Assuarnaalluta saqisa!
Assuarnaalluta saqisa!
‘Uangali saqissaanga assuarnaallunga.’ — TUSSIAAT 26:11, 1900.
1, 2. Jobi assuarnaassutsini pillugu qanoq oqarpa, Jobimillu allakkani kapitali 31mi taanna pillugu sunik paasisaqarpugut?
ITSAQ oqimaalutaaviit nallarissumik taliusallit atorneqartarput. Taliusap isuini puuguttat nivingasarput. Oqimaalutarneqartoq puuguttat aappaannut ilineqartarpoq oqimaalutarlu aappaanut ilineqartarluni. Guutip innuttai oqimaalutaassagaangamik oqimaaluttanik eqqoqqissaartunik atuisartussaasimapput. — Ussatit 11:1.
2 Jobi Guutimik mianerinnittoq Saatanimit saassunneqarami Jehova pillugu ima oqarpoq: “Uuttussavaanga oqimaalutaavinni eqqortuni, Guutillu assuarnaassusera nalujunnaassavaa.” (Jobi 31:6, NV) Tamatumunnga tunngatillugu Jobip angummut arnamulluunniit assuarnaatsumut misilinneqaataasinnaasut arlallit eqqaavai. Jobilli misilinneqarnini attalluarpaa, soorlu Jobimik allakkani kapitali 31mi oqaasiinit ersertoq. Maligassiuilluarnera taassumatut iliornissamut tussiaasiortutullu Daavitut qulanngitsigaluta ima oqarnissamut kajumississutigisinnaavarput: ‘Uangali saqissaanga assuarnaallunga.’ — Tussiaat 26:11, 1900.
3. Sooq annikitsutigut annertuutigullu Guutimut aalajaattariaqarpugut?
3 Jobi misilinneqangaaraluarluni Guutimut aalajaattuarpoq. Inuit ilaat allaat immaqa oqarumassapput Jobip misilinneqarnermini malartitassaannginnera assuarnaanneralu asseqanngilluinnartuusut. Jobip misilinneqaatigisai misilinneqaatigineq ajorpavut, assuarnaattuarumaguttali Jehovallu kisimi oqartussaaneranik qutsissisitseqataajumagutta annikitsutigut annertuutigullu Guutimut aalajaattariaqarpugut. — Atuaruk Lukasi 16:10.
Ileqqussatigut assuarnaatsuunissaq pingaaruteqarpoq
4, 5. Jobi assuarnaattuarumalluni sunaveersaartarpa?
4 Jehovamut assuarnaattuarumalluta Jobip pisimaneratut Jehovap ileqqussatigut najoqqutassiaanik maleruaajuartariaqarpugut. Jobi ima oqarpoq: “Isikka isumaqatigiissuteqarfigisimavakka niviarsiaq pileritsaallugu isigiumanagu. . . . Angutip allap nulianit pileritsatsinneqaruma angutip matuata killingani qamaarisaqarlunga, taava nuliara allap tutilliuk, allat innaallissuk.” — Jobi 31:1, 9, 10.
5 Jobip Guutimut assuarnaattuarnissani aalajangiusimagamiuk arnat pilerigalugit isiginaveersaartarpai. Aappaqarami arnamik aappaqanngitsumik qaninniarujuugaqarneq ajorpoq allalluunniit nulianik sammisaqarneq ajorluni. Jiisusi qaqqami oqaluutsimini kinguaassiuutitigut inuunerlunneq pillugu paasiuminartupilussuarmik — assuarnaattuarumasut eqqumaffigisariaqagaannik — oqaaseqarpoq. — Atuakkit Matthæusi 5:27, 28.
Peqquserluttuliunngisaannarit
6, 7. (a) Guuti Jobimut tunngatillugu iliorsimanermisut assuarnaassutsitsinnik qanoq uuttortaasarpa? (b) Sooq unneqqaserluttuussanatalu peqquserluttuussanngilagut?
6 Assuarnaattuarumagutta peqquserluttuliortussaanngilagut. (Atuaruk Tussiaat 5:7). Jobi ima aperaaq: “Inuusimanerpunga salluliortuullunga pinasuartarlungalu peqquserluttuliornissamut?” (Jobi 31:5) Qularnani nammineq ima akivoq: “Uuttussavaanga oqimaalutaavinni eqqortuni, Guutillu assuarnaassusera nalujunnaassavaa.” (Jobi 31:6, NV) Jehovap inuit tamaasa “oqimaalutaavinni eqqortuni” uuttortartarpai. Guutip naapertuilluarnermut najoqqutassiani naammalluinnartoq uagut kiffatut tunniulluinnarsimasutut assuarnaassutsitsinnut uuttortaatigisarpaa, soorlu Jobimut tunngatillugu taamaaliorsimasoq.
