Enu Atwansi, Chumanyi Chimwatela Kwila Muchihandilu Chenu?

“Hinatemukaña nakululutaku; chinalwaña hinetaña hampepelaku.”—1 KOR. 9:26.

1, 2. Hakwila nawu chihandilu chenu chikali chachiwahi hampinji yimunakukula, chumanyi chimwatela kwikala nachu?

 NEYI munakuya halwendu munjila yimunabuli kwiluka, munateli kusenda mapu hela kwihula muntu kulonda yayileji chimwatela kwenda. Mapu yikuyikwashaku kwiluka iluña kumudi nikwiluka njila yimwatela kuya. Muntu imukwihula wukuyikwasha kulonda mubuli kujimbala. Hela chochu, neyi himuneluki kumunakuyaku, mapu nimuntu imukwihula hiyanateli kuyikwasha chikupuku. Hakwila nawu mubuli kujila-jila, mwatela kwiluka chikupu kumunakuya.

² Hampinji yimunakukula mukumonaña yuma yamuchidiwu. Mukweti mapu yalala nimuntu wakuyileja. Bayibolu yekala neyi mapu yatela kuyikwasha kwiluka njila yalala yimwatela kuya. (Yish. 3:5, 6) Neyi mudizisha chachiwahi chinleji chenu, chikuyikwasha nankashi kwenda munjila yalala. (Rom. 2:15) Hakwila nawu chihandilu chenu chikali chachiwahi, mwatela kwiluka kumunakuya. Mwatela kwimika yikonkwanyi yayiwahi.

3. Wulokwinyi wafumaña mukwimika yikonkwanyi wunashimuniyi Pawulu ha 1 Akorinda 9:26?

³ Kapostolu Pawulu washimwini nkisu yafumaña mukwimika yikonkwanyi nikufwila kuyishikija hampinji yasonekeliyi nindi: “Chinatemukaña mwenomu, hinatemukaña nakululutaku; chinalwaña hinetaña hampepelaku.” (1 Kor. 9:26) Neyi mwimika yikonkwanyi, munateli kutemuka nachikuhwelelu. Katataka mutachiki kufuukula hayuma yamaneni yinakundami kukudifukula, nyidimu, maluwi, nikuhemba chisaka niyuma yikwawu. Mpinji jikwawu munateli kutoñojoka nenu mukweti njila jajivulu jakala jimwatela kuzatisha. Ilaña neyi mutoñojokela chadimu chimwatela kwenda, nakufuukulahu kushindamena hayuma yalala nihanshimbi jekala Mwizu daNzambi, himwakapwempuka nakuya munjila yacheñuku.—2 Tim. 4:4, 5.

4, 5. (a) Chumanyi chikumwekana neyi mukañanya kudimikila yikonkwanyi? (b) Muloñadi kufuukula kwenu chikwatela kushindamena hakufwila kumuzañalesha Nzambi?

⁴ Neyi mukañanya kudimikila yikonkwanyi, akwenu niantañishi anateli kuyikakeja nawu mwili yuma yinakutoñojokawu nawu yalala. Hela chakwila munemiki yikonkwanyi yayiwahi, amakwawu anateli kuyileja yuma yinakutoñojokawu. Hampinji yimunakutiya chinakuyilejawu, dihulenu nenu, ‘Yikonkwanyi yinakunlejawu yikunkwasha kwanuka Nleñi yami muwansi wami tahindi yikuluwañesha?’—Tañenu Mukwakutaŋisha 12:1.

⁵ Muloñadi yuma yimwafuukulaña muchihandilu chiyatela kushindamena hakufwila kumuzañalesha Nzambi? Chatachi, Yehova watwinka yuma yayiwahi yejima yitukweti. (Yak. 1:17) Eñañi, antu ejima atela kumusakilila Yehova. (Chim. 4:11) Kuduhu njila yayiwahi yimwatela kumwekeshelamu kusakilila kudi Yehova kubadika hakutoñojoka hadi yena hampinji yimunakwimika yikonkwanyi? Tutalenu hayikonkwanyi yayiwahi yimwatela kufwila nichimwatela kwila kulonda mushikiji yikonkwanyi yamuchidiwu.

