Jéhovah ayeke Kota Gbia ti e!
Jéhovah ayeke Kota Gbia ti e!
‘L’Éternel Ti Nduzu Ahon Kue ayeke kota Gbia ti sese kue.’—PS. 47:3.
1. Paul ayeke sara lani tënë ti nyen na lege ti atënë ti lo so ayeke na 1 aCorinthien 7:31?
“AYE so ayeke si na yâ ti dunia so ayeke changé tere changengo.” (1 aCor. 7:31). Na lege ti atënë so bazengele Paul ahinga so aye ayeke changé tere lakue na yâ ti dunia so.
2, 3. (a) E lingbi ti haka ye so asi na ngorogbia ti Jéhovah na nyen? (b) Ahundango tënë wa e yeke gue ti bâ ni?
2 Laso, mbeni kota kpale ayeke dä so abâ nga mo! A ndu mbilimbili fango na gigi droit ti Jéhovah Nzapa ti komande dunia kue. E lingbi ti haka kpale ni so na mbeni ye so asi na yâ ti mbeni kodoro. Na yâ ti kodoro ni a yeke wara tâ ngorogbia ti kodoro ni so asara si aye atambela na lege ni. Na mbage, a yeke wara nga mbeni sioni bungbi so azo ahinga ni na sarango ye ti likisi, sarango ye ti ngangu na zo nga na fango zo. Sioni bungbi ni ayeke mbeni kpale ndali ti ngorogbia ti kodoro ni nga ayeke mbeni tara ndali ti azo ti kodoro ni, teti a hunda na ala ti fa so ala yeke be-ta-zo na ngorogbia ti ala.
3 Dunia kue ayeke na yâ ti mara ti ye tongaso. A yeke wara tâ ngorogbia ti “Seigneur L’Éternel” wala Jéhovah (Ps. 71:5). Me, mbeni sioni bungbi ayeke dä laso so ayeke sara sioni na azo, na zo so ayeke na li ni ayeke “Zo ti sioni.” (1 Jean 5:19). Sioni bungbi so ayeke mbeni kpale ndali ti ngorogbia ti Nzapa so ayeke tâ ngorogbia nga ayeke mbeni tara ndali ti azo kue so agi ti duti be-ta-zo na komandema ti lo. Kpale so abâ gigi tongana nyen? Ngbanga ti nyen Nzapa azia lege na ni? Nyen la zo oko oko alingbi ti sara na ndo ti tënë so?
Atënë so kota kpale so andu ni
4. Kota kpale so dunia kue ayeke na yâ ni so andu akota tënë use wa so kamba ayeke na popo ni?
4 Kota kpale so dunia kue ayeke na yâ ni so andu akota tënë use so kamba ayeke na popo ni: Droit ti Jéhovah ti komande dunia kue nga na dutingo be-ta-zo ti azo. Na yâ ti Bible, a iri Jéhovah ‘Kota Gbia’. Na tapande, na yâ ti mbeni bia mbeni wasungo psaume atene: ‘L’Éternel Ti Nduzu Ahon Kue ayeke kota Gbia ti sese kue.’ (Ps. 47:3). E yeke na anzoni raison mingi ti bâ Jéhovah Nzapa tongana Lo Ti Nduzu Ahon Kue.—Dan. 7:22.
5. Ngbanga ti nyen a lingbi e mû mbage ti komandema ti Jéhovah?
5 Teti so Jéhovah Nzapa la acréé aye kue, lo yeke Gbia ti sese nga na ti dunia kue. (Diko Apocalypse 4:11.) Jéhovah ayeke nga Juge ti e, Zo ti lungo ndia na e nga Gbia ti e (És. 33:22). Teti so Nzapa la asara e nga grâce na lo la e ngbâ na fini, a yeke nzoni e bâ lo tongana Kota Gbia ti e. Tongana lakue e bata na li ti e so Jéhovah “aleke trône ti Lo na ayayu, na royaume ti Lo akomande ye kue”, ye so ayeke pusu e ti mû mbage ti komandema ti lo.—Ps. 103:19; Kus. 4:24.
