Jehova Mulenaa Luna ki Muambakani ya Pahami!

“Kakuli Muñaa Bupilo, Muambakani-ya-Pahami, . . . ki Mulena yo mutuna ya busa lifasi kamukana.”—SAMU 47:2.

1. Paulusi naa talusañi ha naa bulezi manzwi a kwa 1 Makorinte 7:31?

“MUKWA wa lifasi le wa fela [“wa cinca,” NW].” (1 Makor. 7:31) Muapositola Paulusi ya naa susumelizwe ku ñola manzwi ao naa ziba kuli lika ze ezahala mwa lifasi za cincanga nako ni nako.

2, 3. (a) Taba ya ku lwaniswa kwa bubusi bwa Jehova bo bu pahami i konwa ku bapiswa niñi? (b) Ki lipuzo lifi ze lu ka nyakisisa?

² Kacenu, ku na ni taba ya butokwa hahulu ye sweli ku ezahala ili ye mi ama! Taba yeo sihulu i ama ku luka kwa bubusi bwa Jehova Mulimu, mi i konwa ku bapiswa ni muinelo o kona ku ba teñi mwa naha ye ñwi. Mwa naha yeo ku na ni mubuso o busa ka mulao, mi kwa neku le liñwi ku na ni kopano ya bukebenga ye busa ka bupumi, ka mifilifili, ni ka bubulai. Kopano ye sa busi ka mulao yeo, i sweli ku hanyeza mubuso o busa ka mulao mi i lika ku susueza batu kaufela ku fetuhela mubuso wo.

³ Nto ye swana ni yeo i sweli ya ezahala kai ni kai. Ku na ni mubuso o tomilwe ka mulao wa “Muambakani-ya-Pahami.” (Samu 97:9) Kono batu cwale ba mwa kozi ye tiswa ki kopano ya bukebenga ye zamaiswa ki “ya maswe.” (1 Joa. 5:19) Kopano yeo i lwanisa mubuso o tomilwe ka mulao wa Mulimu mi i lika ku susueza batu kaufela kuli ba si ke ba sepahala kwa bubusi bwa hae bo bu pahami. Taba yeo ne i tahile cwañi? Ki kabakalañi Mulimu ha i tuhelezi? Mañi ni mañi wa luna u kona ku ezañi ka za teñi?

Ze Amiwa Mwa Taba Yeo

4. Ki lifi lika ze peli ze amiwa mwa taba ya butokwa ye sweli ku ezahala?

⁴ Taba ya butokwa hahulu yeo i ama bubusi bwa Jehova ni busepahali bwa batu. Mañolo hañata a bizanga Jehova kuli ki “Muambakani-ya-Pahami.” Ka mutala, walisamu naa opezi kuli: “Kakuli Muñaa Bupilo, Muambakani-ya-Pahami, . . . ki Mulena yo mutuna ya busa lifasi kamukana.” (Samu 47:2) Ku na ni mabaka e lu swanela ku ngela Jehova Mulimu kuli ki yena ya pahami ka ku fitisisa.—Dan. 7:22.

5. Ki kabakalañi ha lu swanela ku yemela bubusi bwa Jehova?

 ⁵ Ka ku ba Mubupi, Jehova Mulimu ki Mulena ya pahami ka ku fitisisa wa lifasi ni pupo kamukana. (Mu bale Sinulo 4:11.) Jehova hape ki yena Muatuli wa luna, Mutomi wa luna wa mulao, ni Mulenaa luna. (Isa. 33:22) Bakeñisa kuli lu bupilwe ki Mulimu mi lu itingile ku yena, lu swanela ku mu nga kuli ki yena Mulenaa luna ya li Muambakani ya Pahami. Nto ye ka lu susumeza ku yemela situlo sa hae se si pahami hahulu ki ku hupulanga kuli Jehova “u tomile lubona lwa hae mwa mahalimu; mi ku busa kwa hae ku kopanya linto kamukana.”—Samu 103:19; Lik. 4:24.

