D na n saka Wẽnnaam ne d sũur fãa!
D na n saka Wẽnnaam ne d sũur fãa!
“Maam yẽ, mam na n kẽna m burkĩndã pʋgẽ.”—YƖƖL 26:11, NW.
1, 2. Bõe la a Zoob yeel a pʋ-peelmã wɛɛngẽ, la goam nins sẽn be Zoob sak 31 pʋgẽ wã wilgda bõe a mengã zugu?
PĨND wẽndẽ wã, la rũndã-rũndã menga, b magda teedã zɩslem ne balãnse. Balãns n be tɩ b rogend laas a yiib a zugu, n dɩk bũmb ning b sẽn dat n makã n ning laag a ye pʋga, la b sagl kɩlo laag a to wã pʋga. Wẽnnaam nin-buiidã ra pa segd n tall balãns sẽn pa sõma wall zãmb kɩlo n mak bũmb n koos ne ned ye.—Yel. 11:1.
2 A Sʋɩtãan sẽn wa n namsd wẽn-sakd a Zoobã, a Zoob yeela woto: “Wẽnnaam sã n data, bɩ b mak maam sõma n gese, b na mik tɩ mam yaa pʋ-peelem soaba.” (Zoob 31:6) A Zoob sõdga yɛl toor-toor sẽn tõe n kɩt tɩ wẽn-sakd wa kong n beeg Wẽnnaam. La a Zoob goam nins sẽn be Zoob sak 31 pʋgẽ wã wilgdame tɩ yel-kãensã buud taoore, a tõogame n kell n sak Wẽnnaam. A mak-sõngã tõe n kɩtame tɩ d tʋlg n dɩk a togs-n-taare, n wa tõog n yeel ne kɩs-sɩd wa yɩɩl-gʋlsd a Davɩɩd sẽn yeelã. A ra yeela woto: “Maam yẽ, mam na n kẽna m burkĩndã pʋgẽ.”—Yɩɩl 26:11, NW.
3. Bõe yĩng tɩ tar yõod tɩ d sak Wẽnnaam yel-bɛd la yel-bõoneg pʋgẽ?
3 Baa b sẽn nams a Zoob tɩ loog noorã, a kell n saka Wẽnnaam ne a sũur fãa. Neb kẽer pʋd n tõe n yeelame tɩ b sẽn mak a Zoob to-to t’a baas n kell n sak Wẽnnaamã, a kõo mak-sõng sẽn ka to. Yaa sɩd tɩ tõnd pa namsd wa a Zoob sẽn nams to-to wã ye. La baasgo, d segd n saka Wẽnnaam yel-bɛd la yel-bõoneg pʋgẽ, n wilg tɩ d bee a naamã poorẽ.—Karm-y Luk 16:10.
Wẽn-sakd pa segd n yo ye
4, 5. A Zoob sẽn da sakd Wẽnnaam ne a sũur fãa wã yĩnga, a ra gũusda a meng ne bõe?
4 D sã n dat n kell n sak a Zeova ne d sũur fãa, d segd n tũuda noy nins a sẽn gãneg tɩ gɩdgd yoobã wa a Zoob sẽn maanã. A Zoob yeela woto: “Mam wẽena ne m nin tɩ m ka na n ges pʋg-sadb ne ratem sẽn yaa wẽng ye. . . . Mam sã n dat n maan wẽng ne pag n soos n gũus m yak zaka, bɩ ned a to modg mam pagã t’a wer zom n kõ-a, la bɩ rap a taab peeg-a n yo.”—Zoob 31:1, 9, 10.
5 A Zoob sẽn da rat ne a sũur fãa n sak Wẽnnaamã yĩnga, a ra gũusdame n pa rat n ges pag ne ratem wẽnga, tɩ wa kɩt t’a tall yoob tʋlsem ye. A Zoob sẽn da kẽ kãadmã yĩnga, a pa tall rolsem manesem ne pʋg-sada, wall a ro ned a to pag ye. A Zezi sẽn wa n sõsd ne nebã tãngã zugã, a yeela gomd sẽn tar pãnga, sẽn wilgd tɩ yoob gɩdgame. Yaa vẽeneg tɩ neb nins sẽn dat n sak Wẽnnaam ne b sũy fãa wã segd n ninga rẽ b yamẽ.—Karm-y Matɩe 5:27, 28.
Yɩ-y pʋ-peelem dãmba
6, 7. a) Wãn to la a Zoob kibarã wilgd Wẽnnaam sẽn maand to-to n bãngd d sã n sɩd yaa wẽn-sakda? b) Bõe yĩng tɩ d pa segd n tʋmd tʋʋm-kɛg pa rẽ bɩ n zãmbd d taabã?
