Joven sira, keta monu ba tentasaun husi kolega sira
Joven sira, keta monu ba tentasaun husi kolega sira
“Koʼalia . . . hodi tau masin uitoan, atu imi bele hatene oinsá imi sei hatán ba ema ida-ida.”—KOL 4:6.
1, 2. Oinsá mak joven barak sente kuandu sira la hanesan ho joven sira seluk? Tanbasá?
KLARU katak imi joven sira hasoru ona tentasaun no susar husi imi-nia kolega sira. Karik ema ida tenta imi atu halo buat ruma neʼebé imi hatene katak sala duni. Oinsá mak imi sente kona-ba neʼe? Christopher, neʼebé ho tinan 14, hatete: “Dala ruma haʼu sente katak haʼu hakarak halai lakon deʼit, se lae haʼu hakarak sai hanesan deʼit ho kolega sira iha eskola. Haʼu la gosta atu sira haree haʼu nuʼudar ema neʼebé la hanesan.”
2 Agora daudauk imi-nia kolega sira-nia hahalok mak domina imi ka lae? Se nuneʼe, tanbasá? Karik ida-neʼe tanba imi hakarak sira atu simu imi ka lae? La sala atu iha hakarak hanesan neʼe. Laʼós joven deʼit, maibé ema boot mós hakarak atu sira-nia kolega simu sira. Kuandu ema la simu ita, ita sente hanesan ema basa ita-nia oin. Tuir loloos, laʼós ema hotu sei gaba ita kuandu ita hamriik metin ba buat neʼebé loos. Jesus mós iha esperiénsia hanesan neʼe. Kuandu nia moris iha rai, nia sempre halo buat neʼebé loos. Maski nuneʼe, ema uitoan halo tuir nia no sai ninia dixípulu, maibé ema barak hakribi Maromak nia Oan, sira “haree nia hanesan folin-laek”.—Isa 53:3.
Tentasaun husi kolega iha forsa duni!
3. Tanbasá mak sala se imi halo tuir deʼit imi-nia kolega sira-nia hahalok?
3 Dala ruma, karik imi hetan tentasaun atu halo tuir imi-nia kolega sira-nia hahalok neʼebé la diʼak tanba imi hakarak atu sira simu imi. Maibé perigu duni atu monu ba tentasaun neʼe. Ema kristaun labele sai hanesan labarik deʼit “neʼebé anin . . . huu bá huu mai”. (Ef 4:14) Dala barak labarik kiʼik sira halo tuir deʼit buat neʼebé ema seluk halo. Maibé, nuʼudar joven, imi besik ona sai ema boot. Tan neʼe, se imi fiar katak Maromak Jeová nia matadalan sira mak diʼak ba imi, moris tuir bá buat neʼebé imi fiar. (Deut 10:12, 13) Se imi la halo tuir, neʼe katak imi lakon kbiit atu kontrola imi-nia moris rasik. Tuir loloos, kuandu imi rende an ba tentasaun atu tuir imi-nia kolega, imi sei sai hanesan boneka iha sira-nia liman.—Lee Roma 6:16.
4, 5. (a) Oinsá mak Aarão rende an ba tentasaun atu halo tuir ninia maluk sira-nia hakarak? Imi bele aprende saida husi ida-neʼe? (b) Saida deʼit mak imi-nia kolega sira bele halo atu tenta imi?
4 Dala ida, Moisés nia maun Aarão monu ba sala hodi halo tuir nia maluk Izraél oan sira-nia hakarak. Kuandu sira hakaʼas nia atu halo maromak ida ba sira, nia halo tuir deʼit. Tuir loloos, Aarão mak ema aten-brani. Antes tempu neʼe, nia hamriik ho Moisés atu koʼalia hasoru Faraó, ema neʼebé kbiit boot liu iha rai-Ejitu. Iha tempu neʼebá Aarão koʼalia ho aten-brani atu fó sai Maromak nia mensajen ba liurai neʼe. Maibé, kuandu nia maluk Izraél sira hakaʼas nia, Aarão rende an. Ida-neʼe hatudu ho klaru katak tentasaun atu halo tuir kolega sira iha forsa boot duni! Fasil liu ba Aarão atu kontra hasoru liurai husi rai-Ejitu duké hasoru tentasaun atu halo tuir ninia maluk sira-nia hakarak.—Êx 7:1, 2; 32:1-4.
