Ilissi inuusuttuaqqat — inuunersi qanoq atorniarpisiuk?
Ilissi inuusuttuaqqat — inuunersi qanoq atorniarpisiuk?
“Uanga arpappunga maangaannaq pinnanga, tilluuttartutullu silaannarmut tillueriartutut inngilanga.” — 1 KORINTHIMIUT 9:26.
1, 2. Inersimasunngoriartortillutit nalerisimaarlutit inuussaguit suut pisariaqartippigit?
PISUINNAQ angalasoq sumiiffimmi nalusamini angalaniaruni nunap assinganik pujorsiummillu nassarusussagunarpoq. Nunap assinga iluaqutigalugu sumiinnerluni paasisinnaavaa sukkuussanerlunilu aalajangersinnaalluni. Pujorsiullu atorlugu aqqutissamigoorsinnaavoq. Nunalli assinga pujorsiullu iluaqutiginavianngilai naluguniuk sumukassanerluni. Asuli angalajumanani aalajangersimasumik toraagaqartariaqarpoq.
2 Illit inersimasunngoriartorninni tamatumunnga assingusumik inissisimavutit. Atoriaannaasannik tutsuiginartumik nunap assiuteqarlutillu pujorsiutaateqarputit. Biibili nunap assingatut ippoq, sukkuussanerlutit aalajangernissannut iluaqutigisinnaasat. (Ussatit 3:5, 6) Nalunngeqatiginnissutit eqqortumik ilinniartinneqarsimappat aqqutikkut eqqortukkuuginnarnissannut iluaqutigisinnaavat. (Romamiut 2:15) Aap, nalunngeqatiginnissut pujorsiutitut issinnaavoq. Nalerisimaarlutilli inuussaguit sumunnarniarnerlutit nalunngittariaqarpat. Aalajangersimasunik anguniagaqartariaqarputit.
3. Paulusip Korinthimiunut allakkamini siullerni 9:26mi eqqaasaatut, anguniagaqarneq sunik iluaqutissartaqarpa?
3 Apustilip Paulusip anguniagaqarnerup taakkulu anguniarlugit ilungersornerup iluaqutissartai ima eqqaallatsiarpai: “Uanga arpappunga maangaannaq pinnanga, tilluuttartutullu silaannarmut tillueriartutut inngilanga.” (1 Korinthimiut 9:26) Anguniagaqaraanni asuliinnaq arpattoqarneq ajorpoq. Qanittukkut ilaatigut uppernermut, suliffissanut, aappaqarnissamut meeraqarnissamullu tunngatillugu pingaarutilinnik aalajangigaqartussaavutit. Immaqa ilaannikkut qinigassarpassuaqarnermik paatsiveeruttarputit. Inuunermili ingerlavissat pilersaarusioreerukku aalajangikkatillu ajoqersuutinik tunngaviusunik najoqqutassianillu Guutip oqaasianiittunik tunngaveqartittarukkit aqqutikkut kukkusukkoornissamut ussernartorsiulissanngilatit. — 2 Timotheusi 4:4, 5.
4, 5. (a) Imminut anguniagassinngikkuit qanoq pisoqarsinnaava? (b) Sooq aalajangikkatit Guutimik nuannaartitserusunnermik tunngaveqartariaqarpat?
4 Illit nammineq imminut anguniagassinngikkuit inuusuttuaraqatinnit ilinniartitsisunnillu sunnertillutit taakkua ilinnut iluaqutaanerpaasorisaattut iliussagunarputit. Aamma aalajangersimasunik anguniagaqaraluaruilluunniit allat immaqa ilinnut iluaqutaanerpaasorisaminnik iliortinniartassavaatsit. Taakkua siunnersoraangatsit imminut ima aperisarit: ‘Anguniagassat taakkua eqqaasaat Pinngortitsisinnik inuusutsillunga eqqaamanninnissamut iluaqutigissavakka, imaluunniit Pinngortitsisinnik eqqaamanninnissamut akornutigissavakka?’ — Atuaruk Oqaluussisartup oqaasii 12:1.
