Yehowa udi Mukalenge wetu mutambe bunene!
Yehowa udi Mukalenge wetu mutambe bunene!
‘Bualu bua Yehowa, Mutambe Bunene wa mu Diulu udi Mukalenge munene wa pa mutu pa buloba buonso.’—MUS. 47:2.
1. Bilondeshile mêyi adi mu 1 Kolinto 7:31, Paulo uvua mua kuikala wakula bua tshinyi?
MUPOSTOLO PAULO wakamba ne: ‘Tshimuenekelu tshia malu a pa buloba ebu tshidi tshishintuluka.’ (1 Kol. 7:31, NW) Bidi bimueneka ne: Paulo uvua ufuanyikija malu a pa buloba ne dinaya kampanda dia teatre mudi banayi bangata miaba ya bantu bimpe anyi babi too ne padi dinaya dishintuluka.
2, 3. (a) Tudi mua kufuanyikija ditombokela bumfumu bua Yehowa ne tshinyi? (b) Netuandamune nkonko kayi?
2 Lelu eu, kudi kuenzeka malu a mushinga mukole atudi mua kufuanyikija ne dinaya, ne malu aa adi akutangila pebe. Adi akula nangananga bua kubingisha bumfumu bua Yehowa Nzambi. Tudi mua kufuanyikija malu aa ne nsombelu udi mu ditunga kampanda. Kudi mbulamatadi udi ukokesha ne ufila bulongame. Kudi kabidi bulongolodi bua bantomboji badi bakokesha ne tshikisu, bashipa bantu ne bibila. Bantomboji aba badi baluisha mbulamatadi udiku ne bapangisha bantu bua kushala balamate ku mikenji ya mbulamatadi.
3 Nsombelu wa muomumue udi wenzeka mu diulu ne pa buloba. Kudi mbulamatadi muimpe wa ‘Mukalenge munene Yehowa.’ (Mus. 71:5) Kadi lelu eu badi bakengesha bantu kudi bulongolodi bubi budi ku bukokeshi bua “Mubi.” (1 Yone 5:19, Muanda Mulenga Lelu) Budi buluisha mbulamatadi wa Nzambi ne bupangisha bantu bua kushala balamate bumfumu buende. Ntshinyi tshidi tshifikishe ku nsombelu eu? Bua tshinyi Nzambi mmulekele nsombelu eu? Ntshinyi tshidi yonso wa kutudi mua kuenza?
Bilumbu binene bidi mu tshialu
4. Malu adi enzeka adi atangila bilumbu kayi bibidi bidi bipetangana?
4 Malu adi enzeka mu diulu ne pa buloba adi atangila bilumbu bibidi bidi bipetangana: tshia bumfumu bua Yehowa ne tshia lulamatu lua bantu. Mu Bible batu babikila Yehowa ne: “Mutambe Bunene wa mu Diulu.” Tshilejilu, mufundi wa Musambu wa 47 wakafunda ne dieyemena dionso ne: ‘Bualu bua Yehowa, Mutambe Bunene wa mu diulu udi Mukalenge munene wa pa mutu pa buloba buonso.’ (Mus. 47:2) Kudi malu a bungi adi atusaka bua kumona Yehowa Nzambi bu Mukalenge mutambe bunene wa mu diulu ne pa buloba.—Dan. 7:22.
5. Bua tshinyi tudi ne bua kuikala ku luseke lua bumfumu bunene bua Yehowa?
5 Bu mudi Yehowa Nzambi Mufuki udi Mukalenge mutambe bunene wa mu diulu ne pa buloba. (Bala Buakabuluibua 4:11.) Yehowa udi kabidi Mulumbuluishi wetu, Mutueledi wa mikenji ne Mukalenge wetu. (Yesh. 33:22) Bu mudi Nzambi ke udi mutufuke ne bikale ne muoyo bua bualu buende, tudi ne bua kumumona bu Mukalenge wetu munene. Muoyo wetu neutusake bua kuikala ku luseke lua bumfumu buende bunene tuetu tuvuluka misangu yonso ne: ‘Yehowa wakajadika nkuasa wende wa butumbi mu diulu, bukalenge buende budi bukokesha ku mutu kua bantu bonso.’—Mus. 103:19; Bien. 4:24.
