Иузӕрдион уӕм!
Иузӕрдион уӕм!
«Ӕз та – ӕз цӕрдзынӕн рӕстӕй» (ПС. 26:11).
1, 2. а) Иов йӕ иузӕрдиондзинады тыххӕй цы загъта? ӕ) Иовы чиныджы 31 сӕрӕй Иовы тыххӕй цы ис базонӕн?
РАДЖЫ заманты куыд уыди, афтӕ абон дӕр адӕм пайда кӕнынц уӕзбарӕнтӕй. Уӕзбарӕныл иуырдыгӕй ӕрӕвӕрынц баринӕгтӕ, иннӕрдыгӕй та – гиритӕ. Хуыцауы лӕггадгӕнджытӕ рагзаманты пайда кодтой, чи нӕ сайдта, ахӕм уӕзбарӕнтӕй ӕмӕ гиритӕй (Ӕмб. 11:1).
2 Хӕйрӕг Хуыцауы иузӕрдион лӕггадгӕнӕг Иовы фыдӕвзарӕнты хай куы бакодта, уӕд Иов загъта: «Хуыцау [мӕ] раст барӕнтыл сбардзӕн ӕмӕ йӕ базондзӕн, иузӕрдион кӕй дӕн» (Иов 31:6). Уымӕ гӕсгӕ Иов ранымадта, нӕ иузӕрдиондзинадӕн тӕссаг цӕмӕй у, цалдӕр ахӕм хъуыддаджы. Ӕмӕ Иовы чиныджы 31 сӕры куыд фыст ис, афтӕмӕй Иов фӕлварӕнты нӕ фӕцудыдта. Йӕ диссаджы цӕвиттон мах дӕр разӕнгард кӕны, цӕмӕй йӕ фӕзмӕм ӕмӕ псаломзарӕггӕнӕг Давидау ныфсджынӕй дзурӕм: «Ӕз та – ӕз цӕрдзынӕн рӕстӕй» (Пс. 26:11).
3. Хуыцауыл иузӕрдион цӕмӕн хъуамӕ уӕм стыр хъуыддӕгты дӕр ӕмӕ гыццыл хъуыддӕгты дӕр?
3 Иовы сӕр бирӕ дудгӕбӕттӕ баййӕфта, фӕлӕ Хуыцауыл йӕ зӕрдӕ нӕ сивта. Иуӕй-иутӕ зӕгъдзысты, зӕгъгӕ, Иов цытӕ ныффӕрӕзта ӕмӕ цы хъӕбатырдзинад равдыста, уый у диссаг. Махӕн, кӕй зӕгъын ӕй хъӕуы, ахӕм фӕлварӕнтӕ никуы уыд. Фӕлӕ мах дӕр хъуамӕ архайӕм, цӕмӕй стыр хъуыддӕгты дӕр ӕмӕ гыццыл хъуыддӕгты дӕр Хуыцауыл иузӕрдион уӕм ӕмӕ йӕ хицаудзинады фарс фидар лӕууӕм. (Бакӕс Лукайы 16:10.)
Хӕрзӕгъдау уӕм
4, 5. Иов Хуыцауыл иузӕрдион кӕй уыд, уый тыххӕй йӕхи цӕмӕй хызта?
4 Цӕмӕй Йегъовӕйыл иузӕрдион уӕм, уый тыххӕй, Йегъовӕ хӕрзӕгъдаудзинады тыххӕй цы дзуры, уый Иовау хъуамӕ ӕххӕст кӕнӕм. Иов загъта: «Ӕз мӕ цӕстытимӕ скодтон бадзырд. Ӕмӕ ма уӕд чызджытӕм куыд хъуамӕ кастаин? [...] Кӕд искуы мӕ зӕрдӕ сылгоймагмӕ бахъазыд ӕмӕ ме ’мбалы хӕдзары бахизӕны раз ӕрӕмбӕхстӕн ӕмӕ ӕнхъӕлмӕ кастӕн, уӕд мӕ ус мӕнӕу ссӕд ӕндӕр нӕлгоймагӕн ӕмӕ ӕндӕр нӕлгоймӕгтимӕ баиу кӕнӕд йӕ уат» (Иов 31:1, 9, 10).
