Joven, ¿imatataq kawënikiwan ruranki?

“Pelyacho alli ratatseq nuna cuentam quecäpis.” (1 COR. 9:26.)

1, 2. ¿Imataq yanapashunki kawënikichö kushishqa kanëkipaq?

MANA reqinqëki sitiota ëwëta munarqa, itsa huk mäpata apëta munankiman mana oqrakänëkipaq, y alli kaq nänipa ëwanëkipaq. Pero mëtapis ëwëkanqëkita mana musyaptikeqa, manam imapaqpis yanapashunkitsu huk mäpaqa. Oqrakashqa mana purinëkipaqqa, alleqmi musyanëki mëta ëwëkanqëkitapis.

² Tsë cuentallam qampis jövenna karnin alli musyanëki imata ruranëkipaq kaqtapis. Y hanachö rikanqantsiknömi qampapis kapushunki huk alli mäpëki. ¿Imataq tsë mäpaqa? Bibliam, tsëmi yanapashunki imata ruranëkipaq kaqtapis musyanëkipaq (Pro. 3:5, 6). Hinamampis alli concienciëkim yanapashunki, y Bibliawan yachatsishqa kaptikiqa imëpis alli nänipam apashunki (Rom. 2:15). Pero kawënikichö kushishqa këta munarqa, musyanëkim imakunata ruranëkipaq kaqtapis.

3. 1 Corintios 9:26 textochö Pablu ninqannö, ¿imataq yanapamantsik kawënintsikchö alli kaqta akranapaq?

³ Apóstol Pabluqa musyaqmi imakunata ruranampaq kaqta, y tsëta ruranampaq sinchikunqan imanö yanapanqantapis, tsëmi kënö willakurqan: “Noqalläqa alli pensecur tse coreq nuna cuenta ewanqäman chänäpaq[mi] yarparäquicä, y pelyacho alli ratatseq nuna cuentam quecäpis” (1 Cor. 9:26). Qampis, huk cörreqnö mëman chänëkita musyarqa, allim sinchikunki tsëman chänëkipaq. Ichikllachönam alläpa preciso kaqkunata akranki, Jehoväpa kaqchö masta ruranëkipaq, trabäjopaq, casakïpaq y familiapaq. Höraqa oqrakashqanömi këkanki imatapis rurëta mana puëdernin. Pero puntallapitana imata ruranëkipaq kaqta pensarnin y Biblia ninqanmannö rurarninqa, mana alli kaqtaqa manam akrankitsu (2 Tim. 4:4, 5).

4, 5. a) ¿Imaraq pasakunman imata ruranëkipaq kaqtapis mana musyaptikiqa? b) Manaraq imatapis ruranëkipaq churapakarnin, ¿imanirtaq Jehoväta cuentaman churanëki?

⁴ Kikiki imata ruranëkipaqpis mana musyaptikiqa, yanaqikikunawan profesornikikunam kikinkuna pensayanqanmannö imata ruranëkipaqpis niyäshunki. Pero qamqa musyankinachi imata ruranëkipaq kaqtapis, tsënö karpis wakinkuna pensëninkunata niyäshunqëkipita manam libretsu kanki. Pensëninkunata niyäshuptiki kënö tapukï: “¿Consejayämanqankuna yanapamanqatsuraq Kamamaqnïta yarpänäpaq, o pëpitatsuraq rakikäratsimanqa?” (lei Eclesiastés 12:1 *).

⁵ Imatapis ruranëkipaq manaraq churapakarqa, allim tapukunkiman, ruranqä, ¿Jehoväta kushitsinqatsuraq o manatsuraq? nishpa. ¿Imanir? Llapan kapushunqëkipis Pëllapita shamuptin (Sant. 1:17). Rasumpa kaqchöqa llapan nunakunam Diosta haqa kantsik (Apo. 4:11). Pëtaqa alläpam agradecikushwan. Tsëmi imatapis ruranapaq manaraq churapakarnin pëtaraq cuentaman churanantsik. Tsëmi, kanan rikärishun ima rurëkuna alläpa preciso kanqanta y tsëkunata logranapaq imata ruranantsikpaq kaqtapis.

