Wi o tan du san reti!
Wi o tan du san reti!
„Ma mi o tyari misrefi na wan reti fasi.”—PS. 26:11.
1, 2. San Yob ben taki fu sori taki a ben du san reti? San wi e leri fu en te wi e leisi Yob kapitel 31?
NA INI owruten, sma ben gwenti wegi sani tapu wan wegi. Nofo tron a wegi disi ben abi tu baki. Na ini a wan baki, sma ben e poti a sani di den ben wani wegi, èn na ini a trawan den ben e poti wegiston. A pipel fu Gado ben musu gebroiki wegi nanga wegiston di soifri.—Odo 11:1.
2 Di Satan ben e tesi a man Yob di ben e dini Gado nanga en heri ati, dan Yob taki: ’Yehovah o wegi mi tapu wan soifri wegi. A o si taki mi ati krin’ (Yob 31:6). Baka dati, Yob taki fu wan tu situwâsi di ben kan tron wan tesi gi wan sma di lobi du san reti. Ma fu taki en leti, Yob pasa a tesi dati, soleki fa den wortu fu en di skrifi na ini Yob kapitel 31, e sori. A no de fu taki dati a moi eksempre fu en o gi wi deki-ati fu handri na a srefi fasi. Na so wi o man taki nanga a srefi overtoigi di a psalm skrifiman David ben abi. A ben taki: „Ma mi o tyari misrefi na wan reti fasi.”—Ps. 26:11.
3. Fu san ede wi musu tan gi yesi na Gado na ini pikin sani èn na ini bigi sani?
3 Aladi Yob ben kisi bun hebi tesi, toku a tan gi yesi na Gado. Son sma ben kan feni taki Yob na wan heri bun eksempre gi wi fu di a ben tan gi yesi na Gado aladi a ben e kisi so hebi tesi. Wi no e pina na a srefi fasi fa Yob ben e pina. Ma efu wi wani sori taki wi na sma di lobi du san reti, dan wi musu tan gi yesi na Gado na ini pikin sani èn na ini bigi sani.—Leisi Lukas 16:10.
Wi musu tan du san reti
4, 5. San Yob no ben e du fu di a ben de wan sma di lobi du san reti?
4 Efu wi wani tan gi yesi na Yehovah, dan wi musu hori wisrefi na den markitiki fu en, neleki fa Yob ben du dati. Yob ben taki: „Mi meki wan frubontu nanga mi ai. Sobun, fa mi kan luku wan tra uma nanga a prakseri fu didon nanga en? Efu mi ati kori mi fu luku wan tra uma, èn efu mi didon e wakti na a doro fu wan tra sma, dan meki mi wefi masi aleisi gi wan tra man, èn meki wan tra man go didon nanga en.”—Yob 31:1, 9, 10.
5 Fu di Yob ben abi a fasti overtoigi fu tan gi yesi na Gado, meki a no ben e tan luku wan uma fu kisi tranga lostu gi en. Fu di a ben trow, meki a no ben e prei nanga den firi fu tra uma, èn a no ben e suku a wefi fu wan tra man. Na ini a Bergitaki, Yesus ben taki wan prenspari sani di abi fu du nanga hurudu, èn a no de fu taki dati sma di lobi du san reti musu hori a sani dati na prakseri.—Leisi Mateyus 5:27, 28.
No abi bedrigifasi
6, 7. (a) Soleki fa a tori fu Yob e sori, dan fa Gado e kon si efu trutru wi na sma di lobi fu du san reti? (b) Fu san ede wi no musu abi bedrigifasi?
6 Efu wi wani de sma di lobi du san reti, dan wi no musu bedrigi trawan. (Leisi Odo 3:31-33.) Yob ben taki: „Efu mi waka nanga man di no e taki san tru, èn efu mi futu e hasti densrefi fu bedrigi sma, dan meki Gado wegi mi tapu wan soifri wegi. A o si taki mi ati krin” (Yob 31:5, 6). Yehovah e wegi ala libisma tapu „soifri wegi”. Soleki fa a tori fu Yob e sori, dan Gado e krutu den futuboi fu en na wan reti fasi fu si efu trutru den na sma di lobi du san reti.
7 Efu wi e kon abi bedrigifasi, dan wi no o man tan gi yesi na Gado. Sma di lobi du san reti, ’no e du den syen sani moro di den ben du na wan kibri fasi, èn den no abi trikifasi’ (2 Kor. 4:1, 2). Ma kande wi e taki noso du wan sani fu bedrigi wi Kresten brada, so taki a sma dati musu begi Gado fu yepi en. Fa Gado e si a tori dati? A sani disi o tyari takru bakapisi kon gi wi! A psalm skrifiman ben taki: „Mi bari kari Yehovah di mi ben de na nowtu. Ne a piki mi. Ke Yehovah, frulusu mi fu den wan di e taki lei, iya, fu den sma di e taki sani fu kori trawan” (Ps. 120:1, 2). A bun fu hori na prakseri taki Gado kan si san de na ini wan sma ati, iya, a kan „ondrosuku na ati nanga den niri” fu wi, fu kon si efu trutru wi na sma di lobi du san reti.—Ps. 7:8, 9.