5 Иовы Хуыцауыл иузӕрдионӕй баззайын кӕй фӕндыд, уый тыххӕй сылгоймагмӕ ӕнӕгъдау каст никуы бакодта. Стӕй усджын кӕй уыд, уымӕ гӕсгӕ ӕнӕлӕг сылгоймагмӕ кӕнӕ кӕйдӕр усмӕ дӕр йӕ зӕрдӕ никуы ахсайдта. Йесо хохыл адӕмы куы ахуыр кодта, уӕд фидарӕй загъта, рӕстӕй цӕрын кӕй фӕнды, уый йӕхи ӕнӕгъдаудзинадӕй кӕй хъуамӕ хиза. (Бакӕс Матфейы 5:27, 28.)
Мӕнгард макуы суӕм
6, 7. а) Хуыцау Иовы цавӕр барӕнтӕй сбарста ӕмӕ мах дӕр цавӕр барӕнтӕй сбары? ӕ) Мӕнгард кӕнӕ хинӕйдзаг цӕуылнӕ хъуамӕ уӕм?
6 Цӕмӕй иузӕрдион адӕймӕгтыл нымад уӕм, уый тыххӕй хъуамӕ мӕнгард хъуыддӕгтӕ ма кӕнӕм. (Бакӕс Ӕмбисӕндтӕ 3:31–33.) Иов афтӕ загъта: «Кӕд мӕнгард адӕмимӕ лымӕн кодтон, кӕд мӕ къах искӕй асайынмӕ тагъд кӕны, уӕд мӕ Хуыцау раст барӕнтыл сбардзӕн ӕмӕ йӕ базондзӕн, иузӕрдион кӕй дӕн» (Иов 31:5, 6). Йегъовӕ алы адӕймаджы дӕр «раст барӕнтыл» сбары. Хуыцау Иовы йӕ рӕстаг уагӕвӕрдтӕм гӕсгӕ куыд «сбарста», афтӕ абон дӕр йӕ лӕггадгӕнджыты йӕ рӕстаг уагӕвӕрдтӕм гӕсгӕ «сбары», цӕмӕй сбӕрӕг кӕна, рӕстӕй цӕрынц ӕви нӕ.
7 Фӕлӕ мӕнгард ӕмӕ хинӕйдзаг куы уӕм, уӕд нӕ бон нӕ уыдзӕн Хуыцауыл иузӕрдионӕй баззайын. Иузӕрдион адӕймаг «ныууадзы, сусӕгӕй цы худинаджы хъуыддӕгтӕ фӕкӕнынц, уыдон, ӕмӕ хинӕй нӕ фӕархайы» (2 Кор. 4:1, 2). Фӕлӕ нӕ мӕнгард ныхӕстӕй кӕнӕ нӕ мӕнгард митӕй не ’мчырыстӕттӕй искӕй уыйонг куы скӕнӕм, ӕмӕ Хуыцауӕй ӕххуыс курын куы райдайа, уӕд та? Уый тынг ӕвзӕр хабар уаид! Псаломзарӕггӕнӕг загъта: «Йегъовӕмӕ сдзынӕзтон зын сахат, ӕмӕ мын дзуапп радта. О Йегъовӕ, мӕ уд мын фервӕзын кӕн мӕнг ӕвзагӕй, хин ӕвзагӕй» (Пс. 120:1, 2). Хорз уаид, куы никуы рох кӕниккам, мидӕгӕй цы стӕм, уый Хуыцау кӕй уыны ӕмӕ нын нӕ «зӕрдӕ ӕмӕ [нӕ] уыргтӕ» кӕй фӕлвары, цӕмӕй фена, рӕстӕй цӕрӕм ӕви нӕ, уый (Пс. 7:8, 9).
Иннӕтӕм цы зӕрдӕ дарыс, уымӕй фӕзминаг у
8. Иов иннӕтӕм цы зӕрдӕ дардта?
8 Цӕмӕй иузӕрдионӕй баззайӕм, уый тыххӕй Иовау хъуамӕ уӕм раст, сӕрныллӕг ӕмӕ иннӕтыл хъуыды кӕнӕм. Иов загъта: «Искуы афтӕ уыд, ӕмӕ мыл мӕ цагъар-нӕлгоймаг кӕнӕ мӕ цагъар-сылгоймаг хъаст кодта, фӕлӕ мӕн йӕ хъуыддаг равзарын нӕ бафӕндыд, уӕд мӕхӕдӕг та куыд кӕндзынӕн, Хуыцау мӕ ныхмӕ куы сыста, уӕд? Дзуапп мӕ куы ’рдома, уӕд ын цы зӕгъдзынӕн? Мӕн мӕ мады гуыбыны чи сфӕлдыста, уый дӕр Уый не сфӕлдыста? Нӕ дыууӕйы дӕр нӕ мадӕлты хуылфы Уый не скодта?» (Иов 31:13–15).
