Jehovällam Ciëlochö y Patsachö Autoridadnintsikqa

“Ciëlochö y Patsachö Autoridadyoq Teyta Jehovämi tsapämaqnïqa.” (SAL. 73:28.)

1. ¿Imapaqtaq apóstol Pablu parlëkarqan 1 Corintios 7:31 textochö?

“KEY mundoqa mana kaqnowllam pasarin.” (1 Cor. 7:31, QKW.) Santo espíritu yanapaptinmi, apóstol Pablu musyarqan kë Patsachö imëkapis raslla pasarinqanta.

2, 3. a) Jehoväpa Autoridadninta mana allipaq churayanqanta musyanapaq, ¿ima igualatsikïtaq yanapamantsik? b) ¿Ima tapukïkunapitataq yachakushun?

² Kanan witsanqa kawëkantsik huk actuacionta rurëkaq cuentam, y kë actuacionqa rikätsikun Jehovälla Ciëlochö y Patsachö Autoridad kanqantam. Këqa huk nacionchö nunakuna ishkë grüpoman rakikëkur chikinakuyanqannömi. Huk kaq grüpochömi tsë nacionta dirigeq gobierno këkan, y huknin grüpochönam maqakoq, ulikoq y hasta wanutsikoq nunakuna këkäyan. Kënö mana alli nunakunaqa autoridadkunapa contranmi kayan, y tsë alli gobiernopitam nunakunata rakikätsita tïrayan.

³ ¿Imanirtaq ciëlochöpis y Patsachöpis tsënöllam pasëkan nintsik? Tsëtaqa nintsik ciëlochö y Patsachöpis Jehovälla rasumpa kaq Gobierno kanqanta musyarmi (Sal. 71:5). Hinamampis nunakunataqa hipatsin Satanás y yanapaqninkunam (1 Juan 5:19). Satanás diriginqan grüpochö këkaqkunam Jehoväpa Gobiernompa contran karnin, tukïta rurayan y Jehoväpita nunakunata rakikätsita tïrayan. ¿Imanöpataq këqa qallarqan? ¿Imanirtaq kënö kananta Jehová rikaran? ¿Pimanraq noqantsikqa qaqäshun?

¿Imakunataq más preciso tsë actuacionchöqa?

4. ¿Imatataq tsë actuacionqa rikätsimantsik?

⁴ Tsë actuacionqa rikätsikun Jehovälla Ciëlochö y Patsachö Autoridad kanqanta, y nunakuna Jehoväta shonqupita patsë serviyanqanta o mana serviyanqantam. Bibliaqa atska kutim parlan Jehovälla “Ciëlochö y Patsachö Autoridad” kanqanta. Tsëmi Jehoväman alläpa markäkurnin, Salmosta qellqaq kënö nirqan: “Ciëlochö y Patsachö Autoridadyoq Teyta Jehovämi tsapämaqnïqa” (Sal. 73:28). Ciëlochö y Patsachö Autoridadyoq nirqa, rikätsimantsik pëlla llapan hanampa Mandakoq kanqantam. Tsëmi, Ciëlochö y Patsachöpis Autoridadmi nintsik. Awmi, Alläpa Puëdeq Diosnintsikllatam tsënöqa reqintsik (Dan. 7:22).

5. ¿Imanirtaq Jehovälla Mandakoq kanqanman qaqänantsik?

⁵ Jehovällam llapantapis kamashqa, tsëmi Ciëlochö y Patsachöpis pëlla Mandakoq (lei  Apocalipsis 4:11). Hinamampis kikinllam Leyta churan, justiciata ruran y mandakunqantapis cumplitsin (Isa. 33:22). Kamamaqnintsik kaptinmi, Mandamaqnintsiktanö rikänantsik y pëman qaqänantsik. Këta ruranapaqqa yanapamäshun këchö ninqanta yarpanqantsikmi: “Kikin Jehovämi hana ciëlochö alli patsätsishqa gobernamunampaq täkunanta, y llapampa hanampam gobernëkan” (Sal. 103:19; Hech. 4:24).

6. ¿Imanötaq Jehovällapaqna kawanqantsikta rikätsikuntsik?

