Rinawmna Vawngin Kan Awm Ang!
Rinawmna Vawngin Kan Awm Ang!
“Kei zawng rilru ṭha puin [“rinawmna vawngin,” NW] ka awm ang.”—SAM 26:11.
1, 2. Joba chuan a rinawmna chungchângah eng nge a sawi a, Joba bung 31 chuan a chungchâng eng nge a târ lan?
HMAN lai chuan tûn lai ang bawkin thilte chu bûkna (pat-la) hmanga bûk a ni ṭhîn a. Thil bûk tûra chu a lehlama dahin, a lehlamah chuan bûk lung dah a ni ṭhîn. Pathian mite chuan bûkna dik leh bûk lung dik an hmang tûr a ni.—Thuf. 11:1.
2 Pathian ngaihsak tak Joba chuan Setana beihna hnuaia hrehawm a tawrh khân heti hian a sawi a ni: “Bûkna dik taka tehin awm ila, ka dikna [“rinawmna,” NW] hi Pathianin a hriat nân,” tiin. (Job. 31:6) He mi chungchângah hian, rinawmna vawn tumtu fiah thei dinhmun tam tak a sawi lang a. Mahse, Joba chuan bung 31-na aṭanga kan hriat theih angin, fiahna chu hlawhtling takin a pal tlang a ni. A entîrna ṭha tak chuan amah ang bawka thil ti tûr leh fakna hla phuahtu Davida ang bawka: “Kei zawng rilru ṭha puin [“rinawmna vawngin,” NW] ka awm ang,” tia rin tlatna nêna sawi tûrin min chêttîr bawk ang.—Sâm 26:11.
3. Engvângin nge thil lian leh tê thama rinawm tlat chu thil pawimawh tak a nih?
3 Joba chuan nasa taka fiahna tâwk mah se, Pathian chunga a rinawmna chu a vawng tlat a. Ṭhenkhat phei chuan Joba fiahna tawh nasa tak leh a rinawm tlatna chu pasalṭha thiltih ang hialin an sawi a ni. Joba ang tluka tuar chu kan awm lo. Mahse, rinawmna vawng tlat a, Pathian lalchungnunna thlâwptu ni tûr chuan, thil lian leh tê thamah pawh kan rinawm tlat tûr a ni.—Luka 16:10 chhiar rawh.
Nungchang Lama Rinawm A Pawimawh
4, 5. Rinawmna vawngtu angin, Joba chuan eng nungchang nge a pumpelh?
4 Pathian Jehova chunga kan rinawmna vawng tûr chuan Joba ang bawkin nungchang lama a tehnate chu kan zâwm tûr a ni. Ani chuan: “Ka mit atân thuthlung ka siam a, engah nge nula ka meilh ang? . . . Ka thinlung hian hmeichhia a îta, ka ṭhenawm kawngkâah chângte ka nih chuan, ka nupui chuan mi dang sum dêng sela, mi dangte chuan tlâwm rawh se,” tiin a sawi.—Job. 31:1, 9, 10.
5 Pathian hnêna a rinawmna vawn tlat a tum avângin, Joba chuan hmeichhiate ngaih châka melh chu a pumpelh a. Nupui nei a nih angin, nulate a chhai vêl lo va, mi nu ngaihzâwn lah a tum hek lo. Tlâng Chunga Thusawi-ah Isua chuan mipat hmeichhiatna kawnga nungchang mawi chungchângah thu thiltithei tak a sawi a, chu chu rinawmna vawngtute tân rilrua vawn reng tûr a ni chiang hle.—Matthaia 5:27, 28 chhiar rawh.
Kawhmawh Bâwl Chîng Ngai Suh Ang Che
6, 7. (a) Joba chungchâng ang bawkin, Pathianin kan rinawmna teh nân eng nge a hman? (b) Engvângin nge kawhmawh bâwl chîng emaw, mi bumhmang emaw kan nih loh vang?
