Jaʼ Mukʼul Jpasmantal kuʼuntik li Jeovae
Jaʼ Mukʼul Jpasmantal kuʼuntik li Jeovae
«Voʼot noʼox cacʼoj jba o ta acʼob, Mucʼul Dios, voʼot li Cajvalote.» (SAL. 73:28)
1. ¿Kʼusi laj yalbe skʼoplal yaʼeluk li Pablo ta 1 Corintios 7:31?
«LI CʼUSITIC oy liʼ ta banamile chjelov noʼox.» (1 Cor. 7:31.) Kʼalal jech laj yal li jtakbol Pabloe, yakal tskoʼoltas yaʼeluk li balumil bu kuxulutik xchiʼuk li kʼusitik chichʼ akʼel ta ilel ta teatroe, ti te chvinaj ch-echʼik li buchʼutik lekik xchiʼuk li buchʼutik chopolike, xchiʼuk ti jech xcholet ch-echʼ li kʼusitike.
2, 3. 1) ¿Kʼuxi xuʼ jkoʼoltastik sventa xkaʼibetik smelolal ti laj yichʼ chibal kʼoptabel li mukʼul pas mantal yuʼun Jeovae? 2) ¿Kʼusi sjakʼobiltak ta jkʼelbetik skʼoplal?
2 Li ta jkʼakʼaliltik eke, oy kʼusi toj tsots skʼoplal yakal chkʼot ta pasel ti xkoʼolaj kʼuchaʼal jun drama ti te tsakal jkʼoplaltike, taje jaʼ skʼoplal li mukʼul pas mantal yuʼun Jeova ta vinajel-balumile. Taje xkoʼolaj kʼuchaʼal jun lum ti bu tskontrain sbaik chaʼchop krixchanoetike. Ta jote, te oy li mero ajvalile, ti tskʼel ti oyuk lekilale. Li ta yane, jaʼ jun chopol organisasion ti tstunes kʼusuk loʼlael, majbail xchiʼuk ti chmilvane. Li organisasion taje tsibtas li j-abteletike xchiʼuk chakʼ ta preva li stukʼil yoʼonton jnaklejetik ta stojolal li ajvalile.
3 ¿Kʼu yuʼun xuʼ xkaltik ti jaʼ jech yakal chkʼot ta pasel ta vinajel-balumil eke? Baʼyel, yuʼun oy jun mero ajvalilal, ti jaʼ ventainbil yuʼun li «Mucʼul Dios[e]» (Sal. 71:5). Jech xtok, li krixchanoetike tsibtasatik yuʼun jun organisasion ti ven tsaʼ kʼope, ti jaʼ beiltasbil yuʼun li chopol Satanase (1 Juan 5:19). Li organisasion taje chchibal kʼopta li Ajvalilal yuʼun Diose xchiʼuk chakʼ ta preva li stukʼil yoʼonton krixchanoetik ta stojolal li Mukʼul Jpasmantal ta vinajel-balumile. ¿Kʼuxi ikʼot ta pasel taje? ¿Kʼu yuʼun yakʼoj to jech chkʼot ta pasel li Jeovae? ¿Kʼusi xuʼ jpastik ta jujuntal ta sventa taje?
Li kʼusitik te tsakal skʼoplal ta dramae
4. ¿Kʼusi te tsakal skʼoplal li ta drama chkʼot ta pasel ta vinajel-balumile?
4 Li ta drama chkaltik ti chkʼot ta pasel ta vinajel-balumile, te tsakal skʼoplal chaʼtos kʼusitik ti stsakojbe sba skʼoplalike: li mukʼul pas mantal yuʼun Diose xchiʼuk li stukʼilal krixchanoetike. Li sKʼop Diose ep ta velta chal ti jaʼ «Mucʼul Dios» li Jeovae, jaʼ xkaltik, ti jaʼ Mukʼul Jpasmantale. Jech kʼuchaʼal liʼe, xi laj yal jun jtsʼibajom yuʼun salmoe: «Voʼot noʼox cacʼoj jba o ta acʼob, Mucʼul Dios, voʼot li Cajvalote» (Sal. 73:28). Li jpʼel kʼop mukʼul pas mantal xie jaʼ chalbe skʼopla li abtelal ti mas mukʼ ta skotol ajvalilale. Jaʼ yuʼun chaʼa, li buchʼu oy ta skʼob taje yichʼoj akʼbel sbi kʼuchaʼal mukʼul jpasmantal. Ta melel, oy ep srasonal kuʼuntik ti jech ta jbiiltastik li Buchʼu mas Toyol skʼoplale (Dan. 7:22).
