Piin Fel’ Yangaren, Mang e Ngam Rin’ed ko Yafas Romed?

“Aram fan ni gu bod be’ ni girdien e tug nder adbey e tug rok.”—1 KOR. 9:26.

1, 2. Mang e nge yog ngom ni faanra nge fel’ rogon e par rom u nap’an ni kam ilal?

 FAANRA ga be yan ni ngam milekag u ba pa’ i kanawo’ ndawor mu un riy bayay, mab t’uf ni ngam fek e map nge compass. Fa gi map e ra ayuwegem ni ngam nang e gin ni kam taw ngay miki ayuwegem ni ngam nang e re pa’ i kanawo’ ni ngam lek. Ma fare compass e ra ayuwegem ni nge dab mu sor nga bang. Machane, faanra dam nang e gin ni ga be sor ngay, ma fa gi map nge fare compass e ra aw nib m’ay fan. Ere som’on e thingar mu nang e gin ni ngam man ngay.

² Chiney ni ga be ilal i yan e thingar kum nang e n’en ni ngam rin’. Bay e map nge compass rom. Bible e aram e map rom nrayog ni nge ayuwegem ni ngam turguy e n’en ni ngam rin’ ko yafas rom. (Prov. 3:5, 6) Ma faanra kam skulnag e nangan’ rom ma rayog ni nge ayuwegem ni nge dab mu oloboch. (Rom. 2:15) Ireram e compass rom. Machane faanra nge fel’ e par rom, ma thingar mu nang ko mang e ngam rin’. Ere ba t’uf ni ngam nameg boch ban’en.

3. Mang angin ni ngan nameg boch ban’en nrogon ni yog Paul ko 1 Korinth 9:26?

³ I yog apostal Paul angin ni ngan nameg boch ban’en min gay rogon ni ngan rin’ u nap’an ni yoloy ni gaar: “Gu be mil i yan nib k’iy kanawoeg ko gin ni nga ni mus riy; aram fan ni gu bod be’ ni girdien e tug nder adbey e tug rok.” (1 Kor. 9:26) Faanra kam nameg boch ban’en, ma aram e rayog ni ngam mil nib k’iy kanawoem. Ra boch ngaram ma thingar mu dugliy boch ban’en nib ga’ fan ni bay rogon ko pigpig ni ga be tay, nge maruwel, nge mabgol, nge tabinaw. Ra taw nga ba ngiyal’ ma ke yooran’um nda kum nang ko mang e ngam rin’. Machane faanra kam turguy u m’on riy e n’en ni ngam rin’ nrogon nib puluw ko tin riyul’ nge pi kenggin e motochiyel nu Bible, ma aram e rayog ni nge dab mman ko pa’ nib kireb e kanawo’.—2 Tim. 4:4, 5. 

4, 5. (a) Mang e rayog ni nge buch ni faanra dab mu nameg boch ban’en ni fan ngom? (b) Mang fan ni ngaum mel’eg boch ban’en nrogon nib m’agan’ Got ngay?

⁴ Faanra dab mu nameg boch ban’en ni ngam rin’, ma ra waliyem e pi taab yangar rom nge sensey rom ngam rin’ e n’en ni yad be lemnag nib fel’ ngom. Riyul’ ni ka ga ra nameg boch ban’en ni ngam rin’ maku bay boch i yad nra gay rogon ni ngam rin’ e n’en ni yad be lemnag nra yib angin ngom. Faanra aram rogon, ma ngam fithem ni nge lungum, ‘N’en ni yad be yog e ra ayuwegeg ni nggu lemnag e En Tasunmiy u nap’an ni ku gub pagel, fa ra magawonnag e pigpig ni gu be tay ngak?’—Mu beeg e Eklesiastes 12:1.

⁵ Mang fan ni ngaum mel’eg boch ban’en nrogon nib m’agan’ Got ngay? Reb i fan e bochan ni urngin e tin nib fel’ ban’en ni bay rodad e ir e ke pi’. (Jas. 1:17) Ere gad gubin nthingar da pininged e magar ngak Jehovah. (Rev. 4:11) Bin th’abi fel’ e kanawo’ ni ngam dag ni ga be pining e magar ngak Jehovah e ngaum lemnag u nap’an ni ga be nameg boch ban’en. Chiney e ngad weliyed boch ban’en nib fel’ ni ngam nameg nge rogon ni ngam rin’.

