Quixhe íquenu sánenu Dios sin guchéʼnenu laa
Quixhe íquenu sánenu Dios sin guchéʼnenu laa
«Peru naa la? zazayaniáʼ Dios sin gucheeniáʼ laa.» (SAL. 26:11)
1, 2. Xi guníʼ Job para bisihuinni guca ti binni ni qué nuchee, ne xi cusihuinni capítulo 31 stiʼ Job de laabe.
DXIQUÉ nabé biquiiñeʼ binni balanza para uguubiáʼ xiixa cosa. Balanza que napa ti guiibaʼ ni didilaagaʼ ne guiropaʼ punta ni nanda chupa bladu huiiniʼ, ndaaniʼ tobi de laacani riuu ca pesa ca ne ndaaniʼ stobi ca riuu xiixa ni cazíʼ binni. Ca balanza ne ca pesa ni biquiiñeʼ ca xpinni Dios que guizáʼ cani (Pro. 11:1).
2 Dxi bitiidiʼ Binidxabaʼ Job, ti hombre ni bizuubaʼ stiidxaʼ Dios lu guendanagana, guniʼbe ca diidxaʼ riʼ lu capítulo 31 stiʼ Job: «Zaguubiáʼ [Jiobá] naa lu balanza ni guizáʼ stiʼ, ne [...] zuuyabe qué rucheeniáʼ laabe» (Job 31:6). Lu capítulo ca bizeetebe maʼ gunda gudíʼdibe lu stale guendanagana cásica ridiʼdiʼ guiráʼ ca xpinni Dios, ne bisihuínnibe qué nucheenebe Jiobá. Nga runi naca Job ti ejemplu galán para chinándanu. Pa gúninu casi bíʼnibe ca la? zanda guininu cásica guníʼ David: «Peru naa la? zazayaniáʼ Dios sin gucheeniáʼ laa» (Sal. 26:11).
3. Xiñee risaca guzúʼbanu stiidxaʼ Dios lu ca cosa nahuiiniʼ ne lu ca cosa naroʼbaʼ.
3 Job qué nucheené Dios neca gudiʼdiʼ lu stale guendananá. Nuu tu niníʼ huaxiéʼ si binni ñanda ñuni huantar ca guendanagana ni gudíʼdibe. Dxandíʼ, ca guendanagana ridídinu gadxé cani de cani gudiʼdiʼ Job. Peru laaca naquiiñeʼ guzúʼbanu stiidxaʼ Jiobá, cásica lu ca cosa nahuiiniʼ zaqueca lu cosa jma naroʼbaʼ. Zacá zunibiáʼcabe laanu casi hombre ne gunaa ni rusihuinni napa Jiobá derechu de guni mandar (biindaʼ Lucas 16:10).
Cadi gúninu cosa dxabaʼ
4, 5. Xi cosa dxabaʼ qué ñuni Job, hombre bizuubaʼ stiidxaʼ Dios que.
4 Pa racaláʼdxinu gúninu ni na Jiobá, naquiiñeʼ gúninu ni na ca ley stibe ne cadi gúninu cosa dxabaʼ, cásica qué ñuni Job ni, laa guníʼ: «Maʼ bineʼ ti pactu ne bizaluáʼ. Nga runi, ximodo ndiʼ guuyadxiéʼ ti binnidxaapaʼ ne gacalaʼdxeʼ laa yaʼ». De raqué guniʼbe: «Pa maʼ bidieeʼ lugar chuulaʼdxiʼ ladxiduáʼ ti gunaa, ne pa biaanaʼ para gundaacheʼ ra puertaʼ lidxi xcompañeruaʼ la? guʼtuʼ xheelaʼ para sti hombre, ne chuʼné xcaadxi hombre laa» (Job 31:1, 9, 10).
5 Job gudixhe ique cadi gucheené Jiobá, ngue runi qué ñuu dxi ñuuyabe ca gunaa ca ne nuxuíʼlube ñatanebe laacaʼ. Cumu nápabe xheelabe la? qué nusihuínnibe riuuláʼdxibe ca binnidxaapaʼ que ne laaca qué ñuuláʼdxibe ca gunaa ni maʼ bichaganáʼ. Gudiʼdiʼ si stale iza, lu libana ni bidii Jesús lu dani que guníʼ cadi jneza nga chuʼné binni ni cadi xheelaʼ, ne qué rusiáʼndanu conseju ca purtiʼ ruzúʼbanu stiidxaʼ Dios (biindaʼ Mateo 5:27, 28).
