!Oltaem Bambae Yumi Holemstrong Long Jeova!

“Long saed blong mi, oltaem bambae mi mi holemstrong long yu.”—SAM 26:11, NW.

1, 2. ?Job i talem wanem long saed blong ol gudfala fasin blong hem? ?Job japta 31 i soemaot wanem long saed blong Job?

LONG taem bifo, skel we ol man oli yusum blong skelem gol, silva, mo kakae, i wan longfala aean we tu trei i hang long tufala en blong hem. Long medel blong aean ya stret, i gat wan pin we aean ya i stanap long hem. Long wan trei, oli putum gol no narafala samting we oli wantem skelem, mo long narafala trei oli putum wan bol blong skel. Ol man blong God oli yusum ol skel mo ol bol blong skel we oli stret gud, oli no stap giaman long ol man.—Prov. 11:1.

² Taem Setan i stap traem blong spolem gudfala man ya Job, Job i talem se: “I gud God i skelem laef blong mi long skel we i stret gud, nao bambae hem i save luk we mi mi no mekem samting nogud nating.” (Job 31:6) * Job i tokbaot plante samting we oli save traem wan man, se bambae hem i holemstrong long God no nogat. Job i winim ol samting we oli traem hem mo hem i holemstrong long God, olsem ol tok blong hem long Job japta 31 oli soemaot. Gudfala eksampol ya blong Job i save pulum yumi blong mekem sem samting. Mo yumi save toktok wetem strong bilif blong talem sem samting we Deved i talem long Sam ya, se: “Long saed blong mi, oltaem bambae mi mi holemstrong long [God].”—Sam 26:11, NW.

3. ?From wanem i impoten blong mekem i stret long ol bigfala samting mo ol smol samting tu?

³ Nating se Job i kasem ol bigfala trabol we oli mekem hem i harem nogud tumas, be hem i no lego God. Job i soemaot long nambawan fasin olsem wanem ol man oli save holemstrong long Jeova long taem blong bigfala trabol. Maet yumi no kasem ol trabol we oli sem mak long trabol we Job i kasem. Be sipos yumi wantem holemstrong long God mo leftemap hae rul blong hem, yumi mas mekem i stret long ol bigfala samting mo ol smol samting tu.—Ridim Luk 16:10.

Fasin Blong Man Wetem Woman i Mas Stret

4, 5. From we Job i holemstrong long God, ?hem i no mekem wanem?

⁴ Blong holemstrong long Jeova, fasin blong man wetem woman i mas stret, olsem Job i mekem. Job i talem se: “Mi mi mekem wan strong promes finis, se sipos mi luk wan gel, bambae mi no save tingting nogud long hem. Sipos mi stap tingting nogud long woman blong fren blong mi, nao mi kalkal, mi go haed, mi stap wet long doa blong hem, i gud woman blong mi i go kukum kakae blong narafala man, mo i slip long bed blong hem.”—Job 31:1, 9, 10.

⁵ Job i gat strong tingting blong holemstrong long God. Taswe hem i no save lukluk wan woman wetem tingting we i no stret. Job i mared finis. Hem i no save mekem samting blong traem pulum wan gel we i no mared blong i laekem hem, mo hem i no save tingting nogud long woman blong narafala man. Long Bigfala Toktok blong Jisas antap long hil, hem i talem ol strong tok long saed blong fasin blong man wetem woman. Tru ya, ol man we oli wantem holemstrong long Jeova, oli no mas fogetem ol tok blong hem.—Ridim Matiu 5:27, 28.

Yumi No Mas Folem Ol Rod Blong Giaman

6, 7. (a) ?Long wanem fasin God i skelem laef blong Job, mo blong yumi tu? (b) ?From wanem yumi no mas folem ol rod blong giaman?

⁶ Blong stap olsem ol man we oli holemstrong long Jeova, yumi no mas folem ol rod blong giaman. (Ridim Ol Sam 5:6.) Job i talem se: “Neva mi mi mekem samting nogud, mo neva mi giaman long narafala man. I gud God i skelem laef blong mi long skel we i stret gud, nao bambae hem i save luk we mi mi no mekem samting nogud nating.” (Job 31:5, 6) Jeova i stap skelem laef blong man long “skel we i stret gud.” Fasin blong God blong jajem man i stret gud olgeta. Hem i skelem laef blong ol man blong hem long fasin we i stret gud, blong luk sipos oli stap holemstrong long hem, olsem hem i mekem long Job.

