Ko Iehova Tei Teitei Roa!
Ko Iehova Tei Teitei Roa!
“Ko Tei Teitei roa ra, ko Iehova, . . . ko te ariki maata ïa ki runga i te enua katoa nei.”—SALA. 47:2.
1. Mei tana au tuatua i roto ia 1 Korinetia 7:31, eaa tikai ta Paulo e taiku ra?
“TE TAUI nei te tu o teianei ao.” Na te apotetoro ko Paulo i akakite mai i te reira. (1 Kori. 7:31, NW) Te akaaite ra aia i teianei ao ki te ngai akaari anga teata, te akatutu ra te au tangata i ta ratou tuanga ei au tangata meitaki me kore ei au tangata kino, e taui ua atu ei te tu o te nuku.
2, 3. (a) Te akaaiteia ra te akaaoanga o to Iehova turanga ngateitei ki teaa? (e) Eaa te au uianga ka akamanako tatou?
2 Teia tuatau, te tupu nei tetai turanga puapinga rava atu tei akaaiteia ki tetai nuku—e ka o koe ki roto! Te piri tikai ra te reira ki te akatikaanga i te turanga ngateitei o te Atua ko Iehova. Ka akatutuia mai teia na roto i tetai turanga e tupu ra i tetai enua. Tetai tua, e tutaraanga tika tetai te akono tamou ra i te ture. Tetai tua ra, te akatere ra tetai akaaerenga na roto i te tu pikikaa, kino, e te ta tangata. Te riro ra te akaaerenga tika kore ei akaaoanga ki te tutaraanga ngateitei, e te timata ra i te tu ngaueue kore o te tangata ravarai ki to ratou kavamani.
3 Te tupu ra taua tu i te ao katoa e pini ua ake. Te vai ra te kavamani akamanaia o ‘Tei Teitei ra ko Iehova.’ (Sala. 91:9) Inara te takinoia nei te tangata ravarai e te akaaerenga rave kino e akatereia ra e te “vaerua kino ra.” (1 Ioa. 5:19) Te riro ra te reira ei akaaoanga ki te kavamani akamanaia o te Atua e te timata maira i te tu ngaueue kore o te tangata ravarai ki tana tutaraanga ngateitei. Akapeea teia i tupu mai ei? Eaa ra te Atua i akatika ai te reira? Eaa ta tatou tataki tai ka rave no te reira?
Nga Maroanga e O Maira
4. Eaa te nga maroanga e rua te o maira i te ao katoa e pini ua ake?
4 E rua maroanga te o maira i te ao katoa e pini ua ake: To Iehova turanga ngateitei e te tu tiratiratu o te tangata. I roto i te au Tuatua Tapu, e kapikiia ana a Iehova i tetai taime e ko “Tei Teitei roa.” Ei akatauanga, kua imene te tata taramo e: “Ko Tei Teitei roa ra, ko Iehova, . . . ko te ariki maata ïa ki runga i te enua katoa nei.” (Sala. 47:2) E au tumu meitaki tetai no te akamanako anga i te Atua ko Iehova e ko Tei Teitei Rava Atu.—Dani. 7:22.
5. Eaa ra tatou ka akakeuia ai kia turuturu i to Iehova turanga ngateitei?
5 Ko Tei Anga mai, ko te Atua ko Iehova Tei Teitei Roa i te enua nei e te ao katoa e pini ua ake. (E tatau ia Apokalupo 4:11.) Ko Iehova katoa to tatou Akava, Tuku Ture, e te Ariki. (Isa. 33:22) I te mea e ko te Atua te tumu i ora mai ei tatou e te irinaki nei tatou kiaia, e akamanako tatou iaia e ko Tei Teitei Roa. Ka akakeuia tatou kia turuturu i tona taoonga teitei me akamaara ua rai tatou e “kua akamou a Iehova i tona ra terono ki runga i te au rangi; e kua kauraro te au mea katoa nei i tona ra basileia.”—Sala. 103:19; Anga. 4:24.
