Maseka, mo yeke sara ande nyen na gigi ti mo?

“Lege so mbi yeke fi gobo ayeke ti pika yâ ti pupu pëpe.”​—1 ACOR. 9:26.

1, 2. Ti bâ nzoni na ngoi so mo yeke kono, aye wa mo yeke na bezoin ni?

 TARA ti bâ so ndo avuko pitipiti na mo ye ti gue na mbeni ndo so mo hinga lege ni nzoni pëpe. Mo yeke peut-être na bezoin ti torche nga na mbeni zo so ahinga lege ni nzoni. Torche ni ayeke mû maboko na mo ti bâ ndo nzoni si mo tambela. Zo so ahinga lege ni nzoni ayeke mû maboko na mo ti si na ndo so mo ye ti gue dä. Ye oko, tongana mo hinga pëpe ndo so mo ye ti gue dä, torche nga na zo so ahinga lege ni nzoni alingbi ti sara ye oko pëpe. Ti kpe ti tambela gi senge senge, a yeke nzoni mo wani mo hinga mbilimbili ndo so mo ye ti gue dä.

² Mo yeke na gbele mara ti ye so na ngoi so mo yeke kono ti ga kota zo. Mo yeke na nzoni torche nga na mbeni zo so mo lingbi ti zia bê ti mo kue na ndo ti lo. Bible ayeke tongana mbeni torche so ayeke mû maboko na mo ti soro nzoni ye so mo lingbi ti sara na yâ ti gigi ti mo (aProv. 3:5, 6). Tongana mo zia si Bible afa lege nzoni na yingo-ti-hinga ti mo, a yeke mû maboko na mo ti ngbâ na ndo ti nzoni lege (aRom. 2:15). Yingo-ti-hinga ayeke sara kusala tongana mbeni zo so ayeke fa lege na mo. Me,  ti tene gigi ti mo aga nzoni, a yeke nzoni mo wani mo hinga mbilimbili ye so mo ye ti sara. A lingbi mo hinga mbilimbili aye so mo zia na gbele mo ti si dä.

3. Aye ti nzoni wa Paul asara tënë ni na 1 aCorinthien 9:26 so zo ayeke wara tongana lo zia ambeni ye na gbele lo?

³ Bazengele Paul afa na nduru tënë aye ti nzoni so zo ayeke wara tongana lo zia ambeni ye na gbele lo na lo sara ngangu ti si dä. Lo tene: “Lege so mbi yeke kpe na loro ayeke kirikiri pëpe. Lege so mbi yeke fi gobo ayeke ti pika yâ ti pupu pëpe.” (1 aCor. 9:26). Tongana mo zia ambeni ye na gbele mo, mo yeke kpe loro ti wara aye ni so. Na yâ ti kete ngoi, mo yeke mû ande ambeni kpengba desizion na ndo ti vorongo Nzapa, kua ti nginza, mariage nga na sewa. Ye oko, na ambeni ngoi mo lingbi ti bâ so gbâ ti alege ayeke na gbele mo na li ti mo aga kirikiri. Me tongana mo zia na gbele mo ye so mo ye ti sara na yâ ti gigi ti mo, adesizion ti mo aluti na ndo ti tâ tënë nga na afango ye so ayeke na yâ ti Bible, bê ti mo ayeke pusu ande mo pëpe ti mû sioni lege.​—2 Tim. 4:4, 5.

4, 5. (a) Nyen la alingbi ti si tongana mo zia ambeni ye na gbele mo pëpe? (b) Ngbanga ti nyen a yeke nzoni aye so mo soro ti sara na yâ ti fini ti mo aduti aye so anzere na lê ti Nzapa?

⁴ Tongana mo zia ambeni ye na gbele mo pëpe, amba ti mo nga na azo so ayeke fa mbeti na mo alingbi ti pusu mo ti sara ye so ala bâ atene ayeke nzoni ndali ti mo. Biani, même tongana mo zia ambeni mbilimbili ye na gbele mo ti sara, ambeni alingbi ti ngbâ lakue ti fa na mo apensé ti ala. Na ngoi so mo yeke mä wango ti ala ni, hunda tere ti mo: ‘Aye so ala fa na mbi ti zia na gbele mbi so ayeke mû maboko na mbi ti dabe ti mbi na Wasarango mbi na ngoi so mbi de maseka wala ayeke kanga lege na mbi ti sara ni?’​—Diko Zo-ti-fa-tene 12:3.

