O Ieova o lo Tatou Alii Pule Silisili Ese!
O Ieova o lo Tatou Alii Pule Silisili Ese!
“Ou te sulufaʻi atu i le Alii Pule Silisili Ese o Ieova.”—SALA. 73:28.
1. O le ā e faatatau i ai upu a Paulo o loo i le 1 Korinito 7:31?
NA FAAPEA mai Paulo: “O loo suia le tulaga o mea a lenei lalolagi.” (1 Kori. 7:31) Ua faatusaina e Paulo le lalolagi i se vaaiga o se tala, ma tagata o loo faatinoina gaoioiga a tagata lelei ma tagata leaga, seʻia oo ina suia vaaiga po o tulaga o le tala.
2, 3. (a) O le ā ua faatusaina i ai le luʻi faasaga i le pule silisili ese a Ieova? (e) O ā fesili o le a tatou talanoaina?
2 O loo faagasolo i aso nei se tala e sili ona tāua, ma e aafia ai oe! Aemaise o loo faatatau atu lenei tala i le faamaonia o le tonu o le pule silisili ese a Ieova le Atua. E mafai ona faataʻitaʻia lenei tala i se tulaga e ono tupu i se atunuu. E iai le malo ua tofia e le atunuu e tausia le lelei ma le maopoopo o ona tagata. Ae e iai foʻi se faalapotopotoga e tetee i ai, o loo pule e ala i le taufaasesē, faiga sauā, ma le fasioti tagata. Ua luʻia e le faalapotopotoga tetee le pule a lenei malo, ma ua tofotofoina ai le faamaoni o tagatānuu uma i le malo.
3 E faapena le tulaga o loo tupu i le aoao o mea. O loo iai lava le pulega faaletulafono a Ieova, le “Alii Pule Silisili Ese.” (Sala. 71:5) Ae ua faamataʻuina tagata e se faalapotopotoga e tetee i ai, e faauluulu i “lē o loo leaga.” (1 Ioa. 5:19) Ua luʻia e lea faalapotopotoga tetee le pulega a le Atua, ma tofotofoina le faamaoni o tagata uma i lana pule silisili ese. Na faapefea ona tupu o lenei mea? Aiseā ua faataga ai e le Atua? O le ā e mafai e i tatou taʻitoʻatasi ona faia e faatatau i lea tulaga?
Vala Tāua o le Tala
4. O ā vala tāua e lua e fesootaʻi, e aofia ai i le tala o loo faasolosolo ona faaalia mai?
4 O lenei tala o loo faasolosolo ona faaalia mai i le aoao o mea, e aofia ai ni vala tāua se lua e fesootaʻi: o le Pule Silisili Ese a Ieova, ma le faamaoni o tagata. E tele lava ina taʻua i le Tusi Paia Ieova, o le “Alii Pule Silisili Ese.” O se faataʻitaʻiga, o le faatuatua tele o le faisalamo iā te Ia na pese ai: “Ou te sulufaʻi atu i le Alii Pule Silisili Ese o Ieova.” (Sala. 73:28) O le uiga o le upu “Pule Silisili Ese,” e silisili i le malosi, ma e pule i mea uma. E iai māfuaaga talafeagai e tatau ai ona amanaʻia Ieova le Atua, o Lē e Pule Aoao.—Tani. 7:22.
5. Aiseā e tatau ai ona tatou lagolagoina le pule silisili ese a Ieova?
5 Ona o Ieova le Atua na foafoaina mea uma, o ia la o le Pule Silisili Ese i le lalolagi ma le aoao o mea. (Faitau le Faaaliga 4:11.) O Ieova foʻi o lo tatou Faamasino, Faitulafono, ma o le Tupu, auā o ia e faatinoina na vala uma o lana pulega i le aoao o mea. (Isa. 33:22) Ona o le Atua na foaʻi maia le ola, ma e tatou te faalagolago iā te ia, e tatau la ona tatou amanaʻia o ia o lo tatou Alii Pule Silisili Ese. O lo tatou manatua pea o le mea moni e faapea: “Ua matuā faatumauina e Ieova lona nofoālii i le lagi; ua pule aoao foʻi lona malo i mea uma lava,” e uunaʻia ai i tatou e lagolagoina lona tulaga e sili ona maualuga.—Sala. 103:19; Galu. 4:24.
