Jehovah Edi Akakan Ọbọn̄ Andikara!

“Mmada Jehovah, Akakan Ọbọn̄ Andikara, ke ebiet ubọhọ mi.”—PS. 73:28, NW.

1. Etie nte Paul akada ikọ esie oro ẹwetde ke 1 Corinth 7:31 odomo ye nso?

APOSTLE PAUL ọkọdọhọ ke “idaha ererimbot emi ke okpụhọde.” (1 Cor. 7:31) Etie nte enye ekemen ererimbot emi odomo ye itie edinam drama, emi mbon edinam ẹsiwọrọde ẹdinam edinam, edide eti m̀mê idiọk, tutu ikpehe edinam kiet kiet okụre.

2, 3. (a) Ẹkeme ndimen en̄wan oro Satan an̄wanade ye ukara Jehovah ndomo ye nso? (b) Mme mbụme ewe ke idibọrọ?

² Mfịn, ke ẹnam ata akpan drama—ndien afo emetiene esịne ke drama emi! Drama emi enen̄ede aban̄a nte ẹwụtde ke ukara Jehovah Abasi enen. Ẹkeme ndimen drama emi ndomo ye nte n̄kpọ esitiede ke ndusụk idụt. Ata eti ukara emi anamde n̄kpọ ke nde ke nde odu ke idụt oro. Idiọk n̄ka onyụn̄ odu, emi adade n̄kan̄ kiet akara, ndien uwotowo, afai, ye n̄wo, okpon etieti ke ukara mmọ. Idiọk n̄ka emi ke an̄wana ye eti ukara oro, ndien emi iyakke nditọisọn̄ ẹfiọk m̀mê ikpada ye ewe ukara.

³ Se ikade iso edi oro ke ofụri ekondo. Ata ukara odu, emi Jehovah edide Andikara. (Ps. 71:5) Edi enyene ata idiọk n̄ka emi onyụn̄ oyomde ndikara ubonowo, ndien andidiọk edi etubom n̄ka emi. (1 John 5:19) Enye an̄wana ye eti ukara Abasi onyụn̄ odomo kpukpru owo man mmọ ẹkpọn̄ ukara Abasi ẹdida ye ukara imọ. Kpukpru emi ọkọtọtọn̄ọ didie? Ntak emi Abasi ayakde emi aka iso? Nso ke nnyịn owo kiet kiet ikeme ndinam mban̄a emi?

Se Isịnede ke Drama Emi

4. Ewe n̄kpọ iba emi ẹsan̄ade kiet ẹsịne ke drama emi osụk akade iso mi ke ofụri ekondo?

⁴ Drama emi osụk akade iso mi ke ofụri ekondo esịne n̄kpọ iba emi ẹsan̄ade kiet: Ukara Jehovah ye nsọn̄ọnda owo. Bible esiwak ndikot Jehovah “Akakan Ọbọn̄ Andikara.” Ke uwụtn̄kpọ, andiwet psalm ọkọkwọ ete: “Mmada Jehovah, Akakan Ọbọn̄ Andikara, ke ebiet ubọhọ mi.” (Ps. 73:28, NW) Edieke ẹkotde ukara akakan, ọwọrọ ke idụhe odudu eke okponde ntre. Ntre, akakan andikara enyene akakan odudu. Nti ntak ẹdu emi anamde Jehovah Abasi edi Ata Edikon̄.—Dan. 7:22.

5. Ntak emi ikpeberede ye Jehovah nte Andikara ofụri ekondo?

 ⁵ Sia Jehovah Abasi edide Andibot, enye edi Akakan Andikara isọn̄ ye ofụri ekondo. (Kot Ediyarade 4:11.) Jehovah edi n̄ko Ebiereikpe, Owụk-Ewụhọ, ye Edidem nnyịn, koro enye ikpọn̄-ikpọn̄ anam utom mbita emi nte enye akarade ofụri ekondo. (Isa. 33:22) Ikpenyene ndida Jehovah nte Akakan Ọbọn̄ Andikara sia enye ọnọ nnyịn uwem, ndien mîkpedịghe enye, nnyịn ikpodụhe uwem. Nditi ke “Jehovah omowụk ebekpo esie ke heaven; itie ubọn̄ esie omonyụn̄ akara kpukpru” ayanam ibere ye enye nte Andikara ofụri ekondo.—Ps. 103:19; Utom 4:24.

