Kau Tūpulaga, Koteā Takotou Fakatuʼutuʼu ʼo ʼUhiga Mo Tokotou Maʼuli?
Kau Tūpulaga, Koteā Takotou Fakatuʼutuʼu ʼo ʼUhiga Mo Tokotou Maʼuli?
“Ko au ʼe au fakahaga fēnei taku ʼu tā: ʼe mole au hoko fai pē taku ʼu tā moʼo tā te ʼaele.”—1 KO. 9:26.
1, 2. Koteā ʼaē ʼe ʼaoga ke kotou maʼu ke fua lelei ai takotou lahilahi ake?
KAPAU ʼe kotou folau ki he koga meʼa ʼe mole kotou faʼa ʼiloʼi lelei, ʼe lagi kotou toʼo anai he mape pea mo mulimuli ki he tagata takitaki. Ko te mape ʼe tokoni atu anai ke kotou ʼiloʼi peʼe kotou ʼifea, pea mo kotou ʼiloʼi te ʼu ala fuli ʼaē ʼe maʼua ke kotou toʼo ke kotou kaku ki te koga meʼa ʼaē ʼe kotou fia ʼolo kiai. Ko te tagata takitaki ʼe tokoni atu anai ke kotou nonofo ʼi te ala ʼaē ʼe totonu. Kae ko te mape pea mo te tagata takitaki ʼe mole lahi anai honā ʼaoga atu, mo kapau ʼe mole kotou ʼiloʼi te koga meʼa ʼaē ʼe kotou fia ʼolo kiai. Ke mole tō noa tokotou fagona, ʼe ʼaoga anai ke kotou ʼiloʼi papau te koga meʼa ʼaē ʼe kotou fia ʼolo kiai.
2 ʼE toe hoko te ʼaluʼaga fēia kiā koutou ʼi takotou lahilahi ake. ʼI hona ʼaluʼaga fakatā, ʼe feala ke kotou maʼu he mape ʼe kotou falala kiai pea mo he tagata takitaki. Ko te Tohi-Tapu ʼe ko he mape ʼe feala ke tokoni atu ke kotou ʼiloʼi te ala ʼaē ʼe tonu ke kotou fili. (Taag. 3:5, 6) Kapau ʼe akoʼi fakalelei tokotou leʼo ʼo loto, ʼe lahi anai tana tokoni atu ʼaē ke kotou nonofo ʼi te ala ʼaē ʼe totonu. (Loma 2:15) ʼE feala ke hagē ko he tagata takitaki. Kae ke fua lelei tokotou maʼuli, ʼe ʼaoga foki ke kotou ʼiloʼi te koga meʼa ʼaē ʼe tonu ke kotou ʼolo kiai. ʼE ʼaoga ke kotou ʼiloʼi papau te ʼu fakatuʼutuʼu ʼaē kā kotou fai.
3. Koteā te ʼu lelei ʼo te fai ʼaē ʼo he ʼu fakatuʼutuʼu, ʼe talanoa kiai ia Paulo iā 1 Kolonito 9:26?
3 Neʼe fakahā fakanounou e te ʼapositolo ko Paulo te ʼu lelei ʼo te fai ʼaē ʼo he ʼu fakatuʼutuʼu pea mo faiga mālohi ke fakahoko, ʼi tana tohi fēnei: “Ko au . . . ʼe au lele fēnei: ʼe mole au hoko lele pē; kae ko au ʼe au fakahaga fēnei taku ʼu tā: ʼe mole au hoko fai pē taku ʼu tā moʼo tā te ʼaele.” (1 Ko. 9:26) Kapau ʼe kotou fai hakotou ʼu fakatuʼutuʼu, pea ʼe kotou ʼiloʼi papau ai te faʼahiga maʼuli ʼaē ʼe kotou loto kiai. Mole tuai, pea ʼe tonu anai ke kotou fai he ʼu tonu maʼuhiga ʼo ʼuhiga mo te tauhi, mo te gāue, mo te ʼohoana, pea mo te fāmili, pea mo ʼihi atu faʼahi. ʼI ʼihi temi, ʼe feala ke mole kotou ʼiloʼi lelei te meʼa ʼaē ke kotou fai. Kae kapau ʼe kotou ʼiloʼi fakatomuʼa te faʼahiga maʼuli ʼaē ʼe kotou loto kiai, ʼo fakatafito takotou ʼu tonu ki te ʼu moʼoni pea mo te ʼu pelesepeto ʼaē ʼe tuʼu ʼi te Folafola ʼa te ʼAtua, pea ʼe mole kotou fia toʼo anai te ala ʼaē ʼe kovi.—2 Tim. 4:4, 5.
