Ka Sha Mimi Wase Se Zende ye!
Ka Sha Mimi Wase Se Zende ye!
“Mo yô, ka sha [mimi] wam me zende ye.”—PS. 26:11.
1, 2. Yobu yange ôr kwagh u mtil sha mimi na ér nyi, man Yobu ityough 31 tese nyi sha kwagh naa?
SHA ayange a tsuaa la, ashighe kpishi i karen myohom ma kwagh sha iyôgh ki karen kwagh a mi. Yange i er ki ki lu a teran, u i zor u sha iyôgh ki lun nôô hen atôatô u teren la yô. Í har tasa sha teran la ken iyan man ken imese. Nahan í gema kwagh u í lu karen myohom nagh la í wa shin tasa u môm, tasa ugen la di í wa ikaren u myoho shimi. Lu u ior mba Aôndo vea yaren tom a myôm ma karen kwagh a mi kua uikyaren mba myoho mba mimi.—Anz. 11:1.
2 Shighe u Yobu, or u cian Aôndo lu yan ican i Satan va a mi sha a na la, a kaa ér: “[Yehova] A̱ karem ase sha ikyaren i mimi, sha er Aôndo A̱ fa mimi wam yô!” (Yobu 31:6) Sha ityôkyaa la yô, Yobu ter mbamlu mba vea fatyô u karen jighjigh u or u nan til sha mimi yô. Kpa Yobu hemba imeen la, er mkaanem nam ma i nger ken Yobu ityough 31 la ma tese nahan. Ikyav i dedoo i Yobu ver ne ia wase se kpishi u eren akaa sha imba gbenda la shi kaan vangertiôr er orpasalmi Davidi yange kaa nahan, ser: “Mo yô, ka sha [mimi] wam me zende ye.”—Ps. 26:11.
3. Er nan ve i lu hange hange u se lu a ieren i mimi sha ishigh ki Aôndo sha akaa a vesen man a kiriki?
3 Yobu za hemen u suur sha Aôndo her, shin er i kar un tsung nahan kpaa. Mbagenev je yô, alaghga vea kaa ér Yobu due ityough sha kwagh u mtil sha mimi, zum u i kar un tsung la. Se mba yan ican vough er Yobu nahan ga. Nahan kpa, gba u se lu a ieren i mimi sha akaa a vesen man a kiriki ve se tese ser se mba zenden sha mimi shi se sue hemen u Yehova ye.—Ôr Luka 16:10.
Gba Hange Hange u Se Tile sha Mimi sha Kwagh u Aeren a Wang
4, 5. Er Yobu lu or u tilen sha mimi yô, yange palegh u eren nyi?
4 Gba u se dondon atindiakaa a Yehova a we sha kwagh u aeren a wang la, vough er Yobu kpa eren nahan, ve se za hemen u tilen sha mimi hen Aôndo ye. Yobu kaa ér: “M ya ikyur a ashe am; nahan á er nan man me kenger sha iniunkwasa? . . . Aluer ishima yam ia nzughul sha isharen i kwase, man mea lian hen hunda u or u nan we ndor a mo yô, i̱ de, kwase wam a̱ wua orgen uwua, mbagenev kpaa ve̱ gure sha a na.”—Yobu 31:1, 9, 10.
5 Er Yobu kange ishima ér una za hemen u tilen sha mimi hen Aôndo yô, a palegh u kenger kwase sha gbenda u isharen i yaven a nan ia mough ken a na la. Er Yobu lu a kwase na yô, yange hia a ma kwase ukwa, shin ker u sôsom a kwase u orgen sha gbenda u una tese ér nan doo un ishima tsô kpaa ga. Ken Ityesen i sha Uwo la, Yesu ta icin sha kwagh u ieren i ijimbaa la gbang gbang, man doo u mba tilen sha mimi vea umbur kwagh ne.—Ôr Mateu 5:27, 28.
De Hingir u Eren Atseregh Ga
6, 7. (a) Er kwagh u er Yobu la a tese nahan, Aôndo yaren tom a nyi u karen mtil sha mimi wasa? (b) Gba u se lu mbawan atseregh shin icugh ga sha ci u nyi?
