Bantfu Labasha—Nitawukwentani Ngekuphila Kwenu?
Bantfu Labasha—Nitawukwentani Ngekuphila Kwenu?
“Angigadli nje kungatsi ngigadla umoya.”—1 KHOR. 9:26.
1, 2. Kute uphumelele njengobe ukhulela ebudzaleni, yini lokudzingeka ube nayo?
NANGABE ulungela kutsatsa luhambo ngendlela longakayetayeli, uye uphatse libalave kanye nekhampasi. Lelibalave lingakusita ubone kutsi ukuphi futsi likusite nekutsi uhlele indlela lefanele lotawuhamba ngayo. Lekhampasi yona ingakusita kutsi uchubeke uhamba ngalendlela lefanele. Nanobe kunjalo, lelibalave kanye nekhampasi angeke kukusite nangabe ungati kutsi ufuna kuyaphi. Kute ungaloku undzindza, kudzingeka wati kahle kutsi ufuna kuyaphi.
2 Njengobe ukhulela ebudzaleni, nawe usesimeni lesifananako. Likhona libalave kanye nekhampasi longayetsemba. LiBhayibheli lilibalave lelingakusita kutsi uhlele indlela yekuphila lefanele. (Taga 3:5, 6) Nangabe nembeza wakho uceceshwe kahle, ungakusita kakhulu ekutseni uchubeke uhamba ngendlela yekuphila lefanele. (Rom. 2:15) Nembeza ungenta umsebenti lofanana newekhampasi. Nanobe kunjalo, kute kuphila kwakho kuphumelele, kufanele wati kutsi ufuna kuyaphi. Ngako-ke, kufanele ube nemigomo lecacile.
3. Ngutiphi tinzuzo letiletfwa kuba nemigomo, Pawula lakhuluma ngato encwadzini ya-1 Khorinte 9:26?
3 Nakakhuluma ngetinzuzo tekutibekela imigomo kanye nekwetama kuyiphumelelisa, umphostoli Pawula wabhala: “Nami-ke angigijimisi kwemuntfu longenawo umgomo, futsi nangesibhakela angigadli nje kungatsi ngigadla umoya.” (1 Khor. 9:26) Nawunemigomo, ungakwati kugijima ngekuciniseka. Madvutane nje, kutawudzingeka kutsi utsatse tincumo letibalulekile letimayelana nekukhonta Nkulunkulu, umsebenti, umshado, umndeni, kanye nalokunye lokunyenti. Ngaletinye tikhatsi, ungeva shengatsi kunetintfo letinyenti letikudidako lokufanele ukhetse kuto. Nangabe uhlela indlela lotawuphila ngayo kusenesikhatsi, futsi tincumo takho utisekele emacinisweni kanye nasetimisweni letitfolakala eVini laNkulunkulu, angeke ulingeke ekutseni uhambe ngendlela lengakafaneli.—2 Thim. 4:4, 5.
4, 5. (a) Yini lengenteka nangabe ungatibekeli imigomo yakho? (b) Kungani kufanele tincumo takho ticondziswe sifiso sekujabulisa Nkulunkulu?
4 Nangabe ungatibekeli imigomo yakho, kungenteka kutsi bontsanga yakho kanye nabothishela bakho bakukhutsate kutsi wente loko labacabanga kutsi kukulungele. Ngisho nobe unemigomo letsite, labanye bangase bachubeke baveta imibono yabo. Nawusalalele loko labakushoko, tibute: ‘Lemigomo labakhuluma ngayo ingangisita yini kutsi ngikhumbule uMdali wami ebusheni bami, nobe itawungiphatamisa?’—Fundza Umshumayeli 12:1.
5 Kungani kufanele tincumo takho ekuphileni ticondziswe sifiso sekujabulisa Nkulunkulu? Lesinye sizatfu kutsi Jehova nguye losinikete tonkhe tintfo letinhle lesinato. (Jak. 1:17) Ecinisweni, bonkhe bantfu kufanele bambonge Jehova. (Semb. 4:11) Ikhona yini lenye indlela lencono yekukhombisa kubonga kwakho ngephandle kwekutsi uhlale ucabanga ngaJehova nawutibekela imigomo? Asesicabange ngemigomo lokungaba yinzuzo kuyifinyelela, kanye naloko longakwenta kute uyiphumelelise.
