Si Jehova an Soberanong Kagurangnan Niato!
Si Jehova an Soberanong Kagurangnan Niato!
“An Soberanong Kagurangnan na Jehova an ginibo kong pailihan ko.”—SAL. 73:28.
1. Ano an minalataw na pinanonongdan ni Pablo sa sinabi nia sa 1 Corinto 7:31?
“AN KAMUGTAKAN kan kinaban na ini nagbabago.” Sinabi iyan ni apostol Pablo. (1 Cor. 7:31) Minalataw na sa orihinal na lenguaheng ginamit nia, iinagid nia an kinaban sa sarong entablado na igwa nin mga aktor sa sarong drama na may kanya-kanyang papel, bilang bida o kontrabida, sagkod na magbago an eksena.
2, 3. (a) Sa ano ikakakomparar an angat sa soberaniya ni Jehova? (b) Anong mga hapot an pag-oolayan niato?
2 Ngonyan, may nangyayari na siring sa mahalagang marhay na drama—asin kamo kabale dian! Iyan nangorognang may koneksion sa pagbindikar kan soberaniya ni Jehova Dios. An dramang ini ikakailustrar paagi sa sarong kamugtakan na tibaad mangyari sa sarong nasyon. Sa sarong lado, igwa dian nin lehitimong gobyerno na nagpapadanay nin katoninongan. Sa ibong na lado, igwa man nin sarong organisasyon nin mga kriminal na namamahala paagi sa pandadaya, kadahasan, asin paggadan. An ilegal na organisasyon sarong angat sa soberanong pamamahala asin binabalo kaiyan an kaimbodan kan gabos na siudadano sa saindang gobyerno.
3 Arog man kaiyan an kamugtakan sa bilog na uniberso. Igwa dian nin lehitimong gobyerno kan “Soberanong Kagurangnan na Jehova.” (Sal. 71:5) Alagad an katawohan namemeligro ngonyan huli sa sarong organisasyon nin mga kriminal na pinapangenotan kan “saro na maraot.” (1 Juan 5:19) Iyan sarong angat sa lehitimong gobyerno nin Dios asin binabalo kaiyan an kaimbodan kan gabos na tawo sa saiyang soberanong pamamahala. Taano ta nagin arog kaini an kamugtakan? Taano ta tinotogotan ini nin Dios? Bilang indibiduwal, ano an magigibo niato manongod digdi?
Mga Isyung Kalabot sa Drama
4. Anong duwang magkakonektar na isyu an kalabot sa nangyayaring unibersal na drama?
4 Kalabot sa nangyayaring unibersal na dramang ini an duwang magkakonektar na isyu: an soberaniya ni Jehova asin an integridad nin tawo. Sa Kasuratan, si Jehova parateng inaapod na “Soberanong Kagurangnan.” Halimbawa, an salmista na may lubos na pagtitiwala sa saiya nag-awit: “An Soberanong Kagurangnan na Jehova an ginibo kong pailihan ko.” (Sal. 73:28) An “soberaniya” nangangahulogan nin pagigin supremo sa kapangyarihan o pamamahala. An sarong soberano igwa nin supremong autoridad. Dakolon an dahelan niato na mansayon si Jehova Dios bilang an Supremo.—Dan. 7:22.
5. Taano ta maninigo kitang mamotibar na suportaran an soberaniya ni Jehova?
5 Bilang Kaglalang, si Jehova Dios an Soberano kan daga asin kan bilog na uniberso. (Basahon an Kapahayagan 4:11.) Si Jehova man an satong Hokom, Paraboot, asin Hade, huling kapot nia mismo an tolong sanga kan unibersal na gobyerno—hudisyal, lehislatibo, asin ehekutibo. (Isa. 33:22) Huling utang niato sa Dios an sato mismong buhay asin kita nakadepende sa saiya, sia dapat tang mansayon bilang Soberanong Kagurangnan niato. Kita mamomotibar na suportaran an saiyang halangkawon na posisyon kun pirme niatong tatandaan na “si Jehova mismo nagparigon kan saiyang trono sa mismong kalangitan; asin an saiyang sadiring pagkahade nagsakop sa gabos na bagay.”—Sal. 103:19; Gibo 4:24.
