Kede Mo Merael el Oba Blakerreng!

“Ngak a bai diak a mekngit er a klengar er ngak.”​—PSALM 26:11.

1, 2. Ngerang dilung a Job el kirel a blakerreng er ngii, e ngera el tekoi a mocholt el kirel el ngar a Job er a 31 el bliongel?

 SERA ngar a mong el taem e a olebedabel el luluusbech a rruul el ousbech er a kemanget el baeb el klebikl er a belngel a deel el olecholt a berraod e ngar aike el ulebengelel tia el baeb, e ng klebikl er ngii a teblo el olekolel. Kede ngmai aike el soad el melebodeb el klalo el smuk er a ta er aike olekang e ngmai aike el medual a olebedabel el lochang er sel chimong er a olekolel tia el olebedabel. Me a rechedal a Dios a mle kirir el ousbech a ungil e melemalt el olebedabel el melebodeb a klalo.​—Osisechakl 11:1.

² Ngike el mle blak a rengul e melemalt el chad el Job er a lemodechelakl er a Satan e ngdilu el kmo: “Bechere Dios me le debedebak er a diak longeblad el olebedabel, me bo lesa el kmo ng meral diak a telemellek.” (Job 31:6) Ngar tia el blekeradel, e a Job a milsaod a betok el omeruul el sebechel el mo uchul a omelsemai er a blakerreng er a chad. Engdi a Job a mle sebechel el mo mesisiich er a rokui el omelsemai el mlo er ngii e sebeched el mes aikang el ngar a tekingel el medung er a 31 el bliongel er a Job. A ungil el kerebil a sebechel el ngosukid el mo meruul a osisiu el tekoi e mo sebeched el melekoi el ua David er a ledu el kmo: “Ngak a bai diak a mekngit er a klengar er ngak.”​—Psalm 26:11.

3. Ngera uchul me ngklou a ultutelel el doba blakerreng el mo er a Dios er a meklou me a mekekerei el tekoi?

 ³ Alta e a Job a kmal mlo meringel el modechelakl, engdi ngmillemolem el blak a rengul el mo er a Dios. A rebebil a melekoi el kmo a Job a kmal ungil el kerebai el mle urrekodel er a blakerreng er ngii er a chelsel a meringel el blekeradel. Kid a diak de chelebangel a ongarm el ua ike el blo lecharm a Job. Me nguaisei, engdi ngkmal kired el melemolem el merael el oba blakerreng el bedul a Dios er a mekekerei me a meklou el tekoi, el melisiich er a deruchelled el kirel a omengederederel a Dios.​—Monguiu er a Lukas 16:10.

A Blakerreng a Klou a Ultutelel

4, 5. Ngera el omeruul a ble lekerekikl er ngii a blak a rengul el Job?

⁴ A lsekum e ngsoad el lomelemii a blakerreng er kid el mo er a Jehovah, e ngkmal kired el mo oltirakl aike el tekoi er a kldung el lomeskid, el di ua omerellel a Job, el dilu el kmo: “Ak mla rullii a mesisiich el telbilek el kmal diak bo kngibes a kumes er a tar a ekebil. A lsekum ak mla mo nguibes er a bechil a ngar bita er ngak, ma kumart er ngak e mengiil el ngar a ikrel a chesmerel, a le ua isei e a bechik bo loruul a kelel a ngodech el chad, e bo le bad el obengkel a ta er a chad.”​—Job 31:1, 9, 10.

⁵ Me a blakerreng er a Job el mo er a Dios a rirellii me ngmle kerekikl el diak bo lengibes a rengul er a ta er a redil. Ngii el mle bechiil a uchul me ngdimlak el longesang a osengel me a uldesuel er a ta er a redil me a lechub e le ngibes er a bechil a ta er a chad. Ngar sel Cheldechedechal el ngar er a Rois, e a Jesus a dillii a mesisiich el omellach el kirel a tekoi er a durs, el tekoi el kirir a reblak a rengrir el chad el melatk er ngii.​—Monguiu er a Matteus 5:27, 28.