6 D sã n dat tɩ b geelg-d wẽn-sakdbã sʋka, d pa segd n sakd n tʋmd tʋʋm-kɛg ye. (Karm-y Yɩɩl Sõamyã 5:7.) A Zoob yeela woto: “Mam ka mi belgr ye. Mam ka zãmsd ziri ye. Wẽnnaam sã n data, bɩ b mak maam sõma n gese, b na mik tɩ mam yaa pʋ-peelem soaba.” (Zoob 31:5, 6) A Zeova ‘makda ninsaalbã fãa sõma.’ Wala sẽn yɩ to-to a Zoob nengẽ wã, Wẽnnaam tara makdga, n makd tõnd sẽn na yɩl n bãng d sã n yaa wẽn-sakdba. Makdg kãng yaa a noyã sẽn zems zãng n yaa tɩrsã.
7 D sã n wa tʋmd tʋʋm-kɛg pa rẽ bɩ n zãmbd d taabã ne d no-goam wall ne d tʋʋma, d pa le tõe n yeel tɩ d yaa wẽn-sakd ye. Wẽn-sakd “basa bũmb nins sẽn yaa yãnde, sẽn soos n maanã,” n pa le “kẽnd ne sɩlem ye.” (2 Kor. 4:1, 2) La yaa wãn masã, d sã n yag d tẽed-n-taag ziri wall d zãmb-a, tɩ kɩt t’a kot Wẽnnaam sõngre? Woto yaa kaeto! Bala a baasg na n yɩɩ wẽng ne-do. Yɩɩl-gʋlsd a ye ra yeela woto: “Zusoaba, bɩ y fãag maam ne noor sẽn yagd ziri la belgr zɩlemde.” (Yɩɩl 120:1, 2) Segdame tɩ d tẽeg tɩ Wẽnnaam sã n dat n bãng tõnd sã n sɩd yaa wẽn-sakda, a tõe n yãa sẽn be d sũurã pʋgẽ wã, bala a mii “nebã sũy ne b ratem.”—Yɩɩl 7:9, 10.
Tall-y manesem-sõng ne nebã
8. A Zoob manesem da yaa wãn ne nebã?
8 D sã n dat n kell n yɩ wẽn-sakda, d segd n yɩɩ wa a Zoob sẽn da yaa nin-tɩrga, sik-m-meng soab la a nand nebã. A yeela woto: “Mam sã n da maan m yemb-daoog bɩ m yemb-poak pãng n ka kõ a sẽn tog n paame, Wẽnnaam sã n yiki, mam na n maana wãna? Bãmb sã n sok maam, mam na n leokame tɩ bõe? Yaa sẽn naan-a maam m ma pʋgẽ wã n naan m yembsã me.”—Zoob 31:13-15.
9. A Zoob manesem da yaa wãn ne a tʋm-tʋmdbã, la rẽ wɛɛngẽ bõe la tõnd me segd n maane?
9 Wõnda a Zoob wakatẽ wã, f sã n da rat tɩ bʋ-kaoodbã maneg f yelle, ra yaa nana. Bʋ-kaoodbã ra sigla b tʋʋmã sõma la b tʋmd neere, hal tɩ baa yembsã meng ra tõe n tɩ bool ned b taoore. A Zoob yɩɩ nin-tɩrga, la ned sẽn da zoet a tʋm-tʋmdbã nimbãanega. Tõnd me sã n dat n sɩd yɩ wẽn-sakdba, d segd n talla zʋg-sõma kãensã, sẽn yɩɩd fãa d sã n yaa kãsem soab tigingã pʋgẽ.
Yɩ-y kõta, la y ra yɩ zoe-bõn soab ye
10, 11. a) Bõe n wilgd t’a Zoob ra yaa kõta, la ned sẽn sõngd a taaba? b) Zoob 31:16-25 wã tõe n tẽeg-d-la Biiblã sagl-bʋs me?
10 A Zoob ra yaa kõta, la ned sẽn sõngd a taaba. A ra pa beed soab la zoe-bõn soab ye. A Zoob yeela woto: “M ka bas n ka sõng pʋg-kõap ye. Mam ka rɩ m dɩɩb n mong kɩɩb ye. Mam sõnga pʋg-kõap m vɩɩmã tɛka. . . . Mam ka yã nimbãan-ned sẽn ka tar fuug bɩ fu-goabg n ka kõ-a fuug ye. . . . Mam sã n nams kɩɩb m sẽn mi tɩ m yaa nin-bɛd nedã yĩnga, bɩ m bãok sok tɩ m kangã lʋɩ n kao.” La a Zoob sã n ‘da teeg a arzɛgsã t’a tẽeb be ne a sãnemã,’ a ra pa na n yɩẽ wẽn-sakd ye.—Zoob 31:16-25.