6. Kuikala ne muoyo mutoke kudi kumvuija tshinyi?
6 Bua kuikala ku luseke lua bumfumu bua Yehowa, tudi ne bua kuikala ne muoyo mutoke kudiye. Kuikala ne muoyo mutoke kudi kumvuija kuikala ne bikadilu bimpe mu malu onso. Muntu wa muoyo mutoke mmuntu utu wenza malu makane, udi kayi kalema. Yobo uvua muntu wa mushindu eu.—Yobo 1:1.
Muakatuadija bilumbu
7, 8. Mmunyi muvua Satana muleje ne: Yehowa kavua ukumbana bua kukokesha?
7 Kukadi bidimu bitue ku 6 000, muanjelu mukuabu wakaleja muvua Yehowa kayi mukumbane bua kukokesha to. Dijinga dibi dia kumutendelelabu ke diakamusaka bua kutombokela Nzambi. Wakasaka bantu ba kumpala Adama ne Eva bua kutombokela bukokeshi bua Nzambi ne wakateta bua kunyanga dîna dia Yehowa pakambaye ne: uvua mushime. (Bala Genese 3:1-5.) Muanjelu uvua mutomboke eu wakalua muluishi munene wa Nzambi, Satana (ntomboji), Diabolo (mushiminyinyanganyi wa malu), nyoka (muena dishima) ne dragon (mudianganyi).—Buak. 12:9.
8 Satana wakadienza muluishi wa Nzambi. Ntshinyi tshivua Mukalenge munene Yehowa mua kuenza kumpala kua bualu ebu? Uvuaku mua kubutulula diakamue bantomboji basatu aba: Satana, Adama ne Eva anyi? Uvua mua kubabutula ne bu yeye muenze nanku, uvua ujikija diakamue tshilumbu tshia kumanya uvua ne bukenji bua kukokesha. Lufu lua bantomboji aba luvua kabidi mua kuleja ne: Yehowa uvua muambe bulelela bua tshivua mua kufikila bantu bavua batupa ku mikenji yende. Bua tshinyi Nzambi kavua mubabutulule?
9. Malu avua Satana muenze adi aleja tshinyi?
9 Pavua Satana mushime Adama ne Eva ne mubapambuishe kudi Nzambi, wakaleja ne: Yehowa kena ne bukenji bua kulomba bantu bua bamutumikile to. Pashishe, pakasakaye Adama ne Eva bua kushipa mikenji ya Nzambi, wakaleja kabidi mudi bifukibua bia Yehowa bionso bidi ne meji kabiyi mua kushala bimulamate. Anu mudibi bileja mu tshilumbu tshia Yobo uvua mulamate bumfumu bua Yehowa, Satana wakamba muvuaye mua kupambuisha bantu bonso kudi Nzambi.—Yobo 2:1-5.
10. Pavua Nzambi kayi mubutule Satana, uvua mumupeshe mushindu wa kuenza tshinyi?
10 Bu muvua Yehowa kayi mubutule Satana, mmumupeshe mushindu wa kujadika bivuaye muambe. Nzambi mmupeshe kabidi bantu mushindu wa kuleja mudibu balamate bumfumu buende. Ntshinyi tshidi tshienzeke mu kupita kua bidimu? Satana mmuenze bulongolodi bubi budi ne bukole bua bungi. Yehowa neikale mua kubutula Diabolo ne bulongolodi buende bua kuleja mudiye mukumbane bua kukokesha. Yehowa Nzambi uvua mushindike ne: uvua ne bua kujikija tshilumbu etshi bimpe, ke bualu kayi wakadianjila kuleja muajikatshi pavua Adama ne Eva bamutombokele mu Edene.—Gen. 3:15.
