Kami Magalakaw sa Among Integridad!
Kami Magalakaw sa Among Integridad!
“Alang kanako, ako magalakaw sa akong integridad.”—SAL. 26:11.
1, 2. Unsay giingon ni Job bahin sa iyang integridad, ug unsay gipakita sa Job kapitulo 31 bahin kaniya?
SA KARAANG panahon, ang balabag nga timbangan maoy sagad gamiton sa pagtimbang. Kini adunay balabag nga malisoliso sa tunga diha sa usa ka tarugo. Sa matag tumoy niini nagbitay ang platilyo. Ang butang nga timbangon ibutang sa usa ka platilyo ug ang mga bato sa timbangan ibutang sa pikas platilyo. Ang katawhan sa Diyos gisugo nga magmatinud-anon sa paggamit ug mga timbangan.—Prov. 11:1.
2 Sa dihang nag-antos ang diyosnong tawo nga si Job tungod sa pag-atake ni Satanas, siya miingon: “[Si Jehova] magatimbang kanako sa tukmang timbangan ug ang Diyos mahibalo sa akong integridad.” (Job 31:6) Nianang bahina, si Job naghisgot ug mga kahimtang diin masulayan ang integridad sa tawo. Apan si Job nakalahutay niana, ingon sa gipakita sa Job kapitulo 31. Ang iyang ehemplo makadasig kanato nga mogawi sama kaniya ug kita makasulti nga may-pagsalig, sama sa giingon ni David: “Alang kanako, ako magalakaw sa akong integridad.”—Sal. 26:11.
3. Nganong hinungdanon nga magmatinumanon sa Diyos sa dagko ug gagmayng butang?
3 Bisan tuod si Job nakasinatig grabeng pagsulay, siya nagmatinumanon sa Diyos. Gani, ang pipila makaingon nga si Job maoy talagsaong ehemplo sa integridad. Kita wala mag-antos sama sa pag-antos ni Job. Apan, kinahanglan kitang magmatinumanon sa dagko ug gagmayng butang aron atong ikapakita nga kita nagalakaw nga may integridad ug nagapaluyo sa pagkasoberano sa Diyos.—Basaha ang Lucas 16:10.
Gikinahanglan ang Moral nga Integridad
4, 5. Ingong tighupot sa integridad, unsang panggawi ang gilikayan ni Job?
4 Aron mahuptan nato ang atong integridad kang Jehova, kinahanglan natong sundon ang iyang moral nga sukdanan, sama sa gihimo ni Job. Siya miingon: “Ako mihimog pakigsaad sa akong mga mata. Nan unsaon ko man pagtan-aw nga maibogon sa usa ka ulay? . . . Kon ang akong kasingkasing nahaylo sa usa ka babaye, ug ako kanunayng nag-atang diha sa ganghaan sa akong isigkatawo, pagalinga ang akong asawa alang sa laing tawo, ug sa ibabaw kaniya paludha ang ubang mga lalaki.”—Job 31:1, 9, 10.
5 Kay determinadong mahuptan ang iyang integridad, gilikayan ni Job ang pagtan-aw nga may kaibog sa usa ka babaye. Ingong minyo, siya wala magbirigbirig sa usa ka dalaga o magtinguha sa asawa sa laing tawo. Sa iyang Wali sa Bukid, si Jesus puwersadong naghisgot bahin sa seksuwal nga moralidad—usa ka punto nga angayng hinumdoman niadtong naghupot sa integridad.—Basaha ang Mateo 5:27, 28.
Likayi ang Malimbongong Pamaagi
6, 7. (a) Sama sa kahimtang ni Job, unsay gigamit sa Diyos sa pagsukod sa atong integridad? (b) Nganong dili kita angayng manglimbong?
