Jehová Diosqa Ancha Hatun Kamachikuqninchismi

“Ancha Hatun Diosqa [...] teqsimuyuntinpi atiyniyoq reymi.” (SAL. 47:2.)

1. ¿Imamantan apóstol Pablo rimasharqan 1 Corintios 7:31 textopi?

APÓSTOL Pablon nirqan: “Kay pachaq imaynachus kasqan rikusqanchisqa tukukapuqllan”, nispa (1 Cor. 7:31.) Chay nisqanwanmi Pabloqa qhawarichisharqan kay pachapi imakunachus kasqanqa huknirayman tukupushasqanta.

2, 3. a) ¿Ima rikch’anachiywanmi entiendenchis Jehová Diospa Gobiernon contra churapakusqankuta? b) ¿Ima tapuykunatan t’aqwisun?

² Kay tiempopiqa llapa runakunan rikuchishanchis Jehová Dios derechonpichus kashan kamachinanpaq icha manachus chayta. Chayqa rikch’akun huk nacionpi iskay t’aqa runakunaq ch’aqwaypi kasqankuwanmi. Huk lado t’aqan chay nacionpi allin kamachiqta yanapaqkuna, huk lado t’aqataq imaymana mana allin ruwaq millay runata yanapaqkuna. Chay t’aqaqa gobierno contra hatarispan chay nacionpi tiyaq runakunata kallpachan kamachiqninkuta mana kasukunankupaq.

³ Teqsimuyuntinpipas chay rikch’anachiypi hinan sucedeshan. Hukllan allin kamachiqninchisqa, paymi Ancha Hatun ‘Señor Diosninchis’ Jehová (Sal. 71:5). Kallantaqmi huk millay kamachikuqpas, paymi Satanás (1 Juan 5:19). Satanaspa kamachisqan t’aqan Diospa Gobiernon contra hatarin, tukuy atisqankutataq ruwanku Ancha Hatun Kamachikuqninchista ama kasukunanchispaq. ¿Imaynapin chaykuna qallarirqan? ¿Imanaqtinmi Jehová Dios chayta hinallata qhawashan? ¿Imatan sapankanchis ruwasunman?

¿Imakunatan iskayrayachikurqan?

4. ¿Imakunatan iskayrayachikurqan?

⁴ Diospa contrapi hatariqmi iskayrayachirqan Jehová Dioslla kamachinanpaq derechoyoq kasqanta, runakunapas Diospaq hunt’aq sonqo kanankutawan. Bibliaqa sut’itan rikuchin Jehová Diosqa Ancha Hatun Kamachikuqninchis kasqanta. Salmo takita qelqaqmi khaynata nirqan: “Ancha Hatun Diosqa [...] teqsimuyuntinpi atiyniyoq reymi”, nispa (Sal. 47:2). Ancha Hatun Diosqa chay hinata ninanchispaq hinapunin (Dan. 7:22).

5. Jehová Diosllan Ancha Hatun Kamachikuqninchisqa, ¿imanaqtinmi chay hinata qhawarinanchis?

⁵ Jehová Diosqa tukuy imaymanata kamasqanraykun kay pachapipas hanaq pachapipas Ancha Hatun Kamachikuq (leey Apocalipsis 4:11). Chaymantapas payqa Juezninchis, kamachikuykunata Qowaqninchis, Reyninchis  iman (Isa. 33: 22). Diosmi kamawarqanchis payraykun kawsashanchis, chaymi paylla Ancha Hatun Kamachikuqninchisqa. Chay hinata qhawarinanchispaqmi yuyarinanchis Salmo taki qelqaqpa nisqanta, paymi nirqan: “Señor Diosmi hanaq pachapi kamachikuy tiyananta churarqan, hinantin pachakunatataq kamachishan”, nispa (Sal. 103:19; Hech. 4:24).

6. ¿Imaynatan rikuchisunman tukuy sonqomanta Diosta kasukusqanchista?