⁷ Sipos yumi stat blong folem sam rod blong  giaman, yumi no moa stap holemstrong long God. Ol man we oli holemstrong long God oli “lego finis ol fasin blong haed, mo blong sem,” mo oli “no save mekem ol giaman fasin.” (2 Kor. 4:1, 2) ?Olsem wanem sipos wan Kristin brata no sista blong yumi i harem nogud long sam giaman toktok we yumi talem no giaman fasin we yumi mekem, nao hem i mas singaot God blong i givhan long hem? !Sipos yumi mekem wan narafala Kristin i harem nogud olsem, sore tumas long yumi! !Bambae yumi kasem frut we i nogud tumas! Man blong raetem Sam i singsing se: “Taem mi mi stap long trabol, mi krae long Hae God, mo hem i harem krae blong mi. Mi talem se, ‘Hae God, plis yu blokemgud mi blong ol man blong giaman mo ol man blong mekem trik oli no save spolem mi.’” (Sam 120:1, 2) Yumi no mas fogetem se God i save lukluk mo ‘jajem ol tingting blong yumi mo ol samting we yumi wantem.’ Nao hem i save faenemaot sipos i tru we yumi stap holemstrong long hem, no nogat.—Sam 7:8, 9.

Yumi Mas Mekem Ol Gudfala Fasin Long Narafala

8. ?Job i mekem olsem wanem long ol narafala?

⁸ Blong holemstrong long God, yumi mas gat fasin olsem Job. Job i mekem i stret long narafala, hem i mekem tingting blong hem i stap daon, mo hem i tingbaot narafala. Job i talem se: “Taem man blong wok blong mi, no woman blong wok blong mi i harem nogud long sam samting, nao i kam talemaot samting ya long mi, oltaem mi mi stap lesin long hem, mo mi stap mekem i stret long hem. ?Sipos mi no mekem olsem, bambae mi save kam long fes blong God olsem wanem? ?Sipos God i jajem mi, bambae mi mi talem wanem? God ya we i mekem mi, hem i sem God ya nomo we i mekem olgeta.”—Job 31:13-15.

9. ?Job i mekem wanem fasin long ol man blong wok blong hem? ?Yumi mas mekem olsem wanem long saed ya?

⁹ I luk olsem se, long taem blong Job, i no gat plante tumas strong rul we oli folem blong mekem kot. Oli mekem kot long fasin we i stret nomo, mo sipos ol slef oli harem nogud long samting we narafala i mekem long olgeta, olgeta tu oli save askem long kot blong i jajem bisnes ya. Job i sore long ol man blong wok blong hem mo i mekem i stret long olgeta. Sipos yumi wantem holemstrong long Jeova, yumi mas gat sem fasin, antap moa, sipos yumi stap mekem wok blong elda long Kristin kongregesen.

Yumi Mas Glad Blong Givim Samting, Yumi No Mas Wantem Plante Samting Tumas

10, 11. (a) ?Wanem i soemaot se Job i glad blong givim samting long narafala mo givhan long narafala? (b) Ol tok long Job 31:16-25 i mekem yumi tingbaot wanem narafala advaes long Baebol?

¹⁰ Job i glad blong givim samting long narafala, mo blong givhan long narafala. Hem i no traem kasem ol samting blong hem wan nomo, mo i no stap wantem samting blong narafala. Job i talem se: “Neva mi stap lukluk nating long ol wido we tingting blong olgeta i foldaon. Taem mi mi stap kakae, neva mi letem ol pikinini we papa blong olgeta i ded oli stap hanggri. . . . Taem mi luk ol man we oli pua tumas, we oli no save pem klos, oltaem mi stap givim klos long olgeta. . . . Sipos mi stap giaman long pikinini we papa blong hem i ded, blong mi tekemaot olting we hem i gat raet long hem from we mi save se bambae mi mi win long kot, i gud God i brekem tufala han blong mi, i pulumaot tufala long solda blong mi.” Sipos Job i ‘putum tingting blong hem i stap long ol gol blong hem,’ bambae hem i no save mekem i stret long narafala man olsem hem i stap mekem.—Job 31:16-25.