6. O le ā le uiga o le upu, faamaoni?
6 E tatou te lagolagoina le pule silisili ese a Ieova, pe a tumau lo tatou faamaoni iā te ia. O le uiga o le upu “faamaoni,” o le sao o le amio, po o le atoatoa. O lē e faamaoni, e lē taʻuleagaina ma e amio saʻo. Sa faapena le augātamā o Iopu.—Iopu 1:1.
Le Amataga o le Tala
7, 8. Na faapefea ona luʻia e Satani le tonu o le pule silisili ese a Ieova?
7 Pe tusa ma le 6,000 tausaga ua mavae, na luʻia ai e se foafoaga agaga le tonu o le pule silisili ese a Ieova. O lona faanaunauga manatu faapito ia tapuaʻi atu tagata iā te ia, na uunaʻia ai ana upu ma gaoioiga. Na ia faaosoosoina le uluaʻi ulugalii o Atamu ma Eva, ina ia lē faamaoni i le pule silisili ese a le Atua, ma taumafai e faaleaga lona suafa e ala i le faapea mai, e pepelo Ieova. (Faitau le Kenese 3:1-5.) Ua avea ai lē na fouvale o le Fili sili po o Satani (Lē e tetee), Tiapolo (Lē e taufaaleaga), gata (lē e taufaasesē), ma le tarako (o lē e feʻai).—Faaa. 12:9.
8 Ua faia e Satani o ia lava ma pule e faasagatau iā Ieova. O le ā nei o le a faia e Ieova le Alii Pule Silisili Ese i lenei luʻi? Po o le a ia faaumatia loa le ʻaufouvale o Satani, ma Atamu ma Eva? E mautinoa, e iā te Ia le malosi e faia ai faapea, ma o le a iloa ai foʻi po o ai e sili ona malosi. E faamaonia ai foʻi, e leʻi pepelo Ieova e faatatau i le faasalaga pe a soli lana tulafono. Ae aiseā na lē faaumatia ai loa i latou e le Atua?
9. O ā mea na fesiligia e Satani?
9 E ala i le pepelo ma le faaliliuese o Atamu ma Eva mai i le Atua, na fesiligia ai e Satani le aiā a Ieova e tāpā ai le usiusitaʻi atu o tagata iā te ia. E lē gata i lea, o lona faasesēina o le uluaʻi ulugalii ia lē usiusitaʻi i le Atua, na fesiligia ai foʻi e Satani le faamaoni o foafoaga atamamai uma. Na faamaoni Iopu i le pule silisili ese a Ieova, ae na finau mai Satani, e mafai ona ia faaliliuese tagata uma mai i le Atua.—Iopu 2:1-5.
10. O le ā le avanoa na tuu mai e le Atua ina ua tolopō le faatinoga o lana pule silisili ese?
10 O le tolopō e Ieova o le faatinoina o lana pule silisili ese ma le faaumatiaga o Satani, ua ia tuu atu ai le avanoa iā Satani e faamaonia ai ana tuuaʻiga. Ua tuu mai ai foʻi e le Atua le avanoa i tagata, e faaalia ai lo latou faamaoni i lana pule silisili ese. O le ā ua tupu i le faagasologa mai o senituri? Ua faavaeina ai e Satani se faalapotopotoga malosi e tetee iā Ieova. Ua tuupoina le taimi o le a faaumatia ai e Ieova lenā faalapotopotoga ma le Tiapolo, ma matuā faamaonia ai le tonu o lana pule silisili ese. Sa silafia e Ieova le Atua o le a iai se iʻuga manuia, o lea na ia valoia lea tulaga i le taimi na tupu ai le fouvalega i Etena.—Kene. 3:15.