Qué chuʼ dxi gúninu xiixa para gusiguiinu binni
6, 7. 1) Cásica bizaaca né Job que, xi riquiiñeʼ Jiobá para guʼyaʼ pabiáʼ ruzúʼbanu stiidxaʼ. 2) Xiñee cadi naquiiñeʼ gusiguiinu ne quítenu binni.
6 Pa qué racaláʼdxinu guchéʼnenu Dios la? qué ziuu zucáʼchinu tu nácanu o qué zúninu xiixa ni cadi jneza. Biblia na: «Cadi gapuʼ envidia ti hombre ni ridinde, ne cadi chuuláʼdxiluʼ ca neza stibe. Purtiʼ nanalaʼdxiʼ Jiobá binni ni rucaachiʼ tu naca, peru riuube gaxha de cani runi ni jneza. Zusabanáʼ Jiobá lidxi binni malu, peru riguube ndaayaʼ lidxi ca binni ni runi ni jneza» (Proverbios 3:31-33). Job guníʼ: «Pa huazayaniáʼ hombre ni rusiguii, ne pa nagueendaca rusiguieeʼ, zaguubiáʼ [Jiobá] naa lu balanza ni guizáʼ stiʼ, ne [...] zuuyabe qué rucheeniáʼ laabe» (Job 31:5, 6). Racá ridúʼyanu, riguubiáʼ Jiobá binni lu ti balanza ni guizáʼ. Ne cásica bizaaca Job que, Dios riquiiñeʼ ca ley stiʼ para guʼyaʼ pa qué ruchéʼnenu laa.
7 Pa gusiguiinu ne quítenu binni la? qué zanda diʼ guininu nácanu xpinni Cristu ni ruzuubaʼ stiidxaʼ Dios. Xiñee yaʼ. Purtiʼ Dios rinabaʼ laanu gusaananu de gúninu xiixa cosa ni nusituí lunu «pa ñanna binni» de laani ne laaca qué riguítenu binni (2 Cor. 4:1, 2). Peru, xi ñaca pa ñuninanu ti xpinni Cristu pur ca diidxaʼ stinu o pur cani gúninu yaʼ. Zándaca óraque guinábabe Jiobá gacané laabe, cásica biʼniʼ salmista que ora guníʼ: «Bicaariʼdxeʼ Jiobá dxi cadideʼ lu guendananá ne laabe bicábibe naa. Jiobá, rinabaʼ lii gulaluʼ naa de lu naʼ cani rusiguii, ne de lu naʼ ca binni mañoso» (Sal. 120:1, 2). Ni gúninu ca zanda uguuni laanu ra naxoo nezalú Dios. Cadi guiaandaʼ laanu ruuyaʼ Dios ximodo nuu «ladxidóʼ ne [ca] riñón» stiʼ binni, nga nga modo laanu, para gúʼyabe pa qué ruchéʼnenu laabe (Sal. 7:8, 9).
Gúninu ni jneza ora nuunu né xcaadxi binni
8. Ximodo guca Job ne binni.
8 Pa qué racaláʼdxinu guchéʼnenu Jiobá, naquiiñeʼ gácanu casi Job, laa qué nudxiibaʼ laca laa, biʼniʼ ni jneza ne biá binni. Laabe guniʼbe: «Pa qué ricaadiaʼgaʼ esclavu o esclava stinneʼ ora guedanecaʼ ti queja nezaluáʼ, xi zanda guneʼ ora guiasa Dios [para guni juzgar naa] yaʼ. Ne ora cuídxibe cuenta naa, xi zanda guicabeʼ laabe yaʼ. Ni bizáʼ naa ndaaniʼ jñaa, ñee cadi laaca laa nga bizáʼ laabe la? ne ñee cadi Tobi si nga ni bizáʼ laadu ndaaniʼ jñaadu la?» (Job 31:13-15).