5 Aarão nia ezemplu hatudu katak laʼós joven sira deʼit mak hetan tentasaun husi sira-nia kolega, no ida-neʼe mós laʼós deʼit problema ba ema neʼebé ladún iha hakarak atu halo buat neʼebé diʼak. Ema neʼebé hakarak atu halo buat neʼebé loos, inklui mós imi, bele hetan tentasaun husi kolega sira. Imi-nia kolega sira bele book imi atu halo buat neʼebé sala hodi sadik imi, duun imi, ka goza imi. Tentasaun naran deʼit neʼebé mai husi kolega sira dala barak susar atu hasoru. Atu bele hamriik metin, ulukliu imi presiza atu haburas fiar ba buat neʼebé imi aprende husi Bíblia.
“Haree didiʼak imi an . . . koko imi an”
6, 7. (a) Tanbasá mak importante atu fiar ba lia-loos husi Bíblia? Oinsá mak imi bele haburas fiar neʼe? (b) Pergunta saida deʼit mak imi presiza husu ba imi-nia an hodi bele hametin imi-nia fiar?
6 Atu tahan hasoru tentasaun husi kolega sira, ulukliu imi presiza fiar duni katak matadalan neʼebé imi hetan iha Bíblia mak loos. (Lee 2 Korinto 13:5.) Fiar neʼe sei ajuda imi atu hatudu aten-brani, maski karik imi baibain sente taʼuk. (2 Tim 1:7, 8) Tuir loloos, susar mós ba ema neʼebé aten-brani atu apoia buat ruma se nia ladún fiar buat neʼebé nia apoia. Entaun, diʼak atu hakaʼas an hodi hatudu ba imi-nia an katak hanorin neʼebé imi hetan husi Bíblia mak lia-loos duni! Diʼak atu komesa ho hanorin neʼebé simples. Porezemplu, imi iha ona fiar ba Maromak no rona oinsá ema seluk fó sai sira-nia fiar katak Maromak iha. Entaun, husu ba imi-nia an: ‘Saida mak book haʼu atu fiar katak Maromak iha duni?’ Pergunta hanesan neʼe laʼós atu hamosu duvida iha imi-nia laran, maibé atu hametin liután imi-nia fiar. Nuneʼe mós husu ba imi-nia an: ‘Oinsá mak haʼu hatene katak Maromak mak leno Eskritura sira?’ (2 Tim 3:16) ‘Tanbasá mak haʼu fiar katak agora ita moris iha “loron ikus sira”?’ (2 Tim 3:1-5) ‘Saida mak book haʼu atu fiar katak Maromak Jeová nia matadalan sempre lori buat diʼak mai haʼu?’—Isa 48:17, 18.
7 Karik imi lakohi husu pergunta sira hanesan neʼe ba imi-nia an tanba imi taʼuk katak imi sei la hetan resposta. Maibé, ida-neʼe hanesan imi lakohi atu hateke ba ponteiru mina nian iha imi-nia karreta tanba taʼuk atu haree katak ida-neʼe hatudu mina maran ona! Se mina la iha, imi presiza hatene kona-ba neʼe atubele rezolve problema neʼe. Nuneʼe mós, diʼak atu hatene kona-ba imi-nia fiar hodi nuneʼe imi bele hadiʼa se imi-nia fiar seidauk metin.—Apos 17:11.
8. Esplika toʼok oinsá mak imi bele hametin imi-nia fiar katak matenek atu halo tuir Maromak nia ukun-fuan kona-ba hadook an husi sala-foʼer.
8 Hanoin toʼok ezemplu ida. Bíblia haruka imi atu “hadook an husi sala-foʼer”. Entaun, husu imi-nia an: ‘Tanbasá mak matenek atu halo tuir ukun-fuan neʼe?’ Hanoin kona-ba tansá mak imi-nia kolega sira envolve an ho hahalok neʼe. Hanoin mós tansá mak ema neʼebé halo sala-foʼer, tuir loloos, “halo sala hasoru nia isin rasik”. (1 Kor 6:18) Tuirmai, depois hanoin tiha kona-ba buat sira-neʼe, husu ba imi-nia an: ‘Ida neʼebé mak dalan diʼak liu atu laʼo tuir? Hodi envolve an iha hahalok sala-foʼer sei lori buat neʼebé diʼak ka lae?’ Hanoin kleʼan liután, hodi husu imi-nia an: ‘Haʼu sente oinsá se haʼu envolve an iha sala-foʼer?’ Karik ida-neʼe halo imi-nia kolega sira simu imi ba tempu uitoan, maibé tuirmai imi sei sente oinsá kuandu imi hamutuk ho imi-nia inan-aman no maluk kristaun sira iha Reuniaun-Fatin? Imi sei sente oinsá kuandu imi halo orasaun ba Maromak? Imi hakarak duni atu hafoʼer imi-nia relasaun diʼak ho Maromak tan deʼit halo kontente imi-nia kolega eskola?
