Oblahii Kɛ Oblayei Bibii—Mɛni Nyɛkɛ Nyɛwala Baafee?
Oblahii Kɛ Oblayei Bibii—Mɛni Nyɛkɛ Nyɛwala Baafee?
“Nɔmɔ ni minɔɔ nɛɛ, jeee kɔɔyɔɔ mikɛnɔɔ.”—1 KOR. 9:26.
1, 2. Bɔni afee ni oye omanye beni odaa kɛtsɔɔ onukpa lɛ, mɛni esa akɛ oná?
KƐ́ OOFÃ gbɛ kɛmiitsɔ gbɛ ko ní oleee nɔ lɛ, ekolɛ obaakɔ map kɛ kɔmpasi. Map lɛ baaye ebua bo ni ole he ni oshɛ, ni ebaaye ebua bo koni ona he ni esa akɛ otsɔ. Kɔmpasi lɛ baaye abua bo koni okalaaje. Shi kɛ́ oleee he ni oyaa lɛ, no lɛ map lɛ kɛ kɔmpasi lɛ he baŋ sɛɛnamɔ kɛhaŋ bo. Bɔni afee ni okakpa shi kɛkɛ lɛ, esa akɛ ole he tuuntu ní oyaa.
2 Okɛ shihilɛ ni tamɔ nakai nɔŋŋ kpeɔ beni odaa kɛtsɔɔ onukpa lɛ. Oyɛ map kɛ kɔmpasi ni obaanyɛ omu ofɔ̃ nɔ. Biblia lɛ ji map ni baanyɛ aye abua bo ni ona gbɛ ni esa akɛ otsɔ nɔ. (Abɛi 3:5, 6) Kɛ́ otsɔse ohenilee jogbaŋŋ lɛ, ebaanyɛ eye ebua bo koni oya nɔ onyiɛ gbɛ kpakpa nɛɛ nɔ. (Rom. 2:15) Ebaanyɛ etsu nii tamɔ kɔmpasi. Shi kɛ́ obaaye omanye yɛ wala gbɛ ni onyiɛ nɔ lɛ mli lɛ, esa akɛ ole he tuuntu ní oyaa hu. Esa akɛ okɛ otii pɔtɛi komɛi amamɔ ohiɛ.
3. Mɛɛ gbɛ nɔ Paulo wiemɔi ni yɔɔ 1 Korintobii 9:26 lɛ haa wɔnaa akɛ sɛɛnamɔ yɛ he akɛ wɔkɛ otii aaamamɔ wɔhiɛ?
3 Bɔfo Paulo wie sɛɛnamɔi ni yɔɔ he ákɛ akɛ otii aaamamɔ hiɛ, ni abɔ mɔdɛŋ ashɛ he lɛ he beni eŋma akɛ: “No hewɔ lɛ foi ni midaa nɛɛ, midaaa lɛ kɛkɛ ni oti emaaa mihiɛ; nɔmɔ ni minɔɔ nɛɛ, jeee kɔɔyɔɔ mikɛnɔɔ.” (1 Kor. 9:26, Ga Biblia hee) Kɛ́ otii pɔtɛi komɛi mamɔ ohiɛ lɛ, no haŋ oda foi kɛkɛ. Etsɛŋ ehe baahia ni okpɛ oyiŋ yɛ jamɔ, nitsumɔ, gbalashihilɛ, weku kɛ nibii krokomɛi ni he hiaa lɛ ahe. Bei komɛi lɛ, ekolɛ obaanu he tamɔ nɔ ni onaaa nɔ ni ohala akɛ obaafee. Shi kɛ́ oje mra odamɔ anɔkwalei kɛ shishitoo mlai ni yɔɔ Nyɔŋmɔ Wiemɔ lɛ mli lɛ nɔ okpɛ oyiŋ yɛ gbɛ ni esa akɛ okɔ lɛ he lɛ, oduŋ gbɛ.—2 Tim. 4:4, 5.
