Talavou​—Ke ‵Teke Atu Ki Fakamalosiga Ma‵sei Mai Taugasoa

‘Ke faka‵kona otou pati ki te masima ke tumau tena aoga, ko te mea ke iloa ne koutou o tali atu ki so se tino e fesili mai ki a koutou.’​—KOLOSE 4:6.

1, 2. E pefea a lagonaga o talavou e tokouke ki te lotou tu ‵kese mai i nisi tino, kae kaia?

E MAUTINOA eiloa me e seki lagona fua ne koe te fuaiupu tenei “fakamalosiga ma‵sei mai taugasoa” kae ko oti foki eiloa ne pokotia koe i ei. Kāti e isi se taimi ne fakamalosi atu ei se tino ke fai ne koe a mea ma‵sei. E pefea ou lagonaga māfai ko tupu a te mea tenā? E fai mai a Christopher telā ko 14 ana tausaga: “Aku muna loa me ne mafai ne au o fakagalo atu fua i nisi taimi, io me ke fai fua au e pelā mo oku taugasoa i te akoga ko te mea ke mo a ma tu ‵kese au mai i a latou.”

² E mata, e lasi ‵ki a te fakamalosiga a ou taugasoa ki a koe? Kafai e penā loa, kaia? E mata, e fai penā ona ko te mea e manako koe ke talia ne latou a koe? E se ‵se faeloa a te vaegā manakoga tenā. A te ‵tonuga loa, e ma‵nako a tino ma‵tua ke talia foki latou ne olotou taugasoa. E seai eiloa se tino​—foliki io me e matua—⁠e fiafia māfai ko ‵teke atu a tino ki a ia. E tonu, ka se fia‵fia faeloa a nisi tino māfai ko fai ne tatou a te mea tonu. Ne fepaki foki a Iesu mo se vaegā mea penei. Kae ne fai faeloa ne Iesu a te mea tonu. E tiga eiloa ne tau‵tali atu a nisi tino ki a ia kae fai foki mo fai ana soko, ne taku fakamasei ne nisi tino a te Tama a te Atua kae ne ‵kilo atu ki a ia e “pelā eiloa a ia me se mea seai.”​—Isaia 53:3.

E Pefea te Ma‵losi o Fakamalosiga Ma‵sei Mai Taugasoa?

3. Kaia e ‵se ei ke talia ne koe a tulaga o ou taugasoa?

³ I nisi taimi, kāti e tofotofogina koe ke tautali atu ki tulaga o ou taugasoa ko te mea fua ke ‵kalo keatea mai i te sē fia‵fia mai o latou. E mafai eiloa o ‵se a te mea tenā. E se ‵tau o fai a Kelisiano mo fai ne “tama‵liki e peipei ne galu.” (Efeso 4:14) E mafai eiloa o fakamalosigina a tama‵liki ne nisi tino. E pelā me se talavou, ko fanatu eiloa koe i te auala ki te tulaga matua. Tela la, kafai e talitonu koe me i tulaga o Ieova e ‵lei mō koe, e ‵tau eiloa o ola koe e ‵tusa mo tou loto talitonu tenā. (Teutelonome 10:12, 13) Ke fai penā, e ‵tau eiloa o pule atu koe ki tou olaga. A ko te manatu tonu, kafai e talia ne koe a fakamalosiga mai nisi tino, e mafai eiloa o fai koe mo fai te lotou pepe faite telā e mafai o fakatonutonu ne te suā tino.​—Faitau te 2 Petelu 2:19.

4, 5. (a) Ne talia pefea ne Alona a fakamalosiga ma‵sei, kae ne a akoakoga e tauloto ne koe mai i ei? (e) Ne a auala e mafai o fakaaoga ne ou taugasoa ke taumafai o fakamalosi koe ke fai a mea ma‵sei?