⁵ Ngbanga ti nyen a yeke nzoni aye so mo soro ti sara na yâ ti fini ti mo aduti aye so anzere na lê ti Nzapa? Mbeni raison ni ayeke so aye ti nzoni kue so e yeke na ni alondo na Jéhovah (Jacq. 1:17). A lingbi e kue e kiri singila na Jéhovah (Apoc. 4:11). Tâ nzoni lege ti kiri singila na Jéhovah ayeke ti dabe ti mo na lo na ngoi so mo yeke zia na gbele mo ambeni ye ti sara. Zia e bâ ambeni nzoni ye so mo lingbi ti zia na gbele mo nga ye so a lingbi mo sara ti si dä.

Aye wa mo lingbi ti zia na gbele mo?

6. Kpengba ye wa mo lingbi ti zia na gbele mo? Ngbanga ti nyen?

⁶ Tongana ti so a fa na yâ ti article so ahon, kpengba ye so mo lingbi ti zia na gbele mo ayeke ti tene mo wani mo gi ti hinga so aye so Bible afa ayeke tâ tënë (aRom. 12:2; 2 aCor. 13:5). Amba ti mo alingbi ti mä na bê na tënë ti évolution wala na ambeni fango ye ti wataka ndali ti so ambeni zo afa na ala atene a yeke ye so a lingbi ala mä na bê na ni. Me a yeke pëpe ti mo ti mä na bê na mbeni ye gi ngbanga ti so amba ti mo aye ti tene mo mä na bê na ni. Dabe ti mo so Jéhovah aye ti tene mo sara na lo na bibe ti mo kue. (Diko Matthieu 22:36, 37.) Babâ ti e ti yayu aye ti tene mo mä na bê na atâ tënë so ayeke na yâ ti Bible.​—aHéb. 11:1.

7, 8. (a) Ambeni ye wa mo lingbi ti zia na gbele mo ti si dä na yâ ti kete ngoi na so ayeke kpengba mabe ti mo? (b) Nyen la ayeke si na mo na ngoi so mo si na ambeni ye so mo zia na gbele mo ti si dä na yâ ti kete ngoi?

⁷ Ti sara si mabe ti mo akpengba, ngbanga ti nyen mo zia pëpe na gbele mo ambeni ye so mo lingbi ti si dä na yâ ti kete ngoi? Mbeni oko ayeke ti tene mo sambela lâ oko oko. Ti mû maboko na mo si asambela ti mo aluti na ndo ti ambilimbili ye nga si mo tene pëpe gi a-oko tënë, mo lingbi ti bata na li ti mo wala ti sû na lê ti mbeti ambilimbili ye so asi na yâ ti lango ni so mo ye ti yôro ni na yâ ti sambela ti mo. Sara pëpe gi tënë ti akpale so mo tingbi na ni me sara nga tënë ti aye ti nzoni so asi na mo (aPhil. 4:6). Mbeni ye so mo lingbi ti zia na gbele mo ayeke ti diko Bible lâ na lâ. Mo hinga so tongana mo diko alembeti osio ti Bible lâ oko oko, mo yeke diko Bible kue na yâ ti ngu oko? *  Psaume 1:1, 2 atene: “Ngia ayeke na zo so . . . ngia ti lo ayeke na yâ Ndia ti L’Éternel, na lo bi bê ti lo na lege ti Ndia so lâ na bï.”

⁸ Mbeni ota ye so mo lingbi ti zia na gbele mo ti si dä na yâ ti kete ngoi ayeke ti leke ti kiri tënë na abungbi oko oko kue ti congrégation. Na tongo nda ni, mo lingbi ti diko kiringo tënë ni dikongo wala mo diko mbeni versê. Tongana ngoi ayeke hon, mo lingbi ti leke ti kiri tënë na lege ti atënë ti mo wani. Ti tâ tënë ni, lakue tongana mo kiri tënë, mo yeke mû mbeni ye na Jéhovah (aHéb. 13:15). Tongana mo si na ambeni ti aye so mo zia na gbele mo so, mabe ti mo ayeke kpengba, mo yeke kiri singila na Jéhovah nga mo yeke duti nduru ti zia na gbele mo ambeni ye so mo ye ti si dä na yâ ti angoi so ayeke ga.

9. Tongana ade mo ga wafango tënë ti Royaume pëpe, aye wa mo lingbi ti zia na gbele mo ti si dä na yâ ti angoi so ayeke ga?