6 Aluer se soo ser i wa se ken ior mba tilen sha mimi yô, gba u se nyôr atseregh a eren ga. (Ôr Anzaakaa 3:31-33.) Yobu kaa ér: “Aluer mea zenden sha atseregh, man angahar a am kpaa aa zaan fefa sha icugh yô, A̱ karem ase sha ikyaren i mimi, sha er Aôndo A̱ fa mimi wam yô!” (Yobu 31:5, 6) Yehova karen uumace cii sha “ikyaren i mimi.” Aôndo ka a yar tom a ijirôron na i vough la sha u karen se ér una fa sea lu mba tilen sha mimi yô, er kar Yobu nahan.
7 Aluer se hingir mbawan atseregh shin mbawan icugh yô, se lu tilen sha mimi hen Aôndo her ga. Mba tilen sha mimi ka ve “venda akaa a kunya a ken myer la” shi mba “zenden sha atseregh ga.” (2 Kor. 4:1, 2) Kpa aluer se er kwagh a anmgbian wase u ken Kristu sha anyighe shin se tsugh nan, man nan er msen nan vaa a Yehova di ye? Yehova una de se mayange ga cii! Orpasalmi wa icam ér: “M yila TER ken ican yam i tsung, A ungwam kpaa. Yima uma wam sha zwa u aiegh, TERE, man sha nombor u icughugh kpaa.” (Ps. 120:1, 2) Doo u se umbur ser Aôndo una fatyô u nengen a mlu wase u ken atô, “karen asema man ahi kpaa” sha u una fa sea lu mba tilen sha mimi jim jim yô.—Ps. 7:8, 9.
Ver Ikyav i Dedoo sha Ieren You a Mbagenev
8. Yobu yange eren a mbagenev nena?
8 Gba u se lu er Yobu, u lu orperapera man or u hiden a iyol ijime shi wan mbagenev ikyo la, ve se za hemen u tilen sha mimi ye. A kaa ér: “Aluer mea laha ityôkwagh i kpan wam u nomso shin kpan wam u kwase, zum u vea gba ayôôso a mo sha kwagh yô, nahan me er nan je aluer Aôndo Una mough sha? Aluer Una va pinem yô, me kaa Un mer nyi? Wen u A erem ken uya, ka Un A er ngura kpaa ye gaa? Ka Un môm A er se cii ken uya ye gaa?”—Yobu 31:13-15.
9. Yobu yange eren a mbashiren un nena, man doo u se er kwagh sha gbaa ne nena?
9 Ikyav tese ér sha ayange a Yobu la, gbenda u i ôron ajiir la wa kpelegh kpelegh ga. Yange i ôron ajir sha inja sha inja, shi ikpan je kpa, mbaatejir lu sha ci ve. Yobu yange eren a mbashiren un doo doo man sha mhôôn kpaa. U se zende sha mimi wase yô, gba u se eren kwagh a mbagenev sha imba gbenda la, hemban je yô, aluer se mba shiren tom u mbatamen ken tiônnongo u Kristu yô.
Naan Ior Kwagh Mgbeghaa, De Tem Kwagh u Orgen Ga
10, 11. (a) Er nan ve se fe ser Yobu yange wa nagh shi wasen ioro? (b) Alaghga takerada u Yobu 31:16-25 ua umbur se nyi kwaghwan u Ruamaberaa?
10 Yobu yange wa nagh kpishi shi wasen ior, tangen iyol ga shi tômon kwagh u orgen ga. A kaa ér: “Aluer mea . . . er kwasecôghol nana̱ hungwa ashe ikyôr kpaa, shin mea yaan anruam wam mo tswen, ancôghol nana zuan a anivurugh ga yô . . , aluer mea nenge ma or nana lu saan ishe sha mban u akondo . . ; aluer mea naregh uwegh sha u nzughul a ancôghol, sha ci u m nenge a iwasen yam sha hundagar yô, de, vandegh ku̱ tôndom sha kpaakpawe kera, uwegh agh kpaa ku̱ sombo sha kuhe kera.” Shi luun er Yobu kaa a zenaria ér: “We u ngum kwagh u suur sha mi” yô, yange ma lu or u tilen sha mimi ga.—Yobu 31:16-25.