6. Nso ke ndisọn̄ọ nda ọwọrọ?

⁶ Man ibere ye Jehovah nte Andikara ofụri ekondo, ana ika iso isọn̄ọ ida ye enye. ‘Ndisọn̄ọ nda’ ọwọrọ ndidu uwem ekekem ye se Abasi oyomde. Bible ọdọhọ ke owo emi ọsọn̄ọde ada ọfọn ama onyụn̄ enen. Job ekedi utọ owo oro.—Job 1:1.

Nte Drama Emi Ọkọtọn̄ọde

7, 8. Nso ke Satan eketịn̄ onyụn̄ anam man etie nte ke Jehovah inyeneke unen ndikara?

⁷ N̄kpọ nte isua 6,000 emi ẹkebede, kiet ke otu nditọ Abasi eke spirit ama ọdọhọ ke Jehovah inyeneke unen ndikara. Enye ndikọdiọk itọn̄ nyom ẹtuak ibuot ẹnọ imọ akanam ọsọn̄-ibuot edibotn̄kpọ emi etịn̄ ikọ onyụn̄ anam se enye akanamde. Enye ama anam akpa owo iba oro, Adam ye Eve, ẹkpa edem ẹwụt ukara Abasi, onyụn̄ odomo ndibiat Jehovah enyịn̄ ke ndidọhọ ke Enye okosu nsu. (Kot Genesis 3:1-5.) Ọsọn̄-ibuot angel emi ama akabade akwa Asua Abasi, emi ẹnyụn̄ ẹkotde Satan (Andibiọn̄ọ), Devil (Ọdọk Edidọk), urụkikọt (andibian̄a), ye dragon (andita).—Edi. 12:9.

⁸ Satan ama enịm idemesie nte andikara n̄ko. Nso ke Jehovah Akakan Ọbọn̄ Andikara akanam aban̄a emi? Ndi enye ama ọsọsọp osobo owo ita oro ẹkesọn̄de ibuot mi—oro edi, Satan, Adam, ye Eve? Edi akpanikọ ke enye ama enyene odudu ndikpakanam oro, ndien emi okpokowụt ke idụhe eke enyenede odudu nte Jehovah. Emi okpokonyụn̄ owụt ke Jehovah eketịn̄ akpanikọ ke ndikọdọhọ ke mbon oro ẹbiatde ibet imọ ẹyekpan̄a. Ntak emi Abasi mîkosoboke mmọ?

9. Nso ke Satan ọkọdọhọ?

⁹ Ke ndisu nsu nnyụn̄ nnam Adam ye Eve ẹwọn̄ọde ẹkpọn̄ Abasi, Satan akanam etie nte ke Jehovah inyeneke unen ndidọhọ ubonowo ẹsụk ibuot ẹnọ imọ. Akan oro, ke ndinam akpa owo iba oro ẹsọn̄ ibuot ye Abasi, Satan ọkọdọhọ ke idụhe angel m̀mê owo ekededi emi edisọn̄ọde ida ye Abasi. Ndien nte ikụtde ke mbụk Job, emi ọkọsọn̄ọde ada ye ukara Jehovah, Satan ọkọdọhọ ke imọ imekeme ndiwọn̄ọde kpukpru owo n̄kpọn̄ Abasi.—Job 2:1-5.

10. Abasi ndiketre ndisọsọp nsobo mbon nsọn̄ibuot oro ọnọ ifet ndinam nso?

¹⁰ Ke ndiketre ndisọsọp n̄wot mbon nsọn̄ibuot oro nnyụn̄ n̄wụt ke imọ idi Andikara, Jehovah ọkọnọ Satan ini ndiwụt m̀mê se enye eketịn̄de ama enen. N̄ko, Abasi ọnọ mme owo ifet ndiwụt ke mmimọ ida inọ ukara imọ. Nso ke ikụt ke ofụri ediwak isua emi ẹbede mi? Imokụt ke Satan asiak ata idiọk n̄ka. Jehovah oyosobo n̄ka emi ye Devil, ndien emi eyenen̄ede owụt ke Abasi enyene unen ndikara. Jehovah Abasi ama ọfiọk ke ini iso ọyọfọn, ntre enye ama etịn̄ aban̄a emi ke ini ẹkesọn̄de ibuot ye enye ke Eden.—Gen. 3:15.

