Aua le Faatusatusaina Oe i Isi
Auala e 2
Aua le Faatusatusaina Oe i Isi
O LE Ā LE AʻOAʻOGA A LE TUSI PAIA? “Ia taʻitasi le tagata ma faamaonia po o faapefea ana galuega, ona iai lea o se mea e mitamita ai iā te ia lava, ae aua le faatusatusa atu i le isi tagata.”—Kalatia 6:4.
AISEĀ E FAIGATĀ AI? Tatou te mananaʻo e faatusatusa i tatou i isi. O nisi taimi e faatusatusa i ē e itiiti a latou mea ua maua i lo o i tatou, ae o le tele o taimi e faatusatusa i ē e sili atu ona malolosi, mauʻoa pe talenia foʻi. Po o le ā lava, ae e lē lelei lenā faiga. Ua sesē lo tatou manatu e faapea e iloa le aogā o le tagata, i mea ua ia maua pe mafai ona ia faia. E tatou te ono matauʻa ai ma fia faatautavā.—Failauga 4:4.
O LE Ā E TE FAIA? Ia vaai iā te oe e pei ona silasila le Atua iā te oe. Ona e lagona ai lea, e iai lou aogā. “O le tagata e vaai i le tino, a o Ieova * e vaai i le loto.” (1 Samuelu 16:7) E lē fua e Ieova lou aogā i le faatusatusa o oe i se isi tagata, ae i le silafia o mea o loo i lou loto, ma iloilo ou manatu, lagona ma faanaunauga. (Eperu 4:12, 13) E silafia e Ieova mea e gata mai ai lou mafai, ma ua ia faalaeiau oe e talia lenā tulaga. Pe afai e te fua lou aogā i le faatusatusa o oe i isi, o le a iʻu ina e faualuga pe e te lē malie lava i so o se mea. O lea la, ia lotomaulalo ma ioe e faapea, e lē o mea uma e te faia e te sili ai.—Faataoto 11:2.
O le ā la e tatau ona e fai ina ia e tāua ai i le silafaga a le Atua? Na tusi le perofeta o Mika: “Le tagata e, ua ia fetalai mai iā te oe le mea lelei. O le ā foʻi se mea ua finagalo ai Ieova mai iā te oe, pe e lē o le faia o le mea ua tonu, ia fiafia i le agalelei, ma ia savavali ma lou Atua ma le faamaulalo?” (Mika 6:8) Pe afai e te usitaʻia lenā fautuaga, o le a tausia oe e le Atua. (1 Peteru 5:6, 7) O se māfuaaga sili lenei e tatau ai ona tatou lotomalilie.
[Faaopoopoga i lalo]
^ pala. 5 Le suafa o le Atua o loo taʻua i le Tusi Paia.
[Ata i le itulau 5]
E fua e Ieova lo tatou aogā i mea o loo i o tatou loto