11 Mkaanem ma kôron ken ishima tsung er mara nahan ma a fatyô u umbur se kwagh u orhenen Yakobu yange ôr ne, ér: “Mcieaôndo u wang u a lu a acôghor iyol sha ishigh ki Aôndo ga yô, ka un ne: ka u za sôron ancôgholov kua kasev mba côgholov ken ican ve, man shi u kuran iyol you wang sha kwagh u taregh.” (Yak. 1:27) Shi se fatyô u umbur icintan i Yesu ne kpaa, ér: “Ver nen ishima, kura nen ayol a en sha hanma hua; gadia ka sha u ngeen a akaa kpishi la man or nana lu a uma ga.” Yesu maa ôr injakwagh sha kwagh u ornyar ugen u wan hua, u yange ku wua un sha ci u lu “ornyar sha kwagh u Aôndo ga” yô. (Luka 12:15-21) Saa se palegh imeen i tômon kwagh u orgen sha ifer shin eren hua la ve se lu mba tilen sha mimi ye. Mtôm ka mcivir u akombo sha ci u ishima i orwan hua cii ka i lu sha kwagh u nan tômon la, nahan nan kera ver ishima sha kwagh u Yehova ga, maa kwagh u nan tômon la a hingir nan eev. (Kol. 3:5) Orwan hua nana fatyô u lun or u tilen sha mimi ga!
De Kahan Undun Mcivir u Mimi Ga
12, 13. Ka ikyav i nyi Yobu a ver se sha kwagh u kemen iyol sha akombo a civiri?
12 Mba tilen sha mimi mba undun mcivir u wang ga. Yobu yange gbihi mcivir u wang ga, gadia a kaa ér: “Aluer mea kenger sha iyange er i te la, shin uwer u u lu tan wanger wanger la, zan zan i mee ishima yam ken myer, man zwa wam ua suse uwegh agh, kua tese sha a ve yô, ngun kpaa, ka kwaghbo u a kom mtsaha sha ikyev i mbaajiriv je; gadia mea er nahan tsô kpaa, m nyiman Aôndo u Sha je ve.”—Yobu 31:26-28.
13 Yobu yange civir akaa a lun a uma ga ze. Luun er Yobu kenger akaa a sha kwavaôndo, er uwer nahan, man kwagh la mee ishima na ken myer shi a ‘suse uwegh nagh,’ a gema ku a tese sha, sha gbenda u civir akombo yô, yange ma lu orcivir akombo u vendan Aôndo. (Dut. 4:15, 19) Gba u se kem iyol sha kwagh u akombo cii, ve se za hemen u tilen sha mimi ye.—Ôr 1 Yohane 5:21.
De Oron Iyev Shin Eren Kwagh sha Ikparashe Ga
14. Se fatyô u kaan ser Yobu yange vihi tu ga sha ci u nyi?
14 Yobu yange vihi tu ga shi eren kwagh u una va orgen a ican ga. Yange fa ér anza a ngara nahan aa tese ér un ngu or u tilen sha mimi ga; a kaa ér: “Aluer mea ember sha kwaghbo u a tser or u nan kerem ihyom, man mea timin akende zum u ican i tser nan kpaa. . . , m lumun zwa wam u er kwaghbo u wa nan ifan er nana̱ saa ga.”—Yobu 31:29, 30.
15. Er nan ve u ember sha kwaghbo u a tser or u nan ker se ihyom la i lu kwagh u shami ga?
15 Mayange orjighjigh Yobu ember sha kwaghbo u tser or u nan ker un ihyom ga. Shighe u Yobu kpe kera anyom kar imôngo la, injakwagh igen va ta icin ér: “Zum u orihyom wou nan gbe yô, de ember ga, zum u nana nôngo gbev kpaa, ishima you i̱ de ember ga, sha er TER A̱ de nengen, i̱ vihin Un, man A̱ gema A̱ kar a iyugh Na sha a nan kera ga.” (Anz. 24:17, 18) Er Yehova a fe asema ase yô, aluer se mba ember ken myer sha kwaghbo u a tser orgen kpa a fa, man mayange je a lumun imba ieren la ga. (Anz. 17:5) Aôndo una tsaha se sha imba ieren la, gadia a kaa ér: “Iyevoron ka i Yam man mkimbi kpaa.”—Dut. 32:35.