5. ¿Kʼusi srasonal oy kuʼuntik sventa jpakbetik skʼoplal li mukʼul pas mantal yuʼun Jeovae?
5 Ta skoj ti jaʼ smeltsanoj skotol li Jeovae, jaʼ li Mukʼul Jpasmantal ta skotol li vinajel-balumile (kʼelo Apocalipsis 4:11). Jech xtok jaʼ Jchapanvanej, Jpasmantal xchiʼuk Ajvalil kuʼuntik (Isa. 33:22). Ta skoj ti jaʼ yakʼoj jkuxlejaltik xchiʼuk ti jaʼ chakʼbutik kʼusitik chtun kuʼuntike, skʼan jtsaktik ta mukʼ kʼuchaʼal Mukʼul Jpasmantal xchiʼuk ti jpakbetik skʼoplal ti tsots tajek yabtele. Jtos li kʼusi tstij koʼontontik ta spasele jaʼ ti teuk-o ta joltik li mantal liʼe: «Li Mucʼul Diose yacʼoj lec xchotleb ta vinajel; jaʼ sventainoj, jaʼ tspas ta mantal scotol» (Sal. 103:19; Hech. 4:24).
6. ¿Kʼusi smakoj ti tukʼ koʼontontike?
6 Mi ta jkʼan ta jpakbetik skʼoplal li mukʼul pas mantal yuʼun Jeovae, skʼan tukʼuk-o koʼontontik. Vaʼun chaʼa, ¿kʼusi smakoj ti tukʼ koʼontontike? Jech kʼuchaʼal chakʼ ta ilel li moltotil Jobe, li tukʼil oʼontonale jaʼ skʼan xal ti tukʼuk jtalelaltike, ti muʼyukuk jpaltailtik ta jkuxlejaltike xchiʼuk ti tukʼuk kʼusi ta jpastike (Job 1:1).
Chlik li dramae
7, 8. Li Satanase, ¿kʼu yelan la xchibal kʼoptabe sderecho sventa ch-ajvalilaj li Jeovae?
7 Leʼ xa mas ta vakmil jabile, jun anjele la stoy sba ta stojolal Jeova. Ta sventa li kʼusitik laj yal xchiʼuk li kʼusitik la spase, la xchibal kʼoptabe li sderecho Dios sventa ch-ajvalilaje. Jech la spas ta skoj ti ch-itʼixaje, yuʼun tskʼan ichʼel ta mukʼ. Jaʼ yuʼun la stijbe yoʼonton sventa mu xa tukʼuk yoʼontonik ta stojolal Mukʼul Jpasmantal ta vinajel-balumil li baʼyel jtot jmeʼtike, li Adán xchiʼuk Evae. Jech xtok, chikʼubtasbe ox yaʼi li slekil bi Jeova kʼalal laj yakʼ ta aʼiel ti jaʼ la jun jut kʼope (kʼelo Génesis 3:1-5). Li jtoyba taje kʼataj ta bankilal yajkontra Dios. Jech oxal, laj yichʼ biiltasel kʼuchaʼal Satanás (Jkontrainvanej), Diablo (Jchopolkʼoptavanej), chon (jloʼlavanej) xchiʼuk ta dragón (jtiʼvanej) (Apo. 12:9).
8 Li Satanase la svaʼan sba ta ajvalil ek, yuʼun tstsalvan yaʼi. ¿Kʼusi van tspas li Mukʼul Jpasmantal Jeova ta skoj taje? ¿Mi ta anil noʼox van tslajes li Satanás, li Adán xchiʼuk Evae? Ta melel, oy sjuʼel sventa la slajes jechuk li oxvoʼ jtoybaetike. Ti jechuk la spase, laj yakʼ ta ilel ti jaʼ li Dios ti skotol xuʼ yuʼune. Jech xtok, laj yakʼ ta ilel jechuk ti muʼyuk bu tsjut kʼop kʼalal laj yal ti chakʼbe kastigo mi muʼyuk la xchʼunbeik smantale. Pe, ¿kʼu yuʼun muʼyuk jech la spas?
9. ¿Kʼusitik la xchibal kʼopta li Satanase?