11. Nso ke ediwak owo ẹnam ye ukara Jehovah?

¹¹ Ediwak owo ẹnyene mbuọtidem, ẹka iso ẹsọn̄ọ ẹda ẹnọ ukara Jehovah ẹnyụn̄ ẹnam enyịn̄ esie asana. Abel, Enoch, Noah, Abraham, Sarah, Moses, Ruth, David, Jesus, mme akpa mbet Christ, ye ata ediwak mbon nsọn̄ọnda mfịn, ẹsịne ke otu emi. Mmọ ẹmen ofụri esuene oro Satan esuenede enyịn̄ Abasi ẹfep, ẹnyụn̄ ẹtiene ẹwụt  ke Satan edi osu nsu ke ndikanam inua ndọhọ ke imekeme ndiwọn̄ọde ofụri ubonowo n̄kpọn̄ Abasi.—N̄ke 27:11.

Imọfiọk nte Drama Emi Editrede

12. Isan̄a didie ifiọk ke Abasi idiyọhọ idiọkido ke nsinsi?

¹² Nnyịn imọfiọk ke Jehovah ọmọn̄ ọsọsọp owụt ke imọ idi Andikara. Enye idiyakke idiọkido aka iso ke nsinsi, imonyụn̄ ifiọk ke nnyịn idu uwem ke mme akpatre usen. Jehovah ama osobo ndiọi owo ke Ukwọ. Enye ama osobo Sodom ye Gomorrah, onyụn̄ osobo Pharaoh ye udịmekọn̄ esie. Sisera ye udịmekọn̄ esie, Sennacherib ye udịmekọn̄ Assyria ikekemeke ubọk ye Ata Edikon̄. (Gen. 7:1, 23; 19:24, 25; Ex. 14:30, 31; Judg. 4:15, 16; 2 Ndi. 19:35, 36) Mmọdo, emi enen̄ede anam ikụt ke Jehovah Abasi idiyọhọ nte ẹsuenede enyịn̄ esie ẹnyụn̄ ẹfiomode Mme Ntiense esie, ke nsinsi. N̄ko-n̄ko, nnyịn imokụt idiọn̄ọ edidu Jesus ye eke akpatre idiọk editịm n̄kpọ emi.—Matt. 24:3.

13. Nso ke ikpanam edieke nnyịn mîyomke ẹdian nnyịn ye mme asua Jehovah ẹsobo?

¹³ Ana isọn̄ọ ida inọ ukara Jehovah edieke nnyịn mîyomke ẹdian nnyịn ye mme asua Abasi ẹsobo. Ikeme didie ndinam emi? Ana idian̄ade ikpọn̄ idiọk ukara Satan emi ikûnyụn̄ uyak ikọt esie ẹsịn nnyịn ndịk ke idem. (Isa. 52:11; John 17:16; Utom 5:29) Edieke inamde emi, nnyịn iwụt ke ida inọ ukara Ete nnyịn eke heaven, ke imonyụn̄ inyene idotenyịn ke ẹyenyan̄a nnyịn ke ini Jehovah edimende ofụri esuene emi ẹsuenede enyịn̄ esie ifep, inyụn̄ iwụt ke imọ idi Andikara Ekondo.

14. Nso ke ẹneme ke nsio nsio ikpehe Bible?

¹⁴ N̄kpọ aban̄ade ubonowo ye ukara Jehovah ẹyọyọhọ Bible. Akpa ibuot ita ke Bible ẹtịn̄ nte ẹkebotde mme n̄kpọ ye nte owo akanamde idiọkn̄kpọ, ndien akpatre ibuot ita ẹtịn̄ nte ẹdinyan̄ade ubonowo. Mme ibuot eken ke Bible ẹneme ọyọhọ ọyọhọ se Jehovah, Akakan Ọbọn̄ Andikara anamde man osu se enye akaduakde ọnọ ubonowo, isọn̄, ye ekondo. N̄wed Genesis etịn̄ nte Satan ye idiọkn̄kpọ ẹkesan̄ade ẹdụk ererimbot, ndien mme akpatre ibuot ke Ediyarade ẹtịn̄ nte ẹdisan̄ade isio idiọkido ifep: ẹyesobo Devil, ẹnyụn̄ ẹnam uduak Abasi nte ẹnamde ke heaven. Ke akpanikọ, Bible etịn̄ se idide ntak idiọkn̄kpọ ye n̄kpa onyụn̄ owụt nte ẹdisiode enye ifep ke isọn̄ man mbon nsọn̄ọnda ẹkpekop inemesịt ke nsinsi ẹnyụn̄ ẹnyene nsinsi uwem.