16. Aluer se mba a kwagh ave ga je kpa, se fatyô u eren a mbavannya dedoo nena?
16 Yobu yange eren a mbavannya dedoo. (Yobu 31:31, 32) Shin er alaghga se lu a inyaregh kpishi ga nahan kpa, se fatyô u ‘eren a mbavannya dedoo.’ (Rom. 12:13) Se fatyô u nan mbagenev kwaghyan u kpuaa u se lu a mi la, aluer se umbur ser “guda u yan ikyayue henpe dooshima a lu yô, a u yan icôngonbua a ihyom ken asema” yô. (Anz. 15:17) Aluer kwaghyan ngu kpuaa, kpa se mba yan un ken dooshima vea anmgbian u nomso shin u kwase u ken Kristu yô, mtem la una hôm shi una maa se a maa ken jijingi kpaa.
17. Doo u se ker u yeren a yer ma kwaghbo u vesen u se er ga sha ci u nyi?
17 Erdoo u Yobu eren a mbavannya la yange una lu kwagh u maan mlu u ken jijingi kpee, sha ci u yange lu or u wan imanger ga. Yobu lu er mbafanaôndoga mba yange ve yer iyol ve nyôr ken tiônnongo u Kristu u sha derianyom u hiihii, ve lu “nyohon zwa sha u zuan a mtsera” la ga. (Yuda 3, 4, 16) Shin Yobu yange cir kwaghbo na, shin ‘yer ifer na ken vanger’ sha ci u lu cian ér mbagenev vea fa kwagh sha mi yô una ya kunya ga. Yange kegh iyol ér Aôndo, u aluer un Yobu una er kwaghbo kpa una pase hen a na la a̱ kar un. (Yobu 31:33-37) Aluer se er kwaghbo u vesen yô, se ker nen u yeren a yer kwaghbo la sha u kuran iti yase ga. Se tese ser se mba nôngon ser se tile sha mimi her nena? Ka sha u lumun kwaghbo u se er yô shi geman ishima shi keren iwasen i ken jijingi shi eren hanma kwagh u se fetyô cii sha u sôron kwagh u se er sha mi ga la.—Anz. 28:13; Yak. 5:13-15.
Or u Tilen sha Mimi Lumun Ér I Kar Un
18, 19. (a) A fatyô u kaan ér ken uma u Yobu cii, a ya or kwagh ga sha ci u nyi? (b) Yobu yange kegh iyol ér a zua un a kwaghbo yô, una er nyi?
18 Yobu lu or u mimi man u eren kwagh jighilii. Sha nahan yô, a kaa ér: “Aluer sule wam ua yilam ijir, man ihigha i u cii ia vaa yô, aluer mea yaan iyiagh ki u, mea kimbin ga, mea er uma u mbasulev a saa ishe kpaa yô, de, usaa ve̱ mende sha ityough ki alakema, man toho u̱ mende sha ityough ki shair.” (Yobu 31:38-40) Mayange Yobu ngohol inya hen mbagenev sha igyosough ga, shi yaan mtsera sha mbatomov nav kpaa ga. Gba u se za hemen u tilen sha mimi hen Yehova sha akaa a vesen man a kiriki cii, er Yobu nahan.
19 Yobu yange pase akar a na a atar la kua gumor Elihu kwagh na. Yange ‘wa ikyav sha uwegh nagh,’ nahan yôô ér antior u nan zough un a ma kwaghbo yô, nana za wa un ijir. Aluer ijir la i tese ér ka un yange un er kwagh shami ga mimi yô, una lumun mtsaha sha kwaghbo la. Yobu maa yem a mzeyol na ken atejir u Aôndo, shi kegh ijirôron i atejir shon una kure la kpaa. Maa “Kwaghôron u Yobu kure.”—Yobu 31:35, 40.
U Fatyô u Tilen sha Mimi Her
20, 21. (a) Yobu yange fatyô u tilen sha mimi her sha ci u nyi? (b) Kanyi se er ve Aôndo una doo se ishima?