Ngumiphi Imigomo Longatibekela Yona?
6. Ngumuphi umgomo lobalulekile nalosisekelo longatibekela wona, futsi kungani?
6 Njengobe kuchaziwe esihlokweni lesendlulile, umgomo lobalulekile nalosisekelo longatibekela wona kuhlolisisa kutsi loko lokushiwo eBhayibhelini kuliciniso yini. (Rom. 12:2; 2 Khor. 13:5) Bontsanga yakho bakholelwa ekutigucukeleni kwemvelo nobe kuletinye timfundziso tenkholo yemanga letehlukehlukene, ngobe labanye babatjela kutsi nguloko lokufanele bakukholelwe. Nanobe kunjalo, wena akukafaneli ukholelwe entfweni letsite ngobe nje labanye bantfu bafuna kutsi uyikholelwe. Khumbula, Jehova ufuna kutsi umkhonte ngayo yonkhe ingcondvo yakho. (Fundza Matewu 22:36, 37.) Babe wetfu wasezulwini ufuna kutsi kukholwa kwakho ukwakhele ebufakazini.—Heb. 11:1.
7, 8. (a) Kutibekela miphi imigomo longayifinyelela ngesikhatsi lesifishane lokutawukusita kutsi ucinise kukholwa kwakho? (b) Yini lotawuyitfola njengobe ufinyelela leminye yemigomo yakho?
7 Kute ukwati kucinisa kukholwa kwakho, kungani ungatibekeli imigomo longayifinyelela ngesikhatsi lesifishane? Lomunye umgomo ungaba kuthandaza malanga onkhe. Kute imithandazo yakho ihlale icondzile futsi ungaphindzaphindzi, kungakusita kutikhumbula nobe kutibhala phansi tintfo letitsite letenteke emkhatsini welilanga lotawufuna kukhuluma ngato emthandazweni. Kufanele uciniseke kutsi awukhulumi nje ngetinsayeya lohlangabetane nato kuphela, kodvwa ukhuluma nangetintfo letikujabulisile. (Fil. 4:6) Lomunye umgomo ungaba kufundza liBhayibheli malanga onkhe. Bewati yini kutsi nawufundza emakhasi langaba mane ngelilanga, utawulifundza lonkhe liBhayibheli ngemnyaka lowodvwa nje kuphela? a UmBhalo weTihlabelelo 1:1, 2, utsi: ‘Ubusisiwe umuntfu . . . lokujabula kwakhe kusemtsetfweni waSimakadze, uyacabanga azindle ngawo imini nebusuku.’
8 Umgomo wesitsatfu longatibekela wona, kuhlela kutsi uphendvule kuyo yonkhe imihlangano yelibandla. Ekucaleni, ungase uyifundze imphendvulo yakho nobe umbhalo lotsite. Kodvwa njengobe sikhatsi sichubeka, ungase ube nemgomo wekuphendvula ngemavi akho. Kuliciniso kutsi sikhatsi nesikhatsi lophendvula ngaso usuke uniketa Jehova sipho. (Heb. 13:15) Nasewuyifinyelele leminye yalemigomo, kuciniseka kanye nekubonga kwakho Jehova kutawukhula, futsi utawukulungela kutibekela imigomo longayifinyelela esikhatsini lesitako.
9. Nangabe ungasiye ummemeteli weMbuso, ngumiphi imigomo longayifinyelela esikhatsini lesitako longatibekela yona?
9 Ngumiphi imigomo longayifinyelela esikhatsini lesitako longatibekela yona? Nangabe usengacali kumemetela tindzaba letinhle, umgomo wakho longawufinyelela esikhatsini lesitako kuba ngummemeteli weMbuso. Nasewuwufinyelele lomgomo lomuhle, utawufuna kuphuma njalo futsi ube lusito, ingabi khona inyanga longayi ngayo ensimini. Utawufuna kufundza kusebentisa liBhayibheli ensimini. Nawenta kanjalo, utawutfola kutsi uwujabulela kakhulu umsebenti wekushumayela. Ngemuva kwaloko, ungacala kwandzisa sikhatsi losicitsa emsebentini wekushumayela emtini ngemuti nobe utimisele kuchuba tifundvo teliBhayibheli. Njengemmemeteli longakabhajatiswa, ngumuphi umgomo loncono kakhulu longatibekela wona kwendlula kufanelekela kubhajatiswa, ube nguFakazi waNkulunkulu Jehova lotinikele futsi wabhajatiswa?