6. Ano an integridad?
6 Tanganing suportaran an soberaniya ni Jehova, dapat niatong papagdanayon an satong integridad sa saiya. An “integridad” nangangahulogan nin karahayan sa moral o pagigin bilog kan debosyon. An saro na nagdadanay na may integridad daing katuyawan asin tanos. Siring kaiyan an patriarkang si Job.—Job 1:1.
Kun Paano Nagpoon an Drama
7, 8. Paano kinuestion ni Satanas an pagigin may deretso kan soberaniya ni Jehova?
7 Mga 6,000 na taon na an nakaagi, kinuestion nin sarong espiritung linalang an pagigin may deretso kan soberaniya ni Jehova. An makasadiring pagmawot na sambahon an nagin dahelan kan mga sinabi asin ginibo kan rebeldeng iyan. Sinutsutan nia an enot na mag-agom, si Adan asin Eva, na magin bakong maimbod sa soberaniya nin Dios asin prinobaran niang pakaraoton an ngaran ni Jehova paagi sa pagpalataw na Sia nagputik. (Basahon an Genesis 3:1-5.) An rebelde nagin an dakulang Kaiwal, Satanas (Paratumang), Diablo (Parapakaraot), halas (paradaya), asin dragon (parasiba).—Kap. 12:9.
8 Ginibo ni Satanas an saiyang sadiri na magin karibal na namamahala. Ano an gigibohon kan Soberanong Kagurangnan na Jehova sa angat na ini? Lalaglagon daw nia tolos an tolong rebelde—si Satanas, Adan, asin Eva? Siertong may kapangyarihan siang gibohon iyan, asin masisimbag kutana kaiyan an kuestion kun siisay an may supremong kapangyarihan. Mapapatunayan man kutana kaiyan na totoo an sinabi ni Jehova manongod sa penalidad kan pagbalga sa ley nia. Taano ta dai iyan ginibo nin Dios?
9. Ano an kinuestion ni Satanas?
9 Paagi sa pagputik asin pagpatalikod ki Adan asin Eva tumang sa Dios, kinuestion ni Satanas an deretso ni Jehova na hagadon an pagkuyog nin katawohan. Dugang pa, paagi sa pagsutsut ni Satanas sa enot na mag-agom na suwayon an Dios, kinuestion nia man an kaimbodan kan gabos na linalang na may intelihensia. Arog kan ihinayag kan nangyari ki Job, na maimbod sa soberaniya ni Jehova, hiningako ni Satanas na an gabos na tawo kaya niang patalikodon sa Dios.—Job 2:1-5.
10. Paagi sa dai nguna pagpatunay sa saiyang soberaniya, ano an itinogot nin Dios?
10 Paagi sa dai nguna pagpatunay sa saiyang soberaniya, tinogotan ni Jehova si Satanas na patunayan an paghingako nia. An mga tawo tinawan man nin Dios nin oportunidad na ipaheling an kaimbodan ninda sa saiyang soberaniya. Ano an nangyari sa pag-agi nin mga siglo? Naggibo si Satanas nin makapangyarihan na organisasyon nin mga kriminal. Pag-abot nin panahon, iyan asin an Diablo lalaglagon ni Jehova, na biyong magpapatunay sa pagigin may deretso kan soberaniya nin Dios. Seguradong marhay si Jehova Dios sa magigin positibong resulta kaya ihinula nia iyan kan mangyari an rebelyon sa Eden.—Gen. 3:15.
