Jehová Diosaw taqi kunxar munañanixa

‘Taqi kunxar munañani Jehová Diosaw arxatirijaxa.’ (SAL. 73:28, NM.)

1. Apóstol Pablox 1 Corintios 7:31 qillqatanxa, ¿kuna tuqitsa parlaskpachäna?

 “AKAPACHAX mayjtʼaskiwa” sänwa apóstol Pabloxa (1 Cor. 7:31, NM). Uka arunakampixa, inas kunanakatï akapachan pasaski ukanak uñachtʼayañ munchïna. Mä dramäkaspas ukhamaw akapachan sarnaqapxi, uka dramanxa, suma jaqinakampi jan wali jaqinakampiw utji. Ukat qalltat tukuykamax kunanakas pasi ukwa mayat mayat uñachtʼayapxi.

2, 3. 1) ¿Supayax Diosan Apnaqäwiparuw qallasiwayi, kunas uk amuytʼañatakix yanaptʼistu? 2) ¿Kuna jisktʼanakatsa yatxataskañäni?

² Jichhürunakanxa, mä dramansa jikxatasksna ukhamawa, taqi jaqinakaw ukankaraktanxa, uka dramanxa taqi kunxar munañani Jehová Diosaruw qallasipxi. Kunjamtï mä markan pä grupo jaqinakax wal chʼaxwapkixa, niya ukhamarakiwa. Mayax gobiernowa, taqi kunas sumakïñap muni, mayasti jan wali jaqinakawa, kunayman jan walinak lurapxi, jaqinak jiwayapxi kunawa. Autoridadanakarus jan walin uñjasiyapxi, ukat markachirinakas yantʼatäpxiwa, kunattix gobiernoruti atinisipxani janicha ukwa uñachtʼayapxañapa.

³ ¿Kunatsa sistanxa Uraqpachansa mä draman jikxatasksna ukhamawa sasaxa? Kunattix maynikiw ‘taqi kunxar munañanixa’, ukasti Jehová Diosawa (Sal. 71:5, NM). Ukatxa, Supayaw jan wali tamapampix jaqinakar axsarayi (1 Juan 5:19). Ukat jupanakaw Jehová Diosan Apnaqäwipar qallasipxi, ukat jaqinakax Diosarut Apnaqiriparjam atinisipxani janicha ukwa uñachtʼayapxañaparaki. ¿Kunjamatsa uka jan waltʼäwix utjawayi? ¿Kunatsa Jehová Diosax mäki jan askichkpacha? ¿Kunjamsa jiwasax ukan yanaptʼaraksna?

Kunanakas draman uñachtʼayasi

4. ¿Kuna tuqinakatsa draman parli?

⁴ Uka dramanxa, kunjamsa Jehová Diosan Apnaqäwipar qallasipxi ukat jaqinakax taqi chuymati uka Apnaqäwi tuqit saytʼasipxani janicha uka tuqinakatwa parli. Qullan Qillqatanxa, walj kutiw Diosarux ‘taqi kunxar munañani’ sasixa. Sañäni, Salmonak qillqirix taqi chuymaw akham säna: ‘Taqi kunxar munañani Jehová Diosaw arxatirijäxa’ sasa (Sal. 73:28, NM). Ukhamasti, Diosar ‘taqi kunxar munañani’ sañatxa janiw kunat pächasiñax utjkiti (Dan. 7:22).

5. ¿Kunatsa Jehová Diosarux jachʼa reyisarjam uñjañasa?

⁵ Jehová Diosaw taki kuns luri, ukhamasti  jupakiw alaxpachansa aka Uraqinsa, taqi kunxar munañanixa (Apocalipsis 4:11 liytʼasiñapawa). Ukatxa, jupakirakiw Chiqapar Uñjirisaxa (Juez), jachʼa Reyisaxa ukat Leyinak churirisaxa (Isa. 33:22, 23). Niyakixay Diosax jakäwsa churchistuxa, taqi chuymaw Jachʼa Reyisarjam uñjañasa, ukat jan axsarasaw Jupa tuqit saytʼasiñasa. ¿Kunas ukatak yanaptʼistaspa? Aka arunak amtañasawa: “Tatitux alaxpachan reyi qunuñap uttʼayasi, chʼaman kankañapax alaxpach akapach apnaqi” (Sal. 103:19; Hech. 4:24).