4, 5. (a) Kɛ́ okɛ otii mamɔɔɔ ohiɛ lɛ, mɛni baanyɛ aba? (b) Mɛni hewɔ esa akɛ oha shwelɛ ni oyɔɔ akɛ osa Nyɔŋmɔ hiɛ lɛ akudɔ otii ni okɛmamɔɔ ohiɛ lɛ?
4 Kɛ́ okɛ otii pɔtɛi komɛi mamɔɔɔ ohiɛ lɛ, otipɛŋfoi lɛ kɛ otsɔɔlɔi lɛ baanyɛ akɔne oyiŋ koni ofee nɔ ni amɛsusuɔ akɛ no hi kɛha bo. Eji anɔkwale akɛ, kɛ́ otii pɔtɛi komɛi mamɔ ohiɛ po lɛ, amɛteŋ mɛi komɛi baanyɛ atsɔɔ bo nɔ ni amɛsusuɔ akɛ no esa akɛ ofee. Kɛ́ amɛtsɔɔ bo nɔ ni amɛsusuɔ lɛ, bi ohe akɛ, ‘Ani otii ni amɛsumɔɔ ni mikɛmamɔ mihiɛ lɛ baaye abua mi koni makai mi-Bɔlɔ lɛ yɛ miblahiiaŋ, loo ebaaha majie mijwɛŋmɔ kɛjɛ nakai feemɔ nɔ?’—Nyɛkanea Jajelɔ 12:1.
5 Mɛni hewɔ esa akɛ oha shwelɛ ni oyɔɔ akɛ osa Nyɔŋmɔ hiɛ lɛ akudɔ otii ni okɛmamɔɔ ohiɛ yɛ oshihilɛ mli lɛ? Yiŋtoo kome ji akɛ nibii kpakpai fɛɛ ni wɔyɔɔ lɛ jɛ Yehowa ŋɔɔ. (Yak. 1:17) Yɛ anɔkwale mli lɛ, esa akɛ mɔ fɛɛ mɔ ada Yehowa shi. (Kpoj. 4:11) Gbɛ ni hi fe fɛɛ ni obaanyɛ otsɔ nɔ ojie hiɛsɔɔ kpo otsɔɔ Yehowa ji ni okɛ otii ni woɔ ehiɛ nyam aaamamɔ ohiɛ. Nyɛhaa wɔsusua otii ni kɛ́ wɔtiu sɛɛ lɛ wɔbaaná he sɛɛ, kɛ nɔ ni esa akɛ wɔfee koni wɔshɛ he lɛ he.
Mɛɛ Otii Obaanyɛ Okɛmamɔ Ohiɛ?
6. Mɛɛ oti obaanyɛ okɛma ohiɛ klɛŋklɛŋ kwraa, ni mɛni hewɔ?
6 Taakɛ atsĩ tã yɛ nikasemɔ ni tsɔ hiɛ lɛ mli lɛ, oti ko ni esa akɛ okɛma ohiɛ klɛŋklɛŋ kwraa ji, ní bo diɛŋtsɛ otao ni ona akɛ nɔ ni Biblia lɛ wieɔ lɛ ji anɔkwale. (Rom. 12:2; 2 Kor. 13:5) Ekolɛ otipɛŋfoi lɛ heɔ sutsakemɔ tsɔɔmɔ lɛ loo apasa jamɔ tsɔɔmɔi srɔtoi lɛ amɛyeɔ akɛni akɛɛ amɛ akɛ nomɛi ji nibii ni esa akɛ amɛhe amɛye lɛ hewɔ. Shi esaaa akɛ oheɔ nɔ ko oyeɔ akɛni mɛi komɛi miisumɔ ni ohe oye kɛkɛ lɛ hewɔ. Kaimɔ akɛ Yehowa miisumɔ ni okɛ ojwɛŋmɔ muu lɛ fɛɛ asɔmɔ lɛ. (Nyɛkanea Mateo 22:36, 37.) Wɔŋwɛi Tsɛ lɛ miisumɔ ni oná nɔmimaa yɛ ohemɔkɛyeli lɛ he.—Heb. 11:1.