11 Tõe t’a Zoob gom-kãensã sẽn be yamleoogã tẽegda tõnd karen-biig a Zak sẽn yeel bũmb ningã. A yeela woto: “Tẽeb sẽn yaa sõma sẽn ka tar yell tõnd Ba a Wẽnnaam nifẽ, yaa tɩ y kẽng n sõng kɩɩbs ne pʋg-kõap bãmb toog pʋgẽ, la y gũus ne dũniyã wẽngã.” (Zak 1:27) Leb n tõe n tẽeg-d-la a Zezi saglga. A ra yeela woto: “Bɩ y gũus y mens neere, n da maan zoe-bõn ye; tɩ bõe, ned ka tar vɩɩm a paoong sẽn yaa wʋsg yĩng ye.” Rẽ poore, a togsa kibare, n gom rakãagr sẽn yɩ zoe-bõn soab sẽn wa n ki, n yaool n da ka tar arzɛgs Wẽnnaam nifẽ yelle. (Luk 12:15-21) D sã n dat n wilg tɩ d yaa wẽn-sakda, d segd n zãaga d meng ne zoe-bõn la yão-beed sẽn yaa yel-wẽnã. Zoe-bõn ne bõn-naands pʋʋsg yaa a ye. Bala ned sã n wa yã bũmb n dat ne a sũur fãa, a wat n basa a Zeova raabã maaneg n baood bõn-kãng n yɩɩda, tɩ bũmbã lebg wa a wẽnde. (Kol. 3:5) Wẽn-sakr ne bõn-zoeend pa tũud taab ye!
Ra bas-y tũudum hakɩkã ye
12, 13. Gil bõn-naandsã pʋʋsgã wɛɛngẽ, mak-sõng bʋg la a Zoob kõ tõndo?
12 Ned sẽn sakd Wẽnnaam ne a sũur fãa pa basd tũudum hakɩkã ye. A Zoob pa bas Wẽnnaam tũub ye. Bala a yeela woto: “Mam sã n da ges wĩndgã ne a vẽenemã la kiuugã sẽn kẽnd ne a ziirã, n sak makr m sũurã pʋgẽ n waoog-ba, a ra na n yɩɩ yel-wẽna. Tɩ bõe, mam da na n kɩɩsa Wẽnnaam sẽn be yĩngrã.”—Zoob 31:26-28.
13 A Zoob ra pa sakd n waoogd bõn-naands wa Wẽnnaam ye. A yeelame tɩ yẽ sã n sak makr a sũur pʋgẽ n waoog bõn-naands sẽn be yĩngri, wala kiuugã, a ra na n lebga bõn-naands pʋʋsda, n kɩɩs Wẽnnaam. (Tõo. 4:15, 19) D sã n dat n kell n yɩ wẽn-sakda, d segd n gila bõn-naands pʋʋsgo.—Karm-y 1 Zã 5:21.
Ra bao-y n dok-y y sũuri, wall y yɩ pʋ-lik soab ye
14. Bõe yĩng tɩ d tõe n yeel t’a Zoob ra pa wẽnem soaba?
14 A Zoob ra pa nin-toaag bɩ wẽnem soab ye. A ra miime tɩ wẽn-sakd pa segd n yɩ ned a woto buud ye. Bala a yeela woto: “M bɛyã sã n sãam bɩ toog n paam-a, mam ka maand sũ-noog ye. Mam ka sak n yaag m noor n kãab-a t’a ki ye.”—Zoob 31:29, 30.
15. Bõe yĩng tɩ d pa segd n kɩdem sũ-noogo, yel-beed sã n wa paam ned sẽn kis tõndo?
15 A Zoob sẽn yɩ nin-tɩrgã ra zɩ n kɩdem sũ-noogo, yel-beed sẽn paam ned sẽn kis-a yĩng ye. Yel-bũnd a yembr wa n yeela woto: “Fo bɛ sã n lʋɩ bɩ f ra maan sũ-noog ye. B sã n wa lub-a, bɩ f ra kɩdme, tɩ Zusoabã sũur wa sãam tɩ b bas a sɩbgrã ye.” (Yel. 24:17, 18) Sẽn mik t’a Zeova tõe n bãnga sẽn be ned sũurẽ wã, d sã n kɩdem sũ-noog yel-beed sẽn paam d to yĩnga, a miime. La yaa vẽeneg tɩ rẽ pa noom-a ye. (Yel. 17:5) Wẽnnaam tõe n dol-d-la rẽ yĩnga, bala a yeela woto: “Sũ-dokr la beem tugb yaa maam n so.”—Tõo. 32:35.