Mwatela Kwimika Yikonkwanyi Yamuchidinyi?

6. Mwatela kwimika yikonkwanyi yamuchidinyi yalema nawa muloñadi?

⁶ Neyi chalumbulwiluwu muchibaaba chinafumuhu,  chikonkwanyi cheneni chimwatela kwimika chidi chakwiluka chikupu nenu nsañu yasonekawu muBayibolu yalala. (Rom. 12:2; 2 Kor. 13:5) Hadaha akwenu akuhwelela nawu yuma yadinjilili yayeni hela akuhwelela muntañishilu yakutwamba yamunsakililu, muloña ayilejeli kudi antu amakwawu nawu atela kukuhwelela muniyi yuma. Ilaña enu bayi mukuhwelela muchuma hamuloña wakwila akwenu anakuyikakeja nawu mwitejiku. Anukenu nenu, Yehova nakukeña nindi mumuzatili namaana enu ejima. (Tañenu Matewu 22:36, 37.) Tata yetu wamwiwulu nakukeña nindi mukoleshi chikuhwelelu chenu hayuma yimunakumona.—Heb. 11:1.

7, 8. (a) Mwatela kwimika yikonkwanyi yamuchidinyi yakushikija mukapinji kantesha yikuyikwasha kukolesha chikuhwelelu chenu? (b) Chumanyi chikumwekana neyi mushikija yikonkwanyi yikwawu yimwatela kuwanisha mukapinji kantesha?

⁷ Hakwila nawu mukoleshi chikuhwelelu chenu, komana kwila mwimika yikonkwanyi yimwatela kushikija mukapinji kantesha nehi? Mwatela kwimika chikonkwanyi chakulombaña hefuku hefuku. Hakwila nawu mulombi yuma yimunakukeña chakadi kufuntila-funtilamu, mwatela kutoñojoka hela kusoneka yuma yamwekana hanodu ifuku yimukutena mukulomba. Bayi mutena kukala kumwamona hohuku ilaña tenenu niyuma yimwadiluñisha. (Fwi. 4:6) Cheñi mwatela kwimika chikonkwanyi chakutañaña Bayibolu hefuku hefuku. Mweluka ntahi nenu neyi mukutañaña mafu awana hefuku, munateli kumanisha kutaña Bayibolu yejima muchaaka chimu hohu? * Mukanda waMasamu 1:1, 2, wahosha nawu, “Wakooleka muntu . . . watiyaña kuwaha nanshimbi jaYehova; nshimbi jindi watoñojokañamu nimwaana niwufuku.”

⁸ Chikonkwanyi chamuchisatu chimwatela kwimika chakushikija mukapinji kantesha chidi chakuloñesha ñakwilu kulonda mwakuleñahu hakupompa kwachipompelu kudi kwejima. Hakusambila, mwatela kwakula kuhitila mukutaña ñakwilu hela nsona. Kuhiñahu, munateli kwimika chikonkwanyi chakwakula mumazu enu. Eñañi, mpinji yejima yimukwakulahu, dikwila nawu munakumulambula Yehova  mulambu. (Heb. 13:15) Chimwashikija iyi yikonkwanyi yikwawu, mukuleka kutiya woma, nawa mukusweja kumuhameka Yehova, diyi mpinji yimwatela kwimika yikonkwanyi yimukashikija kumbidi.

9. Neyi kanda mwikali mukwakushimwina waWanta, yikonkwanyi yamuchidinyi yimwakashikija kumbidi yimwatela kwimika?

⁹ Yikonkwanyi yamuchidinyi yimukashikija kumbidi yimwatela kwimika? Neyi kanda mutachiki kushimwina nsañu yayiwahi kudi antu ejima, mwatela kwimika chikonkwanyi chimukashikija kumbidi chakwikala mukwakushimwina waWanta. Chimwashikija ichi chikonkwanyi chalema, mwatela kushimwinaña mpinji yejima nikwikala adikita, bayi muhitishamu kakweji chakadi kuya mumudimu wakushimwinaku. Mwatela cheñi kwiluka chakuzatisha Bayibolu mumudimu wakushimwina. Chimukuyizatishaña, mukudiluñishaña chikupu mumudimu wakushimwina. Kuhiñahu mwatela kuwejelahu mpinji yakuzata mumudimu wakushimwina kwitala nikwitala nikufwila kwikala namuntu wakudizisha Bayibolu. Hakwikala mukwakushimwina wabula kupapatishewa, mwatela kwimika chikonkwanyi chakupapatishewa kulonda mwikali Chinsahu chaYehova Nzambi wadihana nawa wapapatishewa.