9 Ta skoj li jutbil kʼopetik laj yal Satanase, kuch yuʼun xchʼakel ta stojolal Jpasvanej yuʼunik li Adán xchiʼuk Evae. Jaʼ jech la xchibal kʼoptabe sderecho Dios ti tskʼan akʼo xchʼunbat smantal li krixchanoetike. Jech xtok, kʼalal la stijbe yoʼonton li baʼyel jtot jmeʼtik sventa tstoy sbaik ta stojolal li Jeovae, la xchibal kʼoptabe stukʼil yoʼonton skotol li spʼijil pasbentake. Jech kʼuchaʼal laj yichʼ ilel ta mas tsʼakal ta stojolal li Jobe —ti tukʼ yoʼonton laj yakʼ sba ta stojolal li mukʼul pas mantal yuʼun Diose—, li Diabloe jpʼel-o laj yal ti xuʼ xchʼak ta stojolal Dios buchʼuuk noʼoxe (Job 2:1-5).
10. ¿Kʼu yuʼun muʼyuk la spak skʼoplal ta ora li Jeovae?
10 Kʼalal muʼyuk la slajes ta ora li Satanás sventa tspakbe skʼoplal ti jaʼ Mukʼul Jpasmantal stuk li Jeovae, laj yakʼbe to skʼakʼalil sventa chakʼ ta ilel mi melel li kʼusitik chal Satanase. Jech xtok, laj to yakʼbe yorail sventa chakʼik ta ilel mi tukʼ yoʼontonik ta stojolal Jeova li krixchanoetike. ¿Kʼusi kʼotem ta pasel ti vaʼ xa sjalil echʼem tale? Li Satanase spasoj jun organisasion ti xibal sbae. Pe li Diose chakʼbe slajeb li Satanás xchiʼuk s-organisasione, vaʼun jech jamal chakʼ ta ilel ti jaʼ li Mukʼul Jpasmantale. Li Jeovae snaʼoj onoʼox ti persa tspas kanale, yuʼun laj onoʼox yal ta ora kʼalal lik li toybail ta Edene (Gén. 3:15).
11. ¿Kʼuxi spakojbeik skʼoplal epal krixchanoetik li mukʼul pas mantal yuʼun Diose?
11 Epal krixchanoetike yakʼoj ta ilel xchʼunel xchiʼuk stukʼil yoʼontonik kʼalal yakʼoj sbaik ta stojolal Jeova ta sventa ti laj yichʼ chibal kʼoptael li mukʼul pas mantal yuʼune xchiʼuk li xchʼultajesbel sbie. Jech la spas li Abel, Enoc, Noé, Abraham, Sara, Moisés, Rut, David, Jesús, li baʼyel jchʼunolajeletik xchiʼuk ta smiyonal noʼox vinik antsetik ti tukʼ yakʼoj sbaik ta jkʼakʼaliltike. Ti vaʼ buchʼutik tspakbeik skʼoplal li mukʼul pas mantal yuʼun Diose yakʼojik ta ilel ti jaʼ jun jut kʼop li Satanase. Ta skoj li stukʼil yoʼontonike, skoltaoj sbaik ek ta sakubtasbel sbi Dios ta skotol li chopol kʼoptael yaloj Diablo kʼalal laj yal ti xuʼ xchʼak ta stojolal Jeova buchʼuuk noʼoxe (Pro. 27:11).
Tspas kanal li kʼusi leke
12. ¿Kʼu yuʼun jchʼunojtik ta melel ti poʼot xa xakʼbe slajeb choplejal li Diose?
12 Li Jeovae jutuk xa skʼan xakʼ ta ilel ti jaʼ li mero Mukʼul Jpasmantale. ¿Kʼu yuʼun jchʼunojtik ta melel? Yuʼun muʼyuk chakʼ teuk-o li choplejale. Jech xtok, lek xvinaj ti ta slajebal xa kʼakʼal kuxulutike. Li stuke oy xa onoʼox slajesoj li chopol krixchanoetike. Jaʼ jech la spas li ta Nojelal ta voʼe, kʼalal la slajes li jteklum Sodoma, Gomorra, li faraón xchiʼuk yajsoltarotake. Jech xtok, muʼyuk kuch yuʼunik ek li yajsoltarotak Sisarae mi jaʼuk li j-asiria ajvalil Senaqueribe (Gén. 7:1, 23; 19:24, 25; Éxo. 14:30, 31; Jue. 4:15, 16; 2 Rey. 19:35, 36). Jaʼ yuʼun, jchʼunojtik ta melel ti Jeovae muʼyuk tstsʼik sbatel osil ti muʼyuk chichʼbeik ta mukʼ li sbie xchiʼuk li ilbajinel chichʼik yajRextikotake. Poʼot xa jech tspas, yuʼun jamal xa ta ilel ti liʼ xa oy li Cristoe xchiʼuk ti nopol xa slajeb li kʼusitik ta chopol balumil liʼe (Mat. 24:3, NM).