5 Sooq inuunermi aalajangikkatit Guutimik nuannaartitserusunnermik tunngaveqartariaqarpat? Tamatumunnga pissutaasut ilagaat ajunngitsut pisartakkatta tamarmik Jehovameersuusarnerat. (Jaaku 1:17) Ilumummi, kikkut tamarmik Jehova qujassutissaqarfigaat. (Saqqummersitat 4:11) Jehova eqqarsaatigalugu imminut anguniagassittarneq qujamasunnermik ersersitsiniarluni iliuuserineqarsinnaasut pitsaanerpaartaraat, ilaa? Anguniassaqqissut sammeriartigit taakkulu anguniarlugit qanoq iliorsinnaanersutit misissorlugu.
Imminut sunik anguniagassissinnaavit?
6. Siullermik sumik imminut anguniagassissinnaavit, aamma sooq?
6 Soorlu allaaserisap matuma siuliani eqqaaneqartoq, siullermik Biibilimi allassimasut ilumoornerannik ‘qulakkeerinissat’ (NV) anguniagarisinnaavat. (Romamiut 12:2; 2 Korinthimiut 13:5) Immaqa inuusuttuaraqativit pinngoriartuaarsimaneraaneq upperisarsiornikkulluunniit ajoqersuutit eqqunngitsut upperaat allat oqarmata taakku upperissagitik. Illilli allat arlaannik upperinnitsitsiniarnerat piinnarlugu upperinnittariaqanngilatit. Eqqaamajuk Jehovap kissaatigigaa illit isumakkut iluunngarlutit kiffartorfigissaginni. (Atuakkit Matthæusi 22:36, 37). Ataatatta qilammiusup kissaatigaa uppernerput uppernarsaatinik qulakkeersimasatsinnik tunngaveqassasoq. — Hebræerit 11:1.
7, 8. (a) Siunissami qaninnerusumi anguneqarsinnaasunik upperninnut nakussatsissutaasussanik sunik imminut anguniagassissinnaavit? (b) Anguniagassat siunissami qaninnerusumi anguneqarsinnaasut ilaannik angusaqarnerit qanoq iluaqutigissaviuk?
7 Uppernerit nakussatsinniarlugu siunissami qaninnerusumi anguneqarsinnaasunik imminut anguniagassissinnaavutit. Ullut tamaasa qinusarnissaq anguniagarineqarsinnaavoq. Qinnutigisanik allanngorartitsillunilu immikkut erseqqissaanissamut iluaqutaasinnaavoq ullup ingerlanerani pisunik qinunermi eqqaarusutanik allattuilluniluunniit eqqaamanninniartarneq. Unamminiarnarsimasut kisiisa eqqaanagit aammali nuannaarutigisimasatit eqqaasakkit. (Filippimiut 4:6) Anguniagarineqarsinnaasoq alla tassaavoq ullut tamaasa Biibilimik atuartarnissaq. Nalunngiliuk ullormut quppernerit sisamat missiliorlugit atuartarukkit Biibili tamaat ukiup ataasiinnaap ingerlanerani atuarsinnaallugu? * Tussiaat 1:1, 2mi ima allassimavoq: ‘Pilluarpoq Jehovap inatsisaanik nuannarisaqartoq inatsisaalu eqqarsaatigalugit [atuartarlugit, NV] ullukkullu unnuakkullu.’
8 Anguniagarisinnaasat siunissami qaninnerusumi anguneqarsinnaasoq suli alla tassaavoq ilagiit ataatsimiinnerini tamani akisarnissamut piareersartarnissat. Aallaqqaammut immaqa akissutigerusutannik allassimaffimmilluunniit atuarusunnerusassaatit. Kingusinnerusukkut oqaatsit ilinnut nalinginnaasut atorlugit akisarnissat anguniagarisinnaavat. Akinerit tamaasa ilumoortumik Jehovamut tunissuteqartarputit. (Hebræerit 13:15) Anguniagassat taakkua ilaat angoreerukkit imminut tatiginerulissaatit, Jehovamut qujamasunnerulissaatit siunissarlu ungasinnerusoq eqqarsaatigalugu anguneqarsinnaasunik imminut anguniagassissinnaalissallutit.
