Mga Pamatan-on—Ano ang Inyo Himuon sa Inyo Kabuhi?
Mga Pamatan-on—Ano ang Inyo Himuon sa Inyo Kabuhi?
“Ang paagi sang akon pagsumbag indi agod magsumbag sa hangin.”—1 COR. 9:26.
1, 2. Ano ang kinahanglan mo agod magmadinalag-on ka padulong sa pagkaadulto?
KON ang isa ka tawo maglakbay sa lugar nga indi niya sunado, mahimo nga luyag niya magdala sang mapa kag kompas. Paagi sa mapa mahibaluan niya kon sa diin na sia kag mabuligan sia sini nga makaplano kon sa diin maagi. Ang kompas amo ang magatudlo sa iya sang husto nga direksion. Apang, ang mapa kag kompas wala sing pulos kon wala sia nakahibalo kon diin sia makadto. Agod indi sia magdalangdalang, kinahanglan nga may maathag sia kag pat-od nga destinasyon.
2 Amo man sini nga kahimtangan ang imo ginaatubang samtang nagapadulong ka sa pagkaadulto. May yara ka masaligan nga mapa kag kompas. Ang Biblia amo ang mapa nga makabulig sa imo nga mahibaluan ang dalanon nga dapat mo pilion. (Hulu. 3:5, 6) Kon ang imo konsiensia nahanas sing maayo, makabulig ini sing daku agod makapabilin ka sa husto nga dalanon. (Roma 2:15) Mangin kaangay ini sa kompas. Apang agod magmadinalag-on ka sa kabuhi, dapat nakahibalo ka sang imo destinasyon. Kinahanglan nga may maathag ka kag pat-od nga mga tulumuron.
3. Ano nga mga benepisyo sa pagpahamtang sang mga tulumuron ang ginapatuhuyan ni Pablo sa 1 Corinto 9:26?
3 Ginsumaryo ni apostol Pablo ang mga benepisyo sa pagpahamtang sang mga tulumuron kag sa pagtinguha nga malab-ot ini sang nagsulat sia: “Ang paagi sang akon pagdalagan indi wala sing kapat-uran; ang paagi sang akon pagsumbag indi agod magsumbag sa hangin.” (1 Cor. 9:26) Makadalagan ka sing maayo kon may yara ka mga tulumuron. Sa indi madugay, magahimo ka sing pila ka importante nga desisyon, halimbawa, tuhoy sa pag-alagad kay Jehova, trabaho, pagminyo, kag pamilya. Kon kaisa, mahimo nga nabudlayan ka magdesisyon. Apang kon abanse ka nga magplano sang imo himuon base sa mga kamatuoran kag mga prinsipio sa Pulong sang Dios, malikawan mo ang sayop nga dalanon.—2 Tim. 4:4, 5.
4, 5. (a) Ano ang mahimo matabo kon wala ka sing napahamtang nga mga tulumuron? (b) Ngaa ang imo mga desisyon dapat nagiyahan sang imo handum nga pahamut-an ang Dios?
4 Kon wala ka sing napahamtang nga tulumuron, mahimo madali ka lang maimpluwensiahan sang imo mga kaupdanan kag mga manunudlo nga maghimo sang butang nga sa banta nila maayo para sa imo. Bisan pa gani may espesipiko ka na nga mga tulumuron, ang pila mahimo gihapon manugda sang ila mga opinyon. Samtang ginapamatian mo sila, pamangkuta ang imo kaugalingon, ‘Ang mga tulumuron bala nga ila ginapanugda makabulig sa akon nga dumdumon ang akon Manunuga samtang lamharon pa ako, ukon makaupang ini sa akon?’—Basaha ang Manugwali 12:1.
5 Ngaa ang imo mga desisyon sa kabuhi dapat nagiyahan sang imo handum nga pahamut-an ang Dios? Ang isa ka rason amo nga si Jehova ang nagahatag sa aton sang tagsa ka maayong butang. (Sant. 1:17) Huo, kita tanan dapat gid magpasalamat kay Jehova. (Bug. 4:11) May mas maayo pa bala nga paagi nga mapasalamatan mo si Jehova sangsa dumdumon sia kon nagapahamtang ikaw sang imo mga tulumuron? Binagbinagon naton kon ano nga mga tulumuron ang maayo nga ipahamtang kag kon paano mo ina malab-ot.
