Jej Aikwij Etetal Wõt ilo Wãnik!
Jej Aikwij Etetal Wõt ilo Wãnik!
“A kin ña, I naj etal ilo aõ wãnik.”—SAM 26:11.
1, 2. Ta eo Job ear ba kin an etetal ilo wãnik, im ta eo buk in Job japter 31 ej kwalok kin e?
ILO ien ko etto, armij ro rekin pauni men ko ikijen air kajerbal juõn kein joñok me juõn alal ak aen ej jutõk iolap im eor juõn alal ej ber ion, im ruo kein paun ko rej etoto ie. Rej likiti men eo rej pauni ion juõn ian kein joñok kein, im rej likiti juõn men erro ilo kein joñok eo juõn. Armij ro an Anij rar aikwij kajerbali kein joñok im paun ko rejime.—Ken. 11:1.
2 Ke armij eo etiljek Job ear iñtan ke ear ber iomin melejoñ ko jen Setan, ear ba: “[Jeova en] paun iõ kin ken paun e jime, bwe Anij en jela aõ wãnik.” (Job 31:6) Ikijen men in, Job ear kwalok jet abañ ko rej walok im remaroñ melejoñwe ro rewãnik. Bõtab ilo mol, Job ear anjo ion melejoñ kein, einwõt an walok ilo nan kein an ilo japter 31 ilo buk in Job. Bwe jen etetal wõt ilo wãnik, jej aikwij lor joñok in emõn an Job im einwõt dri sam eo Devid ke ear ba: “A kin ña, I naj etal ilo aõ wãnik.”—Sam 26:11.
3. Etke eaurõk bwe jen tiljek wõt ñõn Anij ilo men ko relap im men ko redrik?
3 Meñe elukkun lap an kar Job jelmae melejoñ ko, ear tiljek wõt ñõn Anij. Jet armij rej ba bwe wãnik eo an Job ej juõn joñok ekanuij emõn ñõn ro im elukkun lap air iion abañ im melejoñ ko. Jejjab lukkun iñtan einwõt kar Job. Bõtab, ñõn kwalok bwe jej wãnik wõt im jej rejetake iroij potata eo an Jeova, jej aikwij tiljek aolep ien ilo men ko relap im ko redrik.—Riit Luk 16:10.
Eaurõk bwe jen Mour Wõt ilo Jime im Wãnik
4, 5. Einwõt juõn eo ear mour ilo jime im wãnik, ta eo Job ear bõpraik e jen an kõmõne?
4 Bwe jen drebij wõt ar wãnik iman mejen Jeova, jej aikwij edrep ñõn kien ko an ikijen mour erreo, einwõt kar Job. Ear ba: “I ar kõmõn juõn bujen iben meja; inem ekijkan aõ maroñ in reilok ñõn juõn virjin? Elañe emwij karel buruõ ñõn juõn kõra, im I ar kebao ilo kejem in mweo imõn dri turiõ; Inem lio beliõ en irir ñõn bar juõn, im bar jet armij ren babu iben.”—Job 31:1, 9, 10.
5 Ilo an Job kate bwe en drebij wõt an wãnik iman mejen Anij, ear bõprae an kalimjeke bar juõn kõra ilo an mijkaiye. Einwõt juõn eman eo emwij an mare, ear jab katoojoj iben kõra ro ejelok beleir ak kajeoñ karel limaro eor beleir. Ilo Katak eo ion Tol eo, Jisõs ear kwalok juõn men eaurõk kin mour erreo, juõn katak im ro rej mour ilo jime rej aikwij kememeje.—Riit Matu 5:27, 28.
Jab Jerbal ilo Mon
6, 7. (a) Einwõt kar Job, ta eo Anij ej kajerbale ñõn joñe joñõn wãnik eo ar? (b) Etke jejjab aikwij jerbal ilo etao ak mon?