7, 8. (a) Mɛɛ otii komɛi ni obaanyɛ oshɛ he yɛ be kukuoo mli baaye abua bo ní owaje ohemɔkɛyeli lɛ? (b) Beni oshɛɔ otii ni obaanyɛ oshɛ he yɛ be kukuoo mli nɛɛ ekomɛi ahe lɛ, mɛni baanyɛ ajɛ mli kɛba?
7 Bɔni afee ni owaje ohemɔkɛyeli lɛ, mɛni hewɔ okɛ otii komɛi ni obaanyɛ oshɛ he yɛ be kukuoo mli mamɔɔɔ ohiɛ? Oti kome ni obaanyɛ okɛma ohiɛ ji ni osɔle daa gbi. Bɔ ni afee ni okɛ wiemɔ kometoo lɛ nɔŋŋ akatsu nii daa yɛ osɔlemɔ mli, ni onyɛ owie nibii pɔtɛi ahe lɛ, obaanyɛ oha nibii pɔtɛi komɛi ni tee nɔ yɛ gbi lɛ mli ni obaasumɔ ni otsĩ tã yɛ osɔlemɔ mli lɛ ahi ojwɛŋmɔ mli, loo ŋmalamɔ nakai nibii lɛ oshwie shi. Bɔɔ mɔdɛŋ koni oŋmala naagbai ní okɛkpe yɛ gbi lɛ mli, kɛ nibii ni oná he miishɛɛ lɛ hu. (Fil. 4:6) Oti kroko ni obaanyɛ okɛma ohiɛ ji, Biblia lɛ ni oookane daa gbi. Ani ole akɛ kɛ́ okane baafai ejwɛ daa gbi lɛ, obaagbe Biblia muu lɛ fɛɛ kanemɔ naa yɛ afi kome mli? * Lala 1:1, 2 lɛ kɛɔ akɛ: ‘Ajɔɔ gbɔmɔ ni mii shɛɔ Yehowa mla lɛ he, ni emla lɛ he nɔŋŋ ejwɛŋɔ shwane kɛ nyɔɔŋ.’
8 Oti ni ji etɛ ni obaanyɛ okɛ be kukuoo ashɛ he ji, ohe ni ooosaa koni onyɛ oha sane hetoo yɛ asafoŋ kpee fɛɛ kpee shishi. Klɛŋklɛŋ lɛ, ekolɛ obaasumɔ ni okane hetoo lɛ kɛjɛ wolo lɛ mli tɛ̃ɛ, loo okane ŋmalɛ ko. Sɛɛ mli lɛ, obaanyɛ okɛfee oti ni ma ohiɛ akɛ obaaha sane hetoo yɛ bo diɛŋtsɛ owiemɔ mli. Be fɛɛ be ní obaaha sane hetoo lɛ, no tsɔɔ akɛ okɛ afɔle miiha Yehowa. (Heb. 13:15) Kɛ́ onyɛ oshɛ otii nɛɛ ekomɛi ahe lɛ, ebaaha hekɛnɔfɔɔ ni oyɔɔ lɛ mli awa, ni hiɛsɔɔ ni oyɔɔ kɛha Yehowa lɛ baaya hiɛ, ni no baaha onyɛ okɛ otii ni obaanyɛ oshɛ he yɛ be kplaŋŋ mli amamɔ ohiɛ.
