Nobana —Ino Ncinzi Ncomuyoocita Mubuumi Bwanu?
Nobana —Ino Ncinzi Ncomuyoocita Mubuumi Bwanu?
“Tandifwusi mfwaindi zyangu ikuuma buyo muwo pe.”—1 Ko. 9:26.
1, 2. Kutegwa muzwidilile nomuyabukomena ncinzi ncomweelede kucita?
AMWEEZYEEZYE kuti muunka kubusena nkomutazyi kabotu. Muunka amuntu wakaliko kale kubusena oobo alimwi mulamusyoma. Ikuti naa uliizyi nzila yuunka kubusena oobo, nkokuti inga ulamusololela. Ikuti naa mwamutobela tamukonzyi kusweeka.
2 Nomuyaabukomena andinywe cili mbuli kuti muli mulweendo. Nkobali mbomusyoma bakonzya kumusololela. Ibbaibbele lili mbuli maapu iikonzya kumugwasya kuzyiba nzila njomweelede kutobela. (Tus. 3:5, 6) Kuti aiisigwa kabotu manjezezya aanu alakonzya kumugwasya kapati kuti muzumanane kutobela nzila iiluzi. (Lom. 2:15) Kutegwa muzwidilile mubuumi bwanu, mweelede kuziba nkomuya. Mweelede kuba ambaakani zyakumuuya.
3. Ino mbubotu nzi bwakuba ambaakani mbwaakaamba Paulo kulugwalo lwa 1 Bakolinto 9:26?
3 Mwaapostolo Paulo wakaamba mbocigwasya kuba aambaakani akuzizukizya naakaalemba kuti: “Aboobo, tandibaliki mbuli kuti tandikuzyi nkondiya pe; tandifwusi mfwaindi zyangu ikuuma buyo muwo pe.” (1 Ko. 9:26) Kuti kamujisi mbaakani mulakonzya kucita zyintu cakusinizya. Lino-lino muyooyandika kusala zyintu zipati mbuli bukombi, mulimo, lukwatano alimwi amukwasyi. Cimwi ciindi inga mwanyongana kuti naa ncinzi ncimweelede kusala. Pele kuti mwaasalila limwi nzila njomuyanda kutobela, kweelana akasimpe alimwi anjiisyo zijanika Mujwi lya Leza, tamukayungwi kutobela nzila iitaluzi.—2 Ti. 4:4, 5.
4, 5. (a) Ino ncinzi cikonzya kucitika kuti timwalibikkila mbaakani? (b) Ino nkaambo nzi zyintu nzyomusala kucita mubuumi bwanu ncozyeelede kumukkomanisya Leza?
4 Ikuti naa tamulibikkili mbaakani, beenzyinyoko abamayi banu balakonzya kumuyunga kucita ncobayeeya kuti cili kabotu. Masimpe ngakuti nokuba kuti mulijisi mbaakani nzyomuyanda kuzuzikizya, balakonzya kumwaambila mizeezo yabo iitagwasyi. Nomumvwa mizeezo yabo amulibuzye kuti, ‘Sena mbaakani nzyobaamba inga zyandigwasya kuyeeya Mulengi wangu mubulombe bwangu naa inga tazyindigwasyi?’—Amubale Mukambausi 12:1.
5 Ino nkaambo nzi zyintu nzyomusala kucita mubuumi bwanu ncozyeelede kumukkomanisya Leza? Kaambo komwe nkakuti Jehova nguutupa zyintu zibotu zyoonse. (Jak. 1:17) Aboobo toonse tweelede kumulumba Jehova. (Ciy. 4:11) Sena inga tiicabota kuti kamumuyeeya Jehova nomuyeeya nzomuyanda kucita mubuumi? Atubone mbaakani nzyomukonzya kulibikkila ambomukonzya kuzizuzikizya.
Ino Nimbaakani nzi Nzyomukonzya Kulibikkila?