⁶ Jehová Dioslla Ancha Hatun Kamachikuqninchis kasqanta rikuchinanchispaqqa tukuy sonqomantan payta kasukunanchis. Chaypaqqa Job hinan tukuy mana allin kaqmanta t’aqakunanchis, chhaynapi ch’uyata mana huchachanata kawsananchispaq (Job 1:1).

¿Imaynatan Diospa contranpi hatarirqanku?

7, 8. ¿Imaynatan Satanás iskayrayachirqan Jehová Dioslla kamachinanpaq derechoyoq kasqanta?

⁷ Soqta waranqa wata ñawpaqta hinan huk espíritu Jehová Diospa contranpi hatarirqan, paymi iskayrayachirqan Dioslla kamachinanpaq derechoyoq kasqanta. Chaytaqa ruwarqan payta yupaychanankuraykun. Chaymi Adanta Evatawan kallpacharqan Ancha Hatun Kamachikuqninku contra sayarinankupaq. Chaymantapas llullata hina qhawarichispan Jehová Diospa sutinta qhellichayta munarqan (leey Génesis 3:1-5). Chhaynapin chay millay espirituqa Diospa enemigonman tukupurqan. Paytan sutichakun: ‘Hatun dragón, mach’aqway, Saqra, Satanás’, nispa; chay sutikunan qhawarichin hukpa contranpi churakuq, tumpaq, q’otuq, millp’uq kasqanta (Apo. 12:9).

⁸ Satanasqa Diospa Gobiernon contran churapakurqan. ¿Imatan Jehová Dios ruwanman? ¿Kaq ratochu wañuchipunman Adanta Evatawan kuska? Diospaqqa manan sasachu karqan kinsantinkuta ch’usaqman tukuchiy, chhaynapin rikuchinman karqan tukuy atiyniyoq Dios kasqanta, rimasqanman hina ruwaq kasqantapas, payqa sut’itan nirqan kamachikuyninkunata p’akiqtinkuqa wañunankuta. Chhaynaqa ¿imanaqtinmi mana wañuchirqanchu?

9. ¿Imakunatan Satanás iskayrayachirqan?

⁹ Satanasqa llullakuspan Adanta Evatawan Kamaqninkumanta t’aqarqan. Chhaynapin payqa iskayrayachirqan Jehová Dioslla runakunata kamachinanpaq derechonpi kasqanta. Chaymantapas ñawpa tayta-mamanchistan kallpacharqan Diospa contranpi hatarinankupaq chaywanmi iskayrayachillarqantaq runakunaqa tukuy sonqowan Diosta kasukunankuta. Saqran nirqan: “Faciltan llapa runatapas Diosmantaqa t’aqayman”, nispa. Chaymi qhepa tiempoman Jobta Diosmanta t’aqayta munarqan, paymi ichaqa hunt’aq sonqo Diospaq karqan (Job 2:1-5).

10. ¿Imanaqtinmi Jehová Dios mana kaq ratochu wañuchirqan contranpi hatariqkunata?

¹⁰ Mana kaq ratochu wañuchispan Diosqa Satanasman tiempota qorqan tumpasqan cheqaqpunichus karqan chayta rikuchinanpaq. Chaymantapas chay tiempopin runakunaqa Diosman rikuchiyta atinkuman tukuy sonqowan servisqankuta. ¿Iman sucederqan tiempoq pasasqanman hina? Satanasmi kay pachapi imaymana mana allin kaqkunata rikhurichirqan. Diosmi ichaqa chinkachipunqaña Satanasta tukuy kaqninkunatawan, chhaynapin rikuchinqa paylla Ancha Hatun Kamachikuqqa kasqanta. Payqa yacharqanñan atipananta, chaymi Edén huertapi pay contra hatariqtinkupacha chayta willarqan (Gén. 3:15).

11. ¿Imaynatan askha runakuna rikuchirqanku Jehová Dioslla Ancha Hatun Kamachikuq kasqanta?