9. Kɛ́ ojeee Maŋtsɛyeli shiɛlɔ lɛ, mɛɛ otii ni obaanyɛ oshɛ he yɛ be kplaŋŋ mli obaanyɛ okɛmamɔ ohiɛ?
9 Mɛɛ otii ni obaanyɛ oshɛ he yɛ be kplaŋŋ mli obaanyɛ okɛmamɔ ohiɛ? Kɛ́ ojeee shiɛlɔ ni abaptisiko lɛ, obaanyɛ okɛ Maŋtsɛyeli shiɛlɔ ni obaatsɔ lɛ afee oti ni obaasumɔ ni oshɛ he yɛ be kplaŋŋ mli. Kɛ́ onyɛ oshɛ oti ni yɔɔ nyam nɛɛ he lɛ, obaasumɔ ni ofee lɛ daa yɛ gbɛ ni mɔɔ shi nɔ, ní ofooo mli nyɔɔŋ kome po. Agbɛnɛ hu, obaasumɔ ni okɛ Biblia lɛ atsu nii yɛ shiɛmɔ nitsumɔ lɛ mli. Beni ofeɔ nakai lɛ, ekolɛ obaayɔse akɛ shiɛmɔ nitsumɔ lɛ ŋɔɔ waa. Ni enɛ baanyɛ aha okɛ be babaoo atsu shĩa kɛ shĩa shiɛmɔ nitsumɔ lɛ, loo obɔ mɔdɛŋ po akɛ obaafee Biblia mli nikasemɔ. Ákɛ shiɛlɔ ni abaptisiko lɛ lɛ, oti ni sa jogbaŋŋ ni obaanyɛ okɛma ohiɛ ji ni oshɛ taomɔ nii kɛha baptisimɔ lɛ he, ni obatsɔ Yehowa Nyɔŋmɔ he Odasefonyo ni ejɔɔ ehe nɔ, ní abaptisi lɛ.
10, 11. Mɛɛ otii ni abaanyɛ ashɛ he yɛ be kplaŋŋ mli oblahii kɛ oblayei ni abaptisi amɛ lɛ baanyɛ amɛkɛmamɔ amɛhiɛ?
10 Kɛ́ oji Yehowa tsulɔ ni abaptisi lɛ momo lɛ, naa otii komɛi ni obaanyɛ oshɛ he yɛ be kplaŋŋ mli. Ekolɛ obaasumɔ akɛ oshiɛ yɛ shikpɔŋkuku ko ni afɔɔɔ mli nitsumɔ lɛ mli kɛye obua asafoi komɛi yɛ be kɛ beaŋ. Agbɛnɛ hu, obaanyɛ okɛ ohewalɛ kɛ gbɔmɔtsoŋ hewalɛ kpakpa ni oyɔɔ lɛ atsu nii akɛ gbɛgbalɔi awalɔ, loo daa gbɛgbalɔ. Gbɛgbalɔi akpei nyɔŋmai abɔ ni yɔɔ miishɛɛ lɛ baakɛɛ bo akɛ be fɛɛ sɔɔmɔ nitsumɔ lɛ ji gbɛ ko ni haa mɔ tsui nyɔɔ emli, ní obaanyɛ otsɔ nɔ okai o-Bɔlɔ lɛ yɛ oblahiiaŋ. Enɛɛmɛi ji otii komɛi ni obaanyɛ oshɛ he beni okɛ ofɔlɔi yɔɔ po. Asafo mli ni oyɔɔ lɛ hu baaná otii nɛɛ ahe ni oooshɛ lɛ he sɛɛ.
11 Otii komɛi yɛ ni obaanyɛ oshɛ he yɛ be kplaŋŋ mli ni jeee asafo mli ni oyɔɔ lɛ pɛ baaná he sɛɛ. Ákɛ nɔkwɛmɔnɔ lɛ, obaanyɛ oto gbɛjianɔ koni oyasɔmɔ yɛ he kroko, loo maŋ kroko ni hiamɔ yɔɔ jɛmɛ lɛ nɔ. Ekolɛ obaasumɔ ni oye obua ni amamɔ Maŋtsɛyeli Asai, loo nitsumɔhe niji yɛ maŋsɛɛ. Obaanyɛ oyasɔmɔ po yɛ Betel, loo otsɔ maŋsɛɛ sanekpakpa shiɛlɔ. Anɔkwa sane ji akɛ, dani ooonyɛ oshɛ otii nɛɛ ateŋ babaoo he lɛ, oti klɛŋklɛŋ ni esa akɛ oshɛ he ji ni oha abaptisi bo. Kɛ́ abaptisiko bo lɛ, susumɔ nɔ ni ebiɔ ni ofee koni oshɛ oti ni he hiaa waa yɛ oshihilɛ mli nɛɛ he.