¹¹ Ol tok ya blong Job oli save mekem yumi tingbaot ol tok blong disaepol Jemes, se: “God i Papa blong yumi, mo prapa fasin blong ona long hem, we hem i luk se i klin gud mo i stret gud i olsem. Man i mas givhan long ol pikinini we oli no gat papa blong olgeta, mo long ol widowoman, long ol trabol we i kasem olgeta. Mo hem i mas lukaot gud long laef blong hem, blong i stap klin oltaem, we bambae ol rabis fasin blong wol i no spolem hem.” (Jem. 1:27) Maet yumi tingbaot woning blong Jisas tu se: “Yufala i lukaot gud. Yufala i mas blokem olgeta fasin ya we yufala i wantem samting blong narafala man. Maet man i gat plante samting blong hem, be stamba blong prapa laef blong man i no stap long ol samting ya.” Nao Jisas i talem wan parabol long saed blong wan rijman we i wantem plante samting, be ‘long fes blong God man ya i no rijman nating.’ (Luk 12:15-21) Blong holemstrong long God, yumi no mas mekem sin ya blong wantem plante samting tumas mo blong wantem samting blong narafala. Taem wan man i wantem evri samting, i olsem we hem i stap mekem wosip long wan aedol. Hem i no moa tingting long Jeova, be hem i tingting long samting we hem i wantem, nao samting ya i kam olsem wan aedol. (Kol. 3:5) !Tru ya, man we i wantem plante samting tumas i no stap holemstrong long Jeova!

 Yumi Mas Holemtaet Tru Wosip

12, 13. ?Long wanem fasin, Job i soemaot eksampol blong stap longwe long wosip blong ol aedol?

¹² Man blong holemstrong long God i no save lego tru wosip. Job i no save mekem olsem, hem i talem se: “San i saen we i saen, mo mun i stap saen gud tumas, be neva mi mekem wosip long wan long tufala. !Neva wan samting i pulum tingting blong mi blong mi mekem wosip long wan long tufala! !Mi no save leftemap han blong mi blong soemaot we mi ona long tufala! !Sin olsemia, ded nomo i stret panis blong hem! God i hae tumas, mo sin ya i soemaot we man i no bilif long hem.”—Job 31:26-28.

¹³ Job i no save mekem wosip long ol samting we oli no laef. Maet yumi tingbaot sipos Job i lukluk mun mo ol narafala samting long skae, nao tingting blong hem i pulum hem blong mekem wosip long olgeta. Ale, sipos Job ‘i leftemap han blong hem’ blong mekem wan saen blong wosipim olgeta, hem i stap mekem wosip long wan aedol, mo hem i soemaot se hem i no bilif long God. (Dut. 4:15, 19) Blong holemstrong long God, yumi mas stap longwe long wosip blong ol aedol.—Ridim 1 Jon 5:21.

Yumi No Mas Givimbak, Yumi No Mas Gat Tu Fes

14. ?Wanem i soemaot se Job i no minim blong mekem i nogud long narafala?

¹⁴ Neva Job i minim blong spolem narafala mo mekem i nogud long narafala. Sipos hem i minim blong mekem olsem, bambae hem i no wan man blong holemstrong long God. Job i talem se: “Fasin blong mi, neva mi mi glad taem ol enemi blong mi oli harem nogud, mo neva mi mi harem gud taem bigfala trabol i kasem olgeta. Neva mi foldaon long sin ya we mi prea long God blong i kilim olgeta oli ded.”—Job 31:29, 30.

15. ?From wanem yumi rong sipos yumi glad taem man we i agensem yumi i kasem trabol?

¹⁵ Stret man ya Job, neva hem i glad taem wan man we i agensem hem i kasem trabol. Waes tok we oli raetem plante yia biaen, i talem se: “Sipos enemi blong yu i kasem trabol no i stambol, i nogud yu stap glad from. Sipos yu stap glad long ol samting ya, Hae God bambae i save, nao bambae hem i no glad nating long fasin ya blong yu, mo maet hem i no save panisim enemi ya blong yu.” (Prov. 24:17, 18) Jeova i save wanem i stap long hat blong yumi. Hem i save sipos yumi stap glad taem narafala i kasem trabol. Mo hem i no glad nating long man we i mekem fasin ya. (Prov. 17:5) Sipos yumi glad taem narafala i kasem trabol, God i save agensem yumi, from we hem i talem se: “Bambae mi givimbak ol fasin ya . . . Bambae mi givim panis.”—Dut. 32:35.

