Jihova Họ Olori Osu Mai!
Jihova Họ Olori Osu Mai!
“ỌNOWO, Oride na . . . họ ovie ologbo eva akpọ na kpobi.”—OL. 47:2.
1. Eme o wọhọ nọ Pọl ọ rehọ eme riẹ nọ e rrọ 1 Ahwo Kọrint 7:31 na dhesẹ?
‘UYERO akpọ nana u bi nwene.’ Ere Pọl ukọ na ọ ta. (1 Kọr. 7:31) O wọhọ nọ Pọl ọ jẹ rehọ akpọ na ro dhesẹ afe-ughe, avọ ahwo nọ e be jariẹ ru edrama, ejọ e be jariẹ dhesẹ uruemu ahwo owoma, efa kọ ahwo oyoma, bẹsenọ ughe na u ro nwene.
2, 3. (a) Uyero vẹ a sae rọ wawo use-abọ nọ o rẹriẹ ovao dhe esuo-okpehru Jihova? (b) Enọ vẹ ma te ta ẹme kpahe?
2 Uyero jọ nọ u wuzou gaga nọ o wọhọ edrama o be romavia nẹnẹ na—yọ u kpomahọ owhẹ! Uyero na o mai kie kpahe ẹkpare kpehru esuo Jihova Ọghẹnẹ. Ma rẹ sae rehọ edrama nana ro dhesẹ uyero jọ nọ o rẹ sae romavia evaọ ẹkwotọ jọ. Emamọ egọmeti o rrọ ẹkwotọ nana nọ o be lẹliẹ eware riẹ nya ziezi. Evaọ ẹkwotọ ọvo nana, ukoko egbulegbu jọ o riẹ nọ o be wha iwhayo, ozighi, gbe ahwo-okpe haro. Whaọ, ukoko egbulegbu na yọ use-abọ kẹ egọmeti ẹkwotọ na, yọ u bi ru ei bẹbẹ kẹ ahwo ẹkwotọ na re a roma kpotọ kẹ egọmeti na.
3 Uyero nọ o rro vi onọ ma fodẹ na o r’otọ nẹnẹ. “Ọnowo ỌGHẸNẸ” họ ọnọ o wo udu-esuo evaọ ehrugbakpọ na. (Ol. 71:5) Rekọ ukoko egbulegbu jọ nọ “oyoma na” o bi su o be wha ebẹbẹ se ahwo-akpọ. (1 Jọn 5:19) Ukoko nana o rrọ use-abọ kẹ esuo Ọghẹnẹ, je bi ru ei bẹbẹ kẹ ahwo kpobi re a roma kpotọ kẹ esuo-okpehru Ọghẹnẹ. Eme o wha onana ze? Fikieme Ọghẹnẹ ọ rọ kuvẹ kẹ onana? Eme mai omomọvo ma rẹ sai ru kpahe iẹe?
Eware nọ A Jọ Edrama na Dhesẹ
4. Fodẹ eware ivẹ jọ nọ i w’obọ kugbe ohwohwo nọ edrama nọ e rrọ otọ na i dhesẹ.
4 A jọ edrama nana dhesẹ eware ivẹ jọ nọ i w’obọ kugbe ohwohwo, koyehọ esuo-okpehru Jihova gbe ẹgbakiete ohwo-akpọ. A jọ Ikereakere na se Jihova “ỌNOWO, Oride na.” Wọhọ oriruo, ọso-ilezi na ọ so inọ: “Keme ỌNOWO, Oride na . . . họ ovie ologbo eva akpọ na kpobi.” (Ol. 47:2) Ọkwa “Oride” họ ọkwa nọ ọ mai kpehru evaọ esuo. Ohwo nọ ọ rrọ ọkwa yena ọ tẹ ta no yọ u re no. Fikiere, ẹjiroro buobu e riẹ nọ ma be rọ rehọ Jihova Ọghẹnẹ inọ ọye ọ mai kpehru.—Dan. 7:22.
5. Fikieme ma rẹ rọ roma kpotọ kẹ esuo-okpehru Jihova?
5 Jihova Ọghẹnẹ họ ọnọ ọ mai kpehru evaọ ehrugbakpọ na keme ọye ọ ma eware kpobi. (Se Eviavia 4:11.) Jihova ọ tẹ jẹ rrọ Obruoziẹ, Ọkẹ-uzi, gbe Ovie mai, koyehọ udu-esuo kpobi o rrọ obọ riẹ. (Aiz. 33:22) Nọ o rrọ nọ Ọghẹnẹ họ ọnọ ọ kẹ omai uzuazọ jẹ be sẹro mai na, ọye họ Oride mai. Ma rẹ roma kpotọ kẹ esuo-okpehru Jihova nọ ma tẹ be hae kareghẹhọ inọ ‘ọ ruẹrẹ oria ẹkeria riẹ họ eva odhiwu, uvie riẹ họ onọ u wuzou eware kpobi.’—Ol. 103:19; Iruẹru 4:24.