13. ¿Kʼusi skʼan jpastik sventa mu jmojuk xi jlaj xchiʼuk li yajkontratak Jeovae?
13 Mi mu jkʼantik jmoj xi jlaj xchiʼuk li yajkontratak Jeovae, toj tsots skʼoplal ti tukʼuk koʼontontik ta stojolal li mukʼul pas mantal yuʼune. Pe ¿kʼuxi xuʼ xkutik? Jaʼ kʼalal nom oyutik li ta s-organisasion Satanás ti xibal sbae xchiʼuk ti mu xkakʼtik sibtasutik li sviniktake (Isa. 52:11; Juan 17:16; Hech. 5:29). Jaʼ noʼox jech ta jkolta jbatik ta spakbel skʼoplal li mukʼul pas mantal yuʼun Diose xchiʼuk jaʼ jech mu xi jlajutik kʼalal mi la sakubtas sbi xchiʼuk ti chakʼ ta ilel ta stojolal skotolik ti jaʼ Mukʼul Jpasmantal li stuke.
14. ¿Kʼusi chakʼ ta naʼel li jlom loʼiletik ta Vivliae?
14 Ta sliklej li Vivliae oy kʼusitik ta jtatik ti tsotsik skʼoplal sventa li krixchanoetike xchiʼuk li mukʼul pas mantal yuʼun Jeovae. Mi jaʼ chalbe skʼoplal kʼuxi laj yichʼ pasel kʼusitik xchiʼuk baʼyel mulil li baʼyel oxib kapitulo ta Vivliae, li slajeb oxib kapituloe jaʼ chalbe skʼoplal kʼuyelan chchaʼlekub li krixchanoetike. Li yan kapituloetike ep kʼusitik chalbutik ta sventa li kʼusitik spasoj li Mukʼul Jpasmantal yoʼ xkʼot ta pasel kʼusi tskʼan tspas ta stojolal li krixchanoetike, li Balumile xchiʼuk skotol li kʼusitik oy ta vinajel-balumile. Li slivroal Genesise chalbe skʼoplal kʼusi la spas li Satanase xchiʼuk kʼuyelan och choplejal li ta balumile, vaʼun li ta slajebal xa Apocalipsise chal kʼuyelan tslajes li choplejale, li Diabloe xchiʼuk ti chkʼot ta pasel li kʼusi tskʼan yoʼonton Dios liʼ ta Balumil jech kʼuchaʼal yakal xa tspas ta vinajele. Ta melel, li Vivliae chal kʼu yuʼun oy li mulile xchiʼuk li lajelale. Chal xtok kʼuyelan chlaj skʼoplal taje sventa chlik ayanuk jun achʼ balumil ti bu chkuxiik sbatel osil li tukʼil krixchanoetike.
15. ¿Kʼusi skʼan jpastik yoʼ xkichʼtik li bendisionetik mi laj li drama ta sventa li mukʼul pas mantal yuʼun Diose?
15 Poʼot xa me xjel ta j-echʼel li kʼusitik chkʼot ta pasel li ta balumile. Poʼot xa me xlaj li drama ti chalbe skʼoplal li mukʼul pas mantal yuʼun Diose, ti voʼne xa slikele. Li Satanase chichʼ lokʼesel, ta tsʼakale chichʼ lajesel ta j-echʼel. ¡Chkʼot ta pasel li kʼusi tskʼan yoʼonton Diose! Mi ta jkʼan ta jkʼupintik taje xchiʼuk li epal bendision albil ta Vivliae, skʼan me jpakbetik skʼoplal avi li mukʼul pas mantal yuʼun Jeovae. Mu xuʼ jtamtik batel chib be. Mi te jchiʼinojtik li Jeovae, xuʼ me xi xkaltike: «Li Mucʼul Diose liʼ xchiʼinojun[e]» (Sal. 118:6, 7).
¡Xuʼ tukʼ-o koʼontontik!
16. ¿Kʼuxi jnaʼojtik ti xuʼ tukʼ koʼonton xkakʼ jbatik ta stojolal li Diose?
