Yehova E Shikulwifwe Mulopwe!
Yehova E Shikulwifwe Mulopwe!
“Muli Shikulu Mulopwe Yehova e mo nauba.”—AMALU. 73:28.
1. Mu mashiwi Paulo alembele pali 1 Abena Korinti 7:31, apashenye icalo kuli cinshi?
“IFYA pano calo filealuka.” E fyalandile umutumwa Paulo. (1 Kor. 7:31) Paulo afwile apashenye icalo ku cisebele apo balecitila icisela icikwete imbali shalekanalekana umuli abantu abalecita ifisuma ne fyabipa.
2, 3. (a) Bushe ifyacitika kuli bumulopwe bwa kwa Yehova kuti twafilinganya kuli finshi? (b) Fipusho nshi twalalandapo?
2 Ifilecitika pali lelo nafipalana sana ne ficitika mu fisela kabili ifi fintu nafimukuma! Fya-ampana sana ne lyashi lyakuma bumulopwe kwa Yehova Lesa. Kuti twapashanya ifilecitika ku ficitika mu fyalo fimo. Mu calo kuti mwaba ubuteko bwasalwa ubutungulula icalo. Lelo mu calo cimo cine kuti mwaba na kabungwe ka bampulamafunde aka bufumfuntungu, akacita ulukakaala no kwipaya abantu. Aka kabungwe kuti kalesuusha ubuteko bwasalwa kabili no kutunka abantu ukukanaba aba cishinka kuli ubo buteko.
3 Ifya musango uyu e filecitika na pano isonde ponse. Pano isonde paliba ubuteko bwa kwa “Yehova Shikulu Mulopwe,” ubwalinga ukuteka. (Amalu. 71:5) Lelo kwaliba ne bumba lya bampulamafunde ilitungululwa no “mubifi” ilitiinya abantu. (1 Yoh. 5:19) Lilalwisha ubuteko bwa kwa Lesa ubwalinga ukuteka e lyo lilatunka na bantu ukukanaba ne cishinka kuli iyi mitekele. Bushe cali shani pa kuti ifintu fibe ifi? Mulandu nshi Lesa asuminishisha ili ibumba ukubako? Cinshi ifwe umo umo tufwile ukucita pali uyu mulandu?
Imilandu Yakuma Bumulopwe
4. Finshi fibili ifya-ampana ifyo Satana atwishike ifyakuma bumulopwe bwa kwa Yehova?
4 Ifishinka nomba nafishibikwa pa fintu fibili ifya-ampana ifyo Satana atwishike ifyakuma bumulopwe bwa kwa Yehova. Ne fi fintu, ni bukateka bwa kwa Yehova na bucishinka bwa bantunse. Mu Malembo, Yehova ilingi line etwa ati, “Shikulu Mulopwe.” (Amalu. 73:28) Kemba wa malumbo alangile ifyo acetekele Lesa umupwilapo ilyo aimbile ukuti: “Muli Shikulu Mulopwe Yehova e mo nauba.” (Amalu. 73:28) “Mulopwe” cipilibula uwakwata amaka ya kuteka fyonse. Kwaliba imilandu iingi iyo Yehova Lesa etilwa ati Uwapulamo.—Dan. 7:22.
5. Mulandu nshi tufwile ukulafwaila sana ukutungilila bumulopwe bwa kwa Yehova?
5 Yehova Lesa e Mulopwe pano isonde na mu muulu pantu e Kabumba wa fintu fyonse. (Belengeni Ukusokolola 4:11.) Yehova ni Kapingula, e utupeela na mafunde kabili ni Mfumu. (Esa. 33:22) Lesa e Shikulwifwe Mulopwe pantu e watupeela ubumi ne filenga tutwalilile ukuba no mweo. Lyonse tukalafwaya ukulanga ukuti e wapulamo nga ca kutila tuleibukisha ukuti: “Yehova umwine alipampamika icipuna cakwe ica bufumu mu muulu; no bufumu bwakwe buteka pali conse.”—Amalu. 103:19; Imil. 4:24.