9. Suli oqaluussisartunngorsimanngikkuit siunissaq ungasinnerusoq eqqarsaatigalugu anguniagarisinnaasatit suusinnaappat?
9 Siunissaq ungasinnerusoq eqqarsaatigalugu anguneqarsinnaasunik sunik anguniagaqarsinnaavit? Ilagiit nutaarsiassamik nuannersumik oqaluussissutiginninneranni suli peqataasalersimanngikkuit oqaluussisartunngornissat siunissaq ungasinnerusoq eqqarsaatigalugu anguniagarisinnaavat. Anguniagaq siunertaqarluartoq tamanna angoreerukku kissaatigilissavat qaammatit tamaasa oqaluussisarnissat oqaluussillaqqissunngornissallu. Aamma kissaatigilissavat oqaluussinermi Biibilip atorsinnaallualernissaa. Atuillaqqinnerujartuinnartillutit paasilissagunarpat tamatuma oqaluussinermik nuannernerulersitsisarnera. Taava illumiit illumut angalaarnerusalersinnaavutit imaluunniit allaat Biibilimik atuaqqissaaqateqartalerniarlutit iliuuseqarsinnaallutit. Oqaluussisartuuguit kuisimanngitsoq kuisinnissamut piumasaqaatinik eqqortitsinissaq aamma tunniulluinnarsimasutut kuisimasutullu Jehovamut Guutimut nalunaajaasunngornissaq anguniagarisinnaasavit pitsaanerpaartaraat, ilaa?
10, 11. Inuusuttut kuisissimasut siunissaq ungasinnerusoq eqqarsaatigalugu anguneqarsinnaasunik sunik imminut anguniagassissinnaappat?
10 Jehovamut kiffaaguit kuisereersimasoq anguniagassat siunissaq ungasinnerusoq eqqarsaatigalugu anguniarsinnaasavit ilaat sammeriartigit. Ilagiit allat angalaarfigisartakkani qaqutiguinnaq angalaarfigineqartartuni oqaluussineranni ilaannikkut ikiuutaasarsinnaavutit. Aamma aalajangersinnaavutit nukitit peqqinnerillu ikiorti-pioneriunissamut pioneriunissamulluunniit atorniarlugit. Pionerit nuannaartut titusindillit oqaluttuussinnaassavaatsit piffissaq tamaat kiffartornikkut inuusuttuunermi Pinngortitsisumik eqqaamanninniarneq nalerisimaarnartuusoq. Anguniagassat taakku angajoqqaanni najugaqartillutit angusinnaavatit, angugukkillu tamanna ilagiinnut ilaaffigisannut iluaqutaassaaq.
11 Siunissaq ungasinnerusoq eqqarsaatigalugu anguneqarsinnaasunik allanik anguniagaqaruit qularnanngitsumik ilagiinnut illit ilaaffigisannuinnaanngitsoq iluaqutaassaatit. Assersuutigalugu sumiiffimmi nunamiluunniit allami oqaluussisartunik pisariaqartitsiffiunerusumi kiffartornissat pilersaarusiorsinnaavat. Immaqa nunani allani naalagaaffilersaarfilioqataarusussinnaallutilluunniit immikkoortortaqarfilioqataarusussinnaavutit. Aamma imaassinnaavoq Betelimi kiffartulerlutilluunniit ajoqersuiartortitanngorsinnaasutit. Soorunami anguniagassat siunissaq ungasinnerusoq eqqarsaatigalugu anguneqarsinnaasut taakku angusinnaalissagukkit pingaarnerpaaq angoqqaartariaqarpat, tassa kuiseqqaartariaqarputit. Suli kuisissimanngikkuit, taava eqqarsaatigeqqissaaruk inuuninni anguniagassap pingaarutillip tamatuma angunissaanut suut piumasaqaatigineqarnersut.
