Ṭhalaite U—Ṭhiante Nêksâwrna Do Rawh U
Ṭhalaite U—Ṭhiante Nêksâwrna Do Rawh U
“Mi tin engtia chhân ṭheuh tûr nge ni tih in hriat theih nân in ṭawngka chhuak chu, chia al . . . ni fo rawh se.”—KOL. 4:6.
1, 2. Ṭhiante zînga danglam bîk taka awm chu ṭhalai tam takte’n engtin nge an ngaih a, engvângin nge?
“ṬHIANTE nêksâwrna” tih ṭawngkam hi i hre tawh mai ni lovin, i thiltawn aṭangin eng nge a nih tih pawh i hriat tawh ngei a rinawm. Eng hunah emaw chuan mi tuemawin thil ṭha lo nia i hriat chu ti tûrin a tur tawh mai thei che a ni. Chutiang thil a thlen hian engtin nge i ngaih? Kum 14 mi Christopher-a chuan: “A châng chuan bo daih thei ila ka ti rum rum ṭhîn, a nih loh vêk leh an zînga ka danglam bîk loh nân school-a mi dang zawng zawngte ang ni ve law law ila ka ti ṭhîn,” tiin a sawi.
2 I ṭhiante chuan nasa takin an thunun che em? An thunun che a nih chuan engvângin nge? An zînga len ve i duh vâng a ni thei ang em? Chutiang duhna chu a sual hran lo. Puitling tawhte pawhin chutianga ṭhiante zînga len ve duhna chu an nei a ni. Apui apang mi a tu amahin mi dangte hnâwl nih chu an duh lo. Mahse, thil dik atâna din nghehna chuan mite fak a hlawhtîr reng lo vang che. Isua meuh pawh mite’n an lo hnâwl si a. Chuti chung pawhin, Isua chuan thil dik chu a ti reng ṭhîn. Ṭhenkhatin amah zuia a zirtîrte an lo nih laiin, mi dangte chuan Pathian Fapa chu ‘ngaisâng lovin’ an hmusit a ni.—Is. 53:3.
Ṭhiante Ang Nih Duhna—Eng Angin Nge A Nasat?
3. Engvângin nge ṭhiante nêksâwrna laka tlâwm chu thil pawi tak a nih?
3 A châng chuan, ṭhiante sawisêla awm pumpelh nân anmahni anga awm mai duhna i nei thei a. Chutianga awm mai chu thil pawi tak a ni ang. Kristiante chu “lehlam lehlama vawrh leh len len naupang” ang an ni tûr a ni lo. (Eph. 4:14) Naupangte chu mi dangte’n awlsam takin an thunun thei ṭhîn. Amaherawhchu, ṭhalai i nih angin puitling lam i pan mêk a ni. Chuvângin, Pathian Jehova tehnate hi i ṭhatna tûr a ni tih i rin chuan, chu i rinna milin nung ngei ang che. (Deut. 10:12, 13) Chutianga i nunpui loh chuan, i nunna chungah pawh thu i nei tawh lo tihna a ni ang a. Mi dangte nêksâwrna laka i tlâwm hian, an tân duh duha thunun theih milem ang lek i ni tihna a ni.—2 Petera 2:19 chhiar rawh.
4, 5. (a) Engtin nge Arona chu ṭhiante nêksâwrna laka a tlâwm a, chuta ṭangin eng nge i zir theih? (b) I ṭhiante chuan nawr luih nân che eng nge an tih mai theih?
4 Ṭum khat chu, Mosia unaupa Arona chu ṭhiante nêksâwrna lakah a tlâwm a. Israel fate’n an tâna pathian lem siam tûra an tur khân, a siam ve ta mai a ni. Ani chu mi dâwihzep zawng a ni lo. A hma pawhin Mosia nên Aigupta-a lal thiltithei ber Pharaoa hmaah an ding tawh a. Pathian thuchah chu a hnênah huaisen takin a sawi a ni. Mahse, a chipui Israelte’n an han tur tâkah chuan a tlâwm ta mai a. Ṭhiante nêksâwrna chuan thil a va ti thei tak êm! Arona chuan a ṭhiante nêksâwrna do aiin Aigupta lal hmaa din chu awlsam a ti zâwk a ni.—Ex. 7:1, 2; 32:1-4.