6. Eaa te tu tiratiratu?
6 Ei turuturu i to Iehova turanga ngateitei, e akono tamou tatou i te tu tiratiratu kiaia. Te “tu tiratiratu” e tu manako akono tau me kore e tu ki katoa. Te tangata akono i te tu tiratiratu e tangata apa kore e te tu tika. Ko te pateriareka ko Iobu tetai o taua tangata ra.—Iobu 1:1.
Akamataanga o te Maroanga
7, 8. Akapeea a Satani te akaaoanga i te tikaanga o to Iehova turanga ngateitei?
7 Mei tetai 6,000 mataiti i topa, kua akaao tetai vaerua ora i te tikaanga o to Iehova turanga ngateitei. Te tumu i akakeuia ai taua vaerua meameaau kia tuatua e kia rave i teia, no tona inangaro noinoi kia akamoriia. Kua akakeu aia i te tokorua mua ko Adamu raua ko Eva kia kore e turuturu i te turanga ngateitei o te Atua, e kua tauta i te akakino i to Iehova ingoa na te akaapa anga e kua pikikaa te Atua. (E tatau ia Genese 3:1-5.) Kua riro mai tei meameaau ko te Enemi maata, ko Satani (Tei Patoi), te Tiaporo (Tei Akakino), te ovi (tei akavare), e te taae (tei takore).—Apo. 12:9.
8 Kua akariro a Satani iaia uaorai e ko te tutara patoi. Te aro atu anga i teia akaaoanga, eaa ta Tei Teitei Roa ko Iehova ka rave? Ka takore viviki ainei aia i te au meameaau e toru—ko Satani, Adamu, e Eva? Tei iaia te mana no te reira, e ka rauka taua mana ra i te akatikatika i te maroanga e koai te mana teitei rava atu. Ka akapapu katoa te reira e kua akakite a Iehova i te tika no runga i te utunga no te aati anga i tana ture. Eaa ra te Atua i kore ei i rave i te reira?
9. Eaa ta Satani i akaao atu?
9 Na te pikikaa anga e te akaariu ke anga ia Adamu raua ko Eva mei te Atua, kua akaao a Satani i te tikaanga o Iehova kia umuumu i te au tangata kia akarongo kiaia. Tei maata atu, na te akanauru anga i te tokorua mua kia akarongo kore i te Atua, kua akaao katoa a Satani i te tu ngaueue kore o te au mea ora kite pouroa. Mei tei akaariia mai i roto i to Iobu turanga, tei ngaueue kore ki to Iehova turanga ngateitei, kua karanga a Satani e ka rauka iaia i te akaariu ke i te tangata ravarai mei te Atua.—Iobu 2:1-5.
10. Na te kore anga i akatikatika vave i tona turanga ngateitei, eaa ta te Atua i oronga?
10 Na te kore anga i akatikatika vave i tona turanga ngateitei, kua oronga a Iehova i tetai tuatau no Satani kia akapapu i tana akaapa anga. Kua oronga katoa te Atua i te atianga no te au tangata kia akaari i te tu ngaueue kore ki tona turanga ngateitei. Eaa tei tupu ana i te au anere mataiti i topa? Kua akatupu mai a Satani i tetai akaaerenga kino e te ririnui. Kare e roa atu ka takore a Iehova i te reira e te Tiaporo, te oronga anga i te akapapu anga tikai no te tikaanga ngateitei o te Atua. Kua papu tikai i te Atua ko Iehova e e mea meitaki tetai ka tupu mai, i taputou ei aia i te reira te tupu anga te meameaau i Edene.—Gene. 3:15.