6. Calola mwi ukuba uwa cishinka?
6 Pa kutungilila bumulopwe bwa kwa Yehova, tufwile ukuba aba cishinka kuli Lesa. “Bucishinka” kukwata imibele iisuma no kuba uwabula akalema kuli Lesa. Uwa cishinka, muntu umulungami kabili uwatambalala. E fyo na Yobo ali.—Yobo 1:1.
Ifyo Imilandu Iyakuma Bumulopwe Yatendeke
7, 8. Finshi Satana acitile ifilanga ukuti alisonsombele bumulopwe bwa kwa Yehova?
7 Imyaka ukucila 6,000 iyapita, icibumbwa ca mupashi calitwishike nga ca kuti Yehova e walinga ukuba mulopwe. Icalengele ici cibumbwa capondweke ukutwishika, ni co calefwaya ukuti cilepepwa. Catunkile Adamu na Efa ukukanaba ne cishinka kuli Lesa mulopwe wabo kabili caseebenye ishina lya kwa Yehova ilyo catile Lesa alibepele ubufi. (Belengeni Ukutendeka 3:1-5.) Uyu cipondoka, aishiletendeka ukwitwa ati Satana (Uukaanya), Kaseebanya, (Uwa lwambo), icisoka, (uwa bucenjeshi) na icing’wena, (uulya abantu).—Ukus. 12:9.
8 Satana aishileibika pali bukateka no kutendeka ukulwisha imitekele ya kwa Lesa. Ilyo ici cacitike, cinshi Shikulu Mulopwe Yehova ali no kucita? Bushe ali no konaula Satana, Adamu na Efa lilya line fye bapondweke? Alikwete amaka ya kubonaula, kabili acita ifyo no yu mulandu wa kulwisha amaka yakwe ayapulamo nga e po wapwilile. Nga calimoneke ukuti ifyo Yehova alandile pa fyali no kufumamo nga batoba ifunde lyakwe fyali fya cine. Mulandu nshi Lesa ashabonawilile palya pene fye?
9. Finshi Satana atwishike?
9 Ilyo Satana abepele ubufi no kutunka Adamu na Efa ukufuma kuli Lesa, alitwishike nga ca kuti abantu balingile ukulatekwa na Yehova no kulamumfwila. E lyo kabili ilyo Satana atunkile abantu ba kubalilapo ukukanaumfwila Lesa, aletwishika nga ca kutila ifibumbwa fya kwa Lesa kuti fyaba na bucishinka kuli ena. Nga fintu ilyashi lya kwa Yobo uwali uwa cishinka kuli bumulopwe bwa kwa Yehova lilanga, Satana atile kuti afumya abantunse bonse kuli Lesa.—Yobo 2:1-5.
10. Cinshi Lesa ashaonawilile abakeene bumulopwe bwakwe lilya line fye bapondweke?
10 Yehova taonawile abakeene bumulopwe bwakwe palya pene pantu alefwaya ukupeela Satana inshita pa kuti abantu bamone nga ca kuti ifyo alelanda fya cine. Lesa alipeela na bantunse inshita ya kulanga bucishinka bwabo kuli bumulopwe bwakwe. Cinshi cacitika mu kupita kwa nshita? Satana alipanga akabungwe ka maka aka bampulamafunde. Yehova ali no kukonaula pamo na Kaseebanya wine, kabili ici cikalanga bwino bwino ukuti Lesa e walinga ukuba mulopwe. Ilyo Adamu na Efa bapondweke mu Edeni, Yehova alisobele ifyali no kufumamo pantu alishibe bwino sana ifyo ifintu fyali no kuba.—Ukute. 3:15.