9. Xi qué ñuni Job ca xpinni, ne ximodo zanda chinándanu ejemplu stibe.
9 Ruluíʼ si gastiʼ ley ra caníʼ ximodo naquiiñeʼ gaca juzgar binni ca dxi bibani Job que. Peru ora chuʼ xiixa guendanagana, jneza modo riguíxhecabe gaca chaahuiʼ cani, dede né ca esclavu zanda checaʼ nezalú ti juez. Job qué ñaninaʼ ca binni biʼniʼ xhiiñaʼ, sínuque biabe laacaʼ. Ca xpinni Cristu laaca naquiiñeʼ gusihuínnicaʼ ca guenda ca, jmaruʼ si pa nácacabe binnigola ndaaniʼ neza binni ridagulisaa.
Gudiʼnu ni nápanu ne cadi gachelunu gápanu jma
10, 11. 1) Ximodo nánnanu gucané Job binni ne bidii laacabe de ni napa. 2) Xi conseju ni zeeda lu Biblia zándaca guietenaláʼdxinu ora guidúʼndanu Job 31:16-25.
10 Job gucané binni ne bidii laacabe de ni napa, ne qué ñúnibe ni purtiʼ racaláʼdxibe xiixa para laabe o pur guchelube gápabe jma. Ngue runi gunda guniʼbe: «Pa [...] bineʼ xiixa ni uguu triste lú ca viuda, ne pa stúbesiaʼ rahuaʼ guendaró stinneʼ, ne qué nudieeʼ ca bizabi gastiʼ [...]; pa guyuu biaje biiyaʼ tuuxa cayati pur qué gapa lari gacuʼ [...]; pa guyuu biaje biiyaʼ ti bizabi ra puertaʼ guidxi ni caquiiñeʼ gacanécabe laa, peru lugar de ñacaniáʼ laa laga gundisanaʼyaʼ lú, [pa zacá ni la?] guiaaxha paleta nayaʼ, ne guiluuza dxita nayaʼ de lu xiqueʼ». Job laaca qué ñanda ñuni ni na Dios pa lugar de nuyúbibe ñacané Jiobá laabe ñábibe oro: «¡Lii nga zanda gacaneluʼ naa!» (Job 31:16-25).
11 Ca diidxaʼ ca zándaca rusietenalaʼdxiʼ cani laanu ni guníʼ discípulo Santiagu: «Ndi nga ni na Dios Bixhoze nu: Pa dxandí racalaʼdxi nu guni nu ni na, acané nu ca bizabi ne ca viuda ni cadiʼdi ra nagana, ne ibani nu jneza, ma cadi casi nabani ca binni ni qué rulabi Dios» (Sant. 1:27). Laaca zándaca gucaa cani laanu guiníʼ íquenu lu ca diidxaʼ guníʼ Cristu: «Laguuya gá laatu ne enda ruyubi gapa bidxichi, purti cadi nga si nga enda nabani sti binni». Despué de bidii Jesús conseju ca, guniʼbe ejemplu stiʼ ti hombre ni nabé guchelú gapa jma neca maʼ napa stale bidxichi, peru ora gútibe nácabe pobre nezalú Dios (Luc. 12:15-21). Pa racaláʼdxinu gúninu ni na Jiobá la? cadi naquiiñeʼ chuuláʼdxinu gápanu jma o gachelunu stiʼ binni. Xiñee yaʼ. Purtiʼ ora rachelú binni stiʼ stobi la? reeda gácani casi ti dios para laa ndaaniʼ ladxidóʼ ne maʼ qué ruuyaʼ Jiobá casi Dios stiʼ (Col. 3:5). Nga runi, para sánenu Dios sin guchéʼnenu laa, cadi naquiiñeʼ gachelunu gápanu jma.
Cadi guixélenu de religión ni dxandíʼ
12, 13. Xiñee naca Job ejemplu stiʼ tuuxa ni qué ñuni adorar sti cosa.
12 Ca binni ni runi ni na Dios rúnicaʼ stipa pur cadi gúnicaʼ ni runi religión ni cadi dxandíʼ. Rinándacabe ejemplu stiʼ Job, laa guníʼ: «Pa ñuuyaʼ xpiaaniʼ dxi ora maʼ cuzaaniʼ, o ñuuyaʼ ora maʼ zizá beeu, ne nagaʼchiʼ nucaa ladxiduáʼ naa ñuneʼ xiixa, ne nudieeʼ ti bixiduʼ nayaʼ, cuchee pa ñuneʼ zacá ne naquiiñeʼ ñuni juzgar ca juez naa, purtiʼ ne ni ñuneʼ ca nusihuinneʼ cadi dxandíʼ nuu ti Dios guibáʼ» (Job 31:26-28).