Bɔni Ooofee Oshɛ Baptisimɔ He
12. Mɛni ji yiŋtoi komɛi ahewɔ ni mɛi komɛi haa abaptisiɔ amɛ, ni mɛni hewɔ yiŋtoi nɛɛ pɛ kɛkɛ faaa lɛ?
12 Kɛ́ abi bo akɛ mɛni ji yiŋtoo ni yɔɔ baptisimɔ sɛɛ lɛ, mɛni obaakɛɛ? Ekolɛ mɛi komɛi baasusu akɛ, no baabu amɛhe koni amɛkafee esha. Ekolɛ mɛi krokomɛi baanu he akɛ esa akɛ amɛha abaptisi amɛ akɛni amii amɛtipɛŋfoi lɛ anu lɛ hewɔ. Gbekɛbii krokomɛi hu baasumɔ ni abaptisi amɛ koni amɛkɛsa amɛfɔlɔi ahiɛ. Shi baptisimɔ jeee kpaŋmɔ ko ni tsĩɔ onaa koni okafee nɔ ko ni yɛ otsui mli lɛ obaasumɔ ní ofee; ni asaŋ esaaa akɛ ohaa abaptisiɔ bo akɛni mɛi krokomɛi miinyɛ onɔ ni ofee nakai lɛ hewɔ. Esa akɛ oha abaptisi bo be mli ni onu nɔ ni Yehowa Odasefonyo ni oootsɔ lɛ ji lɛ shishi jogbaŋŋ, kɛ beni bo diɛŋtsɛ oyiŋ etsɔ akɛ obaanyɛ ohi shi yɛ obaptisimɔ lɛ naa, ni oosumɔ ni otsu sɔ̃i ni no kɛfɔ̃ɔ onɔ lɛ ahe nii lɛ.—Jaj. 5:3, 4.
13. Mɛni hewɔ esa akɛ oha abaptisi bo?
13 Yiŋtoo kome hewɔ ni esa akɛ oha abaptisi bo ji akɛ, Yesu fã esɛɛnyiɛlɔi lɛ ní ‘amɛfee kaselɔi, ni amɛbaptisi amɛ.’ Agbɛnɛ hu, eha abaptisi lɛ ni ekɛfee nɔkwɛmɔnɔ. (Nyɛkanea Mateo 28:19, 20; Marko 1:9.) Kɛfata he lɛ, baptisimɔ ji nɔ ko ni he hiaa waa ni esa akɛ mɛi ni miisumɔ ni ahere amɛyiwala lɛ afee. Beni bɔfo Petro wie adeka ni Noa kpɛ ni akɛhere Noa kɛ eweku lɛ yiwala yɛ Nu Afua lɛ mli lɛ he sɛɛ lɛ, ekɛɛ akɛ: “No nɔŋŋ agbɛnɛ ehereɔ wɔ hu wɔyiwala yɛ baptisimɔ ni akɛ no to he okadi lɛ mli, . . . kɛtsɔ Yesu Kristo shitee lɛ nɔ.” (1 Pet. 3:20, 21) Shi enɛ etsɔɔɔ akɛ baptisimɔ tamɔ inshɔɔransi ko ni aheɔ atoɔ oshara ko. Yɛ no najiaŋ lɛ, esa akɛ oha abaptisi bo yɛ suɔmɔ ni oyɔɔ kɛha Yehowa, kɛ agbɛnɛ akɛni oosumɔ ni okɛ otsui fɛɛ, osusuma fɛɛ, ojwɛŋmɔ fɛɛ, kɛ onyɛmɔ fɛɛ asɔmɔ lɛ lɛ hewɔ.—Mar. 12:29, 30.