10, 11. Yikonkwanyi yamuchidinyi yikashikijawu kumbidi yatela kwimikawu atwansi apapatishewa?

¹⁰ Neyi mwekala dehi kambuña aYehova wapapatishewa, talenu yikonkwanyi yikwawu yimwatela kushikija kumbidi. Mpinji yikwawu mwatela kukwasha yipompelu yishimwineña mumaluña mwabulaña kuzatilawu kakavulu. Cheñi hampinji yimudi nañovu nawa akola kumujimba mwatela kuzataku mudimu wawupayiniya wakukwasha hela wampinji yejima. Apayiniya amavulu anateli kuyileja nawu mudimu wampinji yejima diyi njila yayiwahi yakumwanukilamu Nleñi yenu muwansi wenu. Iyi diyi yikonkwanyi yimwatela kushikija henohu kanda mufumi mumakasa awanvwali jenu. Neyi mushikija iyi yikonkwanyi chipompelu chenu chikuhetelamu.

¹¹ Kudi yikonkwanyi yikwawu yimwatela kwimika yimwakashikija kumbidi yatela kuhetesha yipompelu yikwawu. Chakutalilahu, munateli kufuukulahu kuya nakuzatila kwiluña hela kwituña dacheñi kudi kukankila kwawakwakushimwina. Hadaha munateli kuzataku mudimu wakutuña Matala aWanta hela nyitayi yamumatuña acheñi. Munateli kutachika mudimu wahaBeteli hela kwikala kamishonali. Ilaña chuma chatachi chimwatela kwila henohu kanda mutachiki kutoñojoka hayikonkwanyi yimwakashikija kumbidi yitunashimuni, mwatela kupapatishewa. Neyi kanda mupapatishewi, toñojokenu hayuma yimwatela kwila hakushikija ichi chikonkwanyi.

Kushikija Chikonkwanyi Chakupapatishewa

12. Yumanyi yaleñelaña amakwawu kupapatishewa, nawa muloñadi chiyabula kutelela?

¹² Munateli kulumbulula nenu chipapatishu chazataña mudimwinyi? Antu amakwawu anateli kutoñojoka nawu chayikwashañaku kubula kuvulumuna. Amakwawu niwena atoñojokaña nawu atela kupapatishewa muloña akwawu ayipapatisha dehi. Atwansi amakwawu niwena afwilaña kuzañalesha anvwali jawu. Ilaña, chipapatishu bayi neyi hichuma chatela kuyikañesha kwila yuma yimwatela kwila mukuswamujokaku; nawa himwatela kupapatishewa hamuloña wekakeja dawakwenuku. Mwatela kupapatishewa neyi muneluki chikupu chalumbuluka kwikala Chinsahu chaYehova nawa neyi muneluki nenu munadiloñeshi kupapatishewa nawa mukutwesha kuzata iwu mudimu.—Mukwa. 5:4, 5.

13. Muloñadi chimwatela kupapatishewa?

¹³ Chuma chikuyileñela mupapatishewi chidi chakwila nawu Yesu walejeli atumbanji twindi ‘kwilisha atumbanji . . . , nikuyipapatisha.’ Cheñi wemikili chakutalilahu kuhitila mukupapatishewa. (Tañenu Matewu 28:19, 20; Maku 1:9.) Kubombelahu, chipapatishu hichuma chalema chatela kwilawu antu anakukeña kupuluka. Hanyima yakuhosha nindi Nowa watuñili watu mwapulukililiyi nichisaka chindi Hadibaji, kapostolu Petulu wahosheli nindi: “Wena meji owu hichifwikija chachipapatishu chayihandishaña; . . . nakusañuka kwaYesu Kristu mudi afu.” (1 Pet. 3:20, 21) Ilaña chipapatishu hidimu chatalishaku, himwatela kupapatishewa hamuloña wakukiñewa  hohuku. Ilaña, mwatela kupapatishewa muloña mwamukeña Yehova nawa munakukeña kumuzatila namuchima wenu wejima, nawumi wenu, namaana enu, niñovu jenu jejima.—Maku 12:29, 30.

