Wayna-sipas, ¿ima ruwaytan akllakunki?

“Manan ch’usaqman saqmaq hinachu [maqanakuni].” (1 COR. 9:26.)

1, 2. ¿Imakunan yanapasunki allillanpuni kanaykipaq?

YUNKAMAN haykuyta munaqqa apananmi mapatapas brujulatapas, mapawanmi yachanqa mayninmi aswan allin ñan kanman purinanpaq chayta, brujulawantaq yachanqa allin ladomanchus purishasqanta. Ichaqa manachus yachanman mayman rinanta chayqa, yanqapaqmi kanman mapapas brujulapas. Kaqllapi ama kuti-t’ikrananpaqqa allinta yachanan mayman rinanta.

² Wayna-sipas qanpas yaqa chhaynapin tarikushanki yuyayniyoq runamanña tukupushasqaykirayku. Chay rikch’anachiypi qhawarisqanchis hina, Biblian huk mapa hina yanapasunki allin kaq ñanta akllakunaykipaq (Pro. 3:5, 6). Allin concienciaykitaq brújula hina yanapasunki allin kaq ñanmanta ama waqllinaykipaq (Rom. 2:15). Allillanpuni kanaykipaqqa yachanallaykitaqmi mayman rishasqaykitapas, chaymi ñawpaqmantaña yuyaykunayki imakuna ruway munasqaykita.

3. 1 Corintios 9:26 nisqan hina, ¿imaynatan yanapawanchis imata ruwananchispaqpas ñawpaqmantaña yuyaykusqanchis?

³ Apóstol Pabloqa ñawpaqmantan yuyaykurqan imakuna ruway munasqanta, kallpachakurqantaq chaykunaman aypananpaq, chaymi nirqan: “Manan ñawsa hinachu [phawani]. [...] Manan ch’usaqman saqmaq hinachu [maqanakuni]”, nispa (1 Cor. 9:26). Sichus qanpas ñawpaqmantaña yuyaykunki imakuna ruway munasqaykita chayqa, manan ñawsa hinachu phawanki. Pisi tiempollamantan decidicinayki kanqa Dios serviyniykipi imakuna ruwanaykita, imapi llank’anaykita, casarakuymanta, wawakunayoqchus kanki icha manachus chaytapas. Mayninpiqa manapaschá yachankichu mayqenkaq akllakuyta. Ichaqa ñawpaqmantaña yuyaykunki ima ruwanaykita, Bibliaq nisqanman hinapunitaq ruwanki chayqa, allin kaqtapunin akllakunki (2 Tim. 4:4, 5).

4, 5. a) ¿Iman pasanman ñawpaqmantaña imachus ruwanaykita mana yuyaykuqtiyki? b) Imatapas decidinaykipaq, ¿imaraykun qhawarinayki Diospa munasqanman hina kananta?

⁴ Ñawpaqmantaña ima ruwanaykita mana yuyaykuqtiykiqa compañeroykikuna profesorniykikuna iman decidinqaku ima ruwanaykita. Allintaña yachanki ima ruwanaykita chaypas, hukkunaqa yuyaychasunkikupunin imatachus ruwawaq chayta. Chayrayku paykunata uyarishaspaqa tapukuy: “Yuyaychawasqankuman hina ruwayman chayri, ¿yuyarikusaqchu Kamaqniyta icha karunchawanqachu?” nispa (leey Eclesiastés 12:1).

⁵ Diosmantan tukuy imaymanata chaskinchis, chaymi imatapas decidinapaqqa qhawarinanchispuni Jehová Diospa munasqanman hinachus kashan chayta (Sant. 1:17). Runakunaqa Diosmanmi manu kashanchis (Apo. 4:11). Payman agradecekusqanchistan rikuchisun munasqanman hinapuni imatapas ruwaspa. Chayrayku qatiqninpi yachasun ima ruwaykuna aswan allin kasqanmanta, imaynata chaykunaman aypawaq chaytapas.

 ¿Imakunata ruwanaykipaqmi yuyaykuwaq?

6. ¿Imatan qan kikiykipuni ruwanayki, imarayku?