¹¹ Askha runakunan Diosta tukuy sonqonkuwan servispa rikuchirqanchu paylla Ancha Hatun Kamachikuqqa kasqanta sutinta ch’uyapaq qhawarisqankutapas. Paykunamantan wakin karqanku: Abel, Enoc, Noé, Abraham, Sara, Moisés, Rut, David, Jesús, hinallataq apostolkunaq tiemponmanta kay tiempomantapas askha cristianokuna. Paykunaqa tukuy sonqo Diosta kasukusqankuwanmi rikuchirqanku Satanasqa llulla kasqanta, chhaynapin Diospa sutinta ch’uyapaq qhawarichirqanku (Pro. 27:11).

 Jehová Diosqa atipanqapunin

12. ¿Imanaqtinmi mana iskayrayananchischu Jehová Dios mana allin kawsayta tukuchipunanmantaña?

¹² Jehová Diosqa rikuchinqañan paylla kamachinanpaq derechoyoq kasqanta. Chaymantaqa manan iskayrayananchischu. Payqa manan wiñaypaqchu hinallata qhawanqa kay pachapi mana allin kawsay kananta. Tukukuy tiempopiñataqmi kawsashanchispas. Chaymantapas Diosqa ch’usaqyachirqanñan contranpi hatariqkunata. Chaytan ruwarqan Millp’uq Para Unuta kachaykamuspa, Sodoma Gomorra llaqtakunata thunichispa, faraonta ejercitontawan wañuchispa. Paytaqa manan atipayta atirqankuchu Sisaraq ejercitonpas, Asiria rey Senaqueribpa soldadonkunapas (Gén. 7:1, 23; 19:24, 25; Éxo. 14:30, 31; Jue. 4:15, 16; 2 Rey. 19:35, 36). Diosqa manan wiñaypaqchu qhawanqa sutinta sarunchanankuta Testigonkunata ñak’arichinankutapas. Yachanchismi Cristoqa hanaq pachapi kamachishasqantaña kay millay tiempopas tukukapunanpaqña kashasqanta, chaymi Diosqa atipanqaña (Mat. 24:3).

13. ¿Imatan ruwananchis millay runakunawan kuska mana wañunanchispaq?

¹³ Millay runakunawan kuska mana wañuyta munaspaqa tukuy sonqon kasukunanchis Ancha Hatun Kamachiqninchista. ¿Imaynatan chayta ruwasunman? Kay pachapi Satanaspa mast’arisqan ruwaykunamanta karunchakuspanchismi, manataqmi runankunatapas kasunanchischu Diospa munayninta ruwananchispaq hark’awaqtinchis (Isa. 52:11; Juan 17:16; Hech. 5:29). Chayta ruwaspallan rikuchisun Dioslla kamachiwananchispaq derechoyoq kasqanta, manataq wañusunchu sutinta ch’uyanchaspa Satanaspa kaqninkunata tukuchipuqtinpas.

14. ¿Imamantan sut’ita Bibliapi willakushan?

¹⁴ Bibliaqa willanmi imaynata Diospa contranpi hatarisqankumanta, imaynata chay allichakunanmantawan. Qallariypi kinsa capitulokunan willashan Diospa imaymana kamasqanmanta, imaynata hucha qallarisqanmantawan. Tukuyninpi kinsa capitulokunan rimashan kay pachapi runakuna kusisqa kawsanankumanta. Wakin capitulokunataq willashan imakunata Jehová Dios ruwarqan kay pachapi hanaq pachapipas munayninta hunt’ananpaq chayta. Génesis libroq qallariyninpin willashan kay pachapi Satanaspa mana allin kawsay qallarichisqanmanta, Apocalipsis libroq tukuyninpitaq willashan imaynata Jehová Dios kay pachamanta mana allin kawsayta Satanastapas chinkachinanmanta, kay pachapi hanaq pachapi hina munayninta ruwananmantawan. Rikusqanchis hina, Bibliaqa sut’itan willan imaynata huchapas wañuypas qallarisqanmanta, imaynata chaykuna chinkapunanmantawan, chhaynapi Diosta tukuy sonqonkuwan serviqkuna wiñaypaq kusisqa kay pachapi kawsanankupaq.

