Oware Udidi Avọ 2

Whaha Omara nọ Whọ rẹ rọ Wawọ Amọfa

EME EBAIBOL NA O WUHRẸ? “Jọ kohwo kohwo o dhesẹ iruo riẹ via, kẹsena o ve ti wo a jiri eva oma [obọriẹ] ọvo, o gbẹjọ orọ [ẹwawọ kugbe] omọfa ha.”—Ahwo Galesha 6:4.

USE-ABỌ VẸ O RIẸ? Mai ahwo-akpọ ma rẹ gwọlọ rehọ oma mai wawọ amọfa, ẹsejọ ma rẹ rehọ oma mai wawọ ahwo nọ i wo eware te omai hi, rekọ ẹsibuobu ahwo nọ a wo ogaga vi omai, fe vi omai, hayo wo eriariẹ vi omai ma rẹ rọ wawọ oma mai. Oghẹrẹ kpobi nọ o rrọ, ẹwawọ otiọye na o rẹ wha iyẹrẹ iyoma ze. Oyena u re ru nọ ma re ro wo iroro ethọthọ inọ eware nọ ohwo o wo hayo epanọ ọ riẹ eware ru te oye u re dhesẹ nọ o te ohwo. O rẹ sae jẹ wha ihri-eriọ gbe ẹzi omuhrowo ze.—Ọtausiuwoma Na 4:4.

EME WHỌ RẸ SAI RU? Daoma rri omara epanọ Ọghẹnẹ o bi rri owhẹ. Jọ eriwo riẹ ọ kpọ owhẹ evaọ oghẹrẹ nọ who re rri omara. “Eru oma ọye ohwo o re riwẹ, rekọ ỌNOWO na kọ obọ eva.” (1 Samuẹle 16:7) Udu ra, iroro ra, gbe owojẹ ra eye Jihova * ọ rẹ kiẹ riwi rọ riẹ epanọ whọ ghare te, orọnikọ ẹkwoma amọfa nọ ọ rẹ rehọ owhẹ wawo ho. (Ahwo Hibru 4:12, 13) Jihova ọ riẹ ọnyaba ra, yọ ọ gwọlọ nọ who wo ovuhumu onana. Whọ tẹ be hae rọ omara wawọ amọfa ro rri epanọ whọ ghare te, o te lẹliẹ owhẹ wo omorro hayo kare edẹro. Fikiere, rọ omaurokpotọ jẹ uzẹme na rehọ inọ whọ rẹ sae jọ ọgba evaọ eware kpobi hi.—Itẹ 11:2.

Ugogo eware vẹ u fo nọ who re ru re whọ sae jọ ghaghae evaọ aro Ọghẹnẹ? Ọghẹnẹ ọ kẹ Maeka ọruẹaro na ẹgba ẹzi ọfuafo nọ o ro kere inọ: “Whai ahwo, o dhesẹ eware iwoma kẹ owhai no; eme ỌNOWO na ọ jọ obọ rai gwọlọ rekọ re wha ru onọ u kiẹrẹe, wha ve kielele uyoyou, re wha jẹ rehọ oma kpotọ nya lele Ọghẹnẹ rai?” (Maeka 6:8) Who te lele ohrẹ yena, Ọghẹnẹ ọ te sẹro ra. (1 Pita 5:6, 7) Kọ oware ofa jọ o riẹ nọ o rẹ kẹ edẹro vi onana?

[Oruvẹ-obotọ]

[Uwoho nọ o rrọ ẹwẹ-obe avọ 5]

Udu mai Jihova o re rri rọ riẹ epanọ ma ghare te