Mga Hoben—Ano an Gigibohon Nindo sa Saindong Buhay?
Mga Hoben—Ano an Gigibohon Nindo sa Saindong Buhay?
“An paagi kan sakong mga pagsuntok bakong tanganing sumuntok sa doros.”—1 COR. 9:26.
1, 2. Tanganing ika magin mapanggana mantang nagdadakula pasiring sa pagkaadulto, kaipuhan na ika igwa nin ano?
KUN ika mabaklay sa dalan na dai mo kabisado, ika posibleng magdara nin mapa asin kompas. An mapa makakatabang sa saimo na maaraman kun haen ka asin planohon an aagihan mo. An kompas makakatabang sa saimo na magdanay sa tamang direksion. Minsan siring, an mapa asin kompas parehong mayong pakinabang kun dai mo aram kun pasaen ka. Tanganing dai magparalagawlagaw sana, kaipuhan na aram mo nin eksakto an dudumanan mo.
2 Arog kaiyan an situwasyon mantang ika nagdadakula pasiring sa pagkaadulto. Ika parehong igwa kan masasarigan na mapa asin kompas. An Biblia sarong mapa na makakatabang sa saimo na planohon an tamang dalan nin buhay. (Tal. 3:5, 6) Kun an konsensia mo sinanay nin tama, dakula an ikakatabang kaiyan tanganing ika magdanay sa tamang dalan. (Roma 2:15) Puede iyan na magserbing kompas. Pero, tanganing magin mapanggana an buhay mo, kaipuhan mo man na maaraman kun pasaen ka. Kaipuhan na ika igwa nin espesipikong mga pasohan.
3. Anong mga pakinabang kan pagkaigwa nin mga pasohan an sinambit ni Pablo sa 1 Corinto 9:26?
3 Sinumaryo ni apostol Pablo an mga pakinabang kan pagkaigwa nin mga pasohan asin paghihingoang aboton iyan kan sia magsurat: “An paagi kan sakong pagdalagan bakong daing kasiertohan; an paagi kan sakong mga pagsuntok bakong tanganing sumuntok sa doros.” (1 Cor. 9:26) Kun ika igwa nin mga pasohan, makakadalagan ka sa dalan nin buhay na may kasiertohan. Dai mahahaloy, kakaipuhanon mong gumibo nin nagkapirang importanteng desisyon arog baga kan dapit sa paglilingkod ki Jehova, pagtrabaho, pag-agom, asin pagpamilya. Kun beses, tibaad an pagmate mo garo baga napapaatubang ka sa komplikadong pagpipilian. Alagad kun patienot mo nang plinano an saimong aagihan, na ibinabasar an mga desisyon sa mga katotoohan asin prinsipyo sa Tataramon nin Dios, dai ka masusugotan na magpasiring sa salang direksion.—2 Tim. 4:4, 5.
4, 5. (a) Ano an puedeng mangyari kun ika mayo nin mga pasohan para sa sadiri? (b) Taano an mga desisyon mo ta maninigong huli sa pagmawot na mapaogma an Dios?
4 Kun ika mayo nin mga pasohan para sa sadiri, posibleng marhay na maimpluwensiahan ka kan saimong kairiba asin mga maestra na gibohon an sa heling ninda tama para sa saimo. Siempre, dawa kun ika igwa na nin espesipikong mga pasohan, an nagkapira tibaad magtao pa man giraray nin opinyon. Kun nagdadangog sa mga suhestion ninda, hapota an sadiri mo, ‘An mga pasohan daw na sinasabi ninda makakatabang o makakaolang sa sako na girumdomon an sakong Kaglalang mantang ako hoben pa?’—Basahon an Eclesiastes 12:1.
5 Taano an mga desisyon mo sa buhay ta maninigong huli sa pagmawot na mapaogma an Dios? An sarong dahelan iyo na itinao sa sato ni Jehova an lambang marahay na bagay na nasa sato. (Sant. 1:17) An totoo, an gabos may utang na boot ki Jehova. (Kap. 4:11) Igwa pa daw nin mas marahay na paagi na ikapaheling mo an saimong pasasalamat kisa sa pagsaisip ki Jehova kun ika naggigibo nin mga pasohan? Pag-olayan niato kun anong mga pasohan an kapakipakinabang na aboton asin kun ano an dapat mong gibohon tanganing aboton iyan.