13 Job qué ñuni adorar ca cosa ni cadi nabani. Qué nudiibe lugar nagaʼchiʼ nucaa ladxidoʼbe laabe ñuni adorarbe xiixa ni nuu guibáʼ, casi Beeu. Ora bíʼyabe cani qué nudiibe «ti bixiduʼ» nabe, o qué nundaabe bixiduʼ ra nuu cani para nusihuínnibe cayuni adorarbe cani. Zeeda gaca nga casi ora ñuni adorarbe sti cosa ne nudxiidéchebe Dios (Deu. 4:15, 19). Pa qué racaláʼdxinu guixélenu de Jiobá la? laaca cadi naquiiñeʼ guni adorarnu sti cosa (biindaʼ 1 Juan 5:21).
Cadi guquíxenu ni gúnicabe laanu ne cadi gucáʼchinu tu nácanu
14. Xiñee nánnanu qué niníʼ ique Job mal de ca cosa ni runi binni.
14 Job qué niníʼ ique mal de cosa ni runi binni ne qué ñéchebe ora bizaaca binni xiixa cosa malu, purtiʼ nánnabe zucheenebe Dios pa gúnibe zacá. Guidúʼyanu xi guniʼbe: «Qué ñecheʼ ora binitilú tuuxa ni nabé nanalaʼdxiʼ naa, [laaca] qué ñecheʼ stale pur guendananá ni bigaanda laabe [...] ne qué nudieeʼ lugar nuchee ruaa ora ñuneʼ jurar cosa malu para alma stibe» (Job 31:29, 30).
15. Xiñee cadi jneza guiéchenu ora gúʼyanu gacaná ca binni ni nanalaʼdxiʼ laanu.
15 Cumu runi Job ni jneza la? qué ñuu dxi ñéchebe ora bíʼyabe cayacaná ca binni ni nanalaʼdxiʼ laabe. Gudiʼdiʼ si stale siglu, libru stiʼ Proverbios gudixhená binni né ca diidxaʼ riʼ: «Ora guiaba xhenemíguluʼ, cadi guiécheluʼ; ne ora guirenda ñeebe, cadi guiecheʼ ladxidoʼloʼ, ti cadi guʼyaʼ Jiobá ni, ne qué chuulaʼdxiʼ ni, ne gudxiguetaʼ xiana stiʼ luguialuʼ» (Pro. 24:17, 18). Cumu nanna Dios xi nuu ndaaniʼ ladxidóʼ binni la? rudiibe cuenta pa riéchenu ora gacaná sti binni, purtiʼ qué riuuláʼdxibe gúninu zacá (Pro. 17:5). Tuuxa ni guni zacá, zusabanáʼ Jiobá laa, pur ni na ca diidxaʼ riʼ: «Naa guquixeʼ ni laacabe, ne naa gusabanayaʼ laacabe» (Deu. 32:35).
16. Ximodo zanda guidxaagalunu binni neca cadi ricu laanu.
16 Job laaca nabé galán modo bidxaagalú binni ralidxi (Job 31:31, 32). Neca cadi ricu laanu cásica guca Job que, zanda guidxaagalunu binni galán (Rom. 12:13). Pa guni invitarnu tuuxa para chitó ralídxinu, cadi caquiiñepeʼ gúninu ti guendaró ni nabé risaca. Cadi guiaandaʼ ndiʼ laanu: «Jma galán nga gó binni verdura ne guendarannaxhii, que beela yuze ne guendaracananalaʼdxiʼ» (Pro. 15:17, Versión popular). Dede pa guidóʼnenu ca bíʼchinu ne ca bizáʼnanu ti guendaró ni qué risácapeʼ, zanda chuʼnu nayecheʼ né laacabe ti ratu ne gacanenu laacabe.
