Jeova Ej Ar Iroij Potata!

“Bwe Jeova eutiejtata . . . . E kiñ elap ion aolepen lõl in.”​—SAM 47:2.

1. Ta eo Paul emaroñ kar keiri kake ilo nan ko an ilo 1 Dri Korint 7:​31 ñõn ta?

 PAUL ear ba bwe “wãwen lõl in [eoktõklok, NW].” (1 Kor. 7:​31) Einwõt ear keiri men in ñõn juõn tieta im armij ro ie rej arin ro remõn im ro renana mae ien ejemlok tieta eo.

2, 3. (a) Ta eo jemaroñ keiri jumae eo kin iroij potata eo an Jeova ñõne? (b) Ta kajitõk ko jenaj etali?

² Ranin, eor juõn men eaurõk ej walok einwõt juõn tieta, im ej kitibuj kwe. Men in elaptata an kwalok kin jime in iroij potata eo an Jeova Anij. Jemaroñ keiri tieta in ñõn juõn abañ ej walok ilo juõn ailiñ. Ilo ailiñ in, eor juõn kien im ej lelok kakien ko ñõn armij ñõn lori bwe en ejelok bwoktak. Bõtab ijo turãjet, eor juõn rolul enana im eobrõk kin etao, lej, im elap an mõnmõn armij. Rolul in enana ej jumae kien eo an ailiñ in im ej melejoñwe tiljek eo an armij ro rej ber iomin kien in.

³ Ejja wãwen in wõt ej walok ijoko otemjej ibelakin lõñ im lõl. Eor juõn kien emõn an “Iroij Anij.” (Sam 71:5) Bõtab rolul eo enana me ej ber iomin tel eo an “dri nana eo” ej kamijõk aolep armij ro kiõ. (1 Jon 5:​19) Ej jumae kien eo emõn an Anij im melejoñwe tiljek eo an aolep armij ro rej rejetake iroij potata eo an Anij. Ta eo ear kõmõn bwe men in en walok? Etke Anij ej kõtlok bwe en walok? Ta eo kij kajjojo jemaroñ kõmõne?

Men ko Rej Walok ilo Tieta Eo

4. Ta aituerõk ko ruo ilo tieta eo im rej ekkejel iben dron?

⁴ Tieta in ej kin ruo aituerõk ko im rej ekkejellok iben dron: Iroij Potata eo an Jeova im tiljek eo an armij ro. Baibel eo ej naetan Jeova eo “Eutiejtata.” Ñõn wanjoñok, joñõn an dri jeje Sam eo lukkun liki Jeova, ear al im ba: “Bwe Jeova eutiejtata . . . . E kiñ elap ion aolepen lõl in.” (Sam 47:2) Elõñ un ko remõn ñõn ar watõk Jeova Anij einwõt Eo Eutiejtata.​—Dan. 7:​22, UBS.

5. Etke jej aikwij rejetake iroij potata eo an Jeova?

⁵ Kinke ear kõmõnmõn men otemjej, Jeova Anij ej Iroij Potata eo ijoko otemjej ilõñ im ion lõl. (Riit Reveles̃õn 4:​11.) Jeova ej bareinwõt Dri Ekajet, Dri Letok Kien, im Kiñ eo ar. (Ais. 33:22) Jej aikwij watõk e einwõt Iroij  Potata eo ar kinke jej muri ñõn e kin mour ko ar im jej atartar wõt ion. Jenaj rejetake utiej eo an elañe ien otemjej jej kememej bwe “Jeova e ar likit tron eo An ilo lõñ ko; im ailiñ in kiñ eo An e iroij ion aolep.”​—Sam 103:19; Jerb. 4:​24.

6. Ta in tiljek?

⁶ Ñõn rejetake iroij potata eo an Jeova, jej aikwij drebij wõt ar tiljek ñõn e. “Tiljek” ej melelen mour jime ak juõn buru eyu. Juõn eo ej drebij an tiljek ejelok nana iben im ewãnik. Dri petriark eo Job ear juõn armij einwõt in.​—Job 1:1.