10, 11. Ngumiphi imigomo yesikhatsi lesitako bantfu labasha lababhajatisiwe labangatibekela yona?
10 Nangabe sewuvele usikhonti saJehova lesibhajatisiwe, nayi leminye yemigomo longayifinyelela esikhatsini lesitako longatibekela yona. Ngaletinye tikhatsi ungase ufune kusita emabandla kutsi asebente insimi lengashunyayelwa njalo. Ungase ukhetse nekusebentisa emandla kanye nemphilo yakho lenhle kute ube lihlahlandlela lelisitako nobe lelivamile. Tinkhulungwane temahlahlandlela lajabulako titakutjela kutsi umsebenti wasikhatsi sonkhe uyindlela lezuzisako yekukhumbula uMdali wakho emalangeni ebusha bakho. Lena migomo longayifinyelela nawusahlala ekhaya. Libandla lakini nalo litawuzuza kakhulu ngelusito lwakho.
11 Leminye imigomo longayifinyelela esikhatsini lesitako ingakwenta ungagcini nje ngekusita libandla lakini kuphela. Sibonelo saloku kutsi ungase uhlele kuyawukhonta kulenye indzawo nobe kulelinye live lelinesidzingo lesikhulu. Ungase ufune kusita ekwakhiweni kwemaHholwa eMbuso nobe takhiwo teligatja kulamanye emave. Ungase ukwati kungenela umsebenti waseBethel nobe ube sitfunywa selivangeli. Umgomo wekucala lobaluleke kakhulu lokufanele uwufinyelele ngembikwekutsi ufinyelele lemigomo yesikhatsi lesitako lesisandza kukhuluma ngayo, kubhajatiswa. Nangabe usengakabhajatiswa, cabanga ngekutsi yini ledzingekako kute ukwati kufinyelela lomgomo lobalulekile ekuphileni kwakho.
Kufinyelela Umgomo Wekubhajatiswa
12. Labanye bantfu babhajatiswa ngatiphi tizatfu, futsi kungani leto tizatfu tingakeneli?
12 Ungayichaza njani injongo yekubhajatiswa? Labanye bangase bacabange kutsi injongo yako ikubavikela ekwenteni sono. Labanye bona bangase babe nemuva wekutsi kufanele babhajatiswe ngobe bangani babo benta kanjalo. Labanye bantfu labasebasha bangase babhajatiswe ngobe bafuna kujabulisa batali babo. Nanobe kunjalo, lubhabhatiso alusiso sivumelwane lesikuvimbela ekwenteni tintfo lebewungatsandza kutenta ekusitsekeni, futsi akukafaneli ubhajatiswe ngobe ucindzetelwa bantfu labatsite. Kufanele ubhajatiswe nangabe ukucondza kahle loko lokushiwo kuba ngulomunye waboFakazi BaJehova, futsi uciniseka kahle kutsi sewukulungele futsi uyafuna kuwemukela lomtfwalo.—Shu. 5:4, 5.
13. Kungani kufanele ubhajatiswe?
13 Lesinye sizatfu sekubhajatiswa kutsi Jesu wayala balandzeli bakhe kutsi ‘bente bafundzi . . . , bababhabhatise.’ Wabeka sibonelo ngekutsi naye abhajatiswe. (Fundza Matewu 28:19, 20; Makho 1:9.) Ngetulu kwaloko, lubhabhatiso lusinyatselo lesibalulekile lokufanele sitsatfwe ngulabo labafuna kusindza. Ngemuva kwekukhuluma ngekwakha kwaNowa umkhumbi loyo yena nemndeni wakhe labasindziswa ngawo kuZamcolo, umphostoli Phetro watsi: ‘Loko lokuhambelana naloku nyalo kuyanisindzisa, lokukutsi, lubhabhatiso, . . . ngekuvuka kwaJesu Khristu ekufeni.’ (1 Phet. 3:20, 21) Nanobe kunjalo, loku akusho kutsi lubhabhatiso lufanana nemshuwalensi, kutsi uyabhajatiswa kute uvikeleke nakwenteka kuvela ingoti. Kunaloko, ubhajatiswa ngesizatfu sekutsi utsandza Jehova futsi ufuna kumkhonta ngenhlitiyo yakho yonkhe, ngemphefumulo, ngengcondvo, nangemandla akho onkhe.—Mak. 12:29, 30.
