Iö Kewe Aramas Rese Tongeni Küner?

Lon Iurop, emön chinnap fefin a tolong lon eü imwenfel, a chüna epa rosario, me a fotopükütiw mwen liosun Meri fän süföl. Lon Afrika, eü famili a niini sakaw ünükün peiasen emön märäriir mi aüchea. Lon Merika, emön alüwöl a echikefel fän an lükü pwe mi wor pwisin nöün we chonläng mi wisen tümünü, iwe, a äneänei pwe ewe chonläng epwe älisi. Lon Eisia, emön patere a keni taropwe mi ölüwölüwekkis fän iten än aramas asor ngeni ngünün ar kewe lewo.

Met ekkeei aramas ra löllö woon? Iir meinisin ra lükü pwe mi wor iir kewe aramas rese tongeni küner, nge sia tongeni fos ngeniir me ra tufichin siwili manauen aramas. Pwüngün, pwe ese minefö ei lükü, me ese pwal ämäirü. Nge met a ämäirü pwe a wor chommong sokkopaten ekiek usun iö kena.

Chon Muslim ra fel ngeni emön Kot ra kör ngeni Allah. * Aramas mi fiti ekkewe tipitipin lamalamen Kraist ra apasa pwe mi wor ülümön Kot lon emön, weween, Kot Sam, Kot Nau, me Kot Ngünüpin. Chon Hindu ra lükü pwe mei wor lap seni engeröü kot me kot fefin. Ekkoch aramas ra erä pwe mi wor ngün mi nonnom lon ekkoch sokkun man, irä, faü, me chanpupu. Iwe, chommong ra tupulo ren ekkewe puk, kachito, me prokram woon tv usun chonläng mi öch me ngaw, anü me ningüngümeech, kot me kot fefin.

Usun chök a wor chommong sokkopaten ekiek usun ekkewe kot, a pwal wor sokkopaten ekiek ika epwe ifa usun sipwe arap ngeniir. Ese pwüng meinisin ekkena ekiek. Äwewe chök: Me mwen sipwe kökkö woon phone, a lamot pwe sia silei emönnewe sia kökköri, me sipwe lükülükü pwe mi wesewesen wor ena aramas me epwe etiwa ach kökköri. Mi lamot mwääl ach sotun le fos ngeni emön sia chök anchangei. Nge sipwe tongeni feiengaw ika sia fos ngeni emön mi otuputup.

Iwe nge, iö kewe aramas rese tongeni küner? Ewe Paipel ese chök pölüweni ei kapas eis nge a pwal äweweei iö sipwe fos ngeni me ifa usun epwe pölüwenikich. Sopwelo le älleani ekkena lesen mwirin ei. Eli kopwe mäirü ren met ewe Paipel a affata.

[Pwóróus fan]