9. Иов йӕ цагъартӕн куыд уыд ӕмӕ махмӕ дӕр цавӕр миниуджытӕ хъуамӕ уа?
9 Иовы рӕстӕджы-иу, ӕвӕццӕгӕн, адӕмы хъуыддӕгтӕ равзарынӕн бирӕ цыдӕртӕ нӕ хъуыд. Хъуыддӕгтӕ-иу ӕвзӕрстой бӕлвырд фӕткмӕ гӕсгӕ ӕмӕ-иу суанг цагъартӕн дӕр уыд сӕ бон сӕ хъаст тӕрхоны лӕгтӕм бахӕссын. Иов йӕ цагъартыл сайдӕй нӕ цыд ӕмӕ сӕм хорз зӕрдӕ дардта. Кӕд нӕ фӕнды, цӕмӕй иузӕрдион уӕм, уӕд махмӕ дӕр хъуамӕ уа ахӕм миниуджытӕ, уӕлдайдӕр та хистӕр нӕлгоймӕгтӕм.
Зыдгӕнаг ма уӕм, фӕлӕ рӕдау
10, 11. а) Иов рӕдау ӕмӕ цӕстуарзон кӕй уыд, уый кӕцӕй зонӕм? ӕ) Иов 31:16–25 цы фыст ис, уый нын Библийӕ нӕ зӕрдыл цавӕр уынаффӕ лӕууын кӕны?
10 Иов уыд рӕдау ӕмӕ цӕстуарзон адӕймаг. Йӕхи удыл нӕ мӕт кодта, стӕй зыдгӕнаг дӕр нӕ уыд. Иов афтӕ загъта: «Кӕд... идӕдзы цӕстытӕ мӕн аххосӕй ӕрӕнкъард сты, кӕд мӕ къӕбӕр иунӕгӕй хордтон, сидзӕрӕн та-иу дзы нӕ радтон, [...] кӕд-иу федтон, ӕмӕ кӕмӕндӕр, йӕ уӕлӕ цы скӕна, уый нӕй, [...] кӕд сидзӕрмӕ мӕ къух ӕртхъирӕнгӕнӕджы тылд кодтон, афтӕмӕй та йӕ хъуыди ме ’ххуыс кулдуары раз, уӕд ме уӕн ме уӕхскӕй рахауӕд ӕмӕ мӕ цонг ме уӕхсчы стӕгӕй фӕхицӕн уӕд». Иов иузӕрдионӕй ницы хуызы баззадаид, йӕ зӕрдӕ сызгъӕриныл куы дардтаид, уӕд. Уый сызгъӕринӕн афтӕ никуы загъта: «Дӕуӕй ныфсджын дӕн!» (Иов 31:16–25).
11 Ацы ныхӕстӕ нын нӕ зӕрдыл лӕууын кӕнынц, ахуыргӕнинаг Иаков цы загъта, уый: «Нӕ Хуыцау ӕмӕ нӕ Фыды цӕсты сыгъдӕг, ӕнӕфау дин у ахӕм: сидзӕртӕ ӕмӕ идӕдзтӕн сӕ тыхсты рӕстӕг сӕ фарсмӕ балӕуу ӕмӕ ацы дунейӕ дӕхи фӕчъизи кӕнын ма бауадз» (Иак. 1:27). Стӕй ма, ӕвӕццӕгӕн, ӕрхъуыды кодтам Йесойы фӕдзӕхст дӕр: «Кӕсут, зыд мацӕуыл кӕнут, уымӕн ӕмӕ адӕймагмӕ алцыдӕр парахатӕй куы уа, уӕд дӕр йӕ цард, цы йӕм ис, уымӕй кӕнгӕ нӕу». Уый фӕстӕ Йесо радзырдта фӕсномыг ныхас зыдгӕнаг хъӕздыг лӕджы тыххӕй. Фӕлӕ уыцы лӕг фӕстӕдӕр амард, ӕмӕ нымад уыд, «Хуыцауы цӕсты хъӕздыг [чи] нӕ уыд», ахӕм адӕймагыл (Лук. 12:15–21). Цӕмӕй иузӕрдион уӕм, уый тыххӕй хъуамӕ зыд ӕмӕ кӕрӕф ма уӕм. Зыд кӕнын у мӕнгхуыцӕуттӕн кувын, уымӕн ӕмӕ кӕрӕф адӕймагӕн йӕ хъуыдытӕ иууылдӕр вӕййынц Йегъовӕйыл нӕ, фӕлӕ йӕ «хуыцауыл» (Кол. 3:5). Иузӕрдиондзинадӕн ӕмӕ зыд кӕнынӕн иумӕйагӕй хъуамӕ мацы уа!