6. Busepahali bu talusañi?

⁶ Kuli lu yemele bubusi bwa Jehova, lu swanela ku zwelapili ku sepahala ku yena. “Busepahali” ki ku ba ni muzamao o lukile kamba ku ineela ku Jehova ka pilu kaufela. Mutu ya sepahala ki mutu ya si na koli ili ya lukile. Toho ya lusika Jobo naa li mutu ya sepahala.—Jobo 1:1.

Mo ne I Kalezi Taba Yeo

7, 8. Satani naa kakanyize cwañi ku luka kwa bubusi bwa Jehova?

⁷ Lilimo ze fitelela 6,000 kwamulaho, sibupiwa se siñwi sa moya ne si kakanyize ku luka kwa bubusi bwa Jehova. Manzwi ni likezo za sibupiwa se ne si kwenuhezi Mulimu seo a bonisa kuli ne si na ni takazo ya ku lapelwa. Ne si susuelize batu ba pili, bo Adama ni Eva, kuli ba si ke ba sepahala kwa bubusi bwa Mulimu mi ne si sinyize Jehova libizo ka ku mu tameleza kuli naa bulezi buhata. (Mu bale Genese 3:1-5.) Muipanguli yo naa fetuhile ku ba Sila se situna, Satani (Muhanyezi), Diabulosi (Lisawana), noha (mupumi), ni drakoni (muci).—Sin. 12:9.

⁸ Satani naa ikezize mubusi ya lwanisa bubusi bwa Mulimu. Jehova Muambakani ya Pahami naa ka ezañi ka za twaniso yeo? Kana hona fo feela naa ka sinya bakwenuheli ba balalu bao—ili Satani, Adama, ni Eva? Kaniti, naa na ni maata a ku eza cwalo, mi ha naa ka ba sinya naa ka bonisa kuli u na ni maata a matuna hahulu. Hape ku sinya batu bao ne ku ka bonisa kuli Jehova naa bulezi niti ha naa ize ne ba ka shwa ha ne ba ka loba mulao wa hae. Kono ki kabakalañi Mulimu ha naa si ka ba sinya honafo feela?

9. Ki nto mañi ya naa kakanyize Satani?

⁹ Ka ku puma bo Adama ni Eva ni ku ba zwisa ku Mulimu, Satani naa kakanyize taba ya kuli Jehova wa swanelwa ku utwiwa ki batu. Mane Satani ha naa susuelize batu ba pili kuli ba si ke ba utwa Mulimu, naa kakanyize ka za haiba mangeloi kaufela ni batu ba kona ku sepahala ku Jehova. Taba yeo ne i bonahezi ku Jobo ya naa sepahala kwa bubusi bwa Jehova, Satani ha naa pihile kuli naa kona ku zwisa batu kaufela ku Mulimu.—Jobo 2:1-5.

10. Ki kabakalañi Mulimu ha naa si ka bonisa honafo feela kuli bubusi bwa hae ki bo bu lukile?

¹⁰ Ka ku sa bonisa honafo feela kuli bubusi bwa hae ki bo bu lukile, Jehova naa file Satani nako ya kuli a bonise nji za naa tamelelize Mulimu ne li za niti. Mulimu hape u file batu kolo ya kuli ba bonise kuli ba sepahala kwa bubusi bwa hae. Ki lika mañi ze ezahalile halaa lilimo-limo ze felile ku to fita cwale? Satani u tomile kopano ye maata ya bukebenga. Kwa mafelelezo, Jehova u ka sinya kopano yeo ni Diabulosi, ili ku fa bupaki bo bu tiile bwa kuli bubusi bwa Mulimu ki bo bu lukile. Jehova Mulimu naa ziba hande mafelelezo a taba yeo kuli mane naa polofitile ka za teñi ka nako ya naa fetuhezwi mwa Edeni.—Gen. 3:15.