Kuisinnissaq qanoq anguniarneqarsinnaasoq
12. Ilaasa kuisinnerminnut suut pissutigisarpaat, aamma sooq taakku pissutissaalluanngillat?
12 Illit kuisinnermut suna siunertaasoraajuk? Ilaat isumaqartarput kuisinneq ajortuliunnginnissamut illersuutaasoq. Allat misigisarput kuisittariaqarlutik ikinngutimik ilaat kuisissimammata. Inuusuttuaqqat allat immaqa angajoqqaaminnik nuannaartitserusuinnarlutik kuisittarput. Kuisinnerli iliuusererusutannik ajortunik allanut oqaatigerusunngisannik iliuuseqarnaveersaarutigisinnaanngilat; aamma allat ilinnik kuiseqqusinerat piinnarlugu kuisinniassanngilatit. Kuisissaatit aatsaat Jehovamut nalunaajaasuuneq paasilluinnarsimagukku, aamma tamatuminnga akisussaaffeqarnissannut piareersimanerit piumassuseqarnerillu qularutigiunnaarsimagukku. — Oqaluussisartup oqaasii 5:3, 4.
13. Kuisinnermut suut pissutigineqartussaappat?
13 Kuisinnissamut pissutissat ilagaat Jiisusip imminik malinnittunut peqqussutaa inunnik ‘ajoqersuganngortitsinissamik kuillugit’. Aamma taanna nammineq kuisinnermigut maligassiuivoq. (Atuakkit Matthæusi 28:19, 20; Markusi 1:9). Aammattaaq kuisinnissaq annaanneqarumasut iliuuserisariaqagaasa ilagaat pingaarutilik. Apustili Petrusi Noap umiarsualiaa, taassuma ilaqutaasalu Ulersuarmit annaffigisaat, eqqaareerlugu allappoq umiarsuaq taanna ‘kuissummut Jiisusip Kristusip makinnera pissutigalugu uagut annaffigisatsinnut’ assersuutaasoq. (1 Petrusi 3:20, 21, 1936) Imaanngilarli kuisinneq ajunaarnersuaqariataassagaluarpat illersorneqarnissamut qularnaveeqqutitut ittoq. Kuisinnermut pissutigineqartussat tassaapput Jehovamik asanninneq aamma uummatikkut tarnikkullu isumakkullu iluunngarluni nukiillu tamakkerlugit taassumunnga kiffartorusunneq. — Markusi 12:29, 30.
14. Sooq ilaat kuisinnissaminnut nangaasarpat, sunali qularutiginngilluinnarsinnaaviuk?
14 Ilaat kuisinnissaminnut nangaasarput kingusinnerusukkut ilaajunnaarsinneqaqinagamik. Aamma illit taamatut eqqarsartarpit? Taamatut eqqarsarneq ilaatigut iluaqutaasinnaavoq. Jehovamut nalunaajaasuunerup qanoq akisussaaffittaqartigineranik paasinnissimaninnut ersiutaasinnaavoq. Immaqa uffa nangaanerit allamik pissuteqartoq? Immaqa suli qularutigiunnaarsimanngilat Guutip najoqqutassiai malillugit inuuneq inooriaasiusoq pitsaanerpaaq. Taamaappat najoqqutassianik Biibilimiittunik sumiginnaaneq qanoq kinguneqassanersoq eqqarsaatigigukku aalajangernissat ajornannginnerutissavat. Aammali imaassinnaavoq Guutip najoqqutassiai nuannarigaluarlugit isumaqartutit maleruarsinnaanagit. Maniguuttuuninnulli tamanna uppernarsaataaginnarsinnaavoq. Biibilimimi allassimavoq inuit naammalluinnanngitsut tamarmik uummataat tatigisassaanngitsuusut. (Jeremia 17:9) Ingerlalluassaatilli eqqumajuaruit ‘Guutillu oqaasii maleruartuarukkit’. (Atuaruk Tussiaat 119:9). Kuisinnissamut nangaaninnut pissutigisatit suugaluarpataluunniit isumakulunninnut sorpiaat pissutaanersut paasiniartariaqarpat iliuuseqarfigalugillu. *
15, 16. Kuisinnissamut piareersimanerluni qanoq paasineqarsinnaava?