6 Rinawmna vawngtu zînga chhiar tel ni tûr chuan kawhmawh bâwl kan chîng tûr a ni lo. (Thufingte 3:31-33 chhiar rawh.) Joba chuan: “Dâwt lama kal ka niha, bumna lama ka ke pên rang ṭhîn ka nih chuan. Bûkna dik taka tehin awm ila, ka dikna [“rinawmna,” NW] hi Pathianin a hriat nân,” a ti. (Job. 31:5, 6) Pathian Jehova chuan mi zawng zawng chu ‘bûkna dik takin’ a bûk ṭheuh va. Joba chungchâng ang bawkin, Pathian chuan a hnêna inpumpêk a chhiahhlawhte anga kan rinawmna teh nân a tehna ṭha famkim chu a hmang a ni.
7 Kawhmawh bâwl chîng emaw, bum hmang emaw kan nih chuan Pathian laka kan rinawmna kan vawng lo tihna a ni ang. Rinawmna vawngtute chuan ‘thil zahthlâk inthupte chu an malmâk’ a, ‘ngamthlêmna thu pawh an hmang lo.’ (2 Kor. 4:1, 2) Mahse, unaute’n Pathian ṭanpuina an dîl ngai khawpa ṭawngkam leh thiltiha kawhmawh bâwl kan chîn chuan engtin nge ni ang? Chutiang a nih chuan, kan tân a ṭha lo viau vang! Fakna hla phuahtu chu: “Ka mangannaah chuan LALPA chu ka au va, tichuan, anin mi chhâng a. Aw LALPA, hmui dawtheite lakah leh, lei mi bumhmang lakah chuan, ka nunna hi chhanhim ang che,” tiin a zai a ni. (Sâm 120:1, 2) Pathian chuan rinawmna vawng tak tak kan nih leh nih loh hriat nân, chhûng lama kan nihna dik tak a fiah theiin, “thinlungte leh rilrute a fiah ṭhîn” tih hriat reng chu a ṭha a ni.—Sâm 7:8, 9.
Mi Dangte Dâwr Dânah Entawn Tlâk Ni Ang Che
8. Engtin nge Joba chuan mi dangte a cheibâwl?
8 Kan rinawmna vawng tûr chuan Joba ang bawka mi dik, inngaitlâwm, leh mi dangte ngaihsak tak kan ni tûr a ni. Ani chuan heti hian a sawi: “Ka chhiahhlawhnu emaw, ka chhiahhlawhpa emaw, ka chunga an vuivaina thu thlen ka ngaihsak loh luih chuan, Pathian a lo thawh hunah eng nge ka tih tâk ang le? A rawn zawh chian hunah engtin nge ka chhân ang? Pum chhûnga kei mi siamtu khân ani pawh a siam lo vem ni? Pum chhûnga mi dintu chu thuhmun a ni lâwm ni?,” tiin.—Job. 31:13-15.
9. Joba chuan a chhiahhlawhte a dâwrnaah eng miziate nge a lantîr a, engtin nge mi dang kan dâwr ang?
9 Joba hun lai chuan thu buai rem chu a khirh vak lo niin a lang a. Thu buaite chu fel taka rem a ni a, salte pawhin court-ah thu buai an thlen thei vek a ni. Joba chu a chhiahhlawhte a dâwrna kawngah a dikin, ngil a nei hle a. Keini pawhin kan rinawmna vawng tûr chuan chutiang miziate chu kan lantîr tûr a ni a, a bîk takin Kristian kohhrana upa kan nih chuan kan lantîr lehzual tûr a ni.
Awt Suh La, Thilphal Rawh
10, 11. (a) Joba chu mi thilphal tak leh ṭanpui peih tak a ni tih engtin nge kan hriat theih? (b) Joba 31:16-25 thu chuan a hnua pêk Bible fuihna eng nge min hriatchhuahtîr theih?
10 Joba chu a thilphalin mi ṭanpui a peih a; mahni hma a sial lovin, a awt hek lo. Amah ngeiin heti hian a sawi a ni: “Hmeithaite bei ka tihdawna, ka chaw keimah maia ka eia, fahrahin a ei ve loh chuan, . . . Tupawh silhfên lova boral emaw . . . hmu ka niha, . . . kawngkâah chuan ṭanpuitu ka hmuh avânga fahrah chunga kut lek ka nih chuan, ka kokî hi ka dâr saiphêng nên phawk hlawk sela, ka bân hi khingkhangruh aṭangin thlawn hlauh rawh se,” tiin. Tin, Joba chuan rangkachak chu ‘a rinchhan’ chuan a rinawmna a vawng lo a ni ang.—Job. 31:16-25.