 ¿Imakunata ruranëkipaqtaq churapakankiman?

6. ¿Imata ruranëkipaqtaq churapakankiman, y imanir?

⁶ Pasaq semana yachakunqantsiknöpis, alläpa allim kanman Bibliapita yachakunqëkikuna rasumpa kanqanta kikiki musyanëki (Rom. 12:2; 2 Cor. 13:5). Itsa yanaqikikunaqa imëkapis kikinlla rurakashqanta niyan, o mana alli yachatsikïkunaman creiyan tsënö yachatsiyashqa kayaptin. Pero qamqa manam pëkunanötsu kanëki. Yarpänëkim ciëlochö Teytëki llapan yachënikiwan y pensënikiwan servinëkita munanqanta (lei Mateo 22:36, 37). Awmi, pëqa shonqupita patsë markäkïniki kanantam munan (Heb. 11:1).

7, 8. a) ¿Ichik tiempollachö ima ruranqëkikunataq yanapashunki markäkïniki más patsakänampaq? b) Y tsënö ruranqëkikuna, ¿imachötaq yanapashunki?

⁷ Markäkïniki alli patsakänanta munarqa, ¿imanirtaq tsëta wallka tiempollachö ruranëkipaq churapakankitsu? Huk rurëqa llapan hunaqkuna Diosta mañakunqëkim. Shonqupita patsë y wananqëkimannö mañakïniki kanampaqqa, allim kanman puntallapitana pensënikichö o qellqëkur imata mañakunëkipaqpis yarpänëki. Jehoväta ama problëmëkikunallapita willëtsu, sinöqa imanir kushishqa kanqëkitawan willë (Fili. 4:6). Hina huk rurëqa Bibliata llapan hunaqkuna leinëkipaq churapakanqëkim. ¿Musyarqëkiku huk hunaqchö chusku päginata leirnin huk watallachö llapan Bibliata usharinëkipaq kaqta? * Rasunllatam Salmo 1:1, 2 texto kënö nin: “Mana alli nunakuna yachatsikuyanqanta mana wiyaq [...] nunaqa, kushishqam kakun. Pëpaqqa Jehoväpa leyninmi alläpa mishkin, y paqasta hunaqta leirmi, leinqanman yarpachakun”.

⁸ Hina ichik tiempollachö hukta ruranëkipaq kaqtapis rikärishun: cada reunionpaq hukllëllatapis comentarinëkipaq alistakï. Itsa  qallanëkipaqqa reunionchö huk textota o pärrafochö qellqarëkaqta leirinkiman. Pero tsëpita ichik tiempo pasariptinqa, käyinqëkimannömi comentarinkiman. Ama këta qonqëtsu: Jehoväpaqqa huk qarë cuentam reunionkunachö comentanqëkiqa (Heb. 13:15). Kë rurëkunata wakinllatapis rurarqa, masmi yachakunqëkikunaman markäkunki, Jehová Diostam agradecido kanki, y listom këkanki Jehoväpa kaqchö masta ruranëkipaqpis.

9. Manaraq publicador karqa, ¿imata ruranëkipaqtaq churapakankiman?

⁹ ¿Imata ruranëkipaqtaq más tiempowanqa churapakankiman? Manaraq publicador karqa, allichi kanman publicador kanëkipaq sinchikunëki. Tsëta rurarirqa, llapan killakuna yachatsikoq yarqunëkipaqmi sinchikunëki. Hinamampis masmi sinchikunëki Bibliata alli manejanëkipaq, tsëmi yanapashunki yachatsikur kushishqa purinëkipaq. Hina allim kanman wayin wayin yachatsikoq yarqunëkipaq más sinchikunqëki, y huk estudio biblicota qallanqëkipis. Publicador këman chärirqa, ¿manatsuraq alli kanman Jehoväta qamllapaqnam kawashaq ninëki y Bautizakunëkipaq sinchikunëkiqa?