14. Mɛni hewɔ ekolɛ mɛi komɛi baashashao shi akɛ amɛbaaha abaptisi amɛ lɛ, shi mɛni hewɔ esaaa akɛ ofeɔ nakai lɛ?
14 Mɛi komɛi baashashao shi akɛ amɛaaha abaptisi amɛ kɛ gbeyeishemɔ lɛ akɛ, ekolɛ abaashwie amɛ yɛ sɛɛ mli. Ani bo hu onuɔ he nakai? Kɛ́ nakai eji lɛ, no etsɔɔɔ doo akɛ ohiɛ susumɔ ni ejaaa. Ekolɛ, eeenyɛ efee akɛ onaa Yehowa Odasefonyo ni oootsɔ lɛ akɛ eji hiɛdɔɔ sane. Shi ani eeenyɛ efee akɛ yiŋtoo kroko yɛ sɛɛ? Ekolɛ onako nɔmimaa kɛmɔko shi akɛ Nyɔŋmɔ shishitoo mlai lɛ anaa ní ooohi shi yɛ lɛ ji shihilɛ gbɛ ni hi fe fɛɛ. No lɛ, kɛ́ ojwɛŋ nɔ ni baa mɛi ni kɛ Biblia mli shishitoo mlai tsuuu nii lɛ anɔ lɛ, ebaaye ebua bo koni onyɛ okpɛ oyiŋ. Yɛ gbɛ kroko nɔ lɛ, ekolɛ oosumɔ ni ohi shi yɛ Nyɔŋmɔ shishitoo mlai lɛ anaa, shi obɛ hekɛnɔfɔɔ akɛ obaanyɛ ofee nakai. Kɛ́ nakai ni lɛ, eji susumɔ ni ja, ejaakɛ etsɔɔ akɛ obaa ohe shi. Biblia lɛ po kɛɔ akɛ, adesai ni yeee emuu fɛɛ atsuii eyi tɔ kɛ kutumpɔo. (Yer. 17:9) Shi kɛ́ otee nɔ ‘okwɛ ohe nɔ jogbaŋŋ yɛ Nyɔŋmɔ wiemɔ lɛ naa’ lɛ, obaanyɛ oye omanye. (Nyɛkanea Lala 119:9.) Ekɔɔɔ he eko yiŋtoi ahewɔ ni oshashaoɔ shi akɛ oooha abaptisi bo lɛ, esa akɛ otsu nakai yiŋtoi lɛ ahe nii. *
15, 16. Te ooofee tɛŋŋ ona akɛ oshɛ kɛha baptisimɔ lɛ?
15 Shi te ooofee tɛŋŋ ona akɛ oshɛ kɛha baptisimɔ lɛ? Gbɛ kome ji ní obi ohe saji tamɔ: ‘Ani manyɛ magbála shishijee Biblia mli tsɔɔmɔi amli matsɔɔ mɛi krokomɛi? Ani mikɛ mihe woɔ shiɛmɔ nitsumɔ lɛ mli yɛ bei ní mifɔlɔi eyaaa lɛ po mli? Ani mibɔɔ mɔdɛŋ akɛ maya Kristofoi akpeei fɛɛ? Ani manyɛ makai bei pɔtɛi komɛi ni midamɔ tipɛŋfoi anɔnyɛɛ naa? Kɛ́ mifɔlɔi kɛ minanemɛi po kpa Yehowa sɔɔmɔ lɛ, ani maya nɔ masɔmɔ lɛ? Ani mitsɔ sɔlemɔ nɔ miha Yehowa ena akɛ wekukpãa ni kã mi kɛ lɛ teŋ lɛ he hiaa mi waa? Ani mijɛ mitsui mli fɛɛ mijɔɔ mihe nɔ miha Yehowa yɛ sɔlemɔ mli?’
16 Baptisimɔ ji nifeemɔ ko ni tsakeɔ mɔ shihilɛ kwraa, no hewɔ lɛ esaaa akɛ akɛshwɛɔ. Ani ojwɛŋmɔ mli egbele bɔ ni obaanyɛ okɛ hiɛdɔɔ asusu nifeemɔ nɛɛ he? Jeee wiemɔi ni mɔɔ shi ni ahaa kɛjɛɔ wiemɔ kpoku lɛ nɔ, loo sanehetoi ni ŋɔɔ ni ahaa yɛ kpeei ashishi kɛkɛ ni tsɔɔ akɛ mɔ ko jwɛŋmɔ mli egbele. Mɔ ni jwɛŋmɔ mli egbele lɛ damɔɔ Biblia mli shishitoo mlai ni enuɔ shishi lɛ nɔ ekpɛɔ eyiŋ. (Nyɛkanea Hebribii 5:14.) Kɛ́ oshɛ he ni obaanyɛ ofee nakai lɛ, belɛ oná hegbɛ ni fe fɛɛ—akɛ obaajɛ otsui muu fɛɛ mli osɔmɔ Yehowa, ni ohi shi yɛ gbɛ ni tsɔɔ akɛ ojɔɔ ohe nɔ oha lɛ lɛɛlɛŋ lɛ nɔ.