7 Unneqqaserlullutaluunniit peqquserlukkutta assuarnaakkunnaarsimassaagut. Assuarnaatsut “isertortut kanngunartullu [naaggaarsimavaat] peqqusersiornerlu ileqqorinagu”. (2 Korinthimiut 4:1, 2) Taavami uppeqatitta Guuti ikioqqulluni torlorfigippagu uagut oqaatsitsigut iliuutsitsigulluunniit peqquserlussimanerput pillugu? Tamanna uagutsinnut ajussagaluaqaaq! Tussiaasiortoq ima erinarsorpoq: “Annikillioraangama [Jehova] torlorfigisarpara, akisaraangalu. [Jehova], annaannga qarlumit pisuusaartumit oqqamillu salloqittaagajuttumit!” (Tussiaat 120:1, 2) Pitsaassaaq eqqaamassallugu Guutip inuttut qanoq ittuunersugut takusinnaagaa aamma ‘uummatit tartullu misilittarai’ ilumut assuarnaatsuunersugut paasiniarlugu. — Tussiaat 7:9, 10.
Allanik pinneriaatsikkut maligassaagit
8. Jobi inunnik allanik qanoq pinnittarpa?
8 Assuarnaatsuujumalluta Jobitut ittariaqarpugut, taannami naapertuilluartuullunilu maniguuttuullunilu innimittartuuvoq. Ima oqarpoq: “Inussiaatiga angut inussiaatigalu arnaq naammagittaalliuuteqartillugit naapertuilluartumik pineqartinngikkukkit, taava qanoq iliussaanga Guuti nikuippat, qanorlu akissavara saqitsaassut pillugu killisiulerpanga? Taassuma uannik pinngortitsisup . . . inussiaatikka taakku aamma pinngortissimannginnerpai? Tassaannginnerpa Guuti taannaasoq anaanatta timaata iluani uannik taakkuninngalu ilusiliisoq?” — Jobi 31:13-15.
9. Jobi kiffaminut qanoq pissuseqarpa, tamannalu eqqarsaatigalugu uagut allat qanoq pisassavavut?
9 Jobip nalaani suliassanik eqqartuussisutigoortunik suliarinneriaatsit pisariuneq ajorunarput. Suliassanngortinneqartut torersumik iluamillu suliarineqartarput, allaallu inussiat eqqartuussisunut saaffiginnissinnaapput. Jobip inussiaatini naapertuilluartumik pisarlugillu nallittortarpai. Assuarnaalluta saqiumalluta uaguttaaq taamatut pissuseqartariaqarpugut; ingammik utoqqaanertat ilagiinni kristumiuniittut taamatut pissuseqartariaqarput.
Piumatunak tukkortuugit
10, 11. (a) Qanoq ililluta nalunngilarput Jobi tukkortuullunilu ikiuiumatusoq? (b) Jobi 31:16-25mi allassimasut siunnersuutinut Biibilimiittunut allanut sunut eqqaanarsinnaappat?
10 Jobi namminissarsiortuunanilu piumatunngilaq, tukkortuullunili ikiuiumatuvoq. Ima oqarpoq: “[Uillarnerit] isaat [qaamaneerutitissimanerpakka?] Nerisassara kisima nerisimanerpara iliarsuk isikkiliiginnartillugu? . . . Takusaqarsimaguma atisaqarani ajunaalersumik, . . . iliarsuk qunusaarsimagukku isaaffimmi taperserneqarnera paasillugu, taava tuera qungatsinnit kaanngarli taleralu pillulluni!” Jobi assuarnaatsuusimassanngikkaluarpoq ‘kuulti akuitsoq tatiginerarsimasuuguniuk’. — Jobi 31:16-25.
