Un Rowere—Ubiro Tiyo Nade gi Ngimau?
Un Rowere—Ubiro Tiyo Nade gi Ngimau?
“Ok agochi ka ng’at ma goyo yamo.”—1 KOR. 9:26.
1, 2. Mondo omi weche odhini maber kaka imedo dongo, en ang’o monego itim?
KAPO ni idhi e wuoth moro mabor to ok ing’eyo yo monego iluw, inyalo ting’o map. Map nyalo konyi fwenyo kama intie, kendo miyo ing’e yo monego iluw. Kata kamano, map ok nyal konyi kapo ni ok ing’eyo kama idhie. Mondo omi kik iwuoth awuotha maonge kama ichomoe, dwarore mondo ing’e maber kama idhie.
2 Gima chalo kamano timoreni sani kaka imedo dongo ka ichomo bedo ng’at maduong’. In gi map minyalo gen kendo manyalo tayi e ngima. Muma en kaka map manyalo konyi yiero yo monego iluw. (Nge. 3:5, 6) Ka chunyi otieg e yo maber, onyalo konyi ahinya siko e yo makare. (Rumi 2:15) Kata kamano, mondo omi weche odhini maber e ngima, dwarore bende ni ing’e kama ichomoe. Nyaka itim chenro maber e wi gigo ma idwaro timo e ngimani.
3. En ber mane mayudore kuom keto chenro motelo ma Paulo losoe e 1 Jo Korintho 9:26?
3 Jaote Paulo nonyiso gimomiyo en gimaber keto chenro kendo temo chopogi kane ondiko kama: “Aringo, ok ka ng’a ma riwo gi kiawa; ok agochi ka ng’at ma goyo yamo.” (1 Kor. 9:26) Ka iketo chenro mag gik midwaro timo e ngimani, ibiro ringo ka in gadier gi kama idhie. Kinde okayo mabiro dwarore ni itim yiero kuom weche madongo kaka, lamo, tich, kend, ngima joot, kaachiel gi weche mamoko. Nitie kinde ma inyalo paro ka gima in gi yiero mang’eny ma chocho pachi. To ka itimo chenro motelo, kitiyo gi puonj mayudore e Wach Nyasaye, ok ibi yudo tem mar luwo yo maok kare.—2 Tim. 4:4, 5.
4, 5. (a) Ang’o manyalo timore kapo ni ok iketo chenro e ngimani? (b) Ang’o momiyo gombo mar moro Nyasaye ema onego ochik yiero mitimo e ngima?
4 Kapo ni in iwuon ok iketo chenro kaka ibiro tiyo gi ngimani, yot mondo mbeseni kaachiel gi jopuonjni ema ochiki e timo gima gin ema giparo ni ber kodi. En adier ni kata kapo ni iseketo chenro e ngimani, jomoko podi nyalo nyisi gima giparo ni onego itim. Sama ichiko iti ne paro ma gichiwo, penjri ane kama, ‘Be paro ma gichiwo nyalo konya mondo apar Jachwechna ka podi an rawera, koso parogo nyalo mona timo kamano gi chunya duto?’—Som Eklesiastes 12:1.
5 Ang’o momiyo gombo mar moro Nyasaye ema onego ochik yiero mitimo e ngimani? Wach achiel en ni Jehova ema omiyowa gik moko duto mabeyo ma wan-go. (Jak. 1:17) Kuom adier, ng’ato ka ng’ato nigi gowi mar dwoko ne Jehova erokamano. (Fwe. 4:11) Be nitie yo moro maber moloyo minyalo dwokogo erokamano, maloyo keto Jehova e paro sama ichano kaka idwaro tiyo gi ngimani? Weuru wanon ane moko kuom chenro ma inyalo keto e ngimani kaachiel gi gik minyalo timo mondo omi ichopgi.
Gin Chenro Mage Minyalo Keto e Ngimani?
6. En chenro mane maduong’ minyalo keto, to nikech ang’o?
6 Mana kaka onyis e sula mokalo, chenro maduong’ minyalo keto en ng’iyo kendo nono mondo ibed gadier in iwuon ni gik ma Muma wacho gin adier. (Rumi 12:2; 2 Kor. 13:5) Nyalo bedo ni mbeseni oketo yie kuom puonj kaka mar ni gik moko nosieko maok ochwegi, kata kuom puonj mag miriambo mag din, nimar jomoko ema owachonegi ni mago e puonj monego giyiego. Kata kamano, ok onego iket yie kuom puonj moro mana nikech jomoko owachoni ni itim kamano. Ng’e ni, Jehova dwaro ni itine gi riekoni duto. (Som Mathayo 22:36, 37.) Wuonwa me polo dwaro ni ibed gi yie ma in-go gadier.—Hib. 11:1.