Mang Boch Ban’en Nrayog ni Ngam Nameg?

6. Mang e ba ga’ fan ni ngam nameg, ma mang fan?

⁶ Rogon ni kad weliyed ko fa binem e thin e  reb e ban’en nib ga’ fan nrayog ni ngam nameg e aram e ngam gay rogon nge mich u wan’um nriyul’ e thin nu Bible. (Rom. 12:2; 2 Kor. 13:5) Sana ke mich e machib ni evolution ara yugu boch e machib ko pi yurba’ i teliw ni googsur u wan’ e pi taab yangar rom ni bochan e aram e n’en ni ka nog ngorad ni nge mich u wan’rad. Machane gur e de t’uf ni nge mich ban’en u wan’um ni bochan e aram rogon ni ka nog. Dab mu pagtalin ni baadag Jehovah ni ngam pigpig ngak u polo’ i lanin’um. (Mu beeg e Matthew 22:36, 37.) Maku baadag ni nge mich u wan’um e pi n’en ni bay e mich riy.—Heb. 11:1.

7, 8. (a) Mang boch ban’en ni ga ra nameg ni ngam rin’ e chiney, ma ra gelnag e michan’ rom? (b) Faan ga ra rin’ e pi n’en ni ga be nameg, ma mang angin nra yib ngom?

⁷ Mang ni dab mu nameg boch ban’en ni ngam rin’ e chiney ya nge yog ni nge gel e michan’ rom? Reb e ban’en nrayog ni ngam nameg e aram e ngaum meybil ni gubin e rran. Rayog ni ngam lemnag ara mu yoloy nga but’ boch ban’en ni kam rin’ fa ke buch rom u reb e rran ni ga baadag ni ngam uneg ko meybil rom, ya nge yog ni mu weliy urngin ban’en nib t’uf ni ngam weliy ko meybil rom ndab mu sul u daken taab n’en. Dab mu pagtalin nra um weliy e magawon rom nge pi n’en ni ma felfelan’um ngay. (Fil. 4:6) Ku reb e ban’en nrayog ni ngam nameg e aram e ngaum beeg e Bible ni gubin e rran. Ga manang ni faan ga ra beeg aningeg e page ni gubin e rran, ma ra m’ay reb e duw ma kam beeg e Bible ni polo’, fa? * Be gaar e Psalm 1:1, 2: “Ba felan’ e cha’ ni ma . . . beeg e motochiyel rok Somol ma ma yib e felfelan’ riy ngak, ma ku aram rogon ni ra beeg ni rran nge nep’ ni bochan e nge nang fan.”

⁸ Bin dalip e rayog ni ngam nameg ni ngam fal’eg rogom ni nge gubin e muulung ma ga pi’ reb e fulweg. Som’on e rayog ni ngam pi’ e fulweg ni ngam beeg u babyor ara mu beeg reb  e thin nu Bible. Me munmun mag gay rogon ni ngam weliy ni thin rom. Gubin yay ni ga ra pi’ e fulweg u nap’an e muulung ma aram e ga be pining e magar ngak Jehovah. (Heb. 13:15) Nap’an ni ga ra rin’ boch e pi n’ey ni ga be nameg, ma ra gel e pagan’ nge tayfan rom ngak Jehovah, maku ra mab e kanawo’ ngom ni ngam nameg boch ban’en ni ngam rin’ boch nga m’on.

9. Faanra dawor mu mang reb e publisher, ma mang e rayog ni ngam nameg ni ngam rin’ boch nga m’on?

⁹ Mang boch ban’en nrayog ni ngam nameg ni ngam rin’ boch nga m’on? Faanra dawor mu un ko machib, ma ngam nameg ni ngam mang reb e publisher. Nap’an ni ga ra un ko machib ma ngam gay rogon ndab mu digey, mag gay rogon ngam salap riy, ma ngkum gay rogon ndabi yan reb e pul ndab mu un ko machib. Kub fel’ ni ngam fil rogon ni ngam fanay e Bible u nap’an e machib. Ya faan ga ra nang rogon ni ngam fanay e Bible u nap’an e machib, ma ga ra adag e machib. Maku reb e rayog ni ngam yoornag e tayim ni ga be un ko machib mag gay rogon ni ngam fil e Bible ngak be’. Nap’an ni ga ra mang reb e publisher ma n’en ni th’abi fel’ ni ngam nameg e aram e ngam ognag e yafas rom ngak Jehovah Got ma ga un ko taufe ngam mang reb e Mich rok.   