15. Nso ke ikpanam man nnyịn owo kiet kiet ibọ ufọn ke ini drama emi aban̄ade ukara mi edikụrede?

¹⁵ Ke mîbịghike, drama emi aban̄ade ukara, emi akade iso ke ediwak isua mi, ọmọn̄ okpụhọde ofụri ofụri. Ikpehe ọmọn̄ ọdọduọ.  Ẹmọn̄ ẹsio Satan ke itie edinam ẹfep, ekem ẹsobo enye ofụri ofụri, ndien uduak Abasi oyosu. Edi man ibọ ufọn ito emi inyụn̄ itiene inyene mme edidiọn̄ emi ẹken̄wọn̄ọde ke Bible, ana ibere ye ukara Jehovah idahaemi. Inaha nnyịn itie ndebe ndebe. Ana ika iso ida ye Jehovah man ikeme nditiene ndọhọ, “Jehovah edi okịmmọ.”—Ps. 118:6, 7.

Nnyịn Imekeme Ndika Iso Nsọn̄ọ Nda!

16. Nso inam inịm ke mme owo ẹkeme ndika iso nsọn̄ọ nda ye Abasi?

¹⁶ Nnyịn imekeme ndibere ye ukara Jehovah nnyụn̄ n̄ka iso nsọn̄ọ nda, koro apostle Paul ekewet ete: “Idomo ikesịmke mbufo ibọhọke se isiwakde nditịbe nnọ owo. Edi Abasi edi akpanikọ, idinyụn̄ iyakke ẹdomo mbufo ẹbe se mbufo ẹkemede ndiyọ, edi enye oyosio usụn̄ ubọhọ ke ufọt idomo man mbufo ẹkeme ndiyọ enye.” (1 Cor. 10:13) Idomo emi Paul etịn̄de aban̄a mi oto m̀mọ̀n̄, ndien didie ke Abasi esisio usụn̄ ubọhọ ọnọ nnyịn?

17-19. (a) Idomo ewe ke nditọ Israel ẹkedụk ke wilderness? (b) Ntak emi idọhọde ke imekeme ndika iso nsọn̄ọ nda ye Jehovah?

¹⁷ Se ikọwọrọde nditọ Israel ke wilderness owụt ke mme idaha oro owo odude ẹkeme ndisịn owo ke idomo nnyụn̄ nnam owo abiat ibet Abasi. (Kot 1 Corinth 10:6-10.) Nditọ Israel ẹkpekekan idomo, edi ke ini Jehovah ọkọnọde mmọ unam emi ẹkotde ikûkpa ke utịbe utịbe usụn̄ ndita ofụri ọfiọn̄ kiet, mmọ ẹma ẹkabade ẹyom “ndiọi n̄kpọ.” Okposụkedi emi edide ebịghi mmọ ẹketa unam, Abasi ama ọnọ mmọ manna barasuene ẹdia. Edi ke ini Abasi ọkọnọde mmọ unam, ọkpọsọn̄ idiọkitọn̄ ama esịn mmọ ke idomo.—Num. 11:19, 20, 31-35.

¹⁸ Mbemiso emi, ke ini Moses akakade ndibọ Ibet ke Obot Sinai, nditọ Israel ẹma ẹwọn̄ọde ẹkpono ndem, koro mmọ ẹketuakde ibuot ẹnọ eyen enan̄ ẹnyụn̄ ẹnamde se inemde obụkidem esịt. Sia adausụn̄ mmọ mîkodụhe, mmọ ikakpaha-kpa idem ndibe idomo. (Ex. 32:1, 6) Esisịt ini mbemiso ẹdụkde Isọn̄ Un̄wọn̄ọ, iban Moab ẹma ẹtap ediwak tọsịn nditọ Israel ẹnam ẹnam use ye mmọ. Ediwak tọsịn nditọ Israel ẹma ẹkpan̄a ke ntak idiọkn̄kpọ oro. (Num. 25:1, 9) Ndusụk ini, nditọ Israel ẹma ẹsisụk uyo ẹnyụn̄ ẹsọn̄ ibuot. Enyene ini emi mmọ ẹkenamde ikọ ye Abasi ye Moses. (Num. 21:5) Mmọ ẹma ẹkam ẹsụk Moses uyo idem ke ẹma ẹkesobo ndiọi owo oro—Korah, Dathan, Abiram, ye mme nsan̄a mmọ—ẹduede ẹkere ke ikọfọnke ndiwot mbon nsọn̄ibuot oro. Nte utịp, Jehovah ama anam idiọk udọn̄ọ owot owo mmọ 14,700.—Num. 16:41, 49.