Lako Mekesuseu er a Mekngit el Omeruul

6, 7. (a) A Dios ngousbech a ngerang el melebodeb er a blakerreng er kid, el di ua lurruul el mo er a Job? (b) Ngera me ngkmal diak el kired el mekesuseu el mo meruul a mekngit?

⁶ A lsekum e ngsoad el melemolem el blak a rengud e ngkmal kired el kerekikl me ngdiak de mekesuseu el mo meruul a mekngit. (Monguiu er a Osisechakl 3:31-33.) A Job a dilu el kmo: “Mak melisiich a tekoi el kmo ng kmal dirkak a mekngit el omerellek, e dirkak kulasem el mengeblad er a re bebil er a re chad. Bechere Dios me le debedebak er a diak longeblad el olebedabel, me bo lesa el kmo ng meral diak a telemellek.” (Job 31:5, 6) A Jehovah a melebodeb er a klechad el ousbech er a “diak longeblad el olebedabel.” El di ua blekeradel el dilubech el mo e a Job, me a Jehovah a ousbech er a cherrungel el llemeltel el mo melebodeb er a blakerreng er a remesiungel.

⁷ A lsekum e kede mekesuseu el mo meruul a mekngit e ngmo diak el sebeched el lomelemii a blakerreng er kid el mo er a Dios. Tirke el blak a rengrir el mo er a Jehovah a mla chemoit ‘aikel berrotel el de merur er ngii el tekoi e diak lorael er a cheleblad.’ (2 Korinth 4:1, 2) Engdi ngkuk mekerang a lsekum e ngmle mekngit a tekinged me a omerelled el mlo uchul me kede rullii a kldemed er a klaumerang el mo olengit a ngeso er a Dios? Ngkmal di mo uchul a chelebuled e merekong! A ta el milluches er a Psalm a dilu el kmo: “Ser a kngar a chelebulek, e ak lilangel el mor a [Jehovah] me ng ngilsukak. Mosebelak e [Jehovah,] er a re bulak ma re cheblad.” (Psalm 120:1, 2) Ngkmal mengelaod a rengud sel dodengei el kmo a Jehovah a sebechel el omes aike el ngar a chelsel a rengud me ngsebechel el “merriter a uldasu ma reng” me ngmo medengei el kmo ngblak a rengud el mo er ngii.​—Psalm 7:8, 9.

Moruul a Ungil el Mo er a Rebebil

8. Ngmle ua ngerang a omerellel a Job el bedul a rebebil?

⁸ A lsekum e ngsoad el mo oba blakerreng, e ngkired el mo ua Job el mle melemalt e ngariou a rengul, e dirrek el mle blechoel el melatk er a rebebil. Ngdilu el kmo: “A tar a re mesiungek sel lolekoi a chetil er ngak, e ak mo orrenges er ngii e kmal  meruul a melemalt el mor ngii. Chomko ng dimlak kua isei, e ak mekera e ongengii a Dios? Ngera sebechek el mo dmung er a Dios sel be loukerrekeriil er ngak? Ngikel Dios el milebak a dirrek el ulemeob er a re mesiungek.”​—Job 31:13-15.

9. Ngera el ungil el omeruul a lurruul a Job el mo er a remesiungel, e kede mekerang e mo sebeched el meruul a osisiu el omeruul el mo er a rebebil?

⁹ Me ngkmal bleketakl el kmo sel taem er a Job e ngdimlak a ileakl el rolel a loukerrekeriil a tekoi. A rokui el kerrekeriil a mileketmokl el okiu a melemalt el rolel, e dirrek a resibai me ngmla er ngii a llemeltir el mo meruul a ultuteklir er a blil a kerrekeriil. Me a Job a kmal mle ungil e melemalt a omerellel el mo er a remesiungel. Me a lsekum e ngsoad el mo oba blakerreng, e ngkmal kired el mo oltaut aika el ungil el omeruul er a chelsel a klengar er kid, el ileakl a lsekum e kede mesiou el ta er a remechuodel el Kristiano er a chelsel a ongdibel.