Ano nga mga Tulumuron ang Mahimo Mo Ipahamtang?
6. Ano ang panguna nga tulumuron nga mahimo mo ipahamtang, kag ngaa?
6 Subong sang ginbinagbinag sa nagligad nga artikulo, ang panguna nga tulumuron nga mahimo mo ipahamtang amo nga pamatud-an sa imo kaugalingon nga matuod ang ginasiling sang Biblia. (Roma 12:2; 2 Cor. 13:5) Mahimo ang imo mga kaupdanan nagapati sa ebolusyon ukon sa butig nga mga doktrina sang relihion bangod amo sini ang ginasiling sang iban nga dapat nila patihan. Apang, indi ka mag-ilog sa ila. Dumduma nga luyag ni Jehova nga alagaron mo sia sa bug-os mo nga hunahuna. (Basaha ang Mateo 22:36, 37.) Luyag sang aton langitnon nga Amay nga ipasad naton ang aton pagtuo sa mga kamatuoran sa Biblia.—Heb. 11:1.
7, 8. (a) Anong magagmay nga mga tulumuron ang makabulig agod maglig-on ang imo pagtuo? (b) Ano ang mangin resulta kon malab-ot mo na ang pila sang imo magagmay nga mga tulumuron?
7 Agod mapalig-on ang imo pagtuo, ngaa indi ka magpahamtang sang simple nga mga tulumuron? Ang isa ka tulumuron amo ang pagpangamuyo adlaw-adlaw. Agod mangin espesipiko kag indi sulitsulit ang imo mga pangamuyo, mahimo mo hunahunaon ukon ilista ang mga natabo sa sina nga adlaw nga luyag mo ilakip sa imo pangamuyo. Indi lamang ang mga kabudlayan ang imo ipangamuyo kundi ang mga butang man nga nakapahalipay sa imo. (Fil. 4:6) Ang isa pa ka tulumuron amo ang pagbasa sang Biblia kada adlaw. Nakahibalo ka bala nga kon magbasa ka sing mga apat ka pahina kada adlaw, matapos mo ang bug-os nga Biblia sa isa lang ka tuig? * “Bulahan ang tawo nga . . . ang iya kawilihan yara sa kasogoan sang GINOO,” siling sang Salmo 1:1, 2, “kag sa iya kasogoan nagapamalandong sia sa adlaw kag gab-i.”
8 Ang ikatlo nga tulumuron nga mahimo mo ipahamtang amo ang paghanda sang komento sa mga miting sang kongregasyon. Sa umpisa, mahimo nga basahon mo lang ang sabat ukon ang isa ka teksto. Sa ulihi, mangin tulumuron mo na nga magsabat sa imo kaugalingon nga mga tinaga. Huo, sa kada tion nga nagasabat ka, nagahatag ka sing dulot kay Jehova. (Heb. 13:15) Kon malab-ot mo na ang pila sa sining tulumuron, magalambo ang imo pagsalig, amo man ang imo apresasyon kay Jehova, kag mangin handa ka na sa pagpahamtang sang mas dalagku nga mga tulumuron.
9. Kon wala ka pa nagapakigbahin sa pagbantala, ano nga mga tulumuron ang mahimo mo ipahamtang?
9 Anong dalagku nga mga tulumuron ang mahimo mo ipahamtang? Kon wala ka pa nagapakigbahin sa pagbantala sa publiko, himua nga tulumuron nga mangin manugbantala sang Ginharian. Kon malab-ot mo na ining dungganon nga tulumuron, tinguhai nga mangin regular kag epektibo. Indi pagpaligara ang isa ka bulan nga indi ka makaalagad. Tun-i man nga gamiton ang Biblia sa imo ministeryo. Kon himuon mo ini, mahimo nga mabatyagan mo nga mas makalilipay ang pagbantala. Dayon, sarang mo madugangan ang imo tion sa pagbantala ukon sa pagdumala sang pagtuon sa Biblia. Subong di-bawtismado nga manugbantala, may mas maayo pa bala nga tulumuron sangsa mangin kalipikado para sa bawtismo kag mangin dedikado kag bawtismado nga Saksi ni Jehova?