6. Ino nimbaakani nzi iyandika kapati njomukonzya kubikka, alimwi nkaambo nzi?
6 Mbubwenya mbukwaambidwe kale mucibalo cainda, icipati ncomweelede kusyoma ncakuti mweelede kusyoma kasimpe kamu Bbaibbele. (Lom. 12:2; 2 Ko. 13:5) Beenzyinyoko balakonzya kuti kabasyoma munjiisyo yakusanduka naa kusyoma zyintu zyakubeja mubukombi bwabo akaambo kakuti bamwi babaambila kuti beelede kusyoma nzyobasyoma. Tamweelede kusyoma nzyintu akaambo kakuti balazisyoma bamwi. Kamuyeeya kuti Jehova uyanda kuti kamumubelekela amoyo yanu yoonse. (Amubale Matayo 22:36, 37.) Taateesu wakujulu uyanda kuti mube alusyomo lwini.—Heb. 11:1.
7, 8. (a) Ino nimbaakani nzi nzyomukonzya kuzuzikizya muciindi cisyoonto zikonzya kuyumya lusyomo lwanu? (b) Ino ncinzi ncomuya kujana nomuzuzikizya mbaakani zyanu zyaciindi cisyoonto?
7 Kutegwa muyumye lusyomo lwanu, mweelede kulibikkila mbaakani nzyomukonzya kuzuzikizya muciindi cisyoonto. Mbaakani imwi njakupaila abuzuba. Kutegwa mwaambe cini ncomuyandika aciindi eeco mulakonzya kuziyeeyela naa kuzilemba eezyo nzyomuyanda kubikkilizya mumupailo oobo buzuba. Mulakonzya kwaamba buyumu-yumu mbomujana azyintu zimukkomanisya. (Flp. 4:6) Imbaakani aimwi njakubala Bbaibbele abuzuba. Sena mulizyi kuti ikuti naa kamubala candaano comwe mumagwalo aa Banakristo aa Chigiliki abuzuba inga mwaamanizya kwaabala mumwaka omwe? Intembauzyo 1:1, 2, yaamba kuti: “Ngusicoolwe . . . [uu]kondelelwa Mulao wa-Jehova, amulao wakwe ulauyeeya lyoonse masiku asikati.”
8 Imbaakani yatatu njakulibambila kuti kamwiingula mucibeela cili coonse nomuunka kumiswaangano. Kusaanguna inga mwabala bwiinguzi naa lugwalo. Mwamana inga mwaba ambaakani yakuvwila mumajwi aanu. Masimpe, lyoonse nomwiingula mupa cipego kuli Jehova. (Heb. 13:15) Ikuti naa mwazizuzikizya mbaakani eezi zimwi, munakulisyoma, munakumuyanda Jehova alimwi muyakucikonzya kulibikkila mbaakani zyaciindi cilamfwu.
9. Ikuti naa kamutanaba basikumwaya bamakani a Bwami, ino nimbaakani nzi zyaciindi cilamfwu nzyomukonzya kulibikkila?
9 Ino nimbaakani nzi zyaciindi cilamfwu nzyomukonzya kubikka? Ikuti naa kamutanaba bakambausi bamakani mabotu, mbaakani yanu yaciindi cilamfwu ilakonzya kuba yakukambauka makani mabotu a Bwami. Ikuti naa mwaizuzikizya mbaakani eeyi, munakuyanda kuti lyoonse kamuunka mubukambausi alimwi kakutaindi mwezi. Alimwi muyakwiiya kubelesya Bbaibbele nomuli mumulimo. Nomuyabucita boobo, muyakubona kuti muyootalika kuukkomanina kapati mulimo wakukambauka. Mpoonya mulakonzya kuyungizya ciindi cakuba mubukambausi bwakuŋanda aŋanda naa kusoleka kuba aciiyo ca Bbaibbele caaŋanda. Mbomuli basikumwaya batabbapatizidwe, inga cabota kuti mwaba ambaakani yakubbapatizigwa akuba Bakamboni ba Jehova Leza balyaabide.