11. Batu ba bañata ba bonisize cwañi kuli ba lata bubusi bwa Jehova?

¹¹ Batu ba bañata ba bonisize tumelo, ba zwezipili ku sepahala, mi ba yemezi bubusi bwa Jehova ni ku tusa ku kenisa libizo la hae. Batu bao ba kopanyeleza Abele, Enoke, Nuwe, Abrahama, Sara, Mushe, Ruti, Davida, Jesu, balutiwa ba makalelo ba Kreste, ni batu ba bañata-ñata ba ba sepahala kacenu. Batu bao  ba ba yemela bubusi bwa Mulimu ba tusa mwa ku bonisa kuli Satani ki lihata ni ku kenisa libizo la Jehova la sinyize Diabulosi ka ku ikutwisisa kuli wa kona ku zwisa batu kaufela ku Mulimu.—Liprov. 27:11.

Lwa Ziba mo I ka Felela Taba Yeo

12. Lu ziba cwañi kuli Mulimu ha na ku tuhelela bumaswe ku ya ku ile?

¹² Lwa ziba kuli Jehova u ka tuha a bonahaza ku luka kwa bubusi bwa hae. Ha na ku tuhelela bumaswe ku ya ku ile, mi lwa ziba kuli lu pila mwa mazazi a maungulelo. Jehova naa yundisize ba ba maswe ka nako ya Munda. Naa sinyize Sodoma ni Gomora, ni Faro ni limpi za hae. Sisera ni mpi ya hae, ni Senakeribi ni limpi za hae za Maasirya ne ba si ka kona ku lwanisa Muambakani ya Pahami. (Gen. 7:1, 23; 19:24, 25; Ex. 14:30, 31; Baat. 4:15, 16; 2 Mal. 19:35, 36) Kacwalo, lu na ni buikolwiso bwa kuli Jehova Mulimu ha na ku tuhelela batu ba ba shwaulwa libizo la hae ni ba ba eza maswe Lipaki za hae. Hape lu sweli lwa iponela bupaki bwa sisupo sa ku ba teñi kwa Jesu ni sa ku fela kwa lifasi le, le li maswe.—Mat. 24:3.

13. Lu kona ku eza cwañi ilikuli lu si ke lwa to sinyiwa hamoho ni lila za Jehova?

¹³ Kuli lu si ke lwa to sinyiwa hamoho ni lila za Mulimu, lu swanela ku sepahala kwa bubusi bwa Jehova. Lu kona ku eza cwañi cwalo? Ka ku ikauhanya kwa puso ya bukebenga ya Satani ni ka ku sa sabiswa ki balateleli ba hae. (Isa. 52:11; Joa. 17:16; Lik. 5:29) Ha lu eza cwalo, kihona lu bonisa kuli lu yemela bubusi bwa Ndataa luna ya kwa lihalimu mi lu ka ba ni sepo ya ku bukelezwa muta Jehova a kenisa libizo la hae ni ku bonisa kuli ki yena Muambakani ya Pahami.

14. Likalulo ze shutana-shutana za Bibele li patululañi?

¹⁴ Bibele mukatumbi i patulula litaba ze ama bubusi bwa Jehova. Likauhanyo ze talu za pili mwa Bibele li bulela ka za pupo ni mo ne si kalezi sibi mi likauhanyo ze talu za mafelelezo li bulela ka za mo si ka felisezwa sibi. Haili likauhanyo ze ñwi zona li talusa ka butungi za ezize Jehova Mulena ya Pahami ka ku fitisisa kuli a pete mulelo wa hae kwa batu, kwa lifasi, ni kwa pupo kamukana. Buka ya Genese i bonisa mwa naa tahezi Satani ni mo ne bu kenezi bumaswe mwa lifasi, mi kalulo ya mafelelezo ya buka ya Sinulo i bonisa mo bu ka felisezwa bumaswe, mwa ka sinyezwa Diabulosi, ni mo i ka petelwa tato ya Mulimu fa lifasi sina mo i ezezwa kwa lihalimu. Kaniti, Bibele i bonisa se ne si tisize sibi ni lifu mi i bonisa mo li ka zwisezwa lika zeo mwa lifasi, ni kuli ba ba sepahala ba ka ba ni tabo ye tuna mi ba ka pila ku ya ku ile.