Раст диныл фидар хӕц
12, 13. Мӕнгхуыцӕуттӕн кувынӕй нӕхи куыд хизӕм, уымӕй нын Иов куыд у фӕзминаг?
12 Иузӕрдион адӕймаг раст дин никуы ныууадздзӕн. Иов дӕр ахӕм зондыл хӕст уыд. Уый загъта: «Рухс куыд ӕрттивы, уымӕ-иу куы кастӕн, кӕнӕ, диссаджы рӕсугъд мӕй куыд ленк кӕны, уымӕ, уӕд-иу мын кӕд мӕ зӕрдӕ сӕхимӕ аскъӕфтой ӕмӕ-иу сын мӕ армытъӕпӕнӕй пъатӕ ӕрвыстон, уӕд уый дӕр уыдаид тӕрхонгӕнджытӕн ӕвзаринаг фыдракӕнд, уымӕн ӕмӕ уӕд ӕз мӕ къух систаин, уӕлейӕ чи ис, уыцы ӕцӕг Хуыцауыл» (Иов 31:26–28).
13 Иов удӕгас Хуыцауӕн йеддӕмӕ ӕндӕр никӕмӕн ӕмӕ ницӕмӕн куывта. Йӕ зӕрдӕйы мидӕг ӕй, арвыл цыдӕриддӕр ис, уыдонӕн кувын куы фӕндыдаид, зӕгъӕм, мӕйӕн, ӕмӕ йын йӕ армытъӕпӕнӕй пъатӕ куы ӕрвыстаид, ома йын куы куывтаид, уӕд дзы мӕнгхуыцауӕн кувӕг рауадаид, ӕмӕ Хуыцауы ферох кодтаид (Дык. з. 4:15, 19). Уӕдӕ цӕмӕй Хуыцауыл иузӕрдионӕй баззайӕм, уый тыххӕй, мӕнгхуыцӕуттӕн кувынмӕ цыдӕриддӕр хауы, уымӕй нӕхи хизӕм. (Бакӕс 1 Иоанны 5:21.)
Маст ма хӕссӕм ӕмӕ цӕстмӕ митӕ ма кӕнӕм
14. Иов фыдзӕрдӕ кӕй нӕ уыд, уый нӕ бон цӕмӕн у зӕгъын?
14 Иов нӕдӕр фыдзӕрдӕ адӕймаг уыд, нӕдӕр ӕгъатыр. Иов зыдта, ахӕм миниуджытӕ иузӕрдион адӕймагыл кӕй нӕ фидауынц ӕмӕ афтӕ дӕр уымӕн загъта: «Кӕд, йе сӕфт мӕ чи уыдта, уый сӕфтыл цин кодтон кӕнӕ йыл фыдбылыз кӕй ӕрцыд, ууыл цинӕй мардтӕн – фӕлӕ ӕз ме ’взагӕн уый бар нӕ лӕвӕрдтон, цӕмӕй тӕригъӕд ракодтаид, никуы йӕ ралгъыстон» (Иов 31:29, 30).
15. Йе сӕфт нӕ чи уыны, уыдоныл исты бӕллӕх куы ’рцӕуы, уӕд цӕуылнӕ хъуамӕ цин кӕнӕм?