10, 11. Ino nimbaakani nzi zyaciindi cilamfwu nzyobakonzya kulibikkila bakubusi babbapatizidwe?
10 Ikuti naa kamuli babelesi ba Jehova babbapatizidwe, nzyeezi mbaakani zimwi zyaciindi cilamfwu nzyomukonzya kucita. Muzyiindi mulakonzya kugwasya mbungano zyanu kubeleka cilawo mobatavwuli kukambauka. Alimwi kuti naa cilakonzyeka mulakonzya kucita bupainiya bwakugwasilizya naa bwaciindi coonse. Zyuulu-zyuulu zyabapainiya balakonzya kumwambila kuti mulimo waciindi coonse ninzila iigwasya yakuyeeya Mulengi wanu kamucili bakubusi. Eezyi nimbaakani nzyomukonzya kuzuzikizya nomucili aaŋanda. Mumbungano momubede amwalo balagwasyigwa akaambo kakuzuzikizya mbaakani zyanu.
11 Imbaakani zimwi zyaciindi cilamfwu zilakonzya kupa kuti mugwasye mbungano zimwi kuleka buyo mbungano momubede. Mucikozyanyo mulakonzya kuba amakanze aakuunka kubusena naa cisi kubulide basikumwaya. Ndiza inga mwayanda kugwasya kuyaka Maanda a Bwami naa mitabi muzisi zimbi. Mulakonzya kuyakubelekela ku Mutabi naa kucita mulimo wabumisyinali. Pele imbaakani yaciindi cilamfwu iyandika kapati aali zyeezi zyoonse njakubbatizigwa. Ikuti naa kamutana bbapatizigwa, amubone cijatikizidwe kuti musike ambaakani eeyi mubuumi bwanu.
Kuzuzikizya Mbaakani Yaku Bbapatizigwa
12. Ino twaambo nzi tubapa kuti bamwi babbapatizyigwe, alimwi kaambo nzi ncotutali twaambo tubotu?
12 Ino mbuti mbomukonzya kukupandulula bbapatizyigwa? Bamwi bayeeya kuti inga cabagwasya kuti bataciti cibi. Bamwi bayeeya kuti balakonzya kubbapatizigwa akaambo kakuti beenzinyina bakabbapatizigwa. Bamwi bana bayanda kukkomanisya bazyali babo. Nokuba boobo, ikubbapatizyigwa takukonzyi kumulesya kucita cintu ncimuyanda kucita; naa kubbapatizyigwa buyo akaambo kakuti beenzinyoko bamusinikizya. Mweelede kubbapatizyigwa buyo kuti mwazyiba zijatikizidwe mukuba Bakamboni ba Jehova alimwi akuti kamuli masimpe kuti mulilibambide alimwi muliyandide kuubeleka mulimo ooyu.—Muk. 5:4, 5.
13. Ino nkaambo nzi ncomweelede kubbapatizigwa?
13 Ikaambo komwe kapa kuti katubbapatizyigwa nkakuti Jesu wakaambila basikumutobela kuti “mukagwasye . . . akubabbapatizya.” Alimwi awalo wakacita oobo kwiinda mukubbapatizyigwa. (Amubale Matayo 28:19, 20; Maako 1:9.) Aboobo, kubbapatizyigwa kulayandika kapati kuli baabo bayanda kufwutuka. Naakamana kwaamba bwato mbwaakayaka Nowa, omo mwalo amukwasyi wakwe mwakafwutukkila ciindi ca Zambangulwe, mwaapostolo Petro wakaamba kuti: “Lubbapatizyo, ilukozyenye aceeci, alwalo lulamufwutula lino, . . . kwiinda mububuke bwa Jesu Kilisito.” (1 Pe. 3:20, 21) Ikubbapatizigwa tacaambi kuti Leza unoomukwabilila kuti kwaba ntenda. Aboobo mulabbapatizyigwa akaambo kakuti mulamuyanda Jehova alimwi muyanda kumubelekela amoyo wanu woonse, abuumi bwanu boonse, amizeezo yanu yoonse alimwi anguzu zyanu zyoonse.—Mk. 12:29, 30.