9, 10. Oinsá mak fiar ba buat neʼebé imi aprende husi Bíblia sei ajuda imi atu nafatin fiar metin kuandu hamutuk ho kolega sira?
9 Iha tempu joven nian, imi-nia kbiit atu hanoin no foti desizaun aumenta ba beibeik se kompara ho tempu neʼebé imi sei kiʼik. (Lee Roma 12:1, 2.) Entaun, uza tempu neʼe atu hanoin didiʼak kona-ba tansá mak importante ba imi atu serbí nuʼudar Testemuña ba Jeová? Hodi hanoin didiʼak kona-ba neʼe sei ajuda imi atu haburas liután imi-nia fiar ba buat neʼebé imi aprende ona husi Bíblia. Nuneʼe, kuandu imi hetan tentasaun husi kolega sira, imi sei bele hatán kedas ho fiar metin. Imi sei sente hanesan irmán klosan ida neʼebé dehan: “Hodi tahan hasoru tentasaun husi kolega sira, neʼe mak oportunidade ba haʼu atubele hatudu sai haʼu-nia fiar ba sira. Ida-neʼe laʼós deʼit kona-ba halo tuir ukun-fuan husi relijiaun ida, maibé neʼe envolve buat hotu iha haʼu-nia moris, inklui haʼu-nia hanoin kona-ba buat morál no planu sira neʼebé haʼu halo.”
10 Sin, imi presiza hakaʼas an atubele hamriik metin ba buat neʼebé imi hatene mak loos. (Lc 13:24) No karik dala ruma imi hanoin: ‘Tansá mak haʼu presiza nafatin hakaʼas an atu hamriik metin?’ La haluha buat tuirmai neʼe: Se imi sente moe atu halo buat neʼebé loos, ema seluk sei hatene kona-ba neʼe, no karik sira sei tenta imi makaʼas liután. Iha parte seluk, se imi koʼalia ho fiar metin, karik ikusmai kolega sira sei para atu tenta imi.—Kompara ho Lucas 4:12, 13.
‘Hanoin kleʼan atu bele hatán’
11. Tanbasá mak diʼak atu prepara nanis antes hetan tentasaun husi kolega sira?
11 Hakat ida tan neʼebé importante atu tahan hasoru tentasaun husi kolega sira mak hodi prepara nanis. (Lee Provérbios 15:28. *) Prepara nanis katak hanoin uluk kona-ba situasaun balu neʼebé karik bele mosu. Dala ruma prepara nanis bele ajuda imi atu hadook an husi diskute-malu. Porezemplu, oinsá se imi haree imi-nia kolega sira hamriik hamutuk no fuma hela sigarru? Karik kuandu imi hakbesik sira, sira sei husu imi atu fuma ka lae? Hodi hatene nanis katak problema neʼe bele mosu, imi bele halo saida? Provérbios 22:3 hatete: “Ema neʼebé matenek haree perigu no buka atu subar nia an.” Karik imi bele hasees an husi situasaun neʼe hodi laʼo fali iha dalan seluk. Ida-neʼe la dehan katak imi taʼuk-teen, maibé neʼe mak hahalok neʼebé matenek.
12. Saida mak dalan diʼak atu hatán kuandu kolega sira goza imi?
12 Maibé, oinsá se imi la bele hasees an husi situasaun ida? Porezemplu, karik kolega ida goza imi hodi husu: “Ó seidauk iha namora ka?” Dalan diʼak ida atu hatán ba pergunta neʼe mak hodi halo tuir konsellu iha Koloso 4:6: “Koʼalia ho laran-diʼak bá, hodi tau masin uitoan, atu imi bele hatene oinsá imi sei hatán ba ema ida-ida.” Hanesan eskritura neʼe hatudu, diʼak atu hatán ba ema tuir situasaun ida-idak. Imi lalika koʼalia naruk hanesan hatoʼo diskursu kona-ba Bíblia. Karik diʼak atu fó deʼit resposta neʼebé badak no klaru. Porezemplu, imi bele hatán ba pergunta neʼe ho liafuan simples hanesan: “Sin, haʼu seidauk,” ka hatete: “Ó la iha direitu atu hatene kona-ba neʼe.”