6. Ti duti be-ta-zo aye ti nyen?
6 Ti mû mbage ti komandema ti Jéhovah, a lingbi e ngbâ be-ta-zo na lo. Ti duti be-ta-zo aye ti tene ti sara ye na lege ni na yâ ti aye kue. Zo so ayeke be-ta-zo ayeke na tënë na li ti lo pëpe nga lo yeke sara ye na lege ni. Job ayeke lani tongaso.—Job 1:1.
Kpale ni abâ gigi tongana nyen?
7, 8. Na lege wa Satan adë kite na droit ti Jéhovah ti komande dunia kue?
7 Ahon ngu 6000 tongaso awe so mbeni ange alondo ti dë kite na droit ti Jéhovah ti komande dunia kue. Ange so aye ti tene azo avoro lo, ni la apusu lo ti sara atënë nga na aye so afa so lo sara kpengba-li. Lo pusu kozo koli na kozo wali, Adam na Ève, ti ke komandema ti Nzapa nga lo gi ti buba iri ti Jéhovah na fango so Jéhovah ayeke zo ti mvene. (Diko Genèse 3:1-5.) Ange ti kpengba-li so aga kota Wato, Satan (Wato), Zabolo (Zo ti pango ndo), ngbo (wahanda) nga sioni nyama so akpa ngbo (zo ti fango zo).—Apoc. 12:9.
8 Satan azia na sese komandema ti lo nde na ti Jéhovah. Jéhovah so ayeke Gbia ti Dunia Kue ayeke sara nyen na gbele kpale so? Lo yeke futi na lê ni lê ni azo ti kpengba-li ota so, so ti tene Satan, Adam nga na Ève? Lo yeke biani na ngangu ti sara ni nga tongana lo sara ni fade, a yeke fa polele zo wa la ayeke na ngangu mingi na yâ ti dunia. A yeke fa nga so ye so Jéhovah atene ayeke si na azo so ake ndia ti lo ayeke tâ tënë. Me ngbanga ti nyen Nzapa asara ni pëpe?
9. Nyen la Satan adë kite na ni?
9 So Satan atene mvene nga lo pusu Adam na Ève ti ke yanga ti Nzapa, lo dë kite na droit ti Jéhovah so ahunda ti tene azo amä yanga ti lo. Na ndo ni, so lo pusu kozo koli na kozo wali ti ke yanga ti Nzapa, Satan aye ti tene so a-ange nga na azo alingbi ti ngbâ be-ta-zo na Nzapa pëpe. Na lege ti ye so asi na Job so ayeke be-ta-zo na komandema ti Jéhovah, Satan atene so lo lingbi ti pusu azo kue ti ke yanga ti Nzapa.—Job 2:1-5.
10. So Nzapa aleke tënë ti komandema ti lo na lê ni lê ni pëpe, lo zia lege na Satan nga na azo ti sara nyen?
10 Na lekengo pëpe na lê ni lê ni tënë ti komandema ti lo, Jéhovah amû lege na Satan ti fa wala tënë so lo tene so ayeke tâ tënë. Nzapa amû nga pasa na azo ti tene ala wani afa so ala yeke be-ta-zo na komandema ti lo. Nyen la asi na yâ ti angu mingi so ahon so? Satan azia na sese mbeni sioni bungbi so asara ngangu mingi na ndo ti azo. Me Jéhovah ayeke futi ande bungbi ni so nga na Zabolo, ye so ayeke fa polele so Nzapa ayeke na droit ti komande dunia kue. Na ngoi so kengo yanga asi lani na Éden, Jéhovah ahinga biani so ye ni ayeke ga ande nzoni, ni la si lo fa tënë ni kozo.—Gen. 3:15.