⁶ Ñawpaq estudiopi yachasqanchis hina, Bibliaq yachachikuyninkuna cheqaq kasqanta yachanaykipaqqa qan kikiykin allinta t’aqwinayki (Rom. 12:2; 2 Cor. 13:5). Yaqapaschá compañeroykikunaqa hukkunaq yachachisqanraykulla creenku runaq yanqallamanta paqarimusqanpi otaq huk pantasqa yachachikuykunapipas. Qanmi ichaqa mana paykuna hinachu kanayki. Hanaq pacha Taytaykiqa tukuy yuyayniykiwan servinaykitan munan (leey Mateo 22:36, 37). Payqa Bibliapi cheqaq yachachikuykunaman hinan iñinaykita munan (Heb. 11:1).

7, 8. a) ¿Imakunatan ruwawaq iñiyniykita kallpachanaykipaq? b) ¿Imaynapin allinniykipaq kanqa chaykunata hunt’asqayki?

⁷ ¿Imakunatan ruwawaq iñiyniykita kallpachanaykipaq? Kallpachakuy sapa p’unchay Diosmanta mañakunaykipaq. Aswan allinta mañakunaykipaqqa chay p’unchaypi imakuna sucedesqasuykimanta huk listata ruwawaq otaq yuyayniykipi chayta hap’iwaq, chhaynapi chaykunamanta mañakunaykipaq. Sasachakuyniykikunata willakusqaykimantapas nillawaqtaqmi imakunas kusichirqasunki chaytapas (Fili. 4:6). Chaymantapas sapa p’unchay Bibliata leey. Sapa p’unchay 4 paginata leespaqa huk watapin tukunki. * Salmo 1:1, 2 texton nin: ‘Kusisamiyoqmi [...] Señor Diospa kamachikuy siminwan kusikuqqa, chaytan tutapas p’unchaypas yuyaymanan’, nispa.

⁸ Chaymantapas allinta preparakuy sapa huñunakuypi tapuykunaman kutichinaykipaq. Qallariypiqa huk textotapaschá leewaq otaq estudiashasqaykichis qelqamanta leespallaraq kutichiwaq. Chaymantañan ichaqa preparakusqaykiman  hina yuyayniykimanta kutichiwaq. Chayta ruwaspaqa Diostan hatunchanki (Heb. 13:15). Chay ruwaykunata hunt’aspaykiqa experienciatan hap’inki, Jehová Diostapas astawanmi agradecekunki, aswan allin preparasqataq kanki huk allin ruwaykunamanwan aypanaykipaq.

9. Manaraq predicayman lloqsishankichu chayqa, ¿imakunata ruwanaykipaqmi yuyaykuwaq?

⁹ ¿Imakunata ruwanaykipaqwanmi yuyaykuwaq? Manaraq predicaq lloqsishankichu chayqa, chayman aypanaykipaqmi kallpachakuwaq. Chayta ruwaspaykitaq mana faltayta sapa killa lloqsinayki. Chaymantapas kusisqa predicanaykipaqqa yachanaykin Bibliawan allin yachachiyta. Kallpachakullawaqtaqmi astawan wasin-wasinta predicanaykipaq huk estudiota qallarinaykipaqpas. Chaykunaman aypaspaykitaq yuyaykuwaq Jehová Diosman qokunaykipaq, chhaynapi bautizakunaykipaq.

10, 11. Bautizakunkiña chayqa, ¿imakunaman aypanaykipaqmi yuyaykuwaq?

¹⁰ Bautizasqaña kashanki chayri, ¿ima ruwaykunaman aypanaykipaqmi yuyaykuwaq? Huk iñiq t’aqa pisilla predicasqanku llaqtakunata riqtinkun mayninpi paykunawan riwaq yanapakunaykipaq. Yuyaykullawaqtaq precursor auxiliar otaq regular kanaykipaq. Askha iñiqmasinchiskunan precursor kaspa Jehová Diosta servishanku. Paykunan willasunkiku wayna-sipas kashaspa precursor kaspa Kamaqninchista serviyqa ancha kusikunapaqpuni kasqanta. Tukuy chaykunamanqa aypawaq tayta-mamaykiwan kuska tiyashaspaykiraqmi. Chay ruwasqaykikunaqa iñiqmasiykikunaq allinninpaqmi kanqa.

¹¹ Ichaqa kallantaqmi huk ruwaykunapas. Yaqapaschá yuyaykuwaq predicaqkuna astawan necesitakusqan cheqaspi yanapakunaykipaq, tiyasqayki nacionpiña otaq huk nacionpiña kanman chaypas. Qhawarillawaqtaqmi Huñunakuy Wasikunata otaq huk nacionkunapi sucursalkunata sayarichiypi yanapakunaykipaq. Betelmanpas riwaqmi otaq misionero kawaq. Chaykunaman aypanaykipaqmi ichaqa ñawpaqta bautizakunayki. Manaraq chayta ruwankichu chayqa, qhawariy imarayku bautizakuy importante kasqanta.