15. Lu swanela ku ezañi kuli lu tusiwe, muta taba ye ama bubusi i fela?

¹⁵ Ona cwale-cwale fa, mukwa wa lifasi le u ka cinceleza. Taba ye ama bubusi i ka fela. Satani  u ka tuheliswa ku busa mi kwa mafelelezo u ka yundiswa, mi tato ya Mulimu i ka ezwa. Kono kuli lu ikole limbuyoti ze bulezwi mwa Linzwi la Mulimu, lu swanela ku yemela bubusi bwa Jehova cwale. Ha lu koni ku bulela kuli luna ha ku na ko lu yema mwa taba ye. Kuli lu kone ku bulela kuli: “Muñaa Bupilo wa ni lwanela,” lu swanela ku zwelapili ku mu yemela.—Samu 118:6, 7.

Lwa Kona ku Zwelapili ku Sepahala

16. Ki kabakalañi ha lu kona ku kolwa kuli batu ba kona ku zwelapili ku sepahala ku Mulimu?

¹⁶ Lwa kona ku yemela bubusi bwa Jehova ni ku zwelapili ku sepahala, kakuli muapositola Paulusi naa ñozi kuli: “Ha mu si ka tahelwa kale ki muliko o sa konwi ki mutu. Kono Mulimu wa sepahala, mi ha na ku lumela kuli mu likwe ki ze mi fita; kono hamoho ni muliko u ka mi fa nzila ya ku zwa ku ona, kuli mu kone ku itiisa ku ona.” (1 Makor. 10:13) Muliko wa naa talusa Paulusi ki muliko o cwañi, mi Mulimu u lu fa cwañi nzila ya ku zwa ku ona?

17-19. (a) Maisilaele ne ba komilwe ki miliko ifi mwa lihalaupa? (b) Ki kabakalañi ha lu kona ku zwelapili ku sepahala ku Jehova?

¹⁷ Sina mo li boniseza lika ze ne ba talimananga ni zona Maisilaele mwa lihalaupa, “muliko” u tiswanga ki miinelo ye kona ku lu tahiseza kuli lu lobe mulao wa Mulimu. (Mu bale 1 Makorinte 10:6-10.) Maisilaele ne ba kona ku tula muliko, kono ne ba lakalize “ze maswe” muta Jehova naa ezize makazo ya ku ba fa makwali a ne ba ka ca kweli mukatumbi. Nihaike kuli batu ne ba sa cangi nama ka nako ye telele, Mulimu naa ba file manna ye ne ba likani. Kono ne ba komilwe ki muliko wa ku lata ku ca maswe ha ne ba olela makwali.—Num. 11:19, 20, 31-35.

¹⁸ Kezo yeo i si ka ezahala kale, Mushe ha naa izo amuhela Mulao fa Lilundu la Sinai, Maisilaele ne ba kalisize ku lapela milimu ka ku lapela namani ni ku ikenya mwa minyaka. Mushe ha naa siyo, ba palelwa ku iswala mi ba wela mwa sibi. (Ex. 32:1, 6) Nakonyana ba si ka kena kale mwa Naha ya Sepiso, Maisilaele ba bañata ne ba yauluzwi ki basali ba Mamoabi mi ba eza buhule ni bona. Ka lona lizazi leo, Maisilaele ba bañata-ñata ne ba shwile kabakala sibi se ne ba ezize. (Num. 25:1, 9) Fokuñwi Maisilaele ne ba komiwanga ki muliko wa ku bilaelanga ka moya wa bukwenuheli, mi ka nako ye ñwi ne ba bulezi maswe Mushe ni Mulimu kasibili! (Num. 21:5) Maisilaele mane ne ba bilaelezi hasamulaho wa ku sinyiwa kwa bo Kora, Datani, Abirami, ni be ne ba li ni bona. Ne ba bile ni muhupulo o fosahalile wa kuli ku bulaiwa kwa bakwenuheli bao ne ku si ka luka. Kabakaleo, Maisilaele ba 14,700 ne ba shwile ka mafu a naa tahisizwe ki Mulimu.—Num. 16:41, 49.