5 Arona thiltawnin a târ lan angin, ṭhiante nêksâwrna chu ṭhalaite emaw, sual lam âwn mite emaw chauhvin an tawng lo. Chu chuan nang ngei pawh tiamin tih tak zeta thil dik ti duhte pawh a nghawng thei a ni. I ṭhiante chuan thil hlauhawm engemaw ti tûra chona te, i chungchâng thu dik lo sawina te, a nih loh leh deusawhna te hmangin thil ṭha lo ti tûra nawr luih che an tum mai thei. Eng ang pawhin lo kal se, ṭhiante nêksâwrna chu do a harsa a. Hlawhtling taka do theih dân chu i thurinte rin ngheh tlatna neih chhoh hi a ni.
“Nangmahni Ngei Infiah Ṭhîn Rawh U”
6, 7. (a) Engvângin nge i thurinte rin nghehna neih chu i tân a pawimawh a, engtin nge rin nghehna i neih theih ang? (b) I rin nghehna thuam ṭha tûrin eng zawhnate nge i inzawh theih?
6 Ṭhiante nêksâwrna do thei tûr chuan i thurin leh i tehna vawnte a dik a ni tih i rin ngheh hmasak phawt a ngai a. (2 Korinth 13:5 chhiar rawh.) Mi zakzum tak i nih pawhin chutiang rin nghehna chuan huaisen tûrin a ṭanpui ang che. (2 Tim. 1:7, 8) Mahse, mi huaisen tak tân pawh a thurinte rin nghehna tak tak a neih loh chuan chûng atâna din ngheh chu a harsa hle thei ang. Chuvângin, engah nge Bible aṭanga thutak i zirte hi a dik ngei a ni tih mahni ngeia i fiah loh vang? Thurin bul berte aṭangin ṭan ang che. Entîr nân, Pathian i ring a, mi dangin Pathian a awm tih an rin nachhan an sawite pawh i hre bawk a ni. Chuti chu, ‘Pathian a awm tih engin nge mi rin nghehtîr?’ tiin inzâwt ang che. Chu zawhna i inzawh chhan chu rinhlelhna tihchhuah nân ni lovin, rinna tihngheh nân a ni zâwk. Chutiang bawkin, heti hian inzâwt rawh, ‘Engtin nge Bible hi Pathian thlarauva thâwk khum ngei a ni tih ka hriat?’ (2 Tim. 3:16) ‘Engvângin nge tûn hi “ni hnuhnûng” a ni tih ka rin tlat?’ (2 Tim. 3:1-5) ‘Engin nge Pathian Jehova tehnate chu ka ṭhatna tûr a ni tih min rintîr?’ tiin.—Is. 48:17, 18.
7 A chhânna hriat loh i hlauh avângin chutiang zawhna chu i inzâwt hreh pawh a ni thei. Mahse, chutiang i nih chuan natna hlauhawm engemaw i lo pai rûk reng i hlauh avânga doctor pan ngam lo ang lek i ni ang! Natna i lo pai rû a nih tâkin, a ṭûl anga i inenkawl theih nân i hriat ngei chu a ngai a ni. Chutiang bawkin, mahnia rin nghehna tlachham nia i inhriat engpawh tâna hma i lâk chu i tân thil ṭha ber a ni.—Tirh. 17:11.