11. Ntshinyi tshidi bantu ba bungi benze bua bumfumu bua Yehowa?
11 Bantu ba bungi mbaleje ditabuja ne mbalame muoyo wabu mutoke bua bumfumu bua Yehowa ne bua kutumbisha dîna diende. Munkatshi muabu mudi Abele, Hanoka, Noa, Abalahama, Sala, Mose, Luta, Davidi, Yezu ne bayidi bende ba kumpala ne bantu binunu ne binunu badi benzela Nzambi mudimu ne muoyo mutoke lelu. Bantu aba badi baleja mudi Satana muena dishima ne bumusha tshipendu tshivua Satana muele pa dîna dia Yehowa pakambaye ne: uvua mua kupambuisha bantu bonso kudi Nzambi.—Nsu. 27:11.
Tudi bamanye muajika bilumbu ebi
12. Mmunyi mutudi bamanye ne: Nzambi kakulekela malu mabi atungunuka kashidi?
12 Tudi bamanye ne: Yehowa neabingishe bumfumu buende mu matuku makese emu. Kakulekela malu mabi atungunuka kashidi ne tudi bamanye ne: tudi mu matuku a ku nshikidilu. Yehowa uvua mubutule bantu babi ku mvula wa kabutu. Wakabutula Sodoma ne Amola ne Palô ne biluilu biende. Sisela ne basalayi bende anyi Sanaheliba ne biluilu bia bena Ashû kabavua mua kuimana kumpala kua Mutambe bunene wa mu diulu ne pa buloba to. (Gen. 7:1, 23; 19:24, 25; Ekes. 14:30, 31; Bal. 4:15, 16; 2 Bak. 19:35, 36) Nunku tuikale bashindike ne: Yehowa Nzambi kakulekela bantu banayila dîna diende ne bakengesha Bantemu bende kashidi to. Tudi kabidi tumona lelu tshimanyinu tshia mukadi Yezu ukokesha ne tshia ku nshikidilu kua tshikondo tshibi etshi.—Mat. 24:3.
13. Ntshinyi tshitudi ne bua kuenza bua kupanduka pabutulabu baluishi ba Yehowa?
13 Tudi ne bua kulamata bumfumu bua Yehowa Nzambi bua kabatubutudi paluabu kubutula baluishi bende. Ntshinyi tshitudi mua kuenza? Katubuelakanyi mu malu a bulongolodi bua Satana ne katutshinyi bantu bende to. (Yesh. 52:11; Yone 17:16; Bien. 5:29) Patudi tuenza nunku tudi tuditeka ku luseke lua bumfumu bua Tatu wetu wa mu diulu ne tudi tupeta ditekemena dia kupanduka pikala Yehowa ne bua kutumbisha dîna diende ne kuleja ne: yeye ke Mfumu munene wa mu diulu ne pa buloba.
14. Bitupa bishilashilangane bia Bible bidi biakula bua tshinyi?
14 Badi bakula mu Bible mujima bua malu adi atangila bantu ne bumfumu bua Yehowa. Mu nshapita isatu ya kumpala, badi bakula bua muvua Nzambi mufuke bintu ne muvua bantu balue kumutombokela. Nshapita isatu ya ndekelu idi ileja mualua bantu kupetulula nsombelu muimpe. Nshapita yonso idi mishale idi yakula bua malu avua Mukalenge munene Yehowa muenze bua kukumbaja disua diende bua bantu, bua buloba ne bua bifukibua bionso. Mukanda wa Genese udi wakula bua ntuadijilu wa Satana ne wa malu mabi, ne tshitupa tshia ndekelu tshia mukanda wa Buakabuluibua tshidi tshileja muajika malu mabi, muabutulabu Diabolo ne muikala disua dia Nzambi mua kuenzeka pa buloba anu mudidi dienzeka mu diulu. Bushuwa, Bible udi uleja kuvua malu mabi ne lufu bifumine ne muikala Nzambi mua kubiumusha pa buloba ne kupingaja masanka ne muoyo wa tshiendelele bua bantu badi bamutumikila.
