Jehovah e Ir e Somol Rodad ni Th’abi Tolang!

U charen Somol Nib Th’abi Tolang e kug par riy ndabi buch ban’en rog.—PS. 73:28, BT.

1. Mang e be yip’ fan e thin rok Paul ni bay ko 1 Korinth 7:31?

 “RAROGON e fayleng e be thil i yan.” Ireray e n’en ni yog apostal Paul. (1 Kor. 7:31, NW) Ba tamilang ni ke taarebrogonnag Paul e fayleng nga reb e drama ni bay e girdi’ riy ni be yan u yaan e ngongol nib fel’ ara kireb ke mada’ ko ngiyal’ ni ke thil yaan fare drama. *

2, 3. (a) Mang e kan taarebrogonnag ko fare togopuluw ni yibe tay nga mat’awun e gagiyeg rok Jehovah ni th’abi tolang? (b) Mang boch e deer ni yira weliy?

² Ngiyal’ ney e ma buch boch ban’en ni bod yaan e drama ni ka gab muun ngay. Ma ba ga’ ni yibe dag riy rogon ni nge gagiyel mat’awun Jehovah. Re n’ey e rayog ni ngan taarebrogonnag nga reb e magawon ni sana riyul’ ni be buch u reb e nam. Susun ni bay reb e am nib fel’ ni be ayuweg e re nam nem. Machane bay reb e ulung ko girdi’ ni be togopuluw ko re am nem ma be gagiyegnag e girdi’ u fithik’ e sasalap, ma dariy e runguy rorad, ma ku yad ma chel ngaur lied e girdi’. Ere re ulung ney e be magawonnag fare am ko re nam nem ma be skengnag e yul’yul’ ko girdi’ ni ma par u rom.

³ Bay e magawon ni aram rogon u tharmiy ngu fayleng. Bay e am riy nib fel’ ni “Somol nib Th’abi Tolang” e be gagiyegnag. (Ps. 71:5, BT) Machane bay reb e ulung nib kireb ni “Faanem nib Kireb” e be suweyrad. (1 John 5:19) Re ulung ney nib kireb e be magawonnag e am rok Got nib fel’ ma be skengnag e yul’yul’ rok urngin e girdi’ ko re am nem. Uw rogon me m’ug e re magawon ney? Mang fan ni ke pag Got ni nge yib e magawon ni aram rogon? Mang e rayog ni nge rin’ be’ nge be’ ko re magawon ney?

Boch Ban’en ni Be Buch ko fare Drama

4. Mang l’agruw ban’en ni bang ko n’en ni buch ni bod e n’en ni yima rin’ u nap’an e drama nib l’ag reb nga reb?

⁴ Re n’ey ni be buch ni kan taarebrogonnag ko drama e bay l’agruw ban’en riy nib l’ag reb nga reb ni aram e gagiyeg rok Jehovah ni th’abi tolang nge yul’yul’ ni ma tay e girdi’. U lan e Bible e yima pining e “Somol Nib Th’abi Tolang” ngak Jehovah. Ma fare psalmist ni kari pagan’ ngak Jehovah e ke yon’ reb e tang ni gaar: “U charen Somol Nib Th’abi Tolang e kug par riy ndabi buch ban’en rog.” (Ps. 73:28, BT) Be’ ni be gagiyeg ni ir e th’abi tolang e be yip’ fan ni dariy be’ ni kab tolang ngak. Ere boor fan ni ngad sapgad  ngak Jehovah ni ir e Got ni Th’abi Tolang.—Dan. 7:22.

5. Mang fan ni ngad adaged ni ngad n’ufed e gagiyeg rok Jehovah ni ir e th’abi tolang?

⁵ Bochan ni Jehovah e ir e ke Sunmiy urngin ban’en u tharmiy ngu fayleng ma ir e Got ni Th’abi Tolang. (Mu beeg e Revelation 4:11.) Maku ir e tapuf oloboch rodad, ma ir e ma pi’ e motochiyel, ma ir e pilung rodad. (Isa. 33:22) Bochan ni Got e ir e ke pi’ e yafas ngodad ma gad be taga’ ngak, ere thingar da sapgad ngak ni ir e Somol rodad ni Th’abi Tolang. Ra k’aringdad ni ngad n’ufed e liw rok nib tolang ni faanra gubin ngiyal’ ni ngad lemnaged ni ir e ‘Somol ni ke yan i ngongliy tagil’ nga tharmiy; ma ir e pilung rok urngin e girdi’.’—Ps. 103:19; Acts 4:24.