Anong mga Pasohan an Magigibo Mo?
6. Anong pundamental na pasohan an magigibo mo, asin taano?
6 Arog kan nasambitan sa naenot na artikulo, an sarong pundamental na pasohan na magigibo mo iyo na patunayan sa saimong sadiri na totoo an sinasabi sa Biblia. (Roma 12:2; 2 Cor. 13:5) An kairiba mo tibaad naniniwala sa ebolusyon o sa manlaenlaen na falsong doktrina sa relihion huling may mga nagsabi sa sainda na ini an maninigo nindang paniwalaan. Minsan siring, dai mo kaipuhan na arogon an siring na kaisipan kun mapadapit sa saimo mismong mga tinutubod. Girumdoma na gusto ni Jehova na sia paglingkodan mo nin bilog na isip. (Basahon an Mateo 22:36, 37.) Gusto kan satong langitnon na Ama na ika magkaigwa nin pagtubod basado sa ebidensia.—Heb. 11:1.
7, 8. (a) Anong madali sanang aboton na mga pasohan an makakatabang sa saimo na pakosogon an pagtubod mo? (b) Ano an mamamatean mo mantang naaabot mo an nagkapira sa mga pasohan na iyan?
7 Tanganing mapakosog an saimong pagtubod, taano ta dai magkaigwa nin nagkapirang madali sanang aboton na pasohan? An sarong pasohan iyo na mamibi aroaldaw. Tanganing magin espesipiko asin bakong paorootro an pamibi mo, puede mong tandaan o isurat an espesipikong mga nangyari sa bilog na aldaw na gusto mong iiba sa pamibi. Dai paglingawan na sambiton bako sanang an mga kadepisilan na inatubang mo kundi pati an mga bagay na ikinaogma mo. (Fil. 4:6) An saro pang pasohan iyo na basahon an Biblia aroaldaw. Aram mo daw na kun mabasa ka nin mga apat na pahina aroaldaw, matatapos mo an bilog na Biblia sa laog nin saro taon sana? * ‘Maogma an tawo na an pagkaogmang marhay yaon sa ley ni Jehova,’ an sabi kan Salmo 1:1, 2, “asin sa saiyang ley sia nagbabasa nin pahinghing aldaw asin banggi.”
8 An ikatolong madali sanang aboton na pasohan na magigibo mo iyo an pag-andam nin isisimbag sa kada pagtiripon kan kongregasyon. Sa primero, tibaad basahon mo sana an simbag o an sarong teksto. Paghaloyhaloy, puede mong gibohon na pasohan an pagsimbag sa sadiri mong tataramon. An totoo, kada pagsimbag mo, ika nagtatao nin regalo ki Jehova. (Heb. 13:15) Kun naabot mo na an nagkapira sa mga pasohan na ini, matalubo an kompiansa mo siring man an pagpahalaga mo ki Jehova, dangan magigin andam ka nang gumibo nin panghaloyan na mga pasohan.
9. Kun ika bako pang parahayag kan Kahadean, anong panghaloyan na mga pasohan an puede mong gibohon para sa sadiri?
9 Anong panghaloyan na mga pasohan an puede mong gibohon para sa sadiri? Kun ika dai pa nakakapoon na maghulit kan maogmang bareta sa publiko, an puedeng panghaloyan na pasohan iyo na magin parahayag kan Kahadean. Kun maabot mo an kagalanggalang na pasohan na ini, bobooton mo na magin regular asin epektibo, na nungkang pinapalihis an sarong bulan na dai nakakapaglingkod. Bobooton mo man na makanood na gamiton an Biblia sa ministeryo. Mantang ginigibo mo iyan, posibleng marhay na madiskobre mo na mas ikinakaogma mo na an paghuhulit. Dangan puede mong dagdagan an oras na ginagamit mo sa pagharongharong o hingoahon pa ngani na makapagkondukta nin pag-adal sa Biblia. Bilang dai pa bautisadong parahayag, igwa pa daw nin mas marahay na pasohan kisa sa magin kualipikado para sa bautismo asin magin dusay saka bautisadong Saksi ni Jehova Dios?