15. Ntshinyi tshitudi ne bua kuenza bua kupeta masanka pajika tshilumbu tshia bumfumu bua Nzambi?
15 Mu matuku makese emu malu a pa buloba neashintuluke bikole. Tshilumbu tshia bumfumu bua Nzambi tshikadi tshienze bidimu bia bungi netshifike ku ndekelu. Nebabutule Satana ne disua dia Nzambi nedienzeke. Kadi bua tuetu kupeta masanka a bungi adibu baleje mu Dîyi dia Nzambi, tudi ne bua kuikala ku luseke lua bumfumu bunene bua Yehowa mpindieu. Katuena mua kushala bavunge maboko to. Bua tuetu kuamba ne: ‘Yehowa udi nanyi,’ tudi ne bua kushala ku luseke luende.—Mus. 118:6, 7.
Tudi mua kushala ne muoyo mutoke
16. Bua tshinyi tudi bashindike ne: bantu badi mua kushala ne muoyo mutoke kudi Nzambi?
16 Tudi mua kulamata bumfumu bua Yehowa ne kushala ne muoyo mutoke bualu mupostolo Paulo wakafunda ne: ‘Kakuena diteta diakunukuata didi kadiyi dikuata muntu yonso; kadi Nzambi udi mua kueyemenyibua, ngudi kayi witabuja bua nuenu nutetshibue ne diteta didi dinupita bukole; kadi palua diteta, yeye neanuenzele njila wa kupandukila, bua nuenu numanye mua kutantamana mu diteta.’ (1 Kol. 10:13) Diteta didi Paulo muakuile didi difuma kuepi ne mmushindu kayi udi Nzambi utuenzela njila wa kupandukila?
17-19. (a) Mmateta kayi avua bena Isalele kabayi batantamene mu tshipela? (b) Bua tshinyi tudi mua kulama muoyo wetu mutoke kudi Yehowa?
17 Anu mudi malu avua menzeke mu tshipela aleja, “diteta” didi difumina ku nsombelu idi mua kutusaka bua kushipa mikenji ya Nzambi. (Bala 1 Kolinto 10:6-10.) Bena Isalele bavua mua kutantamena diteta, kadi bakajinga “malu mabi” pavua Yehowa mubapeshe nyunyi ya nkuadi mu tshishima. Nansha muvuabu kabayi badie munyinyi kukavua matuku a bungi, Nzambi uvua mubapeshe mana makumbane bua kudiabu. Kadi bakapona mu diteta bualu bakakuata nyunyi ya nkuadi ne lukuka luonso.—Nom. 11:19, 20, 31-35.
18 Kumpala, pavua Mose muye ku mukuna wa Sinai bua kupeta mikenji, bena Isalela bakatendelela kana ka ngombe ne kuditua mu bisankasanka. Bu muvua mulombodi wabu uvuabu bamona ne mêsu kayiku, kakuvua muntu uvua mua kubapangisha bua kuenza bualu bubi to. (Ekes. 32:1, 6) Mutantshi mukese kumpala kua kubuela mu buloba bulaya, bana bakaji ba bena Moaba bakakoka bena Isalele ba bungi ne kuenda nabu masandi. Bena Isalele ba bungi bakafua bua bualu abu. (Nom. 25:1, 9) Kuvua misangu ivua bena Isalele bapone mu diteta dia kuakula bibi bua Mose ne bua Nzambi. (Nom. 21:5) Bakakula bibi pakabutulabu Kola, Datana ne Abilama ne bena diabu bavua bantu babi, bela meji ne: kabavua bakumbanyine lufu to. Bua bualu abu, bena Isalele 14 700 bakafua ku disama divua Nzambi mubatumine.—Nom. 16:41, 49.