11. Na ndo ti tënë ti komandema ti Jéhovah, azo mingi asara nyen?
11 Azo mingi amä na bê na ala ngbâ be-ta-zo na komandema ti Jéhovah nga na tënë ti sarango si iri ti lo aga nzoni-kue. Na popo ti ala a yeke wara Abel, Hénoc, Noé, Abraham, Sara, Moïse, Ruth, David, Jésus, akozo disciple ti Christ nga na azo kutu mingi so angbâ be-ta-zo na ngoi ti e. Azo so amû mbage ti komandema ti Nzapa, ala fa so Satan ayeke zo ti mvene nga ala zi zonga so Zabolo abi na ndo ti iri ti Jéhovah na tenengo na baba so lo lingbi ti pusu azo kue ti ke yanga ti Nzapa.—aProv. 27:11.
E hinga tongana nyen kpale ni ayeke hunzi
12. E hinga tongana nyen so Nzapa ayeke zia pëpe si aye ti sioni angbâ lakue ti gue gi guengo tongaso?
12 E hinga biani so na yâ ti kete ngoi Jéhovah ayeke fa so lo la lo yeke na droit ti komande dunia. Lo yeke zia ande pëpe si aye ti sioni angbâ gi ti gue gi guengo tongaso. Nga e hinga so e yeke na alango ti nda ni. Jéhovah afuti lani azo ti sioni na lege ti Kota ngu so apika na ngoi ti Noé. Lo futi Sodome na Gomorrhe nga Pharaon na aturugu ti lo. Sisera na aturugu ti lo nga Sanchérib na aturugu ti Assyrie agbu lê ni pëpe na gbele Lo Ti Nduzu Ahon Kue (Gen. 7:1, 23; 19:24, 25; Ex. 14:30, 31; aJu. 4:15, 16; 2 aGbia 19:35, 36). Ni la, e hinga biani so Jéhovah Nzapa ayeke zia pëpe si a ngbâ lakue ti buba iri ti lo nga si a sara sana na aTémoin ti lo. Na ndo ni, e bâ laso polele fä so afa so Jésus asi awe na lo yeke dä nga fä so afa so e yeke na ngoi so aye ti ngoi so ayeke gue ti hunzi.—Mat. 24:3.
13. Ti tene a futi e legeoko na awato ti Jéhovah pëpe, a lingbi e sara nyen?
13 Ti tene a futi e legeoko na awato ti Nzapa pëpe, a lingbi e fa so e yeke be-ta-zo na komandema ti Jéhovah. E yeke sara ni tongana nyen? Na ngbango lakue ti duti nde na sioni komandema ti Satan nga na ziango pëpe si azo ti lo azia mbeto na yâ ti e (És. 52:11; Jean 17:16; Kus. 5:29). A yeke gi na sarango tongaso si e yeke mû mbage ti komandema ti Babâ ti e ti yayu. E yeke duti nga na beku ti sö kuâ na ngoi so Jéhovah ayeke zi zonga so a bi na ndo ti iri ti lo nga lo yeke fa polele so lo yeke Gbia ti Dunia Kue.
14. Nyen la a fa na yâ ti ambage nde nde ti Bible?
14 Na yâ ti Bible, a yeke wara anzene nzene tënë so abâ azo nga na komandema ti Jéhovah. Akozo chapitre ota ti Bible asara tënë na ndo ti aye so Jéhovah acréé nga tongana nyen zo atï na yâ ti siokpari. Me andangba chapitre ota ti Bible afa tongana nyen azo ayeke kiri ti wara fini ti lakue lakue. Atanga ti chapitre ni afa anzene nzene tënë na ndo ti aye so Jéhovah Gbia ti Dunia Kue asara ti tene ye so lo leke ti sara ndali ti azo, sese nga na dunia kue aga tâ tënë. Mbeti ti Genèse afa tongana nyen Satan nga na aye ti sioni abâ gigi, nga ndangba mbage ti mbeti ti Apocalypse afa tongana nyen a yeke zi ande aye ti sioni nga a yeke futi Zabolo. A fa nga tongana nyen a yeke sara ye so bê ti Nzapa aye na ndo ti sese tongana ti so a sara na yayu. Biani, Bible afa ye so ayeke na gunda ti siokpari na kuâ, nga a fa tongana nyen a yeke zi ande aye so kue. Na pekoni azo so angbâ be-ta-zo ayeke wara ngia nga na fini teti lakue lakue.