Wãwen Ear Jino Tieta Eo

7, 8. Ewi wãwen Setan ear jumae jime im maroñ eo an Jeova ñõn iroij potata?

⁷ Elõñlok jen 6,000 yiõ ko remotlok, juõn enjel enana ear jumae jime im maroñ eo an Jeova ñõn iroij potata. Kibbon im kõnan eo an bwe armij ren kabuñ ñõn e ear kamakõt e bwe en jumae. Ear kabo armij ro ruo moktata, Adam im Iv, bwe ren jumae iroij potata eo an Anij. Ear bareinwõt kajeoñ katton ãt eo etan Anij, Jeova, ilo an kar ba bwe Anij ear riõp. (Riit Jenesis 3:​1-5.) Dri jumae in ear erom dri Kijirãt eo elaptata an Anij, Setan (dri Jumae), Devil (dri Riõp), serpent (dri etao), im drakon (dri kokkure).​—Rev. 12:9.

⁸ Setan ear mõke kõmõn bwe en juõn iroij im ej jumaik Anij. Ta eo Jeova, eo ej Iroij Potata, ear kõmõne kin jumae in ear jelmaiki? Ear ke mõkõj in kokkure dri jumae ro jilu, Setan, Adam, im Iv? Ilo mol, ear or iben maroñ eo ñõn kõmõne men in, im elañe ear kokkure ir, men in enaj kar kamol bwe Jeova eutiej im ekajur potata. Enaj kar bareinwõt kamol nan ko an Jeova bwe enaj kaje ro rej rupe kien ko an. Bõtab, etke Anij ear jab kõmõne men in?

9. Ta aituerõk ko Setan ear bũkmantak?

⁹ Ilo an kar riõp im ukot Adam im Iv jen air lor Anij, Setan ear bõkmantak aituerõk eo elañe ej tellokin Jeova bwe armij ro ren bokake e. Bareinwõt, ilo an kabo armij ro ruo moktata ñõn jab bokake Anij, Setan ear bareinwõt ba bwe armij ro im enjel ro rejjab maroñ tiljek wõt ñõn Anij. Einwõt an walok ilo bwebwenato eo an Job, eo ear tiljek wõt ilo an rejetake iroij potata eo an Jeova, Setan ear ba bwe emaroñ kõmõn bwe armij otemjej ren ellok jen Anij.​—Job 2:​1-5.

10. Ilo an kar jab mõkõj in kamol iroij potata eo an im kokkure Setan, Jeova ear kõtlok ien ñõn ta?

¹⁰ Ilo an kar jab mõkõj in kamol iroij potata eo an im kokkure Setan, Jeova ear kõtlok ien ñõn an Setan kamol nan ko an. Anij ear bareinwõt kebellok juõn ien ñõn an armij ro kamol air tiljek ñõn iroij potata eo an. Ta eo ear walok iomin elõñ ebeben ko remotlok? Setan ear ejaake juõn rolul enana im ekajur. Ejjabto, Jeova enaj kokkure rolul in im Devil eo, im ilo wãwen in enaj kamol jime im maroñ eo an ñõn iroij potata. Joñõn an Jeova Anij kar jela bwe enaj kanuij in emõn jemlokõn, ear kanan kin men in ke jumae eo ear walok ilo kar jikin kallip in Iden.​—Jen. 3:​15.

11. Ta eo elõñ armij ro rar kõmõne ñõn kwalok air koutiej iroij potata eo an Jeova?

¹¹ Elõñ armij ro rar kwalok air tõmak im drebij air tiljek ilo air koutiej iroij potata eo an Jeova im ãt eo etan ekwojarjar. Rein ekoba Ebel, Inõk, Noa, Ebream, Sera, Moses, Rut, Devid, Jisõs, dri kalor ro an Kraist ilo jinoin, im million armij ro retiljek ilo ran kein. Armij rein rej rejetake iroij potata eo an Jeova rej bõk kwonair ñõn kamol bwe Setan eriõp im rej karreoik ãt eo etan Jeova im Devil eo ear kattone ilo an kar ba bwe emaroñ kõmõn bwe armij otemjej ren ellok jen Anij.​—Ken. 27:11.