11 Chutiang hla thu hmanga a thusawite chuan zirtîr Jakoba thu: “Kan Pathian leh Pa mithmuha sakhaw biak dân thianghlim leh sual tel lo chu hei hi a ni, fahrah leh hmeithaite an hrehawm laia kan leh khawvêl bawlhhlawh kai lova insiam ṭhin hi,” tih chu min hriatchhuahtîr mai thei a. (Jak. 1:27) Isua vaukhânna thu: “Fîmkhur ula, awhna rêng rêng lakah chuan invêng rawh u; sum ngah hi mihring dam chhan a ni lo ve,” tih pawh chu kan hre chhuak mai thei bawk. Tichuan, Isua chuan awhna nei mi hausa thi ta pakhat “Pathian lama ngah si lo” chungchânga tehkhin thu chu a sawi a ni. (Lk. 12:15-21) Rinawmna vawng tûr chuan, awhna emaw, duhâmna emaw sualah chuan kan tlu tûr a ni lo. Duhâmna chu milem biakna a ni—mi duhâm thil awh chuan a ngaihsakna chu Jehova hnên ata a lâk pên a, a tân pathian anga biak milem a lo nih tâk avângin. (Kol. 3:5) Rinawmna leh duhâmna chu neih kawp theih a ni lo.
Biakna Dik Vuan Nghet Tlat Rawh
12, 13. Milem biakna pumpelh chungchângah Joba’n entawn tûr eng nge min hnutchhiah?
12 Rinawmna vawngtu chuan biakna thianghlim a pênsan lo va. Joba pawhin a pênsan lo tih he a thusawi aṭangin a lang a ni: “Nî khi a ên êm avâng leh thla pawh a ropui êm avânga ngaisânga, a rûka ka rilru an lo hîp beha, anmahni zaha ka kut ka phar chuan, chu pawh chu rorêltute hrem ngei chi, sual a ni, chung Pathian phatsantu ka nih dâwn avângin,” tih aṭangin.—Job. 31:26-28, C.L. Re-edited.
13 Joba chuan nunna nei lo thil siamte chu chibai a bûk lo. Vân lama thil siam thla ang chite’n a rûk têin a rilru an lo hîp a, chûngte chibai bûk nâna a ‘kut a phar’ chuan, Pathian phatsantu milem bia a ni ang. (Deut. 4:15-19) Pathian laka kan rinawmna vawng tûr chuan milem biakna zawng zawng kan pumpelh tûr a ni.—1 Johana 5:21 chhiar rawh.
Phuba Lâk Chîng Lo La, Vervêk Suh
14. Engvângin nge Joba chu mi chhiatna duh mi a ni lo tih kan sawi theih?
14 Joba chu mi chhiatna duh mi a ni lo va, mi nunrâwng a ni hek lo. Chutiang mi chuan rinawmna a neih lohzia a lantîr tih a hria a ni, amah ngeiin: “Mi hawtu chhiatna chunga lâwm ka nih emawa, thil ṭha lovin a tlâkbuak laia lâwm hlut ka nih emaw chuan, (A ni, a nunna ânchhe lawh khawpa sual ti tûrin kâ ka phal lo),” tiin a sawi si a.—Job. 31:29, 30.
15. Min hawtu tuemawin chhiatna a tawh huna lo hlim chu engvângin nge a dik loh?
15 Mi dik Joba chu amah hawtu tuemawin chhiatna a tawhin a lâwm ngai lo. A hnuah thufingte chuan heti hian min vaukhân a ni: “I hmêlma a tlûkin lâwm suh la, tihtlâwma a awmin i rilru lâwm suh se; chutilochuan LALPAN a hmu ang a, a lâwm lo vang a, a laka a thinrim a lamlêt dah ang e,” tiin. (Thuf. 24:17, 18) Pathian Jehova’n rilru a hmuh theih avângin, mi dangte chhiatna chunga a rûka kan lâwm leh lâwm loh a hre thei a, chutiang rilru put hmang chu a lâwm lo rêng rêng a ni. (Thuf. 17:5) Pathian chuan kan rilru ang zêlin min cheibâwl mai thei a ni: “Phuba lâk leh thungrulh chu keima tih tûr a ni,” tiin a sawi si a.—Deut. 32:35.