⁴ I te taimi e tasi, a te taina o Mose, ko Alona ne talia foki ne ia a fakamalosiga ma‵sei mai i taugasoa. I te taimi ne fakamalosi atu ei a te kau Isalaelu ke faite ne ia se atua mō latou, ne fai eiloa ne  ia. Kae ko Alona e sē se tino mata mataku. Mai mua atu i ei, ne fesoasoani atu a ia ki a Mose i te taimi ne fakafesagai atu ei ki a Falao, te ‵toe tagata malosi eiloa i Aikupito. Ne faipati atu i konā a Alona mo te loto toa, mai i te folafolaatuga o te fekau a te Atua ki a ia. Kae i te taimi ne fakamalosi atu ei ana taina Isalaelu i se auala sē ‵lei, ne talia eiloa ne Alona. Ko oko eiloa i te ma‵losi o fakamalosiga ma‵sei mai i taugasoa! Ne faigofie atu ki a Alona ke ‵teke atu ki te tupu o Aikupito i lō te ‵teke atu ki ana taugasoa.​—Esoto 7:1, 2; 32:1-4.

⁵ E pelā mo te tala o Alona, a fakamalosiga mai taugasoa e se oko atu fua ki talavou, kae e sē se fakalavelave fua mō tino kolā e ma‵nako o fai a mea ma‵sei. A fakamalosiga ma‵sei mai taugasoa e mafai eiloa o pokotia i ei a tino kolā e ma‵nako tonu o fai te mea ‵lei, e aofia i ei a koe. E mafai o faimālō koe ne ou taugasoa ke fai se mea masei mai i te ‵toa atu, ‵losi atu, io me e fakaitaita atu. Faitalia me se a te vaegā fakamalosiga, se mea faigata ke fakafesagai atu ki taugasoa. A te ‵teke atu mo te manuia e kamata eiloa ki te atiakaga o te loto talitonu ki mea e talitonu koe ki ei.

“Ke Sukesuke Ifo Faka‵lei Koutou ki a Koutou Eiloa”

6, 7. (a) Kaia e tāua ei ke fakamaoni aka ne koe ou talitonuga, kae e mafai pefea o fakamalosi aka ne koe? (e) Ne a fesili e mafai o ‵sili ifo ne koe ke fakamalosi aka ei tou loto talitonu?

⁶ Ke ‵teke atu ki fakamalosiga a taugasoa, e ‵tau o fakamaoni aka ne koe me e ‵tonu ou talitonuga mo tulaga. (Faitau te 2 Kolinito 13:5.) Ka fesoasoani atu a te loto talitonu ke loto toa koe, faitalia me ko koe se tino mata mā. (2 Timoteo 1:7, 8) Kae kafai foki eiloa e loto toa se tino, e mafai o faigata ke ‵lago atu a ia ki se mea telā e se talitonu katoatoa a ia ki ei. Tela la, kaia e se taumafai ei koe o fakamaoni aka me i mea kolā ko oti ne akoako atu mai i te Tusi Tapu, ko te munatonu eiloa? Ke kamata eiloa i talitonuga fakavae. E pelā mo tou talitonu ki te Atua kae ne lagona ne koe me e fakaasi mai ne nisi tino a te pogai e fakatuanaki ei latou me e ola tonu a ia. Ia, ke na fesili ifo koe, ‘Se a te mea e fakatalitonu mai ki a au me e ola tonu eiloa te Atua?’ A te pogai o te fesili tenā e se ko te ati aka o te fakalotolotolua kae ke fakamalosi aka ei a te fakatuanaki. I se auala tai ‵pau, fesili ifo ki a koe eiloa, ‘E iloa pefea ne au me i te Tusi Tapu ne fakaosofia ne te Atua?’ (2 Timoteo 3:16) ‘Kaia e talitonu ei au me konei eiloa a “aso fakaoti”?’ (2 Timoteo 3:1-5) ‘Se a te mea e talitonu ei au me i tulaga o Ieova e aoga ki a au?’​—Isaia 48:17, 18.