16 Ta melel, xuʼ jpakbetik skʼoplal li mukʼul pas mantal yuʼun Jeovae xchiʼuk ti tukʼ-o koʼontontik ta stojolale. Xi la stsʼiba li jtakbol Pablo ta sventa taje: «Li voʼoxuque muʼyuc to bu chtal ta atojolic tsots preva ti muʼyuc bochʼo cʼotem ta stojol jeche. Yuʼun li Diose mu snaʼ sjel yoʼnton o, jech mu xacʼ taluc ta atojolic tsots preva ti me mu xa stsʼic avuʼunic chile. Jech noxtoc cʼalal oyoxuc ta prevae, jaʼ chacʼ avilic cʼu xʼelan xuʼ chacolic loqʼuel, yuʼun jech chcuch avuʼunic» (1 Cor. 10:13). ¿Bu chlik talel li preva chal Pabloe, xchiʼuk kʼuxi tskoltautik lokʼel li Diose?
17-19. 1) ¿Kʼusi prevaetik tsʼujik-o ta taki xokol balumil li j-israeletike? 2) ¿Kʼu yuʼun xuʼ tukʼ-o koʼontontik ta stojolal li Jeovae?
17 Jech kʼuchaʼal chakʼ ta ilel li kʼusitik kʼot ta stojolal j-israeletik ta taki xokol balumile, li «preva» chalbe skʼoplal Pabloe xuʼ xkʼot ta jtojolaltik kʼalal oy kʼusi tsnit koʼontontik sventa mu jchʼunbetik smantal li Diose (kʼelo 1 Corintios 10:6-10). Li j-israeletike xuʼ van tsal yuʼunik li prevae, pe tsʼujik ta pichʼ-oʼontonal kʼalal la skʼanik li «cʼusi chopol[e]». Jech ikʼot ta pasel kʼalal akʼbat x-ub mutetik yuʼun Jeova yoʼ xveʼik-o sjunul ue. Akʼo mi jal xaʼox muʼyuk stiʼojik bekʼet, lek makʼlinbilik, yuʼun oy yuʼunik epal maná. Pe itsʼujik li ta pichʼ-oʼontonal kʼalal jaʼ bat-o yoʼontonik stsobel li mutetike (Núm. 11:19, 20, 31-35).
18 Kʼalal skʼan toʼox xkʼot ta pasel taje, kʼalal jaʼo yakal chichʼ li Mantal ta vits Sinaí li Moisese, li j-israeletike lik yichʼik ta mukʼ jun jecheʼ dios, laj yichʼik ta mukʼ jkot chʼiom tot vakax xchiʼuk lik spasik kʼusi tskʼan sbekʼtalik. Ta skoj ti muʼyuk te skʼelojik li buchʼu chbeiltasatike, mas to tsatsaj yaʼiik li preva taje (Éxo. 32:1, 6). Ta tsʼakale, kʼalal jutuk xaʼox skʼan x-ochik li ta Albil Balumile, ta smilal noʼox viniketik loʼlabat yoʼontonik yuʼun jmoab tsebetik, lik mulivajikuk xchiʼukik, vaʼun chamik ta skoj li smulike (Núm. 25:1, 9). Xchiʼuk xtok, li jteklume tsʼujik ta preva kʼalal likik ta vulajetel ta skoj ti tstoy sbaike. Ta melel, jun veltae maʼuk noʼox chopol kʼopojik ta stojolal Moisés, yuʼun jaʼ la xchopol kʼoptaik stuk li Jeovae (Núm. 21:5). Li kʼusi mas to chopole, jaʼ ti laj yalik ti muʼyuk lek ti laj yichʼ milel li jtoyba Coré, Datán, Abiram xchiʼuk li xchiʼiltakike. Ta skoj taje 14,700 krixchanoetik lajik ta milel yuʼun Jeova (Núm. 16:41, 49).
19 Maʼuk ti mu stsal yuʼunik li prevaetik taje. Li j-israeletike tsʼujik ta skoj ti chʼabal xa xchʼunel yoʼontonik ta stojolal Jeovae, ti chʼay ta sjolik kʼuyelan chabiatike xchiʼuk li stukʼil mantaltake. Jech kʼuchaʼal li j-israeletike, li prevaetik ta jnuptantike jech onoʼox chkʼot ta stojolal li krixchanoetike. Jaʼ yuʼun, mi chkakʼtik persa stsalele, kʼalal ta jsaʼtik koltael ta stojolal li Jeovae, tukʼ-o me chkakʼ jbatik. Xuʼ jchʼuntik ta melel, yuʼun «li Diose mu snaʼ sjel yoʼnton» xchiʼuk «mu xacʼ taluc ta [s]tojolic tsots preva ti me mu xa stsʼic [yuʼunik] chile». Li stuke muʼyuk tskomtsanutik; muʼyuk chakʼ akʼo jnuptantik li kʼusitik mu xa stsʼik kuʼuntik sventa ta jpastik li kʼusi tskʼan yoʼontone (Sal. 94:14).