4, 5. (a) Koteā ʼaē ʼe feala ke hoko mo kapau ʼe mole kotou fai hakotou ʼu fakatuʼutuʼu? (b) He koʼē ʼe lelei ke kotou fai he ʼu tonu ʼo mulimuli ki takotou fia fakafiafia te ʼAtua?
4 Kapau ʼe mole kotou fai hakotou ʼu fakatuʼutuʼu, pea ʼe lagi ko tokotou ʼu kaugā ako pea mo te kau faiako ʼaē kā natou uga koutou ke kotou fai te meʼa ʼaē ʼe natou manatu ʼe lelei maʼa koutou. ʼE moʼoni, tatau aipē peʼe kotou fai hakotou ʼu fakatuʼutuʼu, kae ʼe lagi feala pē ki ʼihi ke natou tuku atu tanatou manatu. Kā kotou logo ki tanatou ʼu faitokoni, kotou fai te fehuʼi ʼaenī kiā koutou totonu pē: ‘Ko te ʼu fakatuʼutuʼu ʼaē ʼe natou talanoa kiai, ʼe tokoni mai anai koa ke au manatuʼi toku Tupuʼaga ʼi toku temi tūpulaga peʼe natou fakaleluʼi anai koa au mai te faʼahi ʼaia?’—Lau ia Tagata Tānaki 12:1.
5 He koʼē ʼe lelei ke kotou fai he ʼu tonu ʼi tokotou maʼuli ʼo mulimuli ki takotou fia fakafiafia te ʼAtua? Heʼe ko Sehova ʼaē neʼe ina foaki mai kiā tātou te ʼu meʼa lelei fuli pē ʼaē ʼe tou maʼu. (Sake 1:17) ʼI tona fakahagatonu, ko tātou fuli ʼe tonu ke tou loto fakafetaʼi kiā Sehova. (Fakh. 4:11) Koteā he tahi age meʼa lelei kiā koutou moʼo fakahā tokotou loto fakafetaʼi, ʼi hakotou fai he ʼu fakatuʼutuʼu ʼaki hakotou manatuʼi tuʼumaʼu ia Sehova? Tou vakaʼi age muʼa pe koteā te ʼu fakatuʼutuʼu ʼaē ʼe ʼaoga ke fakahoko pea koteā ʼaē ʼe tonu ke kotou fai moʼona fakahoko.
Koteā Te ʼu Fakatuʼutuʼu ʼAē ʼe Feala Ke Kotou Fai?
6. Koteā te fakatuʼutuʼu maʼuhiga ʼaē ʼe feala ke kotou fai, pea koteā tona tupuʼaga?
6 Ohagē ko te ʼu faʼahi neʼe kua tou talanoa kiai ʼi te ʼalatike kua ʼosi, ko te fakatuʼutuʼu maʼuhiga ʼaē ʼe feala ke kotou fai, ke kotou vakavakaʼi e koutou totonu peʼe moʼoni te ʼu akonaki Fakatohi-tapu. (Loma 12:2; 2 Ko. 13:5) ʼE lagi ko tokotou ʼu kaugā ako ʼe natou tui ki te evolisio peʼe ki te ʼu faʼahiga akonaki hala fakalotu kehekehe, he neʼe ʼui age e ʼihi kiā nātou ke natou tui ki te ʼu akonaki ʼaia. Kae ʼe mole kotou tui anai ki he meʼa ʼuhi pē ko ʼihi ʼaē ʼe natou loto ke kotou tui kiai. Kotou manatuʼi, ko Sehova ʼe loto ke kotou tauhi age kiā te ia ʼaki tokotou ʼatamai kātoa. (Lau ia Mateo 22:36, 37.) Ko tatatou Tamai ʼaē ʼe ʼi selō ʼe loto ke kotou fakatafito takotou tui ki te ʼu meʼa ʼaē ʼe moʼoni.—Hep. 11:1.