⁶ Jehová Dioslla Gobernamaqnintsik kanqanta rikätsikunapaqqa pëllapaqmi kawanantsik. Pero ¿imanötaq Jehovällapaqna kawëqa? Jehovällapaqna kawanqantsiktaqa rikätsikuntsik Job kawanqannö kawarmi, limpio kawakurnin, alli kaqta rurarnin y Diosta sirvenqantsikchö alli tsarakurmi (Job 1:1).

Actuación qallarin

7, 8. ¿Imata rurartaq Satanasqa Jehoväpa Autoridadnimpa contran churakarqan?

⁷ Hoqta waranqa watakunanam pasarishqa huk ángel Jehoväpa contran churakanqampita. Parlanqanwan y ruranqanwanmi Jehová Autoridad kanqanta mana alliman churarqan. Tsëtaqa rurarqan kikin adorashqa këta munëwanmi. Tsëmi Adantawan Ëvata Diospa Autoridadnimpa contran churakätsirqan. Hina, Jehoväqa ulikunmi o llullakunmi nirninmi Diospa shutinta rakchatëta tïrarqan (lei Génesis 3:1-5 *). Kë mana wiyakoq angelmi Diospa chikeqnin tikrarirqan. Kananqa tsë angeltam reqintsik Satanás, Diablu, hatungarë culebra y hatun dragón nishpa, kë shutikunaqa rikätsikun tumpakoq, chikikoq, ulikoq y wanutsikoq kanqantam (Apo. 12:9).

⁸ Jehová Gobernante këkaptinmi, Satanasqa chikikoq gobernante këman chärirqan. Gobiernompa contran churakëkaptinqa, ¿imataraq Jehová ruranman karqan? ¿Tsë höratsuraq Satanasta, Adanta y Ëvata ushakäratsinman karqan? Kimanta ushakätsïtaqa puëderqanmi. Y tsëta rurarqa Alläpa Puëdeq kanqantam rikätsikunman karqan. Hina mana ulikoq kanqantapis Jehoväqa rikätsikunmanmi karqan, pëqa, Adantawan Ëvata willarqanmi mana wiyakurqa wanuyänampaq kaqta. Tsëqa, ¿imanirtaq tsëta rurarqantsu?

9. ¿Imapitataq Satanasqa mana allita parlarqan?

⁹ Ulikïninwanmi Satanasqa Adantawan Ëvata Jehoväpita rakikäratsirqan. Tsënö uliparninmi rikätsirqan Diosta mana wiyakurnin kikinkunapa munëninkunata rurarnin más alli kawakuyänampaq kaqta. Hinamampis Jehoväpa contran Adantawan Ëvata churarmi, ciëlochö y Patsachö sirveqninkuna imatapis tarïta munarlla Diosta serviyanqanta tumparqan. Tsëwanqa Diablu rikätsikïta munarqan pï mëtapis Jehoväpita rakikätsita puëdenqantam, tsëta rikätsikunanrëkurmi Jobta pruëbaman churarqan, pero pëqa Jehovälla Mandakoq kanqanmanmi qaqarqan (Job 2:1-5).

10. ¿Imanirtaq Jehoväqa contran churakaqkunata hinan hora wanuratsirqantsu?

¹⁰ Jehová tsë hora Satanasta mana wanutsirmi, tsë parlanqan rasumpa o mana rasumpa kanqantapis rikätsikunampaq haqirqan. Hinamampis, nunakunatam tiempota qoshqa Jehovällata Mandakoqninkunatanö akrayänampaq o mana akrayänampaqpis. Y, ¿imataq rikakushqa watakuna pasanqanman? Alläpa mana allita ruraq nunakuna, y kallpasapa demoniokuna Satanaspa makinchö këkäyanqanmi. Pero Diosqa ichikllachönam Satanasta y yanapaqninkunata ushakätsinqa, tsënöpam rikätsikunqa Pëlla Ciëlochö y Patsachöpis rasumpa Mandakoq kanqanta. Tsënö kanampaq kaqtaqa Jehová qallanampitanam musyarqan. Tsëta musyarmi nuna hutsaman ishkiriptinlla tsënö pasakunampaq kaqta willakurqan (Gén. 3:15).

11. ¿Imanötaq Jehovälla Gobernaq kanqanta atskaq nunakuna rikätsikuyashqa?