14. Muloñadi antu amakwawu chashintajalilañawu kubula kupapatishewa, ilaña chumanyi chatela kuyikolesha?

¹⁴ Antu amakwawu ashintajalaña kupapatishewa muloña achinaña nawu hadaha kumbidi akayihaña. Komana ninenu mwachinaña? Neyi mudi nawoma, woma wamuchidiwu wunateli kuyikwasha. Dikwila nawu muneluki nenu kwikala Chinsahu chaYehova hichuma chalema nankashi. Hadaha kudi chuma chikwawu chayileñelaña mutiyeña woma? Hekwawu kanda mwiluki chikupu nenu kulondela nshimbi jaNzambi dichihandilu chachiwahi. Dichi neyi mukutoñojokaña hayuma yatama yamonaña antu adiwulaña nshimbi jamuBayibolu kunateli kuyikwasha kufuukulahu chachiwahi. Indi kwiji mwakeña nshimbi jaNzambi, ilaña himwadikuhwelela nenu munateli kuhemba nshimbi jinduku. Ichi hichinjikijilu chachiwahi, muloña chinakumwekesha nawu mwadizoza. Bayibolu niyena yahoshaña nawu nyichima yawantu ejima abula kuwanina yasweja kudimbana. (Yere. 17:9) Munateli kuhemba chipapatishu chenu neyi mutwalekahu ‘nakusha muchima wakwila mwaya izu daNzambi.’ (Tañenu Masamu 119:9.) Hela chakwila kudi yuma yayivulu yinakuyikañesha kupapatishewa, mwatela kumanisha yuma yejimiyi, niyuma yinakuyileñela kwakama. *

15, 16. Munateli kwiluka ñahi nenu mwatela kupapatishewa?

¹⁵ Hanu dinu, munateli kwiluka ñahi nenu munashikuhu kupapatishewa? Njila yimu yidi yakudihula malwihu amuchidawa: ‘Komana nateli kulumbulwila akwetu ntañishilu yalema yamuBayibolu? Komana nayaña nakushimwina hela chakwila anvwali jami ashimwinaña wanyi? Komana nafwilaña kuya kukupompa kwawakwaKristu kwejima? Komana nateli kwanukahu mpinji yinakaanini kwila yuma yankakejeleñawu kudi akwetu? Natela kutwalekahu kumukalakela Yehova hela chakwila anvwali jami niamabwambu aleka kumukalakela? Komana nalombaña kudi Nzambi kutalisha hawubwambu wami nayena? Komana nadihani chikupu kudi Yehova mukulomba?’

¹⁶ Chipapatishu hichuma chahimpaña chihandilu chamuntu, nawa bayi neyi hichuma chakuhemeshaku. Komana munapami mumaana nakufuukula chikupu hansañu yachipapatishu? Kupama mumaana hikwatalisha hohu mukuhana mpanji jajiwahi hachinañamu hela kwakula chachiwahi hakupompaku. Kwatalisha mukufuukula chachiwahi kushindamena hanshimbi jimweluka jamuBayibolu. (Tañenu Aheberu 5:14.) Neyi kanda mushiki hachipimu chakufuukula mwenimu, hambidi yenu hadi kukooleka kweneni, kwakumukalakela Yehova namuchima wenu wejima nikwikala nachihandilu chinakumwekesha nawu mwadihana chikupu kudi yena.