11. Ano an ginibo nin dakol may koneksion sa soberaniya ni Jehova?
11 Dakol an nagtubod asin nagpadanay kan integridad ninda may koneksion sa soberaniya ni Jehova asin sa pagpakangbanal kan ngaran nia. Kaiba sa sainda si Abel, Enoc, Noe, Abraham, Sara, Moises, Rut, David, Jesus, an enot na mga disipulo ni Cristo, asin an minilyon ngonyan na nagdadanay na may integridad. Sinda may kabtang sa pagpapatunay na si Satanas putikon asin sa paghale kan katuyawan sa ngaran ni Jehova na ginibo kan Diablo paagi sa paghambog na an bilog na katawohan kaya niang patalikodon sa Dios.—Tal. 27:11.
Segurado an Magigin Resulta
12. Paano kita makakasierto na dai totogotan nin Dios na an karatan magdanay sagkod lamang?
12 Makakasierto kita na sa dai mahahaloy papatunayan ni Jehova an saiyang soberaniya. Dai nia totogotan na magdanay sagkod lamang an karatan, asin aram niato na kita nabubuhay na sa huring mga aldaw. Huminiro si Jehova tumang sa mga maraot durante kan Baha. Linaglag nia an Sodoma asin Gomorra saka si Faraon asin an hukbo kaini. Si Sisera asin an saiyang hukbo saka si Senaquerib asin an saiyang mga soldados na Asirio dai nagin mapanggana laban sa Kaharohalangkawe. (Gen. 7:1, 23; 19:24, 25; Ex. 14:30, 31; Hok. 4:15, 16; 2 Ha. 19:35, 36) Kun siring, makakasarig kita na dai totogotan ni Jehova Dios na magdanay sagkod lamang an kawaran nin paggalang sa ngaran nia asin an pagmaltrato sa saiyang mga Saksi. Apuera kaini, naheheling na niato ngonyan an ebidensia kan tanda kan presensia ni Jesus asin kan pagtatapos kan maraot na sistemang ini nin mga bagay.—Mat. 24:3.
13. Ano an dapat niatong gibohon tanganing dai kita malaglag kaiba kan mga kaiwal ni Jehova?
13 Tanganing dai malaglag kaiba kan mga kaiwal nin Dios, dapat kitang magin maimbod sa soberaniya ni Jehova. Paano niato magigibo iyan? Paagi sa pagdadanay na siblag sa siring sa kriminal na pamamahala ni Satanas asin dai pagkatakot sa mga alipores nia. (Isa. 52:11; Juan 17:16; Gibo 5:29) Iyan sana an paagi na kita makakasuportar sa soberaniya kan satong langitnon na Ama asin magkakaigwa nin paglaom na maligtas kun haleon na ni Jehova an katuyawan sa ngaran nia asin kun ipaheling na nia na sia an Unibersal na Soberano.
14. Ano an ihinahayag sa manlaenlaen na kabtang kan Biblia?
14 Yaon sa bilog na Biblia an mga detalye mapadapit sa katawohan asin soberaniya ni Jehova. Sinasabi sa sato kan enot na tolong kapitulo kaiyan an manongod sa paglalang asin pagkakasala nin tawo, mantang ipinapaliwanag man kan huring tolong kapitulo kaiyan kun paano ibabalik sa dating kamugtakan an katawohan. An mga pahina sa pag-oltanan kaiyan nagtatao nin detalye dapit sa mga lakdang kan Soberanong Kagurangnan na Jehova tanganing otobon an saiyang katuyohan para sa katawohan, sa daga, asin sa uniberso. Ipinapaheling kan Genesis kun paano si Satanas asin an karatan nakalaog sa kinaban, saka ihinahayag kan huring kabtang kan Kapahayagan kun paano hahaleon an karatan, lalaglagon an Diablo, asin gigibohon an kabotan nin Dios sa daga siring sa langit. Iyo, ihinahayag kan Biblia an dahelan nin kasalan asin kagadanan saka kun paano iyan hahaleon sa daga asin sasalidahan nin labi-labing kagayagayahan patin buhay na daing sagkod para sa mga nagdadanay na may integridad.