14. Yini lengenta labanye bakungabate kubhajatiswa, kodvwa ngusiphi sicinisekiso lonaso?
14 Labanye bangase bakungabate kubhajatiswa ngobe besaba kutsi bangase basuswe ekuhlanganyeleni njengobe sikhatsi sichubeka. Nawe unekwesaba lokunjalo yini? Nangabe kunjalo, kwesaba lokufanana naloku akusikubi. Kungasho kutsi uyawucondza umtfwalo lomkhulu lota ngekuba ngulomunye waboFakazi BaJehova. Kodvwa kungenteka yini kutsi kunalesinye sizatfu lesikwenta wesabe? Mhlawumbe awukaciniseki ngekutsi kuphila ngetimiso taNkulunkulu kuyindlela lencono kakhulu yekuphila. Kuleso simo, kucabanga ngemiphumela letfolwa ngulabo labangatinaki timiso teliBhayibheli kungakusita kutsi wente sincumo. Ngakulokunye, kungaba kutsi uyatitsandza timiso taNkulunkulu kodvwa awuciniseki kutsi ungakwati kutigcina. Ecinisweni, loku kungaba luphawu loluhle ngobe kuveta kutsi utfobekile. Ngetulu kwaloko, liBhayibheli litsi tonkhe tinhlitiyo tebantfu labanesono tiyayengana. (Jer. 17:9) Kodvwa ungaphumelela nangabe ngaso sonkhe sikhatsi ‘ucaphela kuhamba ngelivi laNkulunkulu.’ (Fundza Tihlabelelo 119:9.) Ngisho nobe kungutiphi tizatfu letikwenta ungabate kubhajatiswa, kufanele utilungise. b
15, 16. Yini lengakusita ubone kutsi sewukulungele kubhajatiswa?
15 Yini lengakusita ubone kutsi sewukulungele kubhajatiswa? Lenye indlela kutibuta imibuto lefanana nalena: ‘Ngiyakwati yini kubachazela labanye ngetimfundziso letisisekelo teliBhayibheli? Ngiyahlanganyela yini emsebentini wekushumayela ngisho nalapho batali bami bangekho? Ngiba khona njalo yini kuyo yonkhe imihlangano yebuKhristu? Ngisatikhumbula yini tikhatsi lengakwati ngato kumelana nekucindzetelwa bontsanga? Ngitawuchubeka yini ngikhonta Jehova nangabe batali kanye nebangani bami bayekela? Sengibuthandazele yini buhlobo bami naNkulunkulu? Sengitinikele yini kuJehova ngalokuphelele ngemthandazo?’
16 Lubhabhatiso lusinyatselo lesitsintsa kuphila, futsi akukafaneli sitsatfwe melula. Sewuvutfwe ngalokwanele yini kutsi ucabangele kubhajatiswa? Kuvutfwa kusho lokungetulu kwekukwati kwetfula tinkhulumo letinhle nobe timphendvulo emihlanganweni. Kudzinga kutsi ukwati kwenta tincumo letiveta kutsi uyaticondza timiso teliBhayibheli. (Fundza Hebheru 5:14.) Nangabe ukwati kwenta njalo, yini lekuvimbako kutsi ujabulele lilungelo lekukhonta Jehova ngenhlitiyo yonkhe, futsi uphile ngendlela lekhombisa kutsi utinikele kuye ngalokuphelele?