16. Hausa lo mah ila, engtin nge khualchhâwn thiam tak kan nih theih?
16 Joba chu khualchhâwn thiam tak a ni a. (Job. 31:31, 32) Hausa lo pawh ni ila, “mikhualte lâwmin” kan awm thei a ni. (Rom 12:13) “Hmangaihna awmnaa anhnah chawa rin chu huatna awmnaa bâwngpa châwm thau ei aiin a ṭha zâwk,” tih hre rengin, kan neih ang chhun chhun chu kan eipui thei a ni. (Thuf. 15:17) Kan chaw ei chu ho tê pawh ni se, rinawmna vawngtu unaute nêna hmangaihnaa kîl tlân a nih chuan kan ei tui hle ang a; thlarau lamah kan sâwtpui ṭheuh ngei bawk ang.
17. Engvângin nge sual pawi tak chu thup kan tum loh vang?
17 Joba chu mi vervêk a nih loh avângin a khualchhâwn thiamna dawngtute chu a chawi kâng ngei ang. Ani chu kum zabi khatna kohhran chhûnga lo tawlh lût Pathian ngaihsak lo, ‘hlâwkna duh vânga mi ngaina ṭhînte’ ang a ni ve lo va. (Jud. 3, 4, 16) Mi dangin an hriat huna an hmuhsit a hlauh avânga a sualna thup chîng emaw, ‘mahni âwm chhûnga khawlohna thuhrûk chîng’ emaw lah a ni hek lo. A ṭûl ang anga a inpuanna tûr Pathianin a enfiah chu a inhuam zâwk a ni. (Job. 31:33-37) Sual pawi takah kan tlu lût a nih chuan hming liau pumpelh nâna thup chu i tum lo vang u. Engtin nge rinawmna vawn kan tumzia kan lantîr theih? Ka khawlohna pawmna te, inlamlêtna te, thlarau lama ṭanpuina zawnna te, leh siam ṭhat nâna theih tâwp chhuahnate hmangin kan lantîr thei a ni.—Thuf. 28:13; Jak. 5:13-15.
Rinawmna Vawngtu Chu Fiah A Ni
18, 19. (a) Engvângin nge Joba chuan mite a chhawr dik lo ngai lo kan tih theih? (b) Joba chuan a dik loh chuan eng nge tih a inhuam?
18 Joba chu mi rinawm leh ngîl tak a ni a. Chuvângin, heti hian a sawi thei a ni: “Ka ram chu mi duh lohva au chhuak a niha, a lei rûtkhuarte an ṭap hlawm a nih chuan, man pe lova a rah chhuahte ei ka lo niha, a neitute nun hlauhtîr emaw ka lo nih chuan, buh aiah hlîng ṭo zâwk sela, ṭai aiah hlo har ṭo rawh se,” tiin. (Job. 31:38-40) Joba chuan mi dangte ram chu a hneh chhuh ngai lo va, thawktute lah a chhawr dik lo ngai hek lo. Ani ang bawkin, thil lian leh tê thamah pawh Pathian Jehova chunga rinawmna kan vawn chu a ngai a ni.
19 Joba chuan a ṭhian pathumte leh ṭhalai Elihua hmaah a nun dân chanchin chu a sawi a. Ani chuan a “chhinchhiahna” keng a nun dân chanchin chu a khing duh apiangin khing tûrin a sâwm a. Joba chu a lo dik lo a nih chuan, a hremna tawrh chu a inhuam a ni. Chuvângin, a thu buai chu theh lûtin, Pathian rorêlnain a chungthu a rêl dân tûr chu a nghâk a ni. Chutiang chuan, “Joba thu chu a tâwp ta” a ni.—Job. 31:35, 40.
Rinawmna I Vawng Thei
20, 21. (a) Engvângin nge Joba chuan rinawmna a vawn theih? (b) Engtin nge Pathian hmangaihna kan neih theih?