⁷ Kāti ko fakatalave koe o fesili ifo a vaegā fesili penā, ona ko te mataku i te mea ma se maua ne koe a tali ki ei. Kae e mafai loa o fai a te mea tenā e pelā mo te sē fia kilo atu ki te tane o tau pasikaiti i te mea ma “Masa”! Kafai ko seai ne penitini i te tane, e ‵tau o iloa ne koe ko te mea ke mafai o fai ne koe se faiga ki ei. E penā foki loa, e sili atu i te ‵lei ke onoono koe ki so se feitu telā e vāivāi ei tou loto talitonu.​—Galuega 17:11.

8. Fakamatala mai a te auala e mafai ei o fakamalosi aka tou loto talitonu ne te poto i te fakatonuga a te Atua ke ‵kalo keatea mai i te finalalolagi.

⁸ Mafaufau ki se fakaakoakoga. E fakamalosi mai te Tusi Tapu ke “fakagata a uiga finalalolagi.” Ke fesili ifo eiloa ki a koe, ‘Kaia e ‵lei ei ke fakalogo au ki te fakatonuga tenā?’ Mafaufau ki pogai katoa e aofia i ei ou taugasoa i vaegā amioga penā. Ke mafaufau foki ki pogai kese‵kese e “agasala” ei se tino finalalolagi “ki tona foitino.” (1 Kolinito 6:18) Nei la, ke iloilo aka ne koe a pogai, kae fesili ifo: ‘Se a te ‵toe auala ‵lei ke tautali ki ei? E mata, e aoga a te aofia i amioga fakatauavaga sē ‵tau?’ Ke toe mafaufau faka‵lei ki te mataupu tenā, mai i te fesili ifo, ‘E pefea oku lagonaga māfai ko aofia au i amioga fakatauavaga sē ‵tau?’ Kāti e mafai o talia fakavave koe ne ou nisi taugasoa, kae e pefea ou lagonaga fakamuli māfai ko ‵kau fakatasi koe mo ou mātua io me ko taina Kelisiano i te Kingdom Hall? E pefea ou lagonaga māfai ko taumafai koe o ‵talo atu ki te Atua? E mata, ka fiafia koe o fakaseaoga se tulaga ‵ma i mua o te Atua ko te mea ke fakafiafia atu fua ki ou taugasoa i te akoga?

9, 10. Ka fesoasoani atu pefea tou loto talitonu ke momea aka tou toka i taimi e ‵nofo fakatasi ei koe mo ou taugasoa?

⁹ Kafai ko pilipili atu koe ki te tulaga talavou, ko tu atu eiloa koe i se taimi o te olaga telā ko gasolo aka ki luga a te malosi o tou “mafaufau.” (Faitau te Loma 12:1, 2.) Ke fakaaoga a te vaitaimi tenei ke mafaufau ‵loto me se a te uiga o te fai mo  fai se tokotasi o Molimau a Ieova ki a koe. Ka fesoasoani atu a te vaegā mafaufau ‵loto penā ke fakamalosi aka ei tou loto talitonu ki ou talitonuga. Kae kafai ko fe‵paki koe mo fakamalosiga ma‵sei mai i ou taugasoa, ka mafai eiloa o tali fakavave atu koe mo te loto talitonu. Ka ‵pau eiloa ou lagonaga mo se tuagane talavou Kelisiano e tokotasi, telā e fai mai: “Kafai e ‵teke atu ki fakamalosiga a taugasoa, a te mea fua telā e fai ne au ko te fakailoa atu ki nisi tino a mea e uiga ki a au. E fakaasi atu ne au te tāua o ‘taku lotu’ ki a au. Ko te mea telā e fakavae ki ei oku mafaufauga, fakamoemoega, amioga, mo toku olaga kātoa.”