6 Elañe jekõnan bwe Jeova en watõk kij einwõt ro rewãnik, jej aikwij bõprae ar jerbal ilo etao. (Riit Sam Ko 5:6.) Job ear ba: “Elañe I ar etetal im eor riõp iba, im neiõ e ar kijorur in ilok ñõn mon. [Jeova en] paun iõ kin ken paun e jime, bwe Anij en jela aõ wãnik.” (Job 31:5, 6) Jeova ej kajerbal “ken paun e jime” ñõn joñe aolep armij ro. Einwõt kar Job, Jeova ej kajerbale ekajet jime eo an ewãppen ñõn joñe joñõn wãnik eo ar einwõt ro dri korijeran.
7 Elañe jej erom armij ro retao ak rejela mon, jeban drebij ar wãnik ñõn Anij. Ro rewãnik emwij air “illok jen men ko retino men in kajok” im rejjab “etetal ilo mon.” (2 Kor. 4:1, 2) Ak ta elañe jej mone juõn ian dri tõmak ro mõtar ilo nan ak kõmõn ko ar, im men in ej kõmõn bwe en akwelap im kajitõk jibõñ jen Jeova? Elañe jenaj eindrein, jenaj lo leen jerbal ko ar! Juõn dri jeje sam ear al: “Ilo aõ iñtan I ar lamij ñõn Jeova, inem E ar uak iõ. Kwon kõtlok aõ O Jeova, jen tien ko re riõp, im jen lo in mon.” (Sam 120:1, 2) Jej aikwij kememej bwe Anij emaroñ lo armij eo ituloa, im ej “melejoñ buru ko im lemnok ko” ñõn lale elañe jej mol ilo ar wãnik.—Sam 7:8, 9.
Kwon Juõn Joñok Emõn ilo am Kõmõn ñõn Ro Jet
8. Ewi wãwen an kar Job kõmõn ñõn ro jet?
8 Ñõn drebij wõt ar wãnik, jej aikwij einwõt Job, eo ear jab kaljiklok, ear etã buruen, im ear joij ñõn ro jet. Ear ba: “Elañe I ar kejekron lotan an dri korijera man ak kõra, ke rar akwaile iõ; I naj it ñe Anij e naj jerkak? Im ñe E naj itok, ta in uak kake ñõn E? Eo e ar kõmõnmõn iõ ilo loje, E ar jab kõmõnmõn e ke? Im e jab juõn wõt E ar kõmõnmõn kimro ilo loje ke?”—Job 31:13-15.
9. Ta karkar ko Job ear kwalok ilo an kar jerbal iben dri jerbal ro an, im ewi wãwen jemaroñ kajeoñ e ilo wãwen in?
9 Ealikar bwe ilo ran ko an Job, ear ejelok kakien ko kin wãwen air kamarmire abañ ko an armij ro ilo jikin ekajet. Armij ro rar kwalok abnõnõ ko air ilo juõn wãwen emelak, im dri kamakoko ro rar maroñ bareinwõt bõkmantak abnõnõ ko air ilo jikin ekajet ko. Job ear jab kaljiklok ak ear meanwõr ilo an jerbal iben dri jerbal ro an. Elañe jekõnan mour wõt ilo jime im wãnik, jej aikwij kwalok karkar kein, elaptata elañe jej jerbal einwõt elder ro ilo congregation eo an dri Kristian.
Kwon Kwalok Joij im Jab Kibbon
10, 11. (a) Ewi wãwen ar jela bwe Job ear juõn armij eo ejoij im ejela jibõñ ro jet? (b) Ilo ar riiti Job 31:16-25, enaj kakememej kij kin eon ta ko jet?
10 Job ear joij im ear jela jibõñ armij, im ear jab kibbon ak arõk mweiuk. Ear ba: “Elañe . . . I ar kõmõn bwe mejen lio e joko belen en tõplok, ak I ar mõña kijiõ mõke iaõ, im ro e joko jemeir rar jab mõña jen e . . . Elañe I ar lo an joko jabrewõt kin an aikwij nuknuk . . . Elañe I ar kwotõke peiõ nae ro e joko jemeir, kin aõ kar lo men in jibõñ iõ ilo kejem eo: Inem aieraõ en tumkok, im peiõ en jelellok.” Bareinwõt Job eban kar drebij an wãnik iman mejen Anij elañe ear ba nan kein kin gold ko an: “Kwe aõ men in kõtõmene.”—Job 31:16-25.