15 Kuisinnissamulli piareersimanerluni qanoq paasineqarsinnaagami? Ilaatigut imminut ima aperisoqarsinnaavoq: ‘Biibilimi ajoqersuutigineqartut tunngaviusut allanut nassuiarsinnaavakka? Angajoqqaakka oqaluusseqataanngikkaluaraangataluunniit oqaluusseqataasarpunga? Kristumiut ataatsimiinnerinut tamanut najuunniarlunga iliuuseqartarpunga? Allanit sunnerniarneqartillunga akiuininnik eqqaamasaqarpunga? Angajoqqaakka ikinngutikkalu Jehovamut kiffartorunnaaraluarpataluunniit uanga kiffartortuassagaluarpunga? Jehova qinunikkut paasitereerpara taassumunnga attaveqarnera qanoq pingaartitsigalugu? Aamma qinunikkut Jehovamut nangaanngivillunga tunniulluinnarnikuuvunga?’
16 Kuisinneq iliuusiuvoq inuunermut allannguilluinnassutaasartoq, aamma pimoorussassaavoq. Ima inersimalluartigivit kuisissanerlutit kuisissannginnerlutilluunniit pimoorullugu eqqarsaatigeqqissaarsinnaallugu? Inersimalluarneq oqalugiallaqqissuunermut ataatsimiinnerniluunniit torrattunik akissuteqarsinnaanermut tunngassuteqaannanngilaq. Inersimalluartoqartarpoq najoqqutassianik Biibilimiittunik paasinnissimaneq tunngavigalugu aalajangiisaraanni. (Atuaruk Hebræerit 5:14). * Taamaaliortalersimaguit immikkut pisinnaatitaaffinnit tamanit annerpaaq immikkut pisinnaatitaaffigilersinnaavat — tassa Jehovamut uummatikkut iluunngarluni kiffartorneq taassumunngalu ilumut tunniulluinnarsimaninnik ersersitsisumik inooriaaseqarneq.
17. Kuisinnerpit kingorna ajornartorsiutaalersinnaasut naammagalugit atornissaannut suna iluaqutigissaviuk?
17 Kuisereeruit imaassinnaavoq angorniungaaravit soorlu timmisutit assullu Jehovamut kiffartorusussuseqartutit. Sivitsunngitsorli immaqa ajornartorsiuteqalerputit upperninnut pinertusaarsinnaaninnullu misilinneqaataasunik. (2 Timotheusi 3:12) Isumaqaqinak ajornartorsiutit tamakku nammineerlutit anigortussaallugit. Angajoqqaannut siunnersoqqugit. Qatanngutinut anersaakkut nukittuunut ilagiinniittunut ikioqqugit. Ilinnik tapersersuiumasut ikinngutigiuakkit. Jehovap ilinnik isumassuinera taassumalu qanorluunniit pisoqassagaluarpat pisariaqartitannik ilinnik nakussatsitsisarumaarnera puiunngisaannaruk. — 1 Petrusi 5:6, 7.
Anguniakkat qanoq anguneqarsinnaappat?
18, 19. Qanoq pingaarnersiuisarninnik eqqarsaatiginninnerit qanoq iluaqutigisinnaaviuk?