8. Inngaih tlânsan tûra Pathian thupêk zawm a finthlâk tih i rinna i tihngheh theih dân sawi rawh.
8 He entîrna hi han ngaihtuah teh. Bible chuan: “Inngaih hi tlânsan rawh,” tiin a fuih che a. Heti hian inzâwt ang che, ‘Engvângin nge he thupêk zawm hi ka tân a finthlâk?’ tiin. I ṭhiante’n chutiang nungchang an chhawm chhan awm thei zawng zawngte chu ngaihtuah teh. Inngaih hmang mi chuan ‘ama taksa chunga thil a tihsual’ chhan awm thei zawng zawngte chu ngaihtuah bawk rawh. (1 Kor. 6:18) A chhante chu ngaihtuahin, heti hian inzâwt ang che: ‘Eng kawng hi nge zawh atâna ṭha ber? Nungchang bawlhhlawhnaa inhnamhnawih chu a manhla tak zet em?’ tiin. Chu mi chungchâng chu hetianga inzâwtin ngaihtuah ngun lehzual ang che, ‘Nungchang bawlhhlawhnaah inhnamhnawih ta ila engtin nge ka awm dâwn?’ tiin. Atîrah chuan i ṭhian ṭhenkhatte pawm chu i hlawh mai thei; mahse, a hnua i nu leh pate emaw, Kingdom Hall-a unaute emaw nêna in awm tlân hunah engtin nge i awm dâwn? Pathian hnêna ṭawngṭai i tum hunah engtin nge i awm dâwn? School-a i ṭhiante tihlâwm nân maia Pathian hmaa i dinhmun thianghlim hlauh chu i phal tak zet ang em?
9, 10. I thurinte rinna chuan engtin nge ṭhiante nêna in awm hunah inrintâwkna a pêk belh ang che?
9 Tleirâwl chhuak chho i nih chuan, tûn hma zawng aia i thil ‘hriat theihna’ a ṭhan chhoh hunah i awm tihna a ni a. (Hebrai 5:14 chhiar rawh.) Chu mi hun chu Jehova Thuhretute zînga mi pakhat nih hian i tâna awmzia a neih dân tih tak zeta ngaihtuah nân hmang rawh. Chutiang ngaihtuahna chuan i thurin ring nghet tûrin a ṭanpui ang che. Tichuan, ṭhiante nêksâwrna i tawh hunah mahni inring tâwk takin i chhâng lêt nghâl thei ang a. Kristian unaunu pakhat: “Ṭhiante nêksâwrna ka do hian, ka tih awmchhun chu ka nihna hriattîr hi a ni mai. Hei hi ka tân ‘sakhua engemaw mai’ a ni lo. Ka ngaihtuahna, ka thiltum, ka nungchang, leh ka nunna ber a ni,” tia sawitu rilru ang chu i pu ang.
10 Ni e, thil dik nia i hriat atâna ding nghet tûr chuan ṭan lâk a ngai a. (Lk. 13:24) Chutianga ṭan lâk a phu leh phu loh pawh i ngaihtuah mai thei. Mahse hei hi hre reng rawh: Thil dik tih i tumna chungchângah ngaihdam dîl ang emaw, zahpui ang emawa i lan chuan, chu chu miin an hria ang a, an nêksâwr lehzual ang che. Rin nghehna nêna thu i sawi erawh chuan i ṭhiante chuan i rin aia rangin an ṭînsan ang che.—Luka 4:12, 13 nên khaikhin rawh.
‘Ngun Takin Chhâng Rawh’
11. Ṭhiante nêksâwrna atâna inbuatsaihna chuan eng hlâwkna nge a neih?
11 Ṭhiante nêksâwrna dona kawnga rahbi pawimawh tak dang chu ngun taka chhâng tûra inbuatsaihna neih hi a ni. (Thufingte 15:28 chhiar rawh.) Inbuatsaih tih chu dinhmun lo awm thei tûrte ngaihtuah lâwk hi a ni a. A châng chuan, tlêma ngaihtuah lâwkna chuan inchaltauhna lian tak tak pumpelh tûrin a ṭanpui thei che a ni. Entîr nân, school-a i ṭhian ho khatin zial an zu lai i hmu thei a. Zial an ṭheh che ang em? An ṭheh che i beisei a nih chuan, eng nge i tih theih? Thufingte 22:3 chuan: “Mi hmanghria chuan thil ṭha lo chu a hmuhin a biru ṭhîn,” a ti. Kawng dang zawhin anni chu i pumpelh ṭhak thei a ni. Chu chu dâwizep vâng a ni lo; kawng finthlâk tak a ni zâwk.