14. Ino ncinzi cibalesya bamwi kubbapatizigwa, pele ino ncisyomezyo nzi ncomujisi?
14 Bamwi balayoowa kubbapatizigwa akaambo kakuyoowa kugusyigwa mumbungano. Sena andinywe mulayoowa? Ikuyoowa kuli boobo kuli buyo kabotu. Eeci caamba kuti mulizyi ncocaamba kuba uumwi wa Bakamboni ba Jehova. Sena inga kakuli kaambo akambi? Ndiza tamunasyoma kuti kubelesya njiisyo zya Leza ncecintu cibotu mubuumi bwanu. Munzila iili boobo, kuyeeya zikonzya kubacitikila aabo batatobeli njiisyo zyamu Bbaibbele cilakonzya kumugwasya kusala kabotu. Kulubazu lumwi, ndiza mulakonzya kuti mulaziyanda njiisyo zya Leza pele tamulisyomi kuti inga mwacikonzya. Masimpe, eeci inga caba citondezyo cibotu cakulicesya. Tee tulizyi kuti Ibbaibbele lyaamba kuti bantu boonse batalondekede myoyo yabo ileena. (Jer. 17:9) Pele mulakonzya kuzwidilila kuti naa mwazumanana kutobela ‘ijwi lya Leza.’ (Amubale Intembauzyo 119:9.) Kuti naa kuli twaambo tumwi tumulesya kubbapatizigwa, mulakonzya kutulanga-langa akubona mbomukonzya kutumanizya.
15, 16. Ino inga mwazyiba buti kuti lino muyandika kubbapatizigwa?
15 Ino mbuti mbomukonzya kuzyiba kuti lino inga mwabbapatizigwa? Nzila imwi njakulibuzya mubuzyo mbuli wakuti: ‘Sena inga ndabapandulwida njiisyo zyamu Bbaibbele bamwi? Sena ndilakuunka mumulimo wakukambauka nokuba kuti bazyali bangu tiibaunka? Sena ndilajanika kumiswaangano yoonse ya Bunakristo? Sena kuli ciindi ncondiyeeya nindakakaka kuyungwa? Sena inga ndazumanana kumubelekela Jehova ikuti naa bazyali bangu alimwi abeenzuma bacileka? Sena ndilapaila kuti ndizumanane kumvwana a Leza? Alimwi sena ndakalyaaba camoyo woonse kuli Jehova mumupailo?’
16 Kubbapatizigwa kulacinca buumi bwamuntu aboobo tacili cintu cakuubya-ubya. Sena mwasika aciimo cakuti inga wakabikkila maano kaambo aaka? Kukomena kumuuya tacaambi buyo kupa makani mabotu kucibumbili naa kwiingula kabotu kumiswaangano. Caamba kusala kabotu kweelana anjiisyo zyamu Bbaibbele. (Amubale Bahebulayo 5:14.) Ikuti naa muli aciimo mpomukonzya kucita oobu, nkokuti mulaacoolwe cipati cakubelekela Jehova amoyo wanu woonse alimwi akupona munzila itondezya kuti muli lyaabide ncobeni kumubelekela.