6. Eme họ ẹgbakiete?
6 Otẹrọnọ ma gwọlọ jọ abọ esuo-okpehru Jihova, ma rẹ yọrọ ẹgbakiete mai hrọ. “Ẹgbakiete” yọ ẹfuọ uruemu. Ohwo nọ ọ gbakiete họ ọnọ ọ kare afuẹwẹ hayo kiẹrẹe. Job ọ jọ ohwo otiọye.—Job 1:1.
Epanọ Edrama na I ro Muhọ
7, 8. Ẹvẹ Setan ọ rrọ rehọ unu raha udu-esuo Jihova?
7 Bu vrẹ ikpe idu ezeza (6,000) nọ e vrẹ, ukọ odhiwu jọ ọ rọ unu raha udu-esuo Jihova. Uruemu riẹ gbe eme nọ ọ ta i dhesẹ inọ ọ gwọlọ nọ a gọ ọyomariẹ. Ọ viẹ Adamu avọ Ivi họ ghẹmeeyo kẹ Ọghẹnẹ, jẹ daoma raha odẹ Jihova inọ Jihova yọ ọtọrue. (Se Emuhọ 3:1-5.) Ukọ-odhiwu ọwọsuọ yena o te zihe ruọ odudu ologbo, oriọvọ anwae nọ ọ rẹ viẹ ahwo họ, Ukumuomu gbe Setan.—Evia. 12:9.
8 Setan ọ rehọ omariẹ mu osu ọwọsuọ. Kọ eme Jihova Oride na o re ru kpahe use-abọ nana? Kọ o re kpe Setan, Adamu, gbe Ivi, nọ a kpareso ẹe na no? Jihova o gine wo ẹgba nọ ọ hai ro ru ere, yọ owojẹ utioye na o hai ru emama kpobi riẹ nnọ ọye ọ mai wo ogaga. O hai je dhesẹ inọ Jihova ọ ta uzẹme keme ọ vuẹ rai kpahotọ no inọ a ti whu nọ a tẹ ghẹmeeyo kẹe. Kọ fikieme Ọghẹnẹ o gbe kpe ai no ho?
9. Eme Setan ọ rehọ etata ẹme riẹ dhesẹ?
9 Ẹkwoma erue nọ Setan ọ ta gbe Adamu avọ Ivi nọ ọ viẹhọ, o dhesẹ inọ Jihova o wo udu nọ o re ro su ahwo-akpọ họ. Ofariẹ, Setan ọ rehọ ẹkwoma imava ọsosuọ nọ ọ viẹhọ ghẹmeeyo kẹ Ọghẹnẹ na ro dhesẹ inọ ahwo-akpọ gbe ijẹle a rẹ sai kru ẹgbakiete rai hi. Wọhọ epanọ oriruo Job nọ ọ roma kpotọ kẹ udu-esuo Jihova u dhesẹ, Setan ọ ta nọ ọ rẹ sai ru re ahwo-akpọ kpobi a siọ Ọghẹnẹ ba ẹgọ.—Job 2:1-5.
10. Fikieme Ọghẹnẹ o gbe ro kpe Setan no okioke yena ha?
10 Jihova o kpe Setan no okioke yena ha re ọ ruẹse kẹ Setan uvẹ dhesẹ eha nọ o se na via. Ọghẹnẹ ọ tẹ jẹ kẹ ahwo-akpọ uvẹ re a dhesẹ omaurokpotọ rai kẹ esuo-okpehru ọyomariẹ. Eme ọ via no anwọ ikpe-udhusoi buobu nọ e vrẹ? Setan o si ahwo buobu ruọ abọ riẹ no. Jihova ọ te raha ahwo yena gbe Ẹdhọ no, emama kpobi a vẹ te riẹ inọ udu-esuo Jihova ọ mai kpehru. Nọ ọwọsuọ ọgbọ Idẹn na ọ roma via no, Jihova ọ tẹ ta kpahe ewoma nọ ọ te jọ obaro via.—Emu. 3:15.