6. Mang e be yip’ fan e yul’yul’?

⁶ Rayog ni ngad n’ufed e gagiyeg rok Jehovah ni faanra da pared ni gadad ba yul’yul’ ngak. “Yul’yul’” e be yip’ fan ni ngan athamgil ngan rin’ e tin nib fel’ ni gubin ngiyal’. Be’ nib yul’yul’ e be’ nib manigil ma ma athamgil ni nge dabi rin’ e tin nib kireb ni bod rogon Job.—Job 1:1.

Uw Rogon ni Tabab fare Drama

7, 8. Uw rogon ni ke togopuluw Satan nga mat’awun e gagiyeg rok Jehovah ni ir e th’abi tolang?

⁷ Sogonap’an 6,000 e duw ni ke yan, me togopuluw reb e engel nga mat’awun e gagiyeg rok Jehovah. Ke rin’ ni aram rogon ni bochan e baadag ni nge liyor e girdi’ ngak. Ke waliy Adam nge Efa ni ngar piew keru’row ko gagiyeg rok Got ma ke guy rogon ni nge kirebnag fithingan Jehovah, ma ki yog ni ke bannagrow Jehovah. (Mu beeg e Genesis 3:1-5.) Fare engel ni togopuluw ngak Jehovah e ke mang Satan (Tatogopuluw), porchoyog (sasalap), nge dragon (en ni be gay be’ ni nge longuy).—Rev. 12:9.

⁸ Ere ke tay Satan ir ni nge mang pilung nib togopuluw ku Got. Ere mang e ra rin’ Jehovah? Gur, ra gur Jehovah nge thang owchen Satan, Adam, nge Efa? Riyul’ ni bay gelngin ni nge thangrad, machane faanra rin’ ni aram rogon ma rayog ni nge gagiyel ko mini’ e th’abi gel gelngin. Maku ra gagiyel e n’en ni ke yog Jehovah ni yira gechignag e girdi’ nra th’ab e motochiyel rok. Machane mang fan ni de thangrad Jehovah e ngiyal’ nem?

9. Mang e ke tay Satan nga laniyan’ e pi engel nge girdi’?

⁹ Bochan ni ke yog rok Satan ni nge bannag Adam nge Efa kar piew keru’row ngak Got, ere ke tay nga laniyan’ e pi engel nge girdi’ ni dariy mat’awun Jehovah ni nge yog ngak e girdi’ ko mang e thingar ra rin’ed. Maku ke tay nga laniyan’ e pi engel nge girdi’ ni dabiyog ni ngar pared ni yad ba yul’yul’ ngak Got. Taareb rogon ko n’en ni rin’ ngak Job, i yog Satan ni rayog ni nge k’aring urngin e girdi’ ngar pied keru’rad ngak Got.—Job 2:1-5.

10. Bochan ni dawori thang Got e fan rok Satan, ma mang e ke pag ni nge rin’?

¹⁰ Bochan ni de thang Jehovah Satan e ngiyal’ nem, ere ke pi’ e tayim ngak ni nge micheg ko riyul’ e n’en ni ke yog fa danga’. Maku ki bing Got e kanawo’ ngak e girdi’ ni ngar micheged ko riyul’ ni yad ba yul’yul’ ngak, fa. Mang e ke buch u tomuren bokum biyu’ e duw ni ke yan? Ke yog rok Satan ni nge sunmiy reb e ulung nib kireb, mab gel gelngin. Boch nga m’on ma ra thang Jehovah e re ulung nem, ma ra gagiyel ni ir e bay mat’awun ni nge gagiyeg. Rib mudugil u wan’ Jehovah nra buch ni aram rogon, ya ireray e n’en ni ke yog u nap’an fare togopuluw nni tay u Eden.—Gen. 3:15.

11. Mang e ke rin’ boor e girdi’ ni bay rogon ko gagiyeg rok Jehovah ni ir e th’abi tolang?

¹¹ Boor e girdi’ ni kar maruweliyed e michan’ rorad ngak Got, ma kar pared nib yul’yul’ nga mat’awun e gagiyeg rok Jehovah ma kar pininged e sorok nga fithingan. Ba muun ngay Abel, Enok, Noah, Abraham, Sarah, Moses, Ruth, David, Jesus, nge pi gachalpen kakrom nge bokum biyu’ e girdi’ nib yul’yul’ e ngiyal’ ney. Pi cha’ ney e kar micheged ni Satan e ba malulfith ma kar gagiyelnaged ni dariy ban’en nib kireb ni ke rin’ Jehovah.—Prov. 27:11.