17. Chumanyi chatela kuyikwashaku kuumika kukala kwatela kuyiholokela hanyima yachipapatishu?

 ¹⁷ Hanyima yakupapatishewa, munateli kwikala namuzañalu weneni wakukeña kumukalakela Nzambi. Ilaña mumpinji yantesha, munateli kuholokela mukukala kunateli kweseka chikuhwelelu nikuchinchika kwenu. (2 Tim. 3:12) Bayi mutoñojoka nenu mwatela kushinda iku kweseka nkawenuku. Lombenu wukwashu kudi anvwali jenu. Lejenu akulumpi apama muchipompelu kulonda ayikwashi. Kwatenu wubwambu nawantu anateli kuyikwasha. Ilukenu nenu Yehova wayakamenaña, nawa wukuyinka ñovu yatela kuyikwasha kushinda kukala kwejima kwatela kuyiholokela.—1 Pet. 5:6, 7.

Munateli Kushikija Ñahi Yikonkwanyi Yenu?

18, 19. Munateli kuhetelamu ñahi mukushinshika hayuma yimwalemesha?

¹⁸ Hela chakwila mwakeñaña kwila yuma yayiwahi, komana himwawanaña mpinji yashikila yakwila yuma yimunakukeña niyimunakufwilaku? Neyi himwawanaña mpinjiku, shinshikenu hayuma yimwalemesha. Talenu ichi chakutalilahu: Nonenu mbeketi yapulasitiki nawa shenumu malola amaneni amavulu. Kuhiñahu shenumu wusekulula. Ichi dinu mbeketi yenu yinenzali namalola niwusekulula. Yisukulenu mumbeketi nawa hembenu wusekulula nimalola. Ichi sambilenu kusha wusekulula mumbeketi, kuhiñahu esekenu kushamu malola. Komana akwiñilamu? Inehi muloña mwasambila kusha wusekulula kwishina.

¹⁹ Iku dikukala kumwamonaña hakuzatisha mpinji yenu chachiwahi. Neyi musambila kutwamijaku kuhema, muchihandilu chenu himunateli kwikala nampinji yakwila yuma yalemaku—yuma yakuspiritu. Ilaña neyi mulondela mwayifumbaña Bayibolu nawu ‘mushinshiki yuma yabadika kulema,’ mukwikalaña nampinji yeneni yakwila yuma yaWanta nikapinji kakuhema.—Fwi. 1:10.

20. Neyi mutachika kwakama nikujinooka hampinji yimunakufwila kushikija yikonkwanyi yenu, mwatela kwiladi?

²⁰ Chimukufwilaña kushikija yikonkwanyi yenu, kubombelahu nichikonkwanyi chakupapatishewa, mpinji yikwawu mukwakamaña nikujinooka. Neyi mutachika kwakama nikujinooka, ‘umbilenu chiteli chenu hadi Yehova, yena wukukukwashaku.’ (Mas. 55:22) Hayinu mpinji, mudi nakukooleka kwakukalakala mudimu wawuwahi nawa walema mukuhanda kwawantu, dikwila nawu kampeni kamukaayi kejima kakushimwina nikutañisha. (Yil. 1:8) Neyi munakeñi wanyi munateli kudishakamina nakutala chinakudikitawu akwenu iwu mudimu. Neyi nehi munateli kuzataku iwu mudimu wawuwahi. Dichi mwatela kuzatisha ñovu yenu nakumukalakela Nzambi nikutwala mudimu waWanta hambidi. Himwakaditoñesha hachuma chimunafuukuluhu chakumukalakela ‘Nleñi yenu mumafuku awukwenzi wenuku.’—Mukwa. 12:1.

[Tumazu twaheshina]

Mukwakula Nenudi?

• Muloñadi chimwatela kwimikila yikonkwanyi?

• Yikonkwanyi yamuchidinyi yalema yimwatela kushikija?

• Chumanyi chakeñekaña hakushikija chikonkwanyi chakupapatishewa?

• Indi kushinshika hayuma yimwalemesha kunateli kuyikwasha ñahi kushikija yikonkwanyi yenu?

[Malwihu aKuzatisha haKudiza]

[Mwevulu wudi hefu 13]

Komana mwemika chikonkwanyi chakutañaña Bayibolu ifuku niifuku?

[Mwevulu wudi hefu 15]

Chumanyi chikuyikwasha kushikija chikonkwanyi chenu chakupapatishewa?

[Mwevulu wudi hefu 16]

Chumanyi chimunadizili kunichi chakutalilahu?