6 Kon buot natong mahuptan ang atong integridad, dili kita molihok sa malimbongong paagi. (Basaha ang Proverbio 3:31-33.) Si Job miingon: “Kon ako naglakaw uban sa mga tawo sa kabakakan, ug ang akong tiil nagadali sa panglimbong, siya [Jehova] magatimbang kanako sa tukmang timbangan ug ang Diyos mahibalo sa akong integridad.” (Job 31:5, 6) Si Jehova magtimbang sa tanang tawo diha sa “tukmang timbangan.” Sama sa kahimtang ni Job, gamiton sa Diyos ang iyang hingpit nga sukdanan sa hustisya aron matino kon kita ba naghupot sa integridad.
7 Kon kita manglimbong, dili nato mahuptan ang atong integridad sa Diyos. Ang mga tighupot sa integridad “mibiya na sa sinuwitik nga mga butang nga angayng ikaulaw” ug wala na “magalakaw pinaagig lipatlipat.” (2 Cor. 4:1, 2) Apan komosta kon kita malimbongon sa atong sinultihan ug binuhatan, nga tungod niana ang atong isigkamagtutuo mangayog tabang sa Diyos? Nan, alaot kita! “Sa akong kasakit mituaw ako kang Jehova, ug iyang gitubag ako,” miawit ang salmista. “Oh Jehova, luwasa ang akong kalag gikan sa mga ngabil nga bakakon, gikan sa dila nga malinglahon.” (Sal. 120:1, 2) Maayong hinumdoman nga ang Diyos makasusi sa atong kinasulorang pagkatawo, nga “magasusi sa kasingkasing ug sa mga rinyon” aron matino kon kita ba tinuod nga mga tighupot sa integridad.—Sal. 7:8, 9.
Ipakita ang Maayong Sulondan sa Pagpakiglabot sa Uban
8. Unsay pagtratar ni Job sa uban?
8 Aron mahuptan ang integridad, kinahanglan natong sundogon si Job, kinsa makataronganon, mapainubsanon, ug mahunahunaon sa uban. Siya miingon: “Kon ginahikawan ko sa hustisya ang akong ulipong lalaki o ang akong ulipong babaye sa ilang pakigburoka kanako, nan unsa man unya ang akong mahimo sa dihang motindog ang Diyos? Ug sa dihang siya makighusay, unsay akong ikatubag kaniya? Dili ba ang Usa nga nagbuhat kanako diha sa tiyan nagbuhat kaniya, ug dili ba Usa ra ang nag-andam kanamo diha sa tagoangkan?”—Job 31:13-15.
9. Unsang mga hiyas ang gipakita ni Job sa pagpakiglabot niya sa iyang mga ulipon, ug sa unsang paagi kita angayng molihok niining bahina?
9 Sa panahon ni Job, lagmit dili komplikado ang pagdumalag legal nga mga kaso. Kini gidumala sa hapsayng paagi, ug ang mga korte bukas bisan sa mga ulipon. Si Job makataronganon ug maluluy-on sa iyang mga ulipon. Kon kita magalakaw sa integridad, kinahanglan natong ipakita ang maong mga hiyas, ilabina kon kita mga ansiyano sa kongregasyon.
Magmahinatagon, Dili Magmahakogon
10, 11. (a) Giunsa nato pagkahibalo nga si Job mahinatagon ug matinabangon? (b) Ang Job 31:16-25 mahimong magpahinumdom kanato sa unsang ubang Kasulatanhong tambag?
10 Si Job mahinatagon ug matinabangon, dili mahakogon. Siya miingon: “Kon . . . gikawang ko ang mga mata sa mga babayeng balo, ug ako rang usa ang nagkaon sa akong tinapay, samtang ang mga batang ilo-sa-amahan wala makakaon gikan niini . . . Kon nagatan-aw ako kang bisan kinsa nga himalatyon tungod sa pagkawalay-besti . . . Kon giwarawara ko ang akong kamot batok sa mga batang ilo-sa-amahan, sa dihang akong nakita nga gikinahanglan ang akong tabang diha sa ganghaan, ipatagak ang akong pakopako gikan sa abaga niini, ug mabali unta ang akong bukton gikan sa ibabawng bukog niini.” Ug dili unta mahuptan ni Job ang iyang integridad kon siya miingon sa bulawan: “Ikaw mao ang akong pagsalig!”—Job 31:16-25.