7, 8. (a) Koteā te ʼu fakatuʼutuʼu ʼe feala ke kotou fai pea ʼe mole loaloaga te temi ʼaē moʼona fakahoko, ʼe tokoni atu anai moʼo fakamālohiʼi ia takotou tui? (b) Koteā ʼaē kā kotou maʼu anai mokā ʼe kotou fakahoko hakotou ʼu fakatuʼutuʼu ʼi te ʼu fakatuʼutuʼu ʼaē mole loaloaga te temi ʼaē moʼona fakahoko?
7 Moʼo tokoni atu ki te fakamālohiʼi ʼo takotou tui, he koʼē ʼe mole kotou fai he ʼu fakatuʼutuʼu ʼe mole loaloaga te temi ʼaē moʼona fakahoko? ʼUluaki fakatuʼutuʼu, ʼe feala ke kotou faikole ʼi te ʼaho fuli. Moʼo tokoni atu ke mole tatau tuʼumaʼu pē takotou ʼu faikole pea ke kotou talanoa ki he ʼu meʼa tāfito, ʼe feala ke kotou manatuʼi te ʼu meʼa ʼaē neʼe hoko lolotoga te ʼaho peʼe kotou tohi te ʼu meʼa ʼaia, ʼaē ʼe kotou fia palalau kiai ʼi takotou ʼu faikole. Kotou tōkakaga pē foki naʼa kotou talanoa pē ki te ʼu fihifihia ʼaē neʼe hoko kiā koutou, kae ke kotou toe talanoa ki te ʼu meʼa ʼaē neʼe kotou fakafiafia kiai. (Filp. 4:6) Lua fakatuʼutuʼu, ke kotou lau te Tohi-Tapu ʼi te ʼaho fuli. ʼE kotou ʼiloʼi koa kapau ʼe kotou lau ia pāsina e fā ʼi te ʼaho fuli, ʼe kotou lau kātoa anai te Tohi-Tapu ʼi te taʼu pē e tahi? * ʼE ʼui fēnei iā Pesalemo 1:1, 2: “Manūʼia te tagata ʼaē . . . ko tona fiafia ʼe ʼi te lao ʼa Sehova, pea ʼi tana lao ʼe ina lau leʼo veliveli ʼi te ʼaho mo te pō.”
8 Ko te tolu fakatuʼutuʼu ʼaē ʼe feala ke kotou fai, ke kotou teuteuʼi hakotou tali ki te ʼu fono fuli. ʼI te kamata, ʼe lagi kotou fia lau anai te tali peʼe ko he vaega Tohi-Tapu. Ki muli age, ʼe feala leva ke kotou fai hakotou tali ʼaki takotou ʼu palalau māhani. ʼI tona fakahagatonu, ʼi te temi fuli pē ʼaē ʼe kotou fai tali ai, ʼe kotou momoli he meʼa ʼofa kiā Sehova. (Hep. 13:15) Kā kua kotou fakahoko he ʼu fakatuʼutuʼu ʼi te ʼu fakatuʼutuʼu ʼaia, pea ʼe tuputupu anai takotou falala pea mo takotou loto fakafetaʼi ʼaē kiā Sehova, pea ʼe feala ai anai ke kotou fai hakotou ʼu fakatuʼutuʼu ʼe loaloaga age te temi ʼaē moʼona fakahoko.
9. Kapau ʼe mole heʼeki kotou liliu ko he kaugā fagona ʼo te Puleʼaga, koteā te ʼu fakatuʼutuʼu lelei ʼe feala ke kotou fai pea ʼe loaloaga age te temi ʼaē moʼona fakahoko?