Handri na wan reti fasi nanga trawan
8. Fa Yob ben e handri nanga trawan?
8 Efu wi wani tan du san reti, dan wi musu de leki Yob di ben lobi retidu, di ben abi sakafasi, èn di ben e hori trawan na prakseri. Yob ben taki: „Efu noiti mi no ben arki den problema fu den man di e wroko leki srafu gi mi, èn efu noiti mi no ben arki den uma di e wroko leki srafu gi mi te den abi wan problema nanga mi, dan san mi ben o man du te Gado opo du wan sani? Efu a ben o aksi mi frantwortu fu dati, san mi ben o piki en? A sma di meki mi na ini mi mama bere, meki den tu, a no so? Na wán sma meki wi alamala na ini wi mama bere, a no so?”—Yob 31:13-15.
9. Sortu fasi Yob ben e sori te a ben e handri nanga den futuboi fu en, èn san wi musu du te a abi fu du nanga a tori disi?
9 Soleki fa a sori, dan sma ben e handri krutu-afersi na wan orga fasi na ini a ten fu Yob. Srefi srafu ben kan tyari wan tori go na krutu. Yob ben e handri na wan reti-ati fasi nanga den futuboi fu en, èn a ben e sori sari-ati gi den. Wi musu sori den fasi disi tu efu wi wani de sma di lobi du san reti, èn wi musu du dati spesrutu te wi e dini leki owruman na ini a Kresten gemeente.
De klariklari fu gi sma sani, èn no abi bigi-ai
10, 11. (a) Fa wi du sabi taki Yob ben de klariklari fu gi sma sani èn fu yepi trawan? (b) Na sortu rai na ini Bijbel Yob 31:16-25 e memre wi?
10 Yob ben de klariklari fu gi sma sani èn fu yepi trawan. A no ben denki ensrefi nomo, èn a no ben abi bigi-ai. A ben taki: ’Noiti mi ben tyari sari kon gi den uma di masra dede kaba. Noiti mi wawan nyan mi nyanyan, aladi den pikin di no abi papa no abi noti fu nyan. Efu mi ben e si fa wan sma e pina fu di a no abi krosi, efu mi ben opo mi anu fu naki den pikin di no abi papa, te den ben kon suku yepi na mi na a portu fu a foto, dan meki mi skowru fadon komoto fu mi skin, èn meki na ondrosei pisi fu mi anu broko lusu fu a tapusei pisi fu mi anu.’ Èn Yob no ben o tan du san reti efu a ben taigi gowtu: „Yu na mi howpu!”—Yob 31:16-25.
11 Kande den moi wortu disi e meki wi prakseri den wortu fu a disipel Yakobus: „Na anbegi di krin èn di de sondro flaka, soleki fa wi Gado nanga Tata e si dati, na disi: fu sorgu gi sma di de na nowtu, namku gi pikin di no abi papa nanga mama moro èn gi uma di lasi den masra na ini dede, èn un no musu meki grontapu flaka unu” (Yak. 1:27). Kande wi e memre a warskow disi tu di Yesus ben gi wi: „Tan na ai èn luku bun taki unu no kisi bigi-ai na nowan fasi, bika srefi te wan sma abi furu gudu, toku den sani di a abi no kan gi en libi.” Baka dati, Yesus fruteri wan agersitori fu wan guduman di ben abi bigi-ai, èn di dede leki wan sma di „no gudu na ini Gado ai” (Luk. 12:15-21). Fu man de sma di lobi du san reti, dan wi no musu abi bigi-ai, fu di dati no fiti. Wan sma di abi bigi-ai e du afkodrei, fu di a sani di a e angri fu kisi e hari en prakseri puru na Yehovah, èn na so a sani dati e tron wan falsi gado (Kol. 3:5). Wan sma di wani tan du san reti, no kan abi bigi-ai!
No gowe libi a tru anbegi
12, 13. Fa Yob ben de wan eksempre gi wi te wi e luku fa a wai pasi gi afkodrei?
12 Sma di lobi du san reti no e gowe libi a tru anbegi. Yob no ben du dati, bika a ben taki: „Te mi ben e si a son e skèin, èn te mi ben e luku fa a moi mun ben e waka pasa, dan noiti mi ati kori mi fu fringi wan bosi gi den. We dati srefi ben o de so wan ogri sani taki mi ben o abi fu go na fesi krutu. Bika dati ben o sori taki mi drai baka gi a tru Gado na hemel.”—Yob 31:26-28.