17. Ino ncinzi cikonzya kumugwasya kuti muliyumye kumapenzi aacitika mwabbapatizigwa?
17 Mwabbapatizigwa buyo munakuli basungu mukumubelekela Leza. Kwainda buyo ciindi cisyoonto mulakonzya kuba mumapenzi akonzya kusunka lusyomo lwanu. (2 Ti. 3:12) Mutayeeyi kuti aya mapenzi mulakonzya kwaalwana molikke. Amulombe bazyali banu abaabo basimide kumuuya bali mumbungano yanu kuti bamugwasye. Mweelede kumvwana abantu aabo bakonzya kumugwasya. Mutalubi kuti Jehova ulamubikkila maano alimwi uyakumuyumya mumapenzi woonse akonzya kumusikila.—1 Pe. 5:6, 7.
Ino Mbuti Mbomukonzya Kuzizuzikizya Mbaakani Zyanu?
18, 19. Ino mbuti mbomukonzya kugwasyigwa kuti mwazilanga-langa nzyomweelede kubikka kumbele?
18 Nokuba kuti mulijisi makanze mabotu, sena eeci caamba kuti tamukabi aciindi cakucita zintu nzyomuyanda kucita? Ikuti kacili boobo, amuzilange-lange zintu nzyomweelede kubikka ambele. Mucikozyanyo: Amubweze kapeelo kabangalala mubikke mabwe mapati-pati kutaanguna mwamana mutile museenga aatala. Amuzyigusye zyoonse pele muziyobole zimwagusya. Lino amutaangune kubikka museenga mwamana mubikke mabwe mukapeelo. Sena zyoonse zyakkwana? Eeci cacitika akaambo kakuti mwataanguna kubikka museenga mukapeelo.
19 Mulakonzya kuba aapenzi lili boobu nomuyanda kujana ciindi. Ikuti naa mwabikka kusobana mubusena bwakutaanguna, muyakujana kuti tamujisi ciindi cinji cakucita zyintu zipati-pati zyakumuuya. Pele kuti mwaatobela malailile amu Bbaibbele akuti “musinizye zyintu ziyandika kapati,” muyakujana kuti mulijisi ciindi cakucita zyintu zya Bwami aciindi cakusobana.—Flp. 1:10.
20. Ino ncinzi ncomukonzya kucita ikuti mwatalika kulibilika akudooneka nomusoleka kuzuzikizya mbaakani zyanu?
20 Nomusoleka kusika ambaakani zyanu kubikkilizya akubbapatizigwa, inga kamulibilika akudooneka. Ikuti naa mwalimvwa boobo, mweelede ‘kubika makani aanu oonse mumaanza aa Jehova, alimwi uyakumukwabilila.’ (Int. 55:22) Kuciindi cino, mulaacoolwe cakutola lubazu mumulimo uukkomanisya alimwi uuyandika kapati mubuumi bwamuntu wakukambauka akwiisya. (Mil. 1:8) Mulakonzya kusala kuti kamubalangilila bantu bacita mulimo ooyu. Naa mulakonzya kutola lubazu. Ikuti naa kuli mulimo ngomucizyi kucita kabotu kutegwa mulimo wa Bwami uyaambele amuucite. Tamukatyompwi pe ikubelekela ‘Mulengi wanu mumazuba aabulombe bwanu.’—Muk. 12:1.
Ino Inga Mwaingula Buti?
• Nkaambo nzi ncomuyandikila kubikka mbaakani?
• Ino nimbaakani nzi zimwi zimuyandika kubikka?
• Ino ncinzi cibikkilizyidwe mukuzuzikizya mbaakani yakubbapatizigwa?
• Ino kulanga-langa nzyomuyanda kucita inga kwamugwasya buti kuzuzikizya mbaakani zyanu?
[Mibuzyo yaciiyo]
[Cifwanikiso icili apeeji 13]
Sena mulijisi mbaakani yakubala Bbaibbele abuzuba?
[Cifwanikiso icili apeeji 15]
Ncinzi ciyakumugwasya kusika ambaakani yakubbapatizigwa?
[Cifwanikiso icili apeeji 16]
Ino nciiyo nzi ncomwiiya kucitondezyo eeci?