17. Mɛni baaye abua bo koni onyɛ odamɔ kai ni obaanyɛ okɛkpe yɛ obaptisimɔ lɛ sɛɛ lɛ naa?
17 Kɛ́ abaptisi bo sɛɛ nɔŋŋ lɛ, ekolɛ okɛ ekãa babaoo baasɔmɔ Nyɔŋmɔ. Shi etsɛŋ ni ekolɛ okɛ shihilɛi ni baaka ohemɔkɛyeli lɛ kɛ oshifimɔ lɛ baakpe. (2 Tim. 3:12) Kaanu he akɛ esa akɛ okome pɛ okpee kai nɛɛ anaa. Bi ŋaawoo kɛjɛ ofɔlɔi adɛŋ. Okɛ ohiɛ afɔ̃ mɛi ni edara yɛ mumɔŋ yɛ asafo lɛ mli lɛ anɔ kɛha yelikɛbuamɔ. Okɛ mɛi ni baaye abua bo abɔ naanyo be fɛɛ be. Ohiɛ akakpa nɔ kɔkɔɔkɔ akɛ Yehowa jwɛŋɔ onɔ, ni ebaawaje bo koni onyɛ okpee shihilɛ fɛɛ shihilɛ ni ekolɛ okɛbaakpe lɛ naa.—1 Pet. 5:6, 7.
Te Ooofee Tɛŋŋ Oshɛ Otii ni Okɛmamɔ Ohiɛ lɛ Ahe?
18, 19. Kɛ́ opɛi nibii ni okɛyeɔ klɛŋklɛŋ gbɛhe yɛ oshihilɛ mli lɛ amli okwɛ lɛ, mɛɛ sɛɛ obaaná?
18 Ani eyɛ mli akɛ oosumɔ ni ofee nɔ ni ja moŋ, shi etamɔ nɔ ni onáaa dekã bɔ ni baaha ofee nɔ ni ootao akɛ ofee kɛ nɔ ni esa akɛ ofee lɛ? Kɛ́ nakai ni lɛ, esa akɛ opɛi nibii ni okɛyeɔ klɛŋklɛŋ gbɛhe yɛ oshihilɛ mli lɛ amli okwɛ. Ákɛ nɔkwɛmɔnɔ lɛ, wo goga ko, ni okɛ tɛi wuji awo mli. No sɛɛ lɛ, okɛ shia awo goga lɛ mli. Amrɔ nɛɛ, goga lɛ eyi kɛ tɛi kɛ shia lɛ. Agbɛnɛ tsɔ fɛɛ oshwie shi. No sɛɛ lɛ, okɛ nakai shia lɛ nɔŋŋ awo goga lɛ mli klɛŋklɛŋ, koni obɔ mɔdɛŋ akɛ okɛ tɛi lɛ hu baawo mli. Ani tɛi lɛ fɛɛ enyɛ ebote mli? Nɔ hewɔ lɛ ji akɛ, okɛ shia lɛ wo mli klɛŋklɛŋ.
19 Okɛ shihilɛ ni tamɔ nakai nɔŋŋ kpeɔ yɛ bɔ ni okɛ obe tsuɔ nii ohaa lɛ gbɛfaŋ. Kɛ́ okɛ nibii tamɔ hiɛtserɛjiemɔ ye klɛŋklɛŋ gbɛhe lɛ, onyɛŋ okɛ nibii ni he hiaa titri yɛ shihilɛ mli—ni ji Nyɔŋmɔjamɔ nifeemɔi—lɛ fɛɛ afata he. Shi kɛ́ okɛ Biblia mli ŋaawoo akɛ ‘oyoo nii ni hi titri lɛ’ tsu nii lɛ, obaana akɛ obaanyɛ otsu Maŋtsɛyeli lɛ he nibii lɛ ahe nii, ni obaanyɛ ojie ohiɛtserɛ bɔ ni sa hu.—Fil. 1:10.