Jejela Ta Jemlokõn Tieta Eo

12. Etke jemaroñ liki bwe Anij ejamin kõtlok wõt bwe nana otemjej ren wõnmanlok wõt ñõn indrio?

¹² Jemaroñ liki bwe mõtõn jidrik Jeova  enaj kamol iroij potata eo an. Ejamin kõtlok bwe nana otemjej ren wõnmanlok wõt ñõn indrio, im jejela bwe jej mour ilo ran ko eliktata. Jeova ear jolok ro renana ke ear bõktok Ibijliplip eo. Ear kokkure Sodom im Gomorra kab Pero im jarin tõrinae eo an. Sisera im jarin tõrinae eo an im Senakerib im dri tõrinae ro an rar jab maroñ jumae Eo Eutiejtata. (Jen. 7:​1, 23; 19:24, 25; Ex. 14:30, 31; Ekaj. 4:​15, 16; 2 Kiñ. 19:35, 36) Kin men in, jemaroñ liki bwe Jeova Anij ejamin kõtlok wõt bwe ren katton etan im nana air kõmõn ñõn Dri Kennan ro an. Bareinwõt, emwij ar lo an jejit kitien kakõle eo kin ber eo an Jisõs im kin jemlokõn jukjuk im ber in.​—Matu 24:​3.

13. Ewi wãwen ar maroñ elã im mour ilo ien eo ñe Jeova enaj kokkure dri kijirãt ro an?

¹³ Ñõn ar elã im mour ilo ien eo Anij enaj kokkure dri kijirãt ro an, jej aikwij kamol ar tiljek ñõn iroij potata eo an Jeova. Ewi wãwen jemaroñ kõmõne men in? Ikijen ar kajenolok kij jen wãwen iroij eo enana an Setan im jab mijõk ro dron. (Ais. 52:11; Jon 17:16; Jerb. 5:​29) Elañe jej kõmõne men in, jenaj maroñ rejetake iroij potata eo an Anij im enaj or ar kejatrikrik bwe jenaj elã im mour ilo ien ñe Jeova enaj karreoik etan im kamol bwe ej Iroij Potata Ijoko Otemjej ilõñ im ion lõl.

14. Ta eo buk ko ilo Baibel rej kwalok kake?

¹⁴ Baibel eo ej kwalok kin armij ro im kin iroij potata eo an Jeova ilo tibrikin. Japter ko jilu ilo jinointata in Baibel eo rej jiroñ kij kin an Anij kar kõmõnmõn men otemjej im an armij ro kar jerawiwi, im japter ko jilu eliktata in Baibel eo rej kwalok kin wãwen naj jolok nana otemjej im rar walok ñõn armij. Buk ko jet ilo Baibel eo rej kwalok kin wãwen Jeova, eo ej Iroij Potata, enaj kajejit karõk eo an kin armij, lõl im ijoko otemjej. Buk in Jenesis ej kwalok kin wãwen Setan im nana otemjej rar jino walok, im buk in Reveles̃õn ej kwalok kin wãwen naj jolok nana otemjej, ekoba Setan Devil eo. Ej bareinwõt kwalok kin wãwen an naj Anij kõmõnmõn ankilan ijin ion lõl einwõt ilõñ. Aet, Baibel eo ej kwalok kin unin jej jerawiwi im mij im kin wãwen naj jolok men kein jen lõl in. Ej bareinwõt kwalok kin wãwen an ro retiljek naj mour ñõn indrio ilo mõnõnõ.

15. Ta eo jej aikwij kõmõne bwe jen maroñ bõk tokjen jen tieta eo kin jemlokõn aituerõk eo nae Iroij potata eo an Anij?

¹⁵ Mõtõn jidrik wãwen ko ilo lõl in renaj lukkun oktõk. Tieta eo kin aituerõk eo nae iroij potata eo an Anij enaj jemlok. Enaj joko an Setan iroij im ejjabto naj kokkure, im Anij enaj kajejit ankilan. Bõtab ñõn bõk tokjen jen men in im lo jerammõn ko kar kanan  kaki ilo Baibel eo, jej aikwij rejetake iroij potata eo an Jeova kiõ. Jej aikwij kõmõn ar jokãlet kiõ kin wõn eo jej ber iben. Ñõn ar maroñ ba: “Iroij ej bed ibba,” jej aikwij rejetake wõt e.​—Sam 118:​6, 7, UBS.