7, 8. (a) Gin chenro mage minyalo chopo gie sani mabiro konyi tego yieni? (b) Ang’o mabiro timoreni sama ichopo moko kuom chenro masani?
7 Mondo iteg yie mari, donge inyalo keto chenro moko minyalo chopo gie sani? Chenro achiel nyalo bedo wuoyo gi Nyasaye e lamo pile ka pile. Inyalo keto e pachi kata ndiko piny gik motimore e odiechieng’ ma idwaro keto e kwayoni, kendo timo kamano biro konyi ng’eyo gigo monego ikwa achiel kachiel. Kik ilam mana ka ihulo chandruoge miromogo kende, to bende inyalo hulo gigo ma ne omori odiechieng’no. (Fili. 4:6) Chenro machielo en somo Muma odiechieng’ kodiechieng’. Be ing’eyo ni ka isomo chiegni sula ang’wen mag Muma odiechieng’ kodiechieng’, to inyalo tieko Muma mangima kuom higa achiel kende? * Zaburi 1:1, 2 wacho kama: “Jali ojahawi . . . [ma] morne maduong’ en kuom chik Jehova, to oparo aming’a kuom chikne odiechieng’ gi otieno.”
8 Chenro mar adek minyalo keto ma ichop gie sani en iko dwoko moro achiel mibiro chiwo e chokruok ka chokruok. Mokwongo, inyalo chako gi somo dwoko achiel kachiel e buk, kata somo ndiko. Bang’e inyalo keto chenro mar chiwo dwoko kitiyo gi wecheni iwuon. Kuom adier, kinde ka kinde ma ichiwo dwoko, imiyo Jehova mich mar misango. (Hib. 13:15) Bang’ chopo moko kuom chenrogo, ibiro medo bedo gadier kuom puonj mag Muma kendo medo hero Jehova, bende ibiro bedo moikore keto chenro moko ma ibiro chopo gie kinde mabiro.
9. Kapok ibedo jalendo mar Pinyruoth, en chenro mane mar kinde mabiro minyalo keto?
9 Gin chenro mage mag kinde mabiro minyalo keto? Kapo ni pok ichako lando wach maber, chenro minyalo keto en mar bedo jaland wach Pinyruoth. Bang’ chopo e migawo ma jaberno, biro dwarore ni ilend maok ibari kendo medo lony e tijno maok iwe dwe kal maok ilendo. Bende biro dwarore ni ipuonjri tiyo gi Muma e lendo. Ka itimo kamano, ibiro yudo ka tij lendo medo mori ahinya. Bang’ mano, inyalo medo seche mitiyogo e tij lendo mar ot ka ot, kata inyalo timo matek mondo ibed gi japuonjre Muma. Kapo ni in jalendo mapok obatisi, donge chenro maberie moloyo ma inyalo chopo, en mar bedo Janeno mobatisi mosechiwore ne Jehova Nyasaye?
10, 11. Gin chenro mage mag kinde mabiro ma rowere ma osebatisi nyalo keto?
10 Ka in jatich Jehova mosebatisi, maluwogi gin moko kuom chenro mag kinde mabiro minyalo keto. Inyalo keto chenro mar dhi konyo kanyakla moko lendo e alwora ma jolendo dwarore ahinya. Bende inyalo yiero tiyo gi tekoni koda ngimani e bedo painia makonyo kata painia mapile. Nitie jopainia gana mang’eny mamor manyalo wachoni ni, yo maberie moloyo mar paro Jachwechni e kinde ma in rawera, en tiyo ne Nyasaye kuom thuoloni duto. Magi gin chenro ma inyalo chopo ka podi idak gi jonyuolni. Kanyaklau bende biro yudo ber ahinya ka ichopo chenro kaka mago.
11 Nitie chenro mamoko manyalo miyo ikel kony ne kanyakla mamoko bende. Kuom ranyisi, inyalo chano mar dhi lendo e gweng’ machielo kata e piny moro ma jolendo dwarore ahinya. Inyalo dwaro konyo e gero Ute Romo kata gero ofise mag Bethel e pinje moko. Inyalo kata mana tiyo e Bethel kata bedo misonari. En adier ni batiso e chenro monego ikwong chopo kapok ichopo e migepe mamokogo. Kapok obatisi, inyalo nono gigo monego itim mondo omi ichop e okang’no.