¹⁰ E tonu, e manakogina a taumafaiga ke tu ‵mautakitaki mō te mea telā e ‵lei. (Luka 13:24) Kae kāti ko mafaufau koe me e mata, e aoga eiloa te mea tenei io me ikai. Kae ke masaua a te mea tenei: Kafai e foliga fanoanoa io me e mā koe i te puke ‵mautakitaki ki te mea ‵lei, ka lavea ne nisi tino a te mea tenā, kae ka momea aka te lotou fakamalosi atu ki a koe. Kae kafai e faipati atu koe mo te loto talitonu, e mafai eiloa o poi koe i te vave o fulitua atu ou taugasoa ki a koe.​—Fakatusa ki te Luka 4:12, 13.

‘Mafaufau Mua ki Pati Kae Koi Tuai o Fai’

11. Ne a mea aoga e maua māfai e fakatoka faka‵lei koe ki fakamalosiga ma‵sei mai taugasoa?

¹¹ A te suā mea tāua e ‵tau o fai ke ‵teke atu ei ki fakamalosiga a taugasoa ko te fakatokatoka faka‵lei ki ei. (Faitau te Faataoto 15:28.) A te toka e fakauiga ki te mafaufau muamua ki tulaga kolā e mafai o ‵sae aka. I nisi taimi, a te mafaufau mua ki tulaga e mafai o fepaki mo koe, e mafai o fesoasoani atu ke ‵kalo keatea mai i se matugā kinauga lasi. E pelā me se mea e tasi, kāti ko lavea ‵mao atu ne koe se potukau o ou taugasoa i te akoga e ‵pusi. E mata, ka fakamalosi atu latou ki a koe ke ‵pusi? Mai i te mafaufau mua ki se fakalavelave penā, ne a au mea ka fai? E fai mai te Faataoto 22:3: “A tino ‵poto e lavea ‵mao ne latou a fakalavelave, tela la, e faka‵mao keatea mai i ei.” Mai i te fanatu i te suā auala, e mafai ei o fakaseke katoatoa atu koe mo te fakalavelave tenā. A te mea tenā e se fakaasi mai i ei a tou mataku; a te mea tenei se auala poto eiloa.

12. Se a te auala poto ke tali atu ki se tino telā e fesili fakaitaita mai?

¹² Kae e a māfai ko se mafai o fakaseke ne koe se fakalavelave? Kāti ko fesili mai se taugasoa mo tena loto sē talitonu, “E a, e seki ‵moe eiloa koe mo se tino?” A te auala e tasi ko te tautali atu ki te fakamalosiga i te Kolose 4:6: “Ke isi se alofa i otou pati e fai sāle, ke faka‵kona foki ki te masima ke tumau tena aoga, ko te mea ke iloa ne koutou o tali atu ki so se tino e fesili mai ki a koutou.” E pelā mo te mea e fakaasi mai i te tusi siki tenei, a te auala e fakafesagai atu ei koe ki se fesili penā, ka faka‵na eiloa ki te fakanofonofoga. E mafai eiloa o se manako koe ki se lauga faka-te-Tusi Tapu. Kāti e lava fua i se tali faigofie kae mautinoa. E pelā me se mea e tasi, mai te tali atu ki te fesili e uiga ki tou seki ‵moe mo se tino, e mafai fua o fai atu koe, “Ao, au e seki ‵moe aka eiloa mo se tino,” io me “A te mea tenā se mea totino eiloa a aku.”