11. Bushe abantu abengi bamona shani bumulopwe bwa kwa Yehova?
11 Abantunse abengi balikwata icitetekelo kabili baliba aba cishinka kuli Yehova mulopwe wabo kabili balilenga ishina lyakwe ukuba ilya mushilo. Bamo pali aba ni Abele, Enoke, Sara, Mose, Ruti, Davidi, Yesu, abasambi ba kwa Kristu aba kubalilapo, ne minshipendwa ya bantu aba cishinka pali lelo. Abantu abatungilila bumulopwe bwa kwa Lesa balalanga ukuti Satana wa bufi kabili balafumyapo no museebanya Satana abikile pe shina lya kwa Yehova ilyo aitakishe ukuti kuti afumya abantu bonse kuli Lesa.—Amapi. 27:11.
Ifikafumamo Fyalishibikwa Bwino Bwino
12. Twaishiba shani ukuti Lesa takaleke ububifi ukutwalilila?
12 Twalishiba ukuti Yehova nomba line fye akonaula abakaana bumulopwe bwakwe. Takaleke ububifi ukutwalilila, e lyo twalishiba no kuti tuli mu nshiku sha kulekelesha. Yehova alyonawile ababifi ilyo aletele Ilyeshi. Alyonawile Sodomu na Gomora na Farao na bashilika bakwe. Sisera na bashilika bakwe na Sankeribu na bashilika bakwe abena Asiria balifililwe ukulwisha Uwapulamo. (Ukute. 7:1, 23; 19:24, 25; Ukufu. 14:30, 31; Abapi. 4:15, 16; 2 Isha. 19:35, 36) Kanshi tufwile ukucetekela ukuti Yehova Lesa takaleke abasaalula ishina lyakwe no kucusha Inte shakwe ukutwalilila ukucita ifyo. E lyo kabili ino nshita tulamona ubushininkisho bwa kuti Yesu alitendeka ukuteka no bushininkisho bulanga ukuti cino calo cabipa cili mupepi no kupwa.—Mat. 24:3.
13. Finshi tufwile ukucita pa kuti twikesaonawilwa pamo na balwani ba kwa Yehova?
13 Pa kuti twikonawilwa pamo na balwani ba kwa Lesa, tufwile ukutwalilila ukutungilila bumulopwe bwa kwa Yehova. Kuti twacita shani ifyo? Kuitalusha ku mitekele ya kwa Satana iya bumpulamafunde e lyo no kukanatiina abo abomfya. (Esa. 52:11; Yoh. 17:16; Imil. 5:29) Nga twaitalusha ku mitekele ya kwa Satana e lyo twingalacita ifilanga ukuti tulatungilila bumulopwe bwa kwa Shifwe wa ku muulu, kabili e lyo twingakwata ne subilo lya kwisapusuka ilyo Yehova akafumyapo umuseebanya pe shina lyakwe no kulanga ukuti e Mulopwe uwalinga ukuteka pano isonde na mu muulu.
14. Fishinka nshi Baibolo yasokolola?
14 Baibolo yalitweba ifishinka pa bantunse na pali bumulopwe bwa kwa Yehova. Ifipande fitatu ifya kubalilapo filanda pa fyo Lesa abumbile umuntu ne fyo aishileba umubembu, e lyo ifipandwa fitatu ifya kulekeleshako fitweba ifyo abantunse bakalubulwa ku macushi. Ifyebo fyaba pa kati filanda pa fyo Shikulu Mulopwe Yehova acita pa kuti ubufwayo bwakwe ubwakuma isonde no muulu bukafikilishiwe. Ibuuku lya Ukutendeka litulanga ifyo Satana aishilebako ne fyo ububifi bwaishile pano isonde, kabili ibuuku lya Ukusokolola litweba ifyo ububifi na Kaseebanya fikafumishiwapo. Litila, Kaseebanya akonaulwa, kabili ukufwaya kwa kwa Lesa kukacitwa pano isonde nga mu muulu. Baibolo yalitweba icaleta imfwa no lubembu kabili yalitulanga ne fyo ifi fikafumapo pano isonde, no kuti nga fyafumapo, aba cishinka bakekala umuyayaya mu mutende.
