Ñanderekopotĩkena ha ñaneñeʼẽrendu Jehovápe

‘Che aikoʼaína tekopotĩme.’ (SAL. 26:11, ÑÑB)

1, 2. Mbaʼe mbaʼépa oñemombeʼu Job kapítulo 31-pe?

 YMA umi ombaʼevendéva oiporuvaʼekue valánsa opesa hag̃ua imerkadería. Pe valánsa oreko mokõi pláto, peteĩvape oñemoĩ pésa ha pe ótrope katu merkadería. Jehová ndoipotaivaʼekue isiervokuéra ivalánsa monda, hekoitépe omeʼẽvaʼerã hikuái opa mbaʼe (Pro. 11:1).

² Job kapítulo 31-pe jatopa Job heʼivaʼekue Satanás ombohasa asýramo guare chupe. Haʼe heʼi: ‘Jehová tachepesa pe valánsa hustísia reheguápe, ha oikuaáta cherekopotĩha’ (Job 31:6, ÑÑB). Upe kapítulope Job omombeʼu avei opáicha ojepyʼaraʼã hague ha mbaʼéichapa ombohovái porã. Ñande jaservíva Jehovápe ñambohovaivaʼerã avei opaichagua jehasa asy. Upévare iporãta jasegíramo Job ehémplo ha ikatúta jaʼe David heʼi haguéicha: ‘Che aikoʼaína tekopotĩme’ (Sal. 26:11, ÑÑB).

3. Mbaʼérepa tekotevẽ ñaneñeʼẽrendu tahaʼe umi mbaʼe michĩva térã tuichávape?

³ Job akóinte ojerovia mbaretevaʼekue Jehováre ha iñeʼẽrendu heta ohasa asýramo  jepe. Upévare oĩ voi heʼíva iñaguantetereiha ko kuimbaʼe. Añetehápe ñande ndajahasái opa mbaʼe Job ohasavaʼekue, péro tekotevẽ ñaneñeʼẽrendu ha ñanderekopotĩ avei Jehová renondépe tahaʼe umi mbaʼe michĩva térã tuichávape. Upéicha jajapóramo opavave ohechakuaáta ñadefendeha Jehová sãmbyhy (elee Lucas 16:10).

Aníkena ñanderekokyʼa

4, 5. Mbaʼépa Job ndojapoivaʼekue arakaʼeve?

⁴ Jaikoséramo Jehová oipotaháicha ñanderekopotĩvaʼerã Job ojapo haguéicha. Haʼe heʼi: “Che añemoĩ peteĩ ñeʼẽme che resakuéra ndive, ani hag̃ua amaʼẽ kuñataĩ rehe aiko hag̃ua hendive”. Upéi heʼive: ‘Oimérire che akãraku peteĩ kuñáre ha ahaʼarõramo che rapicha rokẽme aiko hag̃ua hembireko ndive, upéicharõ che rembireko toñembiso ambuépe g̃uarã, ha oimeraẽva toiko hendive’ (Job 31:1, 9, 10, ÑÑB).

⁵ Job odesidivaʼekue akóinte hekopotĩtaha. Upévare arakaʼeve ndoikói omaña asy kuñanguérare ha iñakãraku hesekuéra. Haʼe ningo oreko hembireko, upévare ndoikói ombojaruʼi umi kuñataĩme térã omakanea tembireko ahénondi. Upéi, tiémpo rire Jesús ojapo peteĩ diskúrso sérro ári ha oñemoñeʼẽ mbarete avei ko témare. Ha ñaneñeʼẽrendusérõ Jehovápe, arakaʼeve nañanderesaraimoʼãi Jesús heʼivaʼekuégui (elee Mateo 5:27, 28).

Aníkena ñambotavy ñande rapichápe

6, 7. a) Ojapo haguéicha Job rehe, mbaʼéichapa Jehová ohecha jaikópa Iñeʼẽme heʼiháicha? b) Mbaʼépa oikóta jaikóramo ñambotavy ñande rapichápe?

⁶ Umi tapicha ijoheipyréva ndojapói mbaʼeve ñemiháme ha naiñensuguýi (elee Proverbios 3:31-33). Job heʼi: ‘Aikórire japu reheve ha chepyaʼéramo aporombotavy hag̃ua, Jehová tachepesa pe valánsa hustísia reheguápe, ha oikuaáta cherekopotĩha’ (Job 31:5, 6, ÑÑB). Jahechaháicha, Jehová ñandepesa pe ‘valánsa hustísia reheguápe’. Ojapo haguéicha Job rehe, haʼe tekojojápe ohecháta jaikópa Iñeʼẽme heʼiháicha.