10, 11. Anong panghaloyan na mga pasohan an magigibo nin bautisadong mga hoben para sa sadiri ninda?
10 Kun ika saro nang bautisadong lingkod ni Jehova, uni an nagkapirang panghaloyan na pasohan na puede mong hingoahon na aboton. Kun minsan, tibaad booton mong magtabang sa mga kongregasyon sa paghuhulit sa teritoryong bihirang gibohon. Tibaad magdesisyon ka man na gamiton an saimong kosog asin marahay na salud sa pag-auxiliary o pagregular payunir. Manampulong ribo na maogmang payunir an masabi sa saimo na an bilog na panahon na paglilingkod nakakakontentong paagi na girumdomon an saimong Kaglalang durante kan saimong pagkahoben. Ini an mga pasohan na magigibo mo mantang ika nakaistar pa sa harong nindo. Makikinabang man an lokal na kongregasyon nindo huli sa paghihingoa mong aboton iyan.
11 An ibang panghaloyan na mga pasohan puedeng magin dahelan na ika makapaglingkod bako sana sa lokal na kongregasyon nindo. Halimbawa, puede kang magplano na maglingkod sa ibang lugar o nasyon na mas dakula an pangangaipo. Tibaad booton mong magtabang sa pagtogdok nin mga Kingdom Hall o pasilidad sa sangang opisina sa ibang mga nasyon. Tibaad makapaglingkod ka pa ngani sa Bethel o magin misyonero o misyonera. Siempre, an enot na importanteng pasohan na kaipuhan mong aboton bago mo magibo an kadaklan sa panghaloyan na mga pasohan na nasambit digdi iyo na magpabautismo. Kun ika bako pang bautisado, pag-isipan mo an kalabot sa paghihingoang aboton an importanteng pasohan na ini sa saimong buhay.
Paghihingoang Aboton an Pasohan na Magpabautismo
12. Ano an dahelan nin nagkapira sa pagpabautismo, asin taano ta bakong igo ini?
12 Paano mo ilaladawan an katuyohan nin bautismo? Tibaad an iniisip nin nagkapira iyo na ikakalikay sinda kaiyan sa paggibo nin kasalan. Tibaad para sa iba sinda maninigong magpabautismo huling nabautismohan na an kairiba ninda. Tibaad gusto nin ibang hoben na mapaogma an mga magurang ninda. Minsan siring, an bautismo bakong kontrata na pupugolan ka sa mga bagay na gusto mong gibohon nin sekreto; ni mapabautismo ka man huling pinipirit ka nin iba. Maninigo kang magpabautismo kun aram mo nang lubos an kalabot sa pagigin Saksi ni Jehova asin kun ika nakakasiertong andam ka na saka gusto mo nang akoon an paninimbagan na ini.—Ecl. 5:4, 5.
13. Taano ta maninigo kang magpabautismo?
13 An sarong dahelan sa pagpabautismo iyo na sinugo ni Jesus an mga parasunod nia na ‘gumibo nin mga disipulo asin bautismohan sinda.’ Sia nagtao man nin halimbawa paagi sa pagpabautismo. (Basahon an Mateo 28:19, 20; Marcos 1:9.) Dugang pa, an bautismo importanteng lakdang para sa mga gustong makaligtas. Pagkasambit dapit sa pagtogdok ni Noe kan arka na nagligtas sa saiya asin sa pamilya nia durante kan Baha, si apostol Pedro nagsabi: “An katimbang kaini nagliligtas na man sa saindo ngonyan, an bautismo, . . . paagi sa pagkabuhay liwat ni Jesu-Cristo.” (1 Ped. 3:20, 21) Pero, ini dai nangangahulogan na an bautismo siring sa insurance policy na makukua mo kun may mangyaring kalamidad. Imbes, ika mapabautismo huling namomotan mo si Jehova asin sia gusto mong paglingkodan nin bilog na puso, kalag, isip, asin kosog.—Mar. 12:29, 30.