10, 11. ¿Bautizakushqa jövenkuna tiempowan imakunata rurayänampaqtaq churapakäyanman?

¹⁰ Bautizakushqana karqa, Jehoväpa kaqchö más tiempowan imatapis ruranëkipaqmi churapakänëki. Këman pensari, ¿manatsuraq huk congregacionpa mana chäyanqan territorionkunaman höraqa yanapakoq ëwarinkiman? Itsa kallpëki y saludniki këkaptinraqqa precursor auxiliar o regular kankiman. Waranqëpayanmi kënö llapan tiemponkunawan Jehoväta sirveq cristiänokunaqa kayan. Kushishqam niyäshunki Jehoväta tsënö servi atska bendicionkunata apamunqanta, y tsënö rurarnin Kamamaqnintsikpita yarpanqantsikta. Kë llapantaqa rurëta puëdenki teytëkikunapa rurinchö këkarmi. Tsënö rurarqa congregacionnikitapis yanapëkankim.

¹¹ Pero manam tsëllatsu, hina congregacionnikipita yarqurir hukkunachö Jehoväta servinëkipaqpis churapakankimanmi. Itsa wanayanqan sitiokunachö o huk nacionkunachö yanapakunëkipaq churapakankiman. Hina pensarinkimanmi Yachatsikuyänan Wayikunata rurëchö, o huk nacionchö Betel wayikunata rurëchö yanapakïtapis. O itsa betelita o misionero këta munankiman. Pero rikanqantsiknömi, këkunachö yanapakïta munaptikiqa precisanmi bautizakunëki. Tsëta manaraq rurashqa karqa, yarpachakï imanir alläpa preciso Bautizakï kanqanman.

Bautizakunëkipaq churapakë

12. ¿Imarëkurtaq wakin jövenkunaqa bautizakïta munayashqa, y imanirtaq tsënö pensëqa allitsu?

¹² ¿Imarëkur-raq huk nuna bautizakunman? Wakin jövenkunaqa bautizakïta munayan hutsakunaman mana ishkita munar, amïgonkunanö këta munar y teytankunata kushitsita munarmi. Pero bautizakunqëkiqa, manam mana alli rurëkunapita tsäpäshunëkipaqtsu, y shonqïkichö munapëkaptikipis mana allikunata mana ruranëkipaqtsu. Hina manam wakinkuna niyäshuptikillaqa bautizakunkimantsu. Tsëpa rantinqa, alliran musyanëki Jehoväpa testïgon imanö kawanqanta, hina shonqïkipita patsëmi Testigo këta munanëki, y listom këkänëki Testigo kanëkipaq (Ecl. 5:4, 5).

13. ¿Imanirtaq bautizakunkiman?

¹³ ¿Imarëkurtaq bautizakuntsik? Jesusmi kënö nirqan: ‘Noqaman creyicuyänanpaqmi nunacunata willapäyänequi, y creyicoq caqtanam bautisayanequi’. Kikinmi yakuchö bautizakurnin, tsënö ruranapaq kaqta yachatsikurqan (lei Mateo 28:19, 20 y Marcos 1:9). Hina tsëtaqa rurantsik salvacionman apamänantsikta musyarmi. Noe y kastankuna diluviopita salvakuyänampaq huk arcata rurayanqampita apóstol Pedru parlarmi, kënö nirqan: “Tse yacoqa carqan canan bautisaconqantsicnomi. Tsemi bautisacurnenqa, salbacushqa cantsic, Teyta Jesucristu wanur cawarimonqanrecur” (1 Ped. 3:20, 21). Pero  bautizakïtaqa manam imapitapis tsapäshoqnikitanötsu rikänëki, sinöqa Jehoväta llapan shonqïkiwan, kawënikiwan, pensënikiwan y kallpëkiwan kuyarmi tsëta rurankiman (Mar. 12:29, 30).