18 Iliuuseqarusukkaluarlutit misigisarpit iliuusererusutavit iliuuserisariaqakkavillu iliuuserinissaannut piffissaqanngisaannarlutit? Taamaappat qanoq pingaarnersiuisarnerlutit eqqarsaatigisariaqarpat. Assersuuteqariarta. Siparnimik tigusigit taannalu ujaqqanik angisuunik immerlugu. Taava siparni sioqqanik ulikkaarusissavat. Maanna siparni ujaqqanik sioqqanillu ulikkaarpoq. Siparni imaariarlugu immeqqiguk, tamatumuuna sioqqat siulliullugit ujaqqallu kingulliullugit. Ujaqqat ilaannaat ikisinnaavigit? Tamatumunnga pissutaavoq sioqqat siulliukkakkit.
19 Pilersaarusioraangavit tamatumunnga assingusumik unamminiagassaqartarputit. Aliikkutassat assigisaallu inuuninni pingaarnerpaatittarukkit misigisassaatit pingaaruteqavissunut — sammisassanut anersaakkut ittunut — piffissaqanngisaannarlutit. ‘Suulli pingaartittariaqarneranik paasinninnissamik’ kajumissaarut Biibilimiittoq malillugu ilioruit paasilissavat Guutip naalagaaffianut attuumassuteqartunut aliikkutassaqartarnissamullu piffissaqarlutit. — Filippimiut 1:10.
20. Anguniakkavit anguniarneranni annilaangalerlutillu qulaleruit qanoq iliussavit?
20 Anguniakkavit anguniarneranni, ilaatigut kuisinnissavit anguniarnerani, imaassinnaavoq ilaannikkut annilaangalertarsinnaallutillu qulalertarsinnaasutit. Taamatut misigileraangavit ‘nanertuutigisat Jehovamut tunniuttaruk, taava isumagisarumaarpaatit’. (Tussiaat 55:23) Illit maanna inuiaat oqaluttuarisaaneranni suliat pingaaruteqarnerpaartaralugulu pissanganarnerpaartaanni, silarsuaq tamakkerlugu oqaluussiniarluni ilinniartitsiniarlunilu immikkut suliniarnermi, peqataanissamut periarfissaqarputit. (Apustilit Suliaat 1:8) Aalajangersinnaavutit allat tamatuminnga suliaqarneranni isiginnaartuuinnarniarlutit suleqataaniarlutilluunniit. Piginnaanivit Guutimut kiffartornermut taassumalu naalagaaffianik tapersersuinermut atornissaannut tunuarsimaaqinak. “Inuusuttuunerpit ulluini” Pinngortitsisinnut kiffartorsimanerit peqqissimissutiginngisaannassavat. — Oqaluussisartup oqaasii 12:1.
[Quppernerup ataani ilanngussat]
^ imm. 14 Atuakkami Unge spørger — Svar der duer, atuagaq 2-mi kapitali 34mi iluaqutigisinnaasannik paasissutissaqarpoq.
^ imm. 16 Hebræerit 5:14, NV: “[Nerisassat] tamuasarissat inersimalluartut, eqqortumik eqqunngitsumillu immikkoortitsisinnaanermut sungiusagaasumik paasinnissinnaassuseqartut, nerisassaraat.”
Qanoq akissavit?
• Sooq imminut anguniagassittariaqarpit?
• Suut anguniagassaqqissuuppat?
• Kuisinnissap angunissaanut suut piumasaqaatigineqarpat?
• Illit pingaarnersiueriaatsinnik eqqarsaatiginninnerit anguniakkavit angunissaannut qanoq iluaqutigisinnaaviuk?
[Atuaqqissaarnermi apeqqutit]
[Qupp. 20-mi assiliartaq]
Ullut tamaasa Biibilimik atuartarnissat anguniagaraajuk?
[Qupp. 22-mi assiliartaq]
Kuisinnissavit angunissaanut suut iluaqutigissavigit?
[Qupp. 23-mi assiliartaq]
Assersuusiaq sumik ilinniarfigaajuk?