11. Eaa ta te tangata e manganui i rave no runga i to Iehova turanga ngateitei?
11 Maata te tangata tei taangaanga i te akarongo e tei akono tamou i to ratou tu tiratiratu no runga i to Iehova turanga ngateitei e te akatapu anga i tona ingoa. Kapiti mai ki teia pupu ko Abela, Enoka, Noa, Aberahama, Sara, Mose, Ruta, Davida, Iesu, te au pipi mua a Karaiti, e te mirioni ua atu tangata tiratiratu i teia tuatau. Te piri ra taua aronga turuturu i to te Atua turanga ngateitei i te akapapu e e pikikaa a Satani e te takore anga i te akakino ta te Tiaporo i tuku ki runga i to Iehova ingoa, te tuatua akatietie anga e ka rauka iaia i te akaariu ke i te tangata ravarai mei te Atua.—Mase. 27:11.
Papu e ka Ope te Maroanga
12. Akapeea e papu ei ia tatou e kare te Atua e akakoromaki ua atu i te au tu kino?
12 Papu ia tatou e kare roa atu ka akatika a Iehova i tona turanga ngateitei. Kare aia e akakoromaki i te au tu kino, e kua kite tatou e te noo nei tatou i te tuatau openga. Kua takore ana a Iehova i te aronga kino i te tuatau o te Vaipuke. Kua takore aia ia Sodoma e Gomora e Pharao e tona nuku vaeau. Kare a Sisera e tona pupu vaeau e Senakeriba e tona pupu vaeau Asura i autu ana i runga ake i Tei Teitei Roa. (Gene. 7:1, 23; 19:24, 25; Exo. 14:30, 31; Aka. 4:15, 16; 2 Ari. 19:35, 36) No reira, papu ia tatou e kare te Atua ko Iehova e akakoromaki ua atu i te tu akangateitei kore no tona ingoa e te takinokino anga o tona Au Kite. Pera katoa, te kite nei tatou i te akapapuanga no te akairo o to Iesu parutia e te openga o te akatereanga kino o te au mea nei.—Mata. 24:3, NW.
13. Akapeea tatou e kore ei e takoreia atu ma te au enemi o Iehova?
13 Kia kore e takoreia atu ma te au enemi o te Atua, kia vai ngaueue kore tatou ki to Iehova turanga ngateitei. Akapeea tatou i te rave anga i te reira? Na te akaatea mai anga mei te tutaraanga kino a Satani e kia ketaketa kia kore e tamatakuia e tona aronga raverave. (Isa. 52:11; Ioa. 17:16; Anga. 5:29) Raro anake i taua au turanga ra e rauka ai ia tatou te turuturu i te turanga ngateitei o to tatou Metua i te rangi, e te manakonako anga kia ora mai me takore a Iehova i te akakino anga o tona ingoa, e te akaari anga e koia Tei Teitei i te Ao Katoa e Pini ua Ake.
14. Eaa te akaariia maira i roto i te au tuanga tukeke o te Pipiria?
14 Tei roto i te Pipiria te au akakiteanga no runga i te tangata ravarai e to Iehova turanga ngateitei. Te akakite maira te au pene mua e toru i te au mea tei angaia e te ara anga te tangata, e te au pene openga e toru no runga i te akaoraia anga te tangata ravarai. Tei roto i te au kapi i rotopu te au akakiteanga no runga i te au takainga ta Tei Teitei Roa ko Iehova ka akatupu no tona akakoroanga no te tangata ravarai, te enua, e te ao katoa e pini ua ake. Te akaari maira a Genese akapeea a Satani e te au tu kino i o mai ei ki roto i teianei ao, e te akaari maira te tuanga openga o Apokalupo e akapeea te au kino e te Tiaporo me takoreia, e ka raveia te anoano o te Atua i te enua nei mei te rangi katoa ra. Tika rai, te akaari maira te Pipiria i te tumu o te ara e te mate, e te akaari maira e akapeea me akaateaia te reira i te enua nei e kia monoia ki te mataora ope kore e te oraanga mutu kore no te aronga akono i te tu tiratiratu.