11 Nan kein remejaja an Job rej kakememej kij kin nan ko an dri kalor Jemes: “Men in kabuñ erreo im jab etton iman mejen ar Anij im Jemer, eñin, bwe armij en lolok ro atajinemjen im kõra ejoko beleir ilo air jorran, im bwe en drebij e im jab lipjinjin kin lõl in.” (Jem. 1:27) Jemaroñ bareinwõt kememej nan in kakkil eo an Jisõs: “Komin lale, im kejbãrok kom jen jabrewõt arõk mweiuk: bwe an armij mour e jab kin an lõñ men ko an.” Elikin an ba nan kein, Jisõs ear kwalok juõn wanjoñok kin juõn eman eo emweie im ekibbon im ear mij einwõt juõn eo “e jab mweie ñõn Anij.” (Luk 12:15-21) Bwe jen drebij wõt ar wãnik, jej aikwij kejbãrok kij jen arõk mweiuk ak kibbon. Arõk mweiuk ej mõtõn kabuñ ñõn ekjõp, kinke men eo armij eo elap an kõnan enaj kajeõrlok e jen Jeova, im erom juõn men me ej kabuñ ñõne. (Kol. 3:5) Wãnik im kibbon reban koba iben dron!
Jab Ilok jen Kabuñ eo Emol
12, 13. Ta joñok eo Job ear likiti ilo an kar kejbãrok e jen an kabuñ ñõn ekjõp?
12 Ro rewãnik rejjab ilok jen kabuñ eo emol. Job ear jab kõmõne men in, kinke ear ba: “Elañe I ar reilok ñõn al ke e ar romak, ak aliñ ke ej etetal ilo an jatõltil, im emwij karel buruõ ilo etino, im loñiõ e ar mejenmaik peiõ: Men in bareinwõt juõn bwir ro dri ekajet ren kajeik e; bwe I naj kar karmijete Anij eo ilõñ.”—Job 31:26-28.
13 Job ear jab kabuñ ñõn men ko ibelakin. Elañe ear kõnan kabuñ ñõn men ko ilõñ einwõt aliñ, im elañe ‘loñin ear mejenmaik pein,’ bwelen ej kwotake pein im kwalok an koutiej men kein, enaj erom juõn dri kabuñ ñõn ekjõp im ej kejekron Anij. (Dut. 4:15, 19) Ñõn drebij wõt ar wãnik iman mejen Anij, jej aikwij kejbãrok kij jen jabrewõt kain kabuñ ñõn ekjõp.—Riit 1 Jon 5:21.
Jab Kole ak Kijirãte Ro Jet
14. Etke jemaroñ ba bwe ear ejelok kijirãt iben Job?
14 Job ear jab kijirãte armij ro ak lej ñõn ir. Ear jela bwe karkar rõt kein renaj kalikar bwe ejjab juõn eo ej etetal ilo wãnik, kinke ear ba: “Elañe I ar mõnõnõ kin jorran an eo e ar kijirãte iõ, ak koutiej iõ mõke ke nana e ar lo e. Aet, I ar jab likit loñiõ bwe en bwir kin an kole bwe en mij.”—Job 31:29, 30.
15. Etke ejjab juõn men ejime ñõn ar mõnõnõ elañe jorran ej walok ñõn ro rej kijirãte kij?
15 Job ear jab mõnõnõ ke jorran ear buñ ion ro rej kijirãte e. Juõn jabõn kennan ej kakkil kij: “Kwon jab mõnõnõ ñe eo dri kijirãte yuk ej buñ, im buruõm en jab lõñliñ ñe emwij ukõj e: Ñe ab Jeova en loe, im E illu, inem En kajeorlok An illu jen e.” (Ken. 24:17, 18) Kinke Jeova emaroñ lo buruer, ejela elañe jej mõnõnõ ñe juõn ej iion jorran, im ejjab mõnõnõ elañe jej kwalok lemnok rõt in. (Ken. 17:5) Anij enaj kõmõn ñõn kij ekkar ñõn jerbal ko ar, bwe ej ba: “Kwonaõ irenwõne, I naj nawõnan.”—Rom 12:19.
