Jehova Ngo Mwami Wesu!
Jehova Ngo Mwami Wesu!
“Ndakasala Mwami Jehova, abe mayubilo aangu.”—INT. 73:28.
1. Kweelana acilembedwe ku 1 Bakolinto 7:31, ino Paulo wakali kwaamba nzi?
PAULO wakaamba kuti: “Izyintu zicitika munyika eeyi ziyaabucinca.” (1 Ko. 7:31) Ciboneka kuti wakali kuyeeya mbuli kuti mbaasicisobano bacita zibeela zitondezya zyintu zibotu naa zibi kusikila bacinca cisobano.
2, 3. (a) Ino kukazya bweendelezi bwa Jehova inga kwakonzyanyizyigwa anzi? (b) Ino mibuzyo nzi njotutilange-lange?
2 Aano mazuba, icisobano cili mbuli ceeci iciyandika kapati cilacitika alimwi cilamujatikizya. Cilacitika akaambo kakulemeka bweendelezi bwa Jehova Leza. Icisobano eeci inga citondezya zyintu zikonzya kucitika mubusena bumwi. Kulubazu lumwi, kuli mfwulumende iboona kuti zyintu zyeenda kabotu. Alimwi kulubazu lumwi, kuli mbunga iilwana mfwulumende mwalo basololi mobabelesya bumpelenge, lunya alimwi akujaya. Eeyi mbunga iitazumizyidwe iileta buyumu-yumu kumfwulumende akubantu.
3 Izyintu zili boobu zilacitika munyika yoonse. Imfwulumende ya ‘Mwami Jehova’ njiizumizyidwe Kweendelezya. (Int. 71:5) Aano mazuba bantu balakongwa akabunga keendelezyegwa “aamubi.” (1 Jo. 5:19) Eezi nzyobacita zileta buyumu-yumu kumfwulumende ya Leza akusunka lusyomo lwabantu beendelezyegwa a Leza. Ino ncinzi cakapa kuti eeci cicitike? Ino Leza wakacizumizyila nzi? Ino ncinzi ncotukonzya kucita swebo?
Icijatikizyidwe Mucisobano
4. Kupasuluka kwakaambo kali mucisobano kutondezya kweendelana kwa twaambo tobilo ituli?
4 Mbokayabupasuluka kaambo kali mucisobano eeci itwaambo tobilo tuleendelana: Bweendelezi bwa Jehova akusyomeka kwabantu. Mumagwalo, Jehova waambwa kuti “Mwami Wesu.” Mucikozyanyo, kwiinda kakumusyoma, sintembauzyo wakaimba kuti: “Ndakasala Mwami Jehova [kuti] abe mayubilo aangu.” (Int. 73:28) Ibwami nkuba anguzu zyakweendelezya naa kuba mweendelezi. Mwami uulaanguzu zinji zyakweendelezya. Kuli twaambo tunji tweelede kupa kuti Jehova Leza katumubona kuti uuli Anguzu.—Dan. 7:22.
5. Ino kaambo nzi ncotweelede kubulemeka bweendelezi bwa Jehova?
5 Mbwali Mulengi, Jehova Leza ngomweendelezi wajulu anyika. (Amubale Ciyubunuzyo 4:11.) Jehova alimwi Mubetesi wesu, ngu Similawo alimwi Mwami wesu, nkaambo mubetesi, nguubamba milawo alimwi nguuendelezya mfwulumende. (Is. 33:22) Akaambo kakuti tulapona akaambo ka Leza alimwi tulamusyoma, tweelede kumubona kuti Mwami wesu. Eeci cinakutupa kuti katumulemeka lyoonse akaambo kakuti tulizyi kuti “Jehova ulikazikide cuuno cakwe cabwami mujulu, nkabela bwami bwakwe buleendelezya kuliboonse.”—Int. 103:19; Mil. 4:24.
6. Ino bululami ninzi?
6 Ikutegwa tutondezye kuti tuli kulubazu lwabweendelezi bwa Jehova tuyandika kuzumanana kuba balulami. Bulalami nkuzumanana kucita zyintu zibotu aziluzi. Muntu mululami nguyooyo uutakwe mulandu. Jobu syaanene wesu wakali muntu uuli boobo.—Job. 1:1.
Mbucakatalika Cisobano
7, 8. Ino mbuti Saatani mbwaakakazya bweendelezi bwa Jehova?