10, 11. Mang e rayog ni nge nameg e piin fel’ yangaren ni kar uned ko taufe ni ngar rin’ed boch nga m’on?

¹⁰ Faanra kam un ko taufe ma baaray boch ban’en nrayog ni ngam nameg ni ngam rin’ boch nga m’on. Reb e rayog ni ngam ayuweg boch e ulung ngam machibgad u boch e binaw ni gathi ri yima yan ngay ko machib. Ku rayog ni ngam fanay gelngim ni ngam un ko pioneer ni ayuw ara pioneer. Bokum biyu’ e pioneer nrayog ni nga rogned ngom ni pigpig ngak Jehovah u polo’ e tayim e aram e bin th’abi fel’ e kanawo’ ni ngam lemnag e En Tasunmiy riy u nap’an ni ka gab pagel. Ireray boch ban’en nrayog ni ngam rin’ u nap’an ni ka ga be par u tabinaw. Maku ra yib angin ko ulung rom.

¹¹ Ku boch ban’en nrayog ni ngam nameg ni ngam rin’ e, bod nrayog ni ngam un i pi’ e ayuw ko machib u reb e nam nib t’uf e ayuw riy. Ku rayog ni ngam pi’ e ayuw ko pi Kingdom Hall ni yibe toy ara ku boch e naun ni fan ko liyor ngak Jehovah u boch e nam. Maku rayog ni ngam un ko maruwel u Bethel ara mmang reb e missionary. Machane u m’on ni ngam rin’ e pi n’ey, ma thingar mu un ko taufe. Ere faanra dawor mu un ko taufe, ma ngam nameg ni ngam un ngay.

N’en ni Ga Ra Rin’ Me Yog ni Ngam Un ko Taufe

12. Mang fan ni ma un boch e fel’ yangaren ko taufe, ma mang fan nde fel’ e re n’ey?

¹² Uw rogon u wan’um fan ni yima un ko taufe? Boch e fel’ yangaren e sana yad ma lemnag ni yad ra un ko taufe ma aram e dab kur denengad. Ma boch i yad e ma lemnag ni susun e nge un ko taufe ni bochan e ke rin’ boch e taab yangar rorad. Maku boch i yad e ma rin’ ya nge felfelan’nag e gallabthir rok. Machane, taufe e gathi bangi babyor ni be talegem u boch ban’en ni ga baadag ni ngam rin’ nib mith; maku dab mu un ko taufe ni bochan e be towasariyem be’ ni ngam rin’. Thingar mu un ko taufe u nap’an ni ke tamilang u wan’um e n’en ni thingari rin’ be’ nfaanra ke mang reb e Mich Rok Jehovah, ma ke bung rogom nrayog ni ngam rin’ e pi n’em.—Ekl. 5:4, 5. 

13. Mang fan ni ngam un ko taufe?

¹³ Reb i fan ni ngam un ko taufe e bochan ni tay Jesus chilen ngak pi gachalpen ni ‘ngar pingeged [e girdi’] ngar manged pi gachalpen, mi yad taufenagrad.’ Miki dag rogon ni ngan rin’ ni aram e, ke un ko taufe. (Mu beeg e Matthew 28:19, 20; Mark 1:9.) Maku reb e piin ni yad baadag ni nge yog e yafas ngorad e ku thingar ra uned ko taufe. Tomuren ni weliy apostal Peter murung’agen Noah ni faani toy fare arke ni ir e ayuwegrad e tabinaw rok u nap’an fare Ran ni Tharey e fayleng, me yog ni  gaar: “Re ran nem e be yip’ fan e taufe, ma taufe e be yip’ fan ni kam thapgad ngak Got e chiney, . . . u daken e fos ko yam’ ni tay Jesus Kristus.” (1 Pet. 3:20, 21) Re n’ey e gathi be yip’ fan ni ngam un ko taufe ni bochan e nge dabi buch ban’en rom. Ya ngam un ko taufe ni bochan e ba t’uf Jehovah rom ma ga baadag ni ngam pigpig ngak u polo’ i gum’irchaem, ngu polo’ i lanin’um, ngu polo’ i gelngim.—Mark 12:29, 30.