Gad Manang Rogon nra M’ay fare Drama

12. Uw rogon ni nge mudugilan’dad ndabi pag Got e kireb ni nge par ndariy n’umngin nap’an?

¹² Rayog ni nge mudugilan’dad ni dabki n’uw nap’an ma ra gagiyelnag Jehovah ni ir e ta  gagiyeg ni th’abi tolang. Dabi pag e piin nib kireb ndabi thangrad, ma gad manang ni gad be par ko tin tomuren e rran. Ke thang Jehovah e piin kireb u nap’an Noah. Ki gothey yu Sodom nge Gomorrah nge Farao nge pi salthaw rok. Sisera nge pi salthaw rok nge Sennacherib nge pi salthaw rok e dar gelgad ngak Got ni Th’abi Tolang. (Gen. 7:1, 23; 19:24, 25; Ex. 14:30, 31; Judg. 4:15, 16; 2 Ki. 19:35, 36) Ere rayog ni nge pagan’dad nra thang Jehovah e piin ni yad be darifannag fithingan maku yad be gafgownag e Pi Mich Rok. Maku gad be guy e chiney fare pow ni bay Jesus, maku ireray fare pow ni gad bay u tungun e re m’ag nib kireb ney.—Matt. 24:3.

13. Uw rogon ni ngad mageygad ni gad ba fas u nap’an nra thang Jehovah e pi toogor rok?

¹³ Thingar da micheged ni gadad ba yul’yul’ ko gagiyeg rok Jehovah, ma aram e rayog ni ngad mageygad ni gad ba fas u nap’an nra thang Got e pi toogor rok. Uw rogon? Dabda uned ko gagiyeg rok Satan nib kireb, maku dab da rusgad ko piin ni yad ma fol rok. (Isa. 52:11; John 17:16; Acts 5:29) Kemus ni ireray e kanawo’ nrayog ni ngad ayuweged ni nge gagiyel mat’awun Jehovah ko gagiyeg maku rayog ni ngad mageygad nib fas u nap’an nra dag Jehovah ni ir fare Got u tharmiy ngu fayleng ni th’abi gel gelngin.

14. Mang e ke tamilang u yu yang u Bible?

¹⁴ Thin nu Bible e be weliy murung’agen e girdi’ nge gagiyeg rok Jehovah ni ir e th’abi tolang. Fa dalip ni m’on e guruy ko Bible e be weliy rogon ni kan sunmiy urngin ban’en, nge rogon ni ke denen e girdi’, ma fa dalip ni tomur e guruy ko Bible e be weliy rogon ni kan sulweg e girdi’ nga rogon. Ma tin ni bay nga lukngun e pi guruy ney e be weliy murung’agen e pi n’en ni ke rin’ Jehovah ni fan e nge lebguy e tin nib m’agan’ ngay ni fan ko girdi’ nge fayleng nge tharmiy. Thin ko Genesis e be weliy rogon ni yib Satan nge tin nib kireb ban’en nga fayleng, ma tin tomur e thin ko Revelation e be dag rogon ni yira chuweg fare Moonyan’ nge urngin e tin nib kireb ma aram e rayog ni nge lebguy Got e tin nib m’agan’ ngay u fayleng nge tharmiy. Riyul’ ni be weliy e Bible e n’en ni ke k’aring e denen nge yam’ maku be tamilangnag ko uw rogon ni ngan chuweg e denen nge yam’ u fayleng ma felfelan’ nib gel nge yafas ni manemus ni fan ko girdi’ nib yul’yul’ e yira tay nga lon.

15. Uw rogon nra fel’ rogodad u nap’an nra m’ay fare drama ni be dag yaan e gagiyeg rok Jehovah ni ir e th’abi tolang?

¹⁵ Dabki n’uw nap’an ma ra thil rarogon urngin ban’en ko re fayleng ney. Ma ra m’ay fare drama ni be dag rogon yaan ni kan togopuluw ko gagiyeg rok Jehovah. Dabki gagiyeg Satan ma ra munmun ma yira thang, me lebug e tin nib m’agan’ Got ngay. Machane rayog ni nge yog ngodad e pi tow’ath ni be weliy e thin rok Got murung’agen, ma aram e thingar da n’ufed e gagiyeg rok Jehovah e chiney. Dabiyog ni ngad pared u mathilin. Thingar da pared u ba’ rok Jehovah ma rayog ni nga dogned ni ‘Somol e ba’ rodad.’—Ps. 118:6, 7. 