7 Myaka iitandila ku 6,000 yainda mungelo uumwi wakatalika kukazya bweendelezi bwa Jehova. Akaambo kakuliyanda ooyu sikuzanga wakali kuyanda kuti kakombwa alimwi eeci wakacitondezya mukwaambaula amumicito. Wakabayunga banabukwetene bakutaanguna ba Adamu a Eva kuti baleke kusyomeka kubweendelezi bwa Leza akubisya zyina lya Jehova kwiinda mukwaamba kuti wakabeja. (Amubale Matalikilo 3:1-5.) Sikuzanga wakaba Sinkondo mupati, Sataani (Sikukazya), Diabolosi (Sikutamikizya), muzoka (silweeno) asimwaaba (sikulya bantu).—Ciy. 12:9.
8 Saatani wakalibikka kuti abe muleli awalo. Akaambo kaceeci, ino Mwami Jehova wakatyani? Sena wakabajaya mpoonya aawo basikuzanga aaba botatwe—Saatani, Adamu a Eva? Masimpe wakalijisi nguzu zyakubajaya alimwi eeci nicakaingula mubuzyo wakuziba uuli aanguzu. Alimwi eeci nicakatondezya kuti ncaakaambide Jehova cakali camasimpe cakuti aabo batyola mulawo wakwe bayakusubulwa. Ino Leza wakalekela nzi kucita oobo?
9. Ino ncinzi ncaakali kukazya Saatani?
9 Akaambo kakubeja akucinca ba Adamu a Eva kuti baleke kumumvwida Leza, Saatani wakali kutondezya kuti bantu tabakonzi kumumvwida Jehova. Nokuba boobo, akaambo kakubabikkilizya banabuketene bakutaanguna kuti baleke kumulemeka Leza, Saatani alimwi wakali kuyeeya kuti bantu boonse balaleka kumusyoma Leza. Mbubwenya mbucakacitika kuli Jobu walo iwakali kusyomeka kuli Jehova, Saatani wakaamba kuti ulakonzya kupa kuti bantu boonse baleke kumusyoma Leza.—Job. 2:1-5.
10. Akaambo kakusumpya mazuba aakuti atalike kulela, ino Leza ncinzi ncaazumizya?
10 Akaambo kakusumpya mazuba aakuti atalike kulela Jehova, wamupa ciindi Saatani cakuti abone naa zyaakali kwaamba zyakali zyamasimpe. Leza alimwi wakabapa ciindi cakuti bantu batondezye kuti balakonzya kusyomeka kubweendelezi bwakwe. Ino ncinzi cacitika mbukwainda myaanda yamyaka minji? Saatani wakabamba mbunga yanguzu iilwana mfwulumende ya Leza. Jehova uyakwiinyonyoona mbunga eeyi alimwi a Diabolosi kutondezya kuti Leza nguuelede kulela. Jehova Leza wakalizyi kuti zyintu ziyakuba kabotu kumbele nibakazanga ba Adamu a Eva mu Edeni.—Matl. 3:15.
11. Ino ncinzi bantu banji ncibacita kutondezya kuti balabutobela bweendelezi bwa Jehova?
11 Bantu banji balasyomeka kubweendelezi bwa Jehova akulemeka zyina lyakwe. Akati kabaabo kuli Abela, Enoki, Nowa, Abrahamu, Sara, Musa, Rute, Davida, Jesu, basikwiiya ba Kristo bakutaanguna, azyuulu-zyuulu zyabantu basyomeka bapona mazuba aano. Aba basyoma mubweendelezi bwa Leza balatola lubazu ikutondezya kuti Saatani ulabeja alimwi bapa kuti zyina lya Jehova libote ndyaakasampaula Diabolosi nakaamba kuti ulakonzya kupa kuti bantu baleke kumukomba Leza.—Tus. 27:11.
Tulizyi Mbociyaakumana Cisobano
12. Ino inga twazyiba buti kuti Leza takalekeli cibi kuti cizumanane?
12 Tuli masimpe kuti ino-ino Jehova uyakutalika kweendelezya. Takalekeli cibi kuti cizumanane alimwi tulizyi kuti tupona muciindi camamanino. Jehova wakabajaya bantu babi ciindi cazambangulwe. Wakanyonyoona munzi wa Sodoma a Gomora alimwi a Farao abasikalumamba bakwe. Sisera abasikalumamba bakwe a Sanakeribu abasikalumamba bakwe baku Asuri tiibakali kukonzya kumuzunda Mupati Kampatila. (Matl. 7:1, 23; 19:24, 25; Kul. 14:30, 31; Bab. 4:15, 16; 2 Bam. 19:35, 36) Aboobo tulakonzya kusyoma kuti Jehova Leza takalekeli basampaula zyina lyakwe alimwi abaabo bapenzya Bakamboni bakwe kuti bazumanane. Kuyungizya waawo, lino tubona citondezyo cakubako kwa Jesu amamanino abweende bwazyintu bubyaabi.—Mt. 24:3.