 ¹¹ ¿Imanötaq atskaq nunakuna Jehoväman markäkuyanqanta y pëllapaq kawayanqanta rikätsikuyashqa? Jehovälla Ciëlochö y Patsachöpis Autoridad kanqanman churakarnin, y shutinta respetarninmi. Llapan shonqunkunapita sirveqkunachöqa këkäyan Abel, Enoc, Noe, Abrahan, Sara, Moises, Rut, David, Jesus, punta cristiänokuna y kanan witsan cristiänokunapis. Pëkunam rikätsikuyashqa Satanás ulikoq kanqanta. Satanasqa llapan nunakunatam Diospita rakishaq nirmi, Diospa shutinta rakchatashqa, tsë shuti limpiakänampaqmi kë nunakunaqa yanapakuyashqa (Pro. 27:11).

Actuacionqa alliwanmi usharinqa

12. ¿Imanöpataq musyantsik Jehová ichikllachöna mana allikunata ushakäratsimunanta?

¹² Ichikllachönam Jehoväqa rikätsikunqa pëlla Patsachö y Ciëlochöpis Gobernaq kanqanta. ¿Imanirtaq tsënö kananman markäkuntsik? Musyanqantsiknöpis, pëqa manam alläpa tiempopaqa mana allikunata rikarëta puëdentsu. Hinamampis ushanan tiempokunachönam kawëkantsik. Y Pëqa puntatapis ushakätsirqanmi mana allita ruraq nunakunata. Tsënömi rurarqan Noëpa tiemponchö tamyawan nunakunata ushakätsirnin, Sodoma y Gomorra markakunata ushakätsirnin y Faraontawan tröpankunata ushakätsirninmi. Hina Sïsarapa tröpankuna, ni Asiriapa gobernanten Senaqueribpa tröpankunapis manam Jehoväpa piñakïnimpitaqa salvakuyarqantsu (Gén. 7:1, 23; 19:24, 25; Éxo. 14:30, 31; Jue. 4:15, 16; 2 Rey. 19:35, 36). Awmi, Jehoväqa mananam rikaranqanatsu shutinta mana alliman churayänanta, ni Testïgonkunata chikirnin qatikachäyänanta. Ichikllanam pishin kë llapanta ruramunampaq. ¿Imanirtaq tsëtaqa nintsik? Pasakïkanqankunam rikätsikun Jesus këchöna këkanqanta y mana alli nunakunapa ushakënimpis këllachöna kanqanta (Mat. 24:3).

13. ¿Imatataq rurashwan Jehoväpa chikeqninkunawan ushakëta mana munarqa?

¹³ Jehoväpa chikeqninkunawan ushakëta mana munarqa, Jehovälla Gobernamaqnintsik kanqantam rikätsikunantsik. Pero ¿imanötaq tsëtaqa rurashwan? Satanaspa yanapaqninkunawan mana takukarnin y pëkunata mana mantsarninmi (Isa. 52:11; Juan 17:16; Hech. 5:29). Tsëta rurarllam rikätsikushun Dioslla Ciëlochö y Patsachöpis Autoridad kanqanta. Y kikin Jehová shutinta limpioyätsir, y pëlla Mandakoq kanqanta rikätsikur mana allikunata ushakätsiptimpis salvakushunmi.

14. ¿Imakunapaqtaq Biblia willakun?

¹⁴ Bibliachöqa Jehovälla Gobernaq kanqampita y nunakuna Jehoväta shonqupita patsë serviyanqampita y mana serviyanqampitapis parlanmi. Qallanan kima capïtulochömi parlan Diosnintsik llapan kamanqampita y hutsa imanö qallanqampita. Y ushanan kima capïtulokunanam parlan nunakunata hutsannaq këman Diosnintsik chätsinampaq kaqta. Wakin capïtulokunanam rikätsimantsik nunakunapaq, Patsapaq y llapan kamanqampaq munanqan cumplikänampaq Diosnintsik tukïta ruranqampita.  Imanömi Génesis libro Satanás ruranqampita y mana alli rurë imanö qallanqampita willakun, tsënöllam Apocalipsis libropis willakun Diabluta y mana allikunata Dios imanö ushakätsinampaq kaqta. Hina willakunmi ciëlochö Diospa munënin rurakanqannö kë Patsachöpis rurakänampaq kaqta. Awmi, Bibliaqa willakunmi imanöpa hutsawan wanï qallanqanta, hina willakunmi kë Patsachö alli nunakuna mana wanushpa kushishqa kawakuyänampaq y hutsawan wanï imanö ushakänampaq kaqtapis.