⁷ Jaikóramo ñaporombotavy ha ñandepokarẽramo ndaikatúi jaʼe ñandejehe kristiáno jeroviapyha. Ñandejára voi heʼi ñandéve ñamboyke hag̃ua ‘umi mbaʼe ñemihameguáva térã ñanemotĩtava’ ha ani hag̃ua jaiko ‘ñaporombotavy’ (2 Cor. 4:1, 2, BNP). Péro mbaʼépa oikóta jaʼe térã jajapóramo ñane ermánore peteĩ mbaʼe noĩporãiva térã ñambotavýramo chupe? Ikatu ojerure Jehovápe oipytyvõmi hag̃ua chupe. Upéicha ojapovaʼekue pe salmísta, haʼe heʼi: ‘Ñandejárape ambaʼejerure asy ajepyʼapy vai jave, ha haʼe ombohovái chéve. Ñandejára ani reheja haʼa umi ijapúva ha oporombotavýva pópe’ (Sal. 120:1, 2, ÑÑB). Ajépa ijetuʼuetéta ñanendive ñane ermáno oñemboʼéramo péicha Jehovápe jajapo haguére hese mbaʼe vai! Aníkena ñanderesarái Jehová ohechapaiteha ‘mbaʼépa oĩ ñande pyʼapýpe’ oikuaa hag̃ua añetehápepa ñaneñeʼẽrendu chupe ñanekorasõite guive (Sal. 7:8, 9).

Jatrata porãkena ñande rapichakuérape

8. Mbaʼéichapa Job otratavaʼekue hapichápe?

⁸ Jaiko hag̃ua Jehová oipotaháicha jasegivaʼerã Job ehémplo, haʼe noñembotuichái,  hekojoja ha otrata porã hapichápe. Haʼe heʼi: ‘Oimérõ che rembiguái ombaʼejeruréva, hembipota ameʼẽva chupe. Peichaʼỹrõ, mbaʼéichapa añemboʼýne Ñandejára renondépe? Mbaʼe piko haʼéne oúramo chembojovake? Peteĩ Ñandejára añónte oreapo ore sy ryépe, ha mokõivévape omeʼẽ ore rekove’ (Job 31:13-15).

9. Mbaʼéichapa Job otratavaʼekue hembiguaikuérape ha mbaʼéichapa ikatu jasegi iñehémplo?

⁹ Job tiémpope pe léi ndahaʼeivaʼekue koʼag̃aguáicha, upéicharõ jepe oñeñatende porã umi provléma oñepresentávare. Umi tembiguái jepe ikatuvaʼekue omog̃uahẽ ikéha pe trivunálpe. Ha jaikuaaháicha Job oiporiahuvereko ha hekojojavaʼekue hembiguaikuéra ndive. Upéicha vaʼerã avei umi kristiáno iñeʼẽrendúva ha koʼýte umi ansiáno imbaʼeporã ha otrata porã vaʼerã opavavépe.

Ñandepojerákena ha ani ñande taryrýi

10, 11. a) Mbaʼéichapa jaikuaa Job ipojera ha oipytyvõ hague opavavépe? b) Mbaʼe téysto rehépa ñanemomanduʼa jaleévo Job 31:16-25?

¹⁰ Job ipojera ha oipytyvõ opavavépe, haʼe ndoguerekoivaʼekue aipo taryrýi ha nopensái ijehénte. Upévare heʼi: ‘Arakaʼeve kuña imenaʼỹvape ndahejáiva iñembyahýi. Ndaraháiva che rembiʼu che jurúpe tyreʼỹme ambojaʼoʼỹre, mboriahu ijaoʼỹvape che amondéva, namopuʼãiva che po ityreʼỹvare, [péro oime rire ndajapói upéicha] mokõivéva che jyva toñemopẽ ha tojepeʼa che atiʼýgui’. Péro Job ndaikatumoʼãikuri iñeʼẽrendu ha ojapo hekoitépe opa mbaʼe ‘ojeroviárire órore’ Ñandejárare rangue (Job 31:16-25).