15. ¿Imatan ruwananchis hamuq tiempopi kusisqa kawsananchispaq?

¹⁵ Pisi tiempollamantañan sut’ita yachakunqa Jehová Dioslla kamachinanpaq derechoyoq  kasqanta. Manañan Satanasqa kay pachapi munaychakunqachu, chaymantataq wiñaypaq chinkachisqa kapunqa. Chhaynapin Diosqa atipanqa. Sichus chaymanta kusikuyta munanchis, mosoq pachapipas kusisqa kawsayta chayqa, Satanaspa gobiernonta qhepanchaspan Ancha Hatun Kamachikuqninchista kasukunanchis. Paypa ladonmanta kaspallan nisunchis: “Señor Diosqa ñoqawanmi kashan”, nispa (Sal. 118:6, 7).

Diospaq tukuy sonqo kasun

16. Runakunaqa atisunmanmi Diospaq hunt’aq kayta, ¿imaynapin chayta yachanchis?

¹⁶ Atisunmanmi Diosta tukuy sonqowan serviytaqa, apóstol Pablon qelqarqan: “Qankunaqa manan wak pruebatachu muchunkichis, aswanpas llapa runaq muchusqanta hinallan. Chaywanpas Diosqa hunt’aqpunin. Maykamachus pruebata muchuwaqchis chaykamallan Diosqa probachisunkichis, chaypin kallpachasunkichis qaqata sayanaykichispaq, ahinapin chaymanta lloqsinkichis”, nispa (1 Cor. 10:13, Edición 1988). ¿Ima pruebamantan Pablo rimasharqan? ¿Imaynatan Jehová Dios yanapawanchis chayta atipanapaq? Chaymantan yachasunchis.

17-19. a) ¿Ima mana allinkunamanmi Israel runakuna urmarqanku? b) ¿Imaraykun mana sasachu Jehová Diosta hunt’aq sonqowan serviy?

¹⁷ ¿Imaynapin pruebakunapi tarikusunman? Mana allin kaqkunata munapayaymi sonqonchista aysanman Diospa kamachikuyninkunata p’akinanchispaq, imaynan ñawpa tiempopi Israel runakunapas ruwarqanku hinata (leey 1 Corintios 10:6-10). Paykunaqa atinkumanmi karqan pruebakuna atipayta, ichaqa “mana allin kaqkunata” munapayaspan huchallikurqanku. Chaytan ruwarqanku Jehová Dios milagrota ruwaspa killantin mikhunankupaq yuthukunata qoqtin. Unay tiempoña aychata mana mikhurqanchu chaypas, allin alimentaq maná nisqa mikhunatan mikhurqanku. Ichaqa yuthukunata mana atinankukama askhallataña hap’ispankun rikuchirqanku mana allin kaqta munapayaq kasqankuta (Núm. 11:19, 20, 31-35).

¹⁸ Chay ñawpaqtapas Sinaí orqopi Moisés Diospa kamachikuyninkunata chaskishaqtinmi Israel runakunaqa qori torillota yupaychaspanku aycha kusirikuyman qokurqanku. Chaymanqa urmarqanku umalliqninku Moisés mana paykunawanchu kashasqanraykun (Éxo. 32:1, 6). Qhepamanpas Prometesqa Hallp’aman haykunankupaqña kashaspankun askha qharikuna Moab suyu warmikunawan sonqonkuta suwachikuspanku qhelli huchaman urmarqanku, chaymi Diosqa paykunata wañuchirqan (Núm. 25:1, 9). Hinaspapas Israel runakunaqa nishutan Moisés contra rimapakurqanku, huk kutinqa Jehová Dios contra imaraqmi rimapakurqanku (Núm. 21:5). Coreta, Datanta, Abiramta huk rimapakuq runakunatawan Diospa wañuchisqantapas mana allinpaq qhawarispankun nishuta rimapakurqanku, chaymi 14.700 wañurqanku (Núm. 16:41, 49).