19 Kakuena diteta nansha dimue ditudi batele kulu eku divua bena Isalele kabayi mua kutantamena to. Bakapona mu diteta bualu kabatshivua ne ditabuja ne bakavua bapue Yehowa muoyo, mushindu uvuaye mubalame ne malu mimpe avuaye mubenzele. Anu bu mu tshilejilu tshia bena Isalele, mateta atudi tupeta atu akuata bantu bonso. Tuetu badienzeje bua kuatantamena, ne tuetu beyemene Nzambi, netulame muoyo wetu mutoke. Tuikale batuishibue bua bualu ebu, bualu “Nzambi udi mua kueyemenyibua” ne kena mua kuanyisha bua ‘tutetshibue ne diteta didi ditupita bukole.’ Yehowa kena mua kutupua muoyo ne kuanyisha bua nsombelu mikole idi mua kupangisha muntu yonso bua kuenza disua diende itufikile.—Mus. 94:14.
20, 21. Patudi kumpala kua diteta, mmunyi mudi Nzambi ‘utuenzela njila wa kupandukila’?
20 Yehowa udi ‘utuenzela njila wa kupandukila’ padiye utupesha bukole bua kutantamena diteta. Tshilejilu, bantu badi batukengesha badi mua kutututa bikole bua tulekele ditabuja dietu. Bualu ebu budi mua kutufikisha ku ditupa ku mikenji ya Nzambi bua balekele kutututa, kutukengesha anyi kabatushipi to. Kadi bilondeshile mêyi avua Paulo mufunde ku nyuma wa Nzambi adi mu 1 Kolinto 10:13, tudi bamanye ne: mateta atudi tupeta adi a tshitupa tshipi. Yehowa kakuanyisha bua atungunuke too ne mu tshitupa tshitudi katuyi kabidi mua kushala ne lulamatu kudiye. Nzambi udi mua kukolesha ditabuja dietu ne kutupesha bukole bua kushala bamulamate.
21 Yehowa udi utukolesha ku diambuluisha dia nyuma wende. Nyuma eu udi kabidi utuvuluija mvese ya mu Bible idi mua kutuambuluisha bua kutantamena diteta. (Yone 14:26) Nunku katuena tulonda njila mubi to. Tshilejilu, tudi bamanye mushinga udi nawu tshilumbu tshia bumfumu bua Yehowa ne tshia lulamatu lua bantu. Ku diambuluisha dia dimanya edi Nzambi mmukuatshishe bantu ba bungi bua kushala ne lulamatu too ne ku lufu. Yehowa kavua mubunzuluile njila wa lufu to, kadi uvua mubambuluishe bua batantamene diteta too ne ku lufu. Udi mua kutuenzela petu bia muomumue, bualu utu utuma banjelu bende ‘bua kukuatshilabu badi bamba kupiana lupandu mudimu.’ (Eb. 1:14) Anu mualeja tshiena-bualu tshidi tshilonda, anu bantu badi bashala ne muoyo mutoke ke badi mua kupeta diakalenga dia kuikala ku luseke lua bumfumu bua Nzambi bua kashidi ne tshiendelele. Tudi mua kuikala munkatshi muabu tuetu balamate Yehowa Mukalenge wetu mutambe bunene.
Newandamune munyi?
• Bua tshinyi tudi ne bua kuitaba Yehowa bu Mukalenge wetu mutambe bunene?
• Kuikala ne muoyo mutoke kudi Nzambi kudi kumvuija tshinyi?
• Mmunyi mutudi bamanye ne: Yehowa neabingishe bumfumu buende mu matuku makese emu?
• Bilondeshile 1 Kolinto 10:13, bua tshinyi tudi mua kulama muoyo wetu mutoke?
[Nkonko ya dilonga]
[Tshimfuanyi mu dibeji 24]
Satana wakasaka Adama ne Eva bua kutombokela Yehowa
[Tshimfuanyi mu dibeji 26]
Ikala mudisuike bua kuikala ku luseke lua bumfumu bua Yehowa