9 Koteā te ʼu fakatuʼutuʼu ʼe loaloaga age te temi ʼaē moʼona fakahoko pea ʼe feala ke kotou fai? Kapau ʼe mole heʼeki kotou kamata fakamafola te logo lelei, ʼe lagi feala ke kotou fakatuʼutuʼu ke kotou liliu ko he kaugā fagona ʼo te Puleʼaga. Kā kua kotou fakahoko te fakatuʼutuʼu maʼuhiga ʼaia, ʼe kotou loto anai ke kotou kau tuʼumaʼu kiai pea mo faiva ʼi tona fai, ʼo mole kotou tō ʼi he māhina ʼi te fai fakamafola. ʼE kotou toe loto anai ke kotou akoako ʼi te fakaʼaogaʼi ʼo te Tohi-Tapu ʼi te minisitelio. Kā kotou fai te faʼahi ʼaia, pea ʼe mahino ia ʼe kotou logoʼi anai he fiafia ʼe lahi age ʼi te gāue fai fakamafola. Pea ʼe feala anai ke kotou hikihiki te temi ʼaē ʼe kotou kau ai ki te fai fakamafola ʼi te ʼu ʼapi, peʼe kotou toe faiga mālohi ke kotou fai he ako Tohi-Tapu. ʼI tokotou ʼuhiga kaugā fagona, koteā he fakatuʼutuʼu ʼe lelei age kiā koutou, ʼi hakotou fakahoko te ʼu maʼua ʼaē ki te papitema, pea mo kotou liliu ai ko he Fakamoʼoni ʼa Sehova ʼAtua kua foaki tona maʼuli kiā te ia pea mo papitema?
10, 11. ʼO ʼuhiga mo te kau tūpulaga ʼaē kua papitema, koteā te ʼu fakatuʼutuʼu ʼe loaloaga age te temi moʼona fakahoko ʼe feala ke natou fai?
10 Kapau ko koutou ko he kaugana ʼa Sehova kua papitema, koʼenī te ʼu fakatuʼutuʼu ʼe loaloaga age te temi ʼaē moʼona fakahoko. ʼI ʼihi temi, ʼe lagi kotou fia tokoni ki he ʼu kōkelekāsio ki te fai fakamafola ʼi he ʼu telituale ʼe tahitahiga tona fai. ʼE lagi kotou toe fia fakaʼaogaʼi tokotou mālohi ki te pioniē vaeluaʼi temi peʼe ki te pioniē kātoa. Ko te ʼu lauʼi hogofulu afe kau pioniē fiafia ʼe natou ʼui atu anai, ko te selevisi kātoa ʼe ko he ʼaluʼaga ʼe lelei age moʼo manatuʼi ai tokotou Tupuʼaga ʼi tokotou temi tūpulaga. Ko te ʼu fakatuʼutuʼu ʼaia ʼe feala ke kotou fakahoko ʼi takotou kei nonofo ʼaē mo takotou ʼu mātuʼa. ʼE toe fua lelei anai ki takotou kōkelekāsio takotou fakahoko ia te ʼu fakatuʼutuʼu ʼaia.
11 Ko te tahi ʼu fakatuʼutuʼu ʼe loaloaga age te temi ʼaē moʼona fakahoko, ʼe mole fua lelei pē anai ki takotou kōkelekāsio. Ohagē lā, ʼe feala ke kotou fakatuʼutuʼu ke kotou gāue ʼi he tahi koga meʼa peʼe ko he tahi fenua ʼe ʼaoga lahi ai he kau fai fakamafola. ʼE lagi kotou fia tokoni ki te laga ʼo te ʼu Fale ʼo Te Puleʼaga peʼe ko te ʼu filiale ʼi te ʼu fenua tai. ʼE lagi feala ke kotou hū ʼo gāue ʼi te Petele peʼe kotou liliu ʼo misionea. ʼE mahino ia, ko te ʼuluaki fakatuʼutuʼu maʼuhiga ʼaē ʼe ʼaoga anai ke kotou fakahoko, ʼi muʼa ʼo te ʼu fakatuʼutuʼu fuli ʼe loaloaga age te temi ʼaē moʼona fakahoko ʼaē neʼe tou talanoa kiai ʼi henī, ʼe ko te papitema. Kapau ʼe mole heʼeki kotou papitema, kotou vakaʼi pe koteā ʼaē ʼe tonu ke kotou fai, moʼo fakahoko ia te fakatuʼutuʼu maʼuhiga ʼaia ʼi tokotou maʼuli.