11 Ang maong balaknong mga pulong makapahinumdom kanato sa giingon ni disipulong Santiago: “Ang dagway sa pagsimba nga hinlo ug wala mahugawi sa panglantaw sa atong Diyos ug Amahan mao kini: ang pag-atiman sa mga ilo ug sa mga babayeng balo sa ilang kasakitan, ug ang pag-amping sa kaugalingon nga dili mahugawan sa kalibotan.” (Sant. 1:27) Lagmit mahinumdom usab kita sa pasidaan ni Jesus: “Bukha kanunay ang inyong mga mata ug pagbantay batok sa tanang matang sa hakog nga pangibog, tungod kay bisag ang usa ka tawo adunay kadagaya ang iyang kinabuhi wala magagikan sa mga butang nga iyang gipanag-iya.” Dayon si Jesus naghatag ug sambingay bahin sa usa ka hakog nga datong tawo kinsa namatay nga “dili dato ngadto sa Diyos.” (Luc. 12:15-21) Aron mahuptan ang integridad, dili kita magpadala sa makasasalang pangibog o kahakog. Ang hakog nga pangibog maoy idolatriya tungod kay ang butang nga gitinguha sa usa ka hakog magpahilayo kaniya kang Jehova ug sa ingon mahimo niya kining idolo. (Col. 3:5) Dili gayod kita mahimong tighupot sa integridad ug magmahakogon sa samang panahon!
Ayawg Tipas sa Matuod nga Pagsimba
12, 13. Unsang panig-ingnan ang gipakita ni Job sa paglikay sa idolatriya?
12 Ang mga tighupot sa integridad dili motipas sa putling pagsimba. Mao sab si Job, kay siya miingon: “Kon nakita ko ang kahayag sa pagkidlap niini, o ang bililhong bulan nga nagapanaw, ug ang akong kasingkasing nahaylo sa tago ug ang akong kamot mihalok sa akong baba, kana usab usa ka sayop nga angayng hatagag pagtagad sa mga maghuhukom, kay igalimod ko unta ang matuod nga Diyos sa itaas.”—Job 31:26-28.
13 Si Job wala mosimbag way-kinabuhing mga butang. Kon ang iyang kasingkasing nahaylo sa tago sa pagtan-aw sa mga butang sa kawanangan, sama sa bulan, ug kon ang iyang ‘kamot mihalok sa iyang baba,’ sa idolatrosong paagi, siya mahimong magsisimbag idolo. (Deut. 4:15, 19) Aron mahuptan nato ang atong integridad sa Diyos, angay natong likayan ang tanang matang sa idolatriya.—Basaha ang 1 Juan 5:21.
Likayi ang Pagkamapanimaslon o Pagkasalingkapaw
14. Nganong makaingon kita nga si Job dili madumtanon?
14 Si Job dili madumtanon ni mapintas. Nahibalo siya nga ang maong mga hiyas nagpakita nga ang usa wala maghupot sa integridad, kay siya miingon: “Kon nagmaya ako sa pagkalaglag sa nagdumot kanako sa hilabihan, o nalipay ako tungod kay ang daotan nakakaplag kaniya . . . , wala ko tugoting makasala ang akong alingagngag pinaagi sa pagpangayo sa usa ka tunglo batok sa iyang kalag.”—Job 31:29, 30.
15. Nganong sayop nga malipay kon may katalagman nga modangat niadtong nagdumot kanato?
15 Ang matarong nga si Job dili gayod malipay kon may katalagman nga modangat niadtong nagdumot kaniya. Usa ka proverbio nagpasidaan: “Sa dihang matumba ang imong kaaway, ayaw pagmaya; ug sa dihang siya mapukan, dili unta magkalipay ang imong kasingkasing, aron si Jehova dili makakita niini ug kini mahimong daotan sa iyang mga mata ug iya gayod nga ipahilayo ang iyang kasuko gikan kaniya.” (Prov. 24:17, 18) Sanglit si Jehova makabasa sa kasingkasing, mahibalo siya kon kita nalipay sa katalagman sa laing tawo ug tino nga siya dili mouyon niana. (Prov. 17:5) Ang Diyos mahimong makiglabot alang kanato, kay siya miingon: “Akoa ang panimalos, ug ang bayad.”—Deut. 32:35.