20, 21. ¿Kʼu yelan chakʼ kiltik Dios kʼuxi xuʼ xi jkolutik lokʼel kʼalal ta jnuptantik prevae?
20 Kʼalal chakʼ kipaltik sventa chkuch kuʼuntik junuk preva li Jeovae, yakal chakʼ kiltik kʼuxi xuʼ chi jkolutik lokʼel. Jnoptik avaʼi ta sventa li kontrainele. Li kajkontratike xuʼ van chilbajinutik sventa jvalopatintik komel li kʼusitik jchʼunojtike. Kʼalal jech chkiltik ilbajinele, xuʼ van ta jpastik li kʼusi chalbutik sventa mu xi jlaj ta majel, ilbajinel o ta milele. Pe jech kʼuchaʼal laj yal Pablo ta 1 Corintios 10:13, yalojbutik ta melel Dios ti mu teuk sbatel osil li prevaetike. Li Jeovae muʼyuk chakʼ ti akʼo stsatsaj tajek li prevaetike, ti mu xa xuʼ tukʼ chkakʼ jbatik ta stojolale. Xuʼ stsatsubtas xchʼunel koʼontontik xchiʼuk ti kʼuyelan oyutik ta mantal sventa tukʼ-o xkakʼ jbatike.
21 Li Jeovae tskoltautik ta xchʼul espiritu. Jech xtok, ta stojolal taje tskoltautik ta svulesel ta joltik tekstoetik ta Vivlia sventa chkuch kuʼuntik li prevaetike (Juan 14:26). Jech taje, muʼyuk chi jlokʼ li ta lekil bee. Jech kʼuchaʼal liʼe, jnaʼojtik ti oy chaʼtos kʼusi laj yichʼ chibal kʼoptael ti stsakojbe sba skʼoplale: li mukʼul pas mantal yuʼun Dios xchiʼuk li stukʼilal krixchanoetike. Snaʼel taje skoltaoj epal yajtuneltak Dios sventa tukʼ xakʼ sbaik kʼalal to ta lajelal. ¿Kʼusi koltaatik-o lokʼel li ta prevaetike? Maʼuk li lajelale. Li kʼusi koltaatik sventa tukʼ-o xakʼ sbaik kʼalal to ta slajebale jaʼ ti koltaatik yuʼun Jeovae. Jaʼ jech xuʼ skoltautik ek. Ta melel, li stuke tstunes yaj-anjeltak ti «tacbilic noʼox yuʼun Dios, yuʼun acʼo bat scoltaic li bochʼotic scʼoplal chcolic sbatel osile» (Heb. 1:14). Jech kʼuchaʼal ta jkʼeltik li ta yan xchanobil chtale, oy jun jmotontik: jaʼ ti xuʼ jpakbetik skʼoplal sbatel osil li mukʼul pas mantal yuʼun Diose. Pe taje, jaʼ noʼox me xuʼ kuʼuntik mi tukʼ-o koʼontontik xchiʼuk mi ta jchʼamtik skotol ora kʼuchaʼal Mukʼul Jpasmantal kuʼuntik li Jeovae.
¿Kʼusi ta jtakʼtik?
• ¿Kʼu yuʼun skʼan jchʼamtik kʼuchaʼal Mukʼul Jpasmantal kuʼuntik li Jeovae?
• ¿Kʼusi smakoj ti tukʼ koʼontontike?
• ¿Kʼuxi jnaʼojtik ti poʼot xa tspakbe skʼoplal Jeova ti laj yichʼ chibal kʼoptabel li mukʼul pas mantal yuʼune?
• ¿Kʼuxi chakʼ ta ilel 1 Corintios 10:13 ti xuʼ tukʼ-o koʼonton chkakʼ jbatike?
[Sjakʼobiltak sventa xchanobil]
[Lokʼol ta pajina 24]
Li Satanase la stijbe yoʼonton Adán xchiʼuk Eva sventa mu xa tukʼuk yoʼontonik ta stojolal Jeova
[Lokʼol ta pajina 26]
Skʼan me jpʼel-o ta koʼontontik jpakbetik skʼoplal li mukʼul pas mantal yuʼun Jeovae