15. Kia puapingaia tatou uaorai me ope te maroanga no runga i te turanga ngateitei, eaa ta tatou ka rave?
15 Kare e roa atu ka taui takiri te tu o teianei ao. Ka ope te maroanga no runga i te turanga ngateitei. Ka takoreia atu a Satani, kare aia e tutara akaou, e ka autu atu to te Atua anoano. E puapingaia ai mei teia, e kia mataora i te au akameitakianga e manganui tei totouia i roto i te Tuatua a te Atua, e turuturu tatou i to Iehova turanga ngateitei i teianei. Kare e rauka ia tatou kia papakitai e kia ekoko. Kia rauka ra i te tuatua e: “Tei iaku a Iehova,” kia noo ua rai tatou ki tona tua.—Sala. 118:6, 7.
Ka Rauka ia Tatou te Akono Tamou i te Tu Tiratiratu!
16. Eaa i papu ei ia tatou e ka rauka i te au tangata i te akono tamou i te tu tiratiratu ki te Atua?
16 Ka rauka ia tatou te turuturu i to Iehova turanga ngateitei e kia akono tamou i to tatou tu tiratiratu, no te mea kua tata te apotetoro ko Paulo e: “Kare kotou i rokoia e te timataanga, mari ra mei ta te tangata nei rai: e tuatua-mou ra ta te Atua, e kare aia e vaoo ia kotou kia timataia, mari ra ko te tika ia kotou kia akakoromaki ra; e akatupu katoa aia i te akapuanga i taua timataanga ra, kia tika ia kotou kia akakoromaki.” (1 Kori. 10:13) Eaa te tumu no te timataanga ta Paulo i taiku mai, e akapeea te Atua te riro anga ei akapuanga no tatou?
17-19. (a) Eaa te timataanga ta te ngati Iseraela i tuku ua atu i te metepara? (e) Eaa ra ka rauka ai ia tatou te akono tamou i to tatou tu tiratiratu kia Iehova?
17 Mei tei akatutuia mai i tei tupu ki to Iseraela i te metepara, e aere mai ana te “timataanga” na roto i te au turanga te ka akanauru ia tatou kia aati i te ture a te Atua. (E tatau ia 1 Korinetia 10:6-10.) Ka rauka ua i te ngati Iseraela i te patoi atu i te timataanga, inara kua inangaro ratou i “te au mea kikino” te oronga temeio mai anga a Iehova i te manu ei kai na ratou no te marama katoa. Noatu e kare te tangata i kai ana i te kiko no tetai taime, kua oronga te Atua kia rava ta ratou mana ei kai. Tera ra, kua tuku ua atu ratou ki te timataanga te akaputu noinoi anga i te manu.—Nume. 11:19, 20, 31-35.
18 I mua atu ana, te orongaia anga te Ture kia Mose i te Maunga Sinai, kua riro te ngati Iseraela ei aronga akamori itoro, te akamori anga i te punua puakatoro e te au tamataora anga navenave. I te mea e kare a Mose i reira, kua akatika ua atu ratou ki te timataanga. (Exo. 32:1, 6) I mua ua ake ka tomo ei ki roto i te Enua Taputouia, e tauatini ua atu ngati Iseraela tei akavareia e te au vaine o Moabi, kia rave i te ainga tau kore. I taua atianga ra, e tauatini ua atu au ngati Iseraela tei mate no ta ratou ara. (Nume. 25:1, 9) Tetai au taime, kua tuku ua atu te au tangata Iseraela ki te timataanga na te koumuumu meameaau anga, tetai atianga kua tuatua akakino ratou ia Mose e i te Atua uaorai! (Nume. 21:5) Kua koumuumu katoa te iti tangata Iseraela i muri ake te takoreia anga te tangata kino ko Kora, Datana, Abirama, e to ratou au taeake, te tamanako tarevake anga e kare i tau te akautunga anga o te au tangata meameaau. Tei tupu mai, e 14,700 ngati Iseraela tei tamate takiriia e te maki mate ta te Atua i tuku mai.—Nume. 16:41, 49.