11. O le ā le tali atu a le toʻatele o tagata i le pule silisili ese a Ieova?
11 E toʻatele tagata ua faaalia le faatuatua ma tumau pea lo latou faamaoni i le pule silisili ese a Ieova, ma le faapaiaina o lona suafa. E aofia ai iā i latou nei ia Apelu, Enoka, Noa, Aperaamo, Sara, Mose, Ruta, Tavita, Iesu, o uluaʻi soo o Keriso, ma le faitau miliona o ē e faamaoni i aso nei. Ua ʻaufaatasi i latou uma i le lagolagoina o le pule silisili ese a le Atua, ma faamaonia ai le pepelo a Satani. Ua taʻumamāina ai foʻi le suafa o Ieova mai i le faalumaina e le Tiapolo i lona gugutu mai, e mafai ona ia faaliliuese tagata uma mai i le Atua.—Faata. 27:11.
Ua Mautinoa le Iʻuga
12. E faapefea ona tatou mautinoa e lē faavavau ona faapalepale le Atua i ē amioleaga?
12 Ua tatou mautinoa ua toeitiiti ona faatino lea e Ieova o lana pule silisili ese. E lē faavavau ona faapalepale o ia i ē amioleaga, ma ua tatou iloa foʻi, ua tatou ola i aso e gata ai. Na faaumatia e Ieova o ē amioleaga i le Lolo. Na ia faaumatia foʻi Sotoma ma Komoro, faapea Farao ma ana ʻau. Na faaumatia foʻi e le Silisili Ese Sesera ma ana ʻau, faapea Sanerivi ma ʻau a Asuria. (Kene. 7:1, 23; 19:24, 25; Eso. 14:30, 31; Faama. 4:15, 16; 2 Tu. 19:35, 36) O le ala lea o lo tatou mautinoa, e lē faavavau ona faapalepale Ieova le Atua i le lē migao ua faaalia i lona suafa ma le faileagaina o ana Molimau. E lē gata i lea, o lea ua tatou vāai i le faailoga o le faatasi mai o Iesu ma le faaiʻuiʻuga o lenei faiga amioleaga o mea.—Mata. 24:3.
13. E faapefea ona faasaoina i tatou pe a faaumatia e Ieova ona fili?
13 E tatau ona tatou faamaoni i le pule silisili ese a Ieova, ina ia faasaoina ai i tatou pe a faaumatia e le Atua ona fili. E faapefea ona faaalia lo tatou faamaoni? E ala i le vavaeese mai i le pulega tetee a Satani, ma ia lē fefefe i le faamataʻu mai o ona sui. (Isa. 52:11; Ioa. 17:16; Galu. 5:29) O le faia faapea tatou te lagolagoina ai le pule silisili ese a lo tatou Tama o i le lagi, ma faasaoina ai i tatou pe a faamamāina e Ieova lona suafa mai le faalumaina, ma faaalia ai, o Ia o le Pule Silisili Ese Aoao.
14. O le ā ua faailoa mai i le Tusi Paia atoa?
14 O loo iai i le Tusi Paia atoa faamatalaga auʻiliʻili e faatatau i le fanau a tagata ma le pule silisili ese a Ieova. O loo faamatala mai i mataupu muamua e tolu, le foafoaga ma le paʻū o le tagata i le agasala, ae i mataupu mulimuli e tolu, o loo taʻua ai le toe faafoʻisia o le tagata i le lelei atoatoa. I isi vaega o le Tusi Paia, o loo faamatala ai mea ua faia e Ieova le Alii Pule Silisili Ese e faataunuu ai lona finagalo mo tagata, le lalolagi, ma le aoao o mea. Ua faailoa mai i le Kenese le amataga o le amioleaga i le lalolagi ma Satani, ae i le vaega faaiʻu o le Faaaliga, ua faailoa mai ai le auala o le a soloiesea ai le amioleaga, le faaumatiaga o Satani, ma le faia o le finagalo o le Atua i le lalolagi e pei ona faia i le lagi. Ioe, ua faailoa mai i le Tusi Paia le pogai o le agasala ma le oti, ma le auala o le a tafiesea ai mai le lalolagi, ae faatotoe ai na o ē e tumau i le faamaoni e ola fiafia ai e faavavau.