6. ¿Taqi chuyma sasax kamsañsa muni?

⁶ Jehová Diosan Apnaqäwip tuqit saytʼasiñ munstanxa, taqi chuymaw yupaychañasa. ¿Taqi chuyma sasinxa kamsañsa muni? Kunjamtï Job chachax sarnaqäwipan uñachtʼaykänxa, “taqi chuyma” sasax Diosatakjam qʼuma sarnaqaña, jan jithiqtas yupaychaña ukat chiqap sarnaqaña sañ muni (Job 1:1).

Draman qalltäwipa

7, 8. ¿Supayax kunjamsa Diosan Apnaqäwipar qallasiwayi?

⁷ Niya suxta waranq maranak nayraxa, mä ajayuw Jehová Dios contrax saytʼäna. Kʼari arunakampi ukat jan walinak lurasaxa, Diosax janis taqi kunxar munañani Apnaqirïkaspa ukham amuyayañ munäna. Kunattix jupaw yupaychayasiñ munäna. Ukatwa Adán, Eva nayra awk taykasarux Dios contra saytʼayänxa. Diosar kʼarintasaw Jehová sutip qʼañuchañ munarakïna (Génesis 3:1-5 liytʼasiñapawa). Ukhamatwa uka ajayux Diosan enemigop tukuwayi. Tiempompix Supaya, Diablo, dragona ukat jachʼa katari satäxarakïnwa. Uka sutinakaw Diosar kutkatasirïtapa, kʼarintirïtapa, ukat Diosan yupaychirinakaparus engañirïtapa, manqʼantañsa munkaspa ukham arknaqirïtapa uñachtʼayi (Apo. 12:9).

⁸ Supayax Diosan Apnaqäwip contraw mä apnaqirjam saytʼawayi. ¿Kunsa Diosax luraspäna? ¿Supayarux mäkiti Adanampir Evampir chikax tukjasapäna? Chiqas ukham lurañatakix chʼamanïnwa. Tukjasapänxa, wali chʼamanïtap uñachtʼayasapäna. Ukatxa, Adanampir Evampirux jan istʼapkätaxa jiwapxätaw siskäna ukas chiqäskapunitapwa uñachtʼayarakisapäna. Ukhamasti, ¿kunatsa kimspachanir jan tukjkpachäna?

9. ¿Kuna tuqinakatsa Supayax kʼarinak parläna?

⁹ Supayax kʼarinak parlasaw Adanarus Evarus Diosat jithiqtayäna. Ukat jaqinakax janis Diosarux istʼapxañapäkaspa ukhamwa amuyayäna. Ukat nayrïr awk taykasar Dios contra saytʼayasaxa, amuytʼasir wawanakapatxa janis maynis Diosarux taqi chuyma yupaychkaspa ukham säna. Job chachan urunakapanxa khitirus Diosat jithiqtayakiristwa sasaw Supayax säna, ukampis Job chachax taqi chuymaw Diosan Apnaqäwip tuqit saytʼasïna (Job 2:1-5).

10. ¿Diosax taqi kunxaru munañani Apnaqirïtapxa kunatsa mä pit jan uñachtʼaykänxa?

¹⁰ ¿Kunatsa Supayarux jan tukjkäna, ukat janiraki taqi kunxar munañani Apnaqirïtap uñachtʼaykäna? Supayan kʼari arunakapax chiqati janicha uk uñachtʼayañapatakiw tiempo churäna. Ukatxa jaqinakax Diosat jan jithiqtas sarnaqapxatap uñachtʼayapxañapatakiw tiempo churarakïna. ¿Walja maranak qhipatxa kunanakas uñjasiwayi? Supayax jan walinakampiw akapachar phuqantawayi, ukampis Diosax niyaw Supayarus arkirinakaparus tukjani, ukhamatwa Jupa sapaki taqi kunxar munañani Apnaqirïtap uñachtʼayani. Chiqas Adanampi Evampi Dios contra saytʼasipkäna ukjpachaw Diosax kunjamsa tukjani ukanak sum qhanañchawayxäna (Gén. 3:15).

11. ¿Kunjamsa waljanix Diosan Apnaqäwip tuqit saytʼasiwayapxi?