13. Kaia e manakogina ei a te loto malamalama i te taimi telā e tali atu ei ki fesili fakaitaita mai i se taugasoa?

¹³ Ne tuku sāle atu fua ne Iesu se tali toetoe māfai  e mu‵tana fua a mea ‵lei e maua mai i te fai atu o fakamatalaga e uke. A te ‵tonuga loa, i te taimi ne fakafesili ei a ia ne Helota, ne seai eiloa ne pati ne fai atu ne Iesu. (Luka 23:8, 9) A te nofo filemu se auala ‵lei foki ke fakafesagai atu ki fesili fakaitaita. (Faataoto 26:4; Failauga 3:1, 7) I te suā feitu la, e mafai o lavea atu ne koe se tino e fia iloa tonu eiloa ne ia a mea e uiga ki ou talitonuga​—kāti e uiga ki faifaiga fakatauavaga​—⁠ke oko foki eiloa māfai ne faipati sē ‵lei atu a te tino tenā ki a koe i te taimi muamua. (1 Petelu 4:4) I te feitu tenā, e mafai o fakamatala faka‵lei atu tou tulaga telā e fakavae ki te Tusi Tapu. Kafai e penā loa, ke mo a ma taofi aka koe ne te mataku. “Ke toka faeloa o tuku [atu] se tali.”​—1 Petelu 3:15.

14. E mafai pefea o toe fakafoki atu mo te atamai ne koe a fakamalosiga ma‵sei a taugasoa i nisi tulaga?

¹⁴ I nisi tulaga, e mafai o toe fakafoki atu ne koe a olotou fakamalosiga ma‵sei. Kae e ‵tau mo koe o taumafai o fai a te mea tenei mo te atamai. E pelā me se mea e tasi, kafai e taumafai tou taugasoa i te akoga o fai ke talia ne koe te sikaleti, e mafai ne koe o fai atu, “Ikai fakafetai” kae ka oti, ko toe fai atu ei, “Aku muna loa i a koe ko tō poto ke ‵pusi!” E mata, e lavea ne koe a te auala e toe fakafoki atu ei ne koe a te fakamalosiga masei tenā? I lō te faiga o se fakamatalaga ki te pogai e se ‵pusi ei koe, e mafai o fakamalosi atu koe ki tou taugasoa ke toe mafaufau ki te pogai e ‵pusi ei a ia. *

15. Se a te taimi ‵lei ke sasale atu koe keatea mai i ou taugasoa kolā e taumafai o fakamalosi atu koe i se auala masei, kae kaia?

¹⁵ Kae e a māfai e tumau eiloa a fakamalosiga ma‵sei, faitalia au taumafaiga ke ‵teke atu ki ei? I te tulaga tenā, se mea ‵lei ke na sasale atu keatea. Ko te leva o tou nofo atu, ko te momea aka foki o te avanoaga ke gutugutulua koe i nisi auala. Tela la, ke na fanatu keatea koe mai i te tulaga tenā. E mafai eiloa o fai ne koe a te mea tenā e aunoa mo lagonaga i a koe ko takavale. E fakaasi mai i ei me ne pule faka‵lei atu koe ki te tulaga tenā. E seki fai koe mo fai se pepe faite a ou taugasoa, kae ne fai ne koe a te loto o Ieova ke fiafia.​—Faataoto 27:11.

Ke ‘Fai Faka‵lei a Aofaga Aoga’

16. E oko mai pefea a fakamalosiga mai i nisi tino kolā e fai mai i a latou ne Kelisiano?

¹⁶ I nisi taimi e oko mai eiloa a fakamalosiga ke aofia i faifaiga sē ‵lei mai i nisi talavou kolā e fai mai i a latou ne tavini a Ieova. E pelā me se fakaakoakoga, e a māfai e oko atu koe ki se maopoopoga ne fakatoka ne se vaegā tino penā kae fatoa iloa ne koe me e seai se tino matua ke tausi atu ki a latou? Io me e a māfai e aumai ne se talavou telā e fai mai i a ia se Kelisiano a meainu ma‵losi ki se maopoopoga, kae ko koe mo nisi tino i konā ko tō fo‵liki ke inu e ‵tusa mo te tulafono? E mafai o ‵sae aka a tulaga kese‵kese telā ko ‵tau ei o tautali atu koe ki tou loto lagona telā ko oti ne akoakogina ki te Tusi Tapu. E fai mai se talavou Kelisiano e tokotasi: “Ne olo keatea māua mo toku taina mai i se tamunei telā ne aofia i ei a pati ma‵sei e uke. Ne fakaiku aka ne nisi tino i te potukau ke ‵nofo atu loa latou. Ne tavae ne ma mātua a māua ona ko te mea ne fai ne māua. Kae ko nisi tino i te potukau ne kaitaua mai me ne fai ne māua a latou e pelā me ne tino ma‵sei.”