17. Xiñee cadi naquiiñeʼ gucáʼchinu xiixa cosa malu bíninu.
17 Ca binni ni biʼniʼ invitar Job ralidxi biʼniʼ sentircaʼ biguidxi fe sticaʼ purtiʼ de guidubi ladxidoʼbe bidxaagalube laacaʼ. Qué ñácabe casi ca hombre ni rucaachiʼ tu naca ni guyuu lade ca binni ridagulisaa lu primé siglu que, laacaʼ «rugá ca binni para si udii laaca ni racalaʼdxi caʼ» (Jud. 3, 4, 16). Laaca qué nucaachiʼ Job ca pecadu stiʼ ne qué niguube guiráʼ cani bicheebe ndaaniʼ «bolsa gamixaʼ» stibe purtiʼ si cadxíbibe maʼ cadi gusisaca binni laabe. Bidiibe lugar guʼyaʼ Dios ximodo nuube ne gúdxibe laa ra bicheebe (Job 31:33-37). Pa chuʼ dxi gúninu xiixa cosa malu, cadi naquiiñeʼ gucáʼchinu ni bíninu para si cadi guiníʼ binni mal de laanu. Naquiiñeʼ gusihuínninu ruzúʼbanu stiidxaʼ Dios ra guininu paraa bicheʼnu, gaca arrepentirnu, guyúbinu gacané Dios laanu ne guni chaahuinu xiixa ni bíninu binni (Pro. 28:13; Sant. 5:13-15).
Bisihuinni Job naca ti hombre ni qué ruchee
18, 19. 1) Xiñee qué zanda guiníʼcabe biquiichináʼ Job binni. 2) Xi guníʼ Job zuni para guihuinni qué huayuu dxi guni xiixa cosa malu.
18 Job guca ti hombre ni qué ribaʼnaʼ ne runi ni jneza, ngue runi gunda guniʼbe: «Pa layú stinneʼ nucaa ridxi naa para ñacaniáʼ laa, ne ñuunaʼ ca surcu stini; pa maʼ gudahuaʼ ca cuananaxhi stini sin niguixeʼ, ne pa huayuneʼ xiixa ni gucaa xpixuaanaʼ ca layú ca guicaaláʼdxicaʼ, [pur nga] lugar de guindani trigu guindani yaga guichi; ne lugar de cebada, guindani yaga guichi ni rindáʼ yuudxuʼ» (Job 31:38-40). Ne ca diidxaʼ ca bisihuinni Job qué huayuu dxi gáxhabe layú stiʼ binni ne qué huaxhiibe nin ti binni runi xhiiñabe. Ne cásica laabe, laanu laaca naquiiñeʼ gúninu ni na Jiobá lu guiráʼ cosa, neca ruluíʼ huaxiéʼ risácacani.
19 Nezalú guionnaʼ xcompañérube ne nezalú hombrehuiiniʼ láʼ Elihú que, guníʼ Job ximodo qué huacheené Dios biaʼ dxi nabani ne casi ñaca ñuni firmarbe ni. Ne casi ora ñuni invitarbe ti xhenemígube para guiníʼ cadi dxandíʼ diʼ ngue qué huacheebe. Pa guihuinni maʼ bíʼnibe xiixa cosa malu la? zudiibe lugar guni castigárcabe laabe. Despué de guniʼbe guiráʼ ni bíʼnibe nezalú Dios la? maʼ chindézasibe xi guiníʼ yanna, ne raqué nga bilúxebe ca diidxaʼ stibe (Job 31:35, 40).
Zanda sánenu Dios sin guchéʼnenu laa
20, 21. 1) Xiñee gunda bizuubaʼ Job stiidxaʼ Jiobá. 2) Xi naquiiñeʼ gúninu para gannaxhiinu Dios jma cada dxi tiidiʼ.
20 Bizuubaʼ Job stiidxaʼ Jiobá purtiʼ nadxii laabe, ne bisihuinni Dios dxandíʼ ni purtiʼ gunnaxhii laabe ne gucané laabe. Ngue runi guníʼ Job: «Guendanabani ne guendanachaʼhuiʼ nga huadiiluʼ naa; ne huayápaluʼ espíritu stinneʼ» (Job 10:12). Peru gunnaxhii Job ca binni ni guyuu gaxha de laa, purtiʼ nánnabe qué ziuulaʼdxiʼ Dios modo runi adorarbe laa, pa qué gúnibe ni (Job 6:14). Zacá nga laani, ca binni ni qué ruchee la? nadxiicaʼ Jiobá ne nadxiicaʼ binni (Mat. 22:37-40).