12. Engtin nge ṭhiante nêksâwrna chu ṭha taka i chhân lêt theih ang?
12 Dinhmun chu pumpelh theih ni lo ta se engtin nge ni ang? Entîr nân i ṭhian chuan âwih harsa ti tak chungin, “Ngaihzâwng pawh i la nei lova maw?” tiin a zâwt che a ni. Tih dân tûr ber chu Kolossa 4:6-a fuihna thu zawm hi a ni: “Mi tin engtia chhân ṭheuh tûr nge ni tih in hriat theih nân in ṭawngka chhuak chu, chia al, khawngaihna tel ni fo rawh se,” tih hi. He Bible chângin a târ lan ang hian, chutiang zawhna i chhân dân chu dinhmun azir a ni ang. Bible hmanga i hrilhfiah chiam a ngai lo mai thei a. Chiang fekfawka chhân mai chu a tâwk thei ang. Entîr nân, ngaihzâwng neih leh neih loh chungchâng zawhna chu, “Nei lo ve,” emaw, “Chu zawng mi mal thil a nih chu,” ti emawin i chhâng thei a ni.
13. Nuih sawhtu ṭhian pakhat chhân nân engvângin nge remhriatna neih a ngaih?
13 Isua chuan chhân tamin kawngro a su dâwn lo tih a hriatin, tawifel takin a chhâng fo ṭhîn. Heroda zawhna phei chu pakhat mah a chhâng lo a ni. (Lk. 23:8, 9) Ngawih chu zawhna pawimawh vak lote chhân lêt dân ṭha a ni fo ṭhîn. (Thuf. 26:4; Thur. 3:1, 7) Kawng lehlamah chuan, mi tuemawin atîrah i thurin—entîr nân, mipat hmeichhiatna lama nungchang ṭha i vawn chhan—chu mak tiin sawi chhe hial mah se, rilru takna engemaw chen a nei tih i hre mai thei a. (1 Pet. 4:4) Chutiang a nih chuan, Bible ṭanchhan i dinhmun chipchiar zâwka hrilh chu a ngai thei ang. A ngai a nih chuan, hlauh avângin hrilh lovin awm suh. “Chhâng tûrin inpeih sa fo ang che.”—1 Pet. 3:15.
14. Dinhmun ṭhenkhatah engtin nge ṭhiante nêksâwrna chu a petu lama remhre taka i lêttîr hlauh theih?
14 Dinhmun ṭhenkhatah chuan nêksâwrna an chungah i lêttîr hlauh thei a ni. Mahse, remhre taka i tih a ngai ang. Entîr nân, school-a i ṭhian chuan zial zu tûra a nawr luih che chuan, a hnênah, “Aih, ka lâwm e,” i tih hnuah, “Zial zu tûr khawp chuan i ṭhing lo asin le!” tiin i sawi belh thei a ni. Nêksâwrna a lama a lêt dân chu i hmu thiam em? Zial i zûk loh chhan hrilhfiah ai chuan, i ṭhian chu zial a zûk chhan ngaihtuah tûrin a tur ta zâwk a ni.
15. Eng hunah nge nêksâwr tum ṭhiante kalsan chu thil inâwm tak a nih a, engvângin nge?
15 Theih tâwp i chhuah hnuah pawh nêksâwrna i hmachhawn zêl a nih chuan engtin nge ni ang? Chutiang a nih chuan, kalsan mai chu a ṭha ber a ni. I awmchilh rei poh leh kawng engemaw taka thil sual tih palh a hlauhawm ting mai ang. Chuvângin, kal sawn daih rawh. Chu chu i tlâwm tihna a ni lo. A nihna takah chuan dinhmun chu i thunun tihna a ni zâwk a. Ṭhiante duh duha pawh kual theih milem ang ni lovin, Pathian Jehova thinlung i tilâwm tihna a ni zâwk a ni.—Thuf. 27:11.