¹¹ Diosan Apnaqäwip tuqit saytʼasisa ukat Jehová sutip qʼumachasiñapatak yanaptʼasawa, walja jaqinakax iyawsäwipsa ukat Diosar taqi chuyma luqtañ munapxatapsa uñachtʼayapxi. Yaqhipanakax akanakawa: Abel, Enoc, Noé, Abrahán, Sara, Moisés, Rut, David, Jesús, nayrïr cristianonaka, ukat jichhürunakan Diosar taqi chuyma yupaychir jilat kullakanaka. Supayax khitirus Dios contra saytʼayakiristwa sasaw Diosan sutipsa qʼañuchawayi,  ukampis uka jilat kullakanakaw taqi chuyma yupaychasax Diosan Jehová sutip qʼumachapxi (Pro. 27:11, NM).

Niyaw atipjani

12. ¿Kunatsa Diosax niyaw jan walinak tukjani sistanxa?

¹² Akat mä jukʼa tiempotxa, taqi kunxar munañani Apnaqirïtapwa Diosax uñachtʼayani. ¿Kunatsa ukham sistanxa? Janiw wiñayatakix ukhamaki jan walinakxa uñchʼukkaniti. Qhip qhipa urunakäxatapas wali qhanäxarakiwa. Nayra tiemponakanxa, ñanqha luririnakarux tukjänwa. Sañäni, Uma Juicio apanïna, Sodoma ukat Gomorra markanakaru ukat Faraonan ejercitoparu qʼal tukjäna. Ukhamarakiw Sisaran ejercitopasa, ukat Asiria marka apnaqiris Diosan tʼunjatax uñjasipxäna (Gén. 7:1, 23; 19:24, 25; Éxo. 14:30, 31; Jue. 4:15, 16; 2 Rey. 19:35, 36). Ukhamasti Jehová Diosax janipuniw sutip jiskʼachirinakarusa, ni Qhanañchirinakapar qallasirinakarus ukhamaki uñchʼukkaniti. Niyaw amtapax phuqasini, kunattix Cristox Apnaqäwipankxasin jiwasampïxatapax qhanaw amuyasxi, ukat akapachan tukusiskatapas qhanarakiwa (Mat. 24:3).

13. ¿Diosan uñisirinakapamp chika jan tukjatäñatakix kun lurañasasa?

¹³ Jehová Diosan uñisirinakapamp chika jan tukjatäñatakixa, taqi kunxar munañani Apnaqir Diosatxa janipuniw jithiqtañasäkiti. ¿Kunas ukatakix yanaptʼistani? Supayan yanapirinakaparux janipuniw mä jukʼsa jakʼachasiñasäkiti, janirakiw arkirinakaparus axsarañasäkiti (Isa. 52:11; Juan 17:16; Hech. 5:29). Ukhamatakwa Jehová Diosan Apnaqäwip tuqit saytʼasitas uñachtʼayañäni. Ukat Diosax taqi kunxar munañanïtap uñachtʼaykani ukat sutipsa qʼumachkani ukhax janiw tukjatäkañäniti.

14. ¿Biblian qillqatäki ukanakax kuna tuqinakatsa qhanañchistu?

¹⁴ Biblianxa, jaqinakan sarnaqäwipatsa ukat Diosax taqi kunxar munañani Apnaqirïtapsa wali sum qhanañchasi. Nayrïr kimsa jaljanakapanxa, kunjamsa Diosax taqi kuns luräna ukat kunjamsa juchax uñstawayi ukanak qhanañchi, ukat qhip qhipa kimsa jaljanakapanxa, kunjamsa jaqinakax wasitamp sum jakasxapxani ukwa qhanañcharaki. Ukat maynïr libronakasti, kunanaksa Diosax amtanakap phuqañatakix lurawayi ukanakwa qhanañcharaki, mä arunxa, kunsa jaqinakatakisa, Uraqitakisa ukat alaxpachatakisa amti ukanakatwa parli. Génesis libro qalltanxa, kunanaksa Supayax lurawayi ukat kunjamsa juchax aka uraqir mantaniwayi ukanakwa qhanañchi, Apocalipsis librosti, kunjamsa Diosax Supayarusa ukat taqi jan walinaksa tukjani, ukat kunjamsa munañapax aka Uraqin alaxpachanjam phuqasini ukanakwa qhanañchistu. Chiqas Qullan Qillqatanxa, kunatsa jiwañasa, juchasa utji, ukat Diosar taqi chuyma yupaychirinakan wali kusisit aka Uraqin wiñayatak jakasipxañapatakixa, kunjamsa jan  walinakax jan mayampitaki chhaqtayatäni ukanakwa qhanañcharaki.