15. Tanganing personal kitang makinabang kun matapos na an drama may koneksion sa soberaniya, ano an dapat tang gibohon?
15 Dai mahahaloy, biyong magbabago an kamugtakan o eksena kan kinaban na ini. Ibababa an telon kan dakol nang siglong drama may koneksion sa soberaniya. Hahaleon sa entablado si Satanas, na lalaglagon sa katapustapusi, asin seguradong magigin mapanggana an kabotan nin Dios. Alagad tanganing makinabang digdi asin makamtan an dakol na bendisyon na ihinula sa Tataramon nin Dios, dapat tang suportaran ngonyan an soberaniya ni Jehova. Dapat kitang magdesisyon kun kiisay makampi. Tanganing makapagsabi na “si Jehova nasa kampi ko,” dapat kitang magdanay sa kampi nia.—Sal. 118:6, 7.
Kita Makakapagdanay na May Integridad!
16. Taano ta makakasierto kita na posible sa mga tawo na makapagdanay na may integridad sa Dios?
16 Makakaya tang suportaran an soberaniya ni Jehova asin papagdanayon an satong integridad, huling isinurat ni apostol Pablo: “Mayong sugot na uminabot sa saindo na dai inaagihan nin ibang mga tawo. Alagad maimbod an Dios, asin dai nia itotogot na kamo masugotan nin labi sa saindong makakaya, kundi kaibahan kan sugot matao man sia nin luluwasan tanganing iyan matagalan nindo.” (1 Cor. 10:13) Saen minagikan an sugot na sinambit ni Pablo, asin paano an Dios nagtatao sa sato nin luluwasan?
17-19. (a) Sa anong sugot nagpadaog an mga Israelita sa kaawagan? (b) Taano ta posible para sa sato na mapagdanay an satong integridad ki Jehova?
17 Arog kan iinilustrar kan mga eksperyensia kan Israel sa kaawagan, an “sugot” minagikan sa mga situwasyon na puedeng magsutsut sa sato na balgahon an ley nin Dios. (Basahon an 1 Corinto 10:6-10.) Nalabanan kutana kan mga Israelita an sugot, alagad nagmawot sinda nin “mga bagay na nakakaraot” kan sinda milagrosong tawan ni Jehova nin sarong bulan na suplay nin pugo. Dawa ngani an banwaan mayong karne sa laog nin sarong peryodo nin panahon, tinawan sinda nin Dios nin igong manna na makakakan. Pero, nagpadaog sinda sa sugot na magin grabe kahanab kan sinda nagtitipon nin pugo.—Bil. 11:19, 20, 31-35.
18 Bago kaidto, mantang inaako ni Moises an Ley sa Bukid nin Sinai, nagin parasamba sa idolo an mga Israelita, na nagsasamba sa ogbon na baka asin naggigibo nin makalaman na mga bagay. Kan mayo an saindang naheheling na lider, tinogotan ninda na madaog sinda kan sugot. (Ex. 32:1, 6) Kan madali na sindang maglaog sa Dagang Panuga, rinibong Israelita an inakit kan mga babaeng Moabita na gumibo nin seksuwal na imoralidad. Kan panahon na iyan, rinibong Israelita an nagadan huli sa saindang kasalan. (Bil. 25:1, 9) Kun beses, an banwaan nin Israel nagpadaog sa sugot na magreklamo na may pagrebelde, na sa sarong pangyayari sinda nagtaram tumang ki Moises saka sa Dios mismo! (Bil. 21:5) An banwaan nin Israel naggumodgumod pa ngani pagkalaglag kan maraot na si Kora, Datan, Abiram, asin kan kairiba kaini, na salang nakikiargumento na bakong makatanosan an paggadan sa mga rebelde. Bilang resulta, 14,700 na Israelita an nagadan sa damat na ipinadara nin Dios.—Bil. 16:41, 49.