16. Bisag dili kita dato, sa unsang paagi nato ikapakita ang pagkamaabiabihon?
16 Si Job maabiabihon. (Job 31:31, 32) Bisag dili kita dato, atong ‘masunod ang dalan sa pagkamaabiabihon.’ (Roma 12:13) Kita makapaambit ug simpleng pagkaon, nga maghinumdom nga “mas maayo pa ang pagkaong utanon diin anaay gugma kay sa pinatambok nga torong baka nga inubanan sa pagdumot.” (Prov. 15:17) Makapalipay ug makapadasig ang mahigugmaong panag-ubanay sa isigkamagtutuo bisag simple lang ang pagkaon.
17. Kon kita makahimog grabeng sala, nganong dili kini angayng tagoan?
17 Lagmit makapadasig gayod ang pagkamaabiabihon ni Job, kay siya dili salingkapaw. Siya lahi sa mga tawong dili-diyosnon nga miyuhot sa kongregasyon sa unang siglo ug “nagdayeg ug mga personalidad alang sa ilang kaugalingong kaayohan.” (Jud. 3, 4, 16) Si Job wala usab magtabon sa iyang kasal-anan ni ‘magtago sa iyang sayop sulod sa bulsa sa iyang kamisadentro,’ kay nahadlok nga basig mahibaloan sa uban. Siya andam nga magpasusi sa Diyos, nga iyang suginlan sa iyang mga sala. (Job 31:33-37) Kon makahimo kitag grabeng sala, dili nato kini tagoan sa tuyo nga dili madaot ang atong reputasyon. Sa unsang paagi nato ikapakita nga kita naningkamot nga mahuptan ang atong integridad? Pinaagi sa pagdawat sa atong sayop, paghinulsol, pagpangayog espirituwal nga tabang, ug sa pagbag-o kutob sa atong maarangan.—Prov. 28:13; Sant. 5:13-15.
Usa ka Tighupot sa Integridad Gihusay
18, 19. (a) Nganong makaingon kita nga si Job wala mag-abuso kang bisan kinsa? (b) Unsay andam buhaton ni Job kon mapamatud-an siyang sayop?
18 Si Job matinud-anon ug makiangayon. Busa, siya makaingon: “Kon batok kanako ang akong yuta motuaw alang sa tabang, ug ang mga tudling niini managdungan sa paghilak; kon ang mga bunga niini gikaon ko nga walay salapi, ug ang kalag sa mga tag-iya niini akong gipahangos, inay mga trigo patugka ang tunokong bunglayon, ug inay sebada baho nga bunglayon.” (Job 31:38-40) Si Job wala gayod mangagaw sa yuta sa uban, ug wala siya mag-abuso sa iyang mga mamumuo. Sama kaniya, kinahanglan natong huptan ang atong integridad ngadto kang Jehova sa dagko ug gagmayng butang.
19 Atubangan sa iyang tulo ka higala ug sa batan-ong lalaki nga si Elihu, si Job misulti bahin sa iyang paagi sa pagkinabuhi. Gidapit ni Job ang bisan kinsa nga may reklamo kaniya sa pagpasakag sumbong batok sa iyang maayong rekord. Kon mapamatud-ang sayop si Job, siya andam modawat ug silot. Busa iyang gitugyan ang iyang kaso sa langitnong korte ug naghulat sa hukom niini. Nan, “natapos ang mga pulong ni Job.”—Job 31:35, 40.
Ikaw Makahupot sa Integridad
20, 21. (a) Nganong nahuptan ni Job ang iyang integridad? (b) Sa unsang paagi nato maugmad ang gugma sa Diyos?