Chopo e Okang’ mar Batiso
12. Gin weche mage mamiyo jomoko dhi e batiso, to ang’o momiyo mago ok oromo miyo ng’ato obatisi?
12 Inyalo lero nade gimomiyo batiso dwarore? Jomoko nyalo paro ni batiso biro geng’o ng’ato kuom timo richo. Jomoko bende nyalo paro ni onego obatisgi mana nikech jowetegi bende osebatisi. Rowere moko to nyalo dwaro mana moro jonyuolgi. Kata kamano, batiso ok en singruok moro mabiro moni timo gik moko ling’ling’ ma in iwuon idwaro timo; kata ok onego obatisi mana nikech jomoko wachoni ni itim kamano. Onego obatisi bang’ ka iseng’eyo maber gima tiend bedo achiel kuom Joneno mag Jehova en, kendo isebedo gadier ni iikori kawo ting’ ma mano kelo.—Ekl. 5:4, 5.
13. Ang’o momiyo onego obatisi?
13 Achiel kuom gik mamiyo ibatiso ji en nikech Yesu nochiko jolupne mondo ‘otim ogendini jopuonjre ka gibatisogi.’ Bende ne oketo ne ji ranyisi kane en owuon obatise. (Som Mathayo 28:19, 20; Mariko 1:9.) E wi mano, batiso en okang’ madwarore ahinya kuom jogo madwaro ni oresgi. Bang’ wuoyo kuom kaka Noa nogero yie ma ne oresego kaachiel gi joode e kinde Ataro, jaote Petro nowacho kama: “Pigno nobet ranyis mar batiso ma koro resou . . . kuom chier mar Yesu Kristo.” (1 Pet. 3:20, 21) Kata kamano, mano ok nyis ni gimaduong’ mamiyo ibatisoi en mana ni mondo iyud resruok. Kar mano, ibatisoi nikech ihero Jehova kendo idwaro tiyone gi chunyi, ngimani, riekoni, koda tekoni duto.—Mari. 12:29, 30.
14. Gin gik mage manyalo miyo jomoko oluor batiso, to en jip mane ma imiyi?
14 Rowere moko nyalo luoro batiso nimar giparo ni bang’e inyalo golgi oko mar kanyakla. Be in gi luoro machal kamano? Ka en kamano, luorono ok rach kinde duto. Mano nyalo nyiso ni ing’eyo ting’ maduong’ ma bedo achiel kuom Joneno mag Jehova kelo. Be nyalo bedo ni nitie gimachielo mamoni batiso? Seche moko nyalo bedo ni podi ok in gadier chuth ni dak kaluwore gi puonj mag Nyasaye e gimaberie moloyo e ngima. Ka en kamano, paro matut kuom gik moseyudo jogo ma otamore luwo puonj mag Muma nyalo konyi timo yiero. Kata nyalo bedo ni ihero chike Nyasaye, to in iwuon iluor ni ok inyal ritogi. Kuom adier, mano nyalo nyiso ni ifwenyo kuonde ma iremie. Nikech bende Muma nyiso ni chuny dhano morem opong’ gi wuond. (Yer. 17:9) Kata kamano, inyalo rito chike kod puonj Nyasaye ‘ka iritori kaka wach Nyasaye obet.’ (Som Zaburi 119:9.) Kata bed ni en wach mane mamoni batiso, dwarore ni ikaw okang’ mar nonogi. *
15, 16. Ere kaka inyalo ng’eyo kabe iseikori ne batiso?
15 Kata kamano, ere kaka inyalo ng’eyo kabe iseikori ne batiso? Yo achiel en ka ipenjori penjo kaka magi: ‘Be anyalo lero puonj mayot mag chako ng’eyogo Muma? Be atiyo tij lendo kata kapo ni jonyuolna ok tim kamano? Be atemo mondo adhi e chokruoge duto mag Jokristo? Be anyalo paro kinde moko ma ne akwedo moriere tembe mag mbese? Be anyalo dhi nyime tiyo ne Jehova kata kapo ni jonyuolna koda osiepena oweyo tiyone? Be asewuoyo gi Nyasaye e lamo kuom wach bedo gi winjruok kode? Be asechiwora chuth ne Jehova kokalo e lamo? ’
16 Batiso en okang’ ma loko ngima ng’ato, kendo onego okawe gi pek. Be isetegno moromo minyalo paro kuom ting’no e yo mapek? Bedo motegno oriwo gik mang’eny maok mana bedo gi nyalo mar chiwo twak maber e ndiri, kata chiwo dwoko maber e chokruok. Bedo motegno dwaro ni itim yiero kaluwore gi ng’eyo maber ma in-go kuom chike koda puonj mag Muma. (Som Jo Hibrania 5:14.) Kapo ni ngimani osechopo e okang’ ma inyalo timo kamano, to gima nie nyimi en thuolo maduong’ ahinya maloyo duto—thuolo mar tiyo ne Jehova gi chunyi duto e yo manyiso ni kuom adier in ng’at mochiwore ne Nyasaye.