20 Joba’n rinawmna a vawn theih chhan chu Pathian a hmangaih vâng leh, ani pawhin amah hmangaiha a ṭanpui vâng a ni. Ani chuan: “[Jehova’n] nunna leh duhsakna mi pe a, i mi enkawlna [hmangaihna rinawm] chuan ka thlarau a zuah a,” tiin a sawi. (Job. 10:12) Chu bâkah, Joba chuan mi dangte chunga hmangaihna rinawm lantîr lotute chuan Engkimtitheia ṭihna an hawisan dâwn tih hriain, mi dangte chungah hmangaihna a lantîr a ni. (Job. 6:14) Rinawmna vawngtute chuan Pathian leh ṭhenawmte chu an hmangaih a ni.—Mt. 22:37-40.
21 Pathian hmangaihna chu a Thu nî tina chhiarin leh a chungchâng a târ lante chhût ngunin kan nei thei a. Tih tak zeta ṭawngṭainaah Pathian Jehova chu kan chawimawiin, kan chunga a ṭhatna avângin lâwmthu kan hrilh thei a ni. (Phil. 4:6, 7) A hnênah chawimawina hla kan sa theiin, a mite nêna inkâwm fona chu kan hlâwkpui thei bawk. (Heb. 10:23-25) Tichuan, rawngbâwlnaa kan tela, “a chhandamna thu” kan puan hian, Pathian kan hmangaihna chu a ṭhang chho bawk ang. (Sâm 96:1-3) Chutiang chuan, rinawmna kan vawng thei ang: “Kei atân erawh zawng Pathian hnaih hi a ṭha a ni: Lalpa PATHIAN chu ka inhumhimnaah ka hmang,” tia zaitu fakna hla phuahtu ang maiin.—Sâm 73:28.
22, 23. Jehova lalchungnunna thlâwptute kan nih angin, kan rawngbâwlna chu tûn hmaa rinawmna vawngtute rawngbâwlna nên engtin nge a inan?
22 Kum zabi liam ta zawng chhûng khân, Pathian Jehova chuan rinawmna vawngtute hnênah thawh tûr chi hrang hrang a pe a. Nova chuan lawng a tu a, ani chu “felna thu hriltu” a ni bawk. (2 Pet. 2:5) Josua chuan Israelte chu Ram Tiam-ah a hruai a; mahse, a hlawhtlin chhan chu ‘he dân bu hi . . . chhûn leh zâna’ a chhiar vâng leh chu mi mila thil a tih vâng a ni. (Jos. 1:7, 8) Kum zabi khatnaa Kristiante chuan zirtîrte siamin, anni chu Pathian Lehkha Thute zir tûrin an inhmu khâwm ziah ṭhîn bawk.—Mt. 28:19, 20.
23 Felna thu hrilin, zirtîrte siamin, Bible zilhna thute nunpuiin, leh kohhran inkhâwm leh inkhâwmpui tea ringtu dangte nêna inkâwm khâwmin Jehova lalchungnunna chu kan thlâwp a, kan rinawmna chu kan vawng bawk a ni. Chutiang thiltihte chuan huaisen tûr, thlarau lama chak tûr, leh Pathian duhzâwng tihna kawnga hlawhtling tûrin min ṭanpui a. Kan Pa vâna mi leh a Fapa ṭanpuina kan dawn avângin hei hi kan tân thil harsa lutuk a ni lo. (Deut. 30:11-14; 1 Lal. 8:57) Chu bâkah, rinawmna vawnga awma, Jehova chu an Lalpa Chungnungbera anga chawimawitu “unauhote” ṭanpuina chu kan dawng bawk a ni.—1 Pet. 2:17. (w10-E 11/15)
Engtin Nge Kan Chhân Ang?
• Jehova nungchang tehnate chu engtin nge kan thlîr ang?
• Joba miziaah eng nge i duh ber?
• Joba 31:29-37-a târ lan angin, Joba chu eng angin nge a nun?
• Engvângin nge Pathian chunga rinawmna kan vawn theih?
[Zirlai Atâna Zawhnate]
[Phêk 29-naa milem]
Joba chuan Jehova chunga a rinawmna a vawng. Keini pawhin kan vawng ve thei!
[Phêk 32-naa milem]
Rinawmna kan vawng thei!