17. Kafai ko kau atu koe ki se maopoopoga, ne a mea e mafai o fai ne koe ke tautali atu ei ki tulaga o te Atua?

¹⁷ E ‵tusa mo mea e fakaasi mai i tala konei, e mafai eiloa o fai ne tou loto lagona telā ne akoakogina ki te Tusi Tapu ke tu atu koe i se tulaga fai fakaa‵tea. Kae ke fai faeloa ne koe te mea tonu. Ke toka koe. Kafai e fanatu koe ki se maopoopoga, ke fakatoka se auala ke fanatu koe keatea māfai ko aofia a mea kolā e seki fakamoemoegina ne koe. Ne lotoma‵lie a nisi talavou ke telefoni atu fua ki  olotou mātua ke ‵mai o puke fakavave atu latou ki te fale. (Salamo 26:4, 5) Ka uke eiloa a ‘mea aoga e maua māfai e fai faka‵lei au aofaga.’​—Faataoto 21:5.

“Ke Fakafiafia Otou Olaga i a Koutou Koi ‵Tupu Aka”

18, 19. (a) Kaia e mafai ei o mautinoa i a koe me e manako a Ieova ke fiafia koe? (e) E pefea a lagonaga o te Atua ki tino kolā e ‵teke atu ki fakamalosiga mai taugasoa ma‵sei?

¹⁸ Ne faite ne Ieova a koe ko te mea ke maua ne koe a te ola, kae e manako a ia ke fiafia foki koe. (Faitau te Failauga 11:9.) Masaua me i mea kolā e fia‵fia ki ei ou taugasoa se “agasala i ne mo taimi” fua. (Epelu 11:25) E manako a te Atua tonu ke maua ne koe se mea telā e sili atu i te mea tenā. E manako a ia ke fiafia koe ki te se-gata-mai. Tela la, kafai e fepaki koe mo se tofotofoga ke fai se mea telā e iloa ne koe me e masei i te kilokiloga a te Atua, masaua me i mea kolā e fai mai a Ieova ke fai ne koe e aoga faeloa ki a koe i se taimi leva.

¹⁹ E pelā me se talavou, e ‵tau o iloa ne koe me kafai foki e maua ne koe te taliaga a ou taugasoa, kafai ko ‵teka atu te fia o tausaga mai te taimi nei, a te tokoukega o latou ka se toe masaua eiloa ne latou tou igoa. E ‵kese mai i ei, kafai e ‵teke atu koe ki ou taugasoa, e iloa ne Ieova te mea tenā, kae ka se mafai eiloa o puli i a ia tou fakamaoni. Ka “‵tala ne [ia] a fakamalama o te lagi kae ‵ligi ifo a vaegā mea ‵lei katoa.” (Malaki 3:10) E sili atu i ei, e tuku mai eiloa ne ia mo te kaimalie a tena agaga tapu ke mafai o fesoasoani mai i so se feitu e vāivāi ei koe. E tonu, e mafai o fesoasoani mai a Ieova ke ‵teke atu koe ki fakamalosiga ma‵sei mai i ou taugasoa!

[Fakamatalaga fakaopoopo]

E Masaua ne Koe?

• Se a te fakamalosiga mai i taugasoa ma‵sei telā e malosi ‵ki?

• Se a te aoga o te loto talitonu i te ‵teke atu ki fakamalosiga ma‵sei mai i taugasoa?

• E mafai pefea o toka koe ke fakafesagai atu ki fakamalosiga mai i taugasoa?

• E iloa pefea ne koe me e fakatāua ne Ieova tou fakamaoni?

[Fesili mo te Sukesukega]

[Ata i te itulau e 18]

Ke fakatoka​—na fakaiku aka mai mua i ei a pati ka fai atu ne koe