13. Oinsá mak imi bele uza matenek kuandu imi-nia kolega sira goza imi?
13 Dala ruma Jesus mós fó resposta neʼebé badak kuandu nia hatene katak liafuan neʼebé naruk sei la ajuda atu hadiʼa situasaun ida. Tuir loloos, kuandu Herodes husu buat oioin ba Jesus, Jesus la hatán buat ida. (Lc 23:8, 9) Sin, dala ruma diʼak liu atu nonook deʼit kuandu ema husu pergunta tan hakarak goza ka hatún imi. (Prov 26:4; Ecle 3:1, 7) Iha parte seluk, maski dala ruma ema goza imi, maibé karik imi sente katak nia hakarak duni atu hatene tansá mak imi-nia hanoin kona-ba buat morál la hanesan ema seluk nian. (1 Ped 4:4) Iha situasaun neʼe, imi bele esplika didiʼak kona-ba Bíblia nia hanorin. Entaun, keta dada an tanba sente taʼuk. Sempre prontu hodi “hatán ba ema neʼebé husu” kona-ba imi-nia fiar.—1 Ped 3:15.
14. Oinsá mak imi bele book imi-nia kolega sira-nia hanoin kuandu sira goza imi?
14 Dala ruma, kuandu ema goza imi, karik imi bele husu ka hatete buat ruma ba sira atu book sira-nia hanoin. Maibé importante atu halo ida-neʼe ho respeitu. Porezemplu, se kolega eskola sadik imi atu fuma sigarru, imi bele hatete: “Lae, obrigadu,” no hatutan tan hodi dehan: “Ó hatene ka lae, ida-neʼe la diʼak ba saúde?” Duké imi mak esplika kona-ba tansá imi la fuma, koʼalia hanesan neʼe bele book imi-nia kolega atu hanoin fali kona-ba tansá nia fuma. *
15. Bainhira mak tempu diʼak atu hasees an husi kolega sira neʼebé tenta imi? Tanbasá?
15 Maibé, oinsá se imi-nia kolega sira kontinua atu goza ka tenta imi? Iha situasaun hanesan neʼe diʼak liu atu hasees an deʼit. Se imi la hasees an husi sira, karik ikusmai sira sei book imi atu halo tuir sira-nia hakarak neʼebé sala. Tan neʼe, keta demora, hadook an bá! Hodi halo nuneʼe, neʼe laʼós katak imi lakon ona. Tuir loloos imi mak manán tanba imi la husik sira atu domina imi. Imi la sai hanesan boneka iha sira-nia liman, no imi halo Maromak Jeová nia laran kontente.—Prov 27:11.
Halo ‘planu neʼebé lori rezultadu diʼak’
16. Oinsá mak ema neʼebé dehan katak sira ema kristaun mós bele tenta imi?
16 Dala ruma, tentasaun atu halo buat neʼebé la loos bele mai husi joven sira neʼebé dehan katak sira mak Maromak Jeová nia atan. Porezemplu, se joven kristaun hanesan neʼe mak konvida imi ba festa, no kuandu toʼo festa neʼe mak imi foin hatene katak la iha ema boot ida neʼebé tau matan, saida mak imi sei halo? Ka, oinsá se joven kristaun ida lori tua ba festa, maibé imi balu neʼebé tuir festa neʼe tinan seidauk toʼo atu hemu tua, iha situasaun neʼe, saida mak imi sei halo? Situasaun oioin bele mosu no imi presiza atu halo desizaun tuir imi-nia laran neʼebé hetan ona treinu husi Bíblia. Joven kristaun ida hatete: “Haʼu no haʼu-nia alin-feto husik fatin filme nian tanba filme neʼebé ami haree nakonu ho liafuan aat. Kolega seluk neʼebé ba hamutuk ho ami deside atu tuur hodi nonton nafatin. Ami-nia inan-aman gaba ami tanba ami halo nuneʼe. Maibé, kolega balu neʼebé la sai husi fatin neʼe sai hirus ho ami tanba sira sente katak ami halo sira hanesan ema aat.”