11. Eme ahwo buobu a ru no kpahe esuo-okpehru Jihova?
11 Rọ kpahe ẹkpare kpehru esuo Jihova gbe erufuọ odẹ riẹ, ahwo-akpọ buobu a kru ẹrọwọ jẹ yọrọ ẹgbakiete rai no. Ejọ rai họ Ebẹle, Enọk, Noa, Abraham, Sera, Mosis, Rut, Devidi, Jesu, Ileleikristi ikpe-udhusoi ọsosuọ, gbe ima ahwo buobu nọ i bi kru ẹgbakiete rai nẹnẹ. Ahwo nana kpobi nọ a roma kpotọ kẹ esuo Ọghẹnẹ na a fi obọ họ dhesẹ Setan fihọ ọtọrue je si afuẹwẹ nọ Setan o fihọ odẹ Jihova no ẹkwoma eha nọ o se inọ ọ rẹ sai ru ohwo kpobi siọ Ọghẹnẹ ba ẹgọ.—Itẹ 27:11.
Ma Riẹ Epanọ Edrama na I ti ro Kuhọ
12. Ẹvẹ u ro mu omai ẹro inọ Ọghẹnẹ ọ te kuvẹ kẹ umuomu ribri hi?
12 Avro ọ riẹ hẹ inọ kẹle na, Jihova o ti dhesẹ nọ esuo riẹ ọ mai kpehru. Ọ te kuvẹ kẹ umuomu bẹdẹ bẹdẹ hẹ, yọ ma riẹ inọ edẹ urere na ma rrọ na. Jihova ọ raha ahwo omuomu evaọ oke Ẹvo na. Ọ raha Sọdọm avọ Gomora gbe Fẹro avọ egbaẹmo riẹ. Jihova ọ raha Sisera avọ egbaẹmo riẹ gbe Senakerib avọ egbaẹmo riẹ. (Emu. 7:1, 23; 19:24, 25; Ọny. 14:30, 31; Ibr. 4:15, 16; 2 Iv. 19:35, 36) Fikiere, ma wo imuẹro inọ Jihova Ọghẹnẹ ọ te kuvẹ hẹ re a rri odẹ riẹ vo je kpokpo Isẹri riẹ ribri. Ofariẹ, ma be ruẹ oka nọ u dhesẹ nọ Jesu ọ ze no gbe nnọ ekuhọ uyerakpọ omuomu nana ọ kẹle no.—Mat. 24:3.
13. Ẹvẹ ma sae rọ zọ evaọ okenọ Jihova ọ te raha ewegrẹ riẹ?
13 Re Ọghẹnẹ ọ se omai ba ẹraha kugbe ewegrẹ riẹ, ma rẹ roma kpotọ kẹ esuo-okpehru riẹ. Ẹvẹ ma sai ro ru ere? Ẹkwoma oma nọ ma re si no esuo ugbarugba Setan, yọ ma rẹ dhozọ enọ e rrọ abọ riẹ hẹ. (Aiz. 52:11; Jọn 17:16; Iruẹru 5:29) Ere oruo ma sai ro w’obọ evaọ ẹkpare kpehru esuo Ọsẹ obọ odhiwu mai, je wo ẹruore inọ ma te zọ okenọ Jihova ọ te raha ahwo oyoma je dhesẹ inọ ọye họ osu ehrugbakpọ.
14. Eme eria sa-sa Ebaibol na e ta kpahe?
14 A kere ikuigbe ohwo-akpọ fihọ Ebaibol na, jẹ jariẹ ta kpahe esuo-okpehru Jihova. Izou esa ọsosuọ Ebaibol na e ta kpahe emama gbe epanọ ohwo-akpọ o ro kie ruọ uzioraha, yọ izou esa urere Ebaibol na e ta kpahe epanọ ahwo-akpọ a ti ro wo esiwo. Eria Ebaibol nọ i kiọkọ e roma totọ dhesẹ oware nọ Jihova Olori Oride na o ru no re ẹjiroro riẹ kpahe ohwo-akpọ gbe ehrugbakpọ na ọ sai rugba. Obe Emuhọ u dhesẹ epanọ Setan gbe umuomu o rọ ruọ akpọ na, yọ ubrobọ ukuhọ obe Eviavia u dhesẹ epanọ eyoma o ti ro kuhọ, epanọ a ti ro kpe Ẹdhọ no, gbe epanọ a ti ro ru oreva Ọghẹnẹ evaọ akpọ na wọhọ epanọ a bi ru evaọ obọ odhiwu. Evaọ uzẹme, Ebaibol na i dhesẹ oware nọ o wha umuomu gbe uwhu ze, je dhesẹ epanọ i ti ro n’otọ, kẹsena ahwo kiẹrẹe a ve ti wo oghọghọ ulogbo jẹ rria bẹdẹ bẹdẹ.