10, 11. Anong dalagku nga mga tulumuron ang sarang mapahamtang sang bawtismado na nga mga pamatan-on?
10 Kon bawtismado ka na nga alagad ni Jehova, yari ang pila ka dalagku nga tulumuron nga mahimo mo lab-uton. Mahimo ka magbulig sa mga kongregasyon nga may mga teritoryo nga talagsa lang makobrehan. Mahimo mo man gamiton ang imo kusog kag maayong panglawas sa pag-auxiliary ukon pagregular payunir. Linibo ka malipayon nga payunir ang makasugid sa imo nga ang bug-os tion nga pag-alagad amo ang isa sa makalilipay nga paagi sa pagdumdom sa imo Manunuga sa tion sang imo pagkapamatan-on. Ini nga mga tulumuron sarang mo malab-ot bisan pa indi ka magkadto sa iban nga lugar. Makabenepisyo man ang inyo kongregasyon kon himuon mo ini.
11 Ang iban pa sining dalagku nga tulumuron magahatag sing benepisyo indi lamang sa inyo kongregasyon. Halimbawa, mahimo ka magplano nga mag-alagad sa lugar ukon pungsod diin daku ang kinahanglanon. Mahimo ka magbulig sa pagpatindog sang mga Kingdom Hall ukon sanga talatapan sa iban nga pungsod. Mahimo ka man mag-alagad sa Bethel ukon mangin misyonero. Apang, antes mo malab-ot inang dalagku nga tulumuron, ang pinakauna mo anay nga lab-uton amo ang pagpabawtismo. Kon wala ka pa nabawtismuhan, binagbinaga kon ano ang dapat mo himuon agod mangin kalipikado ka sa sini.
Paglab-ot sa Tulumuron nga Magpabawtismo
12. Ano ang mga rason kon ngaa ang pila nagpabawtismo, kag ngaa indi ini bastante nga mga rason?
12 Paano mo ilaragway ang katuyuan sang bawtismo? Ang pila mahimo maghunahuna nga proteksion ini agod indi sila makasala. Ang iban luyag lang magpabawtismo bangod ang ila mga kaupdanan nabawtismuhan na. May mga pamatan-on man nga gusto lang pahamut-an ang ila mga ginikanan. Apang, ang bawtismo indi makapugong sa imo sa paghimo sang sayop nga mga butang nga gusto mo himuon sing tago. Indi mo ini dapat paghimuon agod pahamut-an lang ang iban. Dapat ka magpabawtismo kon nahangpan mo na sing bug-os kon ano ang nadalahig kon mangin isa ikaw ka Saksi ni Jehova kag kon napat-od mo nga handa ka na sa pagbaton sini nga responsibilidad.—Man. 5:4, 5.
13. Ngaa dapat ka magpabawtismo?
13 Ang isa ka rason kon ngaa dapat magpabawtismo amo ang sugo ni Jesus sa iya mga sumulunod nga “maghimo sang mga disipulo . . . , nga nagabawtismo sa ila.” Nagpahamtang man sia sing huwaran paagi sa pagpabawtismo mismo. (Basaha ang Mateo 28:19, 20; Marcos 1:9.) Dugang pa, ang bawtismo isa ka importante nga tikang para sa kaluwasan. Sa tapos ginsambit ni apostol Pedro ang tuhoy sa pagtukod ni Noe sang arka nga amo ang nag-amlig sa iya kag sa iya pamilya sa tion sang Anaw, sia nagsiling: “Ang katumbas sini nagaluwas man karon sa inyo, nga amo ang bawtismo, . . . paagi sa pagkabanhaw ni Jesucristo.” (1 Ped. 3:20, 21) Apang, wala ini nagakahulugan nga ang bawtismo kaangay sang insurance nga ginkuha mo para sa tion sang kalamidad. Sa baylo, mapabawtismo ka bangod ginahigugma mo si Jehova kag luyag mo mag-alagad sa iya sing bug-os tagipusuon, kalag, hunahuna, kag kusog.—Mar. 12:29, 30.