15. Cinshi tufwile ukucita pa kuti na ifwe tukanonkelemo ilyo imilandu yakuma bumulopwe bwa kwa Lesa ikapwa?
15 Nomba line fye ifintu fili no kwaluka umupwilapo pano isonde. Imilandu yaima pali bumulopwe bwa kwa Lesa ili no kupwa. Satana bakamufumya pano calo no kumonaula umuyayaya, kabili ukufwaya kwa kwa Lesa kukacitwa. Lelo pa kuti tukamwenemo no kuipakisha amapaalo yasobelwa mu Cebo ca kwa Lesa, tufwile ukulatungilila bumulopwe bwa kwa Yehova pali nomba. Tatufwile ukuba ne mitima ibili. Nga tulefwaya ukulanda ati: “Yehova ali na ine,” na ifwe tufwile ukuba ku lubali lwakwe.—Amalu. 118:6, 7.
Fwe Bantunse Kuti Twaba aba Cishinka!
16. Cinshi citulanga ukuti abantunse kuti baba ne cishinka kuli Lesa?
16 Umutumwa Paulo alilangile ukuti abantu kuti batungilila bumulopwe bwa kwa Yehova no kuba aba cishinka, ilyo alembele ukuti: “Takuli ubwesho ubwamuponena ubushiponenako abantu bambi. Lelo Lesa wa cishinka, kabili takamuleke ukweshiwa ubwesho ubo mushingashipikisha, lelo ilyo ubo bwesho bwaisa akafwaya na pa kuti mufuminemo pa kuti mube na maka ya kubushipikisha.” (1 Kor. 10:13) Bushe amesho Paulo alandilepo yafuma kwi, kabili bushe Lesa atupeela shani apa kufuminamo?
17-19. (a) Bwesho nshi abena Israele bawililemo mu matololo? (b) Mulandu nshi tushingafililwa ukuba aba cishinka kuli Yehova?
17 Nga fintu cali ku bena Israele mu matololo, “ubwesho” kuti bwaisa nga ca kuti kwacitika fimo ifyalenga twatunkwa ukutoba ifunde lya kwa Lesa. (Belengeni 1 Abena Korinti 10:6-10.) Abena Israele nga balicimfishe ubwesho, lelo ‘balikumbilwe ifibi’ lintu Yehova abapeele mu cisungusho inkwale sha kulya pa mweshi uutuntulu. Nangu ca kutila abantu tabakwete inama pa nshita imo, Lesa alebapeela mana iingi iya kulya. Na lyo line baishileba na bukaitemwe ilyo baletoola inkwale.—Impe. 11:19, 20, 31-35.
18 Inshita imo ilyo Mose aile ku Lupili lwa Sinai, abena Israele batendeke ukupepa umwana wa ng’ombe no kucita bucisenene. Apo intungulushi yabo iyo balemona tayalipo, balifililwe ukucimfya ubu bwesho. (Ukufu. 32:1, 6) Ilyo bali mupepi no kwingila mu Calo ca Bulayo, abena Israele abengi balibelelekwe ku banakashi abena Moabu no kucita nabo ubulalelale. Abena Israele abengi sana balifwililepo pali ulu lubembu. (Impe. 25:1, 9) Inshita imo, abena Israele bali-ilishenye sana pa butungulushi. Limo balilandile ne fintu ifyabipa pali Mose na pali Lesa wine! (Impe. 21:5) Abena Israele bali-ilishenye na lintu Kora, Datani, na Abiramu na banabo babonawile ilyo bacitile ifyabipa. Batile Lesa talingile ukonaula balya bacipondoka. Ne ci calengele Lesa onaule abena Israele 14,700 ku cikuko.—Impe. 16:41, 49.