14. (a) Mang fan ni dabun boch e fel’ yangaren ni ngar uned ko taufe? (b) Mang e rayog ni nge pagan’um ngay?

¹⁴ Boch e fel’ yangaren e dubrad ni ngar uned ko taufe ni bochan e dubrad ni ngan tharbograd. Ireray e n’en ni ga be rusnag? Faanra ireray, ma gathi be yip’ fan nib kireb. Ya rayog ni ga be rus ni bochan e ga manang ni nap’an ni ga ra mang reb e Mich Rok Jehovah, ma bay ban’en ni ke milfan ngom. Ma ka bay reb i fan nga bayang, fa? Sana dawori mich u wan’um ni faan yira fol ko pi motochiyel rok Got ma aram e bin th’abi fel’ kanawoen e yafas. Faanra aram rogon ma ga ra lemnag e n’en nra buch ko piin ndab ra folgad ko motochiyel nu Bible, ma ra ayuwegem ni ngam dugliy lanin’um. Maku reb e sana ba t’uf e pi motochiyel rok Got rom, machane der pagan’um ngom nrayog ni ngam fol riy. Ba fel’ e re n’em u reb e kanawo’ ni bochan e be dag ni gab sobut’an’. Ma bin riyul’ riy e be yog e Bible nib sasalap gum’irchaen e girdi’. (Jer. 17:9) Machane rayog ni ngam gel ko re n’ey ni faanra um ‘fol ko tin ke yog Got ni ngan rin’.’ (Mu beeg e Psalm 119:9.) Demtrug ko mang fan ni dabum ni ngam un ko taufe, machane ba t’uf ni ngam dugliy lanin’um.

15, 16. Uw rogon ma ga nang ni ke bung rogom nrayog ni ngam un ko taufe?

¹⁵ Ere uw rogon ma ga nang ni ke bung rogom nrayog ni ngam un ko taufe? Reb e kanawo’ e ngam fithem ni nge lungum: ‘Rayog ni nggu weliy kenggin e machib nu Bible ngak e girdi’, fa? Gu ma un ko machib ni mus nfaanra dabi un e gallabthir rog, fa? Gu ma athamgil ni nggu un ko muulung ni gubin ngiyal’, fa? Keb ngan’ug yu ngiyal’ ni ke yog ni nggu siyeg e towasar ko pi taab yangar rog, fa? Faanra tal e gallabthir rog nge pi fager rog ko pigpig ngak Jehovah ma kug ra ulul, fa? Kug yibilay ngak Got murung’agen e tha’ u thilmow, fa? Ma kug ognag e yafas rog ngak Jehovah u daken e meybil, fa?’

¹⁶ Taufe e ban’en nra thilyeg e yafas rom, ere thingar mu fal’eg i lemnag nib fel’ rogon. Kam ilal ko tirok Got ban’en nrayog ni ngam lemnag e re n’ey nib fel’ rogon, fa? Faanra ga ma pi’ e welthin nge fulweg nib fel’ u nap’an e muulung ma gathi be yip’ fan ni kam ilal ko tirok Got ban’en. Ya faanra kam ilal ko tirok Got ban’en ma aram e rayog ni ngam dugliy boch ban’en nrogon nib puluw ko pi kenggin e motochiyel  nu Bible. (Mu beeg e Hebrews 5:14.) Faanra rayog ni ngam rin’ e re n’em, ma n’en ni ka bay ni ngam rin’ e aram e ngam pigpig ngak Jehovah u polo’ i gum’irchaem ma ga ngongol u rogon nra m’ug riy ni kam ognagem ngak.