Bo Bekururau e Lak el Ngibes a Rengum

10, 11. (a) Kede mekerang e medengei el kmo a Job a mle bekururau e mle blechoel el olengeseu? (b) A bades er a Job 31:16-25 ngomeklatk er kid er a ngera el uleklatk er a Biblia?

¹⁰ A Job a kmal mle bekururau e soal lolengeseu e dimlak el mekreos me a lechub e le ngibes er a kloklel a chad. Ngdilu el kmo: “Ng dirkak a tal kukor el olengeseu er a re mechebuul, e uleldoseb a rengrir a re melakl dil er a meringel delengcheklir, ma lechub e sel kumengur e ng diak kbechititerir a re diak a re demerir ma re derrir me lolsengerenger. Sel kbetik er a chad el kmal chebuul el ousbech a ngesou, el diak lochar a bilel, me a lsekum ak mla chobeldir a ngalek el diak a demal ma delal, ele kmle medengei el kmo ng sebechek el mo mesisiich er a kerrekeriil e bo le mecham a chimak; bo le mesauch el mengubet er ongelngelek.” Me a Job a dimlak el sebechel el melemolem er a blakerreng er ngii a lsekum e ngmillekoi el kirel a kolt el kmo: “Ak kulsirs er a ildisel a ududek!”​—Job 31:16-25.

¹¹ Chouaika el ungil el cheldecheduch a kora mekltkid er a tekingel a disaiplo el Jakobus el kmo: “Chomeluu ra Dios el klikiid e diak a idek er ngii er medal a Dios el Chedam a di tiakid el kmo: choldingel rar ngalek el metacherbesrir, el diak a demerir ma derrir, mar mellakl dil, e diak le mechesechusem ra idek ra belulechad el mekedeldar el klikiid.” (Jakobus 1:27) Ngdirrek el sebeched el mo melatk a uleklatk er a Jesus er a ledu el kmo: “Bo mungil kokerengemiu ra rokuil nglemokel; e a klengar ra chad a diak loeak a ildisel a kloklel lolab.” E a uriul er a ledelii tia el tekoi a Jesus, e ngmilsaod er a okesiu el kirel a ta el merechorech a rengul el merau el chad el mlad el dimlak “bo le merau el bedul a Dios.” (Lukas 12:15-21) Me a lsekum e ngsoad el melemolem el blak a rengud, e ngkmal kired el kerekikl me ngdiak bo le ngibes a rengud er a kloklel a ta er a chad me a lechub e bo le merechorech a rengud. A ngibeserreng a ta er a rolel a omengull el bleob e le rengul a chad el mo oureng el soal a kloklel a ta er a chad, a mengesuseu er a uldesuel el mo mengull er a bleob el mo uchul e ngmo cheroid er a Jehovah. (Kolose 3:5) A blakerreng me a ngibeserreng a diak el sebechel el dmak el tekoi!

Molemolem el Urrekodel er a Mera el Omengull

12, 13. Ngera el kerebai a lulechotii a Job el kirel a dongeroid er kid er a omengull el bleob?

¹² A rechad el blak a rengrir el mo er a Dios a melemolem el urrekodel er a mera el omengull. A Job a mle blak a rengul el chad el mo er a Dios, e dilu el kmo: “Ngkmal dirkak kungull er a medidiich el sils, ma lechub a buil ma bek el klebekelel. Ng kmal dirkak a tal kmechetakl el mo meruul choua isel tekoi. A choua isel klengit obals er a kodall; ele ng oumededenger er a Dios el Olab a Bek el Klisiich.”​—Job 31:26-28.