14. ¿Imanirtaq wakinqa bautizakïta munayantsu, pero imatataq yarpänëki?

¹⁴ Wakinqa bautizakïta munayantsu hutsaman ishkiriptin congregacionpita qarquriyänanta mantsarmi. ¿Tsëta yarparku qampis mantsakunki? Tsëman yarpëqa manam paqwëpa mana allitsu. Itsa tsënö pensanqëkiqa rikätsikunman Jehoväpa testïgon këta mana ichikllapaq churëkanqëkita. Hinamampis, ¿imallapis kanku bautizakunëkipaq tsapäshoqniki? Itsa pensankiman Jehoväpa Leyninkunata wiyakï kushikïta mana apamunqanta. Tsënö kaptinqa, mana wiyakoqkunata ima pasanqanmampis yarpanqëkim yanapashunki. O itsa musyanki Jehoväpa Leyninkuna alläpa alli kanqanta, pero itsa pensanki hora hora cumplïta mana puëdenqëkita. Hina këpis allim kanman, kikikiman mana markäkunqëkitam rikätsikunman. Awmi, Bibliaqa willamantsikmi shonqu hutsasapa karnin imëkapitapis más traicionero kanqanta (Jer. 17:9). Pero tsënö kaptimpis, yarpanëkim Diosnintsik nishunqëkikunata cumplïta puëdenqëkita. ¿Imanö? Diospa ‘Palabranta wiyakur mäkoq mäkoqlla karnin’ (Lei Salmo 119:9 *). Tsëmi bautizakïta mantsakurqa, sinchikunëki bautizakï ima kanqantapis musyanëkipaq. *

15, 16. ¿Imanötaq musyanki bautizakunëkipaq listona këkanqëkita?

¹⁵ Pero ¿imanötaq musyanki bautizakunëkipaq listona këkanqëkita? Kënö tapukurmi: “¿Bibliapa precisaq yachatsikïninkunata wakinkunata yachatsita puëdïku? ¿Diospita yachatsikoq ëwäku teytäwan mamä mana ëwayaptimpis? ¿Congregacionchö llapan reunionkunamanku ëwëta tïrä? ¿Inkitayämaptin imanö tsarakunqäwan wakintapis yanaparïmanku? ¿Diosta servikämanllatsuraq teytäkuna y amïgokuna pëta haqiriyaptimpis? ¿Jehoväta nirqöku sirvenqäpita kushikunqäta? ¿Qamllatanam servishqëki nirku Jehoväta mañakurqö?”.

¹⁶ Bautizakunapaq churapakanqantsikqa alläpa precïsom kawënintsikchö. Manam ichikllapaqqa churarishwantsu. ¿Allinaku pensarqunki bautizakunëkipaq? Pensënintsikchö poqu këqa, manam alli discursokunata rurëllatsu o wakinkuna wiyayänampaq shumaq comentëllatsu. Pensënintsikchö poqu këtaqa rikätsikuntsik, Biblia ninqanmannö imatapis rurarninmi (lei Hebreus 5:14). Bautizakunëkipaq listona këkaptikiqa, llapan hunaqkunam portakïnikiwan rikätsikunki  Jehovällapaq kawanqëkita, y Pëtam llapan shonqïkiwan servinki.