15. O le ā le mea e tatau ona tatou faia, ina ia maua aogā pe a faaiʻuina le finauga i le pule silisili ese?
15 Ua lē o toe umi ona suia atoatoa lea o le tulaga o le lalolagi, ma faaiʻuina ai le finauga ua leva, e faatatau i le pule silisili ese. O le a lē toe pule Satani, ma faasolo atu ai lava ina faaumatia, ae faia atoatoa le finagalo o le Atua. E tatau ona tatou lagolagoina le pule silisili ese a Ieova i le taimi nei, ina ia tatou maua aogā ma faamanuiaga e tele ua folafola mai i le Afioga a le Atua. E lē tatau ona tatou faalētonu i manatu e lua. Ina ia mafai ona faapea atu, “O loo ʻau Ieova ma aʻu,” e ao ona tatou tumau i lana itu.—Sala. 118:6, 7.
E Mafai Ona Tatou Tumau i le Faamaoni!
16. E faapefea ona tatou mautinoa e mafai ona tumau le faamaoni o tagata i le Atua?
16 E mafai ona tatou lagolagoina le pule silisili ese a Ieova ma tumau i le faamaoni, auā na tusi Paulo: “O faaosoosoga e oo iā te outou, e oo foʻi i tagata uma. Ae e faamaoni le Atua, ma e na te lē tuua outou i se faaosoosoga e sili atu nai lo o le mea tou te lavātia, ae pe a oo mai le faaosoosoga, e saunia e ia se auala e sao ai outou, ina ia outou tumau ai.” (1 Kori. 10:13) O fea e ala mai ai faaosoosoga o loo taʻua e Paulo, ma e faapefea ona saunia e le Atua le auala e tatou te sao ai?
17-19. (a) O ā faaosoosoga na lolo i ai Isaraelu i le vao? (e) Aiseā e mafai ai ona tumau lo tatou faamaoni iā Ieova?
17 O mea na tutupu i tagata Isaraelu i le vao, ua faaalia ai, o mea e tutupu iā i tatou, e ala mai ai “faaosoosoga” ia e ono faapogaia ai ona tatou solia tulafono a le Atua. (Faitau le 1 Korinito 10:6-10.) Sa ono mafai e Isaraelu ona teena faaosoosoga, peitaʻi na latou tuʻinanau i “mea leaga” ina ua saunia mai faavavega e Ieova salu e aai ai mo le masina atoa. E ui lava ua umi sina taimi talu ona lē toe aai Isaraelu i aano o manufasi, ae na lava ma totoe manai na saunia e le Atua mo i latou. Peitaʻi, ina ua ō atu e ao mai salu, na latou lolo atu ina ua faaosoosoina i le manaʻo tele.—Nu. 11:19, 20, 31-35.
18 Muamua atu i lenā, a o alu aʻe Mose i le mauga o Sinai e aumai le Tulafono, na ifo ai i tupua tagata Isaraelu, ma tapuaʻi i le tamaʻi povi auro, ma faamalie o latou tuʻinanauga. E tele faaosoosoga na oo iā i latou ina ua lē iai lo latou taʻitaʻi. (Eso. 32:1, 6) A o lata ina ulu atu i le Nuu Folafolaina, e faitau afe tagata Isaraelu na faatosina e fafine Moapi, ma latou fai ai feusuaʻiga. I lena mea na tupu, e faitau afe tagata Isaraelu na faaumatia ai ona ua agasala. (Nu. 25:1, 9) I nisi taimi, na lolo ai tagata Isaraelu i le faaosoosoga o le faitio ma le fouvale, ma na oo lava ina faitio i le Atua ma Mose! (Nu. 21:5) Na muimui foʻi tagata Isaraelu ina ua faaumatia tagata amioleaga o Kora, Tanu, ma Apiramo ma ē na latou faatasi, ona o manatu sesē e faapea ua lē tonu le faaumatiaina o na tagata fouvale. O le iʻuga, e 14,700 tagata Isaraelu na feoti i le mala mai i le Atua.—Nu. 16:41, 49.