19 Pa mesho twalandapo, tapali ubwesho ubwakosele ica kutila abena Israele te kuti bashipikishe. Abantu baliponene mu bwesho pantu tabali ne citetekelo kabili balilabile Yehova ne fyo abasakamene, balilabile no kuti fyonse ifyo acita fyalilungama. Nga filya fine cali ku bena Israele, amesho tukwata e yo abantunse bonse bakwatako. Nga twaesha na maka ukukaana aya mesho no kushintilila pali Lesa ukuti alatwafwa, te kuti tufilwe ukuba aba cishinka. Tatufwile ukutwishika pali ico, pantu “Lesa wa cishinka” kabili te kuti atuleke ‘ukweshiwa ubwesho ubo tushingashipikisha.’ Yehova te kuti atulekeleshe ica kuti asuminisha na mesho ukwisa pali ifwe ayengalenga twafilwa ukulacita ukufwaya kwakwe.—Amalu. 94:14.
20, 21. Bushe Lesa atufwaila shani ‘umwa kufumina’ nga twaponenwa na mesho?
20 Yehova ‘alafwaya apa kuti tufumine’ mu bwesho ukupitila mu kutukosha ukucimfya ubwesho. Ku ca kumwenako abantu kuti batucusha no kutuuma pa kuti tunenuke. Nga batucusha kuti twasuka twanenuka pa kuti betwalilila ukutuma, ukutulungulusha, nangu pa kuti betwipaya. Lelo ukulingana na mashiwi Paulo alandile ayaba pali 1 Abena Korinti 10:13, twalishiba ukuti ifilenga twaba mu bwesho, fiba fye fya pa kashita akanono. Yehova te kuti aleke fyatwalilila mpaka twafilwa ukuba ne cishinka kuli ena. Lesa kuti akosha icitetekelo cesu no kutupeela amaka pa kuti twatwalilila ukuba aba cishinka.
21 Yehova alatukosha ukupitila mu mupashi wakwe uwa mushilo. Umupashi wakwe ulalenga no kuti twaibukisha Amalembo ayengatwafwa ukucimfya amesho. (Yoh. 14:26) E ico tatubelelekwa ukucita ifyabipa. Ku ca kumwenako, twalishiba imilandu yaima iyakuma bumulopwe bwa kwa Yehova na bucishinka bwa bantunse. Ukwishiba iyi milandu kulalenga abengi ukutwalilila ukuba aba cishinka kuli Lesa mpaka ne mfwa. Lelo te mfwa ilenga bakwate apa kufumina, ni Yehova abaafwa ukushipikisha ukwabula ukunenuka. Na ifwe bene kuti atwafwa. Na kuba alatwafwa no kupitila muli bamalaika bakwe, imipashi iibombela abantu, “iyatumwa ku kubombela abakapusuka.” (Heb. 1:14) Nga fintu icipande cikonkelepo cilelandapo, aba cishinka fye kuli Lesa e bengakwata isubilo lya kwisatungilila bumulopwe bwa kwa Lesa umuyayaya. Kuti twaba pali aba bantu nga ca kutila twalambatila kuli Yehova, Shikulwifwe Mulopwe.
Kuti Mwayasuka Shani?
• Mulandu nshi tufwile ukulamwena Yehova ukuti e Shikulu Mulopwe?
• Bushe ukuba aba cishinka kuli Lesa calola mwi?
• Twaishiba shani ukuti Yehova ali no konaula abakaana bumulopwe bwakwe?
• Ukulingana na 1 Abena Korinti 10:13, mulandu nshi tushingafililwa ukuba aba kaele?
[Ifipusho]
[Icikope pe bula 24]
Satana atunkile Adamu na Efa ukukanaba na bucishinka kuli Yehova
[Icikope pe bula 26]
Pampamineni pa kulatungilila bumulopwe bwa kwa Yehova