16. Baa d nug pa zãada, wãn to la d tõe n wilg tɩ d maanda taab neere?
16 A Zoob yɩɩ ned sẽn da nong n deegd sãamba. (Zoob 31:31, 32) Baa d nug pa zãada, d me tõe n ‘maanda sãambã sãando.’ (Rom 12:13) Sẽn yaa rɩɩb ning fãa la d tõe n paame, d tõe n boola d taaba, tɩ wilgdẽ tɩ d miime tɩ “neb sã n nong taab n dɩt medg n são neb sẽn wãbd nemd la b zabd taaba.” (Yel. 15:17) D sã n naag d tẽed-n-taag n na n dɩ la d wilg taab d nonglem, baa sẽn yaa rɩɩb ning fãa, tara yamleoogo. Yaa vẽeneg me tɩ na n kenga d fãa tẽebo.
17. D sã n maan yel-wẽn-kãsenga, bõe yĩng tɩ d pa segd n solg-a?
17 Neb nins a Zoob sẽn da reegd sãandã segd n sɩd ra paamda tẽeb kengre. Bala a Zoob sɩd ra maanda rẽ ne pʋ-peelem. A ra pa wõnd nin-wẽns nins sẽn da soos n kẽ pipi kiris-neb tigingã pʋgẽ wã ye. Nin-kãens ra “gomda no-noom goam ne nebã n tẽed tɩ bãmb na n paama yõodo.” (Ziid 3, 4, 16) Sẽn paase, a Zoob ra pa ‘bĩngd a yel-wẽnã a sũur pʋgẽ,’ rat n yeel t’a ra pa solgd a kongre, a sẽn zoet neb na n wa wʋm n paoog-a yĩng ye. A ra sakame tɩ Wẽnnaam fees-a, bala yaa yẽ la a ra segd n togs a kongr fãa. (Zoob 31:33-37) D sã n maan yel-wẽn-kãseng bɩ d ra solg d kongrã, d sẽn pa rat tɩ d yʋʋr sãam yĩng ye. Wakat kãnga, wãn to la d tõe n wilg tɩ d modgdame n dat n kell n sak Wẽnnaam ne d sũur fãa? Yaa d sẽn na n sak n deeg d kongrã, n tek yam n kos sugri, n bao kãsem dãmbã sõngre, la d maan d sẽn tõe fãa n dems yɛl nins d sẽn segd n demsã.—Yel. 28:13; Zak 5:13-15.
A kosame tɩ b mak-a n ges a sã n sɩd yaa wẽn-sakda
18, 19. a) Bõe yĩng tɩ d tõe n yeel t’a Zoob pa tol n wẽg neda? b) B sã n da tõog n wilg t’a Zoob kongame, bõe la a ra na n sake?
18 A Zoob ra yaa pʋ-peelem soab la nin-sõngo. Rẽ n so t’a tõog n yeel woto: “Mam pʋʋgã sã n kelem n yeel tɩ m maand-a-la wẽnga, la a kaalem me sã n yãbe, la m sã n deeg ned pʋʋg zaalem n kʋ a soabã, bɩ m pʋʋgã wom gõos ne moodo, la a ra wom ki ne baning ye.” (Zoob 31:38-40) A Zoob zɩ n maan ned pãng n deeg a pʋʋgo, wall a zãgs n pa yao a tʋm-tʋmdb ye. Tõnd me segd n dɩka a togs-n-taare, n sakd Wẽnnaam ne d sũur fãa yel-bɛd la yel-bõoneg pʋgẽ.
19 A Zoob goma a sẽn vɩɩmd to-to wã yell a zo-rãmb a tãabã taoore, la bi-bɩɩg a Eliyu me taoore. Rẽ poore, a yeelame tɩ ned sã n yã bũmb n na n dõd yẽ bɩ a soab wilgi. A Zoob yeelame tɩ b sã n tõog n yã yell sẽn wilgd tɩ yẽ tara taale, a na n saka sɩbgr dẽ yĩnga. Rẽ n so t’a bas a yellã Wẽnnaam nugẽ, n gũudẽ t’a kao a bʋʋdo. Yaa rẽ n baasd a Zoob goamã.—Zoob 31:35, 40.
Y tõe n kell n saka Wẽnnaam ne y sũur fãa
20, 21. a) Bõe n kɩt t’a Zoob tõog n kell n sak Wẽnnaam ne a sũur fãa? b) Bõe la d tõe n maan tɩ kɩt tɩ d maneg n nong Wẽnnaam?