Jemaroñ Drebij Ar Tiljek!

16. Etke jemaroñ liki bwe armij ro eor air maroñ ñõn drebij wõt air tiljek ñõn Anij?

¹⁶ Eor ar maroñ ñõn rejetake iroij potata eo an Jeova im drebij wõt ar tiljek kinke dri jilik Paul ear ba: “Kabo ko otemjej komar iioni, ejja kabo ko wõt ro jet rej iioni. Bwe Anij etiljek, im ejamin kõtlok bwe en walok menin kabo ñõn kom elablok jen ami maroñ; ak ilo ien an walok menin kabo ko, Anij enaj kakajur kom bwe komin maroñ in kijenmij, im joor jen menin kabo ko.” (1 Kor. 10:13, UBS) Ta kabo ko jej iioni ekkar ñõn Paul, im ewi wãwen Anij ej jibõñ kij?

17-19. (a) Ta kar menin kabo eo dri Israel ro rar kõtlok bwe ren bo ie ke rar ber ilo ene jemaren? (b) Etke jemaroñ drebij wõt ar tiljek ñõn Jeova?

¹⁷ Einwõt kar kwalok kin men ko dri Israel ro rar iioni ke rar ber ilo ene jemaren, menin “kabo” ko rej waloktok jen abañ ko jej jelmaiki ilo mour ko ar im remaroñ kabo kij ñõn rupi kien ko an Anij. (Riit 1 Dri Korint 10:​6-​10.) Dri Israel ro remaroñ kar jumae menin kabo ko, bõtab rar kõnan wõt “men ko renana” meñe ilo kabwilõñlõñ Jeova ear jilkinlok kijeir bao quail kajjojo aliñ. Meñe ear ejelok kijen armij ro jelele, Jeova ear lelok kijeir manna. Meñe eindrein, rar jab bokake kin air kibbon ke rar aini bao quail ko.​—Bwin. 11:19, 20, 31-​35.

¹⁸ Moktalok jen ien in, ke Moses ear ber ilo Tol Sainai ilo ien eo Jeova ear lelok Kien eo, dri Israel ro rar kabuñ ñõn ekjõp in kon in kau eo rar eiki im kõmõni jet mõnit ko rejakkar. Ilo ien eo ear joko dri tel eo air, Moses, rar kõtlok bwe menin kabo renana ren anjo ioir. (Ex. 32:​1, 6) Mokta wõt jen air kar dreloñlok ilo Enen Kalimur eo, tausan dri Israel ro rar bo iben kõra in Moab ro im rar mour in lũñ ibeir. Ilo ien in, tausan dri Israel ro rar mij kin air kar jerawiwi. (Bwin. 25:1, 9) Jen ien ñõn ien, armij in Israel rar bo ilo air jumae, im juõn ien rar konono nae Moses im bareinwõt nae Anij! (Bwin. 21:5) Rar bareinwõt alliñũrñũr elikin kar kokkure dri jumae ro, Kora, Detan, Ebairam, im ro rar kobalok ibeir, kin air lemnok bwe ejjab jime air kar mõne dri jumae rein. Tokjen men in, 14,700 dri Israel ro rar mij ke Anij ear jilkinlok juõn nañinmij ioir.​—Bwin. 16:41, 49.