15 Рӕстгӕнӕг Иов никуы цин кодта, йе сӕфт дзы чи уыдта, уыдоныл-иу исты бӕллӕх куы ’рцыд, ууыл. Ӕмбисӕндты 24:17, 18 ис ахӕм фӕдзӕхст: «Де знаг куы ахауа, уӕд цин ма кӕн, ӕмӕ куы фӕкӕла, уӕд дӕ зӕрдӕ фырцинӕй ма райӕд, науӕд дӕ Йегъовӕ фендзӕн ӕмӕ йӕм уый тынг ӕвзӕр фӕкӕсдзӕн, ӕмӕ йыл йӕ маст нал ныккалдзӕн». Йегъовӕ нын нӕ зӕрдӕ кӕй уыны, уымӕ гӕсгӕ йӕ базоны, искӕй зын нын ӕхсызгон куы вӕййы, уӕд. Кӕй зӕгъын ӕй хъӕуы, ахӕм хъуыддаг Йегъовӕйы зӕрдӕмӕ нӕ цӕуы (Ӕмб. 17:5). Махӕй йе сӕфт чи уыны, уыдонӕн цы кӕнгӕ у, уый Хуыцау хуыздӕр зоны ӕмӕ афтӕ зӕгъы: «Мастисӕг ӕз дӕн, цы сын ӕмбӕлы, уый сын ӕз бакӕндзынӕн» (Дык. з. 32:35).
16. Куыд у нӕ бон уазӕгуарзондзинад ӕвдисын, кӕд хъӕздыг не стӕм, уӕддӕр?
16 Иов уыд уазӕгуарзон адӕймаг (Иов 31:31, 32). Махӕн дӕр нӕ бон у, цӕмӕй «алкӕддӕр уӕм уазӕгуарзон», кӕд хъӕздыг не стӕм, уӕддӕр (Ром. 12:13). Нӕ бон у, цы нӕм ис, уый фынгыл ӕрӕвӕрын, уымӕн ӕмӕ нӕ зӕрдыл дарӕм Библийы фӕдзӕхст: «Цӕйнӕфӕлтау уӕм нард гал уа, ӕмӕ кӕрӕдзийӕ уе сӕфт уынат, фӕлтау уӕм уӕд халсартӕй хӕринаг, ӕмӕ кӕрӕдзи уарзут» (Ӕмб. 15:17). Не ’мчырыстӕттимӕ адджын бадт куы кӕнӕм, уӕд нын хуымӕтӕг хӕринаг дӕр циндзинад ӕрхӕсдзӕн ӕмӕ кӕрӕдзийы уырнындзинад бафидар кӕндзыстӕм.
17. Кӕд исты уӕззау тӕригъӕд сарӕзтам, уӕд ӕй цӕуылнӕ хъуамӕ ӕмбӕхсӕм?
17 Иов цӕстмӕ митӕ кӕй нӕ кодта, уымӕ гӕсгӕ-иу, ӕвӕццӕгӕн, йӕ уазджытӕ йӕ хӕдзарӕй зӕрдӕрайгӕйӕ рацыдысты. Уый нӕ уыд, фыццаг ӕнусы чырыстон ӕмбырдмӕ чи бахъуызыд ӕмӕ «йӕхицӕй [чи] ӕппӕлыд ӕмӕ исты райсын ӕнхъӕлӕй цӕстмӕ митӕ [чи] кодта», уыцы ӕнӕхуыцау адӕмы хуызӕн (Иудӕ 3, 4, 16). Стӕй ма Иов йӕ рӕдыдтытӕ нӕ сусӕг кодта, кӕнӕ йӕ «тӕригъӕдтӕ [йӕ] роны» не ’мбӕхста, иннӕты цӕсты куы фегад уа, уый тыххӕй. Иов Хуыцауӕй ницы сусӕг кодта, ӕмӕ йӕ фӕндыд, цӕмӕй йын йӕ зӕрдӕмӕ ныккастаид (Иов 31:33–37). Кӕд исты уӕззау тӕригъӕд сарӕзтам, уӕд раст уаид, куы нӕ йӕ ӕмбӕхсиккам, мӕ ном ма фӕчъизи уа, зӕгъгӕ. Иузӕрдионӕй баззайын нӕ кӕй фӕнды, ууыл кӕй архайӕм, уый нӕ бон куыд у равдисын? Нӕ тӕригъӕдыл куы басӕттӕм, куы йыл ӕрфӕсмон кӕнӕм, хистӕр нӕлгоймӕгтӕй ӕххуыс куы ракурӕм ӕмӕ куы архайӕм, цӕмӕй фӕстӕмӕ нӕ къахыл слӕууӕм (Ӕмб. 28:13; Иак. 5:13–15).