16. ?Nating we yumi no rijman, be yumi save mekem wanem blong soemaot se yumi rere blong tekem narafala i kam long haos blong yumi?

¹⁶ Job i tekem ol narafala man oli go long haos blong hem, mo i mekem i gud long olgeta. (Job 31:31, 32) Nating we yumi no rijman, be yumi save ‘tekem ol Kristin oli kam yet long haos blong yumi.’ (Rom 12:13) Yumi save serem wan smol kakae nomo wetem olgeta. Yumi save tingbaot se, “sipos man i stap kakae drae nomo wetem ol man we oli lavem hem, hemia i moa gud, i winim we i stap kakae gudfala mit wetem ol man we oli no laekem hem nating, oli agens long hem.” (Prov. 15:17) Taem yumi kakae wetem wan narafala Kristin we i stap holemstrong long God mo i lavem yumi, yumi harem gud, mo yumi kam strong moa long bilif, nating se kakae i smol nomo.

17. ?From wanem yumi no mas traem haedem bigfala sin we yumi mekem?

¹⁷ Job i no gat tu fes. Samting ya i mas mekem se ol man we Job i singaot olgeta oli kam long haos blong hem, oli harem gud mo oli kam strong moa long bilif taem oli joen wetem hem. Job i no olsem sam man nogud we oli kam insaed long kongregesen long faswan handred yia. Ol man ya oli ‘stap switim ol narafala man blong mekem olgeta oli folem tingting blong olgeta.’ (Jud 3, 4, 16) Mo tu, Job i no traem kavremap ol mastik blong hem. ‘Neva hem i traem haedem sin blong hem.’ Hem i no fraet se ol narafala bambae oli laf long hem taem oli faenemaot rong blong hem. Hem i rere blong letem God i traem faenem poen long hem, mo hem i rere blong talemaot ol sin blong hem long fes blong God, olsem we i stret blong mekem. (Job 31:33-37) Sipos yumi mekem wan bigfala sin, yumi no mas traem haedem. Yumi no mas fraet se bambae yumi sem long fes blong ol man taem  oli save long sin blong yumi. ?Yumi mas mekem wanem blong soemaot se yumi stap traehad blong holemstrong long God? Yumi luksave mastik blong yumi, yumi tanem tingting blong yumi, yumi askem help blong ol elda blong kam strong bakegen, mo yumi mekem evri samting we yumi naf blong mekem blong stretem rong blong yumi.—Prov. 28:13; Jem. 5:13-15.

Job i Rere Blong Letem Ol Man Oli Traem Faenem Poen Long Hem

18, 19. (a) ?From wanem i stret blong talem se neva Job i spolem wan man? (b) ?Sipos ol man oli faenem poen long Job, hem i rere blong kasem wanem?

¹⁸ Job i no save giaman, mo hem i mekem i stret long ol narafala. Taswe hem i save talem se: “Sipos graon ya we mi stap wokem garen long hem, mi tekemaot long stret man blong hem, we mi stilim nomo, no sipos mi stap kakae ol kakae blong garen ya, be ol man we oli planem oli stap hanggri nomo, i gud wit mo bale, tufala i no moa gru long ples ya, ol gras nil mo ol rabis tri nomo bambae oli gru long hem.” (Job 31:38-40) Neva Job i stilim graon blong narafala, mo hem i no spolem ol man blong wok blong hem tu. Yumi mas mekem olsem Job, yumi mas mekem i stret long fes blong Jeova long ol bigfala samting mo long ol smol samting tu.

¹⁹ Job i toktok long trifala fren blong hem mo long yangfala man ya Elihu, long saed blong laef blong hem. Biaen, hem i talem se: “Tru mi talem long yufala, evri tok ya blong mi i tru nomo.” Hem i singaot ol man blong oli lesin long hem mo blong oli traem faenem poen long hem. Sipos oli faenem poen long hem, hem i rere blong kasem panis from. Ale, hem i talemaot evri samting, nao hem i wet long God blong i givim ansa long hem. “Ol tok blong Job i finis long ples ya.”—Job 31:35, 40.