⁹ Aye wa mo lingbi ti zia na gbele mo ti si dä na yâ ti angoi so ayeke ga? Tongana ade mo to nda ti fa tënë pëpe, mo lingbi ti zia na gbele mo ti ga wafango tënë ti Royaume. A yeke mbeni pendere ye so tongana mo si dä, mo yeke ye ande ti fa tënë lakue nze na nze nga nzoni. Gi ti manda nga ti sara kusala na Bible na fango tënë. Tongana mo sara ni, mo yeke ye ande kua ti fango tënë mingi. Na pekoni, mo lingbi ti mû ngoi mingi ti fa tënë da na da nga même ti sara kue ti manda Bible na azo. So mo ga wafango tënë so ade ti wara batême pëpe, mbeni nzoni ye so mo lingbi ti zia na gbele mo ayeke ti mû tere ti mo na Jéhovah na ti wara batême ti ga Témoin ti Jéhovah.

10, 11. Aye wa amaseka so awara batême awe alingbi ti zia na gbele ala ti si dä na yâ ti angoi so ayeke ga?

¹⁰ Tongana mo yeke mbeni wakua ti Jéhovah so awara batême awe, bâ ambeni ye so mo lingbi ti zia na gbele mo ti si dä na yâ ti angoi so ayeke ga. Ngoi na ngoi mo lingbi ti mû maboko na congrégation ti fa tënë na ando so a fa tënë dä mingi pëpe. Mo lingbi nga ti mû ngangu ti mo nga na nzoni seni so mo yeke na ni ti sara kusala ti pionnier auxiliaire wala ti pionnier permanent. Apionnier saki na saki so ayeke na ngia ayeke tene na mo so kusala ti ngoi kue ayeke mbeni nzoni ye ti tene mo sara ti dabe ti mo na Wasarango mo na lâ ti maseka ti mo. So ayeke ambeni ye so mo lingbi ti sara na ngoi so mo ngbâ na ndo ti babâ na mama ti mo. Tongana mo gi ti sara aye so, congrégation ti mo ayeke bâ nga nzoni dä.

¹¹ Ambeni ye so mo zia na gbele mo ti si dä na yâ ti angoi so ayeke ga alingbi ti gue na mo ti sara kusala nde na congrégation ti mo. Na tapande, mo lingbi ti leke ti gue ti sara kusala na mbeni ndo so bezoin ti awafango tënë ayeke dä mingi na yâ ti kodoro ti mo wala na kodoro wande. Mo lingbi nga ti mû maboko ti sara kusala ti lekengo aDa ti Royaume wala aBéthel na kodoro wande. Mo lingbi même ti ga béthelite wala missionnaire. Biani, kpengba ye so a lingbi mo si dä kozoni si mo gi ti si na aye so e sara tënë ni ge ayeke ti wara batême. Tongana ade mo wara batême pëpe, gbu li na ndo ti aye so a hunda ti sara kpengba ye so na yâ ti fini ti mo.

Gi ti wara batême

12. Araison wa apusu ambeni zo ti wara batême? Ngbanga ti nyen araison so agbu ngu pëpe?

¹² Ti mo, zo ayeke wara batême ndali ti nyen? Ambeni zo alingbi ti pensé so batême ayeke kanga lege na zo ti tï na yâ ti siokpari. Ambeni alingbi ti pensé so a yeke nzoni ala wara batême ngbanga ti so amba ti ala awara batême. Ti ambeni maseka, ala ye ti nzere na lê ti ababâ na amama ti ala. Ye oko, batême ayeke pëpe mbeni ye so ayeke kanga lege na mo ti sara ye ti sioni so mo ye ti sara na gbemingo; nga a yeke nzoni mo wara batême pëpe ndali ti so ambeni zo apusu mo ti sara ni. Kozoni ti wara batême, a yeke nzoni mo hinga ye so aye ti tene ti duti Témoin ti Jéhovah nga ti bâ wala mo lingbi awe ti wara batême na ti duti nduru ti sara ye alingbi na ni.​—Zo-ti. 5:3, 4.