Kotou Fakahoko Te Fakatuʼutuʼu ʼAē Ko Te Papitema
12. Koteā te ʼu tupuʼaga ʼaē ʼe papitema ai ʼihi, pea he koʼē ʼe mole ko he ʼu tupuʼaga lelei?
12 Koteā te fakaʼuhiga ʼo te papitema kiā koutou? ʼE lagi manatu ʼihi ko te papitema ʼe ko honatou puipui naʼa natou tō ki te agahala. Ko ʼihi ʼe natou manatu ʼe tonu ke natou papitema heʼe kua papitema tonatou ʼu kaumeʼa. Ko ʼihi tūpulaga ʼe lagi natou fia fakafiafia tanatou ʼu mātuʼa. Kae ko te papitema ʼe mole hagē ia ko he kotala ʼe ina tapuʼi atu anai he aga ʼe kotou fia fai fakafufū anai; peʼe mole tonu ke kotou papitema ʼuhi pē ko te fakaneke ʼo koutou e ʼihi. ʼE tonu ke kotou papitema mokā kua kotou mahino lelei, pe koteā ʼaē ʼe fakamaʼua ki he tahi kua liliu ko he Fakamoʼoni ʼa Sehova, pea mokā kua kotou ʼiloʼi papau kua feala ke kotou fakahoko te maʼua ʼaia pea mo kotou loto kiai.—Tnk. 5:4, 5.
13. He koʼē ʼe tonu ke kotou papitema?
13 Ko te tupuʼaga ʼaē ke kotou papitema ai he neʼe fakatotonu e Sesu ki tana ʼu tisipulo ke natou “fai ni ʼu tisipulo . . . , ʼo papitemaʼi ia nātou.” Neʼe ina toe tuku mai foki mo he faʼifaʼitaki ʼaki tona papitema. (Lau ia Mateo 28:19, 20; Maleko 1:9.) Tahi ʼaē, ko te papitema ʼe ko he faʼahi maʼuhiga maʼa nātou ʼaē ʼe loto ke haofaki nātou. ʼI tana ʼosi talanoa ki te faʼu ʼaē e Noe ʼo te ʼaleka ʼaē neʼe puipui ai ia ia pea mo tona fāmili lolotoga te Tulivio, neʼe ʼui fēnei e te ʼapositolo ko Petelo: “Ko te meʼa ʼaenī ʼe fakatātā kiai pea ʼe ina haofaki foki koutou ʼi te temi nei, ʼe ko te papitema . . . ʼaki te fakatuʼuake ʼo Sesu Kilisito.” (1 Pet. 3:20, 21) Kae ʼe mole fakaʼuhiga leva, ʼe kotou papitema ʼuhi pē ke haofaki ai koutou. ʼE kotou papitema heʼe kotou ʼoʼofa kiā Sehova pea ʼe kotou fia tauhi kiā te ia ʼaki tokotou loto kātoa, mo tokotou nefesi kātoa, mo tokotou ʼatamai kātoa pea mo tokotou mālohi kātoa.—Mko. 12:29, 30.