20. Kɛ́ ohao, ni oyiŋ fee bo kɔshikɔshi yɛ mɔdɛŋ ni obɔɔ koni oshɛ otii ni okɛmamɔ ohiɛ lɛ ahe lɛ hewɔ lɛ, mɛni esa akɛ ofee?
20 Beni obɔɔ mɔdɛŋ koni oshɛ otii ni okɛmamɔ ohiɛ, ní baptisimɔ fata he lɛ ahe lɛ, ekolɛ bei komɛi lɛ obaahao, ni oyiŋ baafee bo kɔshikɔshi. Kɛ́ eba lɛ nakai lɛ, “shɛ ojatsu lɛ ofɔ̃ Yehowa nɔ, ni lɛ eeehiɛ omli.” (Lala 55:23) Amrɔ nɛɛ oyɛ hegbɛ ni obaanyɛ okɛ ohe awo nitsumɔ ni he hiaa fe fɛɛ yɛ adesa yinɔsane mli ni miishɛɛ yɔɔ mli waa, ni ji jeŋ muu fɛɛ shiɛmɔ kɛ nitsɔɔmɔ nitsumɔ lɛ mli. (Bɔf. 1:8) Obaanyɛ odamɔ sɛɛ flɛŋŋ ní okwɛ mɛi ni tsuɔ nitsumɔ nɛɛ. Aloo obaanyɛ okɛ ohe awo nitsumɔ nɛɛ mli. Kaashashao shi akɛ okɛ nyɛmɔ ni oyɔɔ lɛ baatsu nii koni Maŋtsɛyeli lɛ he nibii lɛ aya hiɛ. Oshwaŋ ohe kɔkɔɔkɔ akɛ ooosɔmɔ “obɔlɔ lɛ yɛ oblahiiaŋ gbii lɛ amli.”—Jaj. 12:1.
[Shishigbɛ niŋmai]
^ kk. 7 Kwɛmɔ October–December, 2009 Buu-Mɔɔ lɛ baafa 23-26 lɛ.
^ kk. 14 Kɛ́ ootao yelikɛbuamɔ yɛ sane nɛɛ he lɛ, kwɛmɔ Questions Young People Ask—Answers That Work wolo lɛ, Kpo 2, yitso 34 lɛ.
Te Obaaha Hetoo Oha Tɛŋŋ?
• Mɛni hewɔ esa akɛ okɛ otii amamɔ ohiɛ lɛ?
• Mɛɛ otii komɛi kɛ́ otiu sɛɛ lɛ obaaná he sɛɛ?
• Kɛ́ obaashɛ oti ni okɛma ohiɛ akɛ obaaha abaptisi bo lɛ he lɛ, mɛni esa akɛ ofee?
• Kɛ́ opɛi nibii ni okɛyeɔ klɛŋklɛŋ gbɛhe yɛ oshihilɛ mli lɛ amli lɛ, mɛɛ gbɛ nɔ ebaaye ebua bo koni oshɛ otii ni okɛmamɔ ohiɛ lɛ ahe?
[Nikasemɔ lɛ he Sanebimɔi]
[Mfoniri ni yɔɔ baafa 13]
Ani okɛfee oti ni ma ohiɛ akɛ obaakane Biblia lɛ daa gbi?
[Mfoniri ni yɔɔ baafa 15]
Mɛni baaye abua bo koni oshɛ oti ni okɛma ohiɛ akɛ obaaha abaptisi bo lɛ he?
[Mfoniri ni yɔɔ baafa 16]
Mɛni okaseɔ kɛjɛɔ nɔkwɛmɔnɔ nɛɛ mli?