11 Versit taalliortorpalaartut taakku tusarlugit immaqa ajoqersukkap Jaakup allagai uku eqqarsaatigilerpavut: “Guutisiorneq minguitsoq piviusorlu Guutimut Ataatatsinnut tassaavoq iliarsunnik uillarnernillu atugarliuutilinnik isumaginninneq imminillu mingutsinneqatsaalineq silarsuarmit.” (Jaaku 1:27) Aamma immaqa Jiisusip mianersoqqussutaa manna eqqarsaatigilerparput: “Sissueritsi mianersorlusilu piumatussusermut sumulluunniit, inuummi inuuneranut aalajangiisuunngilaq sumik pigisaqarnera naammattorsuarnilluunniit pigisaqaraluaruni.” Tamatuma kingorna Jiisusip angummik piumatuumik pisuumik “Guutimili pisuujunani” toqusumik assersuusiaq oqaluttuaraa. (Lukasi 12:15-21) Assuarnaattuarumalluta piumatunermut pilerissusipilunnulluunniit nakkaannassanngilagut. Piumatunerup guutipilussiorneq assigiinnarpaa inuup piumatuup pilerigisaa Guutimit allamut saatsitsisarmat taamaalillunilu guutipilunngortarluni. (Kolossemiut 3:5) Piumatuujutigaluni assuarnaatsoqarsinnaanngilaq.
Pallorfiginninneq ilumoortoq aalajangiusimajuk
12, 13. Jobi guutipilussiornermik ingalassimanninnermut tunngatillugu qanoq maligassaalluarpa?
12 Assuarnaatsut pallorfiginninnermit minguitsumit qimagunneq ajorput. Jobi aamma tamatumannga qimagutinngilaq, imami oqarpoq: “Takugaangakku seqineq qanoq qaammaritsigisoq qaammallu alutornassutsimini ingerlasoq isertortukkut usserneqartarsimanerpunga tungaannaasa kuninnissaannut? Tamanna iluanngitsuliaasimassagaluarpoq pillarneqaataasussaq; taava Guuti qutsissumiittoq miserratigisimassagaluarpara.” — Jobi 31:26-28.
13 Jobi uumassuseqanngitsunik pallorfiginninngilaq. Qaammatip pinngortitallu avataarsuaniittut allat “tungaannaasa kuninnissaannut” isertortukkut usserneqartarsimagaluaruni guutipilussiortunngorsimassagaluarpoq Guutimik tunussisoq. (5 Mosesi 4:15, 19) Guutimut assuarnaattuarumalluta guutipilussiornermut tunngasut suulluunniit ingalassimasariaqarpavut. — Atuaruk 1 Johannesi 5:21.
Akiniaajumatunaveersaarlutillu ilumoortuusaarnaveersaarit
14. Sooq oqartoqarsinnaava Jobi naakkittaatsuunngitsoq?
14 Jobi peqqarniitsuunanilu naakkittaatsuunngilaq. Nalunngilaa taamatut pissuseqarneq assuarnaakkunnaarsimanermut ersiutaasoq. Ima oqarpoq: “Nuannaapiluutigisarsimanerpara akeqqama ajutoornera, imaluunniit tulluusimaapiluttarlunga perlummik eqqorneqaraangat? Naamik, akeqqannik perloqqusinikkut toqunissaanillu kissaateqarnikkut qanera ajortuliortinngisaannarpara.” — Jobi 31:29, 30.
15. Uagutsinnik uumiginnittup ajunaarnermik eqqorneqarneranik nuannaapiluutiginninneq sooq eqqunngitsuliornerua?
15 Jobi peqqusersuitsoq imminik uumiginnittup ajunaarnermik eqqorneqarneranik nuannaapiluutiginninneq ajorpoq. Mianersoqqussutaasumik imaattumik ussateqarpoq: “Tulluusimaarniaqinak akeqqat orluppat, uummativit qiimmattaatigissanngilaa naakkiuppat, tulluusimaaraluaruit tamanna [Jehovap] takuguniuk ajoreqinammagu akeqqallu kamaakkunnaarlugu.” (Ussatit 24:17, 18) Jehovap inuup uummammiui takusinnaagamigit naluneq ajorpaa inuup allap ajunaarneranik isertorluta nuannaarutiginninnersugut, taamatullu nuannaarutiginnittut iluarinngilluinnartarpai. (Ussatit 17:5) Taamatut pissuseqarutta, tamanna Guutip uagutsinnut pinneriaasianut sunniuteqassaaq, imami oqarpoq: “Akiniaanissaq akisinissarlu uanniipput.” — 5 Mosesi 32:35.