16. Meñe jemaroñ jab mweie, ewi wãwen ar maroñ kajijõtarmij?
16 Job ear jela karuwainene armij. (Job 31:31, 32) Meñe jemaroñ jab mweie, jemaroñ wõnmanlok wõt im “kajijõtarmij.” (Rom 12:13) Jemaroñ kir ro jet ñõn mõña bajjek iber, ilo ar kememej bwe ‘emõnlok mõña ekan in ene, ijo yokwe ej ber, jen ñe juõn ox e uwe, im eor kijirãt.’ (Ken. 15:17) Meñe mõña ko rejjab lap, ak ien rõt kein im robrak kin yokwe emaroñ lukkun jibõñ kij ñõn kakajurlok tõmak eo ar.
17. Etke jejjab aikwij in kajeoñ noje bwir ko ar?
17 Armij ro remaroñ kar bõk elap kõkãtõk ilo air ber iben Job, kinke ear jab joij etao. Ear jab einwõt ro jet im rar ber ilo congregation eo ilo ebeben eo kein kajuõn me rar “etao ilo air nebar ro jet bwe en bo kõnan ko air make.” (Jud 3, 4, 16, UBS) Job ear jab kalibubu bwir ko an ak ‘noj an jab wãnik,’ bwelen kin an mijõk elañe jet renaj drike elañe renaj jela. Ear mõnõnõ in kõtlok bwe Anij en etale e, eo im ear kwalok bwir ko an ñõn e. (Job 31:33-37) Elañe jar kõmõne juõn bwir elap, jen jab kajeoñ in noje bwir in ñõn kejbãrok bwe en jab nana etad. Ewi wãwen jemaroñ kwalok ñõn Anij bwe jej kate kij ñõn drebij wõt ar wãnik? Ilo ar kwalok bwir ko ar, ukwelok jeni, kajitõk jibõñ jen elder ro, im kate kij ñõn kõmõn oktõk ko.—Ken. 28:13; Jem. 5:13-15.
Job Ear Kate Iomin Melejoñ ko ñõn Kamol An Wãnik
18, 19. (a) Etke jemaroñ ba bwe Job ear jab nana an kõmõn ñõn jabrewõt armij? (b) Ta eo Job ear mõnõnõ in kõmõne elañe rar lo ruõn?
18 Job ear juõn armij emol im ejime an jerbal. Eñin unin ear maroñ ba: “Elañe eneo eniõ ej lamij nae iõ, im jukur ko an rej jimor jõñ; Elañe I ar mõña leen ko an im ejelok mõnni wõnan, ak I ar kõmõn bwe ro drinnek ren mij: Inem kãliklik ko ren edrek im binej jenkwõn wit, im mar bõjik en binej jenkwõn barli.” (Job 31:38-40) Job ear jab bõk wãto ko an ro jet, im ear jab nana an jerbal ñõn dri jerbal ro an. Einwõt Job, jej aikwij drebij wõt ar mour ilo jime im wãnik iman mejen Jeova ilo men ko relap im ko redrik.
19 Job ear kennan kin wãwen an kar mour iman lõmaro jilu mõtõn im likao eo etan Ilaihu. Job ear kõtlok bwe jabrewõt dri jumae en kinaklok e im lale elañe ear or men en ejjab jime ear kõmõne ilo mour eo an. Elañe rar lo ruõn Job, ear mõnõnõ in bõk jabrewõt kaje. Inem ear jemlok “nan ko an Job” elikin an kar bõkmantak abnõnõ eo an, im ear kõtar bwe Jeova en ekajet e.—Job 31:35, 40.
Kwomaroñ Etetal Wõt ilo Wãnik
20, 21. (a) Etke Job ear maroñ etetal wõt ilo wãnik? (b) Ewi wãwen jemaroñ kadrek yokwe eo ar ñõn Anij?