17. Mang e ra ayuwegem ni ngam gel ko pi skeng nra yib ngom u tomuren ni kam un ko taufe?

¹⁷ Tomuren ni kam un ko taufe ma sana gab pasig ko pigpig ngak Got. Machane ra munmun ma ga ra mada’nag boch ban’en nra skengnag e yul’yul’ rom. (2 Tim. 3:12) Dab mu lemnag ni thingar mman u fithik’ e pi skeng nem ni goo gur. Mu ning e ayuw ko gallabthir rom nge pi walag u lan e ulung ni kar ilalgad ko tirok Got ban’en. Mm’ag fager ngak e piin ni yad ra ayuwegem. Dab mu pagtalin ni ma lemnagem Jehovah ma ra pi’ gelngim ni ngam gel ko pi skeng ni ma yib ngom.—1 Pet. 5:6, 7. 

Uw Rogon ni Ngam Rin’ e N’en ni Ga Be Nameg?

18, 19. Mang angin nra yib ngom ni faan ga ra nang ko mang e ngam mon’eg?

¹⁸ Ga be guy ndariy e tayim ni ngam rin’ e n’en ni ga baadag mab t’uf ni ngam rin’, fa? Faanra arrogon, ma ngam fal’eg i lemnag ko mang e ga be mon’eg. Baaray rogon ni yira fanathinnag: Mu fek reb e pakit nib plastic ngam af in e malang nib ga’ ngay, ngemu’ ma ga suguy ko yan’. Ngemu’ ma ga puog nga but’ mag gay rogon ni ngam fulweg nga langgin ni kam mon’eg e yan’ nga t’ay fare pakit. Mang e ke buch, gathi dab ki taw? Arrogon, dab ki taw ni bochan e kam mon’eg e yan’.

¹⁹ Ireray e n’en nra buch ni faanra dab mu maruwel ko tayim rom nib fel’ rogon. Faan ga ra mon’eg e fafel, ma ga ra guy ndakuriy e tayim rom ni fan ko tirok Got ban’en. Machane faan ga ra fol ko fonow nu Bible, ngam mon’eg e tin nib ga’ fan, ma ra yoor e tayim rom ni fan ko pigpig ngak Got ma ka ga ra guy ni ku bay e tayim rom ni fan nga boch ban’en ni ga baadag ni ngam rin’.—Fil. 1:10.

20. Faanra be magafan’um ma be maruwaran’um u nap’an ni ga be athamgil ni ngam rin’ e n’en ni ga be nameg, ma mang e susun ni ngam rin’?

²⁰ Nap’an ni ga be athamgil ni ngam rin’ e pi n’en ni kam mon’eg nib muun ngay e taufe, ma bay yu ngiyal’ nra magafan’um me maruwaran’um. Aram e ngiyal’ ni ngam “pi’ e gilab rom ngak [Jehovah],” ya ra ayuwegem. (Ps. 55:22, BT) Chiney e rayog ni ngam un ko fare maruwel nrib ga’ fan ni yibe rin’ ni aram e machib. (Acts 1:8) Rayog ni ngam dugliy ndab mu un ko re maruwel ney. Maku rayog ni ngam dugliy ni ngam un ngay. Dab mu pag e salap rom ndab mu maruwel ngay ni fan ko re maruwel ney. Ga ra pigpig ngak e “En ni Sunumiyem ko ngiyal’ ni ka gab pagel” ma dariy ba ngiyal’ ni ga ra kalngan’um riy.—Ekl. 12:1.

[Footnote]

Uw Rogon ni Ga Ra Fulweg?

• Mang fan ni susun e ngam nameg boch ban’en?

• Mang boch ban’en nib fel’ ni ngam nameg ni ngam rin’?

• Mang e thingar mu rin’ me yog nim un ko taufe?

• Faan ga ra fal’eg i lemnag e pi n’en ni ga be mon’eg, ma uw rogon nra ayuwegem ni ngam rin’ e n’en ni ga be nameg?

[Study Questions]

[Picture on page 20]

Kam nameg ni ngaum beeg e Bible ni gubin e rran, fa?

[Picture on page 22]

Mang e ra ayuwegem nge yog ni ngam un ko taufe?

[Picture on page 23]

Mang e kam fil ko re fanathin ney?