15. ¿Drama tukuyatar bendicionanak katuqañatakix kun lurañasasa?

¹⁵ Akapachax niyaw qʼal mayjtʼani. Taqi kunxar munañani Apnaqirit parlki uka dramax tukuyxaniwa, chiqas walja maranakaw uka dramax apasiwayi. Supayax dramat jaqsutäniwa, ukat tiempompix jan mayampitaki tukjatäniwa. ¡Ukhaw Diosan munañapax phuqasini! Jiwasatï atipjir Diosamp chika kusisiñ munstan ukat Biblian qillqatäki uka bendicionanak katuqañ munstanxa, jichhaw Diosan Apnawäwip tuqit saytʼasiñasa. Janiw pä chuyma sarnaqañasäkiti, taqi chuyma saytʼasiñäni, ukhakiw “Tatitux nayampïskiwa” sisna (Sal. 118:6, 7).

¡Diosarux taqi chuymaw yupaychsna!

16. ¿Kunatsa Diosarux taqi chuymax yupaychsnawa sistanxa?

¹⁶ Ukhamasti, Diosan Apnaqäwip tuqit saytʼasnawa, taqi chuymas yupaycharaksnawa, kunattix apóstol Pablox sänwa: “Janiw jaqinakan uñtʼata yantʼäwitsipana yaqhati jumanakarux puripktam; ukampisa Diosax chiqapawa, janiw jupax chʼamanakamat jukʼampi yantʼäwiru antutapkätamti; ukatsipana yantʼäwimp chikaxa. Mistuñxa churarakiniwa, qʼiwtasipxañamataki” sasa (1 Cor. 10:13, MT). Uka arunakarjamaxa, ¿kawkitsa yantʼanakax juti, ukat kunjamsa Diosax ukanakar saykatañ yanaptʼistu?

17-19. 1) ¿Israelitanakax wasar pampanakan kuna yantʼanakansa uñjasipxäna? 2) ¿Kunatsa Diosarux taqi chuyma yupaychsnaw sistanxa?

¹⁷ Pablon arunakaparjamaxa, jan walinakan uñjasktan ukhaw Diosan kamachinakap pʼakintañataki “yantʼatax” uñjassna, ukwa Israelitanakan wasar pampan sarnaqäwipax uñachtʼayistu (1 Corintios 10:6-10 liytʼasiñapawa). Chiqas jupanakax uka yantʼanakarux atipapxaspänwa, ukampis “jan walinak” munapayasaw jan walir purtʼasipxäna. Kunapachatï Diosax mä phaxsitakjam codornis sat jamachʼinak mä milagron apayankäna, ukhaw yantʼatax uñjasipxäna. Walja tiempos jan aycha manqʼapkchïnxa, suma alimentatäsipkänwa, kunattix maná manqʼax waljaw utjäna. Ukampis manqʼat jiwatjamaw jan wali chuymampi walja apthapipxäna (Núm. 11:19, 20, 31-35).

¹⁸ Ukat nayra maranakaxa, Moisesax Sinaí qullun Diosan Leyinakap katuqaskäna ukhaw qurit lurat mä waca qallur diosat uttʼayasisin yupaychapxäna, ukat qʼañu luräwinaksa lurapxäna. ¿Kunatsa jupanakatakix uka yantʼar atipañax chʼamakïpachäna? Irpiripaw jan jupanakampïkänti (Éxo. 32:1, 6). Qhipatxa, Suma Uraqir niya mantañampïkasaxa, walja chachanakaw moabita warminakamp wachuq juchanak lurapxäna, ukatwa jiwarapxäna (Núm. 25:1, 9). Israelitanakax kutkatasisaw awisax wal quejasipxäna. Mä kutixa, janiw Moisés contrakix jan wal parlapkänti, Jehová Dios contraw parlapxäna (Núm. 21:5). Diosar kutkatasir Coré, Datán ukat Abiram chachanakax arkirinakapamp chika jiwayatäpkäna ukhaxa, ina chʼusatsa jiwapkaspa ukham amuyasaw wal colerapxäna. Ukatwa 14.700 jaqinakar Diosax jiwarayäna (Núm. 16:41, 49).