17. Bautizakuriptiki ima pruëbakunapis shamuptin, ¿pikunataq yanapashunki alli tsarakunëkipaq?

¹⁷ Itsa bautizakurirllaqa Diosta servirnin alläpa kushishqa këkanki. Pero tsëpitaqa tukïtam pasanki, tsëkunam markäkïnikita y alli tsarakïnikita pruëbaman churanqa (2 Tim. 3:12). Tsëkunapa hapallëki pasëtaqa ama pensëtsu. Papänikikuna consejayäshunëkipaq mañakï. Poqu cristiänokunapa yanapakïninta ashi. Jehoväpa kaqchö más sinchikunëkipaq yanapakoq amïgokunata ashi. Imëpis yarpë, Jehoväqa alläpam kuyashunki, y pëmi kallpëki qoshunki ima pruëbakunachöpis alli tsarakunëkipaq (1 Ped. 5:6, 7).

¿Diospa kaqchö imanötaq masta rurankiman?

18, 19. Imatapis puntaman churëkanqëkita rikë, ¿imanirtaq alläpa preciso?

¹⁸ Puëdenqëkimannö kallpachakurnimpis, ¿höraqa llapan munanqëkita y ruranëkipaq kaqkunapaq tiempïki pishinqantaku rikanki? Tsënö kaptinqa allim pensanëki ima rurëkuna más preciso kanqanta. Këman yarpärishun. Huk plástico baldeman atska hatun rumikunata churarinkiman. Hananmanna aqushata huntanqanyaq winarinkiman. ¿Imataq baldechö kan? Rumikunawan aqusham hunta këkan. Tsë baldepita hicharir, kananqa puntata aqushata winë y hananmanna rumikunata churari, ¿llapanku winakärin? Manam llapanta winëta puëdenkitsu puntata aqushata winashqa karnin.

¹⁹ Tsënöllam imanö tiempïkita patsätsinqëkiwampis pasakun. Kawënikichö puntaman kushikïkunata churaptikiqa, manam tiempïki kanqatsu Jehoväpa kaqchö más preciso kaqkunata ruranëkipaq. Pero ¿imaraq pasakunqa “más precisu kaqkunata” puntaman churayë nishpa Biblia consejakunqanta wiyakuptikiqa? (Fili. 1:10.) Tsënö kaptinqa masmi tiempïki kanqa Diospa kaqchö ruranëkipaq, y hukkunata ruranëkipaqpis.

20. ¿Imatataq rurankiman tukï yarpachakïkuna chämuptinqa?

²⁰ Jehoväpa kaqchö masta ruranëkipaq tïraptikiqa, itsa höraqa tukïläya yarpachakïkuna chämunqa. Tsënö kaptinqa, “qepi cuenta lasäshoqnikita Jehoväman churë, y pëqa yanapashunkim” (Sal. 55:22). Kanan witsanqa más preciso rurëchö yanapakïta puëdenkimanmi, tsë precisaq rurëqa hinantin Patsachö Diospita yachatsikïmi (Hech. 1:8). ¿Imatataq qam ruranki? ¿Tsëta rurayaptin rikaräkïkankimanllatsuraq o tsëta rurartsuraq yanapakunkiman? Más alli rurëqa kanman Jehová Diospa kaqchö llapan yachënikiwan yanapakunqëkim. Y manam ni imëpis pësakunkitsu “kanan joven kënikichö” Kamashoqnikita sirvenqëkipitaqa (Ecl. 12:1).

[Päginapa ura kuchunchö willakïkuna]

¿Imatataq yachakurqunki?

• ¿Imanirtaq imatapis ruranëkipaq kaqta alleq musyankiman?

• ¿Imakunata ruranëkipaqtaq churapakankiman?

• ¿Imatataq bautizakunëkipaq rurankiman?

• Pensanqëkikunata ruranëkipaqqa, ¿imanirtaq más precisaq kaqkunata puntaman churankiman?

[Yachakunapaq kaqpa tapukïninkuna]

[20 kaq päginachö dibüju]

¿Churapakarqunkinaku llapan hunaqkuna Bibliata leinëkipaq?

[22 kaq päginachö dibüju]

¿Imatataq bautizakunëkipaq rurankiman?

[23 kaq päginachö dibüju]

¿Imatataq kë dibujo yachatsishunki?