19 An mga sugot na nasambitan pa sana kaya kutanang labanan kan mga Israelita. An banwaan nagpadaog sa sugot huling sinda nawaran nin pagtubod asin nakalingaw ki Jehova, sa mamomoton na pag-ataman nia sa sainda, asin sa pagigin tanos kan saiyang dalan. Arog sa mga Israelita, an mga sugot na napapaatubang sa sato naeeksperyensiahan man nin dakol. Kun hihingoahon nanggad niatong labanan iyan asin magsasarig na tatabangan kita nin Dios, mapagdadanay niato an satong integridad. Makakapagtiwala kita digdi huling “maimbod an Dios” asin dai nia itotogot na kita ‘masugotan nin labi sa satong makakaya.’ Nungkang itotogot ni Jehova na kita makaabot sa situwasyon na magigin imposible na para sa satong mga tawo na gibohon an kabotan nia.—Sal. 94:14.
20, 21. Kun kita nasusugotan, paano an Dios nagtatao “nin luluwasan”?
20 Si Jehova nagtatao “nin luluwasan” paagi sa pagpakosog sa sato na labanan an sugot. Halimbawa, an mga nagpepersegir tibaad abusohon kita sa pisikal tanganing patalikodon kita sa satong pagtubod. Tibaad huli kaiyan masugotan kitang magkompromiso tanganing makalikay sa orog pang paghampak, pagpasakit, o posibleng kagadanan. Minsan siring, basado sa ipinasabong na pagsierto na nasa 1 Corinto 10:13, aram niato na temporaryo sana an situwasyon na ginigikanan nin sugot. Dai itotogot ni Jehova na umabot iyan sa punto na dai na niato kayang magdanay na maimbod sa saiya. Puedeng parigonon nin Dios an satong pagtubod asin tawan kita nin espirituwal na kosog na kaipuhan niato tanganing magdanay na may integridad.
21 Tinatabangan kita ni Jehova paagi sa saiyang banal na espiritu. Ipinapagirumdom man sa sato kan espiritung iyan an mga teksto na kaipuhan niato tanganing malabanan an sugot. (Juan 14:26) Bilang resulta, dai kita nadadaya na gumibo nin sala. Halimbawa, nasasabotan niato an magkakonektar na isyu dapit sa soberaniya ni Jehova asin sa integridad nin tawo. Paagi sa kaaraman na iyan, dakol an natabangan nin Dios na magdanay na maimbod sagkod sa kagadanan. Alagad bakong kagadanan an nagtao sa sainda nin luluwasan; an tabang ni Jehova an nagpagin posible na sinda makatagal sagkod sa katapusan na dai nagpapadaog sa sugot. Magigibo man nia iyan sa sato. Sa katunayan, ginagamit man nia para sa sato an maimbod na mga anghel bilang mga lingkod sa publiko “na isinugo tanganing maglingkod sa mga magmamana nin kaligtasan.” (Heb. 1:14) Arog kan ipapaheling sa sunod na artikulo, an mga nagdadanay sanang may integridad an makakalaom na magkaigwa nin magayagayang pribilehio na suportaran an soberaniya nin Dios sagkod lamang. Puede kitang mapabilang dian kun kita nangangapot ki Jehova bilang an Soberanong Kagurangnan niato.
Ano an Isisimbag Nindo?
• Taano ta dapat tang midbidon si Jehova bilang an Soberanong Kagurangnan niato?
• Ano an boot sabihon kan pagpapadanay kan satong integridad sa Dios?
• Paano niato naaraman na sa dai mahahaloy papatunayan ni Jehova an saiyang soberaniya?
• Basado sa 1 Corinto 10:13, taano ta posibleng makapagdanay na may integridad?
[Mga Hapot Para sa Pag-adal]
[Ritrato sa pahina 24]
Si Satanas sinutsutan si Adan asin Eva na magin bakong maimbod ki Jehova
[Ritrato sa pahina 26]
Magin determinadong suportaran an soberaniya ni Jehova