20 Yobu yange kôrcio u tilen sha mimi her sha ci u Aôndo doo un ishima, shi Yehova soo un shi wasen un kpaa. Yobu kaa ér: “[We Yehova] U nam uma, shi U er a mo dedoo, ikyo i U wem ne, i kura jijingi wam.” (Yobu 10:12) Heela tseegh ga, Yobu tese mbagenev dooshima, sha ci u a nenge ér antior u nan eren a uumace mbagenev dedoo ga yô, nan de u cian Uhembanagee. (Yobu 6:14) Mba tilen sha mimi cii Yehova doo ve ishima kua mbawanndor a ve.—Mat. 22:37-40.
21 Kwagh u se er ve Aôndo una doo se ishima yô, ka u ôron Mkaanem nam ayange ayange shi gbidyen kwar sha kwagh u ma pase se sha a na la. Se fatyô u eren msen a ishima yase cii, wuese Aôndo shi sughun un sha erdoo na a vese. (Fil. 4:6, 7) Se fatyô u wan icam i wuese Yehova shi zuan a mtsera sha u kohol a ior nav imôngo hanma shighe la. (Heb. 10:23-25) Heela tseegh ga, shi Aôndo una seer doon se ishima, aluer se nyôr iyol ken tom u pasen kwagh la se mba pasen “kwagh u myom Na” yô. (Ps. 96:1-3) Sha imba igbenda ne yô, se fatyô u tilen sha mimi her, er orpasalmi u yange wa icam ér: “Mo yô, doom u mgbôghom a Aôndo; m gema Yehova Ter Uhembansha hingir mo ijiir yam i yeren ker” la nahan.—Ps. 47:2.
22, 23. Ityom i se mba suen hemen u Yehova se eren nyian la ngi kwagh môm a ityom i mba tilen sha mimi mba sha ayange a tsuaa la nena?
22 Yehova wa mba tilen sha mimi ityom kposo kposo ken atô u anyom a a kar uderi uderi la. Noa lu gban tso shi “yôôn kwagh u perapera.” (2 Pet. 2:5) Yosua yange hemen Mbaiserael nyôr a ve ken Tar u Ityendezwa, kpa yange kôrcio sha ci u timen ken “Ruamabera u atindigh . . . tugh man atetan” shi eren akaa a i nger kimi la cii. (Yos. 1:7, 8) Mbakristu mba sha derianyom u hiihii la lu geman ior hingir mbahenen, shi kohol imôngo hanma shighe sha u timen ken Ruamabera.—Mat. 28:19, 20.
23 Ka se tese ser se tile sha mimi wase her shi se sue hemen u Yehova sha u yôôn kwagh u perapera shi geman ior hingir mbahenen shi dondon akaawan a Ruamabera shi kohol a mbananjighjigh a vese imôngo ken mbamkombo man sha mbamkohol mba kiriki man mbavesen. Ityom ne ngi wasen se u taver ishima shi taver ken jijingi shi ngi wasen se u eren ishima i Aôndo. Akaa ne taver se u eren ga sha ci u Ter wase u sha la vea Wan na mba wasen se. (Dut. 30:11-14; 1 Utor 8:57) Heela tseegh ga, mzough u “anmgbianev” cii, mba ve kpa ve lu zenden sha mimi shi ve ne Yehova civir ér ngu Ter ve Uhembansha la, ve sue se dông.—1 Pet. 2:17.
Ú Kaa Wer Nyi?
• Doo u se nengen atindiakaa a Yehova a sha kwagh u aeren a wang la nena?
• Ka aeren a Yobu a nyi nahan a hembe doon we?
• Er i tese ken Yobu 31:29-37 nahan, Yobu yange eren kwagh nena?
• Se fatyô u zan hemen u tilen sha mimi hen Aôndo sha ci u nyi?
[Mbampin mba ngeren u henen]
[Foto u sha peeji 29]
Yobu za hemen u tilen sha mimi hen Yehova. Nahan se kpa se fatyô!
[Foto u sha peeji 32]
Se fatyô u tilen sha mimi wase her!