13 Yob no ben e anbegi sani. Efu kande en ati ben wani kori en fu anbegi sani na hemel, soleki a mun, èn efu a ben o „fringi wan bosi” gi wan sani di a ben e anbegi, dan a ben o anbegi falsi gado, èn na so a ben o drai baka gi a tru Gado (Deut. 4:15, 19). Fu man tan gi yesi na Gado, dan wi no musu anbegi nowan-enkri falsi gado.—Leisi 1 Yohanes 5:21.
No du ogri-ati sani èn no hoigri
14. Fu san ede wi kan taki dati Yob no ben abi takru fasi?
14 Yob no ben abi takru fasi èn a no ben e du ogri-ati sani. A ben sabi taki efu a ben abi den fasi dati, dan dati ben o sori taki a no ben de wan sma di lobi fu du san reti. Fu dati ede a ben taki: „Noiti mi prisiri te mi feanti dede, èn noiti mi breiti te ogri miti en. Noiti mi meki mi mofo sondu fu di mi ben fluku mi feanti.”—Yob 31:29, 30.
15. Fu san ede a no bun fu prisiri te rampu e miti wan sma di abi bita-ati gi wi?
15 A reti-ati man Yob noiti ben e prisiri te rampu ben e miti sma di ben abi bita-ati gi en. Wan odo di ben skrifi bakaten e gi wi a warskow disi: „No prisiri te yu feanti fadon. Te a naki futu, yu no musu breiti, bika efu Yehovah si taki yu e breiti, a no o feni en bun. En ati no o bron moro nanga yu feanti” (Odo 24: 17, 18). Fu di Yehovah kan si san de na ini wi ati, meki a sabi efu dipi na ini wi ati wi e prisiri te rampu miti wan trawan, èn a no lobi a sani dati kwetikweti (Odo 17:5). Kande Gado sa strafu den wan di e teige wi, fu di a e taki: „Na mi o puru atibron na den tapu èn na mi o strafu den.”—Deut. 32:35.
16. Fa wi kan gi trawan wan switikon, awansi wi a no gudusma?
16 Yob ben de klariklari fu gi sma wan switikon (Yob 31:31, 32). Awansi wi a no gudusma, toku wi kan „abi a gwenti fu gi sma wan switikon” (Rom. 12:13). Wi kan kari trawan kon na wi oso fu kon nyan nanga wi, èn wi e hori na prakseri taki „moro betre wan sma e nyan wan preti nanga gruntu na wan presi pe lobi de, leki fu nyan wan fatu mankaw na wan presi pe bita-ati de” (Odo 15:17). Awansi wi e nyan wan pikin sani nomo makandra nanga wan tra sma di lobi fu du san reti, toku dati sa gi wi prisiri nanga deki-ati te wi e du dati nanga lobi.
17. Fu san ede wi no musu pruberi fu kibri seryusu sondu?
17 Te Yob ben e gi sma wan switikon, dan a ben musu fu de so taki dati ben e tranga a bribi fu den, bika Yob no ben de wan hoigriman. A no ben de leki den ogri man di ben e kon na ini a gemeente fu a fosi yarihondro, èn di ben e ’prèise sma soso fu densrefi ben kan kisi wini fu dati’ (Yud. 3, 4, 16). Yob no ben e tapu ai gi en eigi sondu, èn a no ben e ’kibri den fowtu fu en na ini en borsusaka’, soso fu di a ben frede taki tra sma ben o lasi lespeki gi en te den ben o kon sabi fu den sani dati. A ben wani taki Gado ondrosuku en, èn a ben o meki Gado kon sabi fu den fowtu fu en te dati ben de fanowdu (Yob 31:33-37). Efu wi du wan seryusu sondu, dan wi no musu pruberi fu kibri dati soso fu di wi no wani taki wi fesi fadon. Fa wi kan sori taki wi e meki muiti fu tan du san reti? Wi musu frustan taki wi du wan sondu, wi musu sori berow, wi musu suku yepi na den brada, èn wi musu du ala san wi man fu meki sani bun baka.—Odo 28:13; Yak. 5:13-15.
Wan reti-ati man e kisi krutu
18, 19. (a) Fu san ede wi kan taki dati Yob noiti no ben kori tra sma? (b) San Yob ben de klariklari fu du efu a ben du wan ogri?
18 Yob no ben abi bedrigifasi, èn ala ten a ben e du san reti. Dati meki a ben kan taki: „Efu mi eigi gron ben o bari suku yepi fu di mi no gebroiki en bun, èn den pikin gotro na ini mi gron ben o bari krei tu, iya, efu mi nyan froktu na sma gron sondro fu pai fu dati, èn sma e geme fu di mi wani teki den gron fu den, dan meki makabon nanga takru wiwiri gro na ini mi gron na presi fu aleisi, èn meki tingi wiwiri gro na presi fu karu” (Yob 31:38-40). Yob noiti no teki a gron fu tra sma, èn a no ben e kori den wrokoman fu en. Neleki en, wi musu tan gi yesi na Yehovah na ini ala sani.