14. He koʼē ʼe lagi lotolotolua ʼihi ke natou papitema, kae koteā te fakapapau ʼaē ʼe kotou maʼu?
14 Ko ʼihi ʼe lagi natou lotolotolua ke natou papitema heʼe natou tuʼania naʼa feala ke fakamavae nātou ki muli age. ʼE kotou maʼu koa te tuʼania ʼaia? Kapau koia, ʼe mole kovi te taʼi tuʼania ʼaia. Heʼe fakaʼuhiga ai ʼe kotou mahino ki te toe maʼua lahi ʼaē ʼe maʼu e he tahi ʼe liliu ko he Fakamoʼoni ʼa Sehova. ʼE feala koa ke ʼi ai hona tahi age tupuʼaga? ʼE lagi mole heʼeki kotou tui papau ko te maʼuliʼi ʼo te ʼu lēkula ʼa te ʼAtua, ʼe ko te faʼahiga maʼuli ʼaia ʼe lelei age kiā koutou. Ki te faʼahi ʼaia, ko takotou fakakaukauʼi te ʼu fua ʼaē ʼe hoko kiā nātou ʼaē ʼe natou meʼa noaʼi te ʼu lēkula Fakatohi-tapu, ʼe feala ke tokoni atu ke kotou fai hakotou tonu. ʼI te tahi age faʼahi, ʼe feala ke kotou ʼofa ki te ʼu lēkula ʼa te ʼAtua kae ʼe mole kotou falala kiā koutou totonu ʼo ʼuhiga mo te lava maʼuliʼi kātoa ʼo te ʼu lēkula ʼaia. ʼI tona fakahagatonu, ʼe feala ko he fakaʼiloga ʼaia ʼo takotou agavaivai. ʼE moʼoni, heʼe ʼui ʼi te Tohi-Tapu ʼe kākā te loto ʼo te tagata agahala. (Sel. 17:9) Kae ʼe kotou lava muliʼi te ʼu lēkula ʼaia mo kapau ʼe kotou ‘nofo tokaga tuʼumaʼu ʼo mulimuli ki te folafola ʼa te ʼAtua.’ (Lau ia Pesalemo 119:9.) Kae tatau aipē pe koteā te ʼu tupuʼaga ʼaē ʼe kotou lotolotolua ai ke kotou papitema, kae ʼe tonu ke kotou fakatokatoka te ʼu faʼahi ʼaia pea mo takotou ʼu tuʼania. *
15, 16. Ko te temi fea ʼaē ʼe kotou lava ʼiloʼi ai kua kotou tokalelei ki te papitema?
15 Kae ko te temi fea ʼaē ʼe kotou lava ʼiloʼi ai kua kotou tokalelei ki te papitema? ʼE kotou lava ʼiloʼi te faʼahi ʼaia ʼaki takotou fai kiā koutou totonu pē te ʼu fehuʼi ʼaenī: ‘ ʼE feala koa ke au fakamahino ki ʼihi te ʼu akonaki Fakatohi-tapu tāfito? ʼE au kau koa ki te minisitelio māʼiapē lā mokā ʼe mole kau kiai taku ʼu mātuʼa? ʼE au faiga mālohi koa ke au kau ki te ʼu fono fuli? ʼE feala koa ke au manatuʼi te ʼu ʼaluʼaga neʼe hoko moʼoni kiā au, ʼaē neʼe au tekeʼi ai te ʼu fakaneke ʼaē mai toku ʼu kaugā ako? ʼE au haga tauhi anai koa kiā Sehova tatau aipē mo kapau ʼe mole kei tauhi taku ʼu mātuʼa mo toku ʼu kaumeʼa kiā te ia? ʼE au fakahā koa kiā Sehova ʼi taku ʼu faikole ʼaē kiā te ia, ʼe maʼuhiga ia taku ʼu felōgoi ʼaē mo ia? Pea kua au foaki moʼoni koa toku maʼuli kātoa kiā Sehova ʼi te faikole?’