13. Ino mbuti mbotukonzya kucita kuti tutanyonyoonwi antoomwe abasinkondonyina Jehova?
13 Kutegwa tutakanyonyoonwi antoomwe abasinkondonyina aa Leza, tweelede kuzumanana kusyomeka kubweendelezi bwa Jehova. Ino inga twacita buti oobo? Tulakonzya kucita oobo kwiinda mukukaka kweendelezyegwa a Saatani akukongwa abaabo mbabelesya. (Is. 52:11; Joh. 17:16; Mil. 5:29) Lilikke kuti twatobela bweendelezi bwa Leza kutali bwa Saatani, tuyakuba abulangizi bwakuti Jehova uyakutufwutula aakusalazya zyina lyakwe akutondezya kuti Mwami Wakujulu Aansi.
14. Ino ncinzi cipanduludwe muzibeela ziindene-indene zya Bbaibbele?
14 Twaambo tuyungizidwe tujatikizya bantu a bweendelezi bwa Jehova tulajanika mu Bbaibbele lyoonse. Zyaandano zyotatwe zyakusaanguna zitwaambila zyintu mbozyakalengwa acibi mbocakatalika, pele zyamamanino zyotatwe zyaamba muntu mbwaayakufwutuka. Izyaandaano zili akati zitondezya zyintu nzyaakacita Mwami Jehova kuzuzikizya makanze akwe kujatikizya bantu, nyika ajulu. Bbuku lya Matalikilo litwaambila zyintu mbozyakalengwa acibi mbocakatalika, pele cibeela camamanino mubbuku lya Ciyubunuzyo lyaamba muntu mbwaayakufwutuka, Diabolosi uyakujaigwa alimwi kuyanda kwa Leza kuyakucitwa aano anyika mbubwenya mbuli kujulu. Masimpe, Ibbaibbele lilapandulula cakapa kuti kube cibi alufwu amboziyakugusigwa munyika akuti kuyakuba kukkomana kutaambiki alimwi kuli baabo bazumanana kusyomeka bayakuba abuumi butamani.
15. Ino tuyakugwasyigwa buti caakumana cisobano eeci cabweendelezi.alimwi ino tweelede kucita buti?
15 Lino-lino zyintu zicitika munyika ziyakucinca. Cisobano eeci cijatikizya weelede kulela ciyakumana. Saatani uyakuleka kulela mpoonya mukuya kwaciindi uyakujayigwa. Pele kutegwa tugwasyigwe lino akukkomana azilongezyo zinji izili Mujwi lya Leza, tweelede kucita zyintu zitondezya kuti tuli kulubazu lwa Jehova. Tweelede kusala kulubazu nkotuzulilwa. Kutegwa twaambe kuti: “Jehova nguundigwasya” tweelede kuzumanana kuba kulubazu lwakwe.—Int. 118:6, 7.
Tulakonzya Kuzumanana Kusyomeka!
16. Ino nkaambo nzi ncotukonzya kuba masimpe kuti bantu balakonzya kuzumanana kusyomeka kuli Leza?
16 Mwaapostolo Paulo wakalemba kuti tweelede kuba kulubazu lwa Jehova akuzumanana kusyomeka nakaamba kuti: “Kunyina sunko lyakamucitikila litabacitikili bamwi. Pele Leza ulasyomeka, aboobo takamulekeli kuti musunkwe kwiinda nguzu zyanu pe, pele mwanoosunkwa uyoomupa anzila yamatijilo kutegwa mukonzye kuliyumya musunko eelyo.” (1 Ko. 10:13) Ino masunko ngaakaamba Paulo azwa kuli alimwi ino Leza utugwasya buti?
17-19. (a) Ino masunko nzi aakabacitikila bana Israyeli munkanda? (b) Ino nkaambo nzi ncotuyandika kuzumanana kusyomeka kuli Jehova?
17 Kweelana acikozyanyo cabana Israyeli nibakali munkanda, ‘masunko’ alaboola kwiinda muzyintu izikonzya kutupa kutyola mulawo wa Leza. (Amubale 1 Bakolinto 10:6-10.) Bana Israyeli bakali kukonzya kwaazunda masunko, pele bakalombozya “zyintu zibi” ciindi Jehova naakabapa bakancele mbobakali kukonzya kulya mumwezi omwe. Nokuba kuti bantu tiibakali kulya nyama kwaciindi cilamfwu, Leza wakali bapede mana manji aakulya. Nokuba boobo, bakasunkwa akaambo kabulyato nobakali kujata bakancele.—My. 11:19, 20, 31-35.