¹³ A blak a rengul el Job a dimlak a ta el lekengei el mo mengull a ngii di el bleob me a lechub e ngokesiul a bleob. Oleko ngdimlak el kerekikl me ngmilekesuseu el mo mengull aike el klekedall er a eanged, el ua buil me a klebekelel me a lechub e ngmilechetakl el mo meruul a ngii di el rolel a omengull el bleob, isei e ngmocha chad el mengull a bleob e mengemikr er a Dios. (Duteronomi 4:15, 19) Me a lsekum e ngsoad el melemolem el oba blakerreng el mo er a Dios, e ngkmal kired el mengeroid er kid er a ngii di el blekerdelel a omengull el bleob.​—Monguiu er a 1 Johanes 5:21.

Lak Bo Momtok Me a Lechub e Momulak

14. Ngera uchul me ngsebeched el melekoi el kmo a Job a mle ungil a omerellel el mo er a rechad?

¹⁴ A Job a kmal dimlak el mekngit a blekerdelel me a lechub e lurruul a mekngit el mo er a rechad. Ngmle medengei el kmo a chouaika el mekngit el omeruul a dial lolechotel a blakerreng er ngii, e le ngdilu el kmo:  “Ng dirkak kulsiich er a renguk sel bo lecharm a re cherrouek, ma lechub el deu a renguk sel losiuekl a chelebuul; ng dirkak kbor a klengit el meluluuch el olengit a kodellir.”​—Job 31:29, 30.

15. Ngera uchul me ngmekngit a doldeu a rengud er a chelebulel a chad el ouketui er kid?

¹⁵ A melemalt el chad el Job a dimlak a ta el loldeu a rengul er a chelebulel a chad el ouketui er ngii. A bades a omeklatk er kid el kmo: “Lak molsiich er a rengum a losiueklii a kerior a re cherrouem. A [Jehovah] a mo medengei a lsekum ke ua isei, e diak bo le soal. A lta e ng mo diak le belsii.” (Osisechakl 24:17, 18) Me a Jehovah a kmal sebechel el menguiu a rengud, me ngmedengei el kmo ngua ngerang a uldesued el kirel a chelebulel a chad, e dirrek el kmal diak el kengei a chouaika el mekngit el omeruul. (Osisechakl 17:5) Ngkmal ngerechelel a Dios el mesaod er tirke el ouketui er kid, e le ngmelekoi el kmo: “A [Jehovah] a mo melaitechei e omals er tir.”​—Duteronomi 32:35.

16. Alta e ngdiak demerau engdi kede mekerang e mo sebeched el omtechakl er a remerael?

¹⁶ A Job a mle blechoel el omtechakl er a remerael. (Job 31:31, 32) Me alta e ngdiak el betok a ududed, e ngdi ngsebeched el meruul er a osisiu el tekoi el “lometechakl rar merael.” (Rom 12:13) Ngsebeched el kuk di meruul a sesei el kall e mengemedaol er a rebebil el me omengur el obengked, e lak dobes er tia el kmo, “Ng bai ungil cho mongang a iasai el obengterir a re chad el mkaubltikerreng, er a cho mongang er a kot el ungil tech e le ngar ngii a kltui.” (Osisechakl 15:17) Me a domengur el obengterir a rekldemed er a klaumerang el ngar a ungil a eltel el blekeradel el mui er a bltikerreng a sebechel el mo uchul a omelisiich er a delongeled.

17. Ngera uchul me ngdiak el kired el melasem el omart a kngtid?

¹⁷ Sel blekerdelel a Job el kmal mle melemalt el chad a ulterekokl el kmal mle uchul omelisiich sel lomtechakl er a remerael. Ngdimlak el uai tirke el chad er a kot el dart el rak el di “oltubokl er tir rar chad el kirel a di klungiolir.” (Judas 3, 4, 16) Ngdirrek el kmal dimlak lolasem el omart a cheleuid el omerellel el dektel er a rechad a uchul me a lechub e ‘lulemart a kngtil.’ Ngbai kmal kilengei el mecherei a Dios me ngmerriter er ngii el oeak sel louchais er ngii aike el bek el tekoi el lolatk. (Job 31:33-37) Me a lsekum kede ruebet er a klou el klengit e ngbai ungil a douchais a kngtid e lak domart e le ngchetid a lemetemall a chised. Me kede mekerang e ochotii el kmo kede melasem er a tkurrebab el klisiched el melemolem el blak a rengud el mo er a Dios? Ngoeak sel dekengei el sumechokl a chelitechetud e dobult er a mekngit el deriruul, e dosiik a ngeso er a remechuodel, e doruul aike el rokui el sebeched el mo omeklemalt a omerelled.​—Osisechakl 28:13; Jakobus 5:13-15.