16. Pisuujunngikkaluarluta qanoq inoroorsaartarsinnaavugut?
16 Jobi inoroorsaartuuvoq. (Jobi 31:31, 32) Pisuujunngikkaluarluta ‘inoroorsaarnissamik pingaartitsisinnaavugut’. (Romamiut 12:13) Pisariunngitsumik nerisassiorluta neriartoqqusisarsinnaavugut eqqaamallugu ‘naatitanit nerisassiat asanninnertaqartut pitsaanerusut ussimmik puallarsakkamik nerisassianit uumissuinertaqartunit’. (Ussatit 15:17) Taamaaliortarutta nerisassianik pisariunngikkaluartunilluunniit uppeqammik ilumoorfiginnittumik nereqateqarneq nuannerlunilu anersaakkut ineriartuutaangaartassaaq.
17. Ingasattumik ajortuliorsimagutta, sooq tamanna isertorniarsarissanngilarput?
17 Jobimit inoroorsaarfigineqarluni anersaakkut ineriartuutaasarsimassaaq, taannami ilumoortuusaartuunngilaq. Guutiitsutut ukiuni hundredelinni siullerni ilagiinnut malugitinnaveersaarlutik akuliuttutut inngilaq, taakkuami ‘inuit iluaqutissarsiorfigalugit qujanarniarfigisarpaat’. (Judasi 3, 4, 16) Aamma allanit asissorneqassasoraluni ‘ajortuliaminik isertuiniarneq’ ajorpoq. Guutimit misissorneqarumasarpoq, taassumunnga ajortuliaminik nassuerutiginnikkumasarluni. (Jobi 31:33-37) Ingasattumik ajortuliussagaluarutta, taava tusaamanerlugaalerumanngiinnarluta tamatuminnga isertuiniarsarissanngilagut. Qanoq ililluta assuarnaattuarusunnerput ersersissinnaavarput? Ajortuliarput nassuerutigalugu, peqqissimilluta, utoqqaanertat anersaakkut ikiortissarsiorfigalugit kukkussutitsinnillu aaqqiiniarluta sapinngisarput tamaat iliuuseqarluta. — Ussatit 28:13; Jaaku 5:13-15.
Angut assuarnaatsoq eqqartuussisunut sassartinneqarumavoq
18, 19. (a) Sooq oqartoqarsinnaava Jobi iluanaarniarfiginninnianngisaannartoq? (b) Jobip eqqunngitsuliorsimaguni suna piareersimaffigaa?
18 Jobi unneqqarissuullunilu peqqusersuitsuuvoq. Taamaattumik ima oqarsinnaavoq: “Narsaatima assuaralunga nilliaffigissagaluarpannga qiporaasiornerilu tamarmik qiappata, tassani inerittunik nungusaaffigisimagatsik taarteqartinnagilli piginnittuilu soqutiginngivillugit, qanortoq taava naagilit kapinartut, qajuusiassat pinnatik, naasupiluillu, suaasiassat pinnatik!” (Jobi 31:38-40) Jobi allat nunaataannik unneqqaserlulluni arsaarinninneq ajorpoq, aamma sulisuminik iluanaarniarfiginninneq ajorpoq. Tamatumunnga assingusumik annikitsutigut annertuutigullu assuarnaattuartariaqarpugut.
19 Jobip ‘ikinngutini’ pingasut Elihulu inuusuttoq oqaluttuuppai qanoq inooriaaseqarsimanerluni. Jobi assuarnaatsumik inooriaaseqarnini uppernarsarlugu ‘atsiorsimavoq’, atsiukkaminillu akerliliiumasut tamaasa kajumissaarpai unnerluutigeqqulluni. Jobi pillarneqarnissaminut piareersimavoq, eqqunngitsuliorsimanini uppernarsarneqarsinnaappat. Maanna eqqartuussisunut suliassanngortitsereerpoq eqqartuussisullu qilammiusut aalajangiinissaat utaqqiinnarlugu. ‘Jobillu oqaasii tassunga naapput’. — Jobi 31:35, 40.
Assuarnaattuarsinnaavutit
20, 21. (a) Sooq Jobi assuarnaattuarsinnaava? (b) Guutimik asanninnermik qanoq ineriartortitsisinnaavugut?