18 Kazitanacitika eezi, Musa naakali kupegwa Mulawo a Cilundu ca Sinai, bana Israyeli bakatalika kukomba mituni, kukomba mwana aŋombe akulikondelezya. Akaambo kakuti musololi wabo ngobakali kubona tanaakaliko, bakaliiba. (Kul. 32:1, 6) Kabatana njila Munyika Yakasyomezyedwe, zyuulu-zyuulu zyabana Israyeli bakayungwa abamakaintu bana Moabu akutalika kucita bumambe. Aciindi eeco, zyuulu-zyuulu zyabana Israyeli bakafwa akaambo kakubisya. (My. 25:1, 9) Zimwi ziindi, bana Israyeli bakali kuzanga kwiinda mukutongooka cakuti aciindi cimwi bakamutongooka Musa a Leza. (My. 21:5) Bana Israyeli bakatongooka nibakajayigwa ba Kora, Datani, Abiramu abeenzinyina, kabayeeya kuti tiicakaluzi kubajaya. Akaambo kaceeci, bana Israyeli bali 14,700 bajayigwa a Leza.—My. 16:41, 49.
19 Masunko oonse aaya bana Israyeli bakali kukonzya kwaazunda. Bantu bakasunkwa akaambo kakuti bakaleka kumusyoma Jehova alimwi bakaluba mbwakali kubalanganya kabotu anzila zyakwe. Zyintu zyakabacitikila bana Israyeli zilakonzya kutucitikila andiswe. Ikuti naa twaliyumya kutegwa tutasunkwi tiyakuzumanana kusyomeka alimwi Leza uyakutugwasya. Tulakonzya kucisyoma eeci nkaambo “Leza ulasyomeka” alimwi takatulekeli kuti ‘tusunkwe kwiinda nguzu zyesu pe.’ Jehova takonzyi kutulekelezya kusikila aciimo mpotutakonzyi kuliyumya kuti tucite kuyanda kwakwe.—Int. 94:14.
20, 21. Ino mbuti Leza mbwatutondezya “nzila” ikuti naa twasunkwa?
20 Kutegwa tuliyumye mumasunko Jehova ‘ulatutondezya nzila.’ Mucikozyanyo, basikupenzya balakonzya kutupenzya kapati kutegwa tuleke kusyomeka. Ikupenzyegwa kuli boobu kulakonzya kutupa kuti tuleke kusyomeka ikutegwa baleke kutuuma, kutupenzya naa kutujaya. Kweelana acisyomezyo ncaakasololelwa kulemba Paulo ku 1 Bakolinto 10:13, tulizyi kuti ikupenzyegwa nkwaciindi buyo cisyoonto. Jehova takamuzumizyi kuti musike aciimo cakuti muleke kusyomeka. Leza ulakonzya kuyumya lusyomo lwesu kutegwa tuzumanane kusyomeka.
21 Jehova ulatuyumya kwiinda mumuuya wakwe uusalala. Muuya ooyu alimwi ulatugwasya kuyeeya Magwalo akonzya kutugwasya kuliyumya notupenzyegwa. (Joh. 14:26) Mbubwenya buyo, andiswe tatuyungwi kuti tuccilile inzila iitaluzi. Mucikozyanyo, tulibuzyi bweendelezyi bwa Jehova alimwi ambociyandika kuzumanana kusyomeka. Akaambo kaluzyibo oolu, banji basala kuti bazumanane kusyomeka kuli Leza mane kusikila bakafwe. Pele taluli lufwu lwakabapa kuti baliyumye; ngu Jehova wakabagwasya kuti baliyumye kusikila kumamanino kakunyina kubisya. Ulakonzya kucita oobo akulindiswe. Alimwi ulabelesya abangelo basyomeka kuti bagwasye “baabo ibayookona lufwutuko.” (Heb. 1:14) Mbuli cibalo citobela mbocitondezya, balikke basyomeka mbabakonzya kusyoma kuti bayakuba acoolwe cakuba mubweendelezi bwa Leza kukabe kutamani. Tulakonzya kuba akati kabo kuti naa twazumanana kubelekela Jehova Mwami wesu.
Ino Mbuti Mbomukonzya Kwiingula?
• Ino nkaambo nzi ncotweelede kubona Jehova kuti Mwami Mupati?
• Ino caamba nzi kuzumanana kusyomeka kuli Leza?
• Ino mbuti mbotuzyiba kuti Jehova lino-lino ulatalika kulela?
• Kweelana a lugwalo lwa 1 Bakolinto 10:13, ncinzi cikonzya kutugwasya kuzumanana kusyomeka?
[Mibuzyo yaciiyo]
[Cifwanikiso icili apeeji 24]
Saatani wakabayunga ba Adamu a Eva kuti baleke kusyomeka kuli Jehova
[Cifwanikiso icili apeeji 26]
Kamuzumanana kusyomeka kubweendelezi bwa Jehova