20 Job ear maroñ etetal wõt ilo wãnik kinke ear yokwe Anij, im Jeova ear yokwe e im jibõñ e. Job ear ba: “Kwar letok ñõn iõ mour im tiriamokake: im [Jeova] Am lale iõ e ar kejbãrok aõ.” (Job 10:12) Bareinwõt, Job ear kwalok yokwe ñõn ro jet, ilo an kile bwe elañe jabrewõt ejjab kwalok yokwe ñõn ro jet, men in enaj kõmõn bwe ren jab kwalok air mijõk Eo Eutiejtata. (Job 6:14) Juõn eo ej mour ilo jime im wãnik ej yokwe Anij im dri turin.—Matu 22:37-40.
21 Jemaroñ kadrek yokwe eo ar ñõn Anij ikijen ar riiti Nan eo An kajjojo ran im kalomõnlokjen kin ta eo ej katakin kij kin Anij. Ilo ar jar jen buruer, jemaroñ wijtake Jeova im kamolol e kin an joij ñõn kij. (Pil. 4:6, 7) Jemaroñ al ñõn Jeova im bõk tokjen ko ilo ar kobalok iben armij ro dron. (Hib. 10:23-25) Yokwe eo ar ñõn Anij enaj bareinwõt edreklok ilo ar bõk kwonad ilo jerbal in kwalok nan im keañ kin “lomor eo An.” (Sam 96:1-3) Ikijen wãwen kein, jenaj maroñ etetal wõt ilo wãnik, einwõt dri jeje sam ke ear al: “A emõn iba bwe in kebakwoj ñõn Anij; I ar kõmõn Anij Jeova aõ likepijñõk.”—Sam 73:28.
22, 23. Einwõt ro rej rejetake iroij potata eo an Jeova, ewi wãwen jerbal im makõtkit ko ar rej einwõt ko an ro rar tiljek ilo ien ko etto?
22 Iomin elõñ ebeben ko, Jeova ear lelok elõñ jerbal ko reoktõk ñõn ro rar drebij wõt air tiljek. Noa ear jek wa eo im ear juõn “dri kwalok ekwojarjar.” (2 Pit. 2:5) Joshua ear tel dri Israel ro ñõn Enen Kalimur eo, bõtab ear maroñ lo wõt tõbrõk kinke ear riiti “buk in kien . . . ran im boñ” im ear jerbale men ko ear riiti. (Josh. 1:7, 8) Dri Kristian ro ilo ebeben eo kein kajuõn rar kõmõn dri kalor ro im ekkeini air koba iben dron im katak kin Nan in Anij.—Matu 28:19, 20.
23 Jej rejetake iroij potata eo an Jeova im drebij ar tiljek ilo ar kwalok nan kin mol eo, kõmõn dri kalor ro, jerbali nan in kakabilek ko jen Baibel, im ilo ar kobalok iben dri tõmak ro mõtar ilo kwelok ko an congregation, im bareinwõt ilo kwelok ko relap. Men kein rej jibõñ kij bwe jen beran, kajur wõt ilo tõmak, im lo tõbrõk ilo ar kõmõnmõn ankilan Anij. Jerbal im makõtkit kein rejjab jet men ko rebin ñõn kij kinke jej bõk jibõñ jen Jemer ilõñ im eo Nejin. (Dut. 30:11-14; 1 Kiñ. 8:57) Kobalok iben men in, jej bõk jibõñ jen rolul in “jimjãn jimjãtin” eo ibelakin lõl in, ro im rej bareinwõt etetal ilo wãnik im rej nebar Jeova einwõt Iroij Potata eo air.—1 Pit. 2:17.
Ewi Wãwen Am Naj Uak?
• Ewi wãwen ar aikwij watõk kien ko an Anij kin mour erreo?
• Ta karkar ko an Job im elap an emõn ibõm?
• Einwõt an walok ilo Job 31:29-37, ewi wãwen an kar Job kõmõn ñõn ro jet?
• Etke jemaroñ etetal wõt ilo wãnik iman mejen Anij?
[Kajitõk ko ñan katak]
[Pija ilo peij 29]
Job ear drebij wõt an mour ilo jime im wãnik. Kij bareinwõt jemaroñ kõmõne men in!
[Pija ilo peij 32]
Jemaroñ etetal wõt ilo wãnik!