¹¹ Ko téysto ñanemomanduʼa Santiago heʼivaʼekuére: ‘Pe jerovia añeteguáva ha iporãva Ñandejára renondépe niko haʼe: Ñaipytyvõ umi ityreʼỹ ha imenaʼỹvape hemikotevẽme, ha ñañeñangareko mbaʼe vaieta oĩvagui ko yvy ape ári’ (Sant. 1:27, JMP). Oiméne avei ñanemomanduʼa Jesús heʼivaʼekuére: ‘Peñatende porãke ha ani pende taryrýi mbaʼevére. Peguerekóramo jepe heta mbaʼe, pende rekove nodependeihína umi mbaʼe peguerekóva rehe’. Omeʼẽ rire ko konsého, Jesús omoĩ peteĩ ehémplo oñeʼẽva peteĩ kuimbaʼe itaryrýivare, ombyatýva mbaʼeta ijupe g̃uarãnte péro ‘imboriahu Ñandejára renondépe’, upéi ou omano ha opa rei (Luc. 12:15-21, NM). Ñaime porãséramo Ñandejára renondépe ndovaléi ñande taryrýi, upéva ivaieterei, haʼeténte avei taʼanga ñemombaʼeguasu. Mbaʼérepa? Pórke jaipotaiterei rasáramo peteĩ mbaʼe, upévantema ñandéve g̃uarã ha ñambotapykue Jehovápe (Col. 3:5). Péicha jahecha jaiko hag̃ua Jehová oipotaháicha ndovaleiha ni mbaʼeveichavérõ ñande taryrýi.

Ñamombaʼeguasúke Jehovápe añoite

12, 13. Mbaʼépa heʼivaʼekue Job ha mbaʼéichapa ikatu jasegi iñehémplo?

¹² Umi tapicha omombaʼeguasúva Jehovápe ipyʼaite guive, omboyke opa mbaʼe ojapóva rrelihión japu. Haʼekuéra osegi Job ehémplo, haʼe heʼivaʼekue: ‘Ajeroviárire kuarahy ojajáiva rehe térã amañárire pe jasy omimbi porãva rehe amombaʼeguasu hag̃uáicha chupekuéra ñemiháme che pyʼapýpe, upéicharire chembojovakevaʼerãmoʼã hikuái amboyke haguére Ñandejárape’ (Job 31:26-28, ÑÑB).

¹³ Job arakaʼeve nomombaʼeguasúi taʼanga ni ambue mbaʼe ndovaléiva mbaʼeverã. Heta oĩ omombaʼeguasúva planetakuéra térã jasy. Péro Job ndohejái oike iñakãme umi mbaʼe ni nomombaʼeguasúi oikuaágui ojapóramo upéicha omboyketaha Ñandejárape (Deu. 4:15, 19). Ñande avei ñamombaʼeguasuséramo Jehovápe añoite, ñamboykevaʼerã oimeraẽ mbaʼe umi rrelihión japu omombaʼeguasúva (elee 1 Juan 5:21).

Aníkena ñandepyʼaro ha ñanderovamokõi

14. Mbaʼéichapa jaikuaa Job ndahaʼéi hague peteĩ kuimbaʼe ipyʼaróva?

¹⁴ Job ndahaʼeivaʼekue kuimbaʼe ipyʼaro ha iñañáva, oikuaágui Jehová siervokuéra ndovaleiha oiko upéicha. Haʼe heʼi: ‘Ndavyʼái ohasa asýramo cherehe ijaʼeʼỹva ha ndachepyʼarorýi  ojehúvo mbaʼe vai chupekuéra, che juru jepe ajoko ani hag̃ua amaldesi umívape omano hag̃ua’ (Job 31:29, 30, ÑÑB).

15. Mbaʼérepa ndovaléi javyʼa ohasa asy haguére umi ndaijaʼéiva ñanderehe?

¹⁵ Job ndahaʼeivaʼekue ovyʼáva ohechávo ohasa asy ndaijaʼéiva hese. Heta áño rire, Proverbios-pe ojehai: “Ani revyʼa hoʼáramo pe nderehe ijaʼeʼỹva, térã repuka hese oñepysanga haguére, cháke Ñandejára ohecháne ha ndojuhuporãichéne, ha ipochyjeráne hendive” (Pro. 24:17, 18). Jehová ikatu ohecha ñandepyʼapýpe oĩva ha oikuaáta oimérõ javyʼa ñande rapicha ohasa asy haguére. Ha upéva haʼe ndoguerohorýi (Pro. 17:5). Upévare, jajecháta Jehová ndive jajapóramo upéicha. Haʼe heʼi voi: ‘Che añevengáta, che ahepymeʼẽta enterovépe hembiapokuérare’ (Deu. 32:35, ÑÑB).