¹⁹ Uka yantʼanakar saykatañax janiw sinti chʼamäkänti. ¿Kunatsa jan walinak lurapxäna? Diosarux janiw atinisxapxänti, jupanakar sum uñjatapsa, irpnaqatapsa armasxapxänwa. Ukatpï jiwasax yantʼanakar atipañatakix Jehová Diosarupuni yanaptʼa mayiñasaxa, ukhamatwa taqi chuymax yupaychaskakiñäni. “Diosax chiqapawa”, ukat janiw  “chʼamanaka[sat] jukʼampi yantʼäwiru antut[kistaniti]”. Janipuniw sapaki jaytanukkistaniti, mä arunxa, munañap phuqañ layku jan walinakan yantʼat uñjasiñäni ukhaxa, qhawqhay chʼamasax utjchi ukarjamaw yanaptʼistani (Sal. 94:14).

20, 21. ¿Kunjamatsa Diosax yantʼanakar atipañasatakix yanaptʼistu?

²⁰ ¿Kunjamatsa Diosax yanaptʼistani? Yantʼanakan aguantañatakiw chʼam churistani. Amuytʼañäni, ¿arknaqatax kuna jan walinakansa uñjassna? Uñisirinakasax inas Diosat jithiqtayañ laykux jan walinak lurapxchistani. Ukat jan nuwayasiñatakisa, jan tʼaqhisiñatakisa, jan jiwañ laykusa inas iyaw sisxaksna. Ukampis kunjamtï Pablox 1 Corintios 10:13 qillqatan siskänxa, janiw wiñay ukham tʼaqhiskañäniti. Jehová Diosax janiw kamachinakap pʼakintañaskam yantʼata uñjasiykistaniti. Chiqas yupaychaskakiñasatakix Jupaw chʼam churistani ukat iyawsäwisansa chʼamañchtʼarakistani.

²¹ Diosax qullan ajayupampiw wayxäsistu. Ukat yantʼanakar saykatañasatakis qullan ajayup tuqiw Biblian yatichäwinakap amtayistu (Juan 14:26). Ukhamatwa thakipat jan saranukkañäniti. Amtañäni, Supayax taqi kunxar munañani Apnaqir Jehová Diosaruw qallasiwayi, ukatxa janiw khitis diosarux taqi chuyma yupaychapkaspati sarakïnwa. Uk yatisaw waljanix Diosar taqi chuyma jiwañkam yupaychapxi. Ukampis ¿jiwxasakit uka jan waltʼäwit qhispxäna? Janiwa, Jehová Diosaw yanaptʼawayi. Ukat Jupaw taqinirus ukham yanaptʼarakistani. Jïsa, angelanakap tuqiw yanaptʼistu, “ukanakasti khitinakatix qhispiyasiñ katuqapkani ukanakar yanaptʼañatak khitanitäpxiwa” (Heb. 1:14). Kunjamtï jutïr yatichäwin uñjkañänixa, jiwasax wiñayaw taqi kunxar munañani Jehová Dios tuqit saytʼassna. Ukampis jiwasatï taqi chuyma jan jithiqtas yupaychañäni, ukat taqi kunxar munañani Apnaqirirjam Diosar istʼapuniñäni ukhakiw wiñayatak yupaychsna.

¿Kamsasmasa?

• ¿Kunatsa taqi kunxar munañani Apnaqirirjam Jehová Diosar uñjañasa?

• ¿Taqi chuyma sasax kamsañsa muni?

• ¿Kunatsa Diosax taqi kunxaru munañanïtapxa niyaw uñachtʼayani sistanxa?

• 1 Corintios 10:13 qillqatarjamaxa, ¿Diosarux taqi chuyma yupaychsnati?

[Jisktʼanaka]

[24 janan fotopa]

Supayaw Adanampi Evampirux Dios contra saytʼayäna

[26 janan fotopa]

Taqi kunxar munañan Jehová Dios tuqit taqi chuyma saytʼasiñasawa