21 Xi naquiiñeʼ gúninu para gannaxhiinu Dios jma cada dxi tiidiʼ yaʼ. Guidúʼndanu Stiidxabe guiráʼ dxi ne guníʼ íquenu xi cusiidini laanu de laabe. Guni orarnu de guidubi ladxidoʼno para gusisácanu laabe ne gudiʼnu xquíxepeʼ laabe purtiʼ nacháʼhuibe né laanu (Fili. 4:6, 7). Zanda guidúʼndanu diidxaʼ riuundaʼ para gusisácanu laabe ndaaniʼ Yoo sti Reinu ne cadi gusaana de guidagulisaanenu xquídxibe (Heb. 10:23-25). Ne laaca naquiiñeʼ gucheechenu ca «diidxaʼ nacubi ne galán ni rulá» binni (Sal. 96:1-3). Pa gúninu guiráʼ nga la? qué zuchéʼnenu laabe, ne zanda guininu cásica guníʼ salmista que: «Guizáʼ galán runeʼ sentir chuaaʼ gaxha de Dios. Runeʼ cré zanda gapa Jiobá naa, Señor ni jma nandxóʼ» (Sal. 73:28).
22, 23. Bichaaga ca dxiiñaʼ runi ca xpinni Dios ni ruzuubaʼ diidxaʼ yanna né cani biʼniʼ ca xpínnibe ni bibani dxiqué.
22 Lu guiráʼ ca mil de iza ni maʼ gudiʼdiʼ ca, huadii Jiobá gadxé gadxé dxiiñaʼ ca xpinni. Biʼniʼ mandarbe Noé guni ti arca ne chitidxi binni gusaanacaʼ «irá enda ruchee sticaʼ» (2 Ped. 2:5). Gúdxibe Josué uguu ca israelita que lu Layú ni bizabiruaabe gudiibe laacaʼ, ne gunda biʼniʼ Josué ni purtiʼ biindaʼ «libru ra cá ley [...] dxi ne gueelaʼ» ne yenanda guiráʼ ni zeeda luni (Jos. 1:7, 8). Ca xpinni Cristu ni bibani lu primé siglu que naquiiñeʼ gúnicaʼ discípulo ne guidagulisaa gatigá para gúʼndacaʼ Stiidxaʼ Dios ne guiénecaʼ ni (Mat. 28:19, 20).
23 Ximodo rusihuínninu ca dxi riʼ napa Jiobá derechu de guni mandar ne qué zaxélenu de laabe yaʼ. Ra gusíʼdinu binni ni cá lu Biblia, gacanenu binni gaca discípulo, gúninu ni na ca conseju stiʼ Biblia ne guidagulisaanenu ca bíʼchinu ne ca bizáʼnanu lu guiráʼ ca guendaridagulisaa ni rápanu. Guiráʼ cani bizéʼtenu racanécani laanu para gácanu nadxibalú, ruquídxicani fe stinu ne rudiicani stipa laanu para gúninu ni na Dios. Cadi nagana diʼ para gúninu ni, purtiʼ nánnanu cayacané Bixhózenu ni nuu guibáʼ laanu né Xiiñiʼ (Deu. 30:11-14; 1 Rey. 8:57). Laaca nuu «irá ca hermanu» para gacanecaʼ laanu, purtiʼ laaca cayúnicaʼ stipa pur sánecaʼ Jiobá sin gucheenecaʼ laabe ne gusisácacaʼ laabe casi Dios ni jma nandxóʼ (1 Ped. 2:17).
Xi nicábiluʼ
• Ximodo naquiiñeʼ guidúʼyanu ca ley stiʼ Jiobá ra na cadi gúnini cosa dxabaʼ.
• Gunáʼ nga ca guenda stiʼ Jiobá ni jma riuuláʼdxiluʼ.
• Casi na Job 31:29-37, ximodo guca xpiaʼ Job.
• Xiñee rininu zanda gúninu ni na Dios sin gucheʼnu.
[Guendarinabadiidxaʼ stiʼ párrafo]
[Dibuju/foto ni zeeda lu yaza 29]
Zanda guzúʼbanu stiidxaʼ Jiobá cásica biʼniʼ Job
[Dibuju/foto ni zeeda lu yaza 32]
Guiranu zanda gúninu ni jneza sin gucheʼnu