13. Ngbanga ti nyen a yeke nzoni mo wara batême?

¹³ Mbeni raison so apusu zo ti wara batême  ayeke so Jésus amû yanga na adisciple ti lo ti ‘sara si azo aga adisciple na ti batize ala’. Lo zia nga tapande ni na lege so lo wara batême. (Diko Matthieu 28:19, 20; Marc 1:9.) Na ndo ni, batême ayeke mbeni kpengba ye so a lingbi azo so aye ti wara salut asara. Na pekoni so bazengele Pierre asara tënë ti arche so Noé aleke na so a bata lo na azo ti sewa ti lo na yâ ni na ngoi ti kota ngu so apika, Pierre atene: “Ye so ague oko na ni ayeke sö ala fadeso nga, so ti tene batême . . . na lege ti zingongo ti Jésus Christ na kuâ.” (1 Pi. 3:20, 21). Me batême ayeke pëpe mbeni ye so ayeke sö mo na ngoi ti mbeni ye ti ngangu. Mo wara batême ndali ti so mo ndoye Jéhovah nga mo ye ti sara na lo na bê ti mo kue, na âme ti mo kue, na bibe ti mo kue nga na ngangu ti mo kue.​—Marc 12:29, 30.

14. Ambeni zo ayeke sara mbeto ti wara batême ngbanga ti nyen? Me dengo bê wa la mo wara?

¹⁴ Ambeni zo alingbi ti gi bê ti ala ti wara batême ndali ti so ala sara mbeto ti tene a bi ala ande na gigi. Mo kue mo sara mbeto tongaso? Tongana a yeke ni la, hinga so mara ti mbeto so ayeke sioni kue pëpe. A fa so mo hinga so ti duti Témoin ti Jéhovah ayeke kete ye pëpe. Mbeni raison ni nde ayeke nga dä? Peut-être ade mo hinga na bê ti mo kue pëpe so sarango ye alingbi na ndia ti Nzapa la ayeke nzoni lege ti dutingo na fini so ahon tanga ni kue. Tongana a yeke tongaso, gbungo li na ndo ti akpale so azo so asara sanka ti aye so Bible afa awara alingbi ti mû maboko na mo ti mû nzoni desizion. Na mbage, peut-être mo ndoye andia ti Nzapa me mo bâ so mo wani mo lingbi pëpe ti sara ye alingbi na ni. Ye so alingbi ti duti mbeni ye so afa so mo sara tere ti mo kete. Na ndo ni, Bible afa so teti so azo kue ayeke awasiokpari, bê ti ala alingbi ti handa ala (Jér. 17:9). Me mo lingbi ti sö benda tongana lakue mo ngbâ ti ‘bata tënë ti Nzapa.’ (Diko Psaume 119:9.) Atâa ye wa la apusu mo ti sara mbeto ti wara batême, a lingbi mo gi ti hon ndo ti ambeto tongaso.

15, 16. Mo yeke hinga tongana nyen so mo lingbi awe ti wara batême?

 ¹⁵ Me, mo yeke hinga tongana nyen so mo lingbi awe ti wara batême? Mbeni lege ni ayeke ti hunda tere ti mo na mara ti ahundango ndo so: ‘Mbi lingbi ti fa na azo nda ti atënë ti Bible so ayeke ngangu pëpe? Mbi yeke gue na fango tënë même tongana babâ na mama ti mbi asara ni pëpe? Mbi yeke sara ngangu ti gue na abungbi kue? Mbi lingbi ti dabe ti mbi na ambeni mbilimbili ngoi so mbi dö sese na amba ti mbi so asara ngangu na ndo ti mbi? Mbi yeke ngbâ ti sara na Jéhovah même tongana babâ na mama ti mbi wala akamarade ti mbi azia lege ni? Mbi sambela ndali ti songo ti mbi na Nzapa awe? Mbi mû tere ti mbi na Jéhovah na yâ ti sambela awe?’

¹⁶ Batême ayeke mbeni ye so ayeke changé fini ti zo na a lingbi zo agbu li ti lo dä nzoni si. Mo kpengba awe ti gbu li ti mo ti sara ye so? A yeke gi pëpe adevoir so mo yeke sara nga na anzoni commentaire ti mo la afa so mo kpengba awe. Zo so akpengba awe ayeke zo so alingbi ti mû adesizion so ague oko na afango ye ti Bible. (Diko aHébreu 5:14.) Tongana mo bâ so mo lingbi awe ti sara ye so, kota pasa so ayeke na gbele mo ahon atanga ni kue ayeke ti sara na Jéhovah na bê ti mo kue nga ti duti na fini na mbeni lege so afa so mo mû tere ti mo biani na lo awe.