¹⁹ Idụhe idomo ndomokiet ke otu mme idomo emi isụk itịn̄de iban̄a mi emi nditọ Israel mîkpekekemeke ndibe. Unana mbuọtidem, edifre Jehovah ye ima ima ukpeme esie, ye ndinen usụn̄ esie, akanam nditọ Israel ẹkûkeme ndibe mme idomo emi. Ukem nte nditọ Israel, mme idomo emi isisobode ẹdi mme idomo emi ẹkemede ndisịm owo kiet ekededi. Edieke isịnde ukeme ndibe mme idomo emi inyụn̄ inyenede mbuọtidem nte ke Abasi ayan̄wam nnyịn, emi ayanam ika iso isọn̄ọ ida. Imenen̄ede inịm emi koro “Abasi edi akpanikọ” idinyụn̄ iyakke ‘ẹdomo nnyịn ẹbe se ukeme nnyịn  edide.’ Tutu amama Jehovah idiyakke ẹdomo nnyịn ẹbe idaha oro nnyịn mîdikemeke ndiyọ nnyụn̄ n̄ka iso nnam uduak esie.—Ps. 94:14.

20, 21. Didie ke Abasi esisio “usụn̄ ubọhọ” ọnọ nnyịn ke ini idomo?

²⁰ Jehovah esisio “usụn̄ ubọhọ” ọnọ nnyịn ke ndisọn̄ọ nnyịn idem man ibe idomo. Ke uwụtn̄kpọ, mme owo ẹkeme ndifiomo nnyịn man ikan̄ mbuọtidem. Utọ mfiomo oro ekeme ndinam ikere ke akpana ikan̄ mbuọtidem man ibọhọ umia, ndutụhọ, m̀mê n̄kpa. Edi se ẹkenọde Paul odudu spirit Abasi ndiwet ke 1 Corinth 10:13 anam ifiọk ke idomo esidi sụk ke ibio ini. Jehovah idiyakke ẹdomo nnyịn ẹsịm udomo oro nnyịn mîdikemeke ndika iso nnam n̄kpọ esie. Abasi ekeme ndisọn̄ọ mbuọtidem nnyịn onyụn̄ ọnọ nnyịn ukeme ndika iso nsọn̄ọ nda.

²¹ Jehovah esida edisana spirit esie ọsọn̄ọ nnyịn idem. Kpa spirit oro esinam iti mme itie N̄wed Abasi oro ẹdin̄wamde nnyịn ibe idomo. (John 14:26) Emi esinam ikûdụk idiọk afan̄. Ke uwụtn̄kpọ, imenen̄ede ifiọk eneni emi aban̄ade ukara Jehovah ye ntak emi ikpakade iso isọn̄ọ ida. Abasi ada utọ ifiọk emi ọsọn̄ọ ediwak owo idem ndika iso nnam n̄kpọ esie tutu esịm n̄kpa. Edi idịghe n̄kpa esisio usụn̄ ubọhọ ọnọ mmọ; Jehovah anam mmọ ẹkeme ndiyọ idomo nsịm utịt, utu ke ndikan̄ mbuọtidem. Enye ekeme ndin̄wam nnyịn n̄ko. Ke akpanikọ, enye esida mme anam-akpanikọ angel esie an̄wam nnyịn, onyụn̄ ‘osio mmọ ọdọn̄ ete ẹsan̄a utom ẹnọ mmọ eke ẹdidade edinyan̄a ẹnyene.’ (Heb. 1:14) Nte idinemede ke ibuotikọ oro etienede, mbon oro ẹkade iso ẹsọn̄ọ ẹda kpọt ẹdinyene akwa ifet edika iso nsọn̄ọ nda nnọ ukara Abasi ke nsinsi. Edieke isọn̄ọde ida ye Jehovah nte Akakan Ọbọn̄ Andikara, nnyịn imekeme ndisịne ke otu emi.

Didie ke Afo Ọkpọbọrọ?

• Ntak emi ikpadade Jehovah nte Akakan Ọbọn̄ Adikara?

• Nso ke ndisọn̄ọ nda nnam n̄kpọ Abasi ọwọrọ?

• Isan̄a didie ifiọk ke Jehovah ọmọn̄ ọsọsọp owụt ke imọ idi Andikara?

• Ke ikerede iban̄a se idude ke 1 Corinth 10:13, ntak emi idọhọde ke imekeme ndisọn̄ọ nda?

[Mme Mbụme Ukpepn̄kpọ]

[Ndise ke page 24]

Satan ama anam Adam ye Eve ẹkpa edem ẹwụt Jehovah

[Ndise ke page 26]

Biere ndibere ye ukara Jehovah