19 Yob ben fruteri den dri mati fu en, sosrefi a yonguman Elihu, fu a fasi fa a ben libi. A ben gi ibrisma di ben abi wan sani fu kragi teige en, na okasi fu tyari en go na krutu. Efu a ben kon na krin taki Yob ben du wan ogri, dan a ben o de klariklari fu kisi strafu gi dati. Sobun, na wan agersi fasi a gi pasi taki sma tyari en go na krutu, èn a wakti teleki Gado srefi krutu en. Na so „Yob kaba taki san a ben abi fu taki”. —Yob 31:35, 40.
Yu man tan du san reti
20, 21. (a) Fa a du kon taki Yob ben man tan gi yesi na Gado? (b) Fa wi kan kon abi lobi gi Gado?
20 Yob ben man tan du san reti fu di a ben lobi Gado, èn fu di Yehovah ben lobi en èn yepi en. Yob ben taki: „Yu [Yehovah] gi mi libi èn yu sori mi bun-ati. Na wan switi fasi yu sorgu gi mi” (Yob 10:12). Boiti dati, Yob ben sori lobi gi trawan, èn a ben sabi taki te a ben o weigri fu sori lobi gi trawan, dan dati ben o sori taki a no ben e frede na Almaktiwan (Yob 6:14). Sma di lobi du san bun na sma di lobi Gado nanga tra sma.—Mat. 22:37-40.
21 Wi kan kon abi lobi gi Gado te wi e leisi a Wortu fu en ibri dei, èn te wi e denki dipi fu den sani di wi e leri. Te wi e begi Gado nanga wi heri ati, dan wi kan taigi en tangi gi den bun sani di a du gi wi (Fil. 4:6, 7). Wi kan singi gi Yehovah èn wi kan kisi wini te wi e kon makandra doronomo nanga a pipel fu en (Hebr. 10:23-25). Dati sa meki tu taki a lobi di wi abi gi Gado e kon moro tranga te wi e teki prati na a diniwroko èn te wi e meki „a bun nyunsu” bekènti „taki a e frulusu sma” (Ps. 96:1-3). Na so wi o tan gi yesi na en, neleki a psalm skrifiman di ben singi: „A bun gi mi fu kon krosibei na Gado. Na a Moro Hei Masra Yehovah mi e si leki mi kibripe.”—Ps. 73:28.
22, 23. Fa wi na ini a ten disi e teki na eksempre fu den sma fu owruten di ben e si Yehovah leki a Sma di abi a reti fu tiri ala sani?
22 Na ini den hondrohondro yari di pasa, Yehovah gi sma di lobi du san reti furu difrenti wroko fu du. Noa ben bow wan ark èn a ben de „wan preikiman fu regtfardikifasi” (2 Petr. 2:5). Yosua ben tyari den Israelsma go na ini a Pramisi Kondre, ma a ben man du dati soso fu di a ben leisi ’a wet dei nanga neti’ èn fu di a ben e du san a wet ben taki (Yos. 1:7, 8). Den fosi Kresten ben e meki disipel èn den ben e kon makandra doronomo fu studeri den buku fu Bijbel.—Mat. 28:19, 20.
23 Soleki fa wi si, dan wi e horibaka gi Yehovah, a Sma di abi a reti fu tiri, te wi preiki a bun nyunsu fu regtfardikifasi, te wi e meki disipel, te wi e du san Bijbel e taki, èn te wi e kon makandra nanga wi Kresten brada nanga sisa na den gemeente konmakandra, na den bigi konmakandra, èn na den kongres. Te wi e du den sani disi, dan dati e yepi wi fu tan abi wan tranga bribi èn fu du a wani fu Gado. A no muilek tumusi gi wi fu gi yesi na Gado, fu di wi e kisi yepi fu wi Hemel Tata èn fu a Manpikin fu en (Deut. 30:11-14; 1 Kow. 8:57). Boiti dati, ’ala wi brada’ e hori baka gi wi. Den e gi yesi tu na Yehovah èn den e si en leki a Moro Hei Masra fu den.—1 Petr. 2:17.
San yu ben sa piki?
• Fa wi musu si den markitiki fu Yehovah?
• Sortu fasi fu Yob yu lobi?
• Soleki fa Yob 31:29-37 e sori, dan fa Yob ben e tyari ensrefi?
• Fu san ede wi man tan gi yesi na Gado?
[Aksi fu a tori disi]
[Prenki na tapu bladzijde 29]
Yob ben tan gi yesi na Yehovah. Wi kan du dati tu!
[Prenki na tapu bladzijde 32]
Wi man tan du san reti!