14. Ngaa ang pila nagapangalag-ag sa pagpabawtismo, apang sa ano ka makasalig?
14 Ang iban mahimo nagapangalag-ag nga magpabawtismo bangod nahadlok sila nga basi ma-disfellowship sila sa ulihi. Amo man bala sina ang imo ginabatyag? Normal lang nga makabatyag ka sina. Buot silingon nahangpan mo nga serioso nga responsibilidad ang mangin isa ka Saksi ni Jehova. Ukon basi may iban pa nga rason. Ayhan indi ka pa kumbinsido nga ang pagkabuhi suno sa mga talaksan sang Dios amo ang pinakamaayo. Kon amo sina ang imo ginahunahuna, makabulig sa imo kon binagbinagon mo ang natabo sa mga nagasikway sa mga talaksan sang Biblia. Sa pihak nga bahin, mahimo nga ginahigugma mo ang mga talaksan sang Dios apang nagahunahuna ka nga indi mo ini matuman. Ang matuod, nagapakita ina sang imo pagkamapainubuson. Kay ang Biblia nagasiling nga ang tagipusuon sang di-himpit nga mga tawo malimbungon. (Jer. 17:9) Apang sarang ka magmadinalag-on kon ‘talupangdon mo pirme ang Pulong sang Dios.’ (Basaha ang Salmo 119:9.) Ano man ang rason sang imo pagpangalag-ag sa pagpabawtismo, dapat mo ina solusyonan. *
15, 16. Paano mo mahibaluan kon bala handa ka na sa pagpabawtismo?
15 Apang, paano mo mahibaluan kon bala handa ka na sa pagpabawtismo? Ang isa ka paagi amo ang pagpamangkot sa imo kaugalingon sang masunod: ‘Mapaathag ko bala sa iban ang panguna nga mga panudlo sang Biblia? Nagabantala bala ako bisan wala ang akon mga ginikanan? Nagatinguha bala ako nga makatambong sa tanan nga Cristianong miting? May madumduman bala ako nga sitwasyon nga ginpamatukan ko ang pag-ipit? Magapadayon bala ako sa pag-alagad kay Jehova bisan pa mag-untat ang akon mga ginikanan kag mga abyan? Nasambit ko na bala sa akon pangamuyo kay Jehova kon daw ano ka importante ang akon kaangtanan sa iya? Kag nakahimo na bala ako sing bug-os tagipusuon nga dedikasyon kay Jehova paagi sa pangamuyo?’
16 Ang bawtismo isa ka desisyon nga magapabag-o sang imo kabuhi amo nga indi mo ini dapat pagpakadiutayon. Hamtong ka na bala para binagbinagon sing serioso ini nga tikang? Indi buot silingon nga kon maayo ka na maghatag sing mga bahin ukon magkomento sa mga miting, hamtong ka na. Nadalahig sa sini ang paghimo sing mga desisyon suno sa mga prinsipio sang Biblia nga imo natun-an. (Basaha ang Hebreo 5:14.) Sa tion nga masarangan mo na ina himuon, nagahulat sa imo ang pinakadaku nga pribilehiyo—ang pag-alagad kay Jehova sing bug-os tagipusuon kag ang pagkabuhi suno sa imo dedikasyon sa iya.
17. Ano ang makabulig sa imo nga maatubang ang mga pagtilaw nga mahimo mag-utwas pagkatapos sang imo bawtismo?
17 Pagkatapos sang imo bawtismo, mahimo nga nakunyag ka gid sa pag-alagad sa Dios. Apang, sa pagligad sang tion, ang imo pagtuo kag kalig-on mahimo matilawan. (2 Tim. 3:12) Indi ka magbatyag nga nagaisahanon ka lang sa pag-atubang sa mga pagtilaw. Mangayo sing laygay sa imo mga ginikanan kag sa hamtong nga mga kauturan. Mangin suod sa imo mga abyan nga makabulig sa imo. Dumduma pirme nga si Jehova nagaulikid sa imo, kag magahatag sia sing kusog nga kinahanglan mo sa pag-atubang sa bisan ano nga kahimtangan nga mahimo mag-utwas.—1 Ped. 5:6, 7.