20 Jobi assuarnaattuarsinnaavoq Jehovamik asannikkami aamma taassumannga asaneqarlunilu annertoqqusersorneqarami. Jobi ima oqarpoq: ‘Pilluaammik atugaqartipparma [imlt.: ilumoorfiginnillutit asannittuliorfigaarma], paaqqisarilluarsimavat inuunera.’ (Jobi 10:12) Jobi aamma allanut asannittuliortarpoq nalunnginnamiuk inoqatiminik ilumoorfiginnilluni asannittuliorfiginnittanngitsoq Ajugaqanngitsumik mianerinnittuunavianngitsoq. (Jobi 6:14) Assuarnaatsut Guutimik tullerminnillu asannittuupput. — Matthæusi 22:37-40.
21 Uagut Guutimik asanninnermik ineriartortitsisinnaavugut ullut tamaasa Biibilimik atuartarnitsigut tamatumanilu taanna pillugu paasisatsinnik eqqarsaatiginnittarnitsigut. Qamannga pisumik qinnutitsinni Guuti unnersiutigisarsinnaavarput uagutsinnullu ajunngitsuliortarnera pillugu qutsavigisarsinnaallugu. (Filippimiut 4:6, 7) Jehova erinarsorfigisarsinnaavarput taassumalu innuttaanik peqateqartuartarnerput iluaqutigalugu. (Hebræerit 10:23-25) Aamma taassuma ‘annaassineranik nalunaajaatiginneqataagaangatta’ Guutimik asanninnerujartuinnartassaagut. (Tussiaat 96:1-3) Taamaalilluta tussiaasiortup assuarnaattuarsimaneratut assuarnaattuarsinnaavugut, taanna ima erinarsorami: “Guuti qanillugu inuuneq tassa pilluarnartora. Qimarnguffigaara Guuti [Jehova].” — Tussiaat 73:28.
22, 23. Jehovap kisimi oqartussaaneranik tapersersuiniarluta iliuuserisavut itsaq Jehovap kiffaasa assuarnaatsut iliuuserisimasaannut qanoq assersuunneqarsinnaappat?
22 Piffissap ingerlanerani Jehovap assuarnaatsut assigiinngitsorpassuarnik suliassittarsimavai. Noa umiarsualiorpoq ‘iluarnermillu nalunaariartortitaalluni’. (2 Petrusi 2:5) Josvap Israelikkut nunamut neriorsuutigisamut siulersorpai, tamatumunngali tunngatillugu iluatsinneranut pissutaasutuaapput ‘Inatsisit allassimaffiannik’ “ullukkut unnuakkullu” atuartarnera taakkununngalu naapertuuttumik iliuuseqartarnera. (Josva 1:7, 8) Ukiuni hundredelinni siullerni kristumiut ajoqersuganngortitsiortorput Allakkallu atuaqqissaarniarlugit katersuuttuartarlutik. — Matthæusi 28:19, 20.
23 Assuarnaattuarlutalu Jehovap kisimi oqartussaaneranik tapersersuivugut naapertuilluarnermik oqaluussissutiginninnitsigut, ajoqersuganngortitsiortornitsigut, siunnersuutinik Biibilimiittunik malinninnitsigut ataatsimiinnernilu ataatsimeersuarnernilu uppeqatitsinnik katersuuteqateqartarnitsigut. Tamakku iluaqutigissavavut sapiitsuunissamut, anersaakkut nukittunissamut Guutillu piumasaatut iliorsinnaanissamut. Guutip piumasaatut iliornissaq sapernartorujussuartut isiginngilarput Ataatatsinnit qilammiusumit taassumalu erneranit annertoqqusersorneqaratta. (5 Mosesi 30:11-14; 1 Kunngit 8:57) Aamma ‘qatanngutigiissuarnit’ assuarnaattuarlutillu Jehovamik kisimi oqartussaalluni Naalagaasumik ataqqinnittunit tapersersorneqarpugut. — 1 Petrusi 2:17, NV. (w10 11/15-E)
Qanoq akissavit?
• Jehovap ileqqussatigut najoqqutassiai qanoq isigissavavut?
• Jobip pissusiisa ilaat sorliit nuannarineruigit?
• Jobi 31:29-37 naapertorlugu Jobi qanoq inuusimava?
• Sooq uagut Guutimut assuarnaattuarsinnaavugut?
[Atuaqqissaarnermi apeqqutit]
[Qupp. 29-mi assiliartaq]
Jobi Jehovamut assuarnaattuarpoq. Uaguttaaq assuarnaattuarsinnaavugut!
[Qupp. 32-mi assiliartaq]
Assuarnaattuarsinnaavugut!