¹⁹ Miliko kaufela ye sa zo bulelwa yeo ne si miliko ye ne ba sa koni ku tula Maisilaele. Batu bao ne ba komilwe ki muliko kakuli ne ba felezwi ki tumelo mi ne ba libezi Jehova, lilato la naa ba bonisanga, ni linzila za hae ze lukile. Sina mo i boniseza taba ya Maisilaele, miliko ye lu talimana ni yona ya swana ni ye ba talimanga ni yona batu ba bañwi. Haiba lu ikataza ku hanyeza miliko ni ku itinga ku Mulimu, lwa kona ku zwelapili ku sepahala ku yena. Lwa kona ku ba ni buikolwiso bo bu cwalo kakuli “Mulimu wa sepahala” mi ha lu  tuheleli kuli lu “likwe ki ze [lu] fita.” Jehova ha koni ku lu tuhelela kuli lu tahelwe ki miinelo ye lu palelwisa ku eza tato ya hae.—Samu 94:14.

20, 21. Ha lu mwa muliko, Mulimu u lu fanga cwañi “nzila ya ku zwa” ku ona?

²⁰ Jehova u lu fa “nzila ya ku zwa” mwa muliko ka ku lu tiisa kuli lu u tule. Ka mutala banyandisi ba kona ku lu holofaza ilikuli lu latule tumelo ya luna. Ku eziwa maswe ko ku cwalo ku kona ku tahisa kuli lu latule tumelo ya luna ilikuli batu bao ba si ke ba zwelapili ku lu nata, ku lu tukufaza, kamba mwendi ku lu bulaya. Kono ka ku ya ka manzwi a Paulusi a kolwisa ili a tahile ka moya wa Mulimu a kwa 1 Makorinte 10:13, lwa ziba kuli muliko o cwalo ki wa nakonyana feela. Jehova ha na ku lumeleza muliko wo ku zwelepili kuli mane lu palelwe ku sepahala ku yena. Mulimu wa kona ku tiisa tumelo ya luna ni ku lu fa maata e lu tokwa ilikuli lu zwelapili ku sepahala ku yena.

²¹ Jehova u lu tiisa ka moya wa hae o kenile. Moya wo hape u lu hupulisanga litaba za mwa Mañolo ze kona ku lu tusa kuli lu tule miliko. (Joa. 14:26) Kamukwaocwalo, ha lu kwashekiwi kuli lu eze lika ze maswe. Ka mutala, lwa utwisisa litaba ze ama bubusi bwa Jehova ni libaka ha ku li kwa butokwa kuli lu zwelepili ku sepahala. Ku utwisisa litaba zeo ni ku tusiwa ki Mulimu ku konisize batu ba bañata ku zwelapili ku sepahala ku isa kwa lifu. Kono haki lifu le ne li ba file nzila ya ku zwa mwa miliko; ki Jehova ya naa ba tusize kuli ba tiyele miliko ku isa kwa mafelelezo. Mi ni luna wa kona ku lu tusa. Mane hape u itusisa mangeloi a hae a sepahala ili a “lumiwanga ku sebeleza ba ba ka yola sanda sa bupilo.” (Maheb. 1:14) Sina mo i boniseza taba ye tatama, ki batu feela ba ba sepahala ba ba kona sepa ku ba ni tohonolo ya ku yemela bubusi bwa Mulimu ku ya ku ile. Lwa konwa ku balelwa kwa batu ba ba cwalo haiba lu kumalela Jehova, yena Mulenaa luna ya li Muambakani ya Pahami.

Mu Kona ku Alaba Cwañi?

• Ki kabakalañi ha lu swanela ku nga Jehova kuli ki yena Mulenaa luna ya li Muambakani ya Pahami?

• Ku talusañi ku zwelapili ku sepahala ku Mulimu?

• Lu ziba cwañi kuli Jehova u ka tuha a bonahaza ku luka kwa bubusi bwa hae?

• Ki kabakalañi ha lu kona ku zwelapili ku sepahala ku likana ni liñolo la 1 Makorinte 10:13?

[Lipuzo za Tuto]

[Siswaniso se si fa likepe 24]

Satani naa kukuelize bo Adama ni Eva kuli ba tuhele ku sepahala ku Jehova

[Siswaniso se si fa likepe 26]

Mu tiiseze mwa ku yemela bubusi bwa Jehova