Paano Mo Malab-ot ang Imo mga Tulumuron?
18, 19. Paano ka makabenepisyo sa pag-usisa sang imo mga prioridad?
18 Walay sapayan sang imo mga panikasog, nagabatyag ka bala nga kulang pirme ang imo tion para mahimo ang gusto mo kag ang dapat mo himuon? Kon amo, dapat mo usisaon ang imo mga prioridad. Sa pag-ilustrar: Magkuha ka sang isa ka balde kag butangi sang pila ka dalagku nga mga bato. Dayon butangi sang balas tubtob mapuno ini. Pagkatapos, iula ang unod sini. Dayon, tilawi nga unahon sulod sa balde ang mga balas kag idugang ang mga bato. Makaigo pa bala tanan? Indi na, bangod gin-una mo sulod sa balde ang balas.
19 Amo man sini nga hangkat ang ginaatubang mo kon tuhoy sa paggamit sang imo tion. Kon unahon mo ang paglingawlingaw, wala ka na sing bastante nga tion para sa mas importante nga mga butang—sa mga hilikuton sa pag-alagad sa Dios. Apang kon sundon mo ang laygay sang Biblia nga ‘pat-uron ang mas importante nga mga butang,’ may tion ka sa pag-alagad sa Dios kag sa diutay nga paglingawlingaw.—Fil. 1:10.
20. Kon nagabatyag ka sing kabalaka kag pagpangduhaduha samtang ginatinguhaan mo nga lab-uton ang imo mga tulumuron, ano ang dapat mo himuon?
20 Samtang ginatinguhaan mo nga lab-uton ang imo mga tulumuron, lakip na ang pagpabawtismo, mahimo ka makabatyag sang kabalaka kag pagpangduhaduha. Kon mabatyagan mo ina, “itungtung sa GINOO ang imo lulan, kag sia magaalay-ay sa imo.” (Sal. 55:22) Sa karon, may yara ka kahigayunan nga makigbahin sa labing makakulunyag kag importante nga hilikuton, ang pagbantala kag pagpanudlo nga hilikuton sa bug-os nga kalibutan. (Binu. 1:8) Puede ka magpili: makigbahin sa sining makakulunyag nga hilikuton ukon mangin tagpanilag lamang. Indi pagtagua ang imo mga talento sa pag-alagad sa Dios kag sa pagsakdag sa mga hilikuton sang Ginharian. Indi ka gid maghinulsol kon mag-alagad ka sa “imo Manunuga sa mga adlaw sang imo pagkapamatan-on.”—Man. 12:1.
[Mga Nota]
^ par. 7 Tan-awa ang Agosto 1, 2009 nga Ang Lalantawan, pahina 15-18.
^ par. 14 Para sa dugang nga impormasyon, tan-awa ang libro nga Questions Young People Ask—Answers That Work, Tomo 2, kapitulo 34.
Ano ang Imo Sabat?
• Ngaa dapat ka magpahamtang sang mga tulumuron?
• Ano ang pila ka mapuslanon nga tulumuron nga sarang mo malab-ot?
• Ano ang nadalahig sa paglab-ot sa tulumuron nga magpabawtismo?
• Paano ang pag-usisa sa imo mga prioridad makabulig sa imo nga malab-ot ang imo mga tulumuron?
[Mga Pamangkot sa Pagtinuon]
[Retrato sa pahina 13]
Ginahimo mo bala nga tulumuron ang pagbasa sang Biblia adlaw-adlaw?
[Retrato sa pahina 15]
Ano ang makabulig sa imo nga malab-ot ang imo tulumuron nga magpabawtismo?
[Retrato sa pahina 16]
Ano ang matun-an mo sa sini nga ilustrasyon?
