Ama tupachikusunchu hukpa vidanwanqa
2 YANAPAKUY
Ama tupachikusunchu hukpa vidanwanqa
BIBLIAM NIN: “Sapakamam kikinpa vidanta qawakunan. Sichum allin kaspaqa kikillanpaqchá allin, hukpa vidanwanqa manam tupachikunmanchu”, nispa (Galatas 6:4).
¿IMAM SASACHAWANCHIK? Hukkunapa vidanwanmi tupachikunchik: wakinpiqa wakchakunawan, astawanraqmi apukunawan, kallpasapakunawan otaq yachaysapakunawan. Imayna kaptinpas tupachikuyqa manam allinninchikpaqchu. Wakinpiqa llumpaytam pitapas chanincharuchwan kapuqllanta otaq ruray yachasqallanta qawaspa. Chaymantapas envidiakuyman otaq cheqninakuymanmi wichiykuchwan (Eclesiastes 4:4).
¿IMATAM RURACHWAN? Jehová * Dios qawawasqanchikman hina qawakuspaqa chaninchakusunmi. 1 Samuel 16:7 nisqanman hinam ‘runaqa qawan hawallanta, [Jehová Diosmi] ichaqa qawan sonqonta’. Huk rimaypiqa, Diosqa manam piwanpas tupachiwanchikchu. Payqa chaninchawanchikmi sonqonchikpi hinaspa yuyayninchikpi imayna kasqanchikman hina (Hebreos 4:12, 13). Yachantaqmi imakuna mana ruray atisqanchikta hinaspam munan reqsikunanchikta. Tupachikuspaqa hukkunamantam aswan hatunchakusun otaq sapa kutim hukmanyasqalla tarikusun. Humilde kaspam reqsikusun pipas ñoqanchikmanta imapipas aswan allin kasqanta (Proverbios 11:2).
Hinaptinqa, ¿imataq chaninchachiwanchik Diospa qawasqanman hina? Dios yanapaptinmi willakuq Miqueas qellqarqa: “Tayta Diosqa nisurqankiñam allin kaqkunamantaqa. Mañasurqankiñam qanmanta imam munasqantaqa. Qamqa allin arreglotam ruranayki. Qamqa kuyapayakuytam kuyanayki. Diosnikipaqmi humillakuspa kawsanayki?”, nispa (Miqueas 6:8). Kay niwasqanchikta kasukuptinchikqa, Diosmi cuidawasun (1 Pedro 5:6, 7). ¿Kanmanchu imapas kaymanta astawan kusichiwaqninchik?
[Willakuy]
^ par. 5 Diospa sutin, wakin Bibliapi rikurisqanman hina.
[5 kaq paginapi dibujo]
Jehová Diosqa chaninchawanchikmi sonqonchikpi imayna kasqanchikman hina