17. Nyen la ayeke mû maboko na mo ti hon ndo ti akpale so alingbi ti si na peko ti batême ti mo?

¹⁷ Hio na peko ti batême ti mo, mo lingbi ti bâ so mo yapu mingi na yâ ti kusala ti Nzapa. Ye oko, kete na pekoni mo lingbi ti tingbi na akpale so ayeke tara mabe ti mo nga ayeke yengi mo (2 Tim. 3:12). Pensé pëpe so a lingbi mo tirika na akpale so gi mo oko. Gi wango na mbage ti babâ na mama ti mo. Hunda na aita so akpengba na yâ ti congrégation ti mû maboko na mo. Ngbâ ti sara kamarade na azo so ayeke mû maboko na mo. Girisa lâ oko pëpe so Jéhovah ayeke bi bê ti lo na mo nga lo yeke kpengba mo na yâ ti aye kue so alingbi ti si na mo.​—1 Pi. 5:6, 7.

Mo lingbi ti sara nyen ti si na aye so mo zia na gbele mo?

18, 19. Tongana nyen gingo ti bâ aye so ayeke kota ye na lê ti mo ayeke sara si mo bâ nzoni?

¹⁸ Atâa anzoni bibe so mo yeke na ni, mo bâ so mo yeke ka na ngoi mingi pëpe ti sara aye so mo ye na aye so a lingbi mo sara? Tongana a yeke tongaso, gi ti bâ aye so ayeke kota ye na lê ti mo. Zia e mû mbeni tapande: Mû mbeni seau mo zia gbâ ti angbongboro tênë na yâ ni. Na pekoni, tuku mbutu na ndo ni. Mo yeke bâ so tênë na mbutu ni asi yâ ti seau ni. Tuku atênë ni na mbutu ni na sese, me bata atênë ni na mbutu ni so. Kiri na atênë na mbutu ni na yâ ti seau ni me ti so ni so zia mbutu ni kozo awe si mo zia atênë ni  na ndo ni. Mo yeke bâ so place ayeke lingbi atênë ni pëpe. A yeke ngbanga ti so mo zia mbutu ni kozo na yâ ti seau ni.

¹⁹ A yeke mara ti kpale so la mo yeke tingbi na ni na ngoi so mo gi ti sara kusala na ngoi ti mo. Tongana mo zia aye tongana sarango ngia na kozo ndo, mo yeke wara ngoi pëpe ndali ti aye so ayeke kota mingi, aye ti yingo. Me tongana mo sara ye alingbi na wango ti Bible ti “hinga biani aye so ayeke akota ye mingi ahon atanga ni,” mo yeke wara ngoi ndali ti aye ti Royaume nga ti sara ngia kete.​—aPhil. 1:10.

20. Tongana mo yeke na mbeto nga na gingo bê na ngoi so mo yeke gi ti si na aye so mo zia na gbele mo, ye wa a lingbi mo sara?

²⁰ Tongana mo yeke sara kue ti si na aye so mo zia na gbele mo, so na popo ni batême ayeke dä, ngoi na ngoi mo lingbi ti sara mbeto nga ti gi bê ti mo. Na ngoi so aye tongaso asi na mo, “zia kungba ti mo na ndo L’Éternel, na fade Lo bata mo.” (Ps. 55:23). Ti fadeso, lege azi na mo ti sara kusala ti fango tënë na ti fango ye so a yeke sara ni na yâ ti dunia kue. A yeke mbeni kusala so ayeke pendere mingi nga ayeke kota ahon tanga ti akusala kue na yâ ti mbaï ti azo (Kus. 1:8). Mo lingbi ti soro ti bâ gi azo bango na sarango kusala ni. Wala mo lingbi ti mû tere ti mo ti sara kua ni. Ke pëpe ti mû akode so mo yeke na ni ti sara si aye ti Royaume ague na li ni. Mo yeke wara vundu lâ oko pëpe na sarango na “Lo so acréé mo, na lâ ti pendere ti mo”.​—Zo-ti. 12:3.

[Kete tënë na gbe ni]

Mo yeke kiri tënë tongana nyen?

• Ngbanga ti nyen a yeke nzoni mo zia ambeni ye na gbele mo?

• Ambeni nzoni ye wa a yeke nzoni mo zia na gbele mo ti si dä?

• Ye wa a hunda ti sara ti wara batême?

• Tongana nyen gingo ti bâ aye so ayeke kota ye na lê ti mo ayeke mû maboko na mo ti si na aye so mo zia na gbele mo?

[Ahundango tënë ti manda na ye]

[Foto na lembeti 23]

Mo zia na gbele mo ti diko Bible lâ na lâ?

[Foto na lembeti 24]

Tapande so afa nyen na mo?