¹⁹ Ejelok ian menin kabo kein jar etali rej kwalok bwe ear ejelok an dri Israel ro maroñ ñõn jumaiki. Armij ro rar bo kinke ear drik air tõmak im rar meloklok Jeova, an kar kejbãrok ir, im ial ko an rewãnik. Einwõt men ko rar walok ñõn dri Israel ro, menin kabo ko jej jelmaiki ilo ran kein rej men ko ekkã armij ro iioni. Elañe jej kate kij joñõn wõt ar maroñ ñõn jumae menin kabo kein im atartar wõt ion Anij bwe en jibõñ kij, jenaj maroñ drebij wõt ar tiljek. Jemaroñ liki bwe enaj jibõñ kij kinke “Anij etiljek” im ejamin kõtlok bwe en walok ‘menin kabo ñõn kij elablok jen ar maroñ.’ Jeova ejamin ilok jen kij elañe ej loe ar iion abañ ko rebin im remaroñ kõmõn bwe armij ro ren ebwer jen air kõmõnmõn ankilan.​—Sam 94:14.

20, 21. Elañe jej iion menin kabo ko, ewi wãwen Anij emaroñ jibõñ kij?

 ²⁰ Jeova ej jibõñ kij ilo an kakajur kij bwe jen jumae menin kabo ko. Ñõn wanjoñok, dri jumae ro remaroñ kajeoñ melejoñwe kij ilo air kejorran kij bwe jen ilok jen tõmak eo ar. Wãwen in emaroñ kabo kij ñõn karmijeteik tõmak eo ar bwe ren jab mõn, im kaiñtan kij, ak bwelen mõn kij ñõn mij. Bõtab, nan ko an Paul ilo 1 Dri Korint 10:13, rej kainemõn kij kinke jejela bwe menin kabo kein im rej melejoñwe kij rej ñõn jidrik wõt ien. Jeova eban kõtlok bwe ren laplok wõt ñõn joñõn eo im jenaj jolok ar tiljek ñõn e. Anij emaroñ kakajurlok tõmak ko ar im letok kajur eo an ñõn ar maroñ drebij wõt ar tiljek.

²¹ Jeova ej jibõñ kij ikijen kajur eo an. Kajur in ej jibõñ kij ñõn kememej nan in kakabileklek ko jen Baibel eo ñõn ar maroñ jumae menin kabo kein. (Jon 14:26) Kin men in, menin kabo kein rejjab maroñ kabo kij ñõn bõk juõn ial ebwir. Ñõn wanjoñok, jej melele kin aituerõk ko kar bũkmantak kin iroij potata eo an Jeova im tiljek eo an armij ro. Ilo air jela kin men in, elõñ rar bõk jibõñ jen Anij bwe ren tiljek wõt ñõn mij. Mij eo air ear jab kõmõn ial in air ko jen abañ ko rej iioni, ak ej Jeova eo im ear jibõñ ir bwe ren kijenmij wõt ñõn jemlokõn im jab bo ilo menin kabo kein. Jeova emaroñ kõmõne men in ñõn kij. Ilo mol, ej bareinwõt kajerbal enjel ro an retiljek ñõn jibõñ kij einwõt dri jerbal ro “ear jilkintok ir bwe ren jerbal ñõn ro re naj dri jolit in lomor.” (Hib. 1:​14) Einwõt an naj katak in tok juõn kwaloke, ro wõt retiljek eor air kejatrikrik ñõn air bõk jerammõn eo ñõn jurake iroij potata eo an Jeova ñõn indrio. Jemaroñ ber ibwiljin rein elañe jej edrep wõt ñõn Jeova, Iroij Potata eo ar.

Ewi Wãwen Kwonaj Uak?

• Etke jej aikwij watõke Jeova einwõt Iroij Potata eo ar?

• Ta melelen ñõn drebij tiljek eo ar ñõn Jeova?

• Ewi wãwen jejela bwe mõtõn jidrik Jeova enaj kajejit kitien iroij potata eo an?

• Ekkar ñõn 1 Dri Korint 10:13, etke jemaroñ drebij wõt ar tiljek ñõn Jeova?

[Kajitõk ko ñan katak]

[Pija ilo peij 24]

Setan ear kabo Adam im Iv bwe ren jab tiljek ñõn Jeova

[Pija ilo peij 26]

Kwon kate wõt yuk ñõn jurake iroij potata eo an Jeova