Фӕлварӕны куы бахауӕм
18, 19. а) Цӕмӕн ис афтӕ зӕгъӕн, ӕмӕ Иов фыргуыст никӕмӕн кӕнын кодта? ӕ) Иов куы рӕдыдаид, уӕд цӕуыл уыд разы?
18 Иов уыд ӕнӕзӕрдӕхудт ӕмӕ раст адӕймаг. Уымӕ гӕсгӕ уыд йӕ бон афтӕ зӕгъын: «Кӕд мыл мӕ зӕхх хъаст кодта ӕмӕ ӕххуысмӕ дзынӕзта, кӕд йӕ хӕххытӕ иууылдӕр ӕрдиаг кодтой, кӕд ын йӕ тыллӕг лӕвар хордтон ӕмӕ-иу ын йӕ хицӕуттӕн смаст кодтон, уӕд мын мӕнӕуы бӕсты сзайӕд сындзытӕ, хъӕбӕрхоры бӕсты – смаггӕнаг хӕмпӕлгӕрдӕг» (Иов 31:38–40). Иов никуы никӕй зӕххытӕ байста, ӕмӕ-иу фыргуыст никӕмӕн кӕнын кодта. Мах дӕр хъуамӕ Иовау Йегъовӕйыл иузӕрдион уӕм стыр хъуыддӕгты дӕр ӕмӕ гыццыл хъуыддӕгты дӕр.
19 Иов йӕ царды хабӕрттӕ радзырдта йе ’ртӕ ӕмбалӕн ӕмӕ ӕрыгон нӕлгоймаг Елиуйӕн. Иов ахӕм хӕрзгъдау цард кодта ӕмӕ йӕхи къӕмдзӕстыг ӕппындӕр никӕй раз хатыди, йӕ царды «къухфыст» уыди раст, ӕнӕрӕдыд. Фӕлӕ кӕд Иовмӕ исты хъуыддаджы фау ӕрхӕссӕн уыди, уӕд разы уыд ӕфхӕрд баййафын дӕр. Цӕттӕ уыд, ӕнхъӕлмӕ кӕсын, цалынмӕ йын Хуыцау тӕрхон рахастаид, уӕдмӕ. Ууыл «Иовы ныхӕстӕ фесты» (Иов 31:35, 40).
Дӕ бон у иузӕрдионӕй баззайын
20, 21. а) Иов иузӕрдион цӕй фӕрцы уыди? ӕ) Цӕмӕй Хуыцауы тынгдӕр уарзӕм, уый тыххӕй нӕ бон цы у аразын?
20 Иовӕн йӕ бон уыд иузӕрдионӕй баззайын, уымӕн ӕмӕ Хуыцауы уарзта, ӕмӕ йӕ уый дӕр уарзта ӕмӕ йын ӕххуыс кодта. Иов Йегъовӕйӕн афтӕ загъта: «Цард мын радтай, ӕнувыд уарзтӕй мӕ бауарзтай, тыхстӕ мыл ӕмӕ мын мӕ уд хъахъхъӕдтай» (Иов 10:12). Уымӕй уӕлдай ма Иов адӕмы дӕр уарзта, ӕмӕ ӕмбӕрста, иннӕты ӕнувыд уарзтӕй чи нӕ уарзы, уый Ӕппӕтхъомысджын Хуыцауӕй кӕй нӕ тӕрсы (Иов 6:14). Иузӕрдион адӕймаг уарзы Хуыцауы дӕр ӕмӕ адӕмы дӕр (Матф. 22:37–40).
21 Хуыцауы ныхас алы бон дӕр куы кӕсӕм ӕмӕ, Хуыцауы тыххӕй цы базонӕм, ууыл куы хъуыды кӕнӕм, уӕд ӕй тынгдӕр уарздзыстӕм. Йегъовӕмӕ зӕрдӕбынӕй куы фӕкувӕм, уӕд ӕй нӕ бон у кадджын кӕнын ӕмӕ йын йӕ хорздзинӕдты тыххӕй бузныг дзурын (Фил. 4:6, 7). Стӕй ма нӕ бон у Йегъовӕйӕн кады зарджытӕ зарын ӕмӕ йын йӕ адӕмимӕ ӕдзух ӕмбӕлын (Дзут. 10:23–25). Уымӕй уӕлдай ма, уацамынды куы цӕуӕм ӕмӕ «хорз хабар цы ирвӕзындзинад дӕтты, уый тыххӕй» куы дзурӕм, уӕд нӕ уарзондзинад фидарӕй-фидардӕр кӕндзӕн (Пс. 96:1–3). Афтӕмӕй псаломзарӕггӕнӕгау иузӕрдионӕй баззайдзыстӕм. Уый ныффыста: «Ӕз мӕхи бакодтон Дунедарӕг Хуыцау Йегъовӕйы уазӕг, цӕмӕй йын йе ’ппӕт хъуыддӕгты тыххӕй хъусын кӕнон» (Пс. 73:28).
