O se ke wa Ipapetša le ba Bangwe
Sephiri 2
O se ke wa Ipapetša le ba Bangwe
KE ENG SEO BEIBELE E SE RUTAGO? “Anke yo mongwe le yo mongwe a hlatsele seo modiro wa gagwe e lego sona, gomme o tla ba le lebaka la go hlalala ka yena ka noši, e sego ka go ipapiša le motho yo mongwe.”—Bagalatia 6:4.
GO NA LE TLHOHLO EFE? Re ka ba re e-na le tshekamelo ya go ipapetša le ba bangwe—ka dinako tše dingwe re ipapetša le bao ba nago le dilo tše dinyenyane go tša rena, gantši re ipapetša le bao ba nago le matla, ba humilego, goba bao ba nago le bokgoni bja go feta bja rena. Go sa šetšwe gore boemo ke bofe, go ipapetša le ba bangwe ga se gwa loka. Ka phošo re umaka gore seo motho a lego sona se ka lekanywa ka seo a nago le sona goba seo a kgonago go se dira. Le gona re ka tsoša maikwelo a lehufa le moya wa phadišano.—Mmoledi 4:4.
O KA DIRA’NG? Leka go itebelela ka tsela yeo Modimo a go lebelelago ka yona. Dumelela pono ya gagwe e tutuetša tsela yeo o swanetšego go itebelela ka yona. “Motho ó bôna se se lebanaxo le mahlô a xaxwe; Morêna Yêna ó bôna pelo.” (1 Samuele 16:7) Jehofa * ga a lekanye seo o lego sona ka go go bapetša le batho ba bangwe, eupša o dira bjalo ka go hlahloba pelo ya gago, go hlahloba dikgopolo, maikwelo le maikemišetšo a gago. (Baheberu 4:12, 13) Jehofa o kwešiša mafokodi a gago gomme o go kgothaletša gore o a hlomphe. Ge o lekanya seo o lego sona ka go ipapetša le ba bangwe, o tla feleletša o ikgodiša goba wa dula o sa kgotsofale. Ka gona, amogela ka boipoetšo gore o ka se atlege dilong ka moka tšeo o di dirago.—Diema 11:2.
O swanetše go dirang gore Modimo a go lebelele o le bohlokwa? O buduletše moporofeta Mika go ngwala gore: “Hee wene motho! O boditšwe se e lexo se se botse, le se Morêna a se nyakaxo xo wene: Ké xo dira tokô, ké xo rata botho; ké xo sepela le Modimo w’axo Ò n’e boipoetšô.” (Mika 6:8) Ge e ba o latela keletšo yeo, Modimo o tla go hlokomela. (1 Petro 5:6, 7) Se ke selo se segolo seo se tlišago kgotsofalo.
[Mongwalo wa tlase]
^ ser. 5 Leina la Modimo bjalo ka ge le hwetšwa ka Beibeleng.
[Seswantšho go letlakala 5]
Jehofa o lekanya seo re lego sona ka go hlahloba seo se lego dipelong tša rena