¹⁹ Israel runakunaqa chay pruebakunatan mana atiparqankuchu Diospi manaña iñipusqankurayku, qonqapurqankun paykunarayku Jehová Diospa imaymana ruwasqanta, chanin kamachikuyninkunatapas. Chay pruebakunaqa manan runakunaq mana atipananpaq hinachu karqan, chhaynallataqmi kay tiempopi pruebakunapas. Diospa yanapayninta mañakuspa kallpachakusun pruebakunata atipananchispaq chayqa, hunt’aq sonqon Jehová Diospaq kasun. Diosqa yachanmi  “maykamachus pruebata muchuyta” atisunman chayta. Payqa manan hayk’aqpas dejanqachu mana atinanchiskama pruebakunapi tarikunanchistaqa (Sal. 94:14).

20, 21. ¿Imaynatan Jehová Dios yanapawanchis pruebakunata atipananchispaq?

²⁰ Jehová Diosqa ‘kallpachawasunmi’ pruebakunata atipananchispaq. Qatiykachasqa kaqtinchisqa nishu mana allintapaschá enemigonchiskuna tratawasun iñiyninchispi pisipachiwananchisrayku. Yaqapaschá maqachikuyta manchakuspa, ñak’ariyta wañuytapas mana munaspa Jehová Dios serviyta saqepuyta munasunman. Ichaqa yuyarinanchismi 1 Corintios 10:13 textopi apóstol Pabloq nisqanta, pruebakunaqa manan wiñaypaqchu kanqa. Jehová Diosqa manan dejanqachu iñiyninchispi pisipananchiskama muchunanchista. Payqa kallpachawasunpunin paypaq hunt’aq kananchispaq.

²¹ Jehová Diosqa espiritunwanmi kallpata qowanchis. Chay espiritullawantaqmi yanapawanchis Bibliaq yachachikuyninkunata yuyarispa pruebakunata atipananchispaq, chhaynapi kamachikuyninkunata kasukushanallanchispaq (Juan 14:26). Yachanchismi Dioslla kamachinanpaq derechoyoq kasqanta, runakunapas Diospaq hunt’aq sonqo kasqankutawan iskayrayachikusqanta. Chaykunata yachaspa Diospa yanapayninwan iman askha cristianokuna atirqanku wañupunankukama Diospaq hunt’aq kayta. Paykunaqa manan wañupuspachu chay pruebakunata atiparqanku, aswanpas Jehová Diospa yanapayninwanmi. Kay tiempopipas Jehová Diosqa chhaynallatataqmi yanapawanchis, angelninkunawanmi kallpata qowanchis, paykunan “kamachi ruwaq espiritukuna kanku, qespikuyta chaskiqkunaq allinninpaq yanapaqta kachamusqakuna” (Heb. 1:14). Ancha Hatun Kamachikuqninchista wiñaypaq kasukuyqa kusikunapaqmi kanqa, chaymi kunanmanta kallpachakunanchis tukuy sonqonchiswan kasukunanchispaq, qatimuq estudiopin chaymanta yachasunchis.

¿Imaynatan kutichisunman?

• Jehová Diosllan Ancha Hatun Kamachikuqninchisqa, ¿imanaqtinmi chay hinata qhawarinanchis?

• ¿Imaynatan rikuchisunman Diosta tukuy sonqowan kasukusqanchista?

• Diosqa rikuchinqañan paylla kamachinanpaq derechoyoq kasqanta, ¿imaynatan chayta yachanchis?

• ¿Imaynatan 1 Corintios 10:13 texto rikuchin Diospaq hunt’aq sonqo kay atisqanchista?

[Tapuykuna]

[24 paginapi dibujo]

Adantawan Evatawanqa Satanasmi Diosmanta t’aqarqan

[26 paginapi foto]

Tukuy imapin Jehová Diostaqa kasukunanchis