14. Taano an nagkapira ta nag-aalangan na magpabautismo, alagad sa ano ka makakasierto?
14 An nagkapira nag-aalangan na magpabautismo huli sa takot na tibaad matiwalag sinda pag-abot nin panahon. Ika daw may siring man na pagkatakot? Kun iyo, an pagkatakot na iyan bako man talagang sala. Iyan puedeng mangahulogan na nasasabotan mo an seryosong paninimbagan na kalabot sa pagigin Saksi ni Jehova. Posible man daw na may iba pang dahelan? Tibaad dai ka pa kombensido na an pamumuhay kaoyon kan mga pamantayan nin Dios iyo an pinakamarahay. Kun arog kaiyan, matatabangan kang magdesisyon kun iisip-isipon mo an maraot na kinaabtan kan mga dai nag-intindi sa mga pamantayan kan Biblia. Sa ibong na lado, puedeng namomotan mo man an mga pamantayan nin Dios alagad mayo kang tiwala sa sadiri na makakaya mong mamuhay oyon dian. An totoo, marahay na senyales iyan, huling ipinapaheling kaiyan na ika mapakumbaba. Total, sinasabi kan Biblia na madaya an puso kan gabos na bakong sangkap. (Jer. 17:9) Alagad puede kang magin mapanggana kun danay kang ‘mag-iingat segun sa tataramon nin Dios.’ (Basahon an Salmo 119:9.) Ano man an mga dahelan mo sa pag-alangan na magpabautismo, kaipuhan mong resolberan an siring na kahaditan. *
15, 16. Paano mo masasabi kun andam ka nang magpabautismo?
15 Pero, paano mo masasabi kun baga andam ka nang magpabautismo? An sarong paagi iyo an paghapot sa sadiri mo: ‘Kaya ko daw na ipaliwanag sa iba an pundamental na katokdoan sa Biblia? Nakikikabtang daw ako sa ministeryo dawa kun an mga magurang ko dai? Naghihingoa daw akong umatender sa gabos na Kristianong pagtiripon? May nagigirumdoman daw akong espesipikong mga pangyayari na linabanan ko an panggigipit nin kairiba? Padagos daw akong maglilingkod ki Jehova dawa kun magpondo an sakong mga magurang asin amigo o amiga? Sinasabi ko daw sa Dios paagi sa pamibi kun gurano kahalaga an relasyon ko sa saiya? Asin ako daw talagang lubos nang nagdusay ki Jehova paagi sa pamibi?’
16 An bautismo sarong lakdang na mabago sa buhay mo, kaya iyan maninigong seryosohon. Ika daw maygurang na tanganing seryosong pag-isipan an lakdang na ini? Kalabot sa pagkamaygurang bako sanang an makapagtao nin magagayon na pahayag sa plataporma o kahangahangang simbag durante nin pagtiripon. Kaipuhan na an saro nakakapagdesisyon basado sa pakasabot sa mga prinsipyo sa Biblia. (Basahon an Hebreo 5:14.) Kun ika nasa peryodo nin buhay na magigibo mo na iyan, kun siring, nasa atubangan mo an pinakadakulang pribilehio sa gabos—an maglingkod ki Jehova nin bilog na puso asin mamuhay sa paagi na ika talagang dusay sa saiya.
17. Ano an makakatabang sa saimo na maatubang an kasakitan na tibaad mangyari pagkatapos kan bautismo mo?
17 Pagkatapos tolos kan bautismo, ika puedeng entusiastikong marhay sa paglilingkod sa Dios. Pero, dai mahahaloy, ika tibaad mapaatubang sa kasakitan na puedeng bumalo sa pagtubod asin pakatagal mo. (2 Tim. 3:12) Dai mo pag-isipon na kaipuhan mong atubangon nin solo an mga pagbalong ini. Hagadon an sadol kan mga magurang mo. Magpatabang sa mga maygurang sa kongregasyon. Papagdanayon an pakikiamigo o pakikiamiga sa mga masuportar sa saimo. Nungkang paglingawan na si Jehova nagmamakolog sa saimo, asin tatawan ka nia nin kosog na kaipuhan tanganing maatubang an ano man na problemang tibaad maglataw.—1 Ped. 5:6, 7.