16. Mbaʼéichapa ikatu ñanembaʼeporã ndajarekóiramo jepe heta mbaʼe?

¹⁶ Job hory ha imbaʼeporãvaʼekue avei omog̃uahẽvo hógape hapichakuérape (Job 31:31, 32). Ha ñande ndajarekóiramo jepe heta mbaʼe Job oreko haguéicha, ikatu ‘torypápe ñamog̃uahẽ ñande rógape ñande rapichakuérape’ (Rom. 12:13, JMP). Ñainvitáramo chupekuéra okaru hag̃ua, natekotevẽi katuete jajapo hetaiterei hiʼupy, oimeraẽ mbaʼemínte ikatu jaʼu oñondivepa. Ñandejára Ñeʼẽ heʼi voi: “Iporãve jaʼu kumanda ñanderayhúva ndive jaʼu rangue soʼo kyra ñanderayhuʼỹva ndive” (Pro. 15:17). Upéicharõ nañaikotevẽi heta mbaʼére ñañomokyreʼỹ ha jahasa porã hag̃ua ñane ermanokuérandi.

17. Mbaʼérepa ndovaléi ñamokañy ñane rembiapo vaikue?

¹⁷ Job imbaʼeporãiterei voi, upévare umi imbohupa katuete oñeñandu porã ha ovyʼanerakaʼe hendive. Haʼe ndahaʼeivaʼekue umi kuimbaʼe síglo primérope guaréicha. Upe tiémpope oikevaʼekue kongregasiónpe heta kuimbaʼe hovamokõiva ha otrata porãva hapichápe ‘ohekágui haʼekuéra oipotávante’ (Jud. 3, 4, 16, BNP). Job nomokañyivaʼekue avei hembiapo vaikue opyta porãségui hapichakuéra renondépe. Haʼe oheja Jehová ohecha ipyʼapýpe oĩva ha omombeʼupaite chupe hembiapo vaikue (Job 31:33-37). Ha ñande jajapóramo peteĩ mbaʼe ivaietereíva nañañomirivaʼerã jakyhyjégui oñeñeʼẽ vaírõ g̃uarã ñanderehe. Upéva rangue jahechakuaavaʼerã jajavy hague, ñañembyasy, jaheja Jehová tañanepytyvõ ha ñañehaʼã ñamyatyrõ umi mbaʼe jajapo vai vaʼekue. Jajapóramo upéicha jahechaukáta ñaneñeʼẽrendu ha jaserviseha Jehovápe ñande pyʼaite guive (Pro. 28:13; Sant. 5:13-15).

Job iñeʼẽrendu ha hekojoja

18, 19. a) Mbaʼérepa ndaikatuivaʼekue ojeʼe Job rehe omombaʼapo rei hague hapichápe? b) Mbaʼépa heʼi Job ojapotaha oiméramo añetehápe ojavy?

¹⁸ Job akóinte imarangatu ha hekojoja, upévare ikatuvaʼekue heʼi: ‘Oimérire aipeʼa ijára teégui pe yvy che arekóva, ha oimérõ amondáraʼe temitỹ ahéno térã amombaʼapo reíramo okarayguápe, umi che kokuépe avati rangue tosẽ ñuatĩ, ha mandiʼo rangue ñanandy!’ (Job 31:38-40). Péicha Job ontendeuka arakaʼeve ndoipeʼaiha yvy ahéno ha nomombaʼaporeíri hague hapichápe. Job ningo peteĩ ehémplo ñandéve g̃uarã, haʼéicha avei ñaneñeʼẽrenduvaʼerã Jehovápe opa mbaʼépe, tahaʼe umi mbaʼe michĩvape jepe.

¹⁹ Peteĩ jey ohovaʼekue Job rendápe mbohapy karai ha peteĩ kariaʼy hérava Elihú. Upérõ Job omombeʼu chupekuéra mbaʼéichapa haʼe tapiaite iñeʼẽrendu ha hekopotĩ, ha ogaranti  voi ijehe añeteha upe heʼíva. Ha umi okritikávape hese heʼi odenunsia hag̃ua chupe ha oiméramo añetehápe ojavy ohejataha ojekastiga chupe. Upéi Job ohejapaite Ñandejára pópe umi hembiapokue ha ohaʼarõ haʼe ohusga chupe. Péicha opa Job heʼivaʼekue (Job 31:35, 40).

Ikatu jaservi Jehovápe ñande pyʼaite guive

20, 21. a) Mbaʼérepa Job iñeʼẽrenduvaʼekue Jehovápe ipyʼaite guive? b) Mbaʼépa ikatu jajapo jahayhuve hag̃ua Jehovápe?