‘A Sâwt Tûr Ruahmanna’ Nei Rawh
16. Engtin nge Kristiana inchhâl ṭhenkhat hnên aṭangin nêksâwrna a lo kal theih?
16 A châng chuan thil ṭha lo tihnaa tel tûra nawrna chu Pathian Jehova chhiahhlawh nia inchhâl ṭhalai dangte hnên aṭang pawhin a lo kal thei a. Entîr nân, chutiang miin a ruahman intihhlimnaah chuan va kalin, huaihawttu puitling tumah an tel ve lo tih va hmu chhuak ta la engtin nge ni ang? A nih loh leh, Kristiana inchhâl ṭhalai pakhat chuan intihhlimnnaah chuan zu rawn keng ta sela, nangmah leh chuta tel mi dangte chu dân anga zu in thei chin in nih si loh chuan engtin nge ni ang? Bible zirtîr i chhia leh ṭha hriatna hman i ngaihna dinhmun dang tam tak a lo chhuak thei a. Kristian tleirâwl pakhat chuan heti hian a sawi a ni: “Ka unaunu nên chuan ṭawngkam ṭha lo tam tak telna cinema hall chu kan chhuahsan a. Kan zînga mi dangte chuan an en zawm a ni. Ka nu leh pate fak chu kan hlawh ngei mai. Mahse, a la en zuitute chu thil sual ti anga an lan avângin kan chungah an thinrim hle,” tiin.
17. Intihhlimnaa tel hunah Pathian tehnate i zawm theih nân eng nge i tih theih?
17 Kan sawi tâk thiltawnin a târ lan angin, Bible zirtîr i chhia leh ṭha hriatna anga thil i tihna chuan dinhmun hrilhhaithlâk takah a awmtîr mai thei che. Mahse, kawng dik nia i hriat chu ti rawh. Intihhlimnaah i kal a nih chuan i beisei anga thil a awm loh huna hawsan thei tûrin inrâlring ang che. Ṭhalai ṭhenkhat chuan phone dawn chu hruai haw hma an ngai tih hriattîrna anga ngai tûrin an nu leh pate nên inrem siamna an nei a. (Sâm 26:4, 5) Chutiang ‘ruahmannate chu a sâwt a ni.’—Thuf. 21:5, NW.
‘I Ṭhat Laiin Hlim Rawh’
18, 19. (a) Engvângin nge Pathian Jehova chuan i hlim a duh tih i chian theih? (b) Engtin nge Pathian chuan ṭhiante nêksâwrna do hnehtute chu a ngaih?
18 Pathian Jehova chuan nun hlimawm chên thei tûrin a siam che a, hlim tûrin a duh bawk che. (Thuhriltu 11:9 chhiar rawh.) I ṭhian tam takte chu “rei lo tê atân sual nawmna hlimpui” mai an ni tih hre reng ang che. (Heb. 11:25) Pathian dik chuan i tân chûng aia ṭha zâwk chu a duhsak che a. Chatuana i hlim chu a duh a ni. Chuvângin, Pathian mithmuha thil sual a ni tih i hriatte ti tûra thlêmna i tawh hian, i laka Pathian Jehova thil phûtte chu atâwpah chuan i ṭhatna tûr a ni tih hre reng ang che.
19 Ṭhalai i nih anga tûna i hriat tûr chu, i ṭhiante pawm i hlawh a nih pawhin, kum engemaw zât a liam hnuah an zînga a tam zâwkte chuan i hming takngial pawh an hre tawh kher lo vang, tih hi a ni. Chu mi nêna inkalh takin, ṭhiante nêksâwrna i do hian, chu chu Pathian Jehova chuan a lo hmu reng a, nangmah leh i rinawmna chu a theihnghilh ngai lo vang. Ani chuan ‘vân tukverhte chu hawngin malsâwmna dawn sên loh khawp hialin a vûr ang che.’ (Mal. 3:10) Chu bâkah, tûna i thil tlâk chham engpawh phuhru tûrin a thlarau thianghlim chu phal takin a pe che a ni. Ni e, Pathian Jehova chuan i ṭhiante nêksâwrna do hneh tûrin a ṭanpui thei che a ni! (w10-E 11/15)
I Hre Chhuak Em?
• Ṭhiante nêksâwrna chuan eng angin nge mi a thunun theih?
• Ṭhiante nêksâwrna dona kawngah engtin nge rin nghehnain a ṭanpui theih che?
• Engtin nge ṭhiante nêksâwrna do tûra i inbuatsaih theih?
• Engtin nge Pathian Jehova’n i rinawmna a ngaihlu tih i hriat?
[Zirlai Atâna Zawhnate]
[Phêk 16-naa milem]
Engvângin nge Arona’n rangkachak bâwng no lem din chu rem a tih?
[Phêk 18-naa milem]
Inrâlring rawh—i sawi tûr chu ngaihtuah lâwk rawh