 Rayog ni Ngad Pared ni Gad Ba Yul’yul’

16. Uw rogon ni nge mudugilan’dad ni rayog ko girdi’ ni ngar pared ni yad ba yul’yul’ ku Got?

¹⁶ Rayog ni ngad n’ufed e gagiyeg rok Jehovah ma ngad pared ni gad ba yul’yul’ ngak, ya yoloy apostal Paul ni gaar: “Urngin e n’en ni ma waliy e girdi’ nge denen ni ke yib ngomed e ereyer e mit i n’en ni ka ma yib ngak e girdi’. Yi Got e dabi thilyeg e tin ni ke yog nra rin’ ngodad, ma dabiyog ni nge pagmed nge yib ngomed e pi n’en ni ma waliy e girdi’ nge denen nge pag rogon ndabiyog romed ni ngam taleged gimed riy; machane re ngiyal’ i n’em e ra pi’ gelngimed ngam k’adedan’med riy, ni aram e ke pi’ e kanawo’ ngomed ni ngam bad riy nga wuru’ e pi n’em.” (1 Kor. 10:13) Uw e yib e skeng riy ni weliy Paul murung’agen? Ma uw rogon ni ma ayuwegdad Got nge yog ni ngad bad nga wuru’ e pi n’em?

17-19. (a) Mang skeng e ke yib ngak piyu Israel ni ke warnagrad? (b) Mang fan nrayog ni ngad pared ni gad ba yul’yul’ ngak Jehovah?

¹⁷ Rogon e n’en ni buch rok piyu Israel u daken e ted e be dag ni fare skeng e ma yib u ba ngiyal’ ni bay e magawon ni ke sum nra k’aring e girdi’ ni ngar th’abed e motochiyel rok Got. (Mu beeg e 1 Korinth 10:6-10.) Piyu Israel e susun ni rayog ni ngar gelgad ko skeng machane kar m’ad ni bochan e “tin nib kireb ban’en” u nap’an ni pi’ Jehovah e arche’ ni quail ni ngar longuyed u lan taareb e pul. Yugu aram rogon ni ke n’uw nap’an ni dar ked e ufin, machane ba gaman e manna ni ke pi’ Got ngorad ni ngar ked. Kar chogownaged fapi arche’ u nap’an nra kunuyed.—Num. 11:19, 20, 31-35.

¹⁸ Nap’an ni kan pi’ fapi Motochiyel ngak Moses u daken fare burey ni Sinai ma piyu Israel e kar liyorgad ko fare liyos ni yaan e garbaw ma kar uned ko ngongol ni darngal. Bochan ni de moy Moses ma aram me yib e skeng ngorad ma kar meewargad. (Ex. 32:1, 6) Nap’an ni kar chugurgad ko fare Binaw ni Kan Micheg, ma bokum biyu’ e pumoon nu Israel ni kar uned ko ppin nu Moab ma aram e kar uned ko ngongol ni darngal. Ngiyal’ nem e bokum biyu’ e girdi’ nu Israel ni kar m’ad ni bochan e denen rorad. (Num. 25:1, 9) Yu ngiyal’, ma girdi’ nu Israel e yad ma gun’gun’ nib gel ma yad ma yog e thin nib togopuluw ngak Moses nge Got. (Num. 21:5) Maku kar gun’gun’gad u tomuren ni kan thang e fan rok Korah, Dathan, Abiram, nge boch e girdi’ ni kar uned ngorad, ka rogned ni de mat’aw e n’en ni ke rin’ Got ngorad. Wenegan ni yib riy e urngin e girdi’ u gubin nra m’ad e yad 14,700 ni bochan e ke gechignagrad Got.—Num. 16:41, 49.