²⁰ Job ohayhúgui Jehovápe, iñeʼẽrendu chupe ipyʼaite guive ha Jehová upévare oguerohory ha oipytyvõ chupe. Upéicha rupi Job heʼi Chupe: ‘Nde chemoingove ha cherayhu, reñangareko cherehe ha reheja aikove’ (Job 10:12). Péro Job ndahaʼeivaʼekue Jehovápente ohayhúva, haʼe mborayhúpe otratavaʼekue avei entéro hapichápe. Haʼe oikuaa porã ndojapóiramo upéicha ikatuha ombopochy Jehovápe (Job 6:14). Upéicharõ umi iñeʼẽrendúva Jehovápe, ohayhu Chupe ha hapichakuérape (Mat. 22:37-40).

²¹ Mbaʼépa ikatu jajapo jahayhuve hag̃ua Jehovápe? Jaleevaʼerã la Biblia káda día ha jajepyʼamongeta hese mbaʼépa ñanemboʼe Ñandejáragui. Ñañemboʼe Jehovápe ñande pyʼaite guive, ñamombaʼeguasu ha jaagradese chupe imbaʼeporãite haguére ñanendive (Fili. 4:6, 7). Jaguerohory chupe ñande purahéi rupive ha ani jafalta rreunionhápe (Heb. 10:23-25). Ñasẽ memevaʼerã avei ñamombeʼu pe marandu porã ikatúva osalva ñande rapichakuérape (Sal. 96:1-3). Jajapopaitéramo koʼã mbaʼe, ñaneñeʼẽrendúta Ñandejárape ñande pyʼaite guive, ñanderekopotĩta ha pe salmísta heʼi haguéicha ikatúta jaʼe: ‘Chéve g̃uarã iporã añemoag̃ui Jehováre, pe Mburuvicha Guasu Ijojahaʼỹva ha ipoguýpe añemoʼã’ (Sal. 73:28, NM).

22, 23. Mbaʼépa ojapovaʼekue Ñandejára siervokuéra yma guare ha mbaʼépa ñande jajapovaʼerã koʼág̃a?

²² Ymaite guive Jehová heta hendáicha ojokuái isiervokuérape. Pór ehémplo, Noépe heʼi ojapo hag̃ua peteĩ káha guasu ha opredikavaʼerãha (2 Ped. 2:5). Josuépe katu heʼi omoinge hag̃ua umi Israelguápe pe yvy oñeprometevaʼekuépe chupekuéra. Ha Josué osẽ porã vaʼekue olee rupi Ñandejára ‘léi ára ha pyhare’ ha ojapo rupi upépe heʼiháicha (Jos. 1:7, 8). Umi kristiáno ypykuépe katu heʼi osẽ hag̃ua oipytyvõ hapichakuérape oikuaa hag̃ua Ñandejárape ha oiko Jesús remimboʼéramo. Avei heʼi chupekuéra oñembyatyvaʼerãha ha ohesaʼỹijo Ñandejára Ñeʼẽ (Mat. 28:19, 20).

²³ Ha mbaʼéichapa jahechaukáta koʼág̃a rupi ñadefendeha Jehová sãmbyhy ha ñamombaʼeguasuha chupe ñande pyʼaite guive? Upearã tekotevẽ ñamombeʼu pe marandu porã, ñaipytyvõ ñande rapichakuérape oiko hag̃ua Jesús remimboʼéramo, jajapo la Biblia heʼíva ha ñañembyaty ñane ermanokuéra ndive rreunionhápe ha aty guasúpe. Koʼã mbaʼe ningo tuichaiterei ñanemombarete, ñanembopyʼaguasu ha ñanepytyvõ jajapo hag̃ua Jehová rembipota. Añetehápe ndahasýi pórke Jehová ha Itaʼýra oĩ ñande ykére (Deu. 30:11-14; 1 Rey. 8:57). Avei tuicha ñanemokyreʼỹ ‘ñane pehẽnguekuéra’ oĩva opárupi ko yvy ape ári, akóinte oñehaʼãva iñeʼẽrendu, hekopotĩ ha omombaʼeguasu Jehovápe, pe Mburuvicha Guasu Ijojahaʼỹva (1 Ped. 2:17).

Mbaʼépa ñambohováita?

• Mbaʼépa ndovaléi jajapo ani hag̃ua ñanderekokyʼa?

• Mbaʼépa reguerohoryve Job rehe?

• Heʼiháicha Job 31:29-37, mbaʼéichapa Job oikovaʼekue?

• Mbaʼérepa enterove ikatu jaservi Jehovápe ñande pyʼaite guive?

[Porandu ñahesaʼỹijóva]

[Nóta oĩva taʼanga ndive páhina 29]

Job iñeʼẽrenduvaʼekue Jehovápe, ñande avei ikatu!

[Nóta oĩva taʼanga ndive páhina 32]

Enterove ikatu jaservi Jehovápe ñande pyʼaite guive