17. Kuandu imi tuir festa ida, saida mak imi bele halo atu bele halo tuir Maromak nia matadalan sira?
17 Hanesan esperiénsia neʼe hatudu, dala ruma susar atu moris tuir imi-nia laran neʼebé treinu ona husi Bíblia. Maski nuneʼe, hakaʼas an nafatin atu halo tuir buat neʼebé imi hatene mak loos. Importante atu prepara nanis. Se imi atu tuir festa ida, diʼak atu prepara nanis kona-ba oinsá atu sai husi festa neʼe se situasaun neʼebé la diʼak mosu. Joven balu halo planu nanis atu telefone inan-aman se sira presiza ajuda atu fila uma sedu. (Sal 26:4, 5) Halo planu hanesan neʼe bele lori “rezultadu neʼebé diʼak”.—Prov 21:5.
“Haksolok bá, iha ó-nia tempu joven”
18, 19. (a) Tanbasá mak imi bele fiar katak Maromak Jeová hakarak imi atu moris kontente? (b) Maromak sente oinsá kuandu imi tahan hasoru tentasaun husi kolega?
18 Maromak Jeová kria ita atu bele haksolok ho ita-nia moris, no nia mós hakarak atu imi joven sira atu sente nuneʼe. (Lee Eclesiastes 11:9. *) La haluha katak maski imi-nia kolega sira haksolok iha sala laran, sira sei “haksolok ba tempu uitoan” deʼit. (Ebr 11:25) Maibé Maromak neʼebé loos hakarak imi atu haksolok ba nafatin, laʼós ba tempu uitoan deʼit. Tan neʼe, kuandu imi hasoru tentasaun atu halo buat ruma neʼebé imi hatene katak sala iha Maromak nia matan, diʼak atu la haluha katak buat neʼebé Maromak Jeová hakarak imi atu halo mak sempre diʼak ba imi agora no iha futuru.
19 Nuʼudar joven, imi presiza komprende katak maski agora imi-nia kolega sira simu imi, maibé tinan barak depois neʼe karik sira barak la hanoin-hetan ona imi-nia naran. Iha parte seluk, kuandu imi tahan hasoru tentasaun husi kolega sira, Maromak Jeová haree ida-neʼe no nia sei nunka haluha imi no imi-nia laran-metin ba nia. Nia sei “loke ba imi . . . odamatan bee nian iha lalehan no [nia] loloos sei fakar ba imi bensaun toʼo imi la falta tan buat ida”. (Mal 3:10) Liután neʼe, nia ho laran-luak haraik espíritu santu ba imi atu taka buat neʼebé imi falta. Sin, imi-nia Aman Jeová bele ajuda duni imi atu la monu ba tentasaun husi imi-nia kolega sira!
[Nota–rodapé]
^ par. 11 Provérbios 15:28: “Ema loos hanoin kleʼan iha nia laran atu bele hatán, maibé ema aat nia ibun hasai buat sira neʼebé aat.”
^ par. 14 Haree parte ho tema “Rencana Tindakan” iha livru Pertanyaan Kaum Muda—Jawaban yang Praktis, Jilid 2, pájina 132 no 133.
^ par. 18 Eclesiastes 11:9: “Haksolok bá, iha ó-nia tempu joven, oh, mane-klosan, no husik bá ó-nia laran lori buat diʼak ba ó iha ó-nia tempu foin-saʼe nian, no laʼo tuir dalan sira neʼebé ó-nia laran hakarak no buat sira neʼebé ó-nia matan haree. Maibé hatene bá katak kona-ba buat sira-neʼe hotu, Maromak neʼebé loos sei tesi lia ba ó.”
Ita hanoin-hetan?
• Tentasaun husi kolega sira iha forsa atu halo saida deʼit?
• Tanbasá mak fiar-metin importante atu la monu ba tentasaun husi kolega sira?
• Oinsá mak imi bele prepara an atu la monu ba tentasaun husi kolega sira?
• Tanbasá mak imi bele fiar katak Aman Jeová hafolin imi-nia laran-metin?
[Pergunta estudu nian]
[Dezeñu iha pájina 8]
Tanbasá mak Aarão halo karau-oan osan-mean?
[Dezeñu iha pájina 10]
Prepara nanis kona-ba buat neʼebé imi sei hatete