¹⁹ Pi n’em ni ke waliy piyu Israel e susun ndariy reb riy ndabiyog ni ngar gelgad ngay. Machane kar rin’ed e tin nib kireb ni bochan e ke war e michan’ rorad ma kar paged talin Jehovah nge rogon ni ma ayuwegrad u fithik’ e t’ufeg mab mat’aw e kanawo’ rok. Bod rogon piyu Israel, ma pi skeng ni ma yib ngodad e chiney e aram ban’en nib ga’ ni ma yib ngak e girdi’. Faanra ngad athamgilgad ngad gelgad ko pi skeng nem ma nge pagan’dad ngak Got ma aram e rayog ni ngad pared ni gad ba yul’yul’ ngak. Rayog ni nge mudugilan’dad ni aram rogon ni bochan e “Got e dabi thilyeg e tin ni ke yog” ma dabi pagdad nge ‘yib e pi n’en ni ma waliy e girdi’ nge denen nge pag rogon.’ Dabi pagdad Jehovah ni nge yib e magawon ngodad nrib gel ndabkiyog ni ngad rin’ed e tin nib m’agan’ ngay.—Ps. 94:14.

20, 21. Nap’an ni yira skengnagdad, ma uw rogon ni nge pi’ Jehovah e “kanawo’” ni ngad pared ni gad ba yul’yul’ ngak?

²⁰ Ma pi’ Jehovah gelngidad ni ngad gelgad  ko skeng ya ireray e ‘kanawo’ ni rayog ni ngad bad riy nga wuru’ e pi n’em.’ Sana ra gafgownagdad e pi ta togopuluw, ya yad be gay rogon ni ngad paged e michan’ rodad. Yira gafgownagdad ni bod ni ngaun li’dad, ma yibe rin’ boch ban’en ngodad ni nga i amith dowdad riy ma rayog ni nge k’aringdad ngad paged e michan’ rodad. Machane gad manang ni thin ni ke yog Paul ko 1 Korinth 10:13 e be micheg ngodad ni skeng ni ma yib ngodad e bay n’umngin nap’an. Dabi pag Jehovah nge yib e skeng ngodad nge pag rogon ni dabkiyog rodad. Rayog ni nge gelnag Got e michan’ rodad ya ireray e n’en nib t’uf rodad ni nge yog ni ngad pared ni gad ba yul’yul’.

²¹ Ma fanay Jehovah gelngin nib thothup ni nge ayuwegdad. Re gelngin nem e ku ra ayuwegdad ni nge yib ngan’dad boch e thin nu Bible nra ayuwegdad u nap’an nra yib e skeng ngodad. (John 14:26) Ere arfan ni ka gadad be fol ko kanawo’ nib mat’aw. Ni bod ni ke tamilangan’dad u murung’agen e gagiyeg rok Jehovah ni ir e th’abi tolang nge murung’agen e yul’yul’ ko girdi’. Bochan e re tamilangan’ nem ma boor e girdi’ ni kar pared nib yul’yul’ ngak Got nge mada’ ko yam’. Machane gathi kar gelgad ko skeng ni bochan ni kar mad, ya bochan e ayuw rok Jehovah ma kar k’adedan’rad ko skeng. Ku rayog ni nge ayuwegdad Jehovah ni aram rogon. Ku ma ayuwegdad Jehovah u daken e pi engel rok nib yul’yul’, “ya ma l’ograd ngar ayuweged e piin ni ngar thapgad ngak Got.” (Heb. 1:14) Bod e n’en ni be weliy e bin migid e thin, kemus ni piin nib yul’yul’ e bay e athap rorad ni ngar n’ufed fare gagiyeg rok Got ni dariy n’umngin nap’an. Rayog ni ngad uned ngorad ni faanra ngad pared ni gad ba yul’yul’ ngak Jehovah ni ir e Somol rodad ni Th’abi Gel Gelngin.

[Footnote]

Uw Rogon ni Ga Ra Fulweg?

• Mang fan ni thingar da sapgad ngak Jehovah ni ir e Somol rodad ni Th’abi Gel Gelngin?

• Mang e be yip’ fan ni ngaud pared ni gad ba yul’yul’ ngak Got?

• Uw rogon ni gad ra nang ni dab ki n’uw nap’an ma ra dag Jehovah gelngin ni th’abi gel?

• Rogon ni bay ko 1 Korinth 10:13, mang fan nrayog rodad ni ngad pared ni gad ba yul’yul’?

[Study Questions]

[Picture on page 24]

Satan e ke k’aring Adam nge Efa ni nge dab kur parew ni yow ba yul’yul’ ngak Jehovah

[Picture on page 26]

Ngam dugliy u wan’um ni ngam n’uf e gagiyeg rok Jehovah