15. Re mai omomọvo ma sai wo erere okenọ avro kpahe esuo-okpehru Jihova o te kuhọ no, eme o gbahọ nọ ma re ru?
15 Kẹle na uyero akpọ na u ti nwene riẹriẹriẹ. Avro kpahe esuo-okpehru Jihova nọ u kri otọ no na o ve ti kuhọ. A ti kpe Setan no bẹdẹ bẹdẹ, oreva Ọghẹnẹ u ve ti rugba. Rekọ re ma sai wo erere no onana ze jẹ reawere eghale nọ a jọ Ebaibol na ruẹaro rai na, ma rẹ roma kpotọ kẹ esuo-okpehru Jihova enẹna. O gwọlọ nọ ma salọ abọ nọ ma rrọ enẹna. Re ma sae ta nọ ‘ỌNOWO ọ rrọ abọ mẹ,’ o gbahọ nọ ma rẹ jọ abọ riẹ.—Ol. 118:6, 7.
Ma Sae Yọrọ Ẹgbakiete!
16. Fikieme u je mu omai ẹro inọ o lọhọ re ahwo-akpọ a yọrọ ẹgbakiete rai kẹ Ọghẹnẹ?
16 Ma sae kpare esuo Jihova kpehru jẹ yọrọ ẹgbakiete mai, keme Pọl ukọ na o kere nọ: ‘Ẹdawọ ọvuọvo o re bru owhẹ tha ha, ajokpa onọ u bi te ahwo kpobi: rekọ Ọghẹnẹ ọ vọ avọ ọtẹruo, ọ rẹ kuvẹ re ẹdawọ nọ ọ ro vi owhẹ o te owhẹ hẹ; rekọ o re ru re whọ sai thihakọ riẹ.’ (1 Kọr. 10:13) Bovẹ edawọ nọ Pọl ọ fodẹ i re no ze, kọ ẹvẹ Ọghẹnẹ o re ro fi obọ họ kẹ omai fi ai kparobọ?
17-19. (a) Odawọ vẹ emọ Izrẹl a kie ro evaọ obọ udhude na? (b) Fikieme o rọ lọhọ re ma kru ẹgbakiete mai kẹ Jihova?
17 Wọhọ epanọ oriruo emọ Izrẹl evaọ udhude na o dhesẹ, uyero nọ o rẹ sae lẹliẹ omai raha uzi Ọghẹnẹ oye “ẹdawọ” na o re no ze. (Se 1 Ahwo Kọrint 10:6-10.) Emọ Izrẹl a hae sae whaha odawọ, rekọ a wo isiuru kẹ “eware iyoma” okenọ Jihova ọ rọ edhere igbunu kẹ ae evra esese nọ a re se kwuel re a re evaọ amara ọsoso. Dede nọ u dina kri no nọ a re arao, Ọghẹnẹ ọ kẹ rai emana buobu. Ghele na, a kie ruọ odawọ nọ a rehọ uvo-uthei kua evra kwuel na vrẹ oma.—Ik. 11:19, 20, 31-35.
18 Taure onana o tẹ te via, nọ Mosis o kpobọ ugbehru Saena nyae rehọ Uzi na, emọ Izrẹl a te muọ edhọ họ ẹgọ, jẹ gọ ọmọ-eruẹ yọ a ru ehaa. A kie ruọ odawọ keme Mosis osu rai nọ a jẹ ruẹ ọ gbẹ riẹ hẹ nọ ọ rẹ whahae. (Ọny. 32:1, 6) Nwane taure a tẹ te ruọ Ẹkwotọ Eyaa na, eyae Moab a lẹliẹ emọ Izrẹl nọ i bu te idu buobu, a te lele ai bru ẹnwae. Evaọ oke yena, idu buobu erọ emọ Izrẹl a whu fiki uzioraha rai. (Ik. 25:1,9) Ẹsejọ, emọ Izrẹl a jẹ hae go kpahe Mosis gbe makọ Ọghẹnẹ omariẹ! (Ik. 21:5) Emọ Izrẹl a tubẹ jẹ go evaọ okenọ Kora, Dethan, Abiram, gbe enọ i lele i rai a whu, bi roro thọthọ inọ a kpe ai kufiẹ gheghe. Fikiere, emọ Izrẹl nọ i bu te idu ikpegbene gbe egba ihrẹ (14,700) a te whu fiki uye nọ Ọghẹnẹ ọ kẹ rai.—Ik. 16:41, 49.