A Blak a Rengul el Chad a Kongei el Mo Meteriter

18, 19. (a) Ngera uchul me ngsebeched el melekoi el kmo a Job a dimlak a ta el longeblad er a ngii di el chad? (b) Ngkilengei el mo mekerang a Job a lsekum e ngmelteriter el mirruul a mekngit el mo er a rechad?

¹⁸ A Job a mle melemalt e tabesul a omerellel el chad. Ngmle sebechel el melekoi el kmo: “A lsekum ak mla rucherechii a chutem el kuusers er ngii, el kngiluu er a re meral ouklalo er ngii, ma lsekum ak mla kma dellomel el dilubech er ngii e di mechititerir a re chad er a sers el millalem me tolsengerenger, e sola e lak le dubech a wheat ma barley, e bai le dubech a chudel ma kollil.” (Job 31:38-40) A Job a kmal dimlak a ta el lorribech a chetemir a rebebil me a lechub e lulengeblad er a rechad er a ureor. Me kid a kmal kired el mo mesuub a omerellel a Job el mo blak a rengud er a meklou me a mekekerei el tekoi el bedul a Jehovah.

¹⁹ Ngar a mederir tirke el tedei el leko te sechelil a Job me a dirrek el Elihu, e nguluuchais er tir el kirel a blekerdelel a klengar er ngii. Ngar er a chelsel a klengar er ngii e ‘ngulelsiich’ a tekoi el mengemedaol er a ngii di el chad el mo meruul a ultuteklel el mo er ngii. Me a lsekum e ngmelteriter a Job el mekngit e ngkmal kilengei el mo obals el kirel a mekngit el lerirellii. Me ngmlo rullii a ultuteklel e mengiil er a temel a kerrekeriil el mo er ngii. Me “a ikakid a tekingel a Job e merekong.”​—Job 31:35, 40.

 Ngsebechem el Melemolem el Blak a Rengum

20, 21. (a) Ngera uchul e ngmle sebechel a Job el lomelemii a blakerreng er ngii? (b) E kede mekerang e mekurulii a bltkil a rengud el mo er a Dios?

²⁰ Ngoeak a bltkil a rengul a Job el mo er a Dios, e ngmle sebechel el lomelemii a blakerreng er ngii e dirrek el Jehovah a kmal mle betik a rengul er ngii me ngulengeseu er ngii. Me a tekingel a Job a kmo: “Kulemekngar er ngak [e Jehovah] e di blechebech el betik a rengum er ngak; ma ulekerreuim a uchul mak chad.” (Job 10:12) Me a lmuut el tang, a Job a ulechotii a bltkil a rengul el mo er a rebebil, e le ngmle medengei el kmo, a ngii di el chad el diak loubltikerreng el mo er a rechad a oridii sel omeluu el bedul Ngike el Kot el Ngarbab el Dios. (Job 6:14) Me tirke el blak a rengrir el chad a betik a rengrir er a Dios me a retonari er tir.​—Matteus 22:37-40.