20 Si Job nakahupot sa iyang integridad tungod kay siya nahigugma sa Diyos, ug si Jehova nahigugma ug nagtabang kaniya. Si Job miingon: “Kinabuhi ug mahigugmaong-kalulot [o, maunongong gugma] imong [Jehova] gihatag kanako; ug ang imong pag-atiman nagbantay sa akong espiritu.” (Job 10:12) Dugang pa, si Job nagpakitag gugma sa uban, nga nahibalo nga si bisan kinsa nga dili magpakitag maunongong gugma sa iyang isigkatawo magsalikway sa iyang kahadlok sa Labing Gamhanan. (Job 6:14) Ang mga tighupot sa integridad nahigugma sa Diyos ug sa ilang silingan.—Mat. 22:37-40.
21 Atong maugmad ang gugma sa Diyos pinaagi sa pagbasa sa iyang Pulong matag adlaw ug sa pagpamalandong kon unsay gipadayag niini bahin kaniya. Pinaagi sa tim-os nga pag-ampo, atong madayeg si Jehova ug mapasalamatan siya sa iyang kaayo. (Filip. 4:6, 7) Kita makaawit kang Jehova ug makabenepisyo sa regular nga pagpakig-uban sa iyang katawhan. (Heb. 10:23-25) Dayon, ang atong gugma sa Diyos molalom usab samtang kita makigbahin sa ministeryo ug magpahayag sa “maayong balita sa iyang pagluwas.” (Sal. 96:1-3) Nianang mga paagiha, atong mahuptan ang atong integridad sama sa gihimo sa salmista kinsa miawit: “Ang pagduol sa Diyos maayo alang kanako. Ang Soberanong Ginoong Jehova gihimo ko nga akong dalangpanan.”—Sal. 73:28.
22, 23. Ingong nagabayaw sa pagkasoberano ni Jehova, itandi ang atong buluhaton karon ug niadtong mga tighupot sa integridad kaniadto.
22 Latas sa kasiglohan, si Jehova naghatag ug lainlaing asaynment niadtong naghupot sa integridad. Si Noe nagtukod ug arka ug ‘nagwali sa pagkamatarong.’ (2 Ped. 2:5) Si Josue nanguna sa mga Israelinhon ngadto sa Yutang Saad, apan siya nagmalamposon lamang tungod kay iyang gibasa ang “basahon sa balaod . . . adlaw ug gabii” ug milihok nga kaharmonya niana. (Jos. 1:7, 8) Ang mga Kristohanon sa unang siglo naghimog mga tinun-an ug regular nga nagtigom aron sa pagtuon sa Kasulatan.—Mat. 28:19, 20.
23 Atong mabayaw ang pagkasoberano ni Jehova ug mahuptan ang atong integridad pinaagi sa pagsangyaw sa pagkamatarong, paghimog mga tinun-an, pagpadapat sa tambag sa Bibliya, ug sa pagpakig-uban sa mga igsoon diha sa mga tigom, asembliya, ug mga kombensiyon. Kana motabang kanato nga mahimong maisogon, lig-on sa espirituwal, ug magmalamposon sa pagbuhat sa kabubut-on sa Diyos. Dili kini lisod kaayo tungod kay kita gipaluyohan sa atong langitnong Amahan ug sa iyang Anak. (Deut. 30:11-14; 1 Hari 8:57) Dugang pa, kita gipaluyohan sa “tibuok kapunongan sa mga igsoon,” kinsa nagalakaw usab sa integridad ug nagapasidungog kang Jehova ingong ilang Soberanong Ginoo.—1 Ped. 2:17.
Unsay Imong Tubag?
• Unsay angay natong panglantaw sa moral nga mga sukdanan ni Jehova?
• Unsang hiyas ni Job ang ilabinang nakapadani kanimo?
• Ingon sa gipakita sa Job 31:29-37, sa unsang paagi migawi sa Job?
• Nganong posible alang kanato nga mahuptan ang integridad ngadto sa Diyos?
[Mga Pangutana sa Pagtuon]
[Hulagway sa panid 29]
Nahuptan ni Job ang iyang integridad ngadto kang Jehova. Mao man usab kita!
[Hulagway sa panid 32]
Atong mahuptan ang atong integridad!