19 Emọ Izrẹl a hae sae whaha edawọ nana kpobi nọ ma fodẹ na. Ahwo na a kie ruọ odawọ keme ẹrọwọ rai o whrehe no, a tẹ jẹ kpairoro vrẹ Jihova, ẹruọsa riẹ, gbe epanọ izi riẹ i woma te. Oghẹrẹ edawọ nọ i te emọ Izrẹl na eye i bi te omai nẹnẹ re, yọ edawọ nana i bi te ahwo-akpọ kpobi. Nọ ma tẹ be daoma whaha uzioraha jẹ rọ ẹro so Ọghẹnẹ, ma ti kru ẹgbakiete mai. Onana o rẹ sai mu omai ẹro keme “Ọghẹnẹ ọ vọ avọ ọtẹruo” yọ ọ te kuvẹ hẹ re ‘edawọ nọ e ro vi omai i te omai.’ Jihova o re vu omai wa ha re odawọ nọ ohwo-akpọ ọ sae thihakọ riẹ hẹ u te omai.—Ol. 94:14.
20, 21. Nọ ma tẹ rẹriẹ ovao ku odawọ, ẹvẹ Ọghẹnẹ ọ rẹ rọ gbẹ edhere k’omai?
20 Jihova ọ rẹ gbẹ edhere k’omai no odawọ ẹkwoma ẹgba nọ ọ rẹ k’omai thihakọ odawọ na. Wọhọ oriruo, otu ukpokpoma a rẹ sai gboja k’omai re ma ruẹsi siobọno ẹrọwọ mai. Uye utioye na o rẹ sai ru omai siobọno ẹrọwọ mai re ma ruẹse vabọ no ukpe, olahiẹ, gbe makọ uwhu. Rekọ wọhọ epanọ Pọl ọ kẹ imuẹro evaọ 1 Ahwo Kọrint 10:13 na, odawọ o rẹ jọ ubroke. Jihova ọ te kuvẹ hẹ re odawọ jọ o j’otọ te epanọ ma re ro siobọno ẹrọwọ mai. Ọghẹnẹ ọ rẹ sai ru ẹrọwọ mai ga jẹ k’omai ẹgba nọ ma re ro kru ẹgbakiete mai.
21 Jihova ọ be rọ ẹkwoma ẹzi ọfuafo riẹ fi obọ họ k’omai. Ẹzi yena o re ru omai kareghẹhọ eme Ebaibol nọ i re fi obọ họ k’omai mudhe kẹ odawọ. (Jọn 14:26) Fikiere, a rẹ viẹ omai họ kie ruọ uzioraha ha. Wọhọ oriruo, ma wo otoriẹ eme-avro kpahe esuo-okpehru Jihova gbe ẹgbakiete ohwo-akpọ nọ i w’obọ kugbe ohwohwo na. Otoriẹ nana u ru ahwo buobu kru ẹrọwọ rai rite uwhu no. Orọnikọ ewhu nọ a whu a ro thihakọ te urere he, rekọ Jihova o fi obọ họ kẹ ae thihakọ ababọ odawọ na nọ a kie kẹ. Jihova ọ rẹ sai fi obọ họ k’omai re. Evaọ uzẹme, ọ be rehọ ijẹle riẹ fi obọ họ k’omai wọhọ enọ “a vi bi ru iruo fiki otu nọ i re ti wo esiwo na.” (Hib. 1:14) Wọhọ epanọ ma ti wuhrẹ evaọ uzoẹme nọ o rrọ aro na, enọ i kru ẹgbakiete rai ọvo họ enọ e te zọhọ fihọ ẹkpare kpehru esuo Ọghẹnẹ bẹdẹ bẹdẹ. Ma rẹ sae jọ omọvo ahwo yena otẹrọnọ ma dhẹ gbalọ Jihova wọhọ Olori Osu mai.
Ẹvẹ Whọ te k’Uyo?
• Fikieme ma re ro vuhumu inọ Jihova họ Olori Osu mai?
• Eme u dhesẹ re ma kru ẹgbakiete mai kẹ Ọghẹnẹ?
• Ẹvẹ ma rọ riẹ inọ kẹle na Jihova o ti dhesẹ esuo-okpehru riẹ via?
• Wọhọ epanọ 1 Ahwo Kọrint 10:13 u dhesẹ, ẹvẹ ma rẹ sai ro kru ẹgbakiete mai?
[Enọ Uwuhrẹ]
[Uwoho nọ o rrọ ẹwẹ-obe avọ 24]
Setan ọ viẹ Adamu avọ Ivi họ ghẹmeeyo kẹ Jihova
[Uwoho nọ o rrọ ẹwẹ-obe avọ 26]
Gbaemu inọ whọ rẹ roma kpotọ kẹ esuo-okpehru Jihova