Paano Mo Mahihingoang Aboton an mga Pasohan Mo?
18, 19. Paano ka makikinabang sa pagsiyasat kun ano an prioridad mo?
18 Sa ibong kan saimong pinakamarahay na intension, sa pagmate mo daw pirmeng kulang nanggad an panahon tanganing magibo an gusto asin kaipuhan mong gibohon? Kun iyo, dapat mong siyasaton kun ano an prioridad mo. Sa pag-ilustrar: Kumua ka nin plastik na balde asin maglaag ka dian nin nagkapirang dakulang gapo. Dangan panoon mo iyan nin baybay. Igwa ka na nin balde na pano nin gapo asin baybay. Halean mo iyan nin laog. Pagkatapos, enot mong ibalik an baybay, dangan probaran mo nang ibalik an mga gapo. Dai na husto? Iyan huli ta enot mong ilinaag an baybay.
19 Napapaatubang ka sa kaagid na kadepisilan sa paggamit nin panahon. Kun eenoton mo an mga bagay na arog kan pag-aling-aling, kulang ka na nanggad nin panahon para sa mahahalagang bagay—an espirituwal na mga aktibidad. Alagad kun susundon mo an konseho kan Biblia na ‘siertohon an orog na mahalagang mga bagay,’ maheheling mo na ika may panahon para sa intereses kan Kahadean pati sa tama sanang pag-aling-aling.—Fil. 1:10.
20. Kun makaeksperyensia ka nin kahaditan asin pagduda mantang pinagmamaigotan mong aboton an mga pasohan mo, ano an maninigo mong gibohon?
20 Mantang pinagmamaigotan mong aboton an mga pasohan mo, kaiba na an pagpabautismo, tibaad kun beses makaeksperyensia ka nin kahaditan asin pagduda. Kun mangyari iyan, “ipasa mo ki Jehova mismo an pagabat sa saimo, asin sia mismo matabang sa saimo.” (Sal. 55:22) Ngonyan, igwa ka nin oportunidad na makikabtang sa pinakamaogma asin pinakamahalagang gibohon sa kasaysayan nin tawo, an pambilog na kinaban na paghuhulit asin pagtotokdo. (Gibo 1:8) Puede mong pilion na magin paramasid sana mantang ginigibo ini nin iba. O puede kang makikabtang dian. Dai ka mag-alangan na gamiton an saimong talento tanganing suportaran an intereses kan Kahadean. Nungka mong pagbabasolan an paglilingkod sa “saimong Kaglalang sa mga aldaw na hoben ka pa.”—Ecl. 12:1, An Banal na Biblia, [edisyon na 2007].
[Mga Nota sa Ibaba]
^ par. 7 Helingon an The Watchtower na Agosto 1, 2009, pahina 15-18.
^ par. 14 Para sa tabang dapit digdi, helingon an kapitulo 34 kan librong Questions Young People Ask—Answers That Work, Volume 2.
Ano an Isisimbag Nindo?
• Taano ta maninigo kang magkaigwa nin mga pasohan?
• Ano an nagkapirang pasohan na kapakipakinabang na aboton?
• Ano an kalabot sa paghihingoang aboton an pasohan na magpabautismo?
• Paano an pagsiyasat sa kun ano an prioridad mo makakatabang sa saimo na aboton an mga pasohan mo?
[Mga Hapot Para sa Pag-adal]
[Ritrato sa pahina 13]
Igwa ka daw nin pasohan na basahon an Biblia aroaldaw?
[Ritrato sa pahina 15]
Ano an makakatabang sa saimo na aboton an pasohan na magpabautismo?
[Ritrato sa pahina 16]
Ano an manonodan mo sa ilustrasyon na ini?