15. Jehovälla Autoridad kënimpaq actuación ushariptin, ¿imataraq rurashwan bendicionkunata chaskinapaq?

¹⁵ Kë mundochö llapan pasakïkanqanqa ichikllachönam usharinqa. Ciëlochö y Patsachö Autoridad Jehová kanqanta rikätsikoq actuacionqa ushakärinqanam. Y Satanastam tsë actuacionpita Jehová qarqurinqa y tiempowannam ushakäratsinqa. Tsënöpam Diospa munënin cumplikärishqa kanqa. Tsëchö kushishqa kawanapaq y bendicionkunata chaskinapaqqa, kanampitanam Jehoväman qaqänantsik. Manam ishkë diostaqa servita puëdentsiktsu. Pero Jehoväwan këkarqa, “Jehovämi noqawan këkan” nishunmi (Sal. 118:6, 7).

Jehovällapaq kawëta puëdentsikmi

16. ¿Imanöpataq musyantsik Diosllapaq kawëta puëdenqantsikta?

¹⁶ Jehovällapaq kawëta y pëlla Autoridad kanqanman qaqëtaqa puëdentsikmi, tsëmi apóstol Pablupis këta qellqarqan: “Llapantsicpaqpis imallapis siemprim jutsaman ishquitsicoq canqa. Peru Teyta Diosnintsicman marcäcushqaqa musyanmi meyaqlla awantanantsicpaq caqta. Tsemi tentasion chacaramuptinpis, yanapecamäshun imanopapis mana ishquinantsicpaq” (1 Cor. 10:13). ¿Pablu parlëkanqan tentacionqa mëpitataq shamun, y imanötaq Diosqa yanapamäshun?

17-19. a) ¿Ima hutsa rurëmantaq israelïtakuna desiertochö ishkiyarqan? b) ¿Imanirtaq Jehovällapaq kawëqa sasatsu o ajatsu?

¹⁷ Desiertochö israelïtakuna pasayanqannömi, Pablu parlanqan tentacionkunaqa shamun mana pensanqantsik hörakunachö (lei 1 Corintios 10:6-10). Israelïtakunaqa hutsaman ishkïpita tsarakuyanmanmi karqan, pero pëkunaqa masta munëwanmi ‘mana alli rurecunaman’ ishkiriyarqan. Këqa pasakurqan ëtsanäyaptin codornizta huk killapa mikuyänampaq Jehová qarëkuptinmi. Atska tiempopana ëtsata mana mikurpis, maná mikïwanqa imëpis pacha huntam këkäyarqan. Pero pëkunaqa imëpis mana mikoqnömi kë codornizkunata alläpa atskata ëllukïkuyarqan (Núm. 11:19, 20, 31-35).

¹⁸ Hina Moises Leyta chaskinqan witsampis israelïtakunaqa huk becërrota adorëmanmi churakäriyarqan, y warmiwampis ollquwampis rakchakunata rurëmanmi ishkiriyarqan. Kë hutsakunamanqa raslla ishkiriyarqan pëkunawan pushaqninkuna mana këkaptinmi (Éxo. 32:1, 6). Hinamampis Jehová awnikunqan Patsaman yëkuyänampaq ichikllana pishikaptinmi, atska waranqa ollqukuna moabita warmikuna shumaq parlapäriyaptin pëkunawan punukïkuyarqan, y tsëta rurayanqampitam wanuyarqan (Núm. 25:1, 9). Hina imallapis pishiriptinqa mana allipanam parlakïkäyaq. Huk kutinäqa manam Moisespa contranllatsu parlayarqan, sinöqa Jehoväpa contrampis parlayarqanmi (Núm. 21:5). Hasta mana alli portakoq Corëta, Datanta y Abiramta Jehová ushakätsinqampitapis mana allitam parlayarqan. Tsërëkurmi wanuyarqan Jehoväpa piñakïninwan 14.700 nunakuna (Núm. 16:41, 49).