Yu Yu Naf Blong Holemstrong Long Jeova

20, 21. (a) ?From wanem Job i holemstrong long God? (b) ?Yumi mas mekem wanem, blong yumi save lavem God?

²⁰ Job i holemstrong long God, from we hem i lavem God, mo from we Jeova i lavem hem mo i givhan long hem. Job i talem se: “Yu yu givim laef long mi, mo oltaem yu yu lavem mi. Yu yu stap lukaot gud long mi, mo oltaem, yu stap mekem we laef blong mi i stap gud.” (Job 10:12) Mo tu, Job i lavem ol narafala man. Hem i save se sipos hem i giaman nomo se hem i lavem narafala man, hem i no stap ona gud mo fraet gud long God ya we i gat olgeta paoa. (Job 6:14, NW) Yes, ol man blong holemstrong long God oli lavem God mo oli lavem ol man raonabaot long olgeta.—Mat. 22:37-40.

²¹ Yumi save lavem God sipos yumi ridim Tok blong hem evri dei, mo sipos yumi tingting dip long ol samting we Tok ya i soemaot long saed blong God. Yumi save prea wetem fulhat blong yumi blong presem Jeova, mo blong talem tangkiu long hem from ol gudfala samting we hem i mekem long yumi. (Fil. 4:6, 7) Yumi save singsing i go long Jeova, mo yumi save harem gud blong joen oltaem wetem ol man blong hem. (Hib. 10:23-25) Mo tu, bambae yumi lavem God moa, taem yumi joen long wok blong prij mo blong talemaot “gud nius ya we [God] i sevem yumi.” (Sam 96:1-3) Olgeta rod ya bambae oli givhan long yumi blong holemstrong long God, olsem man blong raetem Sam. Hem i singsing se: “Hae God, yu yu God blong mi, mo yu yu Masta blong mi. . . . Taem we mi mi kam stap klosap long yu, mi harem se i gud tumas long mi. Yu yu sefples blong mi, yu yu stap blokem mi.”—Sam 73:28.

22, 23. ?Wok blong yumi tede blong leftemap hae rul blong God, i sem mak long wok blong ol man we oli holemstrong long God bifo?

²² Long ol handred yia we oli pas finis, Jeova i givim plante defren wok long ol man we oli holemstrong long hem. Noa i bildim wan bigfala sip, mo hem i “wan prija we i stap talemaot stret fasin.” (2 Pita 2:5) Josua i lidim ol man Isrel oli go long Promes Lan. Hem i naf blong mekem bigfala wok ya from we hem i ridim “buk blong Loa . . . long dei mo long naet,” mo hem i mekem olgeta samting we buk ya i talem. (Jos. 1:7, 8) Ol Kristin long faswan handred yia oli pulum ol man oli kam disaepol blong Kraes, mo oli joen wanples oltaem blong stadi Baebol.—Mat. 28:19, 20.

²³ Yumi leftemap hae rul blong Jeova mo yumi holemstrong long hem taem yumi prij blong talemaot stret fasin, taem yumi pulum ol man oli kam disaepol blong Kraes, taem yumi mekem ol advaes blong Baebol oli wok long laef blong yumi, mo taem yumi joen wetem ol narafala Kristin long ol miting mo ol asembli. Ol wok ya oli givhan long yumi blong gat strong tingting, mo blong stap strong blong fren wetem God, mo blong mekem samting we hem i wantem. I no strong tumas blong mekem samting we God i wantem mo holemstrong long hem, from we Papa blong yumi long heven mo Pikinini blong hem, tufala i stap givhan long yumi. (Dut. 30:11-14; 1 King 8:57) Mo tu, kampani blong “olgeta Kristin man” we olgeta tu oli holemstrong long God mo oli ona long Jeova olsem Hae God mo Masta blong olgeta, oli stap sapotem yumi.—1 Pita 2:17.

[Futnot]

?Bambae Yu Yu Ansa Olsem Wanem?

• ?Yumi mas gat wanem tingting long saed blong ol gudfala fasin we Jeova i wantem yumi blong mekem?

• ?Wanem ol fasin blong Job we yu yu laekem tumas?

• ?Ol tok blong Job 31:29-37 oli soemaot wanem long saed blong ol fasin blong Job?

• ?From wanem yumi naf blong holemstrong long God?

[Kwestin]