19 Te au timataanga tei taikuia akera ka rauka ua i te ngati Iseraela i te patoi atu. Inara, kua tuku ua atu te au tangata ki te timataanga no te mea kua ngaro to ratou akarongo e kua ngaropoina ia ratou a Iehova, tona manako aroa ia ratou, e tona au tu tika. Mei tei tupu ki te ngati Iseraela, te au timataanga e aro atu ana tatou e mea matauia ki te au tangata. Me tauta pakari tatou i te patoi i te reira e te irinaki ki te Atua kia akaora mai ia tatou, ka rauka ia tatou i te akono tamou i to tatou tu tiratiratu. Ka irinaki papu tatou i teia no te mea “e tuatua-mou ra ta te Atua” e kare aia e akatika ia tatou kia ‘timataia, mari ra kia akakoromaki tatou.’ Kare rava a Iehova e akaruke ia tatou kia o atu ki roto i tetai au turanga kare e rauka i tetai i te rave i tona anoano.—Sala. 94:14.
20, 21 Me timataia tatou, akapeea te Atua i riro ei ei “akapuanga” no tatou?
20 Na te akaketaketa anga ia tatou kia patoi i te timataanga, ka oronga mai a Iehova i te “akapuanga.” Ei akaraanga, ka takinokino mai to tatou au enemi ia tatou te tautaanga i te akakore i to tatou akarongo. Ka timata taua tu takinokino anga ia tatou kia tuku i te au, kia kore e papaia, tamamaeia, e kia kore e tamateia atu. Inara, kia tau ki ta Paulo akapapu anga akauruia i roto ia 1 Korinetia 10:13, kua kite tatou e ko te timataanga no tetai tuatau poto ua. Kare a Iehova e akatika i te reira kia tupu ua atu kia kore tatou e vai akarongo mou kiaia. Ka akaketaketa mai te Atua i to tatou akarongo e ka akamaroiroi mai ia tatou i te pae vaerua kia akono tamou i te tu tiratiratu.
21 Ka tauturu a Iehova ia tatou na roto i tona vaerua tapu. Ka akamaara katoa mai taua vaerua i te au manako Tuatua Tapu ta tatou ka anoano, i te patoi atu i te timataanga. (Ioa. 14:26) No reira, kare tatou e akavareia i te aru i te mataara tarevake. Ei akatauanga, kua marama tatou i te au maroanga te piri atura ki to Iehova turanga ngateitei e te tu tiratiratu o te au tangata. No taua kite ra, e manganui tei tauturuia e te Atua kia vai akarongo mou e mate ua atu. Inara kare na te mate tei riro ei akapuanga no ratou; na te tauturu a Iehova i rauka ai ia ratou te akakoromaki e tae ua atu ki te openga ma te kore e tuku ua atu ki te timataanga. Ka rauka katoa iaia i te rave i te reira no tatou. Te tikaanga, te taangaanga katoa ra aia i tana au angera akarongo mou no tatou ei au tavini vaerua “i tonokia [mai] ei matuapuru i te aronga tuanga i te ora.” (Ebe. 1:14) Mei ta te atikara ka aru mai e akaari maira, ko te aronga anake ua tei akono i te tu tiratiratu ka manakonako atu i te tikaanga mataora no te turuturu anga i to te Atua turanga ngateitei e tuatau ua atu. Ko tatou tetai ka o atu kia ratou me mou piri tatou ki Tei Teitei Roa ko Iehova.
Akapeea Koe me Pau?
• Eaa ra tatou ka ariki ei i Tei Teitei Roa ko Iehova?
• Eaa te aiteanga kia akono tamou i to tatou tu tiratiratu ki te Atua?
• Akapeea tatou i kite ei e kare e roa atu ka akatika a Iehova i tona turanga ngateitei?
• Kia tau kia 1 Korinetia 10:13, eaa ra ka rauka ai te akono tamou i te tu tiratiratu?
[Au Uianga Apii]
[Tutu i te kapi 24]
Akanauru a Satani ia Adamu e Eva kia kore e turuturu ia Iehova
[Tutu i te kapi 26]
Tauta pakari i te turuturu i to Iehova turanga ngateitei