16 Ko te papitema kā ina fetogi tokotou maʼuli, koia ʼaē ʼe mole tonu ai ke kotou meʼa noaʼi te tonu ʼaia. Kua kotou maʼu koa te fakapotopoto feʼauga ʼaē moʼo fakakaukauʼi te tonu maʼuhiga ʼaia? Ko he tahi ʼe fakapotopoto ʼe mole gata pē ʼi tana lava fai ʼo he ʼu akonaki lelei mai te faiakonakiʼaga peʼe ina fai he ʼu tali ke feafeaʼi lolotoga te fono. ʼE ina lava fai he ʼu tonu ʼe fakatafito ki tana mahino ʼaē ki te ʼu pelesepeto Fakatohi-tapu. (Lau ia Hepeleo 5:14.) Kapau kua feala ke kotou fai te faʼahi ʼaia ʼi tokotou maʼuli, pea ʼe tuku atu kiā koutou ia te toe pilivilēsio lahi ʼaē ke kotou tauhi kiā Sehova mo tokotou loto kātoa, pea mo kotou fakahā ʼi tokotou maʼuli kua kotou foaki moʼoni tokotou maʼuli kiā te ia.
17. Koteā ʼaē kā tokoni atu anai kiā koutou moʼo tauʼi te ʼu fihifihia ʼaē ʼe feala ke hoko ʼi takotou ʼosi papitema?
17 ʼI takotou ʼosi papitema pē, ʼe lagi kotou maʼu he toe fiafia lahi ʼi takotou tauhi ʼaē ki te ʼAtua. Kae mole tuai kiai, ʼe feala ke kotou tau mo he ʼu fihifihia ʼe natou ʼahiʼahiʼi anai takotou tui pea mo takotou faʼa kātaki. (2 Tim. 3:12) ʼAua naʼa kotou manatu ʼe tonu ke kotou tauʼi tokotahi te ʼu fihifihia ʼaia. Kotou kumi tokoni ki takotou ʼu mātuʼa. Kotou kole kiā nātou ʼaē kua fotufotuʼa ʼi te faʼahi fakalaumālie ʼi te kōkelekāsio ke natou tokoni atu. Kotou fakakaumeʼa mo nātou ʼaē ʼe lagolago atu anai kiā koutou. ʼAua naʼa galo kiā koutou ko Sehova ʼe tokaga kiā koutou, pea ʼe ina foaki atu anai te mālohi ʼaē ʼe ʼaoga ke kotou tauʼi ai te ʼu ʼaluʼaga kehekehe ʼaē ʼe feala ke hoko kiā koutou.—1 Pet. 5:6, 7.
ʼE Kotou Lava Fakahoko Feafeaʼi Takotou ʼu Fakatuʼutuʼu?
18, 19. ʼE fua lelei feafeaʼi kiā koutou takotou vakaʼi te ʼu meʼa ʼaē ʼe kotou fakamuʼamuʼa?
18 Logolā takotou ʼu faiga lelei ʼaē moʼo fakahoko takotou ʼu fakatuʼutuʼu, ʼe hagē koa kiā koutou ʼe mole maʼu he temi feʼauga moʼo fai te meʼa ʼaē ʼe kotou loto kiai pea mo ʼaoga ke kotou fai? Kapau koia, ʼe tonu ke kotou vakavakaʼi te ʼu meʼa ʼaē ʼe kotou fakamuʼamuʼa ʼi tokotou maʼuli. Tou toʼo he fakatā: Kotou toʼo he pākete pea kotou fafaʼo ki loto he ʼu maka. ʼOsi ʼaia, kotou fakafonu te pākete ʼaki te ʼone. ʼI te temi nei kua fonu te pākete ko te ʼu maka pea mo te ʼone. Kotou huaʼi fuli te pākete ʼo kotou taupau te ʼone pea mo te ʼu maka. ʼI te temi leva ʼaenī, kotou ʼuluaki fafaʼo te ʼone ki te pākete, pea kotou faigaʼi leva ke kotou fafaʼo atu te ʼu maka ki te pākete. ʼE mole hao ia. Koteʼuhi neʼe kotou ʼuluaki fafaʼo te ʼone ki te pākete.