15. Ti tene e bâ nzoni na ngoi so tënë so andu zo so ayeke na droit ti komande dunia ayeke hunzi, a lingbi e sara nyen?
15 Na yâ ti kete ngoi, aye ti dunia so ayeke changé kue. Tënë so andu zo so ayeke na droit ti komande dunia kue ayeke hunzi ande. Komandema ti Satan ayeke hunzi nga a yeke futi lo. Na ndo ni, ye so bê ti Nzapa aye ayeke mû ande ndo kue. Me, ti bâ nzoni nga ti wara gbâ ti aye ti nzoni so Bible asara tënë ni, a lingbi e mû mbage ti komandema ti Jéhovah laso. E lingbi pëpe ti tene so e yeke na mbage ti Satan pëpe nga e yeke na mbage ti Nzapa pëpe. Ti tene e tene: “L’Éternel [“Jéhovah,” FD] ayeke na tere ti mbi”, a lingbi e duti na mbage ti lo.—Ps. 118:6, 7.
E lingbi ti ngbâ be-ta-zo!
16. Nyen la afa na e so azo alingbi ti ngbâ be-ta-zo na Nzapa?
16 E lingbi ti mû mbage ti komandema ti Jéhovah na e ngbâ be-ta-zo teti so Paul asû mbeti lo tene: “Mbeni tara nde asi na ala pëpe, gi ti so ayeke si ka na azo kue. Me Nzapa ayeke be-ta-zo, na lo yeke zia ande pëpe si a tara ala ahon ti so ala lingbi ti kanga bê dä, me tongana tara ni ayeke si na ala, lo yeke leke nga lege ti tene ala lingbi ti gbu ngangu dä.” (1 aCor. 10:13). Mara ti atara wa la Paul asara tënë ni so? Tongana nyen la Nzapa ayeke leke lege ti tene e sigigi dä?
17-19. (a) Tara wa la azo ti Israël atï na yâ ni na yando? (b) Ngbanga ti nyen e lingbi ti tene so lege ayeke dä ti tene e ngbâ be-ta-zo na Jéhovah?
17 Tongana ti so ye so asi na azo ti Israël na yando afa, “tara” ayeke ga na lege ti aye so alingbi ti pusu e ti doro ndia ti Nzapa. (Diko 1 aCorinthien 10:6-10.) Azo ti Israël alingbi lani ti luti na lê ti tara, me ala sara nzara ti “aye ti sioni” na ngoi so na lege ti miracle Jéhovah amû na ala adodoro teti nze oko. Même so teti mbeni ngoi azo ni awara nyama ti te pëpe, Nzapa amû na ala gbâ ti manne ti tene ala te. Ye oko, ala tï na yâ ti nzara ti warango gbâ ti ye na ngoi so ala yeke ro adodoro ni.—Nom. 11:19, 20, 31-35.
18 Kozo, na ngoi so Jéhovah ayeke mû na Moïse Ndia ti lo na li ti Hoto ti Sinaï, azo ti Israël atï na yâ ti vorongo yanda na lege so ala voro kete bagara ti lor nga ala sara ngia ti sioni. Gi so zo so ayeke mû li ni na popo ti ala ayeke dä pëpe, lege azi na ala ti sara ye ti bê ti ala (Ex. 32:1, 6). Ngoi kete kozoni si azo ti Israël alï na Sese ti Zendo, awali ti kodoro ti Moab ahanda ala saki mingi na ala tï na yâ ti lango-sioni. Na ngoi ni so, azo ti Israël saki mingi akui ndali ti siokpari ti ala (Nom. 25:1, 9). Na ambeni ngoi, azo ti Israël adema tere ti ala, na mbeni ngoi ala londo na tënë na tere ti Moïse nga na Nzapa! (Nom. 21:5). Même na pekoni so a futi azo ti sioni tongana Koré, Dathan, Abiram nga na azo so amû peko ti ala, azo ti Israël adiko tënë ala tene so a yeke na lege ni pëpe ti futi azo ti kpengba-li so. Ye so asara si Nzapa afuti azo ti Israël 14 700.—Nom. 16:41, 49.