¿Imaraykun Bautizakunayki?

12. ¿Imanaqtinmi wakin wayna-sipaskuna bautizakuyta munanku, imaraykun chay mana allinchu kanman?

¹² ¿Imaraykun bautizakuna? Wakin wayna-sipaskunan bautizakuyta munanku huchaman mana urmanankurayku, amigonkuna bautizakusqankurayku otaq tayta-mamankuta kusichinankurayku. Bautizakusqaykin ichaqa mana hark’asunkichu pakallapi mana allin kaqta ruwanaykita. Manataqmi hukkuna nisqasuykiraykuchu bautizakunayki. Aswanpas chaytaqa ruwanayki Jehová Diospa testigon kanaykipaq preparasqa kashasqaykiraykun (Ecl. 5:4, 5).

13. ¿Imaraykun bautizakunayki?

¹³ Jesusmi qatikuqninkunata nirqan: “Yachachimuychis [...] bautizamuychis”, nispa. Chaymi huk allin razonqa bautizakunapaq. Jesús kikinmi ejemplota saqewarqanchis unupi bautizakuspa (leey Mateo 28:19, 20; Marcos 1:9). Chaymantapas bautizakuyqa salvakunanchispaqmi. Apóstol Pedron rimarqan Noeqa familiantin ruwasqanku arcaman haykuspa Millp’uq Para Unumanta salvakusqankuta, chay qhepamanmi nirqan: “Chay hinapin bautismoqa Jesucristoq kawsarimpusqanwan qespichiwanchis”, nispa (1 Ped. 3:20, 21). Ichaqa manan mana allin kaqkunamanta pakaykusqa kanaykipaqchu bautizakunayki, aswanpas Jehová Diosta munakuspa tukuy sonqoykiwan, almaykiwan, yuyayniykiwan, kallpaykiwan ima  serviyta munasqaykiraykun (Mar. 12:29, 30).

14. ¿Imanaqtinmi wakinkuna mana bautizakunkuchu, ichaqa ima ruwaytan atinkipuni?

¹⁴ Wakinqa manan bautizakuyta munankuchu qhepaman ima mana allintapas ruwasqankumanta qarqosqa kayta manchakusqankurayku. Qanpas ¿chayta manchakuspachu mana bautizakushanki? Chhayna kaqtinqa, chaywanmi rikuchishanki Jehová Diospa testigon kayqa mana yanqa-yanqallachu kasqanta. Chaymantapas yaqapaschá iskayrayashanki Diospa kamachikuyninkunaman hina kawsay allinniykipaq kasqanmanta. Chhayna kaqtinqa, yuyaymanay Diospa kamachikuyninkunata mana kasukuqkuna imaynapi tarikushasqankuta. Otaq nishanki: “Manachus hina Diospa kamachikuyninkunataqa hunt’ayta atiymanchu”, nispa. Ichaqa chaywanmi rikuchishanki huch’uyyaykukuq kasqaykita. Bibliaqa sut’itan qhawarichin ‘runaq sonqonqa tukuy imamantapas aswan q’otukuq’ kasqanta (Jer. 17:9). Jehová Diospa ‘Siminman hina purispaykin’ ichaqa atinki munayninman hina kawsayta (leey Salmo 119:9). Chhaynaqa bautizakunaykipaq imamantapas iskayrayasqaykitaqa sut’inchaypuni. *

15, 16. ¿Imaynatan yachawaq bautizakunaykipaq hinaña kashasqaykita?

¹⁵ ¿Imaynatan yachawaq Bautizakunaykipaq hinaña kashasqaykita? Kaykunatan tapukuwaq: “¿Allintachu entiendeni Bibliaq qallariy yachachikuyninkunata? ¿Lloqsinichu predicaq manaña tayta-mamay lloqsiqtinpas? ¿Llapa huñunakuykunamanchu rishani? ¿Kasunichu compañeroykunata mana allin kaqta ruwanaypaq rimapayawaqtinku icha Diospa munasqantachu ruwani? ¿Servishallaymanchu Jehová Diosta tayta-mamayña amigoykunaña paymanta karunchakapuqtinkupas? ¿Ancha allinpaqchu qhawarini Jehová Dioswan amigontin kasqayta? ¿Ñachu Jehová Diosman qokurqaniña?” nispa.