17. Yini letawukusita kutsi ukwati kumelana netilingo letingaba khona ngemuva kwekubhajatiswa?
17 Ngekushesha nje ngemuva kwekubhajatiswa, utawutiva unemdlandla lomkhulu wekukhonta Nkulunkulu. Nanobe kunjalo, ngekushesha ungahlangabetana netilingo letitawuvivinya kukholwa kwakho kanye nemandla akho. (2 Thim. 3:12) Ungacabangi kutsi kufanele umelane naletilingo uwedvwana. Cela seluleko kubatali bakho. Funa lusito kubantfu labavutsiwe ngekwakamoya ebandleni, futsi ube nebungani lobucinile nalabo labangakusita. Ungakhohlwa kutsi Jehova uyakukhatsalela, futsi utawukunika emandla lowadzingako kute ukwati kumelana nanobe ngutiphi timo letingahle tivele.—1 Phet. 5:6, 7.
Ungayifinyelela Njani Imigomo Yakho?
18, 19. Utawuzuza njani ngekuhlola kutsi yini lebaluleke kakhulu kuwe?
18 Ngaphandle kwetinhloso letinhle lonato, kuke kwenteke yini ubone shengatsi awunaso sikhatsi lesenele sekwenta loko lofuna kukwenta? Nangabe kunjalo, kufanele uhlole kutsi yini lebaluleke kakhulu kuwe. Asesifananise: Tsatsa libhakede ulifake ematje lamakhulu, bese utsela umhlabatsi kulamatje. Nyalo sewunelibhakede leligcwele ematje nemhlabatsi. Litfulule lelibhakede kodvwa ungawalahli lamatje nalomhlabatsi. Nyalo cale ugcwalise lelibhakede ngemhlabatsi bese wetama kufaka lamatje kulomhlabatsi. Kungani angaseneli? Kungobe ucale wafaka umhlabatsi kulelibhakede.
19 Nawe uba nenkinga lefananako nawetama kuhlela sikhatsi sakho. Nawubeka tekutijabulisa kucala ekuphileni kwakho, angeke ube naso sikhatsi lesenele setintfo letibalulekile—njengemisebenti lehlobene nekukhonta Nkulunkulu. Kodvwa nawusebentisa lesikhutsato seliBhayibheli ‘sekwehlukanisa kulokuncono kakhulu,’ utawutfola kutsi unaso sikhatsi semisebenti yeMbuso kanye nesekutijabulisa.—Fil. 1:10.
20. Nangabe utiva ukhatsateka nobe ungabata nawetama kufinyelela imigomo yakho, yini lokufanele uyente?
20 Njengobe ulwela kufinyelela imigomo yakho, lefaka ekhatsi kubhajatiswa, ngaletinye tikhatsi ungakhatsateka futsi ube nekungabata. Nakwenteka loko, “lahlela imitfwalo yakho kuSimakadze, yena uyawukusimisa.” (Hla. 55:22) Kodvwa kwanyalo, unelitfuba lekuhlanganyela emsebentini lobaluleke kuyendlula yonkhe leke yaba khona emlandvweni, umsebenti wekushumayela emhlabeni wonkhe newekufundzisa. (Imis. 1:8) Ungakhetsa kuba sibukeli, ubukele labanye nabenta lomsebenti, nobe ukhetse kuba nencenye kuwo. Ungatigodli ekusebentiseni emakhono akho kute utfutfukise imisebenti yeMbuso. Angeke utisole ‘ngekukhumbula uMdali wakho etinsukwini tebusha bakho.’—Shu. 12:1.
[Imibhalo lengentansi]
a Fundza Sicongosekulindza sa-August 1, 2009, emakhasini 15-18, ngesiZulu.
b Kute utfole lusito ngalendzaba, fundza incwadzi letsi “Intsha Iyabuza—Izimpendulo Ezisebenzayo,” Umculu 2, sehluko 34, ngesiZulu.
Ungaphendvula Njani?
• Kungani kufanele utibekele imigomo?
• Ngumiphi leminye imigomo lebalulekile longayifinyelela?
• Yini lokufanele uyente kute ufinyelele umgomo wekubhajatiswa?
• Kuhlola kutsi yini lebalulekile kuwe kungakusita njani kute ufinyelele imigomo yakho?
[Imibuto Yesihloko Lesifundvwako]
[Sitfombe ekhasini 23]
Unawo yini umgomo wekufundza liBhayibheli malanga onkhe?
[Sitfombe ekhasini 24]
Ngusiphi sifundvo lositfolako kulomfanekiso?