22, 23. Йегъовӕйы хицаудзинады фарс кӕй стӕм, уымӕ гӕсгӕ нӕ Хуыцауы рагон иузӕрдион лӕггадгӕнджытимӕ цӕмӕн ис абарӕн?
22 Ӕнусты дӕргъы Йегъовӕ йӕ иузӕрдион лӕггадгӕнджытӕн лӕвӕрдта бирӕ алыхуызон хӕслӕвӕрдтӕ. Ной сарӕзта нау ӕмӕ уыд «рӕстдзинад хъусынгӕнӕг» (2 Пет. 2:5). Йесо Навин израилӕгты Зӕрдӕвӕрд зӕхмӕ бакодта. Уый йӕ къухы сӕйраджыдӕр бафтыд, «закъоны чиныг... ӕхсӕвӕй-бонӕй» кӕй каст ӕмӕ дзы цы фыст уыд, уымӕ гӕсгӕ кӕй архайдта, уый руаджы (Йес. Н. 1:7, 8). Фыццаг ӕнусы чырыстӕттӕ дӕр ахуыргӕнинӕгтӕ цӕттӕ кодтой ӕмӕ ӕдзух ӕмбырд кодтой, цӕмӕй Фыстад ахуыр кодтаиккой (Матф. 28:19, 20).
23 Мах стӕм Йегъовӕйы хицаудзинады фарс ӕмӕ иузӕрдион стӕм, рӕстдзинады тыххӕй кӕй хъусын кӕнӕм, ахуыргӕнинӕгтӕ кӕй цӕттӕ кӕнӕм, Библийы уынаффӕтӕм гӕсгӕ кӕй архайӕм ӕмӕ не ’мчырыстӕттимӕ ӕмбырдтӕм ӕмӕ конгресстӕм кӕй цӕуӕм, уымӕ гӕсгӕ. Уыцы хъуыддӕгтӕ нын ӕххуыс кӕнынц, цӕмӕй ныфсджындӕр уӕм, нӕ уырнындзинад фидардӕр кӕна, ӕмӕ ӕнтыстджын уӕм Хуыцауы фӕндон ӕххӕстгӕнгӕйӕ. Махӕн Хуыцауы фӕндон ӕххӕст кӕнын ӕмӕ рӕстӕй цӕрын зын нӕу, уымӕн ӕмӕ нын нӕ уӕларвон Фыд ӕмӕ йӕ Фырт ӕххуыс кӕнынц (Дык. з. 30:11–14; 1 Пад. 8:57). Стыр ӕххуыс ма нын сты не ’мчырыстӕттӕ дӕр. Уыдон дӕр иузӕрдионӕй лӕггад кӕнынц ӕмӕ Йегъовӕйӕн кад кӕнынц, Дунедарӕг Стыр Хуыцау кӕй у, уый тыххӕй (1 Пет. 2:17).
Цавӕр дзуапп ратдзынӕ?
• Йегъовӕ хӕрзӕгъдаудзинады тыххӕй цы дзуры, уымӕ цы цӕстӕй хъуамӕ кӕсӕм?
• Иовы миниуджытӕй дӕ зӕрдӕмӕ тынгдӕр кӕцытӕ фӕцыдысты?
• Иов куыд цард, уый Иов 31:29–37 стихтӕй куыд зыны?
• Нӕ бон цӕй фӕрцы у Хуыцауыл иузӕрдионӕй баззайын?
[Фарстатӕ ахуыр кӕнынӕн]
[Ныв 29 фарсыл]
Иов Йегъовӕйыл иузӕрдионӕй баззад. Махӕн дӕр у нӕ бон!
[Ныв 32 фарсыл]
Нӕ бон у рӕстӕй цӕрын!