19 ʼE toe hoko te fihifihia fēia kiā koutou ʼo ʼuhiga mo te fakaʼaogaʼi ʼo tokotou temi. Kapau ʼe kotou fakamuʼamuʼa te ʼu meʼa ohagē ko te ʼu fakafiafia, ʼe hagē anai kiā koutou ʼe mole maʼu hokotou temi feʼauga ki te ʼu meʼa ʼaē ʼe maʼuhiga age, ʼaē ko te ʼu gāue fakalaumālie. Kae kapau ʼe kotou muliʼi te tokoni Fakatohi-tapu ʼaē ke kotou “ ʼiloʼi papau te ʼu meʼa ʼaē ʼe maʼuhiga tāfito,” ʼe kotou fakatokagaʼi anai ʼe kotou maʼu te temi feʼauga ʼaē ki te ʼu gāue ʼo te Puleʼaga pea mo he temi ki te ʼu fakafiafia.—Filp. 1:10.
20. Kapau ʼe kotou hoha pea mo tuʼania ʼi takotou faiga ʼaē ke kotou fakahoko takotou ʼu fakatuʼutuʼu, koteā ʼaē ʼe tonu ke kotou fai?
20 Kā kotou faiga ke kotou fakahoko takotou ʼu fakatuʼutuʼu, ʼaē ʼe kau ai tokotou papitema, pea ʼe lagi ʼi ʼihi temi ʼe kotou hoha pea mo tuʼania. Kā ʼe kotou logoʼi he faʼahi fēia, pea kotou ‘tuku takotou kavega kiā Sehova totonu, pea ko ia totonu ʼe lagolago atu anai kiā koutou.’ (Pes. 55:22) ʼI te temi nei, kua kotou maʼu te faigamālie ʼaē ke kotou kau ki te toe gāue fakafiafia pea mo maʼuhiga ʼi te hisitolia ʼo te tagata, he toe gāue fai fakamafola pea mo faiako ʼi te mālamanei. (Gāue 1:8) ʼE feala ke kotou filifili ke kotou sisio ki te fai ʼo te gāue ʼaia peʼe ke kotou kau ki te gāue maʼuhiga ʼaia. Kotou foaki kātoa tokotou ʼu fealagia moʼo tauhi ki te ʼAtua pea mo lagolago ki te ʼu gāue ʼo tona Puleʼaga. ʼE mole kotou fakahemala anai ʼi he temi ʼi takotou tauhi ʼaē ki ‘tokotou Tupuʼaga Lahi ʼi te ʼu ʼaho ʼo tokotou temi tūpulaga.’—Tnk. 12:1.
[ʼU nota]
^ pal. 7 Vakaʼi Te Tule Leʼo (Fakafalani) ʼo te ʼaho 1 ʼo ʼAukusitō 2009, pāsina 15 ki te 18.
^ pal. 14 Moʼo tokoni atu ki te faʼahi ʼaia, vakaʼi te tohi Les jeunes sʼinterrogent — Réponses pratiques (Fakafalani), Lua Tohi, kāpite 34.
ʼE Kotou Tali Feafeaʼi Anai?
• He koʼē ʼe tonu ke kotou fai hakotou ʼu fakatuʼutuʼu?
• Koteā he ʼu fakatuʼutuʼu ʼe ʼaoga ke kotou fakahoko?
• Koteā ʼaē ʼe tonu ke kotou fai moʼo fakahoko te fakatuʼutuʼu ʼaē ko te papitema?
• ʼE lava tokoni feafeaʼi atu takotou vakaʼi te ʼu meʼa ʼaē ʼe kotou fakamuʼamuʼa, ke kotou fakahoko ai takotou ʼu fakatuʼutuʼu?
[ʼU fehuʼi ʼo te ako]
[Paki ʼo te pasina 21]
Kua kotou fakatuʼutuʼu koa ke kotou lau te Tohi-Tapu ʼi te ʼaho fuli?
[Paki ʼo te pasina 23]
Koteā kā tokoni atu ke kotou fakahoko te fakatuʼutuʼu ʼaē ke kotou papitema?
[Paki ʼo te pasina 24]
Koteā te ako ʼe kotou maʼu mai te fakatā ʼaenī?