19 Azo ti Israël alingbi lani ti luti na gbele atara so e sara tënë ni na nduzu ge. Me ala tï na yâ ni ndali ti so mabe ti ala atï nga ala girisa Jéhovah so na ndoye ayeke bâ ndo na ndo ti ala. Ala girisa nga alege ti lo so ayeke mbilimbili. Tongana ti so a si na azo ti Israël, atara so e tingbi na ni ayeke ye so ayeke si ka na azo kue. Tongana e sara kue ti luti na gbele atara ni nga e zia bê ti e kue na Nzapa ti mû ngangu na e, e lingbi ti ngbâ be-ta-zo. E hinga so lo yeke mû ngangu na e ndali ti so “Nzapa ayeke be-ta-zo” na lo yeke zia pëpe si “a tara [e] ahon ti so [e] lingbi ti kanga bê dä”. Jéhovah ayeke zia lâ oko pëpe si e si na yâ ti ambeni ye so asara si a yeke ngangu na zo ti sara ye so bê ti lo aye.—Ps. 94:14.
20, 21. Na ngoi so e yeke na yâ ti tara, tongana nyen Nzapa ayeke ‘leke lege’ ti tene e sigigi na yâ ni?
20 Jéhovah ayeke ‘leke lege’ na mungo na e ngangu ti luti na gbele tara. Na tapande, awato alingbi ti sara ngangu na e tongaso si e bere mabe ti e. Mara ti aye ti sioni tongaso alingbi ti pusu e ti bere mabe ti e tongaso si e kpe ti tene a pika e, a sara sana na e wala même a fâ e. Ye oko, na lege ti atënë ti dengo bê so Nzapa apusu Paul ti mû ni, so ayeke na 1 aCorinthien 10:13, e hinga so tara ayeke gi teti kete ngoi. Jéhovah ayeke zia pëpe si a tara e juska ti si na mbeni ngoi so e lingbi mbeni pëpe ti ngbâ be-ta-zo na lo. Nzapa ayeke kpengba mabe ti e nga lo yeke mû ngangu na e na lege ti yingo si e ngbâ be-ta-zo na lo.
21 Jéhovah ayeke kpengba e na lege ti yingo vulu ti lo. Yingo vulu ayeke dabe ti e na aversê so e yeke na bezoin ni ti luti na lê ti tara (Jean 14:26). Ye so ayeke sara si e yeke tï na yâ ti ye ti sioni pëpe. Na tapande, e hinga kamba so ayeke na popo ti komandema ti Jéhovah nga na dutingo be-ta-zo ti azo. Teti so azo mingi ahinga ye so, Nzapa amû maboko na ala na ala ngbâ be-ta-zo juska na kuâ. A yeke pëpe kuâ la azi ala na lê ti atara ni, me a yeke Jéhovah la amû maboko na ala ti gbu ngangu juska na nda ni san ti tï na yâ ti tara. Lo lingbi nga ti sara oko ye so teti e. Lo mû nga a-ange be-ta-zo ti sara kusala teti nzoni ti e tongana azo so lo “tokua ala ti sara kua na azo so ayeke wara ande salut.” (aHéb. 1:14). Tongana ti so article ti peko ayeke fa, gi azo so angbâ be-ta-zo la ayeke na pasa ti mû mbage ti komandema ti Jéhovah teti lakue lakue. E lingbi ti duti na popo ti ala tongana e ngbâ na tere ti Jéhovah, Kota Gbia ti e.
Mo yeke kiri tënë tongana nyen?
• Ngbanga ti nyen a lingbi e bâ Jéhovah tongana Kota Gbia ti e?
• Ti ngbâ be-ta-zo na Nzapa aye ti tene nyen?
• E hinga tongana nyen so na yâ ti kete ngoi, Jéhovah ayeke leke tënë ti komandema ti lo?
• Na lege ti tënë so ayeke na 1 aCorinthien 10:13, ngbanga ti nyen lege ayeke dä ti tene e ngbâ be-ta-zo na Jéhovah?
[Ahundango tënë ti manda na ye]