²¹ Ngkmal sebeched el mekurulii a bltkil a rengud el mo er a Jehovah el oeak sel donguiu a Tekingel er a bek el sils, e dirrek el melebedebek aike el tekoi el ouchais er kid el kirel. Ngdirrek el oeak a nglunguched el bedulngii e ngsebeched el oldanges er a Jehovah e dirrek el mereng a sulel el kirel a ungil omerellel el bedul kid. (Filipi 4:6, 7) Ngdirrek el sebeched el mengitakl el oldanges er a Jehovah e ngmai a klungioled sel deblechoel el teloi er a rechedal. (Hebru 10:23-25) Ngdirrek el sel deteloi er a ureor er a berkel a klumech el ouchais el kmo “ngii a mla olsobel er kid,” e ngomekeroul er tia el bltkil a rengud el mo er ngii. (Psalm 96:1-3) Me ngoeak aikaikid el rolel, e ngsebeched el lomelemii a blakerreng er kid el mo er a Jehovah, el ua lolekoi a ta er a milluches er a Psalm el kmo: “Ngdi kuk le ngak e ng bai ungil a dekeed er a Dios! Ak metik er osebechakl el ngar a [Jehovah] el Dios, mak mo ouchais a ikel rokui el bla leruul.”​—Psalm 73:28.

22, 23. Kid el mengebkall er a llemeltel a Jehovah el mengedereder, ngmekerang a omerelled e sebechel el omekesiu er a omerellir tirke el mle blak a rengrir el chad er a irechar?

²² Ngar er a chelsel aika el mereko el betok el dart el rak, e a Jehovah a melemolem el omesterir a betok el kakerous el ngerechelir a reblak a rengrir el mesiungel. A Noah a mirruul er a arhe e dirrek el mle chad el ‘ulemerk ra llemalt.’ (2 Petrus 2:5) A Josua a milengetakl er a rechad er a Israel el mo soiseb er a Beluu er a Nglat, e mlo sebechel el rullii tia el klou el ngerechelel e le ngii el mle blechoel el menguiu er a “babier er a Llach . . . er a llomes ma klebesei,” e dirrek el uleltirakl aike el tekoi el lesiluub. (Josua 1:7, 8) Me tirke el Kristiano er a kot el dart el rak a mirruul er a remo disaiplo e dirrek el mle blechoel el mo dmak e mesuub a bades er a Biblia.​—Matteus 28:19, 20.

²³ Kid el rokui a mengebkall er a llemeltel a Jehovah el mengedereder, e dirrek el melemolem er a blakerreng er kid sel dolisechakl el kirel a llemalt, e doruul er a remo disaiplo, e doltaut a omellach er a Biblia, e dirrek el mo teloi er a rekldemed er a klaumerang el ngar aike el miting er kid, me aike el eru el sils el ongdibel me aike el meklou el ongdibel er kid er a bek el rak. Aika el tekoi a kmal sebechel el ngosukid el mo bekeu e mesisiich el kirel a omesiunged el mo er a Jehovah, e dirrek el mo ungil el churrengelii a urered el meruul a soal a Dios. Tia el omeruul a kmal diak el meringel e le a Demad el Jehovah me a Ngelekel el Jesus a kmal sebechir el ngosukid. (Duteronomi 30:11-14; 1 King 8:57) Me a lmuut el tang, ngngar ngii a rebetok el ‘rudam’ er kid, el tir a kmal blak a rengrir e dirrek el mengebkall er a Jehovah el Ngarbab el Dios er kid.​—1 Petrus 2:17.

Ke Mekerang a Omonger?

• Ngkirel el mo uangerang a osenged el bedul a llechul a Jehovah el kirel a tekoi er a kldung?

• Ngera el blekerdelel a Job a kmal soam el mesuub er ngii?

• Ngmle uangerang a omerellel a Job el sebeched el menguiu er a Job 31:29-37?

• Ngera uchul me ngsebeched el lomelemii a blakerreng er kid el mo er a Dios?

[Aike el Ker er a Suobel]

[Siasing el ngar er a 29 el llel]

A Job a millemolem er a blakerreng er ngii el mo er a Jehovah. Me kid me ngkmal sebeched el meruul er a osisiu el tekoi!

[Siasing el ngar er a 32 el llel]

Ngsebeched el lomelemii a blakerreng er kid!