Ifihlo 2

Jamelana Namazizo Wokuzimadanisa Nabanye

KHUYINI OKUFUNDISWA YIBHAYIBHILI? “Omunye nomunye kufanele aziqale isimilo sakhe. Nengabe silungile, angaba nakho ukuzigqaja ngalokho akwenzileko, ngaphandle kokobana akufanise nokomunye bona wenzeni.”—KwebeGalatiya 6:4.

NGISIPHI ISITJHIJILO? Singathanda ukuzimadanisa nabanye—ngezinye iinkhathi nalabo abanokuncani kunalokho esinakho, kanengi nalabo abanamandla, abanjingileko namtjhana abanamakghono adlula wethu. Kunganandaba bona ngimuphi unobangela, ukuzimadanisa nabanye akukalungi. Senza iphoso ukucabanga bona ukuphumelela komuntu kubonakala ngalokho anakho namtjhana akghona ukukwenza. Kungabangela namazizo wesikhwele nomoya wephaliswano.—UMtjhumayeli 4:4.

KHUYINI ONGAYENZA? Linga ukuziqala ngendlela uZimu akuqala ngayo. Vumela umbonwakhe ube nomthelela endleleni oqala ngayo ipumelelwakho. “Umuntu ubona lokho okubonakala emehlweni; kodwana uJehova, * ubona lokho ihliziyo engikho.” (1 Samuweli 16:7) UJehova ukala ipumelelwakho, ingasi ngokukumadanisa nabanye abantu, kodwana ngokufunda ihliziywakho, nangokuhlola iimcabangwakho, amazizo neenhloso zakho. (KumaHebheru 4:12, 13) UJehova uyakwazi ukulinganiselwa kwakho, ufuna bona nawe ukwazi. Nengabe umeda ipumelelwakho ngokuzimadanisa nabanye, uzokuphetha ngokukghantjha namtjhana uhlale unganeliseki. Ngalokho-ke, kwamukele ngokuzithoba bona ngeze waphuma phambili kikho koke okwenzako.—Iziyema 11:2.

Kuhlekuhle kufuze wenzeni bona wamukeleke emehlweni kaZimu? Waphefumulela umporofidi uMika bona atlole: “Ukutjelile, muntu wephasini, bona khuyini okuhle. Nokobana khuyini uJehova ayifunako kuwe ngaphandle kokobana utjengise ukulunga nomusa wethando, uthande umusa begodu uthobeke ekukhambeni noZimakho?” (Mika 6:8) Nengabe ulandela isilulekweso, uZimu uzokutlhogomela. (1 KaPitrosi 5:6, 7) Ngiliphi ibanga elikhulu lokwaneliseka ongaba nalo?

[Umtlolo waphasi]

[Isithombe ekhasini 5]

UJehova umeda ipumelelwethu ngalokho okuseenhliziyweni zethu