¹⁹ Kë tentacionkunapitaqa tsarakuyanmanmi karqan. Pero pëkunaqa hutsaman ishkiyarqan Jehoväman mana markäkur, pë ruranqankunata qonqashqa kar y mandakunqankunata mana wiyakurmi. Hinamampis tsë tentacionkunaqa unë y kanan nunakunapis pasayanqannöllam karqan. Tsëmi, tsënö hutsakunaman noqantsik mana ishkinapaqqa, Jehoväpa yanapakïninta mañakunantsik. Y pëqa yanapamäshunmi, “meyaqlla awantanantsicpaq” kaqtapis musyarnin. Teyta Diosnintsikqa manam imëpis haqimäshuntsu, ni manam mana tsarakïpaqnö pruëbaman chänataqa permitenqatsu (Sal. 94:14).

20, 21. ¿Imanötaq Dios yanapamantsik tentacionman mana ishkinapaq?

 ²⁰ ¿Imanöraq Jehová yanapamäshun ‘tentasion chacaramuptin’? Tsarakunapaq kallpata qomarnintsikmi. Chikikoqkuna rurayanqanman yarpärishun. Chikimaqnintsikkunaqa itsa tukïta rurëkamashwan Diosnintsikta haqinarëkur. Y maqamänata, hipatsimänata y wanutsimänata mana munar itsa Jehoväta haqirishwan. Pero 1 Corintios 10:13 textochö Pablu ninqannöpis, tsë hipakïkunaqa huk tiempollam kanqa. Jehoväqa manam haqinqatsu markäkïnintsik ushakanqanyaq pruëbakuna kanantaqa. Pëqa yanapamäshunmi alli tsarakunapaq, pë munanqannö kawakunapaq y markäkïnintsik mana ushakänampaq.

²¹ Jehoväqa alli tsarakunapaqmi santo espïritunwan yanapamantsik. Hina tsë espïritunwanmi tentacionkunaman mana ishkinapaq textokunata yarpätsimantsik (Juan 14:26). Tsënöpam mana alli rurëkunaman ishkishuntsu. Musyantsikmi Jehovälla Ciëlochö y Patsachö Autoridad kanqampita y nunakuna Jehoväta shonqupita patsë serviyanqampita Satanás mana allikunata parlanqanta. Këta musyarmi y Dios yanapaqtinmi atskaq cristiänokuna wanuyanqanyaq tsarakuyashqa. ¿Pëkunaqa wanur-raqtsuraq tentacionkunapita librakäyarqan? Manam, Jehovämi hutsakunaman mana ishkiyänampaq yanaparqan. Llapantsiktapis Jehoväqa yanapamantsikllam. Awmi, angelninkunawanmi yanapamantsik, “pecunataqa Diosmi cachamushqa, salbasionta erensiatano chasquiyänanpaq caq nunacunata yanapananpaq” (Heb. 1:14). Qateqnin artïculochömi yachakushun llapan kawënintsikchö Dioslla Mandakoq kanqanta rikätsikïta puëdenqantsikta. Pero tsëtaqa rurashun imëpis pëllapaq kawarnin y Patsachö Ciëlochöpis Jehovälla Mandakoq kanqanta rikätsikurninmi.

[Päginapa ura kuchunchö willakï]

Yarpärishun

• ¿Imanirtaq respetanantsik Jehovälla Ciëlochö y Patsachöpis Autoridad kanqanta?

• ¿Ima ninantaq Jehovällapaq kawëqa?

• ¿Imanötaq musyantsik Jehová Autoridad kanqanta kikin rikätsikunampaq kaqta?

• ¿Imanötaq 1 Corintios 10:13 rikätsimantsik llapantsikpis Diosta servirnin tsarakunapaq kaqta?

[Yachakunapaq kaqpa tapukïninkuna]

[24 kaq päginachö dibüju]

Satanasmi Adantawan Ëvata Jehoväpita rakirirqan

[26 kaq päginachö dibüju]

Jehovälla Ciëlochö Patsachöpis Autoridad kanqantam imëpis rikätsikunantsik