17. Gin ang’o mabiro konyi kedo gi tembe manyalo bironi mapiyo bang’ batiso?
17 Mapiyo bang’ batiso inyalo bedo gi siso ahinya mar tiyo ne Nyasaye. Kata kamano, mapiyo inyalo romo gi tembe moko madwaro ni inan kuom yieni. (2 Tim. 3:12) Kik ine ni onego iked gi tembego mana kendi. Wuo gi jonyuolni mondo gikonyi. Dhi ir Jokristo motegno manie kanyakla mondo okonyi. Dhi nyime mako osiep gi jogo mabiro konyi kendo riwi lwedo. Kik wiyi wil ni Jehova pari kendo odewi, bende obiro miyi teko madwarore mondo iked gi chal moro amora minyalo yudo.—1 Pet. 5:6, 7.
Ere Kaka Inyalo Chopo Chenro Miseketo?
18, 19. Ere kaka inyalo yudo ber kuom nono gigo miketo mokwongo e ngima?
18 Kata obedo ni itemo ahinya, be nitie kinde ma ineno ni ionge gi thuolo moromo mar timo gik midwaro kata madwarore ni itim? Ka en kamano, onego inon gigo miketo mokwongo e ngima. Kuom ranyisi: Kaw ane ndowo moro kae to iket kite moko madongo e ie. Kae to pong’ ndowono gi kwoyo. Koro in gi ndowo mopong’ gi kite kaachiel gi kwoyo. Koro gol ane kitego koda kwoyo ei ndowono. Kae to dwokgi e ndowo ka koro ichako gi kwoyo eka iluwie gi kitego. Donge iyudo ka koro kitego ok rom ei ndowono? Mano en nikech ne ikwongo keto kwoyo e ndowono.
19 Gima kamano nyalo timoreni sama itiyo gi sa. Ka iketo mokwongo weche kaka manyo mor, ibiro neno ka ionge gi thuolo moromo mar timo gik madongo e ngima, tiende ni gik motudore gi tiyo ne Nyasaye. To ka iluwo kaka Muma jiwo ni ‘wabed gi adier kuom weche madwarore moloyo,’ ibiro yudo ka in gi thuolo mar luwo weche mag Pinyruoth kod yueyo gi mor.—Fili. 1:10, New World Translation.
20. Kapo ni ibedo gi parruok kata kiawa sama itemo chopo chenro miseketo, en ang’o monego itim?
20 Sama itemo matek chopo chenro miseketo, moriwo nyaka batiso, inyalo bedo gi parruok kod kiawa moko. Ka mano otimoreni, “ket ting’ mari kuom Jehova, mi nopidhi.” (Zab. 55:22) Gie sani, in gi thuolo mar timo tich majaber maduong’ ahinya, tiende ni tij piny mangima mar lendo gi puonjo. (Tich 1:8) Inyalo yiero mar weyo maok itiyo tijno ka irango aranga kaka jomoko to tiye. Kata in iwuon inyalo bedo achiel kuom jogo ma tiye. Kik iluor tiyo gi nyalo kod mich ma in-go e siro tij lando wach Pinyruoth. Ok iniywag ang’e ngang’ kuom tiyo ne “Jachwechni ka podi in rawera.”—Ekl. 12:1.
[Weche moler piny]
^ par. 7 Ne Mnara wa Mlinzi, ma Agost 1, 2009, ite mag 15-18.
^ par. 14 Mondo iyud kony kuom wachni, ne bug Maswali Ambayo Vijana Huuliza—Majibu Yafanyayo Kazi, Buk mar 2, sula 34.
Inyalo Dwoko Nade?
• Ang’o momiyo onego iket chenro mag gigo midwaro timo e ngima?
• Gin chenro mage maber ka ng’ato ochopoe?
• Gin ang’o madwarore ni ng’ato otim kapok ochopo e batiso?
• Ere kaka nono gigo miketo mokwongo e ngima nyalo konyi chopo chenro miseketo?
[Penjo mag Puonjruok]
[Picha manie ite mar 13]
Be in gi chenro mar somo Muma pile?
[Picha manie ite mar 15]
Ang’o mabiro konyi chopo e okang’ mar batiso?
[Picha manie ite mar 16]
En puonj mane ma iyudo e ranyisini?