19 E leai ma se faaosoosoga e pei ona taʻua i luga e faapea sa lē mafaia e tagata Isaraelu ona teena. Ae o le māfuaaga na lolo ai tagata i na faaosoosoga, ona ua leai se faatuatua ma galo ai Ieova ma lana tausiga alofa iā i latou, atoa ai ma le tonu o ona ala. E pei lava ona oo i tagata Isaraelu, o faaosoosoga e oo mai iā i tatou, o mea e oo i tagata uma. Ae afai e tatou te taumafai malosi e teena ma faatuatua i le Atua e na te faamalosia i tatou, e mafai ona tatou tumau i le faamaoni. E mautinoa lenā mea, auā “e faamaoni le Atua,” ma e na te lē tuua i tatou e ‘faaosoosoina e sili atu nai lo o le mea e tatou te lavātia.’ E lē taitai lava ona tuua i tatou e Ieova ia oo i se tulaga e lē mafai ai ona tatou faia lona finagalo.—Sala. 94:14.
20, 21. Pe a tofotofoina i tatou, e faapefea ona saunia e le Atua le “auala e [tatou te] sao ai”?
20 E saunia e Ieova le “auala e sao ai” e ala i le faamalosia o i tatou e tetee atu i faaosoosoga. O se faaaʻoaʻoga, atonu e sauāina i tatou e tagata tetee o ē e taumafai ia lafoaʻia lo tatou faatuatua, ma e ono tofotofoina i tatou e faia faapea, ina ia sao ai mai i le sasaina, faataugāina, po o le oti. Ae peitaʻi, ua tatou iloa mai le faamautinoaga faagaeeina a Paulo i le 1 Korinito 10:13, o tulaga ua māfua ai o tatou tofotofoga, e mo na o sina taimi. E lē faatagaina e Ieova lenā tulaga e faaauau pea, ma faigatā ai ona tatou tumau i le faamaoni iā te ia. E faamalosia e le Atua lo tatou faatuatua, ma foaʻi mai le malosi faaleagaga e tatou te manaʻomia, ina ia tumau ai i le faamaoni.
21 E faamalosia i tatou e Ieova e ala i lona agaga paia. E toe fafagu mai foʻi e le agaga iā i tatou manatu mai i le Tusi Paia tatou te manaʻomia e tetee atu ai i tofotofoga. (Ioa. 14:26) O le a lē faasesēina ai foʻi i tatou e mulimuli i se ala sesē. O se faataʻitaʻiga, ua tatou malamalama i mataupu tāua e lua, e faatatau i le pule silisili ese a Ieova, ma le tāua o le faamaoni o le tagata. O le auala lea ua faamalosia ai e le Atua le toʻatele ina ia tumau i le faamaoni seʻi oo i le oti. Peitaʻi, e leʻi sao i latou ona ua feoti, a o le fesoasoani a Ieova na tumau ai seʻi oo i le oti, e aunoa ma le lolo atu i tofotofoga. E mafai foʻi ona faia faapena e le Atua iā i tatou. Ua ia faaaogā foʻi ana agelu faamaoni e fesoasoani mai iā i tatou, ma ‘ua aauina mai e auauna mo i tatou o ē o le a maua le faaolataga.’ (Epe. 1:14) I le mataupu o sosoo mai, o le a iloa ai, e na o ē e faamaoni o le a maua le faaeaga fiafia, o le lagolagoina o le pule silisili ese a le Atua e faavavau. E mafai ona tatou ʻaufaatasi ma i latou pe a pipiimau iā Ieova lo tatou Alii Pule Silisili Ese.
O le ā Lau Tali?
• Aiseā e tatau ai ona tatou amanaʻia Ieova o lo tatou Alii Pule Silisili Ese?
• O le ā le uiga, ia tumau lo tatou faamaoni i le Atua?
• E faapefea ona tatou iloa ua toeitiiti ona faatino lea e Ieova o lana pule silisili ese?
• E tusa ai ma le 1 Korinito 10:13, aiseā e mafai ai ona tumau lo tatou faamaoni?
[Fesili mo le Suʻesuʻega]
[Ata i le itulau 24]
Na faaosoosoina e Satani Atamu ma Eva ina ia lē faamaoni iā Ieova
[Ata i le itulau 26]
Ia maumauaʻi e lagolagoina le pule silisili ese a Ieova