¹⁶ Allinta yuyaykuspan Bautizakunaykiqa. Chayrayku ¿allin iñiyniyoqchu kashanki bautizakunaykipaq? Allin iñiyniyoq kayqa manan allin discursokunata qoyllachu nitaq huñunakuypi tapukuykunaman allinta kutichiyllachu. Aswanpas Bibliaq nisqanman hinapuni imatapas ruwaymi (leey Hebreos 5:14). Bautizakunaykipaq allin iñiyniyoqña kashanki chayqa, ima munaymi kanqa tukuy sonqoykiwan Jehová Diosta servispa payllapaqña kawsasqaykiqa.

17. ¿Imakunan yanapasunki sasachakuykunata atipanaykipaq?

 ¹⁷ Bautizakusqayki qhepamanqa ancha kusikuywanchá Jehová Diosta servinki. Sasachakuykunapas kallanqataqmi, chaypin rikuchinayki kanqa iñiyniykipi qaqa sayasqaykita (2 Tim. 3:12). Ichaqa manan sapallaykichu atipanayki kanqa, yanapachikuy tayta-mamaykiwan, hinallataq allin iñiyniyoq iñiqmasikunawanpas. Diospaq hunt’aq sonqo kaqkunawan amigontin kay. Amataq qonqaychu Jehová Diosqa anchata munakusqasuykita, payqa kallpachasunkipunin ima sasachakuytapas atipanaykipaq (1 Ped. 5:6, 7).

¿Imaynatan hunt’awaq imachus yuyaykusqaykita?

18, 19. ¿Imaraykun qhawarinayki imakunachus aswan allin kasqanta?

¹⁸ Tukuy atisqaykitaña ruwashanki chaypas, mayninpiqa manapaschá tiempoyki aypasunkichu imachus munasqaykikunata ruwanaykipaq. Chhayna kaqtinqa, qhawariy ima ruwaykuna aswan allin kasqanta. Huk baldeman aqotawan rumitawan hunt’achispayki, ¿mayqentan ñawpaqta churawaq? Rumikunata ñawpaqta churaqtiykiqa balde hunt’akanankaman aqotapas churayta atinki. Aqota ñawpaqta churaqtiykin ichaqa manaña llapa rumikunatachu churayta atinki.

¹⁹ Tiemponchiswanpas chhaynan. Ñawpaqta kusirikuykunamanraq qokunki chayqa, manañan tiempoyki aypasunkichu Dios serviyniykipi ruwaykunata hunt’anaykipaq. Bibliaq nisqanman hina “aswan allin kaqtapuni” ñawpaqta ruwaqtiykin ichaqa tiempoyki aypasunki Diospaq llank’anaykipaq mayninpi kusirikunaykipaqpas (Fili. 1:10).

20. ¿Imatan ruwanayki ima ruwayman aypanaykipaqpas iskayrayaspayki?

²⁰ Bautizakunaykipaqpas, huk ruwaykunaman aypanaykipaqpas iskayrayanki chayqa, Jehová “Diosman llakipakuyniykikunata saqey, paymi qaqata sayachisunki” (Sal. 55:22). Kunanmi mana hayk’aq ruwakusqanta hina pachantinpi allin willakuykunata predicakushan runakunamanpas yachachikushan (Hech. 1:8). Chayrayku ¿yanapakunkichu chay ancha allin llank’aypi? Icha, ¿qhawayllachu qhawanki chayta? Aswan allinqa kanman imachus ruway atisqaykiwan chay llank’aypi yanapakuymi. “Wayna-sipasllaraq kashaspa Kamaqniykimanta” yuyarikusqaykimantaqa manan hayk’aqpas pesapakunkichu (Ecl. 12:1).

[Uranpi willakuykuna]

¿Ima nispan kutichisunman?

• ¿Imaraykun ñawpaqmanta yuyaykunayki imakunachus ruwanaykita?

• ¿Ima ruwaykunaman aypanaykipaqmi kallpachakuwaq?

• ¿Imakunatan ruwanayki bautizakuyta munaspa?

• ¿Imaraykun qhawarinayki ‘aswan allin kaqkunata’ yuyaykusqaykikunaman aypanaykipaq?

[Tapuykuna]

[13 paginapi foto]

¿Sapa p’unchaychu Bibliata leeshanki?

[15 paginapi foto]

¿Imakunatan ruwawaq Bautizakunaykipaq?

[16 paginapi foto]

¿Imatan kay rikch’anachiy yachachisunki?