20 Bũmb ning sẽn kɩt t’a Zoob tõog n kell n sak Wẽnnaam ne a sũur fãa wã yaa t’a ra nonga Wẽnnaam, t’a Zeova me ra nong-a la a sõngd-a. A Zoob yeela a Zeova woto: “Yãmb n kõ maam vɩɩm ne nonglem n gũ m yõore.” (Zoob 10:12) Sẽn paase, a Zoob ra nonga neba, n miẽ tɩ ned ning fãa sẽn pa nong a to, a pa zoet Sẽn-tõeyã-fãa wã ye. (Zoob 6:14) Ned sẽn sakd Wẽnnaam ne a sũur fãa nonga Wẽnnaam, la a nong a taabã me.—Mat. 22:37-40.
21 D sã n karemd Biiblã daar fãa, la d bʋgsd a sẽn wilgd tõnd Wẽnnaam sẽn yaa a soabã zugu, tõe n kɩtame tɩ d nong Wẽnnaam n paase. D tõe n pʋʋsa a Zeova ne d sũur fãa, n pẽg-a la d pʋʋs-a barka, a sẽn maand-d neerã yĩnga. (Fil. 4:6, 7) D tõe n yɩɩndame n pẽgd a Zeova la d maand tũud-n-taar ne a nin-buiidã wakat fãa. (Heb. 10:23-25) Sẽn paase, d sã n moond Wẽnnaam “fãagr koɛɛgã daar fãa,” d na n maneg n nonga Wẽnnaam. (Yɩɩl 96:1-3) D sã n maand woto, d na n tõog n saka Wẽnnaam ne d sũur fãa wa yɩɩl-gʋlsd ning sẽn yeel woto wã: “Mam sã n kolg Wẽnnaam n yaa sõma. Mam geta Zusoabã sẽn yaa Soaalã tɩ b yɩ m zĩ-lilldga.”—Yɩɩl 73:28.
22, 23. D sẽn be a Zeova naamã poorẽ wã, bõe la d maand rũndã-rũndã tɩ wõnd pĩnd wẽndẽ wẽn-sakdbã sẽn maane?
22 Hal pĩnd wẽndẽ n tãag masã, a Zeova kõta wẽn-sakdbã tʋʋm buud toor-toore. Wala makre, a kɩtame t’a Nowe ka koom koglgo, la a yɩ “tɩrlem koe-moonda.” (2 Pɩɛ. 2:5) A kɩtame t’a Zozue tall Israɛll nebã n tɩ kẽes Kãabg Tẽngã. La yaa a Zozue sẽn da karemd tõogã “wĩntoog ne yʋngã,” la a sakd tõogã sẽn yetã yĩng n kɩt t’a tõog n maan dẽ wã. (Zoz. 1:7, 8) A Zeova kõo pipi kiris-nebã noor tɩ b maan karen-biisi, la b tigimd taab wakat fãa n zãmsd Gʋlsg Sõamyã.—Mat. 28:19, 20.
23 D sã n moond tɩrlem koɛɛgã, n maand karen-biisi, n tũud Biiblã saglsã, n tigimd ne d tẽed-n-taasã tigissã la tigs-kãsemsã sasa, d wilgdame tɩ d bee a Zeova naamã poorẽ, la tɩ d sakd-a-la ne d sũur fãa. Bõn-kãensã maaneg sõngda tõnd tɩ d paamd raoodo, tɩ d tẽebã pãng paasdẽ, la tɩ d tõogd n maand Wẽnnaam daabã sõma. Wẽnnaam daabã maaneg la d burkĩndã tallg pa toog wʋsg ne-d ye. Bala d saasẽ Ba wã ne a Biigã sõngd-d lame. (Tõo. 30:11-14; 1 Rĩm 8:57) Sẽn paase, “ba-biisã” sẽn be dũniyã gill zugã sẽn sakd a Zeova ne b sũy fãa, la sẽn sak n deeg t’a yaa d Zusoab la d Soaalã me sõngd-d lame.—1 Pɩɛ. 2:17.
Wãn to la y na n leoke?
• D manesem segd n yɩɩ wãn ne noy nins a Zeova sẽn gãneg tɩ gɩdgd yoobã?
• Manesem nins a Zoob sẽn tallã sʋka, bʋg n yɩ yãmb noog n yɩɩda?
• Wa Zoob 31:29-37 wã sẽn wilgdã, manesem bʋs la a Zoob tall-yã?
• Bõe n kɩt tɩ